السرعة القاتلة .. في شوارع بريدة

[الذاهبة]

السلام عليكم

هو سؤال و رد غطاه ..




ليه السرعة في قيادة السيارات ؟

ليه الهبل أمام إشارات المرور ؟

ليه تنطلقون أسرع من الريح و تضربون بواري بشكل مخيف ؟




ياخواني اتقوا الله فينا ..

يا سائق السيارة .. قـــُد بأمانة و مسؤولية

حرام و عيب و مايجوز لكم ترويعنا

و إلحاق الضرر بكم و بنا ..





هذا جنون .. جنون .. جنون .. لا تطاوعون الشياطين ..!



أتمنى أن اجد أي تبرير أو ملاحظات او أي حيا الله كلمة حول الموضوع ..

[عبدالله التويجري]

أختي الذاهبة


كل عام وأنت بخير ..


تصدقين إني رحمتك


لأنك تنفخين بقربة مخروقة


ومرور بريدة وأقولها بالفم المليان


ما عندك أحد .


تحياتي ،،،

[أبو حكيم]

أختي الذاهبة ,,,,, سلمك الله


أتفق معك في طرحك الجميل عن السرعة القاتلة ,,,,,, أتمنى أن يوجد لها حل !!!! وسريع جداً من خلال تكثيف

الحملات التوعوية للناس في مختلف وسائل الأعلام

ولكن دعيني أقف قليلاً عند ذلك الرجل المتثاقل والواقف عند الإشارة وبمجرد السماح للسيارات بالتحرك لحظة الضوء

الأخضر تجد ذلك المشغول في جواله أو يقتلك ببروده , وربما يتبادل أطراف الحديث مع زوجته وكأنهما في مقهى

فندق ضخم وبيد كل واحد منهما عصيراً !!!!! أو يوجه أطفاله المتراكمين في مقصورة السيارة !!! ...هذا الشخص

ليس له خانة في قائمة المخالفات في المرور المحترم ...!!!!!!!!!!

أعاقة السير بالبطء الشديد يجب أن يكون له مخالفة وعقاب ..... لأنة يسبب حوادث وإعاقة لمصالح الناس .....

أما الكبير في السن والصغير والأجنبي فيجب إعادة النظر في منحهم رخص للقيادة بشروط اكثر ولايكون إعطاء الرخصة بيوم واحد!!!!!

شكراً لك على هذا الموضوع الجميل

[الذاهبة]

يا أخوتي

انا أمس جلست أصيح عند الإشارة

فيه مجانين راكبين هايلوكس البقرة الجديدة

و مجانين ثانين راكبين جيب صغير

و يفحطون جنبنا

سيارة يمين و سيارة يسار

أول ما ولعت اللمبة قاموا يفحطون و بسرعة جنونية و يخطمون على سيارتنا

والله العظيم إني جلست أصيح



عيب وش كبري يصيحوني



المفروض ..

الوكالات المصنعة للسيارات الموردة للسعودية

المفروض يثبتون عداد السرعة على 40 كلم / ساعة

مو أكثر من كذا

و المفروض بعد ينشئون لنا شبكات مترو باص .. عشان المشاوير البعيدة ..



غير التوعية .. ماهنا شعب يبي يستقبل التوعية




يااخوان ليه حنا شعب متخلف ؟!

ليه ودي أدري ؟!

[خـــــــــــــــالـــــــــد]

اختي الذاهبه قلتيها ..


نحن شعب متخلف


من قائد السياره بتهوره وسرعته و عدم احترامه قوانين السير



الى المشاه و عبورهم الطريق بفوضويه

[فـخــــKSAــــــر]

انا جاني الضغط من السواقه بشوارع بريده لا بعد صرت اكبر عنيد بس خل احد يكبس بالنور قبل لا تفتح الاشاره ولا يضرب لي بوري ولله مااتحرك لو وراي الف بعدين من ركبو ( العد التنازلي لللاشاره صارت الشوارع حلبه سباق ) تخيلو من يصير الرقم على (1 ) يبدا السباق

مانقول الا الله يهدي شبابنا

[هين هين]

اختي الذاهبه
المشكلة ليس في المرور او الدوله
المشكلة فينا نحن انتي انا والجميع
اولهم انا تحت ضغوط معينه والجميع
يمرفبها نشتري لابنائنافي سن المراهقه
اداة خطيره جدآ تسمى السياره
تحت ضغط الام والمجتمع
والاقارب
ان لم افعل اتهم باالبخيل او المتخلف
اذآ نحن السبب تحياتي

[جلوي العتيبي]

اختي الذاهبه

ماسمعتي الهندي اللي يقول

ليش كل سعودي سرعه سرعه بعدين وقف قرقر مع صديق!!!! كثير مشكل


الغريب أن الأجانب اخذوا طبعنا اشوف سواقين يمشي بسرعه جنونيه !! والله لو اني كفيله لأسفره من ثاني يوم !!

الله يستر علينا جميعاً

[ابو متعب]

ياخواني اتقوا الله فينا ..

يا سائق السيارة .. قـــُد بأمانة و مسؤولية

حرام و عيب و مايجوز لكم ترويعنا

و إلحاق الضرر بكم و بنا ..


هذا جنون .. جنون .. جنون .. لا تطاوعون الشياطين ..!




هذا يكفي يا أختي لقد أوصلت الرساله

ولقد أسمعت لو ناديت حياااا

لكن ماودي أكمل البيت لعل الرجاء مازال فيهم



تحياتي للجميع ،،،،

[عبدالله الحلوه]

الطريق ليس لك وحدك !!



لو ادرك الجميع مامعنى هذه العباره وعملوا بها لوجدنا الحال افضل


المشكلة في نمط القياده لدينا وعدم احترام حق الآخرين بالطريق



تحياتي

[خالد التويجري]

تصدقين عاد .. يالذاهبه
إني جاي هالحين ابنزل موضوع عن السواقه .. وكنت ناوي احط عنوانه ..
ياجماعه وش هالسولقه لكم ...؟ فشلتونا ..!

لكن ماشاء الله عليكي سبقتين .. الله يطرح البركه فيك وفي طرحك ... ويصلح حال المسلمين شباب .. وشيبان ..بنات .. وعجز ..!

عموماً ياجماعه والله العظيم إن سواقتنا 90% منه يفشل ولا يسر العدو .. قبل الصديق .
موهوب معقوله تقل الواحد الشارع له لحاله (مطلعن به صك) ..؟؟!

اخطائنا بالسواقه كثر عدد شعر الرأس ... اتقوا الله في انفسكم وفينا .. وأنا اولكم ..؟!

لاحول ولا قوه الا بالله .
موضوع لي قديم بهذا الخصوص .....
http://www.buraydh.com/forum/showthread.php?t=78826





تحياتي

[ابو الحسن]

الذاهبه

تخيلي لو انتي تسوقين سياره او غيرك من بناتنا
وش يبي يزينون ها الشباب المراهق
هذا والبنات ما ساقن السياره

الله يهدي شبابنا

[The Free Man]

السيارة تساعد
و بعدين المفروض يمنعون كل الأغاني ذات الايقاع السريع لأنها هي السبب

بس عاد 40 يالذاهبه الله يهديك
هذي يبيلها ام كلثوم

[الذاهبة]

مرحبا بك استاذ عبد الله التويجري

كل عام و أنت و الجميع بخير ..

المرور .. هم راس العلّة ..

و هم أكبر مخالفين لأنظمتهم !!!



مثلاً مثلاً .. فيه حركة تقهرني يومياً ..

الإشارة اللي مقابل كودو القديم ..

دايم يوقف عندها شرطي .. و يحجز السايد اليمين ..

طيب مو عيب عليك تحجرنا وراك و حنا نبي ننزل الصفراء .. !!



تحياتي ..

[عبدالله التويجري]

مثلاً مثلاً .. فيه حركة تقهرني يومياً ..

الإشارة اللي مقابل كودو القديم ..

دايم يوقف عندها شرطي .. و يحجز السايد اليمين ..

طيب مو عيب عليك تحجرنا وراك و حنا نبي ننزل الصفراء .. !!

تحياتي ..

ألا تعلمين أن هذه تمت بعد عدة اجتماعات ودراسات ..


تحسبين المسألة ( حيسي ديسي ) أبداً كل شيء مدروس ..


والدليل أنه لو يصير حادث بأي شارع حطوا ( مطيب ) صغير وإذا تكرر ..


حطوا مطب أكبر جزاء لي ولك ولجميع اللي ماشين صح ( يعني حنا الضحية ) ..


والله يستر ما يسكرون الشوارع ؟؟!!!.


بعدين تراك نسيتي هالدبابات التي تجوب الشوارع ( خواطيف ) بأصواتها المزعجة


التي تصم الآذان وأشكالهم اللي تفشل ويقطعون الإشارة عادي ( ما أحد يقول لهم شيء ؟؟ ) .


تحياتي ،،،