عبدالله الحلوه مشرفا عاما على وكاله اجبان عالميه

[خـــــــــــــــالـــــــــد]

شقرديه , المتزن , بريماكس , الداب و السكب روح الشفق واخيرا قبل كم يوم عبدالله الحلوه .


من الاعضاء والزملاء الذين حظيت بشرف مقابلتهم .


دون تخطيط او موعد مسبق و ليست صدفه .


بل على طريقه اختي قصمنجيه هنا ..

يا أيّها الملأ أفتونـي في رؤياي.. في ( الذاهبة ) (http://forum.buraydh.com/showthread.php?t=94941)




ناتي الى مناسبه العنوان ..

و ذلك بان رايت فيما يرى النائم وكاني بجانب سياره اهم بالركوب ووقعت عيني على لوحه ( نيون كبيره ) لمحل لمحت فيها اسم اعرفه

اعدت النظر فعلا اسم مديرنا ابو فهد , عبدالله الحلوه موجود على اللوحه ..

قبل ان اقرا محتوى اللوحه مر في بالي تساؤل :12[1]:هل يكون هنا مقر منتدى بريده و في علمي في الحلم انني في الفايزيه في شارع الثلاثين ؟

اعدت النظر لاتاكد من تساؤلي ووجدت انه كُتِــب على اللوحه ..

( اسم شركه اجبان عالميه ) عندما استيقظت نسيت الاسم , و كُـتِـب في اسفله ...

المشرف العام ... عبدالله الحلوه

سالت مرافقي _ و لا اعلم من هو _ عن ذلك ..

فرد ان ذلك حركه ذكيه من ابو فهد في خطوة لصالح المنتدى , حيث انه شخصيه معروفه بحنكته وقدراته الاداريه و طلبت منه الشركه ان يكون مشرفا عاما عليها في المملكه فوافق بشرط ان تكون هذه الشركه العالميه راعيا رسميا لمنتدى بريده

و يهدف ابو فهد من ذلك ايصال منتدى بريده للعالميه .



تدرون في الحلم يوم قال لي الخبر مرافقي اللي مادري منهو بس اعرف انه عضو في المنتدى ( بعد ماصحيت جاءني الهام انه الزعيم <<<<<< صدقت نفسي انها رؤيه صالحه :a1:

قلت في نفسي وااااااااااااااااااوك كم بيعطونه راتب :ash::4_1_6[1]:



رمادينا ..

عاد ان صدق الحلم ترى لي 50 بالميه من الراتب : ::12[1]:



عاد من الحين انتبهوا ياخوان و اخوات الله الله بالمواضيع الزينه و المشاركات اللي تبيض الوجة فـــــ نحن على ابواب العالميه

[بريماكس]

ماشاء الله ..

أبو فهد .. بداين يطقطق بالأجبان :) ، شكله عقب سالفة مقاطعة البضائع الدنماركية قال ما للصلايب إلا أهله

أبو فهد .. عندكم جبن مجدول .؟

ماشاء الله .. خوش حلم و الله ..
على طاري أحلام الأعضاء ..

مرة شفت كرباج بالحلم .. طبعاً قبل لا أعرفه ..
و ليتني ما شفته على الطبيعة .. بالحلم أرحم ..
لا و من زينه بعد ... حتى بالحلم يقول تشااااو :) .


خالد .. أنت شايفني بالحلم بعد .؟
ماشاء الله .. شكل حلومك على كيفك :)

أنا بكراً بحلم بالزعيم .. و العندليب ..

بالتوفيق للجميع



من خلف الشاشة
بريماكس

[كرباج]

مرة شفت كرباج بالحلم .. طبعاً قبل لا أعرفه ..
و ليتني ما شفته على الطبيعة .. بالحلم أرحم ..
لا و من زينه بعد ... حتى بالحلم يقول تشااااو :) .

لاحول شكلك من كثر ماتناظر القمر بديت تحلم بي والله يستر لاتهذريبي !!!

على طاري الحلوم مره حلمت بـ ليلى علوي تبيع بليلة بحوش بيتنا الصراحه عجزت اقوم من النوم :c7: يوم رحت للعيال بالاستراحه قالوا ترا عشانا كشري !! << ياكبرها

ان جينا لحلوم الاعضاء من كثر مانقابل هالمنتدى حلمنا بتواقيعهم :c7:

تشااااااااو

[خـــــــــــــــالـــــــــد]

هلا و مراحب اخي بريماكس


تدري توي انتبه لــ ( قديـــــر ) اللي تحت اسمك.



ماشاء الله .. خوش حلم و الله ..

ايه خوش حلم بس لو يتحقق <<<<< خمسين بالميه من راتب مشرف عام على وكاله عالميه كم تجي ..:ash: اتوقع 15 الف ريال


خالد .. أنت شايفني بالحلم بعد .؟


كان حلم عن موضوع السكب روح الشفق هنا ..


ستركعون.. مثلما ركعت.
(http://forum.buraydh.com/showthread.php?t=76921&highlight=%C7%E1%D3%DF%C8+%C7%E1%D4%DD%DE)



ماشاء الله .. شكل حلومك على كيفك


لا ياشيخ :f5::rolleyes: من اللي قايل لك ان كيفي ودي اشوفك مال من وجهك بقسم المشرفين و طلعتهم


شكرا لحضورك اول واحد

[:: ابعـاد ::]

مرافقكـ مايعرف يفسر :)


التفسير كاالتالي :

كلمه كلمه وخطوه بخطوهـ

في البدايه تهم بالركوب يعني ماركبت ! لو انت راكب كان جا مطب وصحيت وماكملت لنا حلمكـ :)

الفايزيهـ = الفوز

شارع الثلاثين = عمر الذاهبه :) :)

الجبن = ملح وبياض

وهذا طول الله عمركـ يدل ان المنتدى سوف يتجاوز عمر الثلاين سنه وهو بنفس ملحهـ وبياضه ونقائه وصفائهـ


:)



** خالد **


احلام سعيـــــــــدهـ

مع العذر للذاهبهـ :for12: :for12:



ابعـــاد

.

[طاهرة النوايا]

مبروك أخوي عبدالله .. :p
>>>وش أسوي كنت داخله أبارك .. قلت منيب مخليتها في نفسي
--

اخوي خالد ..

بصراحة كان حلمك غريب جدًا ..

وأسلوبك في روايته جدًا رائع :)

وعساه خير

[خـــــــــــــــالـــــــــد]

هلا هلا كرباج

وينك ؟ من زمااااااااااااااان فاقدك


اجل اشوى اللي ليلى علوي و لا سهير القيسي :18[1]:


مادامنا في سيره الحلوم ..

اتوقع اني اذا ابحلم فيك ابشوفك تقول تشاو


و ........ تشااااااااااو لمرورك

[د . سداح]

ما شااااااااااااء الله خمسه و خميسه في أربعه تقسيم جذر ثمانيه و نص الظهر ..

أجل الحلوه صاير مشرف

على وكالة ألبان >>> بس لا يصير دنماركي ترى بنقاطع المنتدى :c9:

و الله يا أخوي خالد من كثر ما فريت بهالمنتدى صرت تحلم بالأعضاء اللي فيه .. أخاف بكره تقول أنك حلمت في

جوجل يلزم عليك بفنجال قهوة بحوش الزعيم >>>> باقة ورد طايفي مع التحيه لأبو عاشه :4_1_202[1


إيه صدز إن الحلووووووم تودي و تجيب و مثل ما يقول شاعرنا الكبير أبو الطيب المتنبي

ماااااااااااااكل قلبن ينشرى بالهدايا *** و لا كل كسر تفيد فيه الجباير







سيروا لا تقطعونا ترى الدكه وااااااااااااسعه ..



تقبلوا تحياتي ..

:36_2_1[1]

سداح بن ساااااادس ج ..

أقووووى عريف بالعالم ...

[خـــــــــــــــالـــــــــد]

اختي ابعاد حياك الله

وهذا طول الله عمركـ يدل ان المنتدى سوف يتجاوز عمر الثلاين سنه وهو بنفس ملحهـ وبياضه ونقائه وصفائهـ


اجل على كذا ابطالب ابو نوره بـــ خمسين بالمئه من عائدات المنتدى لهالحلم البشرى



شاكر مرورك مع قافله المبكرين

[غيدا]

.......والله اخوي.....ابغى انك تحلم......اني اكون....دكتورة....

والاستاذ عبد الله يستاهل.....بس الله يخلف ..فكرن انه صحيح...قلت ابرسل خاص...اهنيه....

لكن معليش استاذي الغالي ..عبد الله...0 هردلك )....وانا ابغى احلم فيك...بس ابخليك...مدير الشركة....تحياتي

[عبدالله الحلوه]

اول ماجاء على بالي اني نائم البارح جوعان :)



ليتك والله محلم اني مطرود من هنا




الا على طارئ الحلوم وسواليفها قبل كم يوم واحد من المشرفين اتصل بي يسألني عن بريماكس قلت الرجال طيب ويناقز حول المزاين قال اني محلم انه متوفي :(



الله يستر منكم ومن حلومكم




اخي خالد يكفي ان اكون محل اهتمامك فهذا اجمل مافي الحلم



تقبل تحياتي وتقديري ,,,

[الذاهبة]

هل يكون هنا مقر منتدى بريده و في علمي في الحلم انني في الفايزيه في شارع الثلاثين ؟

بالله نبي العنوان مضبوط .. مع إني ما آكل جبن بس عشان أربح المنتدى

وينه عن مطعم طي

هه يا قدمي

..




أبعاااااااااااااااااااااااااااااااد

لو سمحتي كلللللللللللش إلا العمر .. :(

هه




..

ياخي قبل لا تنامون أقروا الورد .. أو افتح الراديو على قناة القرآن الكريم

أو لا تتعشون ..

أو تعشوا المغرب ..

أو شوفوا لكم صرفة عاد ..



* أحلام سعيدي *

[بريماكس]

يؤ .. يؤ .!
شو هالحكي أبو فهد ..
شف رفيقك ذا إذا شفته مرة ثانية .. فقع عيونه .. عشان المرة الثانية يعرف يحلم زي الناس .!


أقول خلنا على الجبن بس
:)


.
.


من خلف الشاشة
بريماكس

[عبدالله الحلوه]

بريماكس


يقول المفسرون ان الموت بالحلم يعني طولة العمر



عاد متى العشى :)

[جلوي العتيبي]

هلا هلا ابوفهد وكيل أجبان

وانا وخالد ندور بشارع الثلاثين من قدنا


وهنا إبداع جديد في تفسير الأحلام مع المفسره ابعاد

هنا ابعاد وهناك بحبوحه

ماشاء الله ماشاء الله


لتفسير الرؤى

أبعاد وبحبوحه وتفسيرات مملوحه


بريماكس إذا شفتني في الحلم مر على طيبات الذكر وخلهن يفسرنه قبل اشوفه خخخخ

[امرؤ القيس]

على فكرة الاجبان دانماركية

يعني نبي نسوي مقاطعة لابو فهد


وانا اوعدكم انام بدري واشوف من احلم فيه


الله يستر مايصير حنيش الملز ولا لمبة شارع طايحة علي

[SilVeR]

والله هالأيام الأحلام كثيرة :)


الله يكتب فيه الخير والبركة .. :)


عاد مرة تصدقون حلمت إن ستايل المنتدى تغير ..


والحمد الله تغير :)

[جوااااااااد]

العزيز ... خالد

الحمد لله محل لبيع الاجبان ولا ورشة بالشارع التجاري

الله يستر من احلامك

تحياتي لمشرفنا المتألق

[بريماكس]

أهلين أبو فهد .. <== ما تلاحظ أننا حقنا موضوع الرجال .. صارت السالفة لنا ..

أيه صح أصلن أنت المدير و أتحداه يقول شيء .. :)


أبشر بالعشاء .. بس من وين تبيه ..
فيه عدة خيارات :

1/ (صبة) من فلافل الأربعين .
2/ فول و خبز تميز من فوال النخيل اللي بالبشر .
3/ رز بخاري و دجاج شواية على الفحم :) .
4/ نوااااااشف .. <=== يالله .. من زماااااان ما تعشيت نواشف .


إلا عاد سان ودك نطلع و نأخذ الكاتم و أحوف لكم النثرية <== :) .
على طاري الطبخ .. سد طلعنا سوا مجموعة شباب .. عاد أنا مسوي فيها أبو فريد مدري عيسى
قلت و لا واحد يلمس العزبة .. أنا اللي بطبخ أنتم أجلسوا هنااااك .. <== بعيدين عن منشان المحوقه ..

المهم .. طبخت الغداء و سكرت الكاتم .. لمين ينشف ..
يوم جهز الأكل .. ناديت ربعي .. عشان نفتح الكاتم سوى .. <== زي اللي يقطعون التورته :)
المهم .. فتحنا الكاتم .. و ياليتنا ما فتحناه ..
ليتنا متغدين شابوره أصرف ..
تدري ليه .؟
أدري أن ودك تدري ، لأنك من بريدة و أهل بريدة مشااافيح .. (فضوليين) :) .
المهم .. يوم فتحنا الكاتم .. و نلقى (قوطي) الصلصلة متكي فوق الرز ..
<== طايح في وسط الكاتم و أنا ما دريت .. و من عقبه ما لمست عزبة .. أجلس فأنت الآمر الناهي .

و هو أنت يا أبو فهد أنت و الجبن .. نبي نحشر الجبن بالسالفة :).. عشان ما يزعل علينا خالد
على حوسة الموضوع ..



.
.


من خلف الشاشة
بريماكس

[المتزن]

أخي الكريم / خـــــــــــــــالـــــــــد

جميل أن يحلم بك أحد .. والأجمل أن يكون الحلم جميلاً .. ويكتمل الجمال إذا كان الحلم من شخص له مكانة وقامة كقامتك الرفيعة .

وقد تحقق الأول والثالث , وبقي الثاني ( اللي هو الحلم ) .. والله يستر لا تصير شايفن دراكولا أو وحش . :36_1_18[1


أما حلمك بالأخ عبدالله الحلوة فتفسيري له باختصار هو :

الأجبان : ترمز للنقاء

الشركة العالمية : ترمز للطموح

شارع الثلاثين بالفايزية : يرمز للمنتدى الذي يحمل اسم مدينتنا


بقى شيء ما وضحناه ؟؟!

أعتقد كل شيء واضح . :)

( واحد صدق نفسه يقالـّه ابن سيرين على غفلة .. أقول قم بس قم مشينا )



وتقبل تحياتي 00
المتزن

[خـــــــــــــــالـــــــــد]

اختي غصن الرند

مرحبا بك بالرغم من حداثه عهدك معنا الا ان قلمك فرض وجوده

و حضورك فخر لي


قلت منيب مخليتها في نفسي


مارخّص الله الا الحبر باركي لابو فهد من اليوم لرمضان الجاي :rolleyes:

بصراحة كان حلمك غريب جدًا ..

وش اللي خلان اكتبه لكم هنا الا لاني شفته غريب


وأسلوبك في روايته جدًا رائع


شهادة اعتز بها


وعساه خير

امين


شاكر جدا مرورك

[راشد الصليحان]

عندي لكم فكرة ليش ماتقلبون المنتدى لتفسير الرؤى !


ماشفتوا القنوات الفضائية المتخصصة في تفسير الأحلاااام !

صار تفسير الأحلام مثل فيديو الكليب عند المراهقين !

والمشكلة أن كل واحد عنده احساس أن تفسيراته واحلامه تصدق كثير !

شكرا خــــــــالد اتحفتنا بالأجباان

[خـــــــــــــــالـــــــــد]

هلا و مرحبا بصاحب الحضور الجميل سداح بن سادس ج


على وكالة ألبان >>> بس لا يصير دنماركي ترى بنقاطع المنتدى

افا هذا اللي ما حسبنا حسابه



أخاف بكره تقول أنك حلمت في

وش دعوا شايفني اكل او اعض تقول اخاف تراي بالحلم اوزع حلاو واسال الزعيم عزمته على حلاو بقر بشارع الثلاثين



بس تراي مافهمت وش العلاقه بين حوش الزعيم وابو عاشه و الهدايا وابو الطيب

كل الشكر مجددا لاقوى عريف بالعالم

[خـــــــــــــــالـــــــــد]

اختي غيدا مرحبا بك


.......والله اخوي.....ابغى انك تحلم......اني اكون....دكتورة

لايصير معي مصباح علاء الدين:f5:

وانا ابغى احلم فيك...بس ابخليك...مدير الشركة....تحياتي


ماتبون نائب لمدير هالشركه:12[1]:

شكرا لمرورك

[عبدالله الحلوه]

الحمدلله اجمع المفسرون على بشرى رؤياك خالد


اكثر من احلامك وابشر باللي يسرك


:)


تحياتي للجميع

[أبو أميرة]

إن صدقت الرؤيا فإن زوجتك سوف تلد بنتا وإن لم تكن متزوجا ياعبدالله الحلوه فسوف تتزوج عن قريييييييييييييب والله تعالى أعلم




.
.
.
.
.
.
:36_2_1[1]:36_2_1[1]:36_2_1[1]

راح فيها الشقيق وإلا الدوسري






....................

[أبو أميرة]

.
:36_2_1[1]:36_2_1[1]:36_2_1[1]







.........................

[خـــــــــــــــالـــــــــد]

مرحبا رمادينا بطل حلقتنا

ليتك والله محلم اني مطرود من هنا

من غير شرررررررررررررر عاد مالقيت احد يحلم لك هالحلم الا انا:1856:





الله يستر منكم ومن حلومكم

و الله ترى حلومي شينه احيانا تصدق يحمد ربه بريماكس ان حلمي به كان خذاريف عن شجره السكب روح الشفق و خرابه ومدري ايش مب موت مثل بعض ناس:12[1]:



شكرا ابو فهد لسعه صدرك ومرورك

[خـــــــــــــــالـــــــــد]

مراحب بالذاهبه

بالله نبي العنوان مضبوط .. مع إني ما آكل جبن بس عشان أربح المنتدى

وينه عن مطعم طي

تصدقين عاد ان احساسي قال لي انه في مكان ميد بزاويه التقاطع على يمينك و انتِ طالعه من الصفراء متجهة للفايزيه.




ياخي قبل لا تنامون أقروا الورد .. أو افتح الراديو على قناة القرآن الكريم

أو لا تتعشون ..

أو تعشوا المغرب ..

أو شوفوا لكم صرفة عاد ..

بالعكس هذا حلم زين والدليل صحيت نفسيتي مرتاحه مو منقبضه و كان بعد صلاة الفجر

اجل المنتدى في طريقه للعالميه و نخاف.


شكرا اختي الذاهبه مجرد مرورك يشرف الموضوع

[ابو هليل]

بصراحة لي كم يوم وانا أشوف هالموضوع وكل يوم أقول ابدخله بس بعد شوي وعلى هالحال إلين جت الساعة اللي دخلت وأنا مسوي نسخ لرابط باقة ورد أبهني أبو فهد (( رجل الأعمال الجديد )) وآخرتها يصير حلم ......ز

أخوي خالد

الظاهر إنك مطوزل عند الكمبيوتر لك مدة تفرفر بهالمنتدى ونمت على الكيبورد وعلشان تسذا طلع لك ابو فهد بالحلم ....
وبعدين يوم انك حلمت فيه ما لقيت شي يمسك وكالته إلا الجبن ......


قبل لا أسدح ردي بموضوعكم قلت صعبة انك تجيب ورد وترجع به إلا هاكم اياه ...

http://www.9ll9.com/up/uploads/b95c3cb51a.gif

ودمتم سالمين

[خـــــــــــــــالـــــــــد]

رمادينا + بريماكس

وش رايكم اغير العنوان و احطه سواليف بريماكس الرماديه ؟ :12[1]::f5:

[أحمد المهوس]

أسعد الله مشرفنا المفضال عبد الله , ونال مبتغاه حيثما أحب واجتهد في الطلب . . .

له منا كل دعوة صادقة من قلب يحب لأخيه ما يحب لنفسه . . .

أبو فهد , نتمنى له كل سعادة وهناء . . .

أبو فهد , نسعد بسعادة غامرة حين يرى ما أمـَّل به واقعـًا يراه بين يديه ( أمامه ) لا حلمـًا ...

الود لك أخي............

[مبحوحة الصوت]

فضيلة الشيخه بحبوحه من هيئة الافتاء وتفسير الرؤى

اقول والله اعلم انك متعشي صامولي بجبن ولاشبعت!!!



وانصحك يااخي الكريم انك تنام على جنبك الايمن وتغطى زين 00


يعتمد: فضيلة الشيخه حفظها الله

[خـــــــــــــــالـــــــــد]

هلا ابو شهد

هلا هلا ابوفهد وكيل أجبان

وانا وخالد ندور بشارع الثلاثين من قدنا

باقي الشباب والشابات لازم نشوف لهم حلم عشان كل طاقم المشرفين يصيرون عالميين



اسعدني مرورك اخي الزعيم

بس المره الجايه اذا بنطلع ياخي احسب حسابك تباشر ما اموت جوع حتى بالحلم

[خـــــــــــــــالـــــــــد]

هلا هلا ابو عدي


على فكرة الاجبان دانماركية

يعني نبي نسوي مقاطعة لابو فهد

لاتقولونن شي ما قلته <<<<<<<< خاف يفصله الرمادي

وانا اوعدكم انام بدري واشوف من احلم فيه

ترى الحلوم الزينه ماتجي الا بعد صلاة الفجر <<<<<<< خبره


شاكر مرورك اخي احمد

[خـــــــــــــــالـــــــــد]

هلا بدكتورنا الغالي

والله هالأيام الأحلام كثيرة

يقولون فيه فيروس الاحلام منتشر بالجو هاليومين ليتك تعطينا التطعيم بما انك دكتور المنتدى



عاد مرة تصدقون حلمت إن ستايل المنتدى تغير ..


والحمد الله تغير

اجل كثر لنا من الحلوم السنعه

تسلم على مرورك اخي د. المعتصم

[خـــــــــــــــالـــــــــد]

مرحبا بك اخي جواد

الحمد لله محل لبيع الاجبان ولا ورشة بالشارع التجاري

ياشيخ اهم شيء شفنا ابو فهد بالحلم ,, من قدي محلم بالمدير الاداري




الله يستر من احلامك

ايو الله الله يستر

شاكر مرورك

[خـــــــــــــــالـــــــــد]

مرحبا بك اخي المتزن

والله يستر لا تصير شايفن دراكولا أو وحش .

لا ما اظنه لاني ببساطه متخيلك بعيد عن ذلك

و حلمي فيك منذ زمن بعيد نسيت حاليا تفاصيل الحلم لكن اذكر انه جاء بعدموضوعك بقسم المشرفين .. وظائف وتخصصات واهتمامات أعضاء هيئة الإشراف ... الذي كان للتعارف

ووجدنا ان بيني وبينك قواسم مشتركه كثيره:9[1]:


أما حلمك بالأخ عبدالله الحلوة فتفسيري له باختصار هو :

الأجبان : ترمز للنقاء

الشركة العالمية : ترمز للطموح

شارع الثلاثين بالفايزية : يرمز للمنتدى الذي يحمل اسم مدينتنا

لا بعد هالتفسير خلاص ضروري نفتح قسم استشارات نفسيه وتفسير احلام بالمنتدى :a1:

لك عمييييييييييق شكري وتقيري

[خـــــــــــــــالـــــــــد]

اخي راشد


عندي لكم فكرة ليش ماتقلبون المنتدى لتفسير الرؤى !


ماشفتوا القنوات الفضائية المتخصصة في تفسير الأحلاااام !

صار تفسير الأحلام مثل فيديو الكليب عند المراهقين !

والمشكلة أن كل واحد عنده احساس أن تفسيراته واحلامه تصدق كثير !

افاااااا ؟


وراك حمق علينا يالحبيب مب عوايدك:12[1]:



شكرا خــــــــالد اتحفتنا بالأجباان
شكلي اشم ريحه تطنز:12[1]::4_1_6[1]:

[خـــــــــــــــالـــــــــد]

رمادينا


الحمدلله اجمع المفسرون على بشرى رؤياك خالد


اكثر من احلامك وابشر باللي يسرك



ابد طال عمرك بس نص راتب مشرف عام شركه الاجبان و كم كرتون جبن كل اسبوع <<<<<<< مب طموح ابد

ما تقصر رمادينا كلك بركه

[خـــــــــــــــالـــــــــد]

اخي ابو اميره


إن صدقت الرؤيا فإن زوجتك سوف تلد بنتا وإن لم تكن متزوجا ياعبدالله الحلوه فسوف تتزوج عن قريييييييييييييب والله تعالى أعلم


لو كنت محلم هالحلم قبل شهرين لكان تصديق تفسيرك وقع قبل وصول العروسه المولوده الجديده لابو فهد


و الرجال متزوج اصصصصصصصص لاتسمعك ام فهد


يعني شف لنا تفسير ثاني



شاكر مرورك

[خـــــــــــــــالـــــــــد]

اخي ابو هليل


الظاهر إنك مطوزل عند الكمبيوتر لك مدة تفرفر بهالمنتدى ونمت على الكيبورد وعلشان تسذا طلع لك ابو فهد بالحلم ....
وبعدين يوم انك حلمت فيه ما لقيت شي يمسك وكالته إلا الجبن ......


غالبا اخر شيء اطقطق فيه قبل انام هو كمبيوتري ولا لي فيه غير منتدى بريده واعضاؤه فطبيعي اني احلم فيهم

لكن تصدق عاد اكثر ما يغثن اني احيانا احلم ان المنتدى عيا يفتح


بس سالفه الجبن انا مثلك مستغرب لها وش جاب الجبن ؟ بس احسن من ورشه مثل ماقاال اخوي جواد


شكرا لمرورك

[خـــــــــــــــالـــــــــد]

كاتبنا الفاضل احمد المهوس


أسعد الله مشرفنا المفضال عبد الله , ونال مبتغاه حيثما أحب واجتهد في الطلب . . .

له منا كل دعوة صادقة من قلب يحب لأخيه ما يحب لنفسه . . .

أبو فهد , نتمنى له كل سعادة وهناء . . .

أبو فهد , نسعد بسعادة غامرة حين يرى ما أمـَّل به واقعـًا يراه بين يديه ( أمامه ) لا حلمـًا ...

الود لك أخي............

امين يستاهل ابو فهد كل خير

شاكر لك حضورك وبالنيابه عن الرمادي شاكر لك دعواتك

[خـــــــــــــــالـــــــــد]

اختي بحبوحه



اقول والله اعلم انك متعشي صامولي بجبن ولاشبعت!!!

زين ,, اجل المره الثانيه ابصف ذهب الوالده قدامي وانام


لعلي احلم اني صاحب مصنع مجوهرات

شكرا لك وساعمل بنصيحه فضيلتكم