ولاده ( عسى ماعادت ) بغيت أموت !!

[noor]

صباحكم خير ان شاء الله

ياسيداتي اسمعن نصيحتي ( لا عاد تولدنّ ) وارموا بهالحمل على الجنس الخشن خلنهم يجربون ولو لمره !!

مصيبه انك تولدين وتحملين وبعدها ينقال ( وليش تحب أمك أكثر مني ؟؟ )

الزبده

ولاده من نوع آخر ولدتها بنت عمي ( الحمد لله على سلامتها )

تفاصيل القصه تعود لخمسة أشهر مضت !

عفوا _ أخرجوا الشنبات من هنا _ هناك مقاطع غير صالحه للنشر ولا تفهمها سوى الشباصات :for11:

.
.
.
.
.


وبعد التأكد من خروج الشنبات لنا أن نتحدث بكل حريه

وكما هي العاده السنويه أحب أني استلم المجلس :)

صارت نوسه عمرها 4 شهور وبعد التحليل ( مبروك يامدام حااامل )

وش حامل :for13:

وعلى طول ( يمه تراني حامل ) وش اسوي مخرج طوارئ في الحديث لابد ان اركض اليه !!

ومع استمراريه النفسيه ( الشينه ) هجرت المستشفيات وبرامج متابعة الحمل

وفي ذاك اليوم قررت أن أذهب لأكمل تطعينات نوستي :for8:

وركبت السياره بمعية ( عمتنا ) وفي رواية أخرى _ أخت زوجي _ وبالقصيميه _ اخت رجلي _

حطيت نوستي عند عمتنا ودلفت للدكتوره للفحص لأني سأسافر بالطائرة

وبعد السونارات والحوسه

_ ماشاء الله ياستي دول وضعهم طبيعي :)
_ وش وضعهم ؟
_ وضع التوأم !
_ وشو !!!
_ انتي ليكي أربع شهور ومش عارفه انك حامل بتوأم ؟
_ وش توأمه ؟
_ الله ياستي دنت حامل بتوأم ووضعهم تمااام ماشاء الله
.
.
.
.
.
.

طبعا انتهى مشهد الحديث كلاميا

وبدأت الأحاديث ( صياحيا !! )

ياربيه حامل بتوأم ؟؟

وشلون بطلعهم

أكيد متلاصقين !!!

وكانت ذيك الفتره ( فصل توأمين مااذكر وش جنسياتهم ) وعلى طول خيل لي ان عيالي متلاصقين

وشغلت صياااح :for13: :for13:

ورفعت الجوال

ألو .. يا ...

تعال تراني بموت

وش بلاك

حامل بتوووووووووووووووووم !!





البقيه في العدد القادم ..

انتظرونا


نور

[المتزن]

بانتظار البقية . :)



وتقبلي تحياتي 00
المتزن

[noor]

اولى منتفخه ورى الشباصات ماردن :)

الحين بنتفخ وبقول :

هذا وحنا قايلين مافيه شنب !!

خلص هونت بكتبها بخاص لها خخخ

.
.
.
.
.

لا عاد بكملها بس بحط مقاطع مشفره :D

[noor]

استمرت النفسية شينه بقوه :e7:
حامل وبتوأم بعد !!
ومع الأيام تضخم حجمي بصوره مش طبيعيه
وكل من شافني تسمّر عندي ويقول ( شكلك مب طبيعي !! )
وأنا ناقصه بعد تأملات :for10:
و أواري عن الكل إن تضخم حجمي بسبب اني على طول حملت بعد الولادة
.
.
.

سافرت لأهلي وأنا بكامل جحادتي عن أمي إني حامل بتوأم
ومع الأيام أصبح الوزن يزداد بمعدل كيلو يوميا !! :for7:
وتساور الشك لأمي
يا بنت الناس بنروح للمستشفى
وأتهرب بأي طريقه لا خليه بعد المغرب , بكرى , إذا رجعنا :)
وكملت أسبوع بزيادة 7 كيلو :eek:
بدرجه منعتني من التحرك مطلقا او النوم سوى على كرسي
فرأيت أنه لا بد من أخبار ( الوالدة ) ربي يحفظها
وتخيرت وقت مناسب ...
.
.
.
.
واتصلت على خيتو الثانية ( يا أخيتي أسعفيني ) مب قادرة أقول لأمي
وعلى طولت أسعفتني 911 وقالت : خلاص اصبري وأنا أعلمها :b8:
نزلت عند امي وقلت
يمه بقولك شئ بس اصبري لين تجي أم ميسون
قالت وش فيه وش عندكن :d7:
ابد كل خير
بس اصبري شوي وتجي وهي بتعلمك
وعلى طول ساور( اميمتي ) الشك !!
وبدت تضرب اخماس بأسداس
.
.
.
.
ووصلت اختي المكرمه اللي ينقال انها جايه مسعفه !!
ويوم أقبلت استفتحت مقدمه طويلة مع أمي
وقالت ..



انتظرونا في الحلقه القادمه ..


خالص تحياتي

نور

[ماجد الأول]

السلام عليكم

بانتظار البقية

.
.

مع التحية ..

:D

[فريـــد]

والله أنا يوم شفت : المتزن + ماجد الأول .. جسرت وكملت الموضوع
وإلا من أول .. أبديور ..

:a1:

وشكرًا للكوميديا الراقية

[المـ..ـشـفـ..ـر]

<<< ينتظر البقيه على احر من جمر....

[شقرديه]

أهاااااااااا

هذا وهي مشفر مترززين بذا!!!!!!!!

اقول نووووور

وش قالت تراني تحمست مع القصة

تحتح

[noor]

أهلين بالشنب المشبصين :D

كتشفت شئ غجيب

ان الشرافه بزووود عند الشنب وخاصه اذا كانت سوالف حريم خخخخخخخخخخ





ماجد الأول

القصه صحيحه 100%

وبنكملها

بس بصير نكابه واكمل بخااص لها دام الدعوى بلا شبيصات خخخخخ







تقهو

قعدت اقرأ كلمه ( اديور ) مافهمتها قلت ذا بعد نومنيز صارت ثقافته فرنسي

وبعدين استوعبت انه يلف على شكل دوويره خخخخخخخخخخ

شفت شلون طلعو بعض الناس شرافه محكنه :)




المشفر

انتبه لا يحرقك الجمر وتتحرقص بعد

بصبر اشوف لي وحده شبيصه :)






تحياتي للجميع

بس شراهنتن على الشبيصات والشرايط :(

[شقرديه]

نوووووووووووووور

سلامة النظر عنوني

انا هينا من ساعة اناديتس

تحتح

[noor]

شقرقر

هلا بام البكلات :)

ترى النظر مش ولا بد عقب الامتحانات

نورتيتنا وحمستينا للإكمال

واخيررررررررررن

حصلنا على توكه :D

[Freeangel]

طيب هذا صار عندك ام بكلات
وانا ام الشبصات
يالله بالله كملي السالفة تراني متحمسه على الاخر

[noor]

Freeangel


هلا وغلا

بنكمل الموضوع بس يبغى لي شحن :)

تحياتي

[noor]

ّ~ الحلقه الرابعه والخمسون بعد المائه ~



وقالت :

يانور كملي القصة

تراك ( حومتي كبودنا ) من كثر مانترجاك !!

ولذلك شحنت البطاريه سريعا وعدت لأكمل الحكايهـ


:)

8
8
8
بعد توليف ماسبق أعود للإكمال ..




طبعا نسيت ان أقول لكم انه قبل كلمة وقالت :)

ان أختي ينطبق عليها المثل القائل ( جيتك ياعبد المعين تعني لقيتك ياعبدالمعين عاوز تنعان !! )



وقالت :
يا اميمتي .. انتي تدرين ان كل شئ بقضاء الله وقدره
وكرد فعل طبيعي انه أي شخص يقال له كلمة ( قضاء وقدر ) بيتخيل شئ سيئ
وفهمت ماجال في خاطر ( ماي مذر ) فتخيلت على طوول أني مطلقه _ بعيد الشر _ عني :e7:
وأكملت أختي كلماتها
والدنيا هذي حالها , وانتي يايمه تدرين انه لازم الواحد يجيه مايضيق صدره
وإلى هنا خلاص أعصاب أمي وصلت فوق الـ(h )
وش عندكن خلصني !!!!!!!!!!
يمه ترى ( .. ) حامل بتوأم !!
وشو ؟
ادري انفجرت الطبله عند أمي بس وش أسوي ( المعينه أختي ) كسرت قيود الكلمات المناسبه ووضعت الموقف فوق كلمة ( راااااااااافع للضغط ):for9:
أمي حمدت الله واسترجعته وجعلت تعزي نفسها وتهذي بسرعه
ايه يابنيتي الحمد لله ( هذي منى جابت ثلاثه , وفلانه جابت اثنين , وعلانه جابت عشره )
واريح لك تجيبن اثنين ترتاحين كم سنه :d6:
وبسرعه استأذنت الوالده حتى تنام والوقت ( عصر !! )
.
.
.
أصبح صباح اليوم الثاني
أمي بالمستشفى :(
والحاله / ارتفاع في الضغط وارهاق من قلة النوم
حسبي الله على شيطانك ياام ميسون !!
طلعت أمي بصحة جيده من المشفى لكن بروح نفسيه سيئه :g1:
ما ألومها تشوف لها كوره لاصقه بالكرسي ليل ونهار ماتتحرك ومع كذا يزيد وزنها يوميا بصوره غير طبيعه !!

.
.
.
.

بعد يومين .......

أكملت 6 أشهر ونصف !!
حاولت أن اتحرك قليلا ماقدرت
وبلا مقدمات ......
جاني الطلق !!(1)
وسيدا << بمعنى على طول
ألو ..
ياابو نوسه
احجز لي بأقرب وقت بجي للرياض تراني بولّد
الدنيا خربانه ومااقدر اتحرك !!
وتكررت الزيارات جيئه وذهابا لدورة المياة ( الله يكرمكم )
ولا حظت أمي الحاله ..
وش فيك ؟
ابد مافيه شئ
وفجأه رن الجوال !!


تابعوا في الحلقه القادمه

ــــــــــــــــــــــــــــــــــــــ
الحواشي :
(1) راجع أقرب عجوز حتى تعرف معنى طلق :)
والمأخوذه من الفعل أطلق , يطلق , جاه الطلق
بمعنى قرب موعد الولاده !!








خالص مودتي للجميع

نور

[المـ..ـشـفـ..ـر]

يالدبا ترا بخترق جهازك واشوف البقيه

شوقتينا للباقي..

يلله اكتبيها مره وحده ههههههههههههه

<<< ترا اسمه مشفر مو عبث ههههههههههه

[iiigil]

نووووووووووووووووووووووووووور


اخلصي علينا ترا ما عندي وقت اقابل النت احتري ..........

[iiigil]

نووووووووووووووووووووووووووور


اخلصي علينا ترا ما عندي وقت اقابل النت احتري ..........

[A-دلوعة حبيبها-A]

ياااااااااااااااااااااااربيه
السالفه مقطعة وحلقات..أدخل بعد كم يوم أصرف لي...
المشفر..........>>تسوي خير بس سيــــــدا أرسلها لي تراني قوة متحمسة...
نووووووووووووووووووووووووووووووور عجلي علينا با..الأخيرة ..
بانتظاركككككككككككككككككككككككككككككككككككككككك..
بااااااااااااااااااااااااااااااااااااااااااااااااا ااااااااااااااااااااااااااااااااااااااااااااااي

[الذاهبة]

يارب تمم على خير ..








نور ..


أنتي رهيبة .. !

[شقرديه]

شكلها بقي لها اسبوعين وتولد!!!

نوووووووور

مشى المولود وحنا ننتظر الولادة

تحتح

[noor]

المشفر

عاد الا ذي !!

لو بتنبش الجهاز كله مب لاقي غير اللي قريته

عفوا

حاول مرة أخرى :)

وواصل القراءة معنا

في التفاصيل المتبقيه ..

[noor]

آنسه مطنشه

هذا وانتي معك واسطه وعندك خط بلاش :p

بد اذا كملتها برسلها لك بلوتوث

<< الله يالنصب خخخخخ

صبرك علينا شوي

يبغى لنا تكملة الأحداث برواقه وتفاصيل اكثر دقه

لكن !!

مازلنا نحافظ على التشفير :)


تحياتي ومحبتي للشروفه :)

[noor]

دلوعة حبيبها

متأكده انو مافيك عرق سودانيه ؟

شكلك تطقين للعجازين بأصبع خخخخ

اول ماتكمل الحكاية برسل لك رسالة عبر قناة المجد

وعاد اصبري لما تطلع !!


تحياتي للدلوعة

واصلي معنا
:)

[noor]

الذاهبه

وش رايك أصلح دعاية ( رهيبه ياتسالي :D )

تحياتي ومودتي ومحبتي

للقادمه حبوبتي :)

[noor]

شقرديه

الله المستعان ولدت وقاعده تخطب لعيالها خخخخخخ

تابعي معنا :)

تحياتي لأم الشباصات :)

[noor]

سارع بإقتناء النسخه التكميليه لرواية ( ولادة عسى ماعادت ) بغيت أموت

في الوقت مابين 12.30 وَ 1 صباحا

سارع فالكميه محدوده

والنسخه مشفره :)

تحياااتي ..

نور

[noor]

~ الحلقة التسعون بعد الأربعمائة ~

وفجأة رن الجوال
تررررن .. ترررن .. تررررن
ومن المستحيل عليّ ان أقوم فكيف سأستطيع الوصول للجوال
ردت أمي على الجوال
ألو
هلا ياخاله
هلا والله ياوليدي
وش اخباركم وش علومكم
الحمد لله بخير وصحه
( .. ) عندك ؟
أيه عندي .. بس وش فيكم ؟
سلامتك ماهنا الا العافيه :)
مااترك السماعه لحد ماتعلمن وش فيكم http://buraydh.com/forum/images/smilies/13.gif
ياميمتي مافيه شئ ( وانا ميته من الوجع !! )
وبعد الألحاح والإصرار .
.
.
.
.

ترى ( أحمد ) مرسل إخلاء طبي حتى اروح اولد بالرياض
وشو !!!!!!!!
يايمه مااقدر من البارح وانا ذابحتني الطلوق http://buraydh.com/forum/images/smilies/15.gif
وش هالحكي بتروحين بطياره وانتي تطلقين !! والله ماتطبينها ؟
وبسرعه تدق على الاسعاف واطلع للمستوصف القريب
.
.
.
ومن أقبلت عليهم
على طول طردوني من المستوصف
آآسفين حنا مانستقبل حالتها !!
ليش طيب ؟
_ وياقلبي يااميمتي ماغير تروح وتجي :( )
حجم بطنها مو طبيعي وشلون جالسه طول هالوقت !!
عادي هي حامل بتوأم
حتى ولو ارسلوها اسعاف لااقرب مستشفى الحجم مو طبيعي
وانا خلاص وين اعصااابي بس بهالوقت !!
.
.
.
.
وسريعا تم نقلي للمستشفى المركزي
واول مااقبلت عليهم سوو فحص قالوا ولااااااااااااااااااده
الرحم مفتوح !!
إلى هنا ضجت بي الدنيا وماعدت أميز أنا أشوف أخضر أو أصفر !!

.
.
.
.
وجلست بغرفه الولاده من الظهر للعشاء
ولا ولدت !!
وفجأه
حسيت بألم مو طبيعي !!
وبسرعه نادوا رئيسة الممرضات
وبعد الفحص
لا لا لا
انتي فيك استسقاااء بالرحم !!!!





انطرونا = انتظرونا = تابعونا
في الحلقه القادمه

بدأ العد التنازلي !
ولادة غير شكل !!!





خالص مودتي للجميع

نور

[iiigil]

نوووووووووووووووررر

وش فيك علينا كنك الديوان........

[المـ..ـشـفـ..ـر]

نور


ترى وصلت حدي؟؟

اخر مره لك...

لو تسوينها مره ثانيه..؟؟

سوف يتم

اجراء مايلي....:-

1- تشفير جهازك ولايمكنك كتابة اي مشاركه.
2- اخلاء جهازك من اية قصص ومواضيع اخرى
3- اعطال ماسنجرك لأنه هو الي مسبب لك التقطيع بالقصص...(( ماله دخل ياويلي **)).
4- اجراء عمليه طبيعيه لك عند الولاده (( بعد عمر طويل ))..
5- سوف يتم ولادة طفلك بمستشفى الولاده ببريده (( علشان يعذبونك ))..
6- واخيرا.. سوف يتم اجراء العذاب وهو رقم 232343 تقسيم 9879898.. وشكرا

[noor]

آنسه مطنشه

هذا وهم مابعد حطوني بالديوان

والا كان اوظفك عى طول :)


تابعي معنا ..

[noor]

المشفر

الله كل هالعقاب

اجل كذا بخبطها ومب منزلتها الا بعد العطله <<< تموت بحرق الاعصاب :)

ماقلنا شئ على هالعقابات

الا مشفى بريده لاتدعي اطبه !!

سبق وترقدت فيه جاني مرض زود :(

[البرحيه]

تجبيرينا على قراءتك وتجعلينا نتشوق لقراءة المزيد

وو بينما انا اتجول فى سراديب ضميرك الخفى ونيتك لمستترة !! :p


رأيت انك الأفضل والأجمل والأروع ..واشياء اخرى :p


دروسك رائعة .... واضحة .


عاد تراتس بالغتى بالتمغيط ياأجاثــا كريستي << خربت البرستيج

بقولتس
تخيلاتى

لـ. الليلة الخامسه والخمسون بعد المائه

بلغنى ايها الملك السعيد :p:p

يمكن تجيب بنت !!!!!!!!

ون جابت ولد بيصير اكيد يشبه عبسى << هماوه سعودى:d5::d3::a1:


الاب ... يقعد يجرى مكالمات تلفونيه حثيثه يبحث عن حكم شرعى يسقط حق التمايم عن عاتقه::a1::a2::g5:




شكرا لك

[noor]

البرحيه

شرفتني كلماتك المكسره بكلمات مستتره

وضمائر متصله :)


ياخيتي وش اسوي اذا كانت اجاثا تغار مني وهي مقبوره :D

وتخيلاتك طالعه صحيحه مليون بالميه

خاصه اذا كان عبسي من ضمن التخيلات خخخخ

وش رايك تكملين القصه :)

خابرتك طبيبة نساء ويمكن انتي اللي مشرفه على الحاله ؛)



تحياتي للفيلسوفه البرحيه والسكريه :)

[فريـــد]

أحس إن نهاية القصة شبيهه بفيلم كرتو ( ببّاي )

هو ومرته العصقوله

خخخخخخخخخخخخخخخخخخخخخخخخخخخ

[noor]

تقهو

سبق وذكرت ان القصه حقيقه 100%

ولا يوجد بها لا بباي ولا زيتونه !!

[نسيت اسمي]

نور اللة يخليك لتوامك كملي القصة واتركي عنك التقطيع لانة
يقهررررررررررررررررررررررررررررررررررررررررررررررر رررررررررررررررررررررررررررررررررررررررررررر(طالعة من قلب )









دمــــــــــــــــــــــــــــــــــــــــــــــــ ــــــــــــــــــ بخير وان شاء الله تحملين بخمس ههههههههه ــــــــــــتي

[ام الحلو]

وانت وشسالفتك تراني متحمسة حيل واحب بعد هالقصص هذي بسرعة كملي
قبل مايرتفع الضغط وانفجر

[noor]

نسيت اسمي

ام الحلو


ياهلا والله وغلا

والله حاليا ( مقدر احك راسي ) <<< ياساتر صايره بزنس ويمن :)

بس ان شاء الله بنزلها قريبا ..

خالص محبتي ..

نور ..

[بن يمين]

وين الكماله

[ام الحلو]

اناديك باعلى صوتي نووووووووووووووووووووووووووووووووووووووووووووووووو وووووووور
((( وخزياة اسمعوني الجيران )))
ترا اذا ماكملتي السالفة ابزعل

[العبرى]

إيه والله متى تكمل هالسالفة......

تراني أنا بعد أنتظر.......

[noor]

بن يمين

العبرى

ام الحلو

معذره معذره

هاأنا في التوجه للتكمله :)

[فريـــد]

:for10:

تتوقعون تكمل نور القصة ؟! <-- السؤال ماله علاقة بمسابقة النومنيز الثلاثة :D

[noor]

تقهو

هذا انا قاعده اكتب :)

بس الله يستر لايطيح جدار على الجوله الأخيره :p

[noor]

~ الحلقه الألف بعد الأربعين نفاس ~


جلست انتظر الموت !!
يعني مجرد تخيل لكلمة ( استسقاء ) يجعلها تصرخ في اذني بأحداث موجعه وداميه

ابتداء من احتماليه استئصال للرحم وانتهاء بالمشاكل النفسيه التي ستواجهني لاحقا _ في حالة كتبت لي الحياة مجددا _

وابل اليأس يمطر سماء قلبي !

ماذا تذكرت نوسه :(

شاهدت صورة معلقه لبعض الأمراض التي تصيب الأطفال وبعضهم بدون شعر رأس تذكرت نوسه ( وشعيرها المنتف ) بكيت من قلبي لحالها البائس ولم أطلب من احد ان يأتي بها عندي في المستشفى كي لايزيد تعلقي بها !!


اجريت الفحوصات اللازمه وتمت اتخاذ الاجراءت !!

لا بد من استعجال الولاده فالتوائم في خطر بإستمرار الإستسقاء !!



وضعت على كرسي التوليد وانا في حاله اقرب للهستره من وجع الألم بلا ولاده !
واخبرت لاحقا بعدم النوم على الجانب الايسر لان حاله الجنين في الجهه اليسرى معرض للخطر باستمرار الضعط

وياقلبي على اميمتي اللي راحت الشبكيه عندها من كثر الصياح :for13:
وجتني وقالت شوفي اي أمر يطلبونه منك سويه الله يستر يسون بك شئ او يأذنك !
وانا بس سمعا وطاعه !!


ولكم ان تتخيلوا الموقف

بقمه الوجع والمرض

جتني رئيسة الممرضات ( لو سمحتي قومي لدورة المياه ! ) _ الله يكرمكم _
وعلى طول طعتها وقمت لاني اقول بنفسي يمكن رحتي وجيتي تسهل الولاده شوي :(
يوم رجعت واطالع :eek:
وادور عن السرير اللي كنت عليه !
.

.

.

.

كني شبهت على السرير واطالع مره ثانيه :e8:

لا فيه حرمه على السرير !!

طيب وانا وين بجلس ؟؟

رجعت اطالع يمكن انا مو متأكده

الا نظري عدل فيه حرمه على السرير وشكلها بتولد او مدري يسوون لها سونار

قلت لو سمحتي _ وانا للحين مؤدبه ومتبعه نصايح امي لا تتهاوشين معهن وطيعيهن _

هذا السرير حقي :)

طالعتني رئيسة الممرضات وقالت : ايه ادري انه حقك بس هذي بالشهر الثامن ويمكن تولد بننتظرها !!

طيب وانا وين بجلس ؟؟

انتي عادي شكلك مطوله اجلسي على ذااااااااااااااااااااك الكرسي !!

خير اجلس على كرسي وانا هذي حالتي ؟؟

ايه اقعدي هناك !

انا خلص فار دمي مو معقول كذا حتى السراير صايره بالحجز :for9:

قلت مو معقول كذا انا بعد بولد !

لا توك من امس واللي قبله وانتي عندنا ماولدتي

بس مو منطق انك تقوميني من السرير علشان هذي !

قالت هذي بتولد ؟

وانا بعد بولد !!

طيب هذي حامل ببنت !

وش عليّ منها هي بواحد انا ببطني اثنين وذي حالتي

طالعتني رئيسة الممرضات بطرف عينها ( اقول روحي هناك ولا تكثرين المشاكل !! )

اي والله حلوه لاتكثرين مشاكل !! السرير ولي وحالتي ازفت من حالتها بتقومونها والا بطلع للمدي المشفى !!

اطلعي للمدير <<< ولو هالرئيسه شينه وقويه عين !!

وانا ارفع السماعه واكلم ( احمد ) واقر كل السالفه

وماكملت ربع ساعه الا والمدير داق يهاوشها وتعذرت بعذر قبيح وحطتني انا الملومه !!







واخيرن !!!!!!

حطوني بسرير ومن قدي :)

تخيلوا مستشفى ويالله تلقين فيه سرير !!

يوم طالعت بالسرير الا هو مغبر وكنه منكسر

قلت طيب امسحوه على الاقل

قالت لا مو مشكله هالغبار

يوم تواسيت على السرير

وطرااااااااااااااااااااااااااااااااااااااااااااااا ااخ وينكسر :for2:

وعاد ياسلام كل ثقل بطني صار على ظهري !!

ماعدت اتحمل الوضع ابقوم بعدل نفسي مو قادره :(

وبسرعه يشيلوني ويحطوني على كرسي

<<< انواع التعذيب ظهري منكسر ويحطوني على كرسي

.
.
.
.
.
.
.



كملت اليوم وانا ماغير انتظر مايسمى ولاده !!





وصل ( احمد ) من الرياض

وطبعا ممنوعين من الزياره

طلب انه يشوفني رفضوا فأصريت على ذلك

وقمه الحماقه قامت رئيسه الممرضات وفتحت الستاره وطالعتني وقالت : شوفي زوجك جاي يقولك كلمه ولو جبر خاطر !!

كذا نفسي ( اعطيها وحده بصقه محترمه ) !!





استمر الوضع المؤلم ووفروا لي سرير وكنه نازل لي من السماء

يوم جلست على السرير جت تصرخ علي وقالت : لا تنامين على جنيك الايسر

قلت : الحين انا اللي حامل والا انتي ؟؟

واتغطى بالمفرش واتركها !!





اليوم الخامس لوجودي في المستشفى ومافيه مجال اني اولد

كرهت ريحه المشفى وكرهت صراخ الولادات وكرهت صياح الاطفال وكرهت نفسي وبكيييييييت !!

بدؤا بعمل التشخيص واعطوني النتيجه :for4:

حامل بتوأم بنات والبنت الموجوده على الجانب الأيسر ان عاشت فهي مصابه بفشل كلوي والثانيه ممكن تعيش !!



واصلت حالت الصمت بالبكاء ..

تراءى لي منظر والدي المتوفى ( بفشل كلوي ) تراءى لي الألم الذي قاساه وهو في اوج شبابه

ثم تأملت حال طفله مولوده أصلا بذات المرض كيف ستتحمل الحياة !!



هرعت لمن لا يغلق بابه ابدا

دعوت وبكيت وبكيت وانتابني ارق موجع !!



اشرق صباح اليوم السادس

امي ماعادت تحتمل الانتظار اكثر

طلبت منهم عمل ( طلق صناعي )

واخيرا جتني الولااااااااااااااااااده !!


اختلطت الوان الغرفه وماعدت اميز مره اخرى !!

هالني مارأيت خرجت البنت الأولى وفورا ( متوفاه )

حاولت ان استرجع قواي

توسلت للممرضات :(

لحظه راحه تكفون مااقدر اولد الثانيه !!

ومع الضغط والشد خرجت الثانيه اخيرا ( وسمعت صرختها :for8:

بدأت عمليه النتظيف

خلاص ماعدت اتحمل يكفي ألم ( لسا باقي مشيمتين :for13: )

وغبت عن الوعي بعدها !!!!!!!










تفاصيل باقيه وستكون آخر حلقه بإذن الله

ارحموا يدي :)


خالص الود مع بالع المعذره للتأخر !!

[اماني]

طيب وبعدين

[noor]

حيا الله اماني وتهاني :)

شوي بريح يدي ومخي .. تسمحين لي :)


تحياتي لمروركـ

[ام الحلو]

الله يجبرك بمصيبك ويعوضك خير منها
اختي كسرتي خاطري
بس كملي تراني على اعصابي

[noor]

ام الحلو

ياحبي لك متفاعله

ولايهمك بدور وقت فاضي وابكتب الحلقه الأخيره

عاد بتفلسف بالروايه :)


انتظريني


تحياتي للمتابعه الجيده

[noor]

الحلقه الأخيــــــــــــــــــــــــــــره

معذره شكلكم تقولون ( توبه غير هالنوبه ان تابعنا لها قصه لكن اعذروني شئ خارج ارادتي !!
مو قادره اكتب القصه وانا مو مروقه وعايشه جو القصه : )



بعد افاقتي

التفت حولي لم أجد أحد
سوى أمي واقفه عند راسي وتبكي !!:for13:
يوم طالعتني بكت بزود
الحمد لله على السلامه يابنيتي
الله يسلمك
يمه شفتي البنات ؟
< انا ناسيه ان الاولى توفت على طول >
وخبت وجهها عني :confused:
يمه وش فيه ؟
قالت وهي تخنقها العبره :(
اهم شئ انك طيبه
والحمد لله على كل حال
رجعت اعيد السؤال
يمه شفتيهن ؟
ماقدرت اشوفها من كثر بكاها
شوفي يابنيتي كل شئ يصير للانسان خيره
طيب وش فييييييييييييييييييييييييه ؟
الأولى توفت على طول << وتذكرت انهم قالوا لي انها متوفيه
والثانيه وسكتت فتره
يمه خلصيني تكفين وش فيها الثانيه ؟؟:f4:
يقولون انها لو عاشت فهي مريضه !
وش مريضه ؟ لا قالوا لي بس الأولى فيها فشل
والثانيه صحتها حلوه
روحي تكفين تأكدي !!
ودخل ( أحمد )
لا وجهه مايبشر بخير :(
طالعني وهو يتصنع الابتسامه
الحمد لله على سلامتك
ماهمني شئ قد ماتكونين بخير
رديت وقلت : الله يسلمك
أحمد انت شفت البنت الثانيه :g2:
طالعني وانكسرت عينه
ايه شفتها
وحسيت ان نظراته تأكد كلام امي
قلت ايييه
الله يستخير لها الخيره المباركه
ابتسم وقال : تبغين تشوفين نوسه
قلت : ايه بس بروح اشوف البنت اول
على طول ناظر لاامي
وبسرعه قال : لا انتي تعبانه انا بشوفها وبطمنك
خلص ماقدرت اتحمل حسيت ان فيها شئ مو طبيعي
قولوا لي وخلصوني هي ماتت !!:mad:
ماسمعت الا امي تبكي
قال احمد : الحمد لله على كل حال
قلت وش فيها قولوا الصدق
قال جلست ثلاث ساعات ومافيها شئ ابدا
وبعدها توفت :for7:
صراحه حز بنفسي اني اطلع بدون أي وحده
وحمدت ربي وشكرته لاني فعلا ماادري الخيره وين مكمنها
قلت طيب شفتهن ؟
قال ايه
ضحكت وقلت : يشبهن بعض ؟
قال مررررررررررررره
وجلس يضحك وقال بعد نسخه من نوسه وهي صغيره
قلت الحمد لله تكفينا هالنوسه وشطانتها ربي يصلحها
جيبوها لي ميته أشوفها وولهانه عليها
.
.
.
.
.

جلست ثلاث ايام بالمستشفى مو قادره اتحرك بعد تعب الولاده
وبعد وجع ظهري المتكسر
يوم جيت أطلع
جابوا لي عربيه يدفوني فيها وكان الجو شتاء ومغطيني بمليون بطانيه
وجت وحده ممرضه تدفني يوم وصلت آخر الممر وكان مايل
وهي تنطلق العربيه من يدها
انا هاللحظه تشهدت ( انواع التكسير )
لانو ماقدامي غير جدار لو صدمت فيه !!
وبسرعه يركض عامل نظافه ويدف العربيه :for8:
وانا كني جسم آلي يحركوني وين مايبون

والحمد لله طلعت من المستشفى









من خلف الزوايا

البنوتات غسلوهن وصلوا عليهن ودفنوهن :(
أحمد كان فرحان بالتوأم وشاري عربه توائم
ومختار لهن أسماء قريبه من بعض
ومجهز غرفه بالبيت بألعابها


رجعت أضم نوستي لاني فقدتها طول هالفتره :c1:
والحمد لله على قضائه وقدره






والى هنا انتهت قصتنا

آمل اني ماطولت عليكم :D

خالص محبتي مع رذاذ مودتي

نور

[ابوقش]

بسم الله الرحمن الرحيم /


مشكور على التعبير


ههههههههههههه

[noor]

ابو قش

تعبير بقصه واقعيه :)


حياك وشرفنا مرورك ..

[ابوقش]

بسم الله الرحمن الرحيم /


مشكوره على الموضوع


واعذرونا على القطه


هخهخهخهخهخهخهخهخه

[شينة بس اخلاق]

ما صارت عاد ترى عطيناك وجة يلالالالالا امزح واقرادتي عز اللة عنست المهم عطينا الزبدة
* كملي * بس مبروك على التوأم ههههههههههههههههههههه

[العندليب]

الحمد لله على السلامه والله يعوضهم خيـــــر ...