في بريدة رجل يجري مكالمة وقحة مع عنصر نسائي على مسمع من الآخرين

[المكافح]

السلام عليكم ورحمة الله ....................وبعد

كيفكم ياجماعة ؟
أمس البارح وتحديداً الساعة عشرة تقريبا صار موقف لي فيه تحفظاااات ولكن ......؟


طبعا جيت بريدة البارح بعد العشاء عشان أنزل خواتي بالسوق الجديد(النخيل ).....المهم نزلت خواتي ورحت ما أدري وين أوجه ....!!!!!....عذراً يا أهل بريدة ما عندكم أي متنزه يخلص فيه الإنسان وقته ....؟ لا تزعلون علي والله إني أحبكم تدرووون ليه لان خوالي من بريدة ... وأنتم تستاهلووون ....صح إن عندي نقد عليكم بس وين اروح ...إن رفعتها فهي بالشنب وإن نزلتها فهي باللحية......؟ مع هذا واللله العظيم إني أغليكم وأستمتع بكلامكم يعني ودي أجيب واحد من بريدة وأخليه يسولف علي طول الوقت ......بس ها مايكون يغير لهجته لانها تعجبني بقوووووووة ؟
ارجع وأقول أحبكم ولو بالود كان سكنت أنا واهلي عندكم ...بس أبوي يرفض نهائي تدرون ليه ...؟لانه إذا قعد بالمجلس يعلقون عليه ربعه ....راعية بريدة لاعبة فيك وتوجهك على ما تبي هي ...؟ وأنا أقول تستاهل تدرون ليه لانها أمي ومن بريدة...؟
المهم طلعت من موضوعي الأساسي....إعذرون تراي قرقة ......؟
أقولكم رحت أدور مكان وماحصلت أي مكان أرتاح فيه ......درت بطريق الأمير عبدالله مرتين والثالثة شفت كفي شب إسمه أستاذ القهوة ....فرحت ولبقت ونزلت وحقيقة كفي رهييييب جداً ديكوره وطاقمه أجنبي مو عربي .......؟
الغريب دخلت وفيه قسمين قسم مدخنين وغير مدخنين .....رحت للقسم اللي يخصني !!!!!! شكلكم شكيتوا إني مدخن ...ههههه ؟
أريحكم رحت لقسم غير الدخنين ....المهم جالس بجلسة لوحدي .....طبعا مكان هادي جداً مافيه غير كتب ومجلات وصحف المهم المكان فايف ستار ........تفاجئت إن الجلسة اللي جنبي فيها أثنين جالسين وبما إني شروووف وأحب أتابع حقين بريدة شفتهم وشفت طلباتهم وكانوا طالبين قهوة فرنسة ....؟ المهم واحد فيهم جالس يكم بجواله بالإسبيكر يعني الصوت يسمعونه جيرانة بالجلسات المجاورة......؟
تدرون من يكلم ...؟
يكلم بنت قدام الناس ...(إذا بليتم فاستتروا).............؟
حقيقة طالت المكالمة اللي تخدش الحياء والجيران ما أدري يمكنهم مثلي شروفييييين ويتسمعون للرجال وخويته ؟
بالأثناء هذي دخل واحد للمحل وراح للكونتر وتكلم مع الفلبيني ....أثر الفلبيني قال للرجال اللي دخل إنه فيه واحد يتكلم بالإسبيكر بصوت مرتفع ......؟ توجه الرجال للقسم اللي حنا قاعدين فيه ....طبعا الجلسات كلها فل وما فيه مكان له عشان يجلس راح ووقف بالنصف سمع صوت هذا اللي يكلم خويته ......وإبتسم إبتسامة سخرية وراح للكاونتر وتكلم مع الفلبيني كلمتين....راح الفلبيني للرجال اللي قاعد يكلم وقالة بالإنجليزي لو سمحت قفل جوالك لانك سببت إزعاج للأخرين ( ترى ما عندي لغة بس الكلام كان واضح من الفلبيني ومفهوووم لاسيما إن الكلمات اللي قالها الفلبيني معروفة ودارسها من اولى متوسط )
المهم كان الرجال واقف يطالع ويقز من الكاونتر ........رجع الفلبيني وتكلم مع هالرجال دقيقة بس وبعدين جاء الرجال وتوجه للجلسة اللي فيها الرجال اللي يكلم .......سلم عليهم وقال بالحرف الواحد وأنا جالس أسمع وأتابع الوضع مساكم بالخير ياشباااب ؟ ردوا السلام ...قال للي يكلم ممكن تتكلم بدون إسبيكر ؟؟؟ قال أخينا بكل وقاحة وهو جالس يتكلم مع خويته ..أظن الجوال لي وهذي إذني ......؟
رد الرجال بكل أدب برضه أنا هذي إذني وأذان الآخرين ما ترضى إنها تستمع لقلة أدب ....قال الرجال أنا ما غصبتكم تسمعون ......؟ الآن عرف بنفسه الرجال وقال أنا صاحب المحل (بصوت هادي ) رد الرجال وقال حنا ما جينا تكد علينا حنا جايين بفلوسنا ....؟ لا تستغربون والله هذا اللي صاير قدامي واللي منكم يعرف صاحب المحل يسأله والله ما زدت عليكم ولا كلمة وحدة ....؟
المهم أخينا صاحب المحل بكل جرأة أرتفع ضغطه على الوقح وقاله تشكر ياحبيبي على لطافة أسلوبك وأشكر أهلك اللي علموك كيف تتكلم ......عفواً أنتم ما تشرفون الكفي إنكم تكنون ضيوف عليه لو سمحتو تفضلوا برا ولا أبي منكم ريال واحد..........قالوا تطردنا ....قال نعم واتشرف إني أطردكم لانه بطردكم تتنظف آذان السامعين من مكاماتكم اللي فيه قلة أدب ......ولو كان عندكم ريح من الأدب كان ما كلمت البنت ...... والغلط الثاني أنك مشغل الإسبيكر ختى الآخرين ما قدرتهم وما إحترمتهم المحل هذا نظيف من الناس اللي زيكم .......إنت يا أرعن المكالمة كلها غلط بغلط فكيف تسمع الأخرين ؟؟؟
طبعا ساكتين وما تكلم واحد فيهم .....؟
طلعواااا ........ بعد 10 دقايق جاء صاحب المحل وإعتذر من الزباين وقال المكان نزيه بوجودكم وما ودنا يتجرأون ضعيفوا الأنفس إنهم يغلطون داخل المحل على مسمع من الآخرين.....وقال كلام طويل ..... ؟؟؟؟

المهم أنا أعجبت بقوة وعقلية صاحب المحل ( جداً محترم ) ولكن السؤال تتوقعون هذه طريقة صحية اللي سواها .......؟

لا تستعجلون بالحكم ... أنا أعرف إن كلامة جداً رائع وأروع من رائع وواضح أن صاحب المحل متربي و ثقافته حضارية جداً .........ولكن أنا أقول هل هو فاتح عشان يربي عيال الناس ولا فاتح عشان يربح ؟؟
إذا هو عشان يربح فما أدري تتوقعوت كذا ربح زبون ولا طرد زبون ؟
أنا بقول وجهة نظري واللي يعرفه منكم يسلملي عليه ويقوله يسلم عليك المكافح ويقول ما عليك من الناس أنت فاتح تربح مو فاتح تصلح مفاهيم الآخرين .......؟
عموما أكن له كل تقدير واحتراااام ؟

ما أدري توافقوني على هذا ولا لا ؟

طبعا أنا أقول كذا ليه مو لاني مؤيد للمكالمة ....لا والله بس الرجال خسران في محله وتعبان عليه والله متكلف بديكور وتصميم وأثاث وترتيب وأخرتها يطرد واحد جاي يشتري منه.....يا أخي بكيفه ؟ المهم يدفع فلوس ويمشي ؟؟؟

[خـــــــــــــــالـــــــــد]

اخي المكافح


جميل جدا انك نقلت هذا الموقف اتدري لماذا ؟


لان مثل هذه المواقف تحدث كثيرا ولكن معظم الجماعه حول اشباه صاحب المكالمه مع الفتاه من ربع ( وش كاري)

و ظهور مثل هالموقف تشجيعا لهم لاتخاذ الموقف السليم ضد هذه الاشكال .


وما تصرف صاحب المقهى الا قمه في الاحساس بالمسؤليه والروعه


حتى وان خسر فئه من الزبائن ( المبتلين استتروا ام لم يستتروا ) لكن يبقى ان حافظ المكان على نظافته لان الزبائن المحترمين بالتاكيد لايرضوا ان يتواجد في اماكن تحوي هذه النوعيات .


شكرا لك

[العريف]

ياعيني عليه ... تكفى سلّم لي عليه ياهو رجــــــــــــــل .. وعن مية راجل ..


وبصراحة اعجبني سردك للموقف ... بعدين ياخي ليش مانزلت مع أهلك للسوق تحسبه خاص للعوايل ؟؟

<< ملقوف !

بعدين ليش ما أتصلت عليّ ؟؟


<< تراني مااعرفه ! بس أتشرف أعرفه لانه يحب بريدة مهوب مثل بعض الناس اللي يعرف نصف بريدة واذا جلس مع حقين الرياض قعد يحش في بريدة واهلها ..


تحياتي لك ولصاحب المحل اللي بصراحة أفتخر فيه انه من بريدة .

[الرمادي]

أخي العزيز المكافح


هنا يبرز مدى الإيمان بأن من ترك شيئا لله عوضه الله خيرا منه

فالتجاره وإن كانت شطاره إلا أنها لاتعني التضحيه بالدين والخلق والمبادئ

ومن يرضى بوجود مثل ذلك الشخص في محله دون التصرف بشكل سليم ـ كما فعل هذا الرجل الرائع ـ من أجل الحفاظ على أرباح ماديه فأعتقد والله أعلم بأنه لايخرج عن أحد أمرين :

إما أن دينه وخلقه ومبادئه لاتجعله يرى ذلك الأمر خطأ

أو أنه يعيش إزدواجيه بين مايؤمن به ويعتقده وما يفعله


شخصيا أرى أن صاحب المحل تصرف تصرفا طبيعيا لم تفارقه الحكمه ولا الحلم بالتعامل مع ذلك الشخص وهذا يدل على أنه شخص يملك القناعة الصادقة بما يؤمن به وليس لديه الإستعداد بالتضحيه بكل ذلك من أجل الربح المادي


تقبل تحياتي ,,

[ثامر الناصر]

عيني عليه باردة والله صاحب المحل

والله مثل ماقيل من ترك شي لله عوضه الله خيرآ منه

وجزاه الله خير

والله يهدي اللي كان يكلم ان شاء الله

ودمتم

[فريـــد]

الله يبيّض وجهك ووجه راعي المحـل

كذا الناس وإلا بلاش !

[ماجد الأول]

تصرف صاحب المحلة صحيح ويشكر عليه
بل إنه جلب فائدة كبيرة للمحل
تتمثل في الدعاية التي عملتها له

مع التحية ..

[الذئب]

ابلغ سلامي وتقديري لصاحب المحل

زدت إعجاباً بهذا الكوفي شوب

[بندر الحمر]

نسأل الله لنا وللمتصل الهدايه

ويعطيك العافيه أخي المكافح على نقل الصورة تامه كامله

وأعجبتني طريقة صاحب المحل بالتعامل مع مثل هالأشكال والتاعمل الطيب وإحترام الزبائن الآخرين




وعتبي عليك

ليش ما إتصلت علينا أو على أقل تقدير حطيت خبر إنك تبي تجي نفرش لك ورد

شكرا لك

[النسيان]

اولا عزيزي المكافح حتى انا ماني من بريده بس ياخي أعشق بعض اهلها بتصرفاتهم الطيبة اما قصتك في الكفي شوب

والله صاحب المحل اتصرف صح يعني اولا هذا يعاكس بنت ياخي وفاتح السبيكر ياخي هذا ماهو ( بار) هذا كوفي شوب وببريدة الغالية ثانيا يعني يطرد واحد ويخسر زبون واحد او يجامل واحد ويخسر مجموعة زبائن

ايضا لا انسى تعقيب العزيز الرمادي كله روعه بصراحة

تقبل تحياتي

[السكب روح الشفق]

هههههههههههههههههههههههه

المكافح جميل جدا ما نقلته

لكن .....

الان فهمت ليش الرمادي عزمنا هناااك

[المستشار القومي]

اولا اخوي وان جاء ردي متأخر ....لكني وبكل صراحه ما اعجبني هو سردك الاكثر من رائع للموضوع (مع انه طويل الا اني خلصت بسرعه ).


اما بخصوص الموضوع ....فأنا وكما قال الاخوه (حلوه ((وكما قال))!) اشاركهم الرأي ان تصرف صاحب الكفي سليم وماعليه غبار....وبالعكس هذا التصرف راح يزيد من زبيانه لان اهم شي بالمحل السمعه ......وسلامتكم

[الذاهبة]

عفواً .. أبي أقول رأيي :

أنتم تسمعون بالحرية ؟؟

أتركوا الرجل هو و ( سلقته )* مبسوطين أنتم وش قاهركم ؟؟

الفاتورة عليه و الغثا عليه و كلللللللللش عليه .. أنتم اسمعوا و تحمدوا ربكم ..


_______

مادري الكوفي شوب هذا فيه توصيل للمنازل ؟

ممكن رقم الكوفي شوب ؟

^^^^^^^^^^^^^^^ أمزح




___________________

السلقة = زوجة الكلب أعزكم الله ..

[alnesf1]

كلامك جميل وسردك للقصه أجمل

ونفتخر بوجود مثل صاحب هذا المحل بمدينتنا مدينة بريده الحبيبه على قلوبنا

والله مثل ماقيل من ترك شي لله عوضه الله خيرآ منه



بعدين تعال أنت يـــــــــا المكافح

وشــ قصدك بهااا ذي الكلمه

(يعني ودي أجيب واحد من بريدة وأخليه يسولف علي طول الوقت ) ؟؟؟؟؟؟


<<<<<<<<<<< يحب يتحقق من الموضوع

وجزاه الله خير

[مغترب عن الديرة]

تصرف جميل من صاحب المحل ..

لكن يكون التصرف اجمل لو انه ( اعطى ) هذا البزر ( كف ) على وجهة واخذ الجوال وصكه بالجدار .. او على الاقل اتصل على الهيئه وابلغهم باللي صار .. واذا جو انهوا الموضوع بطريقتهم ..

الف شكر لك اخوي

[هاكر]

القهوه والعشاء عندنا يالمكافح

[القنصل السوري]

الحقيقة بارك الله في صاحب المحل وناقل القصة
والحديث ذو شجون عن هذة المناظر المؤلمة واللي الحياء فيها انعدم ولكن العتب مو على صاحب الجوال العتب علينا والاسباب كثيرة:-
الواحد يقول (وش كاري انا علي منوه)
انا كنت في جدة وكان هناك صاحب فورد يعاكس بنات طالعات من الثانوية وعيني عينك قدام خلق الله ويمشي بشويش واصبح يحاول ان يضيق الشارع عليهم وكل الناس اللي جالسة تنتظر بناتها ولا همها وكأن الحدث في دولة اوربية المهم انا معاي احد الزملاء فقلت له خلينا نشوف الموضوع ونوقف الرجال عند حدة ورفض ولكني انا السواق فقمت واعترضت طريق راعي الفورد ونزلنا على ابو شعيورات ونزل اخينا في الله وبدينا ليش تعتدي على البنات ( ضخمنا الموضوع) وهو انت ايش دخل اهلك هم خواتك او خواتك واول مابدينا بالكلام والمشادة معاه جاء كل الناس اللي كانوا ينتظرون بسياراتهم وقفوا وبدأ الكلام (الناس انظمت لنا ) والولد خاف وشوي الا والهيئة جاية (اكيد احد متصل ) وش السالفه وش القصة قلنا انه يحاول يعتدي على البنات( تغيرت صيغة الاتهام واصبحت يحاول ) وشوي الا والدوريات جاية وش السالفه ( قلنا لهم انه يحاول يتكلم مع البنات ويضايقهن) تغيرت الصيغة (وصارت يحاول يكلمهن) المهم الهيئة طلبت من الشرطة انها تتولى الموضوع الشرطة اخذوا الاثبات من الهيئة وحنا غادرنا والموضوع تولته الهيئة ثم الشرطة ؟
الزبدة / كل الناس جالسة تتفرج وعندما وماعندها طاري تسوي شي الا لما شافوا احد بدأ بالموضوع ؟
شي يقهر ليش ماكل واحد يحاول ينكر المنكر مهما كان بالاسلوب الحسن والاخلاق ولا ينتظر غيرة يتقدم ويبدأ لانها اقل شي ابراء للذمة وبس
اذا خايف اتصل بالهيئة او الشرطة اقل شي
(( اعراض الناس لليست للعبث او البيع))
اذا كان احد مسوي شي غلط والله مافية اجبن منه وانا اذكر احد الزملاء من ولاية الرياض يقول ان احد الشباب اعتدى على بنت ومد يدة عليها صرخت بقوة وعينك ماتشوف الا النور تقاطرت الناس لمسك الشاب والله لايوريك بدو يحجرونه مع كل محل كنة بسة محلوف عليها الا تطب بنار واول مامسكوة بعد صرخة البنت بثواني الا والركل والتصفيق شغال وكل واحد ياخذ نصيبة وابو قصيصة جالس يدور بالارض ويتلقى الضربات من كثرة الناس اللي تاخذ نصيبها من الوليمة وعلى طول جاء الامن بالاسواق واخذوة والبنت تبكي وكل واحد يشوف الموضوع ويفهم القصة يشارك بالوليمة ببصقة او كلام ولو من بعيد وشوي والا وام البنت جاية وخذ ياصياح والولد يصارخ ماقصدي والله ماقصدي ( صارت فلم هندي ) المهم الامن اتصل بالشرطة ورفيقنا الملقوف رفض يغادر الا والقصه مكتمله ولكن الامن منعوة من الاكمال ولكنه وقف ينتظر حتى تقاطرت سيارات الشرطة حوالي سبعه وضباط واخذوا المعتوة الى المركز وفتشوا سيارتة واحد من الجنود يسوق سيارته وبس
والله الله بانكار المنكر حتى لانصير مثل بعض المناطق المسجل لاخرة ويلاحقون سيارات البنات او البنات ولا احد يقول شي
انا تعبت من الكتابة واهم شي الكلمات البريداوية لصاحبنا والقصتين حقيقيتن والثانية من شخص ثقة

[المكافح]

مساكم الله بالخير .......المكافح يرجع لكم .....؟
ياجماعة الخير وش القصف العظيم على الرجال .....؟
ليش كذا ...!!!!!؟
قبل ما أدخل بالموضوع أبشرط عليكم شرط إنكم ما تزعلون على المكافح حتى لو لاحظتوا عليه طلعاااات في بعض الأراء .....؟

أرجع وأقول الأخت الذاهبة قالت كلام جميل حتى وهي ساخرة بالموضوع ولكن لنجعل مثل هذا الموضوع حرية.....؟
إذن يجب علينا إحترام حريات الآخرين نعم حريتي تنتهي حينما تبدأ حرية الآخرين ولكن عندما إبتدأت حرية الآخرين إبتدأت بماذا ....؟ هل إبتدأ حرية الآخرين أن من حقهم أن لا تسمع أذانهم (غزل) .....؟
طبعا الكل يوافقني بقوووول نعم من حقهم أن لا تسمع أذانهم كلام غزل .

إذا كان كذلك فمن حرية الآخرين أن لا يستمعوا إلى موسيقى ...قرآن ....محاظرات ....؟
أرى أن مثل أستاذ القهوة مكان عام لجميع طبقات المجتمع ..أقصد الملتزم وغير الملتزم أستطيع أن أقول أنه في ذاك المكان الحريات مختلفة وسوف تبتدئ في وقت واحد إذن مالسبيل في ذلك .....؟

على العموم أنا أحترم وجهات نظر الآخرين وأعرف إنه فقط مشارك واحد وافقني والباقين يختلفون معي ولكني مازلت أعتبر صاحب المحل تعدى على حرية ضيوفه ....وهو حر.... المحل محله ....؟

الأخ العريف مساك الله بالخير ....تقول ليش ما دخلت مع أهلي ...؟
تصدق أستحي أروح مع أهلي تدري ليش لان الحريم يمشون بالسوق وأنت تدربي راسك معهم ولا أنت فاهم شيئ ...؟
الشيئ الثاني أنا موصل خواتي للسوق ولو كنت موصل زوجتي كان أنزل تدري ليه ؟؟؟لان أغراضها طبيعي إني أعرفها ...صغيرها وكبيرها ..؟
وللمعلومية يالعريف ما عندي زوجة على إيدك بس المهممممممم من بريدة ....؟
الله ياخذكم (أستغفر الله ..أستغفر الله ..أستغفر الله ) والله إني أموت فيكم حتى شريكة حياتي أتمناها منكم ...؟
عشان كذا أمي تغلين أكثر من أخواني .....؟

على فكرة تذكرت الأخ alnesf1 يقول وش تقصد بــــ(يعني ودي أجيب واحد من بريدة وأخليه يسولف علي طول الوقت ) ؟؟؟؟؟؟
حرام عيك كلامي واضح يعني أموت في لهجتكم الأصلية ؟؟؟
ياويلي منك تحسبها مسبة.....؟
بس والله إنك خطير ورهيييب لانك تحب ديرتك ......؟
ياجماعة نسيت بقولكم شيئ رهيب والحمد لله ما نسيت ...؟
البارح جيب لبريدة وخصيصا لأستاذ القهوة وحصلت شيئ بالكفي يضحك بس والله أعجبني .....؟تدرون أيش هو ..؟؟؟؟
طبعاً ما تدرون أنا اللي أدري ...كم تدفعون وأقولكم ؟
يالله عشان أمي من عندكم بقولكم الموضوع اللي يضحك بلاااااش ......كنت البارح بأستاذ القهوة وكنت منسجم أقرأ كتاب أنا وخويي طبعا تحديداً بقسم المدخنين الجلسة الوسطأ ....ها أثاريني قايلكم إني ما أدخن ..؟
عموما أنا ما أدخن بس مع خوي يدخن ؟
ياجماعة ما تلاحظون إني أطلع من السالفة خمسين مرة ؟؟؟؟؟
بس والله أنسى وما أدري إلا أنا طالع ...وبعدين رحم الله إمرئ عرف قدر نفسة أنا قايلكم من قبل إني قرقة .....؟
وش وصلنا .........أقولكم منسجمين نقرأ ...قمت أنا وقعدت أفتش بالكتب بالعناوين تدرون وش الكتاب اللي طاحت عيني عليه ....؟
اللي يدري له وزنه ذهب .......؟
لقيت كتاب عنوانه ...كيف تحافظين على رشاقة جسمك بعد الولادة ....هههههه ياحليل صاحب الكفي ..المهم كتبت ملاحظة لصاحب المحل وقلت يا أخي هذا كتاب ماهو لنا وما أدري هذا الكفي عوايل...؟
طبعا سويت الملاحظة ونزلتها بصندوق الإقتراحات والورقة فيها فراغ لرقم الجوال وكتبت رقم جوالي .......؟
تفاجئت إنها توصلني رسالة من جوال مسمي أسمه أستاذ القهوة تتوقعون وش فيها ....؟ هذي هي بالنص ....(أخي العزيز تشرف أستاذ القهوة بزيارتك وسعد بملاحظتك...أخي تشكر على الملاحظة ولكن أستاذ القهوة تميز بدمج الثقافات )
فسروها يعني وش نفهم ...؟ ليش ما حط كتاب بعنوان (مكياجك ) .
بس تبغون الصدق خويكم صاحب المحل واضح إنه جريئ حتى بتصميم المحل ؟
لانه حاط خلف الكاونتر شغلااات (عندي أنا قوية ورهيبة) وعند كثير من الآخرين مو حلوة ....تحديداً الجدار اللي خلف الكاونتر حاط فيه رف وحاط فوق الرف شغلااات ما أعرفها ...أخاف أقولكم وش هالشغلات ..تتهموني ..ما اعرفها ..بس الأكيد ما تعجب الكثييير ...أنا معجبني قوته أما هالشغلات ما أعرفها ...؟
ياويليه طولت مررررررة

الأخت الذاهبة:::تسأل عن رقم الكفي شوب ....أنا والله ما أدري كم ...بس الظاهر ما يمديكم بتسوقون بكرى ولا بعده وتروحين بنفسك وتوصلين لنفسك بسيارتك الخاصة..........يوه وش جاكم طيرتوااا عيونكم علي بسم الله علي.. أنا وش قلت ..؟ أمزح أعصابكم ......تصدقون إني غبي خربتها مع بعضكم بالآخر ......أسحب كلاااامي للأخت الذاهبة وأقول ما تسوقون وما نعرف أرقام .....؟
تقبلووووووو تحياااااتي

[الذاهبة]

مرحبا بك ..

عندي تعليق إذا سمحتوا لي :

الناس شابين بالبنات اللي ساقن سيارات بالبر ،،، ما يدرون انهم و الله العالم (( شباب )) بس


متلثمين يبي يرقصونكم !!

إذا تكلمنا عن قيادة السيارة أقول // لا ان شاء الله ما نسوق !!

الله لا يغير علينا ..

الله يحفظ لنا رجالنا ..

**

لكن إذا تأخرت عن الدوام أو مالقيت أحد يوصلني للسوق //

أقول لو معي سيارة ماكان عندي مشكلة !!





ودي نركب خيل .. وناسة

_______

مشكور يا المكافح ..

[المكافح]

السلااااااااااااااااااااام

الذاهبة العفووووووو...........

الله يحفظ لنا رجالنا.............آآآآآآآمين الله يتقبل دعااااك

ياجماعة بطرح موضوووووع يتعلق بالحرياااات ...... اللي تكلمنا عنها يوم الرجال يطرد اللي يكلم خويته ولعلي أطرحه في موضوع جديد .......يعني مو بالصفحة هذي . ترقبوووووووووووو طلعات المكافح .

[حبوبة]

أخي المكافح
سردك حلووووو
واللي أحلى منك صاحب محل أستاذ القهوة .......وبجد والله رجل وبطل .....ليه لانه طرد مراهق من مكان عام ومكان محترم .........؟
المكافح تصدق إني أمر عند المحل هذا باليوم مرتين وثلاث وسمعت عنه كثير من صديقاتي المتزوجات ومن أخواني بس والله العظيم هالحين ودي ادخله !!!!!!! إعجابا بتصرف صاحبه .
المكافح مهم إنك تعرف رجالنا مو زي أي رجال ناس متربين صح ........؟
باااي جاني النووووم تصبحون على خيييير

[حبوبة]

المكافح السلام عليك .....
على فكرة عندي تعليق كثييييير بالمرة على تعليقك اللي بعنوان :::(قصف عظيم)
بس هالحين تعبانه وتأخرت على النووووم خليها بكرى

[حبوبة]

طبعا أنا ضيفة جديدة على هذا المنتدى وإسمحولي ببدأ معكم بهجوووم ولعل الهجوم اليوم على أخينا المكافح.........عاد من بعده ما أدري ؟؟

السلام عليكم ورحمة الله وبركاته....................:
عذراً ......عذراً.............عذراً

كلمة حرام لا تفيد ............. أصبحت كلمة تقال ............ ولا تفيد الأطراف المعنيين .
المكافح طرح موضوع جيد ولكني أعتب عليه وأقول له إجعل هدفك أسمى .
المكافح طرح موضوع بعنوان (في بريدة رجل يجري مكالمة وقحة مع عنصر نسائي على مسمع من الآخرين) .
أخي المكافح في البداية أشكرك كغيري ممن قرأ موضوعك وأقول لك لقد أتحفت القارئ بقصة جميلة تمنينا أن لا تنتهي حينما كنا نقرأ . فأسلوك جداً رووووووووعة .
ولكني إسغربت كثيراً من وجهة نظرك .....وليست الغرابة في وجة النظر وإنما الغرابة في الإصرار والكبرياء ...عذرا لا أقصد التجريح من ذاتك بل إني لمست هذا من ردك على القرائ الذين علقوا على موضوعك ...فأنت بقلمك قلت وبالنص (((على العموم أنا أحترم وجهات نظر الآخرين وأعرف إنه فقط مشارك واحد وافقني والباقين يختلفون معي ولكني مازلت أعتبر صاحب المحل تعدى على حرية ضيوفه ....وهو حر.... المحل محله ....؟)))

أيضا ذكرت إنه فقط مشاركة واحدة وهي الذاهبة وافقت وجهة نظرك ثم ذكرت أنها وافقت وهي ساخرة ولكن لنجعل مثل هذا الموضوع حرية ...؟(هذا نص كلامك) .
أخي المكافح لعلك عذرتني حينما قلت لك بأنني أستغرب من كبريائك ....أخي نحن نكتب في ساحة عامة والحرية فيها مباحة ليس لاننا نؤمن بالحرية وإنما لاننا نكتب من خلف ستار وهذا وقعنا داخل هذه الشبكة ...إذن أنت المكافح من تكون وأنا حبوبة من أكون ؟؟؟؟ الكل لا يعلم إذن نحن والجميع نتكلم من خلف ستار لا نتكلم من باب إيماننا بالحرية .
إذا كان كذلك فيجب ألا نخلط بين ما نكتب وبين ما نؤمن به حتى ولو كنا نتكلم من خلف ستار الشبكة العنكبوتية .
أخي المكافح لعلي أقصد من هذا أن ما تكتبة يجب أن تؤمن به ........ولا أقول لك أنك كتبت مالم تؤمن به ولكني أذكرك بذلك حينما تبدأ بالرد على موضوعي هذا .
المكافح العزيز :::
هل تعلم أن صاحب محل أستاذ القهوة بالتأكيييييد زاد إعجاب الجميع بشخصه الكريم وهذا من خلال قرأتي للردود على موضوعك .؟؟
ألم تسأل نفسك لما هذا الإجماع من القرائ ؟؟

أخي المكافح في نظري أنك جانبت الصواب حينما قلت لقد أخطأ صاحب محل أستاذ القهوة عندما قام بطرد الشخص الذي تبجح على آذان السامعين ......أخي المكافح لا أقول حرام لانها أصبحت كلمة وللأسف مستهلكة ...أقول عيب ثم عيب ثم عيب أن يتبجح مثل هذا الأخ على مسامعنا ...عيب عليه أولاً إن كان يعرف العيب وعيب علينا ثانيا أن نبقى مكتوفي الأيدي ......عفواً فأنا لا أدعوا للمضاربة ولا المقاتلة وإنما أدعوا للتوجيه السليم وفي نظري توجيها بعيداً عن الدخول بهذا الشخص بأوامر الدين لانها كما قلت اصبحت مستهلكة على آذان هؤلأ ....فمثل توجيه صاحب المحل أعتبره إنموذجا لتوجيه السليم .
أخي المكافح هل تريد أن نمسخ عادتنا وتقليدنا لأهداف مادية ....وذلك حينما نقول لصاحب ذاك المحل((( لا تتدخل بحريات الآخرين أنت همك الأساسي يدفع فلوس ويمشي))) .
لا أتكلم بحرام ولا حلال ...أتكلم بواقع عادات وتقاليد ...فكيف لو قلت لك بأن أصل الموضوع محرم .

الإخوة الأعزاء أنا ما أقول ليش يكلم بنت ...هو حر بنفسه ومعليش مقتنع وهي مقتنعة ...بكيفهم وما هم أول ناس تغزلوا مع بعض فيه كثير وكثير .......لكن تسمعني لا ؟
وبعدين واضح إنهم مهبل بمهبل ...وين راحت الخصوصية اللي بينهم !!!!!!..؟
رسالة للبنات:::
يابنات إنتبهوا ترى فيه مطافيق بكرى يفضحونكم في أماكن عامة مثل أخينا الخبل ؟

أخي المكافح كأني بك ولسان حالك يقول :::: من تكون هذه (حبوبة) هل هي زوجة لصاحب محل أستاذ القهوة أو هي أخت له أو هي أم له ؟؟؟
على مهلك فا والله العظيم لا أعرفه ولا أعرف أستاذ القهوة إلا مروراً من عنده وللمعلومية لم أطلب منه إلا صبح هذا اليوم مع أبي وكنت خارجة من الكلية ...وليس حباً بالقهوة بل هو حب إستطلاع مني حينما قرأت موضوعك قبل أمس .
أخي المكافح أرجوا أن لا أكون جرحتك بكلمة أو بتلميح ...وثق ثقة تامة أني لا أقصد شيئ غير إيصال ما طلبته منا ...عندما طلبت وجهات النظر .

رسالة أخيرة لبعض الإخوة اللي شاركوا بالردود على الأخ المكافح ....معليش أنا شكلي معصبة عليكم كلكم وهذي يتحملها المكافح ...أقولكم شكرتواااا صاحب محل أستاذ القهوة على هذا التصرف الجميل اللي أروع من رائع لكن في نظري مو هذا المطلوب ....أخينا المكافح مقتنع في وجة نظر غلط بغلط !!!!!!! مطلوب منا نقوله لا لا الصح ما فعله صاحب المحل ...!!!!!....
لازم نرده ونفسر الغلط بالتفصل عشان ما يضل غيره ...
أنا عارفة إن المكافح يقول وش الله بلاني بهالنشبة .......بس أرجع وأقول قرأت كتاباتك كلها وبكل صدق أروع من روعة .

المكافح الكريم ...عندي وقفة ثانية على ردك الأخير على المشاركين بردودهم عليك .
بس والله إلحين بنام قبل ما يأذن العصر ...وتسمحلي
باااااااااااااااااااااااااااااااااااي ومع السلامة

[عدول القصيم]

اللي سواه صاحب المحل هو الصح
اللي سواه يدل على انه تخلى عن مبدأه الربحي واتجه للمبدأ الأخلاقي

وبعدين الي سواه هذا يرفع من قدر المحل امام الزائرين وبكذا يعرفون ان المحل محترم مو يعني كوفي يعني اخذ راحتي ..

وبعدين لو يخليه يكسب اثمه وأثم السامعين ومأاظن احد من الناس الا الا القلة وضعيفي الأيمان اللي يقدم المبدأ المادي الدنيوي على العمل الاخروي ,,
وهذا اللي سواه فيه عمل جميل انكر المجاهره بالمعصية ,,
ويشكر صاحب المحل وياليت لو تقول لي اسم المحل لاني بصراحة احب المحلات المحترمة اللي زي هذي ومستعد اني اكون زبون له وهذا ان ماكنت زبون له من قبل ,,

وتشكر على الطرح الجميل ..

والسلام ,,,

[حبوبة]

المكافح وينك ما رديت علينا ...... أنا ما أدري تدخل وسافهنا ولا خلقة ما دخلت ..... بس الموضوع اللي طرحته ...مسؤل عنه يعني ننتظرك ......وياليت المشرفين بالمنتدى يسوله رسالة على إيميله......قاهرني طرح موضوع وإختفأ .... أستغفر الله ‘نشاء الله بخير ويرجع بالسلامة ..... والله صرت اوسوس هالحظة ....إنشاء الله بألف سلاااااامة

[عدول القصيم]

ههههههه حبوبة اصبري شوي عليه وش حارقن رزك ,,


باي

[حبوبة]

هههههههههه عدول القصيم ضحكت من ضحتك .....
وقسماً بالله أحرق نفسي مو رزي ...بس وش أسوي غصب عني بكل شيئ حااااارة .

المهم المكافح غااااب....عساه إنشاء الله بعافية وسلااامة ...وبعدين اللي يعرفه يقوله المنتدى ينتظرك .
لا يصير يتغلى ....... اللي يعرفه يقوله ترى نبغى قلمك ....
شكله إذا جاء بيصدق عمره وبيتكبر علينا .

[عدول القصيم]

وينه عن نفسه الحيـن

بس موضوعه حلو ,,

[حبوبة]

يقهرني اللي يكتب موضوع وما يعقب عليه أو يرد وما يتابع نتيجة رده من الطرف الآخر ....مثلك يالمكافح ومثلك يابرجس .

[حبوبة]

معليش ترى الملاحظة اللي أنا سويت وهي
(يقهرني اللي يكتب موضوع وما يعقب عليه أو يرد وما يتابع نتيجة رده من الطرف الآخر ....مثلك يالمكافح ومثلك يابرجس)) .
مو هذا مكانها ...كنت قاصده تكون بالمنتدى العام وهي رداً على موضوع (إمرأة تخون بفراش زوجها بعد خروجه للعمل) .

[المكافح]

السلام عليكم ورحمة الله :
يقولون من طول الغيبات جاب الغنايم ....وأنا وش جبتلكم ؟
العلوم الطيبة ....
صارلي وقت طويل ما دخلت ولعل البعض إتهمني بالهروووب أقصد الأخت حبوبة ...الله يصلح قلبك أهرب وين ؟
حبوبة إنشاء الله إنك حبوبة ومهب واضح عليك لانك شرسة بردودك علي المهم إختلاف الرأي لا يفسد للود قضية . تراني ما ني الشخص اللي توقعينه يعني ما أرضى بمسخ العادات والتقاليد ونصف الكلام اللي قلتي يكفيني . (ناوي أتزوج من بريدة بس هالحين خفت ) ياقويكم يابنات بريدة .
ياولد من وين أبدأ بردك تصلحين مؤلفة كتب تقولين إني أتوقعك تضن إني زوجة أو أخت أو أم لصاحب استاذ القهوة لا والله الزوجة ما تسوي هالي سويتي ، لعن أبو بليسك وشلون برد على هالكتاب اللي كاتبته لي ؟؟؟؟؟؟؟؟؟؟؟؟؟؟؟؟؟؟؟؟؟ آآآآه لو إني صاحب المحل والله بجزيك المحل كله هدية لك ، وشكلك تشتغلين محامية للمحل ، أحسن ما بكلامك إنك شكرتين ومدحتي قلمي وهذا يخليني أنفس شوي .
أقول فشلتيني عند الأخ عدول القصيم ، حتى هو شره عليك وقالك وش حارقن رزك ؟ أنا لا يمكن أكمل معك الموضوع إلا بعد ما أدخل معي محامي من المشرفين اللي بالمنتدى . عشان أقدر آخذ حقي منك .
كيف أصاب بالغرور وأنت لعنة اللي جابن

[حبوبة]

المكافح الحمد لله على سلامتك آآآآسف تراني رديت عليك بأسلوب قاسي لكن ما كنت قاصده شيئ وبعدين كلامي معك ضحك.
وبعدين تراك لسا مارديت على الموضوع يعني طويل قصير ما يهمني إنت مسؤل عن موضوعك ....إلا إذا أنت متنازل ومقتنع بكلام الآخرين ؟
وما قصدتك بعينك يوم أقول مسخ العادات والتقاليد لا وألف لا محشوم انا متكلمة كلام عام مو أنت المقصود .
وبعدين قلت عنك هارب لانك طرحت موضوع وما ناقشته مع المشتركين بالرد .
وبعدين تقول ناوي أتزوج من بريدة والأن خفت ولا هونت .؟ إذا خفت فأنا أقولك بريدة يتشرفون فيك وترى بناتهم من كذا وأقوى يعني اللي فيه خوف ما يصلح لهم وإذا أنت هونت فأنا أقول إسأل أمك عن بريدة (طبعا أنت تقول خوالي من بريدة) .

[تـنـقـيـطـه]

تصرف جميل من صاحب المحل ..

لكن يكون التصرف اجمل لو انه ( اعطى ) هذا البزر ( كف ) على وجهة واخذ الجوال وصكه بالجدار .. او على الاقل اتصل على الهيئه وابلغهم باللي صار .. واذا جو انهوا الموضوع بطريقتهم ..

الف شكر لك اخوي

[المكافح]

السلام عليكم ..............: وشلون الربع والأعضاء وال.........وكلكم وشلونكم ....:

أولاً أعتذر ثم أعتذر ثم أعتذر على عدم مشاركتي أو بالأصح على غيابي ، لكن تراني مشغوووول بالمرة ، والنت لو بفضي نفسي لها كان ما أنجزت عمل ،
ثانياً : الأخت حبوبة أنت قلتي كلام وأظنك صدقتي حتى لو موافقتي ما ترضي بس هذا الواقع ، تقولين أنت على الفرغات ؟ والله إني كذلك بس ماهو هروب مثل ما قلتي ، هو إنشغال ، وإذا الواحد حصل معه وقت يدخل يسلم على الطيبين ولعل من أطيب الطيبين الأخت حبوبة اللي جعلت جل إهتمامها بموضوعي وبالتهجم العنيف علي ( لكني مع هذا أقول لاحظت أغلب تهجمك ممزوج بالأدب الراقي وهذي كلمة حق ، تهاجمين ولكن لا تغلطين ) ولعل هذي ميزة تنم عن أدب في البيت اللي تربيتي فيه ،

ثانياً :: ترى موضوع صاحب أستاذ القهوة تجدد فيه أشياء كثيرة ولعل إنقطاعي عن النت حال بيني وبينكم ،
طبعاً ما أخفيك ومع بعدي عن بريدة إلا اني أصبحت من زوار ذاك المحل المستمرين وبهذه الظروف قابلت صاحب المحل وقد أخذت معه وأعطيت بالكلام العام ، وحقيقة لم تأتني جرأة بالبوح عما حدث عن الشرذمة لاني خفت أنه ممن يتابع النت وقد يكون قرأ ما كتبت ، هنا خجلت لاني قد إستسلمت عما كتبت ، ولعل من جعلني أتراجع عن وجهة نظري هم المشاركون بالموضوع ولعلك أنتي خصيصاً أكثر من فصل بهذا الموضوع ،

ثالثاً ناقشت الرجل عن الرف الخلفي والذي وضع عليها (علب من الزجاج ) وقد أبدى لي وجهة نظرة (طبعاً أنا معجب فيها) ولكني أردت أن أتكلم بلسان الآخرين ، الرجل مقتنع تماماً أن هذا ليس فيه محظور ، وأن التحدث بمثل هذا هو مجرد فراغ ثقافي (نص كلامه) . بالحرف الواحد يقول (يا أخي رضا الناس غاية لا تدرك ، وكأن الناس ما عندهم قضايا إلا التحدث بمثل هذا الموضوع ، يا أخي الأمر فيه الإباحية ، وثق ثقة تامة أنه بمجرد أن نغرق في الجزئيات هذا غرق عميق لا ينقذنا منه إلا الأقدار ، يا أخي الكريم أنصحك بسماع شريط لسلمان العودة بعنوان الإغراق في الجزئيات ، ولعلي لا أقصدك بعينك بل أقصد نفسي أولاً ثم الآخرين ) ،
إنتهى كلامه ،،،،، طبعاً كلام مؤدب جداً يعني ما جاف بس أنا كاتب زبدة كلامه .
المهم بالموضوع ...ولعله يسمحلي وتسمحون لي بالحكم عليه .....أنه رجل وااااثق بنفسه بقووووة .....تربيته ما قدرت أفهمها إذا قلت دينية فهي دينية وإذا قلت دينية أوربية فهي كذلك .....
ثقافته الدينية ممتازة جداً .
ثقافته العلمية والحظارية ممتازة جداً
ما هو مطوع .
وللأسف لم أسأل عن تعليمة داخلي ولا خارجي .
**** السؤال أنا وش دخلني بالموضوع هذا ؟
أنا قايلكم قبل إني أسولف وأطلع من موضوعي الأساسي ....وين لو سمعتوا سواليفي شفوي كان يأذن الفجر ما طلعتوا معي بموضوع محدد .

الأخ تنقيطة ::: الرجال ما قصر سوا الي أنت تبيه وزيادة ما فيه أكثر من التفشيل أمام الملأ

بكرى أنا بزور المحل وبحاول أقابله وبقوله زي ما قلت يا أخينا تنقيطة