إذا أعرستي سوّي اللي تبين !!!!

[أم لسانين]

إذا أعرستي سوّي اللي تبين !!!!

--------------------------------------------------------------------------------



لمّا تعرسين سوّي اللي تبين

--------------------------------------------------------------------------------

تكبر البنت.. وتكبر احتياجاتها .. وتكبر رغباتها ايضا..
يوم ان كنا صغارا كانت كل امالنا ثوبااو شنطة جديده .. اوعلبة اقلام ملونه نتباهي بها..
اما الان وقد كبرنا .. اصبحنا نرى الامور من وجهات مختلفه..
بل واصبحنا نرى ان اهلونا افكارهم تختلف عن افكارنا..
قد لا تكون المدة بين الجيلين كبيره..
واكثرهم قد حضروا التطور الذي حصل وعاصروه..
ولكن تبقى الافكار التي ربّوا عليها متاصلة بهم تابى الانفكاك..
هذه المقدمه والان ساتنقل لانقل لكم واقعنا نحن الفتيات..
(ليس الكل منا بالطبع –حتى لا تقولوا باني اعم- )
ولكن اغلبنا تقريبا..
وساحتوي الموضوع من جهتين:
من ناحية (الطلعات)
ومن ناحية (لما تعرسين سوّي اللي تبين)
********************

الطلعات وما ادراك ما الطلعات؟؟
والله انتم يالشباب بخير ونعمه – كثيرا ما نحسدكم عليها-
اقلّها اذا بغيتوا تطلعون رميتو الشماغ على كتوفكم وشغلتوا السياره ومشيتو ..
مو حنا يالبنات اللي لازم نخوض في صولات وجولات عشان روحه وحده بس..

- (وقرن في بيوتكن ولا تبرجن تبرج الجاهلية الاولى)
- يمه والله ماحنب متبرجين .. ومو حنا اللي انشالله نتبرج بس نبي نطلع نبي نروح بنشوف العالم مو بس جالسين بالبيت .. والله طقّت كبادنا..
- روحي نظفي غرفتك والا اطبخي لنا..
- يمه وانا كل ما زهقت .. عطيتون شغل .. مابي اشتغل ابي اطلع الحين حنا باجازه مشونا.. طول السنه وحنا نكرف خلونا نستانس شوي..
- وحنا ماخلقنا الا للطلعات .. اعبدي ربك.. اقري قران..
- انشالله يمه بنقرا بس والله ودي اطلع .. وبعدين حتى بطلعتنا ذي نقدر نعبد ربنا .. بس تكفووون طلعونا..
- والله يوم حنا كبركم ماكنا نطلع.. طول النهار بالبيت..
- يمه انتم عصركم غير عصرنا..
- عصرنا وعصركم واحد..
- طيب اوكي بس نبي نطلـ..ااااااااااااااااااااااااااااااااااااااع..
تتدخل جدتي وتقول:
لو ماكان للبيض والٍ يهينه ركبت على كيرانها والميارس
(لطالما سالت جدتي عن معنى هذا البيت وشرحته لي لكنني بسرعه انساه
ولكن مفهوم البيت ان الحرمه اذا مالقت (والي) يهينه صارت (تسوي اللي براسه) )
- الحين حنا بنركب على كيراننا والميارس زي ماتقولين عشان نبي نطلع..
هنا تقول جدتي : قولي لابوك يطلعك..
- دايم اقوله ويقول لا .. تدرين طول النهار مشغول وين بيودينا..
- اجل اقعدوا بالبيت..
- خلونا نطلع مع السواق.. ونتمشى..
- لا..
- كل الناس يطلعون ويتمشون بس حنا اللي محجورين..
- اذا اعرستي تمشي زي ماتبين..
- كل شي اذا اعرستي .. ان قلنا لكم بنسافر قلتي لاعرستي ان قلنا نبي نطلع قلتوا لاعرستي ان قلنا نبي نقص شعورنا ونصبغ قلتوا لاعرستي.. ماصارت .. طيب وان صاروا رجالنا مثلكم وش بيصير بنا ):
- الله يرزقك الرجل الصالح..
- امييييييييييييييين بس انا باستانس عند اهلي مو اروح لرجلي وانا (دبشه) ماعرف شي..

وهنا تنتهي السالفه دائما.. اما لان امي راحت تشوف شغله .. او بصراخ احد الاطفال..
وتبقى الطلعه معلّقه لصولة اخرى واخرى حتى تاتي الموافقه..
صرااااااااع لا يعلمه الا الله لاجل طلعه واحده..

اغلب الفتيات هكذا..
ابائهم مشغولون بعملهم .. او من النوع الذي لا يحب الطلعات .. او ممن يحبها ولكن دون بزران او ممن انتقلوا الى رحمة الله..
واخوان اما صغار .. او ممن تاخذ طلعاتهم وروحاتهم كل وقتهم..
والبنات ياعمري محجووووووووووووووووووووورات..
صدق قرف .. والله لما نشوف الفعاليات حقات الصيف اللي بتلفزيون ننقهر..
فعلاً ودنا نكون معهم .. ودنا نستانس باجازتنا.. ودنا نطلع زي الناس..
مو بس نوووووووووووم..
حتى النوم مل مننا .. (والله احيانا اقوم واقول وشّوله قمت) ولما احاول ارجع انام (احس النوم يقولي ظفي وجهك خلاص انت شبعانه رقاد)
اكيد بتقولون نمّو هواياتكم..
نحب نقولكم ما قصرنا .. نحاول ننميها .. بس لازم نغير جو.. لازم نطلع.. ملينا من جو البيت.. لازم نغيّر..
واكيد بتقولون لنا تعلّموا الطبخ..
احب اقولكم ان اغلب الفتيات امهاتهم يخلون لهم بالاجازه ايام للطبخ.. ويلتزمون فيها الفتيات..
واكيد بتطلعون لنا الف حل وحل.. بس صدقوني مافيه حل زي الطلعات لان الواحد يغير فيها جو.. يحس بالراحه .. والتجديد في حياته..

وبعدين احب اقول نقطه للي يقول (انتم ما تسافرون)
البعض منا ما يسافرون بل يجلسون في بيوتهم..
والبعض يسافرون (لمنطقتهم الاصليه) وبرضه (ينحبسون في بيتهم اللي هناك)
وبعضهم من تكون منطقته قريه او مدينه تخلو من حضارة المدينه التي يعيش بها فيكون سفرهم وبالاً عليهم..
هذا بالنسبه للفتيات.. اما الشباب –ماشاء الله عليهم- في كل الحالات مبسوطين..
فان ماسافروا طلعاتهم تغنيهم عن كل شي..
واحيانا مايسافرون مع اهلهم لمنطقتهم الاصليه..
وحتى ان سافروا لقريه او ماشابه استغلوا سفرهم هناك للكشتات والاستراحات وغيره..
مو حنا ):

***************
هذا من ناحية الطلعاااااااااااااااااااااااااااااااااات ..
نجي لناحية (لما تعرسين سوي اللي تبين)
& وحده ماقد سافرت بالطياره الا لما اعرست .. ولا تسالوا عن شكلها .. كانت خايفه مره وماحست بالوناسه الا يوم ان حطت الطائره في المطار..
وتلقونها بقلبها تقول (الله من الفشله بس)
يعني رايحه شهر عسلها مع زوجها .. واخرتها انقلبت روحتهم بالطياره (بصل) بسبب خوفها من الطيارات..
؟؟؟؟؟؟؟؟؟؟؟؟؟؟؟؟؟؟ لا تعليق .. بس هي احدى ضحايا الاهل الذين قالوا لماتعرسين سافري بالطياره..
هذي فقط ما يحضرني من القصص..( وان كان عندكم من مزيد فاذكروها)

المهم ..
بمقولة الاهل لهذه الجمله .. جعلوا كل تفكير البنات هو متى يعرسون؟؟
واحضروا سواليف البنات وناظروا (اغلب سواليفهم عن هالموضوع) هذا من ناحيه..
اما من ناحية اخرى فقد فقدت البنت حيائها في هذا الموضوع .. فمنذ زمن ما ان يجي طاري العرس الا والبنت ساكته وهي محمره خدوده وتقوم..
والحين لا والله بل تناقش وتسولف وكان الموضوع عادي..
لا تلوموا الفتيات..
من كثر مااطروا سالفه العرس عندهم راح حيائهم من هالموضوع..

وبعدين تراكم يالاهل ومن غير ما تقصدون قد تدمرون حياة البنت..
لانها راح تتخيل ان العرس هو حريتها وعندما تتزوج تنصدم بعكس ذلك..

ولانها ايضا قد توافق على اول طارق حتى وان لم يكن مناسبا فقط لتنال حريتها..

(لا ادري مالذي جعلني اتذكر تلك النكته التي تقول : بنت اعرست على ولد خالته عشان تنام ببيتهم
صحيح انها نكته ..
ولكن قد تكون تلك البنت تريد النوم عند خالتها والاستمتاع مع بناتها بسهرة عائليه حلوة
وفاجؤها اهلها بقولهم : لما تعرسين سوي اللي تبين
فاعرست على ابن خالتهاعندما تقدم لها لتتمتع بحريتها و لتنام عندهم ايضاً
من يدري فقد يكون هذا السبب؟؟)

الموضوع كبير .. ولا ادري ان كان له حلول .. ولكنني ارى اغلب الفتيات لم يجدوا له حلاً ..
طرحت الموضوع هنا للنقاش ..
اتمنى ان اراى ارى ارائكم.. وحلولكم..
بانتظاركم ) 0
__________________

[قصمنجيه]

والله يا أم لسانين وش يفكنا منك;)

"دحدرت " ضحك عليك بصــراحه


مو حنا يالبنات اللي لازم نخوض في صولات وجولات عشان روحه وحده بس.. :)

لو ماكان للبيض والٍ يهينه ركبت على كيرانها والميارس

عجـــزت أقاوم هذي..:p
الوالدة حافظتها عن ظهر قلب...





لكن إليك الحلول "القصمنجيه"

رغم أن أختك في الله.. ماتحب الطلعات بمعنى "مجروبه"

ألا أن لها حلول سحرية لكافة أفراد العائلة إذا ما صكت براسها طلعه,,

لا "تشاورين أحــد :cool:

تظاهري بلأنشغال إذا جيت تخبرينهم.... ما أقول تشاورينهم ;)

أكثري من العبارات التاليه,,,

أيييييه...فلانة أهلها ......................

علانها محشووووووووومة ليت أهلها يتصدقون عليكم أشوي,,

آل علان مسوين بنتهم كذا.........



"كفارات بـلعشير":f9:


لكن والله مفعول سحري;)



- والله يوم حنا كبركم ماكنا نطلع.. طول النهار بالبيت..

والا هذي جايبتلي "القولون" :for1:



أم لسانين
كوني كما تحبين;)


.

[111]

هههههههههههههههههههه
هههههههههههههههه
ههههههههه

ايه هذا المفروض متفضين مع الباب إلا للمقبره.

<<<طلع اردى من أمه :c7:


***

بصراحه حسسسسسسسسسسسسسسسيت بمعاناتك ..

الله يكون بعونك ..

بس خلي هالحجره على قولتك ترجع عليك إجابياً بأستغلالها بما يفيد من قراءه واطلاع وثقافه ..

(تشعل شمعه خيراً من أن تلعن الظلام الف لعنه )

ولاتنسين اذا اعرستي سوي اللي تبين ..
:for6:

[جروح]

عشتي ياشيخه وعاشت ايامك
عليك بهم
والله يسدد خطاك

لا واذا تصدقوا عليك بطلعه تمننوا بها 4 شهور و3 دقايق ويقولون توك طالعه امس

وبالمناسبة ...
اذكر بالاجازة اخوي كل يوم يطلع وانا اقول له ودنا مثلك وماله اذن تسمع ومره كشت كشته كبيره مع ربعه وهو هناك ارسلت له >> بشرني احترق الغدا ولا انكسرت غضارة ولا انقلب احد << يعني نذكر الله << ياحبيلي قلبي طيب

رد علي >> كاااااااااااااااااااااااااااااااال الامور زينة << يبي يقهرني

يعني حشف وسوء كيله ..

هذا وهو ينادي ويشجع ان الواحد لازم ماينسى الاهل من الترويح عن النفس والطلعات اجل وشلون اللي مطنشين ..!!!

وبالاخير مااقول الا هذا هم "" الشباب "" اللي فرحانين فيهم ماتطلع النفعه الا بشق الانفس والمنّه

وماينفع بهم الا تسرقين مفتاح السياره وتخبين عزبته وتخلينه يجرب القعده بالبيت 3 ايام على الاقل

ومايهمك اذا عصب لأنه ماراح يدري انه انتي الفاعله..

وصدقتي في كل كلمه قلتيها......

ولاهنتي.......


مؤيدتك
جرووووح

[KuWaiT_PoeT]

الاخت أم لسانين..

أول شي احب اشكرج على جرائتج بطرح موضوع حلو ومهم مثل هذا..
كثير من الفتيات في المملكه العربيه السعوديه مابي ابالغ بس فعلا (يعانون) من هالشي هذا (اذا عرستي سوي اللي تبين) ..ومثل ماقلتي يااختي اغلب البنات فقدو حيائهم من ناحية هالموضوع وبودهم انهم يتزوجون باعتقادهم ان الزواج بكون فيه حرية اكبر بس المصيبه هني انهم ينصدمون ان الزوج يطلع شديد اكثر من الاهل ..

و بما ان انا بالكويت ,, بس عندي الكثير من الصديقات في السعوديه وهم فعلا يشتكون لي من هالمشكله ..
يااختي انتي طلبتي كل واحد ورأيه , انا من رأيي ان البنت بشر وانسان مثل الرجل لازم تطلع وبعدين الله سبحانه وتعالى وصانا بالترفيه عن النفس بس كل شي بحدوده اكيييد لان حطي في بالج شغله ان الولد والبنت اذا كانوا الاهل شديدين معاهم للآخر راح يؤدي فيهم التفكير بأشياء ثانيه يرفهون عن نفسهم ومن وراء الاهل والشي الثاني ان اذا كان الاهل معطينهم حريتهم للآخر هذا بكون أسوأ وأسوأ وراح يؤدي (للسيبان) ومشاكل كثيره..."خير الامور اوسطها" هذا رأيي واتمنى من الشباب المشاركه ايضا ابي اشوف رايهم.
وأشكرج يا اختي مره ثانيه على هالموضوع الحلو..

[الشاطر]

ام لسانين

الحقيقه استطعتي ان تكتبين مااااااااااااااره في بيتنا دائماً


ياعزتيلكم ....


لكن احب اضيف مايفيد واتمنى ان اوفق

الشباب في البيت والفتيات ايضا يحتاجوا بان يتساعدوا ....يعني تمصلح بالعربي ...كيف

فانا شاب
احتاج من اخواتي ..ان يسون لي حلا شاهي قهوه .. بدون تاااااافف ودلع ...وتردد.
كذلك قد احتاجهن اذا لم تكن الخادمه موجوده ...بكوي اشماغ على الطاير ولا ثوب ...
كذلك اذا عزم اخوك لازم تفزعين وتقولين ابشر او تجيبين حل يساعده على تبييض وجهه قدام ربعه مثلا اذا كنت تبي اسوي الطبخه الفلانية جب كذا وكذا ....واذا تبي جب كذا وكذا مو تقولين ليش باكر خلها الاسبوع الجاي والا تغييرون الموعد .
كذلك الرجال يحتاج خواته لا جاء يخطب ...وهنا اللي ماله خوات سنعات ويحبنه ويدورن له السنعه من الحريم ولا عزالله انه يطيح بوحده تدبل سبده طول عمره بسبب ان خواته ماتعاونن معه

والفتاه
تحتاج من اخوها يجيبها ويوديها من المدرسه او الكليه ....الخ
تحتاج تقضاءمن السوق والمكتبه ....وتبي تبدل القطعه الفلانية ولا تبي ترجعها
وتحتاج بعض الاحيان مايروحون الا متاخرين في العزايم ...ويطلعون بدري في الزواجات
تحتاج تغيرن جو ...وهذا اللي اتوقع انه مااااااااااايحصل دايما لان ديارنا ماتصلح لتمشي بالاه وين اوديكم من زين الشوارع اسكت احسن ..
وتحتاج عشاء ...بيتزا ولا وجبه من الوجبات السريعه ..ولا ايسكريم من باسكن ربنز ...
وتحتاج تروح للكوفيره تقصون وتسرحون اشعوركم
وتحتاج للخياط او المشغل ..يعدل ولا يخيط ..فساتينكم اللي حايسها.
وتحتاج للكلمه الزينه وتمديح ...اللي على سنع ودراء التعييب وتطنز

وتحتاج لاطلعت للبر ...تاخذين دوره بالدبابات اويطاعسبكم بالبر((لا تفرحون واجد لاني سمعت منع ركوب الدبابات والخيول للفتيات ...ويسمح لهن بركوب الخيول القزمان خخخخخخخخخخ))

وتحتاج من يقولها عن الرجال اللي متقدملك وشهو حبيب ثقيل دم مرت فوضوي عصبي اناني بخيل ..(ولا تورطت البنيه وعاشت حياه لا يعلم بها الا الله (وش تبي تسوي تعدل اطباع ولا ادرس من جديد )

وتحتاج لو تزوجت انها ان اخوها يجي ياخذها من بيت زوجها يوديلها غرض ولا يجيبلها غرض ((فزعه))


مثلا ...مثلا


انا وخواتي السندرلات
عقدنا موتمر بيني وبينهم بحضور البردعي و هيئة الامم المتحده
وتفقنا على تبادل المصالح وحفظ الخواطر ووفقا للنقاط التي سبق ذكرها.
لكن انا بحكم اني اطلع وارتبطت منيت لو ان يتم اشعاري مسبقا عن رغبت البنات بطلعه ...يشعروني ونحدد وقت يناسبلهم ويطيب خواطرهن

وتبون الصراحة خلوكم احلييلين مع اخوانكم ...لانه لوهو ذهين فتراه مايحتاجكم بشي
مثلا يقدر يكوي ويغسل ملابسه باحسن مغسله بريالين
ويقدر يزهم على احسن مطعم كبسه ويطلب غدا بصحن تقديم على مستوى عالي ذ
والشاهي مقدور عليه ....والعزبه دايما موجوده (((وطلعات البر قربت )))
والزواج ...بيقول مسموح لي اشوفها
يعني لتكونون ناشفين ولا تكونون مزلبين الوسط زين

خلوها مثل شعرت معاويه اذا شدوا ارخوا و اذا ارخوا شدوا لكي لا تنقطع الشعره


لذلك ارجوا اني افتكم وجبت حل ..متواضع ((الحل لابد من عقد موتمر طارى ))سواء اعرستي ولا ما اعرستي لان هذا اللي يبي يصير مع الاخوان او مع الزوج ....وكلهم واحد بس من الذهينه اللي تكسبهم لان نفس الحال مع الاخوان والزوج بصراحه وسالوا المتزوجات وحلفوهن بالله

سؤال / هل تعتقدون ان احد هالوقت احد يوديك بامر واحد او بازعاج والاحاح سواء زوجك ولا اخوك !!
...انتم عارفين السعوديين رجال ونساء ماااااايحبون التأمر عليهم إ لا لمن له فضل عليهم مثل الاباء والامهات .
وان طاع الحاحكم وحججكم صارت تقل منه .
وترى قول ياحبيلك يافان تتتتتتتتكفاااااااااااا ولي يسلمك ياااااااخيي تلين الشاب العنيد !



والله يوفقكم مع اهاليكم وسامحوني ان اغلطت او بالغت انامثلكم لي خوات واخوان الله يصلحهم ويهديهم ويزيد ببركتهم

[ســـــــراب]

أم لسانين

ضحكتيني من قلب

لكن كلامك كله محله

تتوقعين يقولون الكلام هذا
علشان يسكتوننا..؟؟!!

[كسرة خبزة]

السلام عليكم مشكورة اختي ام لسانين على طرح الموضوع بس احس ان الناس تغيروا هالسنتين !!

كثرت طلاعاتهم مو زي اول


ماعلينا المهم عنديلك فكرة حلوة وانا مجربتها كم مرة ان امسكت معك انك تطلعين


تولمي ولبسي وعطيهم خبر وخلي نفسك انك مستعدة ولو انتي ماشاوفتي مرة بس خليهم يحسون وان

شاء الله يرحمونك ويطلعونك