زفة العروس ..

[ماجد الأول]

السلام عليكم ورحمة الله وبركاته

أهلا بالجميع أخواتٍ وإخوانا
زفة العروس من التقاليد العالمية كما أظن
لكن كثيرا من الناس لا يرون ضرورة لها لأسباب يقتنعون بها.
وبحكم كون الإخوات أكثر معرفة بالعادات والتقاليد
أحب أن أسأل عن مدى انتشار هذه العادة سواء في منطقة القصيم أو غيرها
وهل الفتاة ترى ضرورة لهذه العادة لدرجة أنها تحلم بها منذ صغرها ؟
والعروس التي لا تعمل زفة كيف يسير يوم زواجها ؟!! وهل تحس بأنها عروس حقا ؟
حدثوني عن هذا الموضوع بكل ما تعرفون ..

مع أعذب تحية ..

[noor]

لا الدعوى فيها زفه وحوسه

وش عندك اعترف ونعلمك http://www.buraydh.com/forum/images/smilies/wink.gif

لا ترانا نمزح

بالنسبه للزفه

اصبحت الآن اهم مظهر للزواج

بإختصار الزواج بدون زفه للعروس احسه بارد

يعني اذا العروسه ماحست بفرحة الناس فيها

وحست انها فعلا اليوم شئ ثاني

يعني بإختصار الزفه تابعه لاحساس العروس

ولو بيدي كان خليت كل عروس تنزف

اذا كانت بتتكلف على فستانها وعلى المسكه والكوشه

اجل وش بقى بس الناس يشوفونها

لكن من ناحية ان البنت تحلم من يوم هي صغيره بالزفه

انا سمعت ناس يحلمون يلبسون الفستان الابيض

بس ماقد سمعت انه فيه ناس تحلم بالزفه الا اللي طالعه من عمرها واللي حولها يسوون زفات

اما اهل القصيم فأعتقد انه لو بيديهم قفلوا على العروس يوم زواجها لا احد يشوفها يطقها عين

والا ينظلها

الا في حالات خاصه على حسب تفتح اهل العروس وتقبل العريس لفكرة الزفه



من ناحية انتشارها فأنا اشوف بالرياض والدمام كثييير تكون فيه زفه بالزواج بالعكس صار شئ عادي عندهم

مو اذا طلعت العروس كلن بحلق فيها كنها طالعه من كوكب آخر




عن نفسي

اشوف فرحة العروسه بزفتها

والا وش تغير بحياتها اذا ماشافت الناس وحست انها مختلفه هاليوم

ولا اظن بتقطع زفتها الزوج يوم زواجه لاني مااظن فيه احد حاليا مايكلم زوجته ايام الملكه او شافها

عاد غير اللي يطلع يتمشى وياها

يعني مو مشكله لو صبر له ساعه الا ربع واسمها طول عمرها عنده

لكن اشوف ان الزوج ينزف مع زوجته دقه سخيفه جدا

لانه صراحه ماله موقع من الاعراب



هذا مالدي على السريع

واعتذر لان مثل هالمواضيع مااتحمل اكتب بالفصيح

لان العامي يكون اوصل للفكره

اتمنى اني افدتك :)

تحياتي

[أم فهد]

الاخ ماجد


بالنسبه لللعاده اصبحت منتشره وقد تصل الى الضروره عند بعض الناس

اما بالنسبه لاهميتها لدى الفتاه ارى انه يختلف من فتاه لاخرى

اما عن رايي انا في الزفه ارى انها مهمه للفتاه لان البنت اذا مازفت ماتحس بطعم تعب الاستعداد لزواج كذلك ماتستفيد من المصاريف الي صرفتها على العرس

لكن لابد ان تكون الزفه بحدود دون (هبال)

هذا لا يعني ان يوم العروس بدون زفه ماله طعم لانه ممكن تسوي اشياء داخل غرفه القصر احلى من قدام الناس وتتمتع هي وزوجها والاهل سوى

نصيحه (قراءه الورد ضروريه في كل الاحوال )

اختي نور

اولا تكلفه الفستان والمسكه للناس وللزوج بعد لانه اهم من الناس وهو اللي دافع دم قلبه

ثانيا بالنسبه للشفاحه موجوده بكل المجتمعات واسمحي لي نظرتك لاهل بريده خطأ وصارو يختلفون عن اول
بعدين الضرر والعين موجودات باالزفه وبدونها اذا الواحد نسى الورد والذكر سواء كان الضرر من شياطين الانس او الجن



أم فهد

[خزامى نجـد]

الزفة

بصراحه هي مهمة جدا للفتاة واغلب العرايس يطلبونها بعض المعاريس يرفضون مرافقة عرايسهم في الزفة فتخرج العروس وحدها ((وهذا المنتشر في نجد))

في منطقة القصيم ما فيه زفه الزواج اللي فيه زفه يصير عائلي ومقتصر على العائله فقط


عموما اكثر البنات الآن يطلبون الزواج العائلي حتى يتسنى لهن تنظيم زفه عائليه براحه تامه وبدون تعليقات او ((عين ))

الواجب على الرجل الا يرفض زفة عروسته حتى لا يكون في نفسها شيء عليه
لأنها تمثل الحلم المجسد لها




تحياتي لك
خزامى

[بنت الشرقيه]

الزفه غير ضروريه عند بعض البنات:)
طبعا اهم شي ان زوجها يشوفها في احللى واجمل حله:o

الدارج الحين زفه العروسه لحالها على بيت شعر ينكتب لها :rolleyes:

طبعا بعد ان تنزف وتجلس في الكوشه الي هي مصممه بطريقه جميله مليانه ورد طبيعي وطبعا تختلف تصاميم الكوش
على حسب ذوق العروسه:)

طبعا يكون العريس في انتظار عروسه :cool:
فبعد انتهاء التشريعه او الزفه
يحضر العريس لاستلام زوجته :o
اذا فيه كيكه او مصوره تصورهم مع بعض وهم يقطعون كيكه الفرح +كم صوره للذكرى ولاولاد المستقبل :)
يشوفون امهم وابوهم يوم عرسهم:)

هذا بأختصار
من بنت الشرقيه

[سيدة ....]

زفة العروس يا بنياتي

صحيح انه حلم احيان وزينة وتفاخر احيان اكثر بس صدقوا ناصحتكم ان التوفيق اهم

لكن بنظرتي ان زفة العروس زينه اذا موقعنا بغضب الله زعله

وهذا يعني استحالتها مع ما حذرت منه

الله يتمم بالتوفيق على المعرسات ويوفق اللي ما بعد أعرس

سيدة ....

[شقرديه]

شوف ماجد

حسب درجة ركادة العروس

لا احد يزعل

بس بكل صراحة نا ضدها شكلا ومضمون

لعدة اسباب

اولا مالها داعي

ثانيا كل عرس نروح نشوف فيه زفة ما يخلو من تعليق البنات وحسد العانسات وهمز ولمز شوفي بطنها طالع شوفي العريس ما عطاها وجه شوفي العريس يمطخ فيها وش عجلين عليه

ومن هالحكي الين ما تطلع الا وهم طاقينها عين

بعدين اصلا بصراحة منين لها اعصاب تطلع قدام الناس وهي عارفة انها محط انظار الجميع

والله انا ضد شيء اسمه زفة

ولا زافة ولا وحدة من بناتي من غير شررررررر

مع العلم اني احب الكشخة والتشخيص بس زفة لاع

واحب التميلح والحركات الغريبة الا الزفة

المعقول انادي به لكن اللي له نتايج سلبية اكرهه

صح فيه زواجات نجحت وهم حاطين زفة

لكن برضوة انا ضد الزفة شكلا ومضمون

تحتح ومبروك مقدما ماجد الأول

[الذاهبة]

أقول بنات .. لا مؤاخذة .. !!


أنتن من أي عصر .. ؟؟


الحجري ؟ ولا الحصوي ؟ ولا المنجنيقي ؟؟


! !

[أم فهد]

اختي الذاهبه

اولا وش الفرق بين العصور اللي ذكرتيها وهل فعلا يوجد ذكر لهذه العصور لاني حسب معلوماتي اعرف انه لاوجود لها


ثانيا وش علاقه الموضوع بسؤالك عن عصورنا اللي نعيشها

بعدين ماعرفنا رايك بالموضوع
و(لامؤاخذه) :cool:

[ماجد الأول]

حياكن الرحمن يا أخوات

قلت من البداية هناك من لا يرى ضرورة للزفة لأسباب (يقتنعون) بها
وليس بالضرورة يقتنع بها الجميع.
من لديها (لديه) رأي فمرحبا به أيا كان
أما الهمز واللمز فبعيد الله يرضى عليكم.

وبس ..

[noor]

ماجد الأول

وش اللي حطك بحلوق بنات المنتدى :)


الزبده

لو عندكم طاري تزفون عروس او شئ من هالقبيل

علموني اذا تبغون خدمه

ولزوم احضر الزفه <<<< شروف :D


لا الجد حنا تحت الخدمه :)

[خزامى نجـد]

نووووووووووووور

الرجال قال يبي آراء ما قال يبي يعزم أحد

المهم الموضوع حلو ارجو من الجميع المشاركه حتى نشوف أراء الاغلبيه


تحياتي
خزامى

[عبدالله القيعاني]

اخوي / ماجد الأول


وجهة نظري زفة العروس له عواقب وخيمه منها ..؟

تجد كل فتاة وخاص التي لم تتزوج تنظار هذه الزفه وهي منحرمه او بعض المتزوجات اذا شافة هذا الشخص تكون من حرمه من اشياء ..؟؟

وتزهق النفس وكثيراً ما نسمع عن المطلاقات وخاصه التي زفة ..؟

ولا ننسا بهذا الوقت الباندا يكثر التصوير وما شعوركم ايه الزوجين لو نزلت الصور في كل المنتديات ..؟؟؟؟؟؟؟؟؟؟

لكن الحمدلله فيه اشياء بديله ضعها الزوجه في كامل زينتها عندك في الغرفه او في اي فندق تسكن فيه وعش معها ليلة العمر وهي متحلية في كامل زينتها ..!!!


تحياتي ،،

[ماجد الأول]

مرحبا نور
ما دمنا بين قوارير فالأمور طيبة إن شاء الله
القصة وما فيها أن قريبة لي كان زواجها قبل شهر
على الطريقة القصيمية .. يعني بدون زفة
وقبل أيام جلست مع بعض القريبات والأقارب وانفتحت سيرة للزفة وما زفة ..
وكان الغالبية رافضين لها والقليل مؤيدين
أنا حقيقة لم أتحدث كثيرا لأني لا أعرف كيف تفكر الفتاة بالموضوع
لكني كنت من الرافضين
يعني على قولة شقردية عن الزفة .. لااااع << بغا يطلع البلعوم :)
لذلك أنا هنا ارتحت لرد الأخت شقردية كثيرا ووافق ما في نفسي كثيرا
وهذا لا يعني وجود قصور في ردود البقية
لكن شقردية ذكرت رأيها صريحا لذلك جعلت منه معيارا
أما باقي الأخوات فذكروا كلاما أقرب إلى العموم ..
فكل ما ورد في ردود البقية مما يوافق كلام شقردية أنا معه وأؤيده
سبب رفضي لهذه العادة ورد كثير منه في كلام أختي شقردية
وأضيف عليه أن سعادة الفتاة الحقيقية تكون مع زوجها وكل ما تجهز الفتاة نفسها به قبل الزواج يجب أن يكون لزوجها
وليس من أجل نصف ساعة تقضيها أما اللي يسوى واللي ما يسوى
وهي في كل حال لن تسلم من نقد الناقدين وألسنة الملسونين وحسد الحاسدين
من يريد الخير للفتاة فسيدعوا لها سواء عملت زفة أو لم تعمل
وزفة عائلية أمام الأقارب الأقربين جدا .. فكرة مش بطالة ..
وعلى فكرة .. زفة الزوج والزوجة سويا أمام الجميع أنا ضدها بالكلية والجامعة والثانوي !!
وهذا رأي
وبالله التوفيق

وتعالوا أبيكم ..
ورد في كلامكم مصطلحات ما لي فيها مثل: المسكة واللانجري !!
فيكم تشرحون لي ؟
أخاف تطلع مسبة وأنا مدري !

وسلامتكم

مع التحية ..

[كرباج]

ياشين الضعوف اذا طاحو بشي بعد مشكلتنا شعب تقليد بكل شي ,,,ابي سبب مقنع للزفه

لاتقولون ليلة العمر ماذبحتنا الا ليلة العمر والمشكله المستفيدن هالناس اللي طايرتن بوهتهم :D

تقل ماشافوا عيشه وبعدين فيه سبب ان الزفه ماتناسب العريس ابد لان عيونه تبي تصير زايغه:) من

هنا والى هناك ويناظر ذي ويبلحق بذي ويتحسف على اللي بجنبه هههههههههههههههههههه

واذا جينا للامور الماليه والله من واحد واحد اخذ قرض ولا تسلف ولاطلع ددسن كله علشان حرمته

حنت فوق راسه مثل الغراب وترى العرس يبي وترى ابي عرس بنتي يطلع احسن عرس بالعطله

وابي العالم يهرجونبه وبعدين ياخاله:) النهايه الطلاق كله من هرج العالم ترى الدعوه

شمعتين وقطعة قماش ناقشين عليه بترتر :D هههههههههههههههههه الله يرحم الحال بس

طيب يمكنكم سمعتوا بسالفه العائله الثريه بالرياض اللي جابو بزواج بنتهم الفنانه الشينه احلام:) وماكمل زواجهم شهر اللهم لاشماته على الاقل لو جايبن نانسي عجرم ولا اليسا كان ماعليه حسوفه:)


( من اسخط الله برضاء الناس سخط الله عليه واسخط عليه الناس ومن ارضاء الله بسخط الناس رضي الله عنه وارضاء عنه الناس )
هذا ماكان في جعبتي ولكن الحسره والغبنه موجوده في القلب

تشااااااااااااو

[الذاهبة]

بسم الله الرحمن الرحيم
بعد إذن صاحب الموضوع الأستاذ
ماجد الأول
أود المشاركة بالموضع ..

زفة العروس .. و مراسم الحفل .. و تبعات العرس .. و سفريات شهر العسل .. و غيرها من أمور متعلقة بالزواج ..مثلها مثل أي حدث آخر بالدنيا : لابد و أن يتأثر بالظروف المحيطة ..

لكني سأحدثكم عن الأوضاع الطبيعية و في الظروف العادية .. و من وجهة نظري الشخصية // كما طلب صاحب الموضوع

حفل الزواج بدون زفة العروسين .. أسمحوا لي مو زواج

يصير عزيمة عادية و معازيم فاضين او مستهبلين .. لكن ينقصهم أمر كبير جداً و هام.. و هو طلة العرسان عليهم ..

البنت في حياتها ليلة واحدة فقط .. ليلة زواجها تنتظرها و تخطط لها و تستعد من قبلها بأشهر و بعضهم بسنة كاملة

هذه ليلتك أنتي .. و انتي الليلة ملكتهم

لازم تظهر بأحلى حلة و توريهم ..

و بطبيعة الحال ، كل عروس لابد ما تضفي لمساتها الخاصة فيها ليلة زواجها

و لابد من التنسيق مابين الألوان السائدة في القاعة .. و مفارش الطاولات .. و السلات و الشمعدانات ..و هذايا المعازيم ووو....و كل هذا لازم يمشي مع ستايل فستانها و كوشتها ..

وعموما كل عروس و ذوقها في الترتيب و التنسيق في الزفة و حركاتها

إلى المونتاج صارت البنت تصور لقطات و تمنتجها و تعرضها بالزفة ..

طبعاً لسنا بصدد عرض الحركات .. لكن تعجبني المبدعة .. !!

وصدقوني .. اهتمام البنت بالامور الصغيرة قبل الكبيرة .. دليل على دقتها و حرصها

و اعتقد هذه ميزة في قلة من البنات ..

يعني ببساطة .. زفة العروسين مع بعض شي أساسي ولا يستغنى عنه ..

_______________________________________

كلمات مسوية زحمة :

* التوفيق من رب العالمين .. و لا تربطون الزفة بالتوفيق ..

* بالنسبة للعين .. اللي تتحصن و تقرأ وردها و تتوكل على ربها ما يجيها الشر بإذن رب العالمين و المفروض ما نخاف من العين لهذه الدرجة ..ولا كان ما سوينا شي بحياتنا خوفا من العين ،،، و ترى كثير نشوف بنات جميلات و ماضرهن شيء ما شاء الله تبارك الله ولا العين مقصورة فقط على العرايس ؟؟ !!

* بالنسبة لكلام الناس : لو سويتي زواج فخم قالوا وشوله التبذير ؟ لو سويتي عائلي : قالوا وع وش هالبخل ؟ لو سويتي رجال فقط : قالوا :وشوله كذا يعني ما يبون حريمنا يحضرن ؟ ....طيب و الحل ؟؟؟؟ كلام الناس و نقهم عمره ما يؤثر ،، و مستحيل ترضينهم .. و بعدين ترى الحريم بالذات نغورااااااااااااااااااات و ينقهرن من كل شي ..

أنا أبي أفرح بزواجي و أسوي كل اللي في بالي و الناس لو تبي تتكلم إلى يوم القيامة .. ماعني مشكلة ، بل بالعكس

إذا تكلموا عني اعرف أني أحسن منهم و قاهرتهم و بآخذ من حسناتهم إن شاء الله ..

و إدلع يا كايدهم @@

* العروس لما تزف لوحدها كأنها يتيمة .. ولو يزف العريس لوحدة خير إن شاء الله كأنه خبل

يعني ما يزفون إلا مع بعض ..

* إذا شافتني عانس إلخ إلخ طيب مو مشكلتي انها عانس الله يرزقها يارب باللي يسترها و يملي حياتها .. و إذا شافتني شينة .. برضو مو مشكلتي انها شينة ..!! الله يجملها بالإيمان .. الله جميل يحب الجمال ، و يحب يشوف نعمته علي .. إذن من حقي أنا يالعروس أني أتزين و أبهرهم .. !!

* متطلبات الزفة و ترتيباتها تعتمد على الميزانية المحددة ، و على أساسها تكون الزفة بسيطة أو فيها حركة أو فخمة .. إلخ

* هذا اليوم بتظل تذكره طول حياتك و كل مرة تشوف الصور ليلتها ، تتجدد فرحتك و تعود بك ذاكرتك للايام الجميلة

بالنسبة للمصطلحات اللي ما فهمتها يا استاذ ماجد _ البنات يمكن مشغولات و لا ردوا عليك _ المسكة : بوكيه ورد أو تحفة أو عصا سحرية أو شمعة أو إن شاء الله طاسة .. المهم حاجة تمسها العروس ، يعني ما تجي ( تبهطل ) يديها فارغة ..
اللانجري : تعرف محلات نعومي ؟ فكتوريا سيكرت ؟ شانتيل ؟ لاسنزا ؟ الحسون اللي مو حق الاقمشة ؟ هذه المحلات تبيع اللانجري ...... !




آسفة للإطالة أحبتي و جعل الله أيامكم كلها افراح و سعادة ..

[ماجد الأول]

شكرا للجميع على المشاركات الجميلة
شكرا الذاهبة
المسكة عرفتها
لكن الثاني الظاهر لسا بدري ..!
لأني ما أعرف ولا محل من اللي قلتِ
أعرف مطعم مشوار
وكافتريا السعادة
وتموينات فهد بالعقربية
وحلاق قرطاج ..
وبس :)

مع التحية

[الذاهبة]

العقربية !!

طيب إذا دشيت الراشد مول ناظر لمحل ( الريس ) يمكن تعرف

بقولها على بلاطة //

اللانجري = Under Wear + أطقم قمصان النوم + أطقم الشاور ...


( وينك يا ماجدولين ) !!


عموماً هي بالنهاية شغلات حريمي .. مو مشكلة لو ما تعرفت عليها

[شقرديه]

يؤ يؤ يؤ

وش وصلنا للانجري وشغلات الحريمي

:)

الذاهبه يمنع التوضيح اكثر

لما نسوي منتدى خاص لها لنا هناك كلام ثاني

وعد اذا تملك ماجد الأول ندخله للمنتدى عشان يتثقف

تحتح

[ماجد الأول]

أبدا أبدا .. مو مشكلة ..
أصلا أنا حاس إن الدعوة فيها إن
لذلك قلت (لسّا بدري)
شكرا الذاهبة ..
كلك بركة ..

شقردية ..
شكرا لك ..
(خاص لها) هذا يذكرني بالعنقاء :)


إلا زفة العروس .. ما رأيكم بها ؟