تحذير خطير لإهالي بريدة

[العفش]

على طول ابدا بالتحذير

خلي جامع الشيخ محمد بن عبد الوهاب < جامع الونيان >على يدك اليسار وأنت متجه شرقاً


تجيك ياطويل العمر إشارة مرور لف يمين وأتجه جنوباً

بعد حوالي مسافة كيلو ا واحد على يمينك مستودعات العليان وعلى يسارك المستودع الخيري

خفف السرعة شوي وبعد حوالي 400 متر إلتفت يسار

هنا موقع التحذير مستودع خاص للأغذية والزيوت اللتي تستخدم في المطاعم للطبخ والبروستد

هنا الخطر الأن << تقف تريلتين محملات زيوت طبخ عند المستودع منذ يوم الأثنين السابق >>

والزيوت تصب على التراب والسبب هو والله اعلم إنتهاء صلاحية الزيوت


والمشكلة ليست هنا ولكن هل يقوم صاحب المستودع بدخول هذه الزيوت لمستودعة وبطريقة او باأخرى

يتم تصريف هذه الزيوت على المطاعم ربما بنصف السعر

ولكن هل بلدية بريدة تعلم عن هذه الحمولة ؟




والله لاأعتقد فبلدية بريدة نايمة باالعسل < والدرعى ترعى>

ومدام هالزيوت وغيرها المستفيد منها الأجنبي فهي ترحب وعلى الرأس والعين

وما زيادة اسعار اللحم ببعيد المهم الأجنبي يستفيد < وجيوبه عامرة>


ولكن إبن البلد ماعندهم غير الحديد والنار


وشكراً

[worldly]

صورة بدون تحية للجهات المختصة

[المهره]

كودكم تتوبون من اكل المطاعم اللي كبر كروشكم خخخ خخخ

[XxالمشاكسXx]

يا ابن الحلال خلــــــــــــه على الله

وربك يعين شفناا انتخباات البلديه

ولا شفنااا تنفـــــــيذ كلااااااااام

عـــــــــــــــــــــلى الفاضي



تشكراااااااااات ع التنبيه يا بعد دلبي انت

[خالد التويجري]

اخاف المستودع لواحد بالبلديه. يعني رحنا وطي . يخلف الله .الا كم يبيلها هالحموله وتخلص من المطاعم لشروها.......؟؟
لغدينا نقاطعهم لمى تخلص.!

[مسيطيح]

يالله يالبلديه خشوا قبل ما يهرب الزيت

[الكبري]

الأخ العفش

الله يعطيك العافيه

ليش مستعجل

زعل عليك سيبويه

وزعل أحمد المهوس

بس أنا لا

سأتصل عليهم

وخلهم ما يسون شيء

وش عنده :20[2]:

لكن ماودي نستعجل ونضلم الرجال صاحب المستودع

تحياتي

[العفش]

على كلام عبالعزيز الهزاع في شريط حديجان ومريبظ

يوم كانو راكبين الطيارة وصكواالباب عليهم


< إقمح هذي والله البلشة هذي والله الورطة وش الحيلة دبر نفسك >

أبشركم تم مصادرة الزيوت المنتهية الصلاحية من قبل مفتشي بلدية بريدة الشجعان البواسل

وفي مقدمتهم ريس او مدير البلدية السلطان او الأحمد < إختاروا واحد >

وتم عمل اللا زم وتم تلاوة بيان العقوبات اليوم < الساعة الثانية عشر وخمس وأربعين دقيقة ظهراً >


وتنص العقوبات على مايلي.

1__ يتم إنزال كامل حمولة السيارتين داخل المستودع وبسرعة البرق بمساعدة ونوش البلدية .


2__ أخذ تعهد خطي على صاحب المستودع بسرعة تصريف الزيوت على مطاعم بريدة

خوفاً من حدوث إنفجار هائل للتنك من شدة الحرارة وإنتهاء الصلاحية .

3__ الأمر على صاحب المستودع بتحميل عدد من السيارات من المواد الغذائية المخزنة والذهاب بها

لمنازل اللجنة لإاجراء الفحص عليها في مطابخ المنازل

4__ التكتم الشديد على ماجرى < سكتم بكتم >


5__ الإشادة بمراقبي البلدية البواسل والتنبه عليهم بعدم المرور باالقرب من المستودع المذكور .


وتم التوقيع على البيان من قبل اللجنة المكلفة وصاحب المستودع ابو شكيم



<<<< العيون الساهرة لم تنم >>>>

[ابو-زياد]

السلام عليكم ورحمة الله وبركاته


الله يلبسك الصحة والعافية بعض المسؤلين في الديرة نايمين في العسل ولا نقدر نتكلم ...
لا كن جزاك الله خير اخي على هذا التنبية

[راعى الزين]

وش صار على الزيت يا ناس


تم التجاوب
او اجي انا بنفسي !!!!!!!!!!!!!

[الإبراهيمي]

اللي صار على الزيت منتهي الصلاحية مثل اللي صار على أم شوشه "البرسوبس" .....

هدر فلوس على تجميل هاشجره اللي إلى الآن قضيتها ما إنحللت ....

يقولون عند البلدية مكتب إسمه تنسيق الحدايق .... ربما هذه هي المشكله لأنه لو أزيلت هالشجره ما بقا ببريدة شيء يشغلهم ويستنفذ ميزانيتهم .... ترانا بدون هالمكتب مرتاحين ...و يبدوا أن مدير هالمكتب ساكن شمال ولهذا السبب الزهور والنخيل والأشجار الحلوة الجميلة اللي تفتح النفس شمال والشوك وعدم التنسيق في الجنوب ... صدق اللي قال يا ويل اللي أمه ماهيب بالدار ما يأكل ويشرب إلا النكد والغبار!!!!


عموما... موضوع الزيت له أمثله كثيره وهو واحد من سلسلة مهازل ....

الموضوع يا إخواني ماهيب مسألة إنتهاء فترة صلاحية من عدمها ..... اللي ساكن بالنازية ما عليه إلا زيارة البقاله اللي بالمحطة الجديدة هناك تجدها بدون مكيفات ... الجو حار ومهما كان المنتج ضمن الصلاحية يعتبر علميا غير صالح للإستهلاك الآدمي لإنتفاء شرط واحد ومهم وهو الحفظ عند درجة الحرارة اللي بموجبها ووفق على منح هذا المنتج فترة الصلاحية لأن تلك الفترة مشروطة بدرجة حرارة ورطوبه محدده.... أقول محدده ويجب أن تكون معرَفة على بطاقة العلبه .....

وعلى المستهلك أن يربط أثناء شرائه أي منتج غذائي فترة الصلاحية بما ذكر على البطاقة من درجة الحرارة التي يجب حفظها فيه فإن كانت الدلائل تشير إلى عكس ذلك على المستهلك تجنب شراء ذلك المنتج ودورنا تنبيه السلطات على مثل هذه المخالفات الخطيره....

لكن مالسبب في حصول مثل تلك التجاوزات/الأمور....

ومن مبداء إذا أردت أن تطاع أطلب المستطاع ....

هل سأل أحدنا نفسه عن خبرة المسؤلين عن الأغذية في البلدية ماهي ؟ وهل ياترى هي الجهة المؤهله لكي يناط بها مثل هذه المسؤلية الجسيمة والتي تهم بالدرجة الأولى صحة المواطن ؟ وهل لديها الإمكانيات لكي تقوم بواجبها على الوجه الأكمل ؟ ......

قد يكون المسؤل عن مثل هذه الأمور موظف أنيطت به هذه المهمة إما بالترقيه ...

أو خريج علوم أغذية دليله كتابه ...

ونحن نعلم من كان دليله كتابه كان خطأه أكثر من صوابه ...

أو خريج علوم بيطرية ...

أو أن لديه من الشهادات ما يعجز الشخص عن تعدادها لكن ...

هل كل هذا مقرون بتدريب عملي في مجال الأغذية مع جهات علمية متخصصة كتلك الموجودة في أمريكا والمعروفة إصطلاحا ب FDA (إدارة الأغذيه والعقاقير الأمريكية)

أنظر إلى جهل المسؤل عن هذا القطاع الحيوي ... فأين هو والشروط الواجب إتباعها عند منح رخص لمسوقي الأغذية على حافلات والتي واقعها أقرب ما يقال عنها أنها مزبلة في مزبلة لتعرضها للأتربة والغبار وعادم السيارات والحرارة العالية التي قد تزيد عن السبعين درجة داخل تلك الحاوية المغلقة (سيارات التوزيع) ....

فوجود فترة الصلاحية وبمثل هذه الظروف أعتبرها تهاونا في حق المواطن ومسؤلية كبرى فعلى البلدية أو الجهة صاحبة العلاقة التصرف بسرعة لأنها قمه في الغش التجاري ... والمتضرر هو هذا المسكين " المستهلك" لأن أغلب المواد المضافة تتكسر بفعل الحرارة وينتج معها مواد قد تكون سببا لأمراض خطيرة....
:c6:

[العفش]

الأخ الإبراهيمي

يما انت بايع روحك ولا انت رجل شجاع وفدائي


ماهذا اللي ذكرت في ردك Fda ,ydvig وغيرها من شهادات

اكيد مدير او ريس البلدية اسف الأمانة

وجميع العاملين فيها يبغون يسوون لك كمين ويمسكونك ويطبقون بحقك اشد الأنظمة والمعايير العقابية

وردك اللي ذكرت لو يمر على مدير او ريس البلدية السلطان او الأحمد يبون لهم مترجم متخصص يشرح لهم ماكتبت


انت مادريت إن اعلى شهادة يحملها منسوبي البلدية هي الثانوية وتخب عليهم

لايغرك مسمى مهندس او دكتور وغيراها من الخراط

شف ياأخي المراقبين باالبلدية احسن واحد فيهم يصلح مساعد طباخ او بنشري


ركد الرمي عليهم لاتبين ريحتهم ياأخي