الفزعة ...دلوني على طبيب اطفال

[موبايل]

المستشفى زحـــــــــــــــــــــمـــــــــــــــــــة وإذا جاك الدور تفاجأ بطبيب دون أدنى مستوى وتخصص عـــــــــام لأن الشركة المشغلة ماعنده استعداد تجيب طبيب جيد لأنه مكلف عليه .
،
،
،
طيب وين نروح
نروح مستوصف خاص ؟ ؟؟ ماعندنا مستوصف موثوق بل همهم المكاسب المادية والشهرة السريعة يعني ممكن الطبيب يعطي الطفل علاج يقضي على المرض لكن على حساب الطفل المسكين وقد حصل لي ذلك مع الطبيب ممدوح بمستوصف +++++ وثبت لي ذلك عندما عرضت علاجه على طبيب عام أثق فيه ... قال لي أعوذ بالله من اللي صرف لك هالدواء هذا مايخاف الله ....
،
،
وش الحل ياجماعة اطفالنا فقدوا المناعة واصبحت اجسامهم قابلة للمرض عند اي هبوب شمال او آيسكريم او أي فايروس عابر وكل هذا من ضعف الثقافة الصحية عندنا وعند حريمنا ناهيك عن هالأطباء المحسوبين على الطب ...
آمل من الذين لهم تجارب ناجحة مع اطباء اطفال ان يسعفونا باسماءهم ولهم منا الدعاء

.
.
.

[(الراسي)111]

الدكتور ممدوح ........... مستوصف +++++وممكن يستدعونه لك إسعاف بعد بحق أحسن دكتور اطفال ببريده
مع تمنياتي لطفلك بالشفاء العاجل وجميع مرضى المسلمين

[موبايل]

الراسي 11
شكراً لمداخلتك وليتك تقرأ موضوعي مرة ثانية

[العشة]

على ما أذكر فيه طبيب أطفال ممتاز في مستوصف العضيب لعلك تجد ما يسرك لديه .. ولا أدري هل هو موجود حاليا أم لأ ..
هذا جهد مني هادفا تقديم ما أعرفه ..

[أبو لجيــــن .فهد]

الاخ الرفيق موبايل
السلام عليكم ورحمه الله وبركاته
لقد حركت موضوعا ذا شجون ياصاح :)
ولكن كقاعده عامه المستوصفات الخاصه ماديه بحته والاهتمام الظاهري (مهنه)
والمستشفيات العامه وظيفه والانجاز بلا معنى اذا ليش الاخلاص مره !!!!
حتى ان المستشفيات صرت تعرف نوع العلاج قبل تجيهم .... مع سبق الاصرار والترصد
الاخ الدكتور ممدوح نقدره كشخص ولكنه كطبيب مثله مثل غيره الا اللهم ان به ميزة وهي
((حسن الاستماع لوالد الطفل )) فهو يستمع لك لو تحدثت شهــــرا وهذا مايجعل العامه يميلون اليه
... دكتور المحيميد المشهور ماادري وش اسمه ايضا له احترامنا الا ان اسطورته لا تعدو كونها لعدم وجود البديل
واشتهر عنه كثرة الفحوصات والتحاليل المبالغ فيها وكان التشخيص لايثبت الا بتحليل ملغيا بذلك عنصر الخبرة الذي
يجعله يعلم مالمشكله قبل ان تتحدث امامه لاسيما وان لديه يوميا حوالي 50-60 حاله اضربها في شهر ؟؟؟

نصيحه عامه مهمه :
1-انتبه من شي اسمه (مضاد حيوي ) بكافه انواعه
2- معظم امراض الاطفال واضحه وعلاجها له بدائل بالبيت ابتداء من فيفادول الحراره الى ينسون الامساك
الى بعض الادويه الشعبيه كالعنزروت للبطن والكاثه الخفيفه مع القهوه للبلغم وفيتامين سي عموما للمناعه
وغيرها من الأشياء البسيطه ومحاذير المثلجات والبرد والدسم الزياده ..أشياء من ماينفع ولايضر ...
مع الابتعاد عن البرد وان غلبت الروم فالتهاب الجهاز التنفسي له البخار بالبيت والا جرعه بخار بالمستشفى ربع ساعه
... ولايهمك بعدها العلاج اللي يعطيك الدكتور لان كلـــــــــــــه هيلمه :)
3-استرجع ذكرياتك وذكرياتي بعقلانيه
(نروح نركض بالليل بالطفل للمستشفى وساعتين واخرها فيفادول ومضاد الهيستامين ويمكن شويه بخار ..والا تحميله ))
ماتلاحظ ان كلهن ببيتك حتى البخار بالبريق وصلى الله وبارك ((اذن انا وانت ليش نركض الســــــــاعه 2 بالليل ))
انه العامل النفسي ليس الا ...!!!!ونحس انا حلينا المشكله وهي اصلا محلوله ؟

هذه بعض الفضفضه وهذا غيض من فيض ومن هنا لهناك لكم اجمل التحايا

[(الراسي)111]

اخي موبايل :
انا فهمت انك بحاجة إلى طبيب اطفال ولم اشاهد ملاحظتك على الطبيب ممدوح .................

عموما :: انا وصفت لك هذا الطبيب لسبب ... ان لدي طفله عانيت من مرضها بصغرها لارتفاع بدرجة الحرارة مستديم حتى إني ذهبت بها إلى الرياض ، ووصفه لنا احد الأخوان وهو الذي اكتشف مرضها وأعطانا العلاج وكان سبباً سخره الله لنا في شفائها مع إننا نسمع بشهرته الآن والناس شهداء لله على ارضه ....
وأنت حصل لك ماحصل .. عموماً شفى الله مريضكم وعافاه ......... لكن ترى بعض الأطباء لايقبل دواء من قبله ,,, والنهايه صحتنا

هذا ما أردت توضيحه وشكراً

[فارس الميدان]

افضل علاج اطفال في مستوصف المحيميد الاهلي

هناك افضل شي حق الاطفال

دمت بود







فارس

[ATC]

اخوي موبايل رح الى مستشفى البركة اللي بعنيزه اذكر ان الكادر الطبي ممتاز واتمنى لطفلك الشفاء العاجل

[بنت أبو عبد الله]

أنا سمعت عن الدكتور محمد (على ما أظن) بمستوصف رشيد
عالج أحد أطفال قريبتي من مرض طالما ترددوا فيه لمعظم مستوصفات و مستشفيات بريدة

[سنافيه]

تدري وش وصفتي لعيالي دايم ...

ابدا من الفيفادول والتحاميل والهستوب واذا اشدة الحاله وكان لابد لها من مضاد وخاصة لصار التهاب شديد لانه مايصلح نتركه لان المضاد على مضاره اهون من مضار اللتهاب والصديد الى يسبب رومتزم القلب ويتعب الكلى ..اصرف له انا نفسي دون الرجوع الى طبيب وهو مضاده الى كل ماراحت للطبيب صرفه له ومريحه نفسي الا اذا الاعراض مو لوز وزكام مثل المعتاد فذيك الساعه مظطره اوديه لدكتور ..

وعلى فكره ترى العسل الاصلي والحبه السوداء تقوي المناعه دوام عليها مو للسخن طفلك لا وهو طيب استمر عليها ,,,,,,

تحيتي للكل

تحيتي لك

[عبدالله الحلوه]

اخي العزيز موبايل

اصبحنا بكل اسف اطباء بالخبره اكثر من الأطباء انفسهم

اليوم لاتسأل عن افضل طبيب بل اسأل عن افضل صيدلي !!

نعم الصيدلي اصبح اكثر اهمية اذا ماكانت لديه الخبره والقدره على معرفة العلاج المناسب


وعلى فكره الدكتور ابراهيم في مستوصف المحيميد يحظى بسمعة طيبه وسبق لي مراجعته ويتميز بوصف الحليب المناسب للرضع


تقبل تحياتي

[البرنس 2004]

الله يشفي مريضك

[هادي الطبع]

افضل علاج اطفال في مستوصف المحيميد الاهلي

هناك افضل شي حق الاطفال

دمت بود







فارس



صدقت والله اخوي فارس وفيه ايضاً دكتور عام اسمه احمد هيكل مراح يقصر وراعي ذمه هو

[فراشة الالماس]

الله يشفي مريضك

[موبايل]

أشكر الجميع على حسن مداخلاتهم وجميل تعاونهم
ولقد استفدت من التوجيهات المطروحة لاحرم الله اصحابها الأجر والثواب وألبسنا وأياهم لباس العافية
.

لقد صدقت أخي عبدالله الحلوة حينما قال لقد اصبحنا اطباء بالخبرة ..... كثرة مراجعاتنا للأطباء صنعت منا أطباء دون شهادات ولا ينقصنا الا الأدوات اللازمة للكشف .
.
. كان في بريدة طبيب اسمه فايز الزعبي قليل الكلام ....تشخيصه دقيق.... يرفض أحيانا الموافقة على المراجعة من ثقته بتشخيصه .... وصفته لايتجاوز مبلغها
20 ريال ..... كشفيته 30 ريال .... الأثر الطبي فعّال ومطمئن وموثوق
لكن للأسف رحل الى بلادة .

[راعي الحق]

اهلين اخ موبايل...زوجتي حفظها الله ام فريح النسخة المطورة,,,,يعني تشخص المرض وتصرف العلاج احيانا...ومع ذلك الورعان دايم مصاخين واحد صدر الله يشفيه وحساسية والبنت مغص واذان...يعني اذا صخن حدى ورعانك فنحن بالخدمة...

واما عن افضل دكتور ببريده فهو حاليا زياد بالطب الشامل دقيق وفاهم شغله لكن عيبه اسعار الكشف اعلى من غيره بحكم انه استشاري..
وفيه دكتور بعيادات المستقبل علاجه موافق باذن الله بس انه يبي تنغيز ...مره رحنا بالبنت كشف على صدره قال عاوزه بخار بس قلنا مابها شي ثاني قال لا ...عاد ام فريح ماصبرت كالعاده عجله الله يهبطه بذكره قالت اكشف على اذانها قال آه صحيح فيها صديد وصرف لها مضاد...بس من جد علاجه زين

[رارا الناصر]

أخي العزيز ..

فيه دكتور أخصائي أطفال ممتاز .. أسأل مجرب ولاتسأل طبيب
لكن ما أعرف أسمه بالضبط ..


دمت بود

[تاج القصيم]

المشكلة في مستشفى الولادة والأطفال الزحمة الشديدة التي لفاتبين لنا امكانيات الأطباء في الإسعاف مع يقيني التام أن فيه نخبة مميزة ولكن الشين يخرب سمعة الزين هناك

[خطر125]

اخي العزيز
عيبنا اننا كثره تغيير الاطباء وهذا غلط لان كل طبيب سوف تذهب لمه سوف يعيب بالتشخيص والدواء الذي صرف من قبل ليثبت لك انه هو اافضل حتى لو كان طبيب حكومي
فنصيحتي ان تبقى على طبيب واحد تثق به وانشاءالله تجد الشفاء من عند الله اولا
اما انا اثق في اخصائيه الاطفال اللى بمستوصف العضيب شارع الاماره
وتمنياتي لك ولمريضك بالصحه والعافيه

[ملاك القصيم]

أثنا عادتي اطال الله بعمري بتصفح المنتدى قريت موضوع الاخ العزيز ( موبايل ) ومعاناته مع أطباء الأطفال وان دل على شي يدل على كثرة شقا البزارين الله يعين المهم ومع الدفاء اللي نشوفه بالمربعانية أكيد كل بيت وفيها زكمة ولوز وبزارين تصيح والام تقول ( يا كوكو )<|---- +++ اسم الدلع بلا فخر

افتحوا درج العلاجات اللي بالمطبخ والا بالصالة عطوه فيفادول وهستوب اللي يصرفة مستوصف الحارة الدكتور + + + + واما لقيتوا دوروا لنا واسطة بالمستوصف يدبرنا بقوارير علاجات 00 ونرجع نقوله يمه مافية هستوب تقول الام الحنونه ( ادهنوا ) حلقه بأبوفاس ولبسوه شراب ودلجوا حلقه بزيت زيتون وتطلع العمه تقول لا لا لا مايصلح زيت الزيتون إنه يجيب مرض السرطان أن رفيقة دربه ( ام صالح ) تقول ان مرت عمنا تقول انه تعرف وحدة بالخبوب تعالج بالاعشاب وعلاجه وحده بوحده وانه من الزحمة ماتقدر تحك راسه ومالكم بالطويلة لأن هذي اسرار منزلية وابوي يقول لاتعلمون وش نسوي بالبيت المهم قلت ابشوف المنتدى بطرح الموضوع للنقاش قريت دكتور المحيميد وحفت من اللي يقال وبصراحه حبيب دكتور ( راعي الحق ) اللي ينغز بعيادات المستقبل قلت اخاف نروح ونجلس طول الليل ننغزه عشان يقولنا وش بأختى وابفتح له أذانه يشوف وش به ومن حب الاستطلاع قلت لابوي ابروح معكم ( شرافة اكيييييد ) دخلنا والا هااك الدكتور صراحه حبيب مرررره وطيب وعلاجه الحمد لله جاب نتيجه



هذي قصتي ونتمنى للجميع الشفاء العاجل

[موبايل]

يعطيك العافية ملاك القصيم
والله انا اروح هالوقت وبدون مبالغة مرتين يوميا للصيدلية وتحميل علاجات .... واليوم قلت للمدام شيلي كل العلاجات اللي بالثلاجات خل نجدده ،، ولقينا هوايل
اميدرامين ، زرتيك ، برنشيكوم ، راينوفد ، فلوميد ، هستوب ، ريموكس ، سابوفين ، فيفادول ، جلفاموكس ، فير موجلوبين ، سيدوفان ،ميكسافيت ، ..... الخ
معقولة هاللي يصير !!!! هل وصلنا لمرحلة الوسوسة كل ما كح الطفل او ارتفعت حرارته حملنا اكياس علاجات ؟
المشكلة القائمة اللي ذكرت كلها لالتهابات الحلق والكحة ومايصاحبها .
والله اني كنت ناوي ارجع أثير الموضوع بس خفت يقولون وش هاللي اشغلنا عند رضاعينه .

[ام عبدالله2]

معاناه كل اب وام ذا الوقت والله ذا الوقت كل البزارين رايحين فيها من البرد وما فيه امل تلقى دكتور الا استثني الدكتور الى بمستوصف المحيميد

ممتاز وعن تجربه بعد الله سبحانه وتعالى هو الى بتستفيد منه

[المهره]

مافيه غير الدكاتره هالسعوديين بمركز الحبيب الطبي بالرياض الله يخلي لنا عيالنا والله قمة الاخلاص والقناعه وعدم التهويل بس لو الكشفيه ارخص شوي وقربون شوي ويصيرون بالخبيب خخخ خخخ خخخ
مره وديت ولدي لمهم وتصدقون ان الدكتور احمد العرفج مره واحمد العمار مره ثانيه ماعطوه غير علاجه اللي معه ونقط للانف وقلت له غير المضاد قال مافيه احسن منه بس استمري عليه
وفيه دكتور مشهور قال لرفيقتي معلومه قال: اذا الطفل كان مرضه افقي (يعني لوز او اذان) فلابد من المضاد اما اذا كان مرضه عمودي ( يعني حلق وانف ) مايحتاج الا للفيفادول فقط
وقال له بعد لو طفلك بدا يتعب حاولي تعطينه الفيفادول زي المضاد يعني كل 6 ساعات ممكن مناعته تقضي على الفيروس ومايحتاج مضاد
الله يشفي عيالنا وعيالكم امييين

[نبض القلـم]

خخخخخخخخخخخ

الدعوى صارت أفقي وعمودي بعد !!!!!

أقول كلش يصير بهالزمن !!

تبزعون وتتخيلون أنفسكم مهندسين وتقضون جدار وتبنون جدار .. مقبولة !!

تتصورون أنفسكم فاهمين الرياضيات الحديثة وتسوون أنفسكم مدرسين لعيالكم وتخربون كل جهد الاستاذ الي منشق حلقه بالفصل ... نمشيها !!

بس عاد تعتبرون أنفسكم دكاترة .. صعبة شوي وما تنبلع !!

يا ناس .. يا عااااااالم ... يا هوووووه ..

ترى هذي صحة .. صحة .. فاهمين وش معنى صحة؟!!

وصحة مين ؟!!

صحة عيالكم .. فلذات كروش حريمكم !!

يعني أمانة بارقابكم لما يوم القيامة ..


فتكفون بلاش استهبال واستهتار وصرف ادوية بلا استشارة ..

وبلاش بخل وادفعوا قروش الكشفية .. لا تاخذونها من قاصرها للصيدلي وأنتم كلكم ثقة بـ ( خبراتكم بالصخاين والأمراض ) !!!

لأن فيه شي اسمه التهاب .. وفيه شي اسمه احتقان ..

وفيه ارتفاع حرارة .. وفيه انخفاض ..

فلا تبزعون بشي ما يعرفه الا ( الطبيب ) ومن خلال الكشف السريري ( فقط )!!!!