لـــــــــــو كنتي رومنسية ومتزوجه واحــــــــــــــد جفس !!! [الأرشيف]

فارس الميدان

29-11-06, 03:34 pm

بسم الله الرحمن الرحيم

السلام عليكم جميعاً

في هالوقت البنات صارت اكثر رومنسيه من قبل .. يمكن عشان الاعمال الشاقه التي كانت تجعل المرأه اكثر خشونه قد اصبحت سهله وجميعها منفذه من قبل الخدم او ماشابه ذلك ..

المهم
..

المرأه اصبحت تهتم بشكلها لكي تجعل من نفسها نعومه وجمال ورومنسيه اكثر
سؤال ---> لو كانت وحده ناعمه ورومنسيه وتزوجت واحد جفس !
يعني خشن وتصرفاته حاده شوي وطبعه حاد من النوع القديم شوي وش راح يكون وضعك معه ؟

والبنت العكس ناعمه ورومنسيه وصاحبة اتكيت وحركات .. بالله وش بتسوي مع هذا الرجل ؟

هل تستمر في معيشتها معه ؟
او سوف تطلب الطلاق ؟

هذي زبدة الموضوع

__________________________________________________ _____________________________

هذا القسم لا احد يقراه الا اذا كان فاضي بقوه

يحدثني واحد من اصدقائي عن سالفه ضحكتني شوي .. يقول :

فيه واحد جفس جفس بالحيل مع زوجته وفوق هذا كله ميت قلبه
من شدة موتت قلبه يشتغل في قسم الموتى في مستشفى التخصصي
وزوجته العكس رومنسيه فوق الزوم وبيتها كله شمعات واسلوبها مره هادي وااااااو مره كيوت وحالتها حاله
المهم !

يقول صديقي ان البنت حاولت كثير انه تعدل فيه وما قدرت .. حتى طبعه زي الشيبات يبي قهاوي بالطلعه والدخله وبايع الدنيا بشراره ..
المهم يقول مره من المرات زوجها راح الدوام كلعاده واخذ لفه على الاقسام عشان يسأل
فيه احد ميت او لا ؟
بعدين لما جاء الحضانه وسأل فيه احد ميت قالت السستر (ممرضه) يس يس فيه بيبي موت
اخذ البيبي الميت وكان (فرط) صغير بالحيل المهم اخذه وحطه في مخباته من شدة انه متعود
وقال في نفسه اذا رحت المكتب اسوي اجرأه واخلص اموره واروح ادفنه

بعدين نسى انه حط الميت في مخباته وراح البيت

جت زوجته الكتكوته
وقالت تراني بفرغ ثوبك عشان اوديه غرفة الغسيل .. لما فرغة ثوبه وشافت شي ملفوف في قماش ومحطوط في كيسه استغربت .. قلبت الكيس ومافهمت وش الي جواته
راحت لزوجها وقالت وش الكيس هذا الي معك في مخباتك حاطه ؟

مسك راسه وقال يووووووووووووووووووووه نسيت اودي الميت ادفنه
زوجته اغمي عليها لما عرفت ان الي قبل شوي في يدها كانت ميت صعيييييير

سؤال ----> ماهو شعورك لو كنتي مكانها ؟؟؟
____________________________________________

فيه واحد ولد الرزقان هذا ميت قلبه في مستشفى التخصصي في بريده قسم الموتى
من شدة موت قلبه
قد مره راح بيودي جثه في السياره من القصيم للرياض عشان طالبينها تشريح وعليها قضيه
الجثه اذا طلعوها من الثلاجه تكون جامده بالحيل
ولد الرزقان هذا اذا مسك الخط يفتح الجثه ويحط فيها ببسي ومويه عشانها ثالجه والببسي والمويه ماتسخن
تخيلو يحط بين الجثه وفي حوايفها .. هههههههههه
وكل شوي يمد يده على التابوت وياخذ مشروب من الي حط جنب الميت وعععععععععع

تخيلت الذاهبة هذا زوجها هههههههه
الذاهبة من شدة الخوف من الموت لها يومين ماتدخل المنتدى تخاف عشان الي صار
عاد كل الي من جنس الذاهبه مايحبون ذكر الموت مدري ليش ..

فارس

الذاهبة

29-11-06, 10:36 pm

مرحبا بك فارس الميدان

أولاً تشكر يا استاذي على النشاط و النفسية الحلوة و محاولة رسم الابتسامة و الضحكات على شفاهنا

الله لا يغير عليك و يديم عزك

ثانياً .. بالنسبة لــ صلب الموضوع .. و الله عن نفسي أنا ما أفضل الرجل الخيخة النعومه

ما ينفع ذا

كل ما كان خشن كل ما كان احسن

و لكن الرومانسية مطلوبة طبعاً .. بس مو على طول ..

أهم شي يكون شجاع و قوي و صنديد و نفس الوقت : قلبه طيب و فيه رحمة ..

ثالثاً و الله يا فارس قطعت قلبي من الخوف .. بصراحة ما اصدق فيه بني آدمين كذا ..

اممما شايل بجيبه ( جثة ) طفل !!

زين ما غسلت الثوب و هو فيه ..

بصراحة هذا ينخاف لا يقتل زوجته .. قلبه مو ميت و بس !

تحياتي ..

نـدى الـورد

29-11-06, 10:50 pm

رجالنا كلهم حنان ورومانسيه
من يقول انهم جفسين صحيح العالم ماتخلي احد بحاله

ايه با الحيل كثري منها ياحبيبتي

/

شوف الفارس

احنا في مجتمع قبلي

يعني ماافيش اذا هذا ماعجبني بروح واتركه

الزواج مو لعبه بصراحه

وكثير بنات رضوا تزوجوا رجال جفسين مثل ماتطرقت وقلت

لانها رضت بقسمتها ونصيبها

واعتقد ان البنت اذا لقت شخص يحترمها مو شرط يكون رومنسي

تستمر معه لانه بيكون افضل من مية رومنسي غير سوي

ويأتي هنا دورها بانها تحرك مشاعره بأمور من الممكن تغيره مع مرور الوقت

شاكره لك الفارس

على اهتمامك بمشاعر الفتيات

.

راشد الصليحان

29-11-06, 11:52 pm

المشكلة إذا كانت المرأة جفسة !!

او تكون ماتشم مسكينة تحط العطر وريحتهاصنان !!

او ذوقها خطأ ...مهما تعلمت ! تظل كما هي مستحيل تتغير !

اما الرجل( ينبلع ) مهما كان وضعه...

بدرالوابلي

30-11-06, 02:02 am

تدرون ليش حنا جفسين ؟؟؟؟؟؟؟؟ ومانعرف شي أسمه رومانسيه بصراحه !! لأننا ......ماش ودي أكتب بس ماركزت بجنبي واحد بالكوفي أنترنت أحتريه يوخر ؟؟وأبوالشباب جادع خشته معي !!هذا اللي يجيك من الكوفي أنترنت ؟؟ يازين البيت بعد ...راجع لكم أن شاءلله .

لمبة شارع

30-11-06, 11:07 am

كل نساء العالم يافارس رومانسيات .. هذا من حيث المعنى الذي نفهمه لكلمة رومانسية وهي_ طغيان الجوانب العاطفية في تشكيل وبناء الشخصية وتأثر القرار العقلي وفقا للنزعة العاطفية للشخصية _..ووفقا لهذا التعريف فنساء العالم كلهن رومانسيات قياسا بالرجال وبالتالي ففي المجمل فإن نساء العالم كلهن تقريبا يشعرن بتقصير ازواجهن في اشباع الجوانب العاطفية عندهن على الدوام_اعني انهن لايشعرن بالاشباع طول الوقت....
الامر الآخ انني تعرفت اليوم على هذا المصطلح الجديد _جفس_ منك يافارس وللاسف انني اسمعه (أو أقرؤه) لأول مرة ..لقد مر بي من قبل مصطلح مشابه _جفش_ او _جلف_ او _فض لكن لايهم فالمعنى واضح والقصد ان المرأة اكثر ما ينمي فيها شعور الميل الى زوجها هو جاذبيته الذكورية بالدرجة الاولى عبر كل اشكالها السلوكية وفي حكاية عامل مغسلة الموتى التي اوردت تبدو لنا شخصية رائعة جدا ومليئة بعناصر جذابة ...صحيح ان النساء يفضلن في شخصية ازواجهن مسحة من الرقة والعاطفية السلوكية لكن ذلك لا يرضيهن على الدوام إذ يضل الرجل المتمتع بخصائصه الرجوليه هو محور دائرة المرأ ة....

القصد يافارس ان ماقد يبدو لنا بحجم جامبو قد يكون في حقيقة الامر في حجم مايكرو .. ولكننا نكون قريبين جدا من الصورة فلا نرى بقية مكونات اللوحة ثم لانستطيع قياس حجم الاشياء ونسبة بعضها الى بعض...

:: ابعـاد ::

30-11-06, 12:36 pm

.
راشــد
.

او تكون ماتشم مسكينة تحط العطر وريحتهاصنان !!

الله يحوم كبدكـ

اما الرجل( ينبلع ) مهما كان وضعه...

كيف يعني ينبلع وريحته لاتطاق ؟ ! مااظن

**************************

ليس لدي خبره في مثل هذه الأمور

ولكن من الواجب فصل الرومانسيه عن النعومه والتأنث من قبل الزوج

لأني ارى خلط بالمفاهيم هنا

رومانسي نعم

ناعم لا او نعم ولكن بحدود

.

ابعـــاد

.

ابعـــاد

صحيــح كــلامي يحــوم الكبــد !

لكن هذي حقيقــة يعاني منها الرجــال

بســبب بعض النســاء !

اما الرجــل كيف ينبلع !

المراة تقبل بزوجها في اي صورة كان ...إذا هي احبته !!

شكــرا

راشد الصليحان

30-11-06, 02:27 pm

.
راشــد
.

الله يحوم كبدكـ

كيف يعني ينبلع وريحته لاتطاق ؟ ! مااظن

**************************

ليس لدي خبره في مثل هذه الأمور

ولكن من الواجب فصل الرومانسيه عن النعومه والتأنث من قبل الزوج

لأني ارى خلط بالمفاهيم هنا

رومانسي نعم

ناعم لا او نعم ولكن بحدود

.

ابعـــاد

.

ابعـــاد

صحيــح كــلامي يحــوم الكبــد !

لكن هذي حقيقــة يعاني منها الرجــال

بســبب بعض النســاء !

اما الرجــل كيف ينبلع !

المراة تقبل بزوجها في اي صورة كان ...إذا هي احبته !!

شكــرا
ابعـــاد

لم يحدث نعديل على ردك السابق

إنما دخول بالخطأ !

ابــعــــاد

صحيــح كــلامي يحــوم الكبــد !

لكن هذي حقيقــة يعاني منها الرجــال

بســبب بعض النســاء !

اما الرجــل كيف ينبلع !

المراة تقبل بزوجها في اي صورة كان ...إذا هي احبته !!

شكــرا

@ ابتسام @

30-11-06, 03:07 pm

الحريم الكبار دايم يقولن ... الحب يدفن الجفر ... :20[2]:

واظن انهن مصيبات. :19[1]:

توضيح لغير الناطقين بالقصيمية ؛؛؛ يعني اذا حبت البنت زوجها بتتغاضى عن عيوبه ويمكن تقلبها لحسنات ومنها

الجفاسة :10[1]:

وحده زوجها جفس بس تحبه لما سألوها عنه قالت ياحبيله ما يدري وين الله حاطه .. ترى تمدحه الحين هي :ash:

....e7sas

30-11-06, 03:28 pm

أهـــــــــــــــلا فارس .... بصراحه النماذج اللي ذكرتها مو بس أشخاص جفسين إلا قلوبهم ميته الصلابه اللي فيهم متعديه حدودها.. يعني الحياة معاهم فقدت رونقها ، وأنا ما أقول إن الفتاة تبي إنسان دلع ، لكن تبي شخص لطيف ، يحترم رايها ، ويقدر مشاعرها ، ويحترم أحاسيسها ، لإن النساء عاطفيات من الدرجة الاولى.. بعدين أشخاص يتصفون بالأوصاف اللي ذكرتها ما أعتقد أن إنسانه ضعيفه راح تقدر تأثر فيه ، بالعكس هو اللي راح يؤثر فيها بعد ما يكرها الحياة (هذا إذا أستمرت حياتها معاه)،
أما ياأخ راشد .. شوي شوي على عمرك ولا توهقها زياده، أعتقد هذا رأيك الشخصي البحت أن ( الرجل ينبلع أيا كان حاله )

Thanx a lot

فارس الميدان

01-12-06, 12:35 am

روح مرتاحه

جفس!!!!!!!!!!!!!11
ايش يعني جفس؟؟؟؟؟؟؟؟؟؟؟؟؟؟؟

اصلا هالكلمه مو موجوده بقاموس حياتنا مع رجالنا فديتهم

رجالنا كلهم حنان ورومانسيه
من يقول انهم جفسين صحيح العالم ماتخلي احد بحاله

ولا رجالنا وين والجفاسه وين؟؟؟؟؟؟؟؟؟؟

نورتي روح مرتاحه

بالله وبأمانتك ماتعرفي كلمة جفس

احسها دارجه عندنا

جفس يعني مثلي انا

على فكره انتي طبيعتك انسانه مداحه

اجل رجالنا كلهم حنان ورومنسيه .. بالحيل بالحيل

لا تنسي انك في ربوع القصيم

فارس

فارس الميدان

01-12-06, 12:49 am

الذاهبة
مرحبا بك فارس الميدان

هلا هلا الذاهبه

وينك انتي فاتك نص عمرك .. فتح منتدى اسمه منتدى بريده .. وفيه ناس وصجه ولجه وسوالف وحكايا واخبار .. وانتي نااااايمه بالعسل .. اكيد غسان ولدك شاغلك ..

أولاً تشكر يا استاذي على النشاط و النفسية الحلوة و محاولة رسم الابتسامة و الضحكات على شفاهنا

الله لا يغير عليك و يديم عزك

الشكر والعز في طلتك على الموضوع طال عمرك .. مو انا ولمبة شارع فاقدينك هالفتره

ثانياً .. بالنسبة لــ صلب الموضوع .. و الله عن نفسي أنا ما أفضل الرجل الخيخة النعومه

ما ينفع ذا

كل ما كان خشن كل ما كان احسن

و لكن الرومانسية مطلوبة طبعاً .. بس مو على طول ..

تدرين وش مشكلتي الذاهبه ؟

اني ماوضحت كلمة جفس التوضيح المعني به

عشان كذا انتي حكمتي عليها انها ضد النعومه .. اكيد الرجال مو حلو يكون ناعم عشان يكون هو اختيارك

أهم شي يكون شجاع و قوي و صنديد و نفس الوقت : قلبه طيب و فيه رحمة ..

الذاهبه شجاع وقوي وصنديد هذي كلها معنى واحد او صفه وحده

بالله قد شفتي شجاع خيخه ؟
او قوي بس ضعيف

حتى الي قلبه طيب هذا من زود رحمته صار قلبه طيب

قد شفتي واحد قلبه طيب بس مايرحم ؟ .. اكيد ما تجي

او واحد رحوم بس قلبه مو طيب ؟ .. وهذي ما تجي

الذاهبه احلفي انك ما افطرتي فول

اشكر لك تنوير موضوعي

فارس

إخلاص

01-12-06, 01:02 am

أعتقد ان الطلاق مصيرهم ... الا اذا لمست فيه الاحترام لها والود
فإنها ستصبر على جفاسته
ستحاول تغير فيه

فارس الميدان

01-12-06, 01:14 am

سكون الليل

شوف الفارس

هلا السكون

مو حلوه السكون صح ؟

احس ان هذي مالها داعي ( الــ )

(سكون) بدون ال كذا بتكون احلى

عشان نفس الشي الفارس مو حلوه

ياليت تحذفي الـ

احنا في مجتمع قبلي

يعني ماافيش اذا هذا ماعجبني بروح واتركه

سكون ماعليش بس ابي افهم قبلي يعني وشو ؟

فيه مجتمعات قبليه وتتخير وبكل ثقه وبدون معارضة احد

الزواج مو لعبه بصراحه

وكثير بنات رضوا تزوجوا رجال جفسين مثل ماتطرقت وقلت

لانها رضت بقسمتها ونصيبها

واعتقد ان البنت اذا لقت شخص يحترمها مو شرط يكون رومنسي

ههههه تدرين ليش تقنعي نفسك بقولتك مو شرط يكون رومنسي ؟

لان البنت الي تقول في الاول مغصوبه .. يعني لو فيه عيوب الدنيا بتقول اهم شي الاحترام حتى لو مافي توافق

بس هذا بالنسبه لي شي حلو .. لان البنت الي من هالنوع هذي جداً قنوعه ومتنازله ..

تستمر معه لانه بيكون افضل من مية رومنسي غير سوي

ويأتي هنا دورها بانها تحرك مشاعره بأمور من الممكن تغيره مع مرور الوقت

سكون كلامك فيه تناقض غريب !!

اقولك ليش

انتي تقولي لانه افضل من مية رجال رومنسي غير سوي .. ليش قلتي ان الرومنسي مو سوي وحطيتي 100 واحد عشان تكسبي تغيير بالرجال بطريقتك الرومسيه السويه ؟؟؟

مع انه الرجال هو الي يغير الحرمه مو العكس

سكون الرومسيه يجب ان تكون من باب لطف اي انه رجل سوي

والميه الي قلتي هذولا مو رومنسيين عشا يكون احلى منهم

اشكر لك حضورك

فارس

فارس الميدان

01-12-06, 01:23 am

راشد الصليحاني

المشكلة إذا كانت المرأة جفسة !!

او تكون ماتشم مسكينة تحط العطر وريحتهاصنان !!

او ذوقها خطأ ...مهما تعلمت ! تظل كما هي مستحيل تتغير !

اما الرجل( ينبلع ) مهما كان وضعه...

هذا واحد جفس
:17[1]:

راشد وشو صنان

والله ان الي فيه صنان ماينبلع لا رجال ولا حرمه ياراشد

وبعدين الي فيه صنان هذا مو جفس

هذا وصخ

فارس

فارس الميدان

01-12-06, 01:28 am

بدرالوابلي

تدرون ليش حنا جفسين ؟؟؟؟؟؟؟؟ ومانعرف شي أسمه رومانسيه بصراحه !! لأننا ......ماش ودي أكتب بس ماركزت بجنبي واحد بالكوفي أنترنت أحتريه يوخر ؟؟وأبوالشباب جادع خشته معي !!هذا اللي يجيك من الكوفي أنترنت ؟؟ يازين البيت بعد ...راجع لكم أن شاءلله .

على العموم خلك عجل ترا يمكن تجي بكرا تفقدني
خبرك الدنيا توحش والموت كثر في هالايام

فارس

جناان

01-12-06, 02:14 am

والله لو كانت
وحده رومنسيه
واتزوجت واحد مثل اللي تقول
عليه يشتغل
بقسم الموتى ..
بتجيها سكته من تصرفااته
احسهم مو لايقين على بعض..!!!

لكن لو كاان انسان اقل منها رومنسيه
تحاااول تعلمه وتجذبه لعالمها..

وبالاخير راااح يغلب احدهماااااا الاخر..!!!

تحيتي لك
فارس

عبدالله30

01-12-06, 02:44 am

الاخ الكريم00فارس 00تحية طيبة0

قسم بالله انك ضحكتن من كل قلب00احجز لي مكان بكل مواضيعك00

انت منتب منسم بس شكلك مقلع الابر 0

فيه واحد جفس جفس بالحيل مع زوجته وفوق هذا كله ميت قلبه
من شدة موتت قلبه يشتغل في قسم الموتى في مستشفى التخصصي

ههههههههههه لا بعد وحاط الميت بالمخبات وين حنا به!!!!!!!!!واللي يحط بالجثة ببسي!!!!!!!!

وشم ذولا؟؟؟؟؟؟؟؟

بس اقولك00يقولون ان المرأة بامكانها ترويض الأسد وتغيير الجبل00واللي ماتقدر تغير طبع زوجه لك عليه ولا هو

ماهو لمه يعني لايهتم لها0

تحياتي لك0

Queen of buraydh

01-12-06, 02:49 am

يوووووه مشكله صراحــه اذا كان جفس :(

بس اعتقد انها ما توصل لدرجة اني اطلب الطلاق ..

احاول اعدل فيه هالطبع .. واوضح له اني متضايقه من هالشي .. اكيد راح يغير في نفسه شوي ويصير اكثر حنيـه :)

واذا ما نفع

راح امشّي الحال .. خاصه اذا فيه صفات ثانيه تشفع له :)

شكراً لك اخي الكريم ..

نـدى الـورد

01-12-06, 03:14 am

[color=#660000][size=4]

[quote]هلا السكون

مو حلوه السكون صح ؟

هنا لام شمسيه

احس ان هذي مالها داعي ( الــ )

(سكون) بدون ال كذا بتكون احلى

عشان نفس الشي الفارس مو حلوه

ياليت تحذفي الـ

والفارس هنا لام قمريه

وال اضعها للتفخيم برأيي

اذا ماعجبك بلااها نشيلها كرمالك

سكون ماعليش بس ابي افهم قبلي يعني وشو ؟

فيه مجتمعات قبليه وتتخير وبكل ثقه وبدون معارضة احد

يعني مازال هناك عادات وتقاليد ربما تكون متشدده نوعآآ ما ولكن ملتزمين بهاا

ههههه تدرين ليش تقنعي نفسك بقولتك مو شرط يكون رومنسي ؟

لان البنت الي تقول في الاول مغصوبه .. يعني لو فيه عيوب الدنيا بتقول اهم شي الاحترام حتى لو مافي توافق

بس هذا بالنسبه لي شي حلو .. لان البنت الي من هالنوع هذي جداً قنوعه ومتنازله ..

انا لو خيروني بين رجل رومنسي ويفتقد الاحترام

بــ رجل يكن لي الاحترام رغم فقره مشاعريآآ

اختار الاخير....مع المحاوله لتغييره

سكون كلامك فيه تناقض غريب !!

بلعكس ليسا هنا اي تناقض بل واقعي

اقولك ليش

قول لي ليه؟

انتي تقولي لانه افضل من مية رجال رومنسي غير سوي .. ليش قلتي ان الرومنسي مو سوي وحطيتي 100 واحد عشان تكسبي تغيير بالرجال بطريقتك الرومسيه السويه ؟؟؟

مع انه الرجال هو الي يغير الحرمه مو العكس

معلوماتك ناقصه المرأه بيدها كل شي

وتخضع كل الامور بين يديها

المرأه تستطيع بذكائها تتعامل مع الرجل وكأنه طفل بين يديها

المرأه تستطيع تغيير الرجل 180 درجه مثل مايقولون

سكون الرومسيه يجب ان تكون من باب لطف اي انه رجل سوي

والميه الي قلتي هذولا مو رومنسيين عشا يكون احلى منهم

كل الفتيات يرغبن برجل رومنسي ولا انكر هذا الشي

لان المرأه عاطفيه بطبعهااا

ولكن صدقني هناك رجال جليدين في مشاعرهم وللاسف لاتكتشف

المرأه هذا الشي الا بعد الزواج

امعقول تنفصل منه بسبب هذا؟

لا اعتقد

انا ممن الفتيات الاتي يحسبن ايجابيات الزوج

واتقبل منه اشياء رغم فقره مشاعريآآ

وكما اسلفت

المرأه لها قدره رهيبه في خلق اجواء شاعريه بينها وبين زوجها

شكرآ سكون

العفو

فارس

سكون

.

:: ابعـاد ::

01-12-06, 02:13 pm

.

.

المراة تقبل بزوجها في اي صورة كان ...إذا هي احبته !!

والرجـل كذلكـ ...... اليس كذلكـ ....

.

.

هامة حاسوبية

01-12-06, 02:45 pm

إيه الله يستر علي بس ، عاد أنا حساسه أخاف ماأتحمله

بس يله بتفاءل خير والله يرزقن الرزق الحسن من عنده

جلوي العتيبي

01-12-06, 02:47 pm

أدري مالي دخل بالموضوع بس ودي ارد

فارس حبيب قلبي

أي رومانسيه وأي شكليات

البنت في وقتنا الحالي المفروض تدور عن الرجل الجفس

لأن جفس أيامنا هذي نعوم مقارنه بالماضي

سلم لي على راعي جثة الطفل هكذا هم الرجال

((دعايه مجانيه للجفوس <<<جمع جفس))

راشد الصليحان

01-12-06, 03:01 pm

.

.

والرجـل كذلكـ ...... اليس كذلكـ ....

.

.

الرجـل ....إذا احب زوجته اكثر مماتحبه ...يكون

كالبعير الأبله ! !!

لكن بعض الرجــال يحب التدلع ويحب يشوف غلاه عند زوجته !

دائماَ يأمر وينهى ! والمرأة عندما تحب تستمتع بقوة شخصية زوجها!

خرجنا عن الموضوع !!

المهم ...لاتكون المرأة جفسة او لحوحة ..او نكدية !

والرجل مقبول منه الجفاسة لأنه رجل !!

نـدى الـورد

01-12-06, 04:09 pm

الرجـل ....إذا احب زوجته اكثر مماتحبه ...يكون

كالبعير الأبله ! !!

لكن بعض الرجــال يحب التدلع ويحب يشوف غلاه عند زوجته !

دائماَ يأمر وينهى ! والمرأة عندما تحب تستمتع بقوة شخصية زوجها!

خرجنا عن الموضوع !!

المهم ...لاتكون المرأة جفسة او لحوحة ..او نكدية !

والرجل مقبول منه الجفاسة لأنه رجل !!

راشد للاسف

يكون هذا رأيكــ؟؟؟؟؟؟

.

راشد الصليحان

01-12-06, 05:07 pm

هذا واحد جفس
:17[1]:

راشد وشو صنان

والله ان الي فيه صنان ماينبلع لا رجال ولا حرمه ياراشد

وبعدين الي فيه صنان هذا مو جفس

هذا وصخ

فارس

فارس انت ماتدري فيه ناس مساكين

من حريم ورجال يفقدون حاسة الشم ؟

لذلك مهما فعلوا لايعرفون مايدور حولهم من روائح !!

شكر لك ..

راشد الصليحان

01-12-06, 05:09 pm

راشد للاسف

يكون هذا رأيكــ؟؟؟؟؟؟

.

سكون هذا هو الواقع وليس رأيي !!

راشد الصليحان

01-12-06, 05:11 pm

روح مرتاحه

ماصدق راشدهو اصلا فيه حد ريحته صنان هالوقت ؟؟؟؟؟؟؟؟؟؟؟؟؟؟؟؟
انت وين عايش والله كسرت خاطري

هذه واحده الثانيه ليش يعني لا حبيناكم نقبلكم متل مإنتو لا ياحلالي من قاله

هذاك اول الحين الأول تحول
بس جد صدمتني قوه والله كنت متحمسه لك من يوم ذاك البعيجان مدري وش اسمه الي كل يوم منزل موضوع يصلح لك
تالي طاح بسالفة من اييملي

تككفى قول انك تمزح

خذ وخــل !!

نـدى الـورد

01-12-06, 05:28 pm

سكون هذا هو الواقع وليس رأيي !!

اجحااف

ومن اخبرك ان نفس المرأه تتقبل ماذكرته بكل سهوله؟

لعلمك المرأه لها نفس ترفض اي شي يكون خارج عن المألوف

المرأه ليست عديمة الاحساس كما فهمت من عباراتك ورأيك

.

راشد الصليحان

01-12-06, 06:00 pm

اجحااف

ومن اخبرك ان نفس المرأه تتقبل ماذكرته بكل سهوله؟

لعلمك المرأه لها نفس ترفض اي شي يكون خارج عن المألوف

المرأه ليست عديمة الاحساس كما فهمت من عباراتك ورأيك

.

لاياسكون ! لم اقل ماذكرتي

انا اقول ان الواقع ....

الرجل المحب لزوجته اكثر مماتحبه (يعني يحبها بزيادة )

كالبعير الأبله !

والمرأة التي تحب زوجها اكثر ممايحبها !

تقبله بأي صورة مهما كانت !!

اما الإحساس والمشاعر لم انفيها إطلاقاَ

قالمرأة هي المصدر الأساس لكل المشاعر !

ارجو ان لاتدافعي من منطلق المرأة الحقوقية !!

بل من المرأة الواقعية التي تفهم الواقع بعناية !

شكرا لك سكون ....

:: ابعـاد ::

01-12-06, 06:10 pm

*************************

الذاهبة

01-12-06, 09:26 pm

الذاهبه احلفي انك ما افطرتي فول

فارس

مرحبا فارس

أنا ما فطرت فول ..

فطرت طعمية و كبده .. أبونا جابها لي :)

يافارس .. عفوا

ابي اوصل شي وهو :

الشجاعة .. مع طيبة القلب و الرحمة

:)

فارس دمت في سعادة !

فارس الميدان

01-12-06, 11:52 pm

لمبة شارع
كل نساء العالم يافارس رومانسيات .. هذا من حيث المعنى الذي نفهمه لكلمة رومانسية وهي_ طغيان الجوانب العاطفية في تشكيل وبناء الشخصية وتأثر القرار العقلي وفقا للنزعة العاطفية للشخصية _..ووفقا لهذا التعريف فنساء العالم كلهن رومانسيات قياسا بالرجال وبالتالي ففي المجمل فإن نساء العالم كلهن تقريبا يشعرن بتقصير ازواجهن في اشباع الجوانب العاطفية عندهن على الدوام_اعني انهن لايشعرن بالاشباع طول الوقت....
الامر الآخ انني تعرفت اليوم على هذا المصطلح الجديد _جفس_ منك يافارس وللاسف انني اسمعه (أو أقرؤه) لأول مرة ..لقد مر بي من قبل مصطلح مشابه _جفش_ او _جلف_ او _فض لكن لايهم فالمعنى واضح والقصد ان المرأة اكثر ما ينمي فيها شعور الميل الى زوجها هو جاذبيته الذكورية بالدرجة الاولى عبر كل اشكالها السلوكية وفي حكاية عامل مغسلة الموتى التي اوردت تبدو لنا شخصية رائعة جدا ومليئة بعناصر جذابة ...صحيح ان النساء يفضلن في شخصية ازواجهن مسحة من الرقة والعاطفية السلوكية لكن ذلك لا يرضيهن على الدوام إذ يضل الرجل المتمتع بخصائصه الرجوليه هو محور دائرة المرأ ة....

القصد يافارس ان ماقد يبدو لنا بحجم جامبو قد يكون في حقيقة الامر في حجم مايكرو .. ولكننا نكون قريبين جدا من الصورة فلا نرى بقية مكونات اللوحة ثم لانستطيع قياس حجم الاشياء ونسبة بعضها الى بعض...

هلا هلا لمبة نورت المكان طال عمرك يا عزيزي

فإن نساء العالم كلهن تقريبا يشعرن بتقصير ازواجهن في اشباع الجوانب العاطفية عندهن على الدوام_اعني انهن لايشعرن بالاشباع طول الوقت....

لمبة اذا جيت من باب ان المرأه لاتشعر بالاشباع طول الوقت .. بقولك ياحبيبي المرأه لا تشعر بالاشباع في كل شي مو بس الرومنسيه او فقدان صفه او زيدادتها في نفسها .. المرأه تحس بالتقصير او الاغلبيه دايم تحس بالتقصير
والدلليل انك اذا نزلت زوجتك عند اهلها جابت عاليك واطيك بالحش عندهم ..
زوجي سوى وحط وفعل وراح وجاء وقال وضرب وشتم .. وكلها فوق راسها منك وتسوي نفسها انها مكرمتك وماده يدها لك وانت كسرتها وماتشكرها .. وانت تالقاك بالبيت بس تمشي وتبوس من حبك لها .. بس انا سمعت من كثير حريم انها تقول هذا عشان النظل (نحاته) .. يمكن صدق ويمكن المرأه من وراك قواااااله وماتشكر ..
والغريب ان النساء من قديم الزمان وجميعهم لا يشكرون مو بس في هالوقت
----> هل نسيت قصة ابراهيم عليه السلام عندما جاء الى زوجة ابنه اسماعيل ماذا قالت له عن ولده !!!

القصد يافارس ان ماقد يبدو لنا بحجم جامبو قد يكون في حقيقة الامر في حجم مايكرو .. ولكننا نكون قريبين جدا من الصورة فلا نرى بقية مكونات اللوحة ثم لانستطيع قياس حجم الاشياء ونسبة بعضها الى بعض

افهم من كذا ان الرجال الي طبيعته جفس اذا راح عند زوجته فيه رومنسيه و تقدر تغير فيه ؟؟؟

فارس

فارس الميدان

02-12-06, 12:03 am

ابعاد

ليس لدي خبره في مثل هذه الأمور

ولكن من الواجب فصل الرومانسيه عن النعومه والتأنث من قبل الزوج

لأني ارى خلط بالمفاهيم هنا

رومانسي نعم

ناعم لا او نعم ولكن بحدود

.

ابعـــاد

اختي ابعاد احلى شي انك شرحتي الرومنسيه انها مو نعومه

البعض يخلط المفاهيم كما قلتي ..

اشكر لك مرورك وتعقيبك

مشاركتك الثانيه بالموضوع احلى مافيها رقمها مميز

1,666 ياليت البراق يجي يصيدها ..

فارس

فارس الميدان

02-12-06, 12:11 am

بسوووووووومه

وحده زوجها جفس بس تحبه لما سألوها عنه قالت ياحبيله ما يدري وين الله حاطه .. ترى تمدحه الحين هي

هههههههههههههههههههههه
هههههههههههههههههه
هههههههههههه
ههههههه
ههه
هه

متزوجه منغولي هذي ؟

كويس انها قالت ياحبيله .. شكلها راحمته من دباشته

والي يقهرك انه مسكين على باله الحين ان زوجته جالسه تمدح فيه وموصلته العلالي .. بالاخر مايدري وين الله حاطه

فارس

قراشيع

02-12-06, 12:51 am

المشكله اذا الرجال طاح بوحدتن جفسه والا ريحتها فطيس :4[1]:

الملتاعه

02-12-06, 01:53 am

حتى لو كان الزوج جفس

بيد الزوووجه تخليه رومنسي ومب شرط رومنسي لازم يكون نعووووم

لا بس الزوجه إذا خلت حياتهم رومنسيه الجفس يصير رومنسي مع بقى الجفااااسه

فيه لأنها متأصله للأسف فيهم

دمت بووود فااااااااااااااارس

راشد الصليحان

02-12-06, 08:58 am

المشكله اذا الرجال طاح بوحدتن جفسه والا ريحتها فطيس :4[1]:

؟؟؟؟؟؟؟؟؟؟؟ :36_1_5[1] :36_1_4[1]

iiigil

02-12-06, 08:59 am

يماااااااااااااااااااااااااااااااااااااااااااااااا اااااااه وش ذا القصص معقول
لا الله يبعد هالجفسين عني يما لو اشوف واحد ميت ؟؟؟؟؟؟؟؟؟؟؟؟

بعدين هلي يبرد المويه بالجثه الله لا يبلنا

ولو اني متزوجه واحد جفس كان بطنش ابوه معه وامه ...فاضيه انا اقتل نفسي وانا صغيره .

فارس الميدان

02-12-06, 09:28 am

The peincess

هـــــــــــــــلا فارس .... بصراحه النماذج اللي ذكرتها مو بس أشخاص جفسين إلا قلوبهم ميته
الصلابه اللي فيهم متعديه حدودها.. يعني الحياة معاهم فقدت رونقها ، وأنا ما أقول إن الفتاة تبي
إنسان دلع ، لكن تبي شخص لطيف ، يحترم رايها ، ويقدر مشاعرها ، ويحترم أحاسيسها ، لإن
النساء عاطفيات من الدرجة الاولى.. بعدين أشخاص يتصفون بالأوصاف اللي ذكرتها ما أعتقد أن
إنسانه ضعيفه راح تقدر تأثر فيه ، بالعكس هو اللي راح يؤثر فيها بعد ما يكرها الحياة (هذا إذا أستمرت حياتها معاه)،

The peincess اشكر لك حضورك وتعليقك

كلامك حلو

اما بالنسبه للي في القصه الظاهر انه حتى القويه ماراح تغير فيهم

مشكله اذا كنت المرأه تصلح من جهه والعمل والصدقات تخرب من الجهه الثانيه

فارس

فارس الميدان

02-12-06, 09:36 am

جناان
والله لو كانت
وحده رومنسيه
واتزوجت واحد مثل اللي تقول
عليه يشتغل
بقسم الموتى ..
بتجيها سكته من تصرفااته
احسهم مو لايقين على بعض..!!!

لكن لو كاان انسان اقل منها رومنسيه
تحاااول تعلمه وتجذبه لعالمها..

وبالاخير راااح يغلب احدهماااااا الاخر..!!!

تحيتي لك
فارس

جناان اتركي حق الموتى على جنب .. القصه ما ابي احد يحكم عليها لانها مجرد قصه لها صله بالموضوع بسيطه
ابغاك تحكمي في شكل عام وتجاوبي على السؤال بدون القصه
انا وانا رجال لو يقولي احد ودك هذا يصير صديقك قلت لا (وهو مجرد صديق بس) .. وش عاد بنت الناس بتنام معه وهو ريحته المسك حق غسيل الموتى ..

لكن لو كاان انسان اقل منها رومنسيه
تحاااول تعلمه وتجذبه لعالمها..

وبالاخير راااح يغلب احدهماااااا الاخر..!!!

المصيبه اذا غلبها الرجال وصارت لا تبالي

اشكر لك حضورك

فارس

فارس الميدان

02-12-06, 09:53 am

عبدالله 30
الاخ الكريم00فارس 00تحية طيبة0

قسم بالله انك ضحكتن من كل قلب00احجز لي مكان بكل مواضيعك00

هلا هلا عبدالله .. ياخي وينك انتي تختفي فتره وتطلع فتره ؟

او يمكن تكون في المنتدى في اقسام نائيه وما انتبه لك

اشكر لك حضورك .. حاجزلك في مواضيعي بالدرجه الاولى طال عمرك

انت منتب منسم بس شكلك مقلع الابر 0

هههههه لا والله بعذري من هالي اشوفه

ياخي عندنا حريم اكتشفت انها بتدخل الجنه بسبب تحملها لزوجها .. عشان كذا تطرقت لهالموضوع

إقتباس:
فيه واحد جفس جفس بالحيل مع زوجته وفوق هذا كله ميت قلبه
من شدة موتت قلبه يشتغل في قسم الموتى في مستشفى التخصصي

ههههههههههه لا بعد وحاط الميت بالمخبات وين حنا به!!!!!!!!!واللي يحط بالجثة ببسي!!!!!!!!

وشم ذولا؟؟؟؟؟؟؟؟

هذولا ترا موجودين
عاد تدري يقولي واحد يشتغل معهم ان كل سواليفهم اقلاع في اقلاع
يقول اني اول ما توظفت عندهم جاء عندي واحد قال اسمع
قلت نعم
قال ترا انا عندي واسطه اذا مت انت بنحطك في المقبره القديمه مع المشايخ والرجال وبحاول اشوفلك فيها محل مع انها مليانه
لان المقبره الجديده كلها خكاريا ورجال هالوقت البايخه ..
يقول خويي انا جتني الصيحه ورحت للمدير قلت تكفى انقلني انا اول مره اشوف واسطه في مقبره

بس اقولك00يقولون ان المرأة بامكانها ترويض الأسد وتغيير الجبل00واللي ماتقدر تغير طبع زوجه لك عليه ولا هو

ماهو لمه يعني لايهتم لها0

تحياتي لك0

ياحبيلك اصلن لو يهتملها ما صار جفس

فيه امثله كثيره بقولها عن هالموضوع بس اتمنى الوقت يساعدني وبتكون الصوره اوضح

فارس

فارس الميدان

02-12-06, 10:11 am

سكون الليل
يعني مازال هناك عادات وتقاليد ربما تكون متشدده نوعآآ ما ولكن ملتزمين بهاا

تقصدين البدو .. صح ؟

خلك واضحه عادي مافيها شي

إقتباس :
ههههه تدرين ليش تقنعي نفسك بقولتك مو شرط يكون رومنسي ؟

لان البنت الي تقول في الاول مغصوبه .. يعني لو فيه عيوب الدنيا بتقول اهم شي الاحترام حتى لو مافي توافق

بس هذا بالنسبه لي شي حلو .. لان البنت الي من هالنوع هذي جداً قنوعه ومتنازله ..

انا لو خيروني بين رجل رومنسي ويفتقد الاحترام

بــ رجل يكن لي الاحترام رغم فقره مشاعريآآ

اختار الاخير....مع المحاوله لتغييره

سكون لو سمحتي كيف رجل رومنسي يفقد الاحترام ؟
وش الرومنسيه الي بدون احترام انا اول مره اسمع فيها !
الرومنسيه بالتعامل لازم فيها احترام وتقدير عشان تنفهم بمعناها

إقتباس:
سكون كلامك فيه تناقض غريب !!

بلعكس ليسا هنا اي تناقض بل واقعي

إقتباس:
اقولك ليش

قول لي ليه؟

إقتباس:
انتي تقولي لانه افضل من مية رجال رومنسي غير سوي .. ليش قلتي ان الرومنسي مو سوي وحطيتي 100 واحد عشان تكسبي تغيير بالرجال بطريقتك الرومسيه السويه ؟؟؟

مع انه الرجال هو الي يغير الحرمه مو العكس

معلوماتك ناقصه المرأه بيدها كل شي

وتخضع كل الامور بين يديها

المرأه تستطيع بذكائها تتعامل مع الرجل وكأنه طفل بين يديها

المرأه تستطيع تغيير الرجل 180 درجه مثل مايقولون

المرأه تستطيع تغيير الرجل 180 درجه ؟

اتمنى ذلك بس مو في كل الامور
ولو اني اشوف العكس عند البعض بالتغيير

إقتباس:
سكون الرومسيه يجب ان تكون من باب لطف اي انه رجل سوي

والميه الي قلتي هذولا مو رومنسيين عشا يكون احلى منهم

كل الفتيات يرغبن برجل رومنسي ولا انكر هذا الشي

لان المرأه عاطفيه بطبعهااا

ولكن صدقني هناك رجال جليدين في مشاعرهم وللاسف لاتكتشف

المرأه هذا الشي الا بعد الزواج

امعقول تنفصل منه بسبب هذا؟

لا اعتقد

انا ممن الفتيات الاتي يحسبن ايجابيات الزوج

واتقبل منه اشياء رغم فقره مشاعريآآ

وكما اسلفت

المرأه لها قدره رهيبه في خلق اجواء شاعريه بينها وبين زوجها

سكون شكرا لك عودتك وتعقيبك

احس ان المرأه الي تستطيع ان تغير الرجل لازم انها تكون كبيره شوي يعني 26 او 27 او 28

عشان تتعامل مع الرجال كأنه طفل على قولتك وتغير فيه
ايه صح نسيت اقول
اهم شي تكون زوجته من برج الاسد عشان تتقن قيادتها :20[2]:

فارس

عبدالله30

02-12-06, 10:26 am

أخي الكريم00فارس0

كلنا شوق وتلهف للامثلة التي سوف تذكرها00ننتظرها فلا تتأخر علينا0

تحياتي لك0

نـدى الـورد

02-12-06, 01:42 pm

:11_4_124v

خبرك عتيق

ايها الفارس المثالي

نحن في زمن

البنت في عمر العشرين

تستطيع وبجداره

ونجاح ان تقود سريه عسكريه

خصوصآآ,,,

من يكون برجها الاسد

وليسا فقط مخلوق يسمى الرجل

,

....e7sas

03-12-06, 12:06 am

[QUOTE=فارس الميدان][color=#0000CC]

The peincess اشكر لك حضورك وتعليقك

The Princess

مشكله اذا كنت المرأه تصلح من جهه والعمل والصدقات تخرب من الجهه الثانيه

نعـــــــــــم .. :12[1]: ......... ما فهمت ، وش علاقة محور حديثنا بالعمل والصدقة؟؟؟؟؟؟؟!!!!!!!!!

[size=3] Thanx a lot

فارس الميدان

03-12-06, 01:53 am

umomar7

إيه الله يستر علي بس ، عاد أنا حساسه أخاف ماأتحمله

بس يله بتفاءل خير والله يرزقن الرزق الحسن من عنده

اشكر لك مرورك

انشاءالله تاخذي الي في بالك وتتهني ويسعدك

بس لاتنسي تعزمينا على الزواج

حطي بطاقة دعوه كامله للمنتدى

فارس

فارس الميدان

03-12-06, 01:58 am

الزعيم

أدري مالي دخل بالموضوع بس ودي ارد

هلا هلا بالزعيم

بالعكس لك دخل ونص ،، انت المفروض تنقل الصوره المثاليه للتعامل السليم مع الزوجه بصفتك
متزوج ولديك الخبره الكافيه

فارس حبيب قلبي

أي رومانسيه وأي شكليات

البنت في وقتنا الحالي المفروض تدور عن الرجل الجفس

لأن جفس أيامنا هذي نعوم مقارنه بالماضي

سلم لي على راعي جثة الطفل هكذا هم الرجال

((دعايه مجانيه للجفوس <<<جمع جفس))

الرجل الجفس نعوم في وقتنا هههههه كثرلي منها

انت ماشفت حقين البر وحقين القنص وحقين الورشات والي غيرهم
فيه ناس تحقر المرأه وتتعامل معها وكأنها شغاله (( يعني جفاسه من جد ))

فارس

فارس الميدان

03-12-06, 02:02 am

راشد الصليحاني

والرجل مقبول منه الجفاسة لأنه رجل !![quote]

لا مو مقبول ياراشد ،، بس المرأه عندها قوة تحمل ،، عشان كذا وش تسوي المسكينه ؟

وتتبع المثل الي يقول :
امسك مهبولك لا يجيك اهبل منه

فارس

هامة حاسوبية

03-12-06, 02:04 am

انشاءالله تاخذي الي في بالك

أنا مابالي أحد معين بس في بالي مواصفات معينه

وتتهني ويسعدك

آميييييييين الله يجزاك خير

فارس الميدان

03-12-06, 02:10 am

روح مرتاحة

ماشاء الله اشوف المنتدى كله متجمع هنا

سكون معقوله مصدقه الي انا كتبته ولا انت فارس لالا مو معقوله

يمكن هذي اول مشاركه لي تشوفونها
ذاك اليوم بغينا انتقاضب الشوش انا وبدر الوابلي بسالفه عن شعب الله المختار "السعوديين "

ترى كلامي من باب المزح ولا حبيابي السعوديين وين والرومانسيه وين

على قولة الي قالت عنها قبل شوي واحده من العضوات

مايدرون وين الله حاطهم
عاد نجي لراشد

ماصدق راشدهو اصلا فيه حد ريحته صنان هالوقت ؟؟؟؟؟؟؟؟؟؟؟؟؟؟؟؟
انت وين عايش والله كسرت خاطري

هذه واحده الثانيه ليش يعني لا حبيناكم نقبلكم متل مإنتو لا ياحلالي من قاله

هذاك اول الحين الأول تحول
بس جد صدمتني قوه والله كنت متحمسه لك من يوم ذاك البعيجان مدري وش اسمه الي كل يوم منزل موضوع يصلح لك
تالي طاح بسالفة من اييملي

تككفى قول انك تمزح

تدرين ليش مايدرون وين الله حاطهم ؟؟؟

لانه بالبيت قبل ما يتزوج ما كان يشوف ابوه يدلع الماما او يبادلها حوار جميل مشبع في ابتسامات وحنان من دون جفاسه

ابوه يدخل البيت يصوت لماما ويقول : انتي هاه حطي الغدى >> حتى اسمها ما يقوله

عشان كذا الولد ماشاف شي عشان يقدمه

ترا التربيه ياناس لها دور كبير لتغيير الطبع

اشكر لك حضورك

فارس

فارس الميدان

03-12-06, 02:15 am

راشد الصليحاني

فارس انت ماتدري فيه ناس مساكين

من حريم ورجال يفقدون حاسة الشم ؟

لذلك مهما فعلوا لايعرفون مايدور حولهم من روائح !!

شكر لك ..

ههههههه راشد وش سالفتك ماسكه معك روايح ؟

راشد الجفاسه المقصود بها التعامل مع الزوجه وطريقة الكلام والاخذ والعطاء وغيره ..

ياحبيلك قسم بالله تضحك احس انك من جد تعاني من شي ومستحي تقوله

فارس

راشد الصليحان

03-12-06, 02:33 am

ههههههه راشد وش سالفتك ماسكه معك روايح ؟

راشد الجفاسه المقصود بها التعامل مع الزوجه وطريقة الكلام والاخذ والعطاء وغيره ..

ياحبيلك قسم بالله تضحك احس انك من جد تعاني من شي ومستحي تقوله

فارس

فارس

ودي اقول كلام عن بعض الناس اللي انت خابرهم لكن في فمي ما !!

فارس الميدان

03-12-06, 02:36 am

الذاهبة

مرحبا فارس

مرااااااحبك هلا الذاهبة

أنا ما فطرت فول ..

فطرت طعمية و كبده .. أبونا جابها لي

مو منشقه بس تخر

الفول مو بعيد عن الكبده والطعميه

اها الحين عرفت من وين الخمول الي فيك !!!
انا اشرحلك الي فيك بالتفصيل مع انه خارج عن نطاق الموضوع بس عشان افيدك وترجعي نشيطه كما كنتي في السابق

كبده وطعميه :

الذاهبة الطعميه والكبده فيها نسبات كثير من الحديد والنشويات وكذا مو حلو
يعني اذا كنتي في الصباح تاكلي كبده وطعميه (( هنا فيه حديد ))
والظهر تتغدي لحم او دجاج مع الرز والمرق (( هنا فيه حديد ))
والعشاء معزومه او عازمه احد وبتاكلي لحم وغيره (( هنا فيه حديد ))

هل تعلمي ان الكثره من الحديد في الجسم تسبب اضطرابات في الجسم بالدم وبعدين تتسبب في نزول او ارتفاع الضغط بعدين يجيك دوخه او خمول او كسل او او صداع او خثور

وهذي كلها بسباب الكثره من المأكولات الي فيها حديد لذلك انصحك بالابتعاد عنها

خليني ارسم لك برنامج غذائي :

الصبح :
خلي ابوكم يجيب كرسون وسوي معه كابتشينو
(( جميع روائح القهوه تساعد على صفاوة الذهن والتركيز بنشراح وتساعد على ان تكوني نشيطه ))

الظهر :

كولي سلطه عشان الجسم يكون فيه غذاء صحي وفوائد صحيه وتنامي (قيلوله) وجسمك مرتاح ومو شبعان بالحيل عشان تقومي وانتي نشيطه ومافيك كسل ..

العشاء :

حاولي انك تاكلي حلى عشان الحلى يدفع البلى على قولت السوريين
والحلى معروف انه يوسع الصدر وخاصه الشوكلاته ..

وبعدها اتعشي الي تبين بس خففي من أكل الي فيها نسبة حديد

وستصبحي فتاة نشيطه وصافية الذهن وخاليه من التوترات

يافارس .. عفوا

ابي اوصل شي وهو :

الشجاعة .. مع طيبة القلب و الرحمة

اشكر لك تعقيبك مع انك قنوعه او ابوكم جفس وما تدرين

فارس دمت في سعادة !

الذاهبة دمتي اسعد

فارس

فارس الميدان

03-12-06, 02:47 am

قراشيع

المشكله اذا الرجال طاح بوحدتن جفسه والا ريحتها فطيس

هذي سهل حلها

يحاول يعدل فيها واذا ما قدر يتزوج عليها ثانيه وراح تصير احسن وحده

واذا ماتغيرت بعد اخذ الثانيه وشاف انها مازالت جفسه يطلقها (( لاتنسى ان العصمه في يد الرجل ! ))

مع اني ما اعتقد ان فيه مرأه جفسه

اشكر لك حضورك سيد قراشيع

فارس

فارس الميدان

03-12-06, 03:10 am

الملتاعه

حتى لو كان الزوج جفس

بيد الزوووجه تخليه رومنسي ومب شرط رومنسي لازم يكون نعووووم

لا بس الزوجه إذا خلت حياتهم رومنسيه الجفس يصير رومنسي مع بقى الجفااااسه

فيه لأنها متأصله للأسف فيهم

دمت بووود فااااااااااااااارس

الملتاعه نورتي في حضورك

التكرار بالاحرف عنك رهيب

الملتاعه ( نعوم ) انتي حطيتيها بشكل تصغير في الكلمه بس ضخمتيها في كثرت الواوات
نعوووووم

في معلومه بقولك ايها في كيفيت التضخيم والتركيز هي انك تشديد احد الحروف او تزويده بستمرار (مكرر) يكون مشدد بقوه وتصبح تقصد الكلمه تنفيذها مع الاشباع بقوة

يعني بضرب لك مثال بسيط وقريب من المقصود عشان توضح الصوره :

لو واحد من اخوانك قالك( الملتاعه روحي جيبي لي ماء ؟
بتقولي انتي ( لا ) او (لااااااا ) او ( لا لا لا )

( لا ) يعني بتروحي بس يبيلك مساحر او تتغلين ومع هذا في امل تجيبي لو قالك مره ثانيه
( لاااااا ) مالك خلق الي كازك وماتبينه يعيد الطلب مره ثانيه وقلتي كذا عشان يأيس منك خير شر
( لالالا ) هذي حاله مزريه وقصدتي بها ان صاحب الطلب تموني عليه بقوه ومايهمك يرضى او يزعل لان مرده لك

واذا كانت اجابتك لخوك العكس فأن الجابه تكون كما كانت بس العكس في المعنى بنفس التفصيل

يعني نعووووووم حقتك تعني : في هالحاله بيصير خكري وما يصلح يتزوج ومو رجال
بس
نعوم تعني بدون واوات : يكون ماخذ شوه من النعومه المطلوبه في وقتها فقط

يمديك على هالفلسفه ( :10_5_2[1] )

اشكر لك حضورك

فارس

فارس الميدان

03-12-06, 03:18 am

انسه مطنشة

يماااااااااااااااااااااااااااااااااااااااااااااااا اااااااه وش ذا القصص معقول
لا الله يبعد هالجفسين عني يما لو اشوف واحد ميت ؟؟؟؟؟؟؟؟؟؟؟؟

بعدين هلي يبرد المويه بالجثه الله لا يبلنا

ولو اني متزوجه واحد جفس كان بطنش ابوه معه وامه ...فاضيه انا اقتل نفسي وانا صغيره .

هلا انسه

الحين كل البنات قالو انهم بيحاولو انهم بيغيرو من الرجل بقدر المستطاع

الا انتي ليش ماعندك استعداد تغيري من الرجال وبتخلينه هو وامه وابوه على قولتك ؟

شكلك حاده وما تتحملي (هنا نسبة جفاسه من الباب اثاني)

الله يعينك دايم الي مثلك تطيح بواحد ...... !

فارس

فارس الميدان

03-12-06, 03:21 am

عبدالله 30

أخي الكريم00فارس0

كلنا شوق وتلهف للامثلة التي سوف تذكرها00ننتظرها فلا تتأخر علينا0

تحياتي لك0

انشاءالله بكرا او بعده اوضح الي عندي من سوالف

اشكر لك عودتك وحرصك

فارس

فارس الميدان

03-12-06, 03:24 am

سكون الليل

اجل سريه كامله ههههههه

نجدعلك مو سريه كامله

لو زوجها واحد بس يكون برج الثور او الحوت

كان يجب الطعه على الاسد والغابه كلها من ثقل دمه

وجفاسته

فارس

إشراق

03-12-06, 04:07 am

السلام عليكم جميعا

مشكور اخوي فارس على الموضوع المهم والحلو

بس تصدق قصصك اللي قلتها رجعت مره وثنتين وثلاث اقرا فيهم يارب تكون كاتب تحت اخر شي امزح لكن شكلها من صدق

وووااووو الله يعين حريمهم من جد

كنت قبل اشفق على حال وحده من قرابتي من شدة جفاسة زوجها لكن هالحين يهون ياعساه بالف حل هو وجفاسته طلع يجنن

عندهم

زوجته تصير لي مره وتحكيلي عن جفاسته بحكم انه طير بر وراعي صيد المسكينه هي من رقتها جايب معاه مره الصيد قميري ودخل
وجلس ينتف فيهم وهي جالسه تبكي متاثره وراحمه الطيور وتقول ياحرام مارجع هالطير لعياله ياحرام انحرمت ام هالطير من ولدها

وفيه مره من المرات كانت مسويه اجواء رومانسيه شمعات وحركات اول مادخل زوجها جلس يصارخ فيها طفي الشمع لايحرق الموكيت والستاير ونحترق معاهم

المسكينه عدت السالفه وجلست تسولف رجع وقال لها انكتم نفسي من هالشموع ابي اناره قويه وشغلي ((النجفه المزدوجه))

مابي الصفراء ابي(( نجفه ))

اسكتت وبرضوا عدت السالفه ماتبغى تخرب الجو الرومانسي اخر شي مل منها وقال حشى حنا بكنيسه على هالشموع

يوم شافت الدعوه كذا تقول قمت وطفيت شميعاتي واحترمت حالي

وقصص كثيرررررررره تفطس من الضحك بس انا اعجز خلق الله بالكتابه احمدوا ربكم اني كتبت هالكلام

بس تصدقون على كلامها انها تحبه موت تقول مع جفاسته احبه ولا ارضى بداله بدل يكفي طهارة وطيبة قلبه واخلاقه الحميده

اللي تغطي على كل عيب بفكر فيه

ودايم تختم كلامها اذا قالت قصص عن جفاسته الله يخله لي ويطولي بعمره

آآآآآآآآمين الله يخليه لها ويطول بعمره ويهنيهم ويسعدهم

سنافيه

03-12-06, 04:31 am

تغيرو شباب الحين على قولة الشيخ المطلق (الله يصلحهم شباب هالوقت يقولون كلام حنين مما يخلي الام تغار لانه ماشفت الكلام من ابوه )

اتوقع قله الجفسين الحين .. من تشوف القصات والبناطيل تقول مافيه جفس انقرض ..

فارس الميدان

03-12-06, 03:34 pm

بنت بريده 2

السلام عليكم جميعا

مشكور اخوي فارس على الموضوع المهم والحلو

بس تصدق قصصك اللي قلتها رجعت مره وثنتين وثلاث اقرا فيهم يارب تكون كاتب تحت اخر شي امزح لكن شكلها من صدق

وووااووو الله يعين حريمهم من جد

كنت قبل اشفق على حال وحده من قرابتي من شدة جفاسة زوجها لكن هالحين يهون ياعساه بالف حل هو وجفاسته طلع يجنن

عندهم

زوجته تصير لي مره وتحكيلي عن جفاسته بحكم انه طير بر وراعي صيد المسكينه هي من رقتها جايب معاه مره الصيد قميري ودخل
وجلس ينتف فيهم وهي جالسه تبكي متاثره وراحمه الطيور وتقول ياحرام مارجع هالطير لعياله ياحرام انحرمت ام هالطير من ولدها

وفيه مره من المرات كانت مسويه اجواء رومانسيه شمعات وحركات اول مادخل زوجها جلس يصارخ فيها طفي الشمع لايحرق الموكيت والستاير ونحترق معاهم

المسكينه عدت السالفه وجلست تسولف رجع وقال لها انكتم نفسي من هالشموع ابي اناره قويه وشغلي ((النجفه المزدوجه))

مابي الصفراء ابي(( نجفه ))

اسكتت وبرضوا عدت السالفه ماتبغى تخرب الجو الرومانسي اخر شي مل منها وقال حشى حنا بكنيسه على هالشموع

يوم شافت الدعوه كذا تقول قمت وطفيت شميعاتي واحترمت حالي

وقصص كثيرررررررره تفطس من الضحك بس انا اعجز خلق الله بالكتابه احمدوا ربكم اني كتبت هالكلام

بس تصدقون على كلامها انها تحبه موت تقول مع جفاسته احبه ولا ارضى بداله بدل يكفي طهارة وطيبة قلبه واخلاقه الحميده

اللي تغطي على كل عيب بفكر فيه

ودايم تختم كلامها اذا قالت قصص عن جفاسته الله يخله لي ويطولي بعمره

آآآآآآآآمين الله يخليه لها ويطول بعمره ويهنيهم ويسعدهم

بنت بريده 2

بركه الي كتبتي

عاد كويس انها تحبه وهو جفس وتقول عسى الله يخليه لي .. والله انها وافيه هذي

بالله شوفي المصاريا كيف يتعاملون مع زوجاتهم حتى العجز

اشوفهم بالحج من ضربات الشمس بالحر تلقينه كبير بالعمر وشايب وزوجته عجوز ودبيه

ولو يجيها ضربة شمس قام يبكي عندها ويقول انا السبب ياحببتي

انا الي المفروض واقف اصاد الشمس مش انتي ياحببتي

يارب استر يارب استر

والسعودي بالحج ؟

الله الله الله على التعامل مع زوجته اذا جاها شي خاصه اهل نجد

اذا تعبت زوجته وجابوها بالاسعاف من ضربة شمس

بالطريق تلقاه راكب معها يلعنها ويقول الله يعن الي يجيبك

الشرهه مو عليك الشرهه على الي جابك

انتي مامثلك في بيتك وعند بزرانك انتي فيد حج انتي وعععععع

والحريمه المسكينه ما تدري من وين تلاقيها من الزوج ولا من تعبها وصحتها ولا من .. الخ

صدق شي يقهر

والي يقهر ان الحرمه متحمله .. ليش مدري ؟

اشكر لك حضورك يا اختي

فارس

فارس الميدان

03-12-06, 03:43 pm

سنافيه

تغيرو شباب الحين على قولة الشيخ المطلق (الله يصلحهم شباب هالوقت يقولون كلام حنين مما يخلي الام تغار لانه ماشفت الكلام من ابوه )

اتوقع قله الجفسين الحين .. من تشوف القصات والبناطيل تقول مافيه جفس انقرض ..

سنافيه لا والله مو قله

الغريب ان بعضهم جفس مع غباء

تخيلي

واحد انا اعرفه من عيال هالوقت على طاري انهم على قولتك تغيرو

جت زوجته وقالت له الله يخليك جب لمبه سهاريه عشان الاضاءه تكون حلوه في الغرفه عند النوم

قال طيب

راح الولد وجاب لمبه خضراء (تخيلي خضراء قسم بالله )

تقول اول ما شبكها استحيت اقوله شي وانا للحين ما امون عليه لانه لسى متزوجه قريب وصار لها ايام

بعدين لما صارت تمون عليه هاشته وقالت ياخي حرام عليك احس ان غرفتي انا وانت فوق مناره مسجد

كل ماشبكت المبه اتذكر مسجد واستغفر هههههههههههه

بالله هذا رمنسي .؟

هذا يبيله قنبله عشان يتغير من شدة انحرافه

اشكر لك حضورك

فارس

فارس الميدان

03-12-06, 03:46 pm

روح مرتاحه

الا وين بدر الوابلي مو كان بمقهى وقال بيجي يشرح اكثر لأن واحد ملقوف بالمقهى زهقه
حد يطمنا عليه ولا عليكم امر

روح مرتاحه والله ما ندري

وعلى قولت المثل :

الحكومه ابخص

فارس

جناان

03-12-06, 05:49 pm

احس ان غرفتي انا وانت فوق مناره مسجد

كل ماشبكت المبه اتذكر مسجد واستغفر هههههههههههه
هههههههه
والله يعليك امثله
يافارس
طيب يحوول يمكن عنده عمى الوان ..

سنافيه

03-12-06, 07:33 pm

راح الولد وجاب لمبه خضراء (تخيلي خضراء قسم بالله )

تقول اول ما شبكها استحيت اقوله شي وانا للحين ما امون عليه لانه لسى متزوجه قريب وصار لها ايام

بعدين لما صارت تمون عليه هاشته وقالت ياخي حرام عليك احس ان غرفتي انا وانت فوق مناره مسجد

كل ماشبكت المبه اتذكر مسجد واستغفر هههههههههههه

وتسبديه ههههههههههههههههههههههههه

اجل ماقدر اقول شي الحكومه ابخص على قولتك

نـدى الـورد

03-12-06, 09:54 pm

صدق شي يقهر

والي يقهر ان الحرمه متحمله .. ليش مدري

شكلكم تحسبون الزواج شي سهل

اذا كان حالها مثل ماذكرت

تسكت وترضى بقسمتها حتى يحدث الله امرآآ مفعولا

.

شقرديه

03-12-06, 10:36 pm

صاحب الموضوع ما فرق بين الجفس والدبشه!!

والردود منها من ادخل "الطمل "في طيات الموضوع وهو ماله دخل

الجفس اما جفاسه في العاطفة وهو الغالب او جفس الحركات الكلام وهم قلة والاسواء جفس الاثنين

مثلا:

رجل يأكل بيدة ويلعقها بعد الأكل ، عادي يتوسخ ثوبة بنقطة شاهي ، تكشخ له زوجته وتتفجأ انه يقول لها وع وش هاللون يحوم الكبد! واذا جا يتغدى قال لها والله ياغدى ببيت ابو فلان انه شيء رهيب مرته طباخة ،،،يكح راسه الين تحسبه يحفر عن كنز ،،،يحط السلطة بيدة على الرز ،،،يشرب اللبن وبعده يشرب المرق بنفس البادية ،،، الى جا يفتح باب البيت ينكسر المفتاح بيدة ،،،الى قرا الجريدة تخرع بعده ،،، ياكل الغدا وتنتظره يقول لها تسلم ايديك خاصة ان الاطعمة اللي طبختهم لا تتكرر كثر وتتفاجأ انه يقول ناسية الملح!!

هذا امثلة لجلوف

اما صاحبك في القصة فهو مادري وش ممكن نسمية يمكن دبشه!!

ما عنده ذمة !!!

ميت قلبه والعياذ بالله !!

نرجع للب الموضوع

تعيش احسن عيشه ولو زوجها جفس

لأنها تشعر أكثر بأنوثتها معه

ولأنها تستمتع كل مرة تحس انها حسنت شوي من طباعه

وكل مرة تشوف نظرة ندم لموقف كله جفاسه عاشته معه في لحظة يفترض انها كلها رومنسيه

حتى لو اخذته عزة النفس ولا بين انه متحسف ليه يفشلها

فارس الميدان

04-12-06, 02:10 am

روح مرتاحه

الحكومه ؟؟؟؟؟؟؟؟؟؟؟؟

طيب من هي حكومته نسألهم

حكومة المملكه العربيه السعوديه

مو الي تدوري عليه انتي واحد من الشعب

اكيد الحكومه تدري عنه بصفته احد ابنائها

>>> يارب تكوني فهمتي

وانا اقول ليش راشد الصليحاني كاتب تحت تعليقك خذ وخل

فارس

فارس الميدان

04-12-06, 03:07 am

جناان

هههههههه
والله يعليك امثله
يافارس
طيب يحوول يمكن عنده عمى الوان ..

ههههههه لا والله مو عمى الوان بس جفس كل عمره بالبر ودخل على بنت الناس

تصدقين فيه ناس كثيره عندها جفاسه بالذوق غريبه

وحده متزوجه واحد تقول ذبحني دايم يلعب في اغراضي

تقول مره من المرات جيت ابوسه واثر خشته يابسه ووجهه يابس

سألته ليش وجهك صاير اشهب ويابس ؟

قال اني متعطر من العطر حقك لانه جازلي

سألته اي عطر ؟

قال هذا ..

تخيلي

طلع دايم يتعطر من المثبت حق زوجته

وتقول مره لقيته متعطر من العطر حق الابجوره حقت الغرفه

قسم بالله ان هذا الرجل انا شخصياً اعرفه وهذا ماحصل مع زوجته

فارس

فارس الميدان

04-12-06, 03:11 am

سكون الليل

شكلكم تحسبون الزواج شي سهل

اذا كان حالها مثل ماذكرت

تسكت وترضى بقسمتها حتى يحدث الله امرآآ مفعولا

مساكين اتحملو بالدنيا بما فيه الكفايه

فارس

فارس الميدان

04-12-06, 03:38 am

شقرديه

صاحب الموضوع ما فرق بين الجفس والدبشه!!

مشاءالله شقرديه مشرفه موضوعي

نوتي الموضوع شقرديه

شقرديه ترا الدباشه فيها شبه من الجفاسه احيانن

الجفاسه تدخل في كثير من الاشياء ..

الجفاسه في التعامل والحكي والطبع والذوق والمزح والجد وكل شي ..

والردود منها من ادخل "الطمل "في طيات الموضوع وهو ماله دخل

ايه قصدك راشد .. الظاهر انه قد صادف حاله واتذكرها عشان كذا حب يسوي اضافه بسيطه

الجفس اما جفاسه في العاطفة وهو الغالب او جفس الحركات الكلام وهم قلة والاسواء جفس الاثنين

العاطفه هذي كثيره واجد

والجفاسه بالكلام اكثر

حتى نقل صوره حسنه للزوجه فيها نوع من الجفاسه

مره من المرات كنت في احد المستشفيات وطلبت من واحد انه يتبرع بالدم لزوجته لانها بحاجه

بعدين قالي : وش الفصيله الي لازم اتقيد فيها
قلت : اي فصيله مقبوله اهم شي يتوفر بديل لبنك الدم حتى نأخذ منه
قال: ايه لان فصيلة دم زوجتي فصيلة حمار >>> قسم بالله انه قايل كذا قدامي
قلت : ياخي اتق الله هذي زوجتك وتقول عنها فصيلتها حمار ؟
وجلس يضحك .. والمشكله انه ملتحي يعني عليه الشرهه

وينه عن الرسول صلى الله عليه وسلم الي اذا شربت زوجته من الايناء استقصد الجهه التي شربت من عندها زوجته وشرب منها حتى يتطعم بشربه ويتحلى بريقها

والله انه يوم قالها اتذكرت علي ابن ابي طالب (رضي الله عنه ) يوم يدخل على الزهراء (رضي الله عنها) وهي جالسه تتمسوك ومن شدة حبه لها قال :

حظيت ياعود الاراك بثغرها .. أما خفت ياعود الاراك اراك

شوفي الحب كيف .. علي ابن ابي طالب يحسد المسواك بثغر زوجته

لو يدري علي ابن ابي طالب انه فيه واحد مسلم ملتحي يقول عن زوجته انها من فصيلة الحمير وش بيقول ؟؟؟

الله يخلف بس .. هذا وهي تعبانه .. اجل اذا استصحت وش يقول عنها .. اكيد بيقول قرده واستصحت !!!

اما صاحبك في القصة فهو مادري وش ممكن نسمية يمكن دبشه!!

ما عنده ذمة !!!

ميت قلبه والعياذ بالله !!

اي قصه انا من كثر القصص ضيعت ..

الظاهر انها حقت الي في قسم الموتى هههههههههه

عاد هذا وش نسوي له طبيعة عمله جامده ومافيها غير موتت القلب >> تتوقعي عنده خبر عن خساير الاسهم هذا ؟

الظاهر ان الدنيا اخر همه .. بعذره من كثر الذبايح الي شاف

نرجع للب الموضوع

تعيش احسن عيشه ولو زوجها جفس

لأنها تشعر أكثر بأنوثتها معه

ولأنها تستمتع كل مرة تحس انها حسنت شوي من طباعه

وكل مرة تشوف نظرة ندم لموقف كله جفاسه عاشته معه في لحظة يفترض انها كلها رومنسيه

حتى لو اخذته عزة النفس ولا بين انه متحسف ليه يفشلها

وجهة نظر مقبوله ياشقرديه

اشكر لك مرورك الذي خصيتيني به من المواضيع التي في قسم التربوي والاجتماعي

فارس

فارس الميدان

04-12-06, 11:06 am

روح مرتاحه

ليش يعني كاتب خذ وخل ياعبقري زمانك ؟؟؟؟؟؟؟؟؟؟؟؟

مو انا الي قلت .. راشد الي قال

ارجعي للردود السابقه وشوفي

>>> بغيت اخاف

فارس

هامة حاسوبية

04-12-06, 04:34 pm

مساكين اتحملو بالدنيا بما فيه الكفايه

هههههههههههههههههههههههههههههههههههههههههههههههههه ههههههههه

عشان كذا أنا باخذ إماراتي منب آخذة سعودي

بس مع هذا أبي الجنة بعد

جناان

04-12-06, 07:17 pm

تخيلي

طلع دايم يتعطر من المثبت حق زوجته

وتقول مره لقيته متعطر من العطر حق الابجوره حقت الغرفه

قسم بالله ان هذا الرجل انا شخصياً اعرفه وهذا ماحصل مع زوجته

فارس هذا انسان
الحمد لله شكله ما يشره عليه
يعني >>لك عليه :4[1]:
حرااام يدخل ضمن رابطة الجفسين ههه

فارس الميدان

05-12-06, 01:04 am

umomar7

هههههههههههههههههههههههههههههههههههههههههههههههههه ههههههههه

عشان كذا أنا باخذ إماراتي منب آخذة سعودي

بس مع هذا أبي الجنة بعد

والله ونعم في اهل الامارات مع انهم يحبون هز الروس في عرضتهم مدري ليش

بس لا اوصيك عليك في اهل الشارقه خوذيلك واحد مطوع ومثقف ومحترم ومزيون

دمتي بود

هامة حاسوبية

05-12-06, 04:20 pm

[align=center]مع انهم يحبون هز الروس في عرضتهم مدري ليش

[quote]بس لا اوصيك عليك في اهل [color=#FF9933]الشارقه خوذيلك واحد مطوع ومثقف ومحترم ومزيون[/quot

فارس الميدان

06-12-06, 02:49 am

umomar7

هههههههههه قصدك اليوووله وااااااي تجــــــــــــــنـــــــــــــــن >>

ونعم بالله

فارس

فارس الميدان

09-12-06, 09:55 am

الكثير اتفق على كلام واحد وهو ان ارجل يتغير من محاولت المرأه في اصلاحه وتعديل الجفاسه الي عنده

كلامكم جميل وتوضيحكم احلى

بس بعض الحريم سمعت انها تقول شي كبير بصراحه عن التغيير

انا اقولكم وش السالفه :

الي قهرني قد مره سمعت انه وحده اتقدم لها مطوع وملتحي

قالت لماما حقتها .. لالا .. ما ابغاه مطوع

قالت امها من قالك انه بيبتل مطوع .. انتي خوذيه وعلى شوي شوي مع محاولتك بيحط خليجيه

وبعدها سكسوكه وبعدها تفنني فيه ..

وصارت امها تضرب لها امثله .. شوفي فلانه بنت فلان اخذت مطوع والحين يهبل حاط خليجيه او سكسوكه

شوفي فلانه بنت فلان اخذت واحد مطوع والحين تقول انه يحب يسمع اغاني

معقوله ان التغيير يوصل لدين والاتزان حتى عن طرق تأثير المرأه ؟؟؟

هذا سحر او زيادة غرام ؟؟؟

هذا الرجال خيخه او زوجته فيها قوه خارقه ؟؟؟

هذا الرجال كان منافق او زوجته سوت فيه شي ؟؟؟

هل التغيير بالتهديد بشي معين ؟؟؟

او من جمال الزوجه صار كل شي نعم بدون تردد ؟؟؟

>> اذكر واحد يقول لو اخذ فلانه بنت فلان نسيت امي واهلي وقابلتها

حتى لو كانت جميله وش عاد ؟؟؟

ارجو الاجابه على استفساراتي

فارس

الذاهبة

09-12-06, 11:38 pm

مرحبا بك فارس الميدان المحترم

اشكرك للمعلومات الحديدية ..

عموما هو يوم واحد فرحت أكلت فلافل أعوذ بالله الواحد ما يفرح بشيء عندكم !

//

بالنسبة لاستفسارك الأخير

شوف فارس

لا تصدق اللي يقول المرأة سحر و تستطيع أن مدري وشو و مدري وشو

تراه كله خرطن فاضي ياعمي المراة يا حبة عيني ما تقدر على شيء .. إلاااااااااااا :

إذا كان زوجها يساعدها على التغيير ..

يعني هو راضي إنها تغيره .. و عنده تقبل لذلك ..

وماعنده مشكلة يطيعها و يدللها و يحرص على رضاها .. إلخ إلخ

أما غيره .. هه فمعليش

صحيح بعض الرجال ينهبل إذا تزوجت وحدة حليوة

و لكن فترة و تخمد الطفّه ..

و عموماً الجميلات .. غالباً غبيات ..

تجيك شايفة روحها و مايقة بزينها ..

و تتكبر على زوجها .. و هو ما يقصر يتحمل يتحمل يتحمل .. لكن بيجي يوم و يقبع فيها ..

:(

و الحمد لله موزع الأرزاق و العقول ..

هه

فارس الميدان

11-12-06, 02:16 am

شوف فارس

لا تصدق اللي يقول المرأة سحر و تستطيع أن مدري وشو و مدري وشو

تراه كله خرطن فاضي ياعمي المراة يا حبة عيني ما تقدر على شيء .. إلاااااااااااا :

إذا كان زوجها يساعدها على التغيير ..

يعني هو راضي إنها تغيره .. و عنده تقبل لذلك ..

وماعنده مشكلة يطيعها و يدللها و يحرص على رضاها .. إلخ إلخ

أما غيره .. هه فمعليش

صحيح بعض الرجال ينهبل إذا تزوجت وحدة حليوة

و لكن فترة و تخمد الطفّه ..

و عموماً الجميلات .. غالباً غبيات ..

تجيك شايفة روحها و مايقة بزينها ..

و تتكبر على زوجها .. و هو ما يقصر يتحمل يتحمل يتحمل .. لكن بيجي يوم و يقبع فيها ..

اكيد ولازم بيكون عنده تقبل .. مو الاموره تبه حسب رغبتها ..

والله يالذاهبه ان كيدكم عظيم

الحرمه زي ماقالت سكون الليل تقدر تغير سريه بحالها

فارس

فارس الميدان

11-12-06, 02:19 am

الذاهبة
و عموماً الجميلات .. غالباً غبيات ..

تجيك شايفة روحها و مايقة بزينها ..

يعني انتي غبيه ؟؟؟

:18[1]:

ارجع واقول الحكومه ابخص

فارس

فارس الميدان

20-12-06, 02:47 am

~ مي ~

20-12-06, 03:12 am

اتوقع بيدها تقدر تسوي أي شئ
يعني تقدر تغيره للي تبغى
لكن بطولة بال شوي ....
مشكور فارس .....

ليالي الشوووووق

21-12-06, 02:19 am

ماااعتقد انه فيه للحين جفاسه في الرجل
يعني الزوج تغيرت نظرته للعواطف والمشاعر واصبح اكثر ليونه من السابق <<<<هذا الكلام حسب اطلاعي بس مو من تجارب

§¤~^~¤§ شوكلاته مالحه§¤~^~¤§

21-12-06, 04:31 am

عاد بصراحه مادري ودي ارد بس عجزت أجمع أفكاري مادري يمكن من البرد

الموهيم<<خلصي قولي الي عندتس

أحس أن الرجال بهالوقت أغلبهم مادري يعني خكاريه شوي<<تقضبي الباب

لاتفهمون عاد خكاريه بالمعنى المراد لا يعني أقصد لو هم بالعكس على جفاستهم أبرك لانهم مهما

حاولو يتصنعون النعومه والحنان الخ أحس تطلع أشكالهم غلط خاصة القصمان يعني<<احلفي

عشان تسذا انا افكر أخذ لبناني<<بدت تقط خيط وخيط

أقول شكلي طولت عليكم<<صايرتن تقل عجوز خخخخخخخخخخخخخخ

فارس الميدان

23-12-06, 01:43 am

الي قهرني قد مره سمعت انه وحده اتقدم لها مطوع وملتحي

قالت لماما حقتها .. لالا .. ما ابغاه مطوع

قالت امها من قالك انه بيبتل مطوع .. انتي خوذيه وعلى شوي شوي مع محاولتك بيحط خليجيه

وبعدها سكسوكه وبعدها تفنني فيه ..

وصارت امها تضرب لها امثله .. شوفي فلانه بنت فلان اخذت مطوع والحين يهبل حاط خليجيه او سكسوكه

شوفي فلانه بنت فلان اخذت واحد مطوع والحين تقول انه يحب يسمع اغاني

معقوله ان التغيير يوصل لدين والاتزان حتى عن طرق تأثير المرأه ؟؟؟

هذا سحر او زيادة غرام ؟؟؟

هذا الرجال خيخه او زوجته فيها قوه خارقه ؟؟؟

هذا الرجال كان منافق او زوجته سوت فيه شي ؟؟؟

هل التغيير بالتهديد بشي معين ؟؟؟

او من جمال الزوجه صار كل شي نعم بدون تردد ؟؟؟

>> اذكر واحد يقول لو اخذ فلانه بنت فلان نسيت امي واهلي وقابلتها

حتى لو كانت جميله وش عاد ؟؟؟

ارجو الاجابه على استفساراتي