لا تفكر تنبسط بعرق الطريفة بعد اليوم

[الصامل]

طلعت أنا وأعيالي نبي نفرح نغير جو عقب نزول هالامطار وهالخيرات لكن صراحة تمنيت أني في بيتي جالس وملعنن ابو خامسي ولا طلعت تنقهر إذا شفت شىء يمسك ولا تقدر تسوي حاجة له وهذا الشىء يمسنا كلنا اللي هو احتكار الاماكن في عرق الطرفية من قبل اصحاب المخيمات يحمي له مساحة بحدون عشرة الاف الى عشرين الف متر ويضرب بها الخيام أمهات ويالله الي يبي يكشت يجي يستأجر مني قريب للخط وقريب لتأجير الدبابات وقريب للخدمات وإذا ما تبي رح اكشت بعيد لحالك و لوحدك بعدين صدقني والله تمنيت إنها الارض ليتها مملوكة لأحد غير البلدية على الاقل يقدر يتحكم وياحفظ عليها أو ليتها لسمو الامير متعب من ضمن حماه أنا واثق مئة بالمئة انهم ما راح يطبون ذيك المنطقة ولا يحلمون بها وقولو آمين والله لا يوفق من راح يطالب فيها منتزة ما دام ما يجيي منه الا المغثة إذا لم يوضع حد لهذا الموضوع بعدن وين اللي انتخبنا بالمجالس البلدية عهودهم ووعودهم بما يخدم مصلحة المواطنين وليس مصلحة مواطن على حساب مواطنين أخرين !!! حاسوا المنطقة كلها لكن الشكوى لله ما أدري من الامر متعلق فيه هي وزارة السياحة والآثار والا هيئة حماية البيئة والثرة الحيوانية عندنا والا نوصل الامر لهيئة حقوق الانسان وجمعية السلام الاخصر يمكن ينفعون !!!! لأن الامارة والبلدية أكبر من أن تضع حد لهذا الامر .
وإذا أستمر الوضع على ما هو عليه وهذا ما أنا متأكد منه فلا يلوم عريق الطرفية الا نفسه لأني صراحة رايح ادعي عليه بالعجاج والجفاف والغبار والبرد والحر ويمكن يصل الأمر أن ادعي عليه بالزلزال إذا تطور الامر .

[شقرديه]

اضافة مميزة من الصامل

لأني كنت بتكلم عن الموضوع

أنا عن نفسي اخترشت على التطعيس

كان شيء جنان

تخيلو جيب ربع وهمر لعبو بذيك النفود لعب

رشاقة حلاوة دلع

انا اخترشت

ما تمنيت الا لو معي همر

اما قضية المخيمات فهي اولا احتكار

والدبابات مبالغ بسعرها ((مية بالساعة))

ولا فيه خدمات اطلاقا

بس فيها هيئة وهذا شيء في حد ذاتة نشكر الجهات القائمة عليها وبقووووووووة

وفيها ناس ((إيكة))

الاحداث طويلة ولا ابي اخوض بالتفاصيل

لكن الطرفية تبي اهتمام مرافق دورات مياة مساجد مخيم ترفيهي ومخيم دعوي وتنظيم وتحديد الاسعار لتشجيع السياحة بالمدينة

لو هي لعنيزة كان شفتو شيء

بعدين دامها معتمدة رسمية منتزة وطني المفروض لها ((خط محترم)) سيدين مثل الاوادم

تحياتي وتقديري

[عبدالله30]

لاخ الصامل00

غريب امرك 00ماتقوله حسد00

يااخي اضرب لك مخيم احد منعك00

بعدين اللي راح يكشت يوم بس افضل له يبعد عشان يحصل اماكن نظيفة وبعيدة عن الاخرين0

البر واسع والنفوس يجب ان تكون وسيعه0

تحياتي لك0

[أبو حكيم]

اخي الصامل ..... اؤيدك إلى حد ماء ... اما النظرة التشاؤمية للأمور بهذه الطريقة فأني اتحفظ على ذلك



قلة الخدمات ناتجة من قلة الوعي لدى المجتمع بأهمية السياحة في البلد والناتج الأقتصادي وطريقة تفعيل المهرجانات .... وجذب المتنزه للطرفية
1- بعقد مهرجانات ومسابقات رياضية للسيارات بطريقة الراليات الصحراوية وكذلك للدبابات الصحراوية....

2- اقامة مسابقات ثقافية وعلمية في فترة الأجازات الشتوية والعيد

3- الدعاية قبل الأجازة بوسائل الأعلام عن اقامة مهرجانات ومسابقات

4- تخصيص ميزانية ضخمة لتفعيل هذه المهرجانات



والتعاقد من الشركات التسويقية بإقامة مثل هذه المهرجانات ويكون ريعها للشركة نفسها ,,, والتسهيل عليها من ناحية الأجراءت النظامية بقدر الأمكان وتشجيع غيرها من تفعيل دور المتنزه في تحقيق الريع الأقتصادي لهذا الموقع اما القطاعات الحكومية ... الأمانة والشرطة والدفاع المدني والأسعاف ..... يكون دورها اشرافي فقط


اخي الصامل .. لا تكون نظرتنا قاصرة على حماية المواقع ومن يحوز على اكبر قدر ممكن من المواقع !!! والتركيز على امور لاتخدم السياحة



اما قولك .... ( وإذا أستمر الوضع على ما هو عليه وهذا ما أنا متأكد منه فلا يلوم عريق الطرفية الا نفسه لأني صراحة رايح ادعي عليه بالعجاج والجفاف والغبار والبرد والحر ويمكن يصل الأمر أن ادعي عليه بالزلزال إذا تطور الامر .) اخي لعلها مجرد قول ومزحة فقط ,,, لأنك تتعدى على الله إذا كان جداً



يبقى دور الوعي السياحي لدى المجتمع قاصر وكيفية استثمار ذلك يزحف في الطريق الصحيح !!!!!


لعلكم عندما تقرأون كلامي ينتابكم شعوراً بعدم الملل من الأسطر السابقة ,,,,,,,,,,



تحياتي ......... اخوكم ابو حكيم

[عجولي]

الطرفيه يوم الخميس الي راح



بحل يالثمامه

[abonaif]

مشكور اخي الصامل على الموشوع

حيث حصلت نفس المشكلة حيث ان ابني نايف اصر على استئجار دباب
ومشكلة اخذلة دباب واقولة الحقنا و مشكلة اذا انتظرناة لين يخلص من اللعب تروح علينا الطلعة
لذلك قررت شراء دباب و الذهاب لاماكن انظف و احسن

و تقبلوا تحياتي ,,,,

[الصامل]

اولا اشكركم جميعا على تفاعلكم مع الموضوع وهذا دليل حبكم لبريدة والمنطقة كلها والبلد اجع وهذه ما هي غريبة على ناس تربوا وعاشوا بهالبلد . والله يكثر من امثالكم ويحفظكم ربي .

وأحب اعقب على كلام :

اختي / شقردية انا معك وكلامك ماعليه غبار لكن اقف عند قولك وجود هيئة هذه اختلف معك شوي أنا أتمنى عدم وجود هيئة وشرطة يعني نلتزم بالادب ولا داعي لوجود مثل هذه الجهات . بعدين مايحتاج مخيمات دعوية وترفيهية كل يدعي روحه ويرفه عن نفسة بطريقته الخاصة وعلى مزاجه . وأن كثرت؟ دبلت ؟؟!!

وانت يا أخي / عبدالله 30 أذا كان اقرب مكان نظيف يبعد عن بريدة حوالى 90 كيلو حتاج حوالي ساعة ذهاب وساعة رجعة يعني ساعتين والوقت بمثل هذه الايام وقت قصير ، على سبيل المثال وأنت تبي تصلي الجمعة بالديرة ثم تطلع متى تصل الى محل نظيف وعلى كيفك راح عليك الوقت وانت بالطريق . بعدين تقول اضرب لي مخيم يأخي لو كل من تضايق مثلي ضرب له مخيم كان صار العريق منى أو عرفات ويمكن السنيدي والمطرودي ما يلحقون علينا بالخيام ( دعاية مجانية ) ؟ حظهم !! .
وبعدين مسئلة ( حسد ) هذه ماني متكلم فيها .. ارفع نفسي أن اتكلم بمثل هذه الكملة عياذا بالله منها.

أخي / ابو حكيم فعلا يبدو انك فعلا حكيم لكن صدقني نظرتي والله ليست تشاؤمية بل من الحر اللي في كبدي وباقي تعقيبك كلام جميل بالمرة لكن المعنيين نقول لهم من عطرهم لا يـــ .... حذفت لكونها غير لائقة بالقارىء الكريم ...) بعدين كلامي مأعتقد انه تعدي معاذ الله.

اخي عجولي / نعم يبدوا انك شايف الوضع هناك !!

اخي ابو نايف / الله يحفظلك نايف وأم نايف صدقني نفس كلامك راح علينا الوقت والعيال خلفي بالدبابات وحنا ندور نبي نحصل مكان نقف فيه ما حصلنا راح الوقت علينا دوران والمشكلة العالم يحسبوننا نمتر العرق ونبي نشريه من كثر ترددنا ياما رحنا يمين ياما رحنا يسار ياما قدمنا يما رجعنا .

وتحياتي لكم جميعا .

[أبونواس]

ومن زين عرق الطرفية ؟؟؟؟؟؟؟

[محترف كيرم]

اطلعو مناك لم عذفاء000طاب عرض؟؟

[شاعر الاحساس]

انااستغرب من مثل هذ الكلام يا اخى اذ كان معك عائله ليه تجي عند الناس اطلع بعيد اشوى يعنى خلص العرق علي كلامك بعدين اصحاب الدبابات ياخي اغلبهم شباب عاطل يترزق الله من ور هل عمل بعدين العرق يوجد فيه اماكن روعه بعيدعن الناس خمس مائة متر اما بنسبه لعدم النظافه والترتيب فهذ واضح جدا بعدين كلام الاخت شقرديه من وجهة نضري اولن انا اسمة عيب اذ كانت بنت حقيقه لانه اعتقد ماتعرف معني هذ الاسم وكذلك عيب الحرمه تقرب لمجالس الرجال تقول اعجبها الجيب والهمروالاخت تتمنى لو معاه همر خوش ولله يابنت الديره ولله عيب

[بين السطور]

اخوي الصامل معك حق في كلامك ياخي انااستغرب من لللي يقولك ابعد بعيد ياخي معك عائله ويقولون ابعد بعيد...اصلالوكانواشباب ماراح يفكرون بعرووق الطرفيههي متنفس للعوائل فقط نظرالقربها..

اخي شاعرالاحساس واناقاعد اقراكلام الاخت شقرديه حست اني امام بنت مسترجله يعني اهتمامات الميك اب تعدتهالى الهمر...اعتقدعيب والله عيب شقرديه...

[الرمادي]

اخي العزيز الصامل



اتفق معك تماماً بشأن تلك المخيمات


اعتقد ان واجب الأمانة التدخل بهذا الأمر وإن كان ولابد من السماح لهم بها فعلى الأقل يكون هناك تنظيم وخطة مناسبة لوجودها


انتشارها بهذا الشكل يهدد ذلك المنتزه ويوحي بمستقبل مظلم من جميع النواحي !!



اتمنى ان تتدارك الأمانة ذلك قبل فوات الأوان



تقبل تحياتي ,,,

[الحقيقي]

منتزه الطرفية كله كفرات وبقايا مخيمات

[ĶЧλ£Σď]

قال الطرفيه قال ... لا تنسى بس ( تكف )رجليك لا يدوسهن ربع أو همر على قولتهم .منتهى الهمجيه ولا الدبابات هذي قصه ثانيه ,أنا بالنسبه لي لا أذهب الى تلك الأماكن أبدا البر ( وسيع ) وهناك مناطق قريبه أجمل من الطرفيه ..

[الصامل]

اخوي ابو نواس عرق الطرفية ما أحد ينكر زينه اقسم لك بالله كان قبل مدة قمة الروعة بالنظافة والهدوء ونقاوة الجو صدقني والله كنا نشاهد ذاك الوقت الارطى والغضى موجود بالنفد كلها بس هالحين وين راح طبعا تعرف السبب !! شف اهل عنيزة واهتمامهم بالغضى وحرصهم عليه وعلى الامكان مع العلم أن المساحة ما هي كبيرة بالمرة يعنى لو نروح حنا ياشباب بريدة كشته يوم ونترك على راحتنا كان حصدناهن حسد - عفوا اقصد ( حصد ). صراحة هم اكثر منا حرص على بلدهم ولا تزعل لأني اقول الصراحة حنا تبي هرج خذ رجال تبي فعل ما هناش الشكوى لله هذه قسمة ربنا.

ويا اخي / شاعر الاحساس
يأخي نعم معي عائلة واحتاج اجلس حول الناس بينى ارتز تقل شيطان بعيد عن خلق الله والعالم وقلبي ماهو على كراسية جاك الذيب جاك أوليده يأخي أنا ماعلي خوف بس الخوف على العيال وأقصد الزوجة والبنات يعني بالعربي وأن طب علينا ناس ما تخاف الله سواء صاحين او سكرانين لا والجو هالايام على كيف كيف براد وغيم وفلت حجاج على مزاجهم لا يحبيبي ما يلزم ؟ !!
وقولك اصحاب الدبابات اغلبهم شباب عاطل يترزق الله من وراء العمل ياحبيب أن ما قلت شىء لو راحوا اصحاب الدبابات كان غالبية العالم ما كشتت هناك لكن يكون هناك تنسيق وأماكن محددة للعب وتنظيم مهب احرث الارض على كيفكم هو ببيت أبوه لا يحبيب لا ضرار ولا ضرار بعدين كلن يترزق الله (بما يملك له خاصة) أجل خل العالم تروح لم عروق قبه والا لم عروق النفود جهة حايل وتحطب وقل يترزقون الله وأترك العالم تصيد على كيفها وقل يتسلون ترى الغزلان الى في المحيات لحمه طيب بالحيل وجلودها غالية جدا وخاصة ما طالت قرونه ولا أوصيك على (المها) وأن قال لك احد ليش قل ابا أترزق الله.

بعدين اختي / شقردية اصحاب الدبابات لعبوا عليكم مع احترامي لكم سعر الدباب الساعة بـ 50 ريال وأذا كاسرته يخليه بـ 40 مثل ما أخذنا. وقولك

اخترشت على التطعيس

كان شيء جنان

تخيلو جيب ربع وهمر لعبو بذيك النفود لعب

رشاقة حلاوة دلع

انا اخترشت

ما تمنيت الا لو معي همر

فعلا اجدتي اللعبة أوهمتيهم أنك بنيه صغيرة دلوعة ( ابي ام أبي أبوي ) ياي

اخي بين السطور / اعجبتين سطورك .

اخوي / الرمادي
الامانة مارايح تتدخل لأن نظرهم مع الاسف الى مدى طرف خشومهم أمور كثيرة تبي تدخل بس وين الامانة وين النصح وين الاخلاص وين .. وين ... وين .... الله يرحم الحال.


لكن عندى أقتراح وهو أن نقوم بجمع افتراحات ومطالب ونقوم عبر هذه المنتدى بجمع تواقيع وتقديمها الى أمانة مدينة بريدة لعلها تفعل شىء .!!!

واحلقوا شاربي وهدب عيوني إذا زينوا شىء .

وذا قضينا من هم البلدية رحنا نعالج هموم الصحة ؟؟؟؟
واذا قضينا من هم الصحة رحنا نعالج هم الامن ؟؟؟
واذا قضينا من هم الامن رحنا نعالج هم التعليم ؟؟؟
واذا قضينا من هم التعليم رحنا نعالج هم البطالة ؟؟؟
واذا قضينا من هم البطالة رحنا عالج هم ..... ؟؟؟؟
واذا قضينا من هم ... رحنا نعالج هم .... ؟؟؟؟

يعني بأختصار نعيش حياتنا كلها علاج وترقيع وتصليح وضبيط وتزيين واصلاح وكلتش وبنزين وزيت وفرامل .... - معليش شكلي طار من راس وشرة - والسبب من ( مني أنا وانت والثاني والثالث والرابع لأننا نحن ابناء هذا البلد ونحن من يهتم به ونحن من يقدر يحافظ عليه حتى لا يحتاج لكل وجع الراس ) .

والسلام عليكم والمعذرة على الاطالة لأني اتكلم عن حبيبتي وعن قرة عيني وعن البلد الذي ملك قلبي وعن البلد الذي ملك احساسي ونبضي . ( مدينتي الحبيبة بريدة )

السلام عليكم - ( معليش ارتفع ضغطي )