بسوق العثيم إمرأة تسدد كفاً جميلاً بوجه رجل ......؟ هذي لبطوله ولا بلاش......؟؟

[حبوبة]

تصدقون قلة الأدب بدأت تطول الحريم الكبار .....!!!!!!!!.......

صدق أو لا تصد

اليوم الجو ممطر وحلوووو بالمرة ..... كنت رايحة للعثيم وبعدين نزلت من السيارة أنا واختي الصغيرة وكان الجو ممطر وكانت وحدة كبيرة بالسن يعني ممكن عمرها بــ بالأربعينات ...المهم نزلت من السيارة وكانت رافعه شوي من قميصها ...ليش عشان الجوو ممطر وخايفة تتوسخ ملابسها .....دخلنا وياها مع البوابة سوى وكانت رفعه قميصها وتتكلم مع بنتها الصغيرة وتقول وسخ الخط أسود يوسخ الملابس ........دخلت ...الظاهر فيه واحد كان يشوفها واعجبه الوضع (مشفوووووح) والمصيبة إنها بمكان أمه (أقصد عمرها )..المهم تابعها لحد ما دخلت وكانت بتدخل لمحل إيتام ......أنا ماكنت مركزة لاني أنتظر أختي(الصغيرة) رجعت لسواق(أرسلتها تجيب غرض) وانتظرها المهم فجأة أنا أسمع صوت ضربة قوية !!!!!! وش تتوقعون ؟؟
الحرمة الكبيرة تضرب رجال على وجهه ....منظر حلووو بالمرة الرجال طاح عقاله واخذه بسرعة وكمل مشيه ما كأنه مسوي أي شيئ لف يسار واسرع ... أنا بسرعة قلت للحرمة تراها هرب ...إش مسوي ؟
قالت خليه ينقلع هذا قليل أدب مضايقني من أو ما نزلت من السيارة .... قلتلها هرب هرب من هنا قالت خلاص إتركيه ......الغريب إنتهى الموقف على كذا ..... الغريب كيف دخل .....طبعاً الحارس كان يسولف مع واحد عند الباب من الخارج ......معليش ترى أنا ما أدري هو شايف الحرمة وهي رافعة قميصها ولا لا ؟ بس هي تقول مزعجني من أو ما نزلت ..وأنا شايفتها يوم تنزل وتوقعت غنه شافها وهي تنزل ...لان المشوار من السيارة لحد الموقع أقل من دقيقة ..قريب بالمرة .
المهم بالموضوع الوسخ هذا كيف يمشي وما أحد إنتبهله ؟
أنا يوم راح وابعد طلعت عظلاتي وقلت كذا .........؟
أحسن شيئ بالموقف جرأة الحرمة وبطولتها ...لو كانت غيرها كان هربت منه وهي خايفة ؟

[الرحيـق المختـوم]

جنت على نفسها براقش

[mam999]

يستااااهل ماجاه

[السكب روح الشفق]

كف جميل

على وجه يستاهل


من يد لانعدمها في تربية الرجال...

[band2003_1]

يستااااهل ماجاه

[بنت الشرقيه]

يستاهل الي جاه

[النسيان]

صح يستاهل ماجاه بصراحه

وبعد لازم نقول الستر زين ولو إنهابعمر جدته بعد لازم تتستر واعتقد علبة صابون تايد سعرها ريال وربع تكفي لغسيل فستانك وعبائتك أحسن من انه يتوسخ شي لا يمكن غسله ابدا سيدتي او انا غلطان....!!!!؟

[اكار شوكولانا]

قللعته ويستاهل......وصدقت اخوي السعودي..وشكرا اختي حبوبه

[بندر الحمر]

من حصل شي يستاهله

ركله قويه شكله

[خـــــــــــــــالـــــــــد]

دائما الرجال في هذه المواقف ضعفاء ..

والترصف الحكيم من المراه بردعه او التبليغ عنه


يؤدب هذه النوعيه

بدلا من السلبيه والهروب فتفتح له ولغيره المجال بجبنها

شكرا اختي حبوبه

[الذاهبة]

السلام عليكم //


* من المفترض على الحريم ( حتى و إن كانت عجوز ) أن تتستر و تحتاط لمثل هذه الأمور :for13:


* ( مستحيل الرجل يناظر أو يلمح أو يستهبل على حرمة و هي مستترة و متغطية و محترم

نفسها ،، مستحيل ) يعني ماحد قال لها طلعي كراعينك و آمني :o.. !


* هو اعمى ما يشوف ؟ أو صغير ما يميز ؟ أو ( ماكان في العثيم وقتها أحد حلوو

و ملفت للنظر ) و ما لقى غير هالمره ؟ :p


* يا حظكم يا حبوبة عندكم سائق :rolleyes:



__________________________________________________ ____ سلام يا قمر !!

[جلوي العتيبي]

تصرف جميل

ورد قوي لمن تسول له نفسه مثل هذه التصرفات

مشكوووره حبوبه

[الناقد البصير]

مشكوره اختنا الحبوبة على نقل تلك الحادثه

لقد ابدعتي واجدتي في تصويرها

هذه المراة تعتبر في الحقيقة انموذج يحتذى به

وياليت جميع نسائنا على شاكلتها اذا لما كنا بحاجة الى هيئة في الاسواق

نعم المربية ونعم القدوة لم تقتصر على تربية ابنائها

بل ربت كل من قل ادبه من الشباب

فكلنا فخر بمثل هذه المراة

[امرؤ القيس]

اخت حبوبة 000
والله لو أقول للمرأة قصي ما حدث ما قصته بهذا السيناريو المحبوك000

اثرك تحبين الشر 000!!ّ لو هو صابر اشوي كان جاه كف منك00

لكن نقول للرجل ان كيدهن عظيم 00

آسف للأخت حبوبة بس حبيت انرفزها ثلاث حبات !!

[ثامر الناصر]

مشكورة اختي :

لكن يستاااااااااااااهل والرجل ماجاه وزيادة

وايضآ تستااااااااااااااهل الـ ( عجيز ) ماجاها وزيادة من المضايقات لانها تجعل الرجل ينظر لها بلبسها

ودمتم

[المجمعة ديرتي]

كف جميل

على وجه يستاهل


من يد لانعدمها في تربية الرجال...

[وليد الطريقي]

بعيداً عن اخطاء تلك المراه لكنها احسنت عندما علمت ذلك السافل اننا بخير ومازال نساءنا قادرات على ان تذود عن نفسها بارك الله بها وبكي وحمى الله نساءنا من كل مكروه

[وردة]

السلام عليكم
الغريبه ان الحرمه الكبيره ما لبست سروال
المعروف في عجزنا لبس صراويل تحت الثياب
خاصه في الشتاء..
ومع هذا يستاهل
انا مره شفت وحده مصريه شدة شماغ واحد يلحقها بالسوق ورمته بالارض ومشت وخلته
وهو استحى وطلع من السوق..

[المنتصر بالله]

اول شي يتساهل ماجاه

ثاني شي الحرمة ماهي عجوز!!!

بالاربعين يعني مالها حق (تكشف ) عن ساقيها؟؟؟؟

يعني هي السبب وهو يستاهل!!

[حبوبة]

الإخوة والأخوات ::::
الرحيق المختوم
mam999
السكب روح الشفق
band2003_1
بنت الشرقية
اكار شوكولانا
فيمتو
الزعيم
أشكركم جميعاً على توحد ردكم تقريباً وأنا أقول معكم بصوت عااااااااااالي
يستااااااااااااااااااااااااااااااااااااااااااااااا اااااااااااااااااااهل

الأخ الكريم غريب الجواء كلامك صح ويستاهل والصابون رخيص بس لا تنسى (الموية - والمكوى - وطاولة الكوي - وراتب الشغالة إذا فيه شغالة - والوقت و..و...)
يحق لك رجال كل شيئ جاهز وتلبس وتأكل وما تدري وش يصير للزوجة المسكينة من تعب (وهذا واجبها )
غريب الجواء أمزح معاك كلامك جداً ممتاز وما ندري يمكن تكون حالهم ضعيفة ...هل عندك إستعداد تشتريلهم الصابون اللي في ريال وربع ؟
شعلتنا ومشرفنا خالد (زي ما هو مكتوب ) ::
كلامك جيد وفعلاً المفروض يصير فيه محاظرات عن هذا الموضوع ....وعلى فكرة إنت تقول سكوووت البنت جبن ...؟
أنا أخالفك في هذا :::
ما أدري جبن من وين ....ليش ما نلطفه ونقول حياء ....ترانا مو زي المصريااات ولا غيرهم ....حنا ما تعودنا ونستحي حتى مجرد الوحدة ترد على التليفون على رجل .....أنا عارفة إنك بتقول هذا أيام زمان ...بس صدقني والله ما زال فيه وفيه .....؟
بهالمناسبة ليش واحد ما يتبنى عنوان محاظرة ويوصله للناس اللي يسوون محاظرات مثل (سليمان العودة ) ويكون عنوان المحاظرة (كيف تتصرفين عندما تضايقين ).....والله شكلي بسوي أنا المحاظرة أهم شيئ العنوان وجبته (وحدة صدقت عمرها)
المهم ياليت واتمنى يكون زي المحاظرات هذي لانها تفك أزوماااات وتفتح عقووول البنات والعيال يعرفون إنه ممكن تكون البنت هذي متخرجة من الدورة ولا سامعة المحاظرة وبعدين تسدد له كف .
تشكر يامشرفنا
أهلين بالذاهبة ....حبيبتي من زمان عنك ....وين الناس ؟
عمري ما تحجرين واسع ....تراها من ضمن القواعد وبعدين ممكن أنا أكون بالغت في تصوير الحدث ...... بس بجد والله ما بالغت لاني متأكدة وقدام عيوني رفعها للقميص ملفت للنظر .
الذاهبة أنا مقتنعة 100% بس بسألك سؤال وما أبغاك تجاوبينه بالنت ......حبيبتي الحرمة هذي بعمر أمي وامك لو كانت أمك ولا أمي نازلة من السيارة ورفعت قميصها عشان المطر ...بصدق بنقولها نزلي ياماما قميصك ؟
أنا عن نفسي لا وألف لا ؟
ليه لانها كبيرة وهي اللي تعلمني عكس هذا لو كانت أختي والله بمسح فيها البلاط (أمزح تراها تقواني )(وحدة خافت) .
أقولك عمر أمي تجاوز الأربعين مو معقول بقولها نزلي قميصك .....أصلا بعد الأربعين ما أحد يناظرها...... ليش ؟؟
لان البديل كثييييير وسهل
عزيزتي الذاهبة على الرغم إني مقتنعة من كلامك 100% إلا إني لما أتخيل الموقف يكون عندي رأي ثاني .
حبيبتي بالنسبة للسواق تحت يدك واعتبريه عندك ولك بس والله دبشة مع يعرف شيئ نروح واقوله إنتبه للطريق عشان تعرف ترجع والله العظيم ما أذكر مرة فهم ورجع صح إلا إذا راح على رجوله للبقالة .
الناقد البصير ::
مساك الله بالخيييير
أشكرك على مدحتك
وكلامك ممتاز ويضحك ......أقصد يوم تقول ما إكتفت بتربية أولادها راحت تربي وتأدب الشباب .
العلقم المخلوط بــ(......)
والله قاعدة أضحك من الفرحة مبسووووووطة (طبعاً ما فيه أحد ما يحب المدح)
العلقم المخلوط بـ(....)
صدقني مو حب للشر وعلى فكرة لو أنا صارلي مثل الموقف هذا والله ما أقدر أتصرف كذا .....يعني بإختصار خوااااااافة أو زي ما قال مشرفنا خالد جباااانة ......تصدق الآآآآآآن وبعد 4 أيام إذا تذكرت الموقف ..... ما أدري وش أقولك بس مو مستوعبة ........عشان كذا أنا أول وحدة بتدخل الدورة أو المحاظرة اللي تعنونت بـ(كيف تتصرفين عندما تضايقين)
.....يالله سجلوا إسمي من الآن عشان أروح أطبق بالنخيل (ههههههه)(أول مرة أشوف وحدة تقول كلام وتضحك منه)

الأخ
سلطانكو المغترب:::
نعم يستاهل بس هي لا ما تستاهل .....هي بحاول من الحكومة نعطيها وسااااام إسمة وسام الشجاعة والبطولة .

بالأخير أشكركم على تفاعلكم مع الحدث
واللي يعرف الحرمة اللي صارلها الموضوع ...تكفوووووون يقولي عشان أخلي أمي تتعرف عليها والله العظيم إني متحسفة كثييير إني ما تعرفت عليها (لان أمي تقولي المفروض أخذتي رقمها وعزمتيها ).....والله إنها تستاهل

[حبوبة]

الأخ المجمعة ديرتي :: تشكر على ردك وربي يخليلها يدها (بس اللي سددت الكف ....وحدة بخيلة )

عيون القصيم الحمد لله والله الحرمة هذي تعطينا شوي أمل بالمستقبل ...مشكور

الأخت وردة هذي عجوز متطورة (بعدين تراها مو كبيره واجد )
المصرياااات قوياااااات مو زينا (حنا أقوى بس بعد سماعنا للمحاظرة اللي أنا عنونتها (حقوق الطبع محفوظو)

النتصر بالله .....صدقني تعليقك من أجمل التعليقات ...... إنت نبيه واضح إنك محقق
كلام النتصر رائع وفعلاً تذكرت إنها مو عجوز يعني ما زالت تنجب ولسا في عمر آخر الشباب.....المنتصر بالله أنا عينتك محقق هذا النتدى ...... بس مو عسكري مدني ....ما أدري يجي محقق مدني ولا لا ؟ بس عشاني يجي .......
أشكر الجميع

[الناقد البصير]

:x10:

انا اقترح تجيبون العجيز هنا للمنتدى وتخذون منه الحقيقة

لا تزعلين حبوبه اقصد انا مصدقك بس اقصد تداعيات الموقف

ونتي ياحبوبه نبي منك تحققين :c4:معه بس تحملي مابيجيك:for6:


بعدين يا اخواني لا تبرون الشاب وتتهمون البنيه ;) ( عشان ماتزعل)

ترى فيه شباب لو يشوفون نعجه لابسه عباه تحرشوبه

[h0911]

والله ونعم في هذه الحرمه :for2:

[نايف الصغير]

سوتها اختي ماعلمتني وش اوصافه اكمل عليه

اكيدله واسطه عند البوابه ولا وشلون دخل الى السوق

[الحب السعودي]

هواة المعاكسه يعتقدون ان اهمال المراءه لحشمتها دعوه صريحه منها للتحرش بها 00
هذه المراءه ارادت وبحسن نيه ان تجنب ملابسها( الدنس ) وكادت ان ( تدنس ) ماهو أعز واغلى 000
الا ( العثيم ) ماعنده نيه يفتح فرع (بسكاكا ) ؟؟؟
تحياتي للجميع

[النسيان]

اختي حبوبه وماله اشتري صابون بريالين بعد
لكن على فكره ترى عيال البلد فيهم البركة ينفعون سواقين حتى لو ب 600 ريال لكن مزمارالحي لا يطرب ياخيتي انتم ميتنين على الهنود والاندوسيين خلاص فيه شباب ممكن عندهم استعداد يلبسون بنطلون وقميص ويدهنون شعورهم وتصير تلمع مثل الهندي ايضا ماعندهم مانع من متناول قليلا من الثوم حتى تصير الرائحة زكية والجو منععععش هاااااه ينفع اختي حبوبه ؟؟

مامضى كان فاصلا من المزح الذي تداعبه الجدية قليلا
لكم تحياتي

[ابوهيلة]

واقول انا وش هالصوت ..على بالي ,,, انه رعد
واثره ..طررررررررراق من قلب ..لا والعصيم بلاط >>انواع الصدى
****
يعطيك العافيه
حبوبه
واتمنى ان اليد كان فيها حنا بعد ..علشان تطبع ايده بخده

[شقرديه]

من قااااااااااااااال ان الاربعينيات عجززززززز

<<<<<<<<حمقت خافت على بنيات جيليها

هذا اولا ثانياااااااااا

صح كلامكم ونعم فيها

بس لو لو بحط نفسي مكانها

وفيه شاب يعاكس <<<وشو عليه يالغزال الشارد!!!

ايه نكمل

اصلا بصراحة مجرد اقترا ب رجل غريب مني لو هو صاحب المحل يكوش الجلد

كيف عاد تعطيه طراق!!

انا اوضح لكم وجهة نظر مع اني اسطر اعجابي باللي يعطن طراقات

بس بصراحة لو وش ما صار مستحيل امد يدي على رجل

وبصراحة وبعيد عن المشي مع القوم عز

صعب جدا حرمة تصك رجال كف اذا ياس من انه يلقى استجابه بيروح من نفسه

وبعدين الكف على وجه الرجل حتى وهو كف من يد ناعمة عز الطلب


<<<<صريحة

اتمنى تكون المعلومة وصلت!!

تحتح

[الناقد البصير]

الله يرحم حريم الجيل الاول

بصراحه تعجبني المراة القويه الجاده

[حبوبة]

الناقد البصير تحية مسائية لك بس صدقني زي ما يقولون (عليك حق).....واللي يحكمون بيني وبينك اللي يقرون تعليقك وبهالمناسبة بنسوي تصويت وأنا راضية بحكم الآخرين .
الناقد البصير ماشاء الله عليك بتجيب العجيز !!!!! ولا بتكذب اللي روى القصة ...؟
أقول إصدق وما تنحرج ؟
عموماً هي واضحة ....... وإنت ذكي ما صرحت ولا لمحت بل شككت والتشكيك أشد من التلميح والتصريح .
الناقد البصير أنا راضية بالحكم وبنعد الأصوات وبنشوف إذا قال أكثرهم إنك غلطت علي ترى أبغى حقي ؟ وإذا قالوا أكثرهم لا ما غلط فأنا بأخذ درس بالمستقبل إني (موسوسة) .
الأخوة والأخوات المصوتين ترى حقي اللي بأخذه بيكون موزع بيني أنا واللي شاركوا بالتصويت لصالحي (إنتخابات بلدية)
لا بعد وتختمها بتعيينك لي بإستلام التحقيق معها ؟ لا والله تحقق أنت معها بوجود محرم......المسكينة صارت غلطانة ليش ما تقول نجيب الرجال نحقق معه .
لا تنسى ما أسامحك إلا بتصويت وإذا ما فيه تصويت ترى الحكم بالظاهر لنا ...؟

الأخ (h0911)::
النعم شوي فيها تستاهل أكثر .

الأخ نايف الصغير....يوه صارت أختك ....ياليتها تدري وش قاعد يقول نايف .....وتستحق أكثر وكل واحد فينا يتمنى القرب منها .

الأخ(الحب السعودي)::
تصدق إنك صادق والله أي حركة مهما كانت نزيهة إلا إنك ما تستغرب إنها تفسر تفسير سيئ .
تقول العثيم ما عنده نية يفتح في سكاكا ممكن تقترح بالمنتدى ويوصلهم الإقتراح ...ليش لا ؟

الأخ (غريب الجواء)::
ماشاء الله عليك كرييييييم (بس لا تخليني أورطك فيها ) وبعدين تندم ترى الصابون ممكن يزيد سعرة وبعدين تتورط وتراني أعرفها نظيفة بالمرة تغسل باليوم 5 مرات .......ها بتتراجع ولا ؟
غريب الجواء...تقول( مزمار الحي لا يطرب ) بجد ماني فاهمة وش تقصد ...بس واضح إنه مثل يقال (وما فهمته) ليتك تشرح ....وما علي منك فسرها اللي تفسرها غبية جاهلة اللي يحلو لك .

غريب الجواء.... متأكد إن السعوديين يصلحون سواقين للعوايل...؟
أقول عساك سالم وإنت ما خليته سواق للبيت .
صدقني حتى لو دهن رأسة ولبس بنطلون و..و.....لا يمكن يغير طبعه .
(معلومة الإندونيسيين ما يأكلون الثوووووم )
ولنفرض إنه ممتاز ومواصفاته فل تتوقع بيستمر بنفس الراتب 600 ريال ؟
ما أدري أنا ما أتوقع ولا بــ1000 ريال

ابوهيلة كنيتك حلوووووة :::
الكف سمعوه اللي بسوق النخيل (متأكدة) لان أمي كانت هناك وقالت لي .

شقردية تعليقك يجنن بس صدقيني أنا وأنت ما نقدر نسدد الكف لكن الغير يقدر وشجاعة .....معليش شقردية والله العظيم أشوف وتشوفين بالأسواق وبالسيارة كيف يصرون ويحاولون المهابيل بالمعاكسة .....ما أدري حقهم نتركهم وبس ؟
حتى لو كان رجال بنضرب حتى لو من المرأة لانه ما إحترم نفسة ......شكلك ما تأيدين المحاظرة اللي عنونها بــ(كيف تتصرفين عندما تضايقين) . تقولين بمجرد إنه يقربلي يكوش جلدي ....صح تدرين ليه لانه ممكن ما ينوي أي نية سيئة .....لكن اللي يعاكس أنا عارفة هدفه عشان كذا لازم أتشجع واسويلة كف .(والله لو أنا ما أسوي اللي أنا قاعدة أقوله ) لكن أتمنى أسوي لو رد بالكلام (أفشله بالكلام)

[صالح 493]

لو كل امراة تكون هكذا لخف الصائعون عن الاسواق وحقيقة انها امراة وبس وبهذه المناسبة اذكر لكم قصة مماثلة وقديمة فى اول التسعينات فى اسواق السدرة القديم امراة راكعة تختار بضاعة من مبسط واذا بذك الشاب يلامسها من الخلف احست فاخذت حذاءها على مهل وفجاة فاذاهى بجبين هذا النذل وهرب كالكلب والله نشمية ليت كل النساء الا تى يتعرضن لمثل تلك الافعال يستخدمن ةالكعب العالى ليحفرن به جبين كل خبيث يحاول ان يصل اليهن ولكن ليت النساء ايضا يحافظن على انفسهن من التبرج الداعى الى الاذى ويتركن تبادل الاحاديث قيما بعد بالقول تابعنا ذك الرجل حتى خرجنا وافتكينا منه او تغبينا عنه بالدكان الفلانى احفظن انفسكن واستعملن الكعب لترقيع وجه المسيئ يا بنات الوطن هنا تكون الشجاعة

[النسيان]

اختي حبووبه

محشومة ياختي عن الغباء والجهل اللي اقصده انه ابن البلد يعني ما يعجب حريمنا واخواتنا وهذا واضح اختي الكريمة من الليموزين ومن العدد الهائل من السائقين الاجانب واعتقد اللي عنده قدره يجيب سواق ايضا يقدر يرفع راتبه الى 1000 ريال اذا لزم الأمر وما ننسى انه لازم يحتسب الأجر عند الله سبحانه وانه راح يساهم بإلانفاق على قد تكون اسرة كاملة وليس شاب فقط وخير من ان اموالنا تتحول الى الاجانب ياعزيزتي
على فكره / انا اعرف اسوق ما يلزمني سواق اصلا

وكلنا نغسل خمس مرات باليوم على الأقل للصلوات الخمس .ههههه اما قصدك تغسل الثياب خمس مرات باليوم هذي عندها مشكلة يمكن ماعندها الا ثوب واحد وتغسله كذا .. الله يرزقنا واياها ..

لك تحياتي اختي حبوبه

[المكافح]

السلام :

أهل بريدة عجيببين !!!!!!!!!!!!!
حاطين أحد يغني وأحد يضرب اللي يغني (الهيئة مثلاً)
هذا مثل

تذكرون الموضوع اللي صار معي في أستاذ القهوة عكسسسسسس هذا تماماً .

معليش انا بصلي وأنا عارف إنكم ما فهمتوا شيئ بس معليش أنا بصلي ولا تتهجمون علي إلا بعد ما أكمل . طلعوا من الصلاة

[المكافح]

السلام :
صباح الخير للجميع ردي الأخير أعتذر منه لاني قرأت الموضوع على عجالة وبالتأكيد فهمته على عجالة .
أرفع أسمى آياااات التبجيل والتقدير والإحترام لهذه المرأة .
ثم أطالب بمن يعرف هذه المرأة بأن يعطيني عنوانها .... عشان أخطب بنتها ...يازين نسلها .
بعض الإخوة اللي علقوا على الموضوع إدعى بأن هذه المرأة عجوز !!!!!! عجوز !!! عجوز !!! عجوز !!!!!! غريبة وش خليتوا للي فوق الــ 55 سنة ؟
وأحياناً اللي بهالسن تثير البعض أكثر من اللي في سن 18 سنة .

الموضوع الثاني موضوع السواااق تقول الأخت حبوبة السعودي ما عندة إستعداد ولا بـــ 1000 ريال !!!!! يا أختي شوفيهم متوظفين بــ800 ريال ومن الصبح لحد الساعة خمسة العصر .
عموماً لو بغيتي سواق سعودي بــ 1000 ريال تراني مستعد أوفره لكم بدون أخذ عمولة .