بيوت الطين منصور بن عبدالله المجيدل

[ريح الشمال]

:x3:بيوت الطين



بيوت الطين لا شفته تذكرني زمانٍ دار

زمانٍ رغم ما به من قساوة ماحدٍ سبه

وهذا بيتنا واطلاله اللي عودت تذكار

وذاك الروشن وهذا مكان الزير والقبه

وصفة جدتي ما باقي الا بابها واجدار

وصوت الباب يصفر كلما هب الهوى هبّه

وهذا ما بقى من صفة امي والغمى منهار

غماها من جذوع الاثل واحلى من غمى الصبّه

وهذا كان مطبخنا وهذا هو مشب النار

قبل لا نعرف الغاز وقبل لا تطلع الدبّه

وهذا هو مجبّبنا وهذاك الكمر ووجار

وذيك الدكه القصيا وهذا الحوش نلعب بّه

سقى الله ذيك الايام الخوالي ليتها تندار

سقى الله لا تجمعنا وصارت عندنا الشبّه

سقى الله يوم تبرق ثم ترعد والسما مطار

وصوت المثعب يسورب وكنك جالس بجنبّه

وجتنا الجدة تسبحن علينا يوم هنا اصغار

على شمعة سراج القاز قبل لا نعرف اللمبّة

زمن به للطفولة في خيالي ذكريات اكثار

يا ليته ترجع الايام لوقتٍ راح واحبّه

ولكن ما مضى هيهات يرجع والزمن داور

يروح الوقت مع ناسه ويبقى ربي وربّه