سابقة في منتدى بريدة لم تحصل في اي منتدى على الانترنت

[راعي الاوله]

السلام عليكم جميعا ................

وش علومكم ياجماعة الخير ....... جعل السعادة والرضى ماتفارقكم قولوا امين.....

عندي موضوع بس ياليت يكون فيه تشجيع واصرار .. لانه لو تم والله ياحنا بنستانس ونفرح.....

خلوني اول ابداء بمعلومه احصائية عن المنتدي ...

عدد الاعضاء المسجل ( وليس بالضروره الفعلي او الحالي ) هو 8321 عضو وعضوه ...

الموضوع ياجماعة هو العمل على شراء ارض وبناء مسجد عليها وذلك لوجه الله تعالى ...

انا ادري ان بعظكم راح يقول انها صعبه ومعقده ... لكن خلونا نحللها في خطوات :

عدد الاعضاء في المنتدى هو 8321 . طيب خل نقول ان العدد الفعلي الموجود حاليا هو 4000 عضو وعضوه ( يعني اقل من النصف وهذا رقم احصائي متعارف عليه في علم الاحصاء لحساب النسبة الواقعية من العدد الفعلي)... طيب نقول 1000 عضو او عضوه ماراح يتجاوب مع الموضوع .. يصير الحساب 3000 عضو وعضوه ..... قيمة التبرع المقترح هو 150 ريال فقط ( واعتقد ان هالمبلغ ماهو مبلغ كبير ومتاكد انه اي واحد منا يقدر عليه وخاصه اذا كان لوجه الله سبحانه وانا اولكم مستعد اني اتبرع باضعاف هذا المبلغ ).

طيب قلنا 3000 عضو في 150 ريال==== التاتج يكون 450,000 ريال

هذا غير ان بعض الاجاويد راح يتبرع باكثر من المبلغ المقترح...

طيب هنا فيه سؤال ... كيف نتاكد ان هالمبلغ اللي نتبرع فيه راح فعلا يستغل في بناء مسجد...

الجواب : طبعا انا عضو جديد في هالمنتدى ... لذا الجواب راح يكون من الاعضاء القدامى واللي قادرين انهم يرشحون اشخاص محل ثقه انشالله ( ولا يهونون الجميع واللي كلهم محل ثقه انشالله).

طيب السوال التالي: كيف يتم تجميع المبلغ من المتبرعين:
الجواب بسيط جدا: يتم وضع حساب جاري باسم الشخص المتفق عليه من المتبرعين او المزكى من قبل المنتدى ويكون الحساب في احد البنوك ويقوم المتبرعين بايداع مبلغ التبرع...


وانا متاكد انه راح يكون فيه الف اقتراح والف فكره لانه عمل خير والكل ماجور عليه ...

ياجماعه ترى الافكار العظيمه تبداء بفكره صغيره .. وياجماعه خلونا نرد بعض الدين لديرتنا واهلنا ...

والاجر انشالله يمتد ليوم القيامه واجر غير منقطع باذن الله .............

وعندي طلب من الجميع... لاحد يبخل برد او فكره او تصحيح او حتى انتقاد .. وترى الموضوع في الاساس فكره لين تقبلونه لانه يعتمد على الكل ولاجل الكل ولخدمه الكل...

يالله انك تلين قلب اللي يقرا هالموضوع وتجعله سند لعمل الخير ...

تحياتي للجميع ...


اخوكم راعي الاوله..........

[خـــــــــــــــالـــــــــد]

اخي راعي الاوله


اقتراح مبارك

ومن جهتي اؤؤيدك


وننتظر راي البقيه

ليبدا التخطيط والتفيذ عن قبول الفكره فالاخوان ما راح يقصرون

جزاك الله خير

[راعي الاوله]

تسلم والله يابو خلود .....

هذا اول الغيث قطره... وفاتحه خير انشالله ...


والدور على الباقين وهم قدها وقدود انشالله

[هاوي لاغاوي]

الأخ العزيز راعي الأولة

قال عليه الصلاة والسلام الدال على الخير كفاعله

لا حرمك ربي الأجر والله أسأل أن يوفق ويكتب الخير على يديك

وبالنسبة لأخيك هاوي فإنه مؤيد لهذا المشروع وبقوة شريطة أن تكون أليه التعامل مع الجهة المستقبلة للتبراعات واضحة وشفافه

ويشرفني أن أقدم عن طريقي مساهمة ستة أفراد

150في 6 = 900 ريال

تراني أضطريت لكتابة في محل علامة الضرب لأنني بالفعل بحثت عن العلامة فلم أجدها

للجميع تحياتي وسلام ربي ختامي

هاوي لا غاوي

[راعي الاوله]

اخوي هاوي لاغاوي ... جعلك تبشر بالجنه قل امين.............


ماقول الا كريم ومنيع الجود .........

وعن موضوع الشفافيه اللي ذكرته .. الموضوع موضوعنا كلنا يابعدي.. وانا متاكد ان في هالمنتدى ناس قادره انه تنظم وتهياء الجو المناسب لتنفيذ الفكره .. وزي ماقلت الموضوع موضوعنا كلنا واللي عنده زود لايبخل علينا...

جعلك سالم وغانم اخوي هاوي لاغاوي

[راعي الاوله]

اخواني المشرفين ... مسيكم بالخير...........

عندي طلب ولو ثقلت عليكم .... اذا فيه امكانيه تثبيت الموضوع لوقت محدد علشان رواد المنتدى يقورنه ويكون محل اهتمام الجميع لين مايكتب الله خير بتنفيذ الفكره ...

وانتم ابخص واعلم والكلمه الاوله والاخيره لكم .. وماعلى كريم تشرط ..........

ماقصرتوا وجعلكم سند للمنتدى


اخوكم راعي الاوله

[عاشق التحدي]

بصراحة اقتراح رائع بروعة مقترحة .

أنا من المؤيدين لهذه الفكرة .

[راعي الاوله]

عاشق التحدي... ماقول الا انك من جد عاشق تحدي ... وياصغر التحدي عندك لاتحديته .....

جعلك سالم وغانم وماقصرت ... والله يكتب اللي فيه الخير ...


اخوك راعي الاوله

[ام المقداد]

قتراح رائع
واهل هذا المنتدى هم الاولى
بمثل هذه الاقتراحات لما عرف
عنهم من فعل الخير والسعي فيه
وانا مني 600 ريال عن نفسي وعيالي
بس من يتولاه ياسعده بالاجر..

[خـــــــــــــــالـــــــــد]

تم تثبيت الموضوع


نامل من الجميع ابداء الراي واخذ الامر بجديه

وجزى الله خيرا صاحب الفكره

[راعي الاوله]

محفوظه باذن الله يام المقداد.... وجعل الهنا والرخا دايم سليلك ورفيقك.........

الخير من اهل الخير ولاهل الخير ..... وانا متاكد انه فيه اجاويد بهالمنتدى قادرين يخلون هالفكره ترتسم على ارض الواقع...

الود ودي اني اتزهل بالهفكره... لكن وش يقول ساكن بريطانيا لغرض الدراسه ... لكن كلي ثقه بربعي ربع هالمنتدى ان هالفكره تشوف النور


اخوك راعي الاوله

[ام المقداد]

على فكره ..
كنت ناويه اقترح اقتراح مشابه لكن لهدف آخر..
الله يجزى اخوي راعي الاوله كل خير ويجعله بموازين
حسناته ..

الإقترااااااح
كل من تبرع لبناء هذا المسجد فهو يعلم ان اجره مستمر مادام المسجد باقي..
لكن اتمنى ان يوافق الجميع على ان يسمى بإسم اخينا الراحل..

راعي العنود
رحمة الله عليه..
نريد ان نبر اخواننا الذين فقدناهم فهم بحاجه لكل عمل خير نستطيعه
لعل الله يقيض لنا عباده الصالحين بعد وفاتنا ووقت اشد حاجتنا للخير..
مارأيكم..

[ALI 9]

السلام عليكم ورحمة الله وبركاته

تراي ما قريت كل المشاركات لكن أشكرك على هذه الفكرة و سجلني معك ويمكن تتيسر مساهمات من غير أعضاء المنتدى

وبما إنك سامحن بالاقتراحات ليش ما يمسك المشروع أحد المشايخ ولا يهونون الأعضاء حتى يكون له ثقله عند الي خارج المنتدى
أو فيه إشكالية؟؟

تحياتي أخوكم
المطنون

[خـــــــــــــــالـــــــــد]

فكره اختي ام المقداد رائعه بارك الله فيك


وايضا اقتراح اخي المطنون جميل و يكون احد الاخوه في المنتدى هنا هو الواسطه بين المنتدى واعضاؤه المتبرعين وبين الشيخ وارشح اثنين لهذا الدور




هاوي لا غاوي



او


الرمادي

[الرمادي]

أخي العزيز راعي الاوله

اسأل الله لك أجر ماقدمت من إقتراح رائع

أنا من المؤيدين وبشدة للفكرة بكل تفاصيلها والتي اضاف لها الأخوان المزيد بتشجيعهم وإقتراحاتهم

وسأكون بإذن الله من المساهمين معكم فيها

وأتمنى أن يفتح المجال كما ذكر أخي المطنون لمن هم خارج المنتدى للمساهمة أيضا

ويبقى أن يتطوع شخص أو أشخاص لتبني مثل هذا الموضوع وبإعتقادي لو تكفل البعض بالإتصال بالشيخ صالح الونيان ليكون مشرفا على هذا الأمر فإنه لن يقصر ولن يبخل بجهدة لأنه إن شاءالله محل ثقة الجميع

ومجرد أن يعطينا رقم حساب خاص لهذا المشروع أمر كاف للإعلان عنه وبعد أن يكتمل لديه المبلغ المطلوب يبدأ العمل على إظهار المشروع لأرض الواقع

هذا رأيي الخاص طبعا ولكم الرأي الأخير في الأمر


لك وللجميع خالص تحياتي وتقديري ,,,

[وائل]

السلام عليكم


لدي بعض التعليقات ومنها :


1- الشكر والامتنان الوافر و التقدير الجزيل للأخ / راعي الأوله على هالفكرة



2- من الضروري جداً أن يتولاها شخصية معروفة وموثوقه كالشيخ صالح الونيان


أو الشيخ عبدالعزيز الشاوي أو غيرهم


3- أنا مشارك معكم في المبلغ المخصص ، وعشان عندي اسمين بدفع (300) !


4- أشك في رقم الأعضاء ، ولن أطرح رقم معين حتى لا اؤثر على الدافعية ..


5- يجب عدم النظر للمبلغ المذكور (450) ألف ريال ، ونركز على جمع مبلغ معين

للمساهمة في بناء مسجد ..

6- من الضروري نشر الفكرة في المنتديات ، وإرفاق آلياتها ، ومنها ربطها بشخصية

مرموقة موضع ثقة للأعضاء ..

7- تكوين فريق لإدارة فكرة هذا المشروع ..

[غريب]

السلام عليكم

الفكره روعه جداً جداً

ابدأ على بركة الله وارشح منشئئ وإداريي هذا المنتدى المبارك وأن يسمى مسجد منتدى بريده ...

بارك الله فيك اخي الكريم والدال على الخير كفاعله

تحياتي

[جلوي العتيبي]

فكره رائعه

جزاك الله خيراً أخي راعي الأوله

وانا مع رأي الأخوه الذين طلبوا أن يتولى الموضوع شخصيه معروفه وأن يوضع رقم حساب لهذه الشخصيه بحيث يسهل التبرع لهذا المشروع الهادف

أسأل الله أن يرى هذا المشروع النور قريباً

[قبة رشيد]

إقتراح رائععععععععععع جداً تشكر عليه.
وأنا من المؤيدين.

ولكن لي وجهة نظر أخرى.
المساجد تحضى بهتمام الجميع، وكل من أراد أن يوقف وققاً بنا مسجداً.
لو كان هذا الوقف عبارة عن محل تجاري يتم شراءه و أجار هذا المحل يصرف في وجوه الخير مثل مساعدة المتزوجين ، المساجد ،المحتاجين، حلق تحفيظ القرأن...الخ.

على كل هو إقتراح ولكن يبقى أصل الفكرة رائعه وسابقة خير يثاب عليها فاعلها.

[كرباج]

تصدقون توي اشوف الموضوع وانا معكم في الفكره وبشده اتمنى ان ارى المشروع ينفذ يالله عيال همتكم

جزاك الله خير

وائل لماذا لغة التشاوم ؟

تشاااااااااو

[الخاطف]

أنا على استعداد للتبرع ولكن ماذا عن الجهات المختصة هل تم إبلاغها بالأمر لأنني أعرف أن جمع التبرعات ممنوع إلا للجهات المصرح لها بذلك

[بندر الحمر]

أخي راعي الأوله

جزاك الله خير أخي

فكرة جيدة ستجد القبول من الإخوة الأعضاء والمشرفين

عندي مقترح

هل تعلم أن المسجد تعمره في أفريقيا واليمن والهند والدول الفقيرة كامل وكل حاجة لا يتجاوز خمسة آلاف ريال


وش رأيكم يا إخوتي بالدول المحتاجة للمساجد

وأنا معكم

[الرهيب 124]

بسم الله الرحمن الرحيم

السلام عليكم ورحمة الله وبركاته

:(
والله أنا يمكن لي سنة ما دخلت لكن جت الرساله يوم قريت الموضوع جاز لي


قلت خلنا ندخل نشوف يوم قريت الموضوع صراحة إقتراح جميييييييل

لكن في مداخلة

بالنسبة للأخت أم المقداد

لإسم المسجد

إذا كنت تريدين إسمه المستعار اللي هو راعي العنود
فما أتوقع إن هالإسم يصلح لمسجد

أما إذا كان إسمه الحقيقي فأنا أشجعكم أنكم تسمون بإسمه

وأرجو إنها تكون بيد شيخ كما قال الإخوان معليش طولت

[ام المقداد]

زاكم الله خير وكثر من امثالكم..
اخوي الرهيب طبعاً قصدي بإسمه
الحقيقي اكيد..

[حامل المسك]

(( حامل المسك ))
مع هذه القافلة المباركة
والتي سوف تصل بإذن الله
إلى مكان يطمح إليه كل مسلم
وعند التنفيذ سيكون سهمي بإذن الله
أضعاف المقترح
::::::::::::::::::::
أرى والرأي لكم
عدم تسمية المسجد
إن أصبح حقيقة بإذن الله
باسم أي شخص كان
بل يسمى باسم مدينة (( كالفلوجة )) مثلا
أو باسم دولة (( كفلسطين ))
أو باسم معركة من معارك الإسلام الحاسمة (( كحطين ))
أو باسم ينطبق على المتبرعين (( كالصحبة الصالحة ))
والمسميات كثيرة لكن ابتعدوا عن أسماء الشخصيات قدر الإمكان
::::::::::::::::::::::
ولصاحب الفكرة كل دعاء له بالخير
وإن تحقق إقتراحه فهو على رأس الرابحين
فهنيئا له

[أبو بسام]

أخي الكريم راعي الأوله

فعلاً سابقة لم تحصل في أي منتدى

وفكرة اكثر من رائعة ،وعلى الأقل الواحد منا يطلع شي لربه سبحانه،

اخواني لاتسكثر المبلغ ترى والله انه قليل جدا جدا

ياخي تخيل المية وخمسين هذه اللي مسكثرها، تخيل انك اصرفتها في شي لنفسك (طلعة بر - عزيمة - ينزين سفرة - نهاية الاسبوع- .... إلخ ) ، ما راح تستكثرها صح؟!!!
ليش؟ لأنك لقيت متعتها بوقتها..... بس هذه الصدقة وفعل الخير لها متعة لكن قد ماتكون عاجلة ... لكنها والله انها اكبر بكبير ومستمرة غير منقطعة ومن دون ماتحس فيها...




اقولك توكل على الله بس

وانا مني عن أربعة أشخاص 150 * 4= 600 ريال

[خزامى نجـد]

بصراحه الفكره جدا رائعه وننتظر الشخص الثقه الذي يتولاها ويصمد في إيصالها لنهايتها

والجميع يبحث عن الخير وابواب الصدقات
علها تدفع عنا بلاء عظيماً

خصوصاً بعد الأحداث والكوارث الاخيره
هل رأيتم كيف يموت الناس وكأنهم حشرات أو شيء لا أهميه له ..

اللهم نجنا من العذاب
اللهم نجنا من العذاب
اللهم نجنا من العذاب

تحياتي الكبيره لصاحب هذه الفكره
خزامى

[تاج القصيم]

إخواني الصالحون بإذن الله
أولا من باب الدال على الخير كفاعلة
نوجه دعواتنا الصادقة للعضو : راعي الأوله000
ومن ثم نطالب الجميع بنشر الموضوع على معارفهم خارج النت لأن أصحاب الخير كثيرون ويبحثون عنه وأيضا نتمنى طرح هذا الموضوع في المنتديات الأخرى ويوضع رابط للدلالة على هذا المشروع الخيري ونطالب الأعضاء المشرفين بمهمة هم أهلها وجزاهم الله خيرا أن يبحثوا الموضوع على أرض الواقع لأن الأفكار إذا لم تقيد تزول وياحبذا لو تم الوصول للشيخ الفاضل صالح الونيان ولايهينون البقية لأنه عرف بالعمل في المشاريع الخيرية وله معارف كثيرة قادر على تفعيل حلمنا لواقع إن شاء الله في العاجل القريب وأويد فكرة احد الإخوان ببناء المسجد خارج الوطن لأنه سيكون كبيرا وفي حاجة ماسة للمسلمين في الدول الفقيرة وإذا كان هناك من تسمية أحترم آراء السابقين وأقترح بإسم يطلق على المشروع وهو اسم مدينتنا الغالية
بــــــــــــريـــــــــــــدة
وأتمنى من الأخوة الذين ستكلف لهم المهمة بالعمل السريع حتى يرى النور اليوم قبل غدا ولي إقتراح ربما طرح وهو أن يكون دعم الأعضاء أيضا للمحتاجين في مدينتنا الغالية بريدة ومن لديه معلومات عن المحتاجين يطرح الأمر على العضو الخيري الذي سيكلف ويكون ذلك عن طريق الرسائل الخاصة حتى يعيشون سعادة الدنيا كغيرهم ونعيش جميعا سعادة الآخرة بإذن الله تعالى00
وبالأخير دعواتنا الصادقة للجميع وعسى الله أن يتقبل عملنا ويجعله خالصا لوجهه الكريم0

[عنوان الحقيقة]

جزاك الله الف خير

قيد الف ريال

ولك مني كل الاحترام

[قناص]

انا من المؤيدين لها
لووول

[(البلاتيني)]

جزاك الله خيرا وجعل ذلك في موازين اعمالك

[سيدة الحور]

جزاك الله خيرا أخي راع الاوله وأنا أشهد
أنك راعيها فعلآ فلم يسبقك أحد بها؛؛
والله العظيم أن حلمي من زمان أبني مسجد
ولكن للأسف مجرد أمنيه وأتمنى أن يكون سهمي ببنا هذا المسجد جزى من حلمي
ولكن أتمنى أن لايكون مجرد حلم أيضا<<
ولكم شكري

[محسن الحربي]

السوال : وين يبي يصير المسجد ؟؟

لايكون في حارة حضر , تراني ماني بقاط معكم :for6: :for6:

[فرقى عين]

بصراحة كلامك عين الصواب ولكن اين تبقى الثقة هي المشكلة عند الشباب

[مايحتاج اسم!!]

عمل لم يسبقنا احد بفعله
والله يوفقنا واياكم

[طيب القلب]

وش صار عليك يا راعي الاوله

انا اول الداعمين للفكرة وأول من سيتبرع

يالله بس انتم اجزموا لا يصير كل شغلنا هرج بهرج

[راعي الاوله]

اخوي طيب القلب... انا مع المنتظرين لبدء العمل في هالمشروع اللي انشالله راح يتم على خير ...


وصراحة كل الردود اللي شفناها تشجع على اتمام الفكره وانشالله نشوف على ارض الواقع....

واذا من ناحية التبرع فانا ذكرت اني اول المتبرعين .. وراح اتبرع ب 5000 ريال حالياُ واوعد اني راح اساعد بنسبة مقطوعه من راتب كل شهر لين ماينتهي بناء المسجد...

وبالنسبة وش راح يصير الحين.. اخوي طيب القلب ولا يهونون الباقين .. انا مع الجماعة باي شي تقرره .. وزي ماذكرت بفكرة طرح الموضوع, انا اعتقد ان فيه اعضاء في هالمنتدى قادرين انهم يأثرون تأثير كبير على تنفيذ المشروع, يعني اعضاء المنتدين المعروفين واللي لهم صله ببعض.. وزي ماذكرت بعد.. لو انا في السعوديه الان كان من بكرا فتحت حساب جاري في احد البنوك والخاص للمشروع. بس زي ماقلت انا في بريطانيا والشي اللي اقدر ادعم فيه الان هو طرح الفكره و التبرع من جهتي...

وهذا طلب لاحد من الاعضاء المعروفين انه مشكوراُ يقوم بعمل اللازم لبدء اول خطوه في هالمشروع الخير..... وياليت من الاعضاء الباقين انهم يصرون على بدء العمل بالفكره بعد... وزي ماذكرت ياطيب القلب., الموضوع موضوعنا كلنا ويهمنا كلنا ...

والله ييسر علينا ويكتب الخير ويهي النفوس للبدء في هالفكره..

اخوك راعي الاوله

[الرمادي]

أخي راعي الاوله

الحقيقة سبق وان طلبت من احد الأخوة المشرفين الإتصال بالشيخ صالح الونيان وطرح الفكره عليه ليزودنا بما يراه من توجيه تساعدنا في البدء بها وإن وافق على التكفل بها بنفسه بطريقة او بأخرى سيكون ذلك أكثر فائدة لكونه محل ثقة الجميع بإذن الله تعالى

سأتابع الموضوع بنفسي وأتمنى أن احصل على نتيجة مرضيه بإذن الله

تقبل تحياتي ,,

[راعي الاوله]

اخوي الرمادي... تسلم على هالرد اللي يشرح الصدر.... وتسلم على التوضيح... وايضا تسلم على ماسويت سواء بتكليفك احد المشرفين او بمتابعتك للموضوع شخضياُ....

وعموماً اذا تطلب الموضوع الاتصال شخصياً ببعض انا راح اتواصل معكم... بس انتو عطوني ارقامكم وانا اتصل عليكم ( مابي اخسركم واعطيكم رقمي ببريطانيا, الا اذا الفلوس زايده عندكم ترى ماعندي مانع...... مزحه).. واذا بغيتو اي مساعده او حتى ننتاقش في الموضوع بس ارسلي رقمك على ايميلي في هالمنتدى او على halabec@yahoo.com

[طيب القلب]

شكرا لك اخوي راعي الاوله على هذا الرد السريع

من ناحيتي الفكرة ممتازة جدا جدا

لكن يبقى تميزها ببدء التنفيذ

لكن قبل أن تقرر أخي البدء به لابد من تفهم الواقع الذي يعيشه المنتدى من حيث غياب كثير من الإخوان عن المنتدى

وكما قرأت ان قدرت الموجودين في المنتدى بحوالي 3000 عضو سيقومون بالتبرع

لكن صدقني أن هذا العدد كبير جدا

وليس تثبيطا من عزيمة الرجال لكنها فقط حقيقة لتبقى في الصورة تماما

من ناحيتي أرشح لهذه المهمة الكبيرة أخونا مدير المنتدى الرمادي ابو فهد

أثق فيه تمام الثقة ولا يساروني شك بأنه سيكون أهلا لها

صحيح أنها مهمة شاقة ومتعبة لكنه على قدر المسئولية

عموما أي خدمة او مساعدة أنا في الانتظار

ولكم تحياتي

[تركي605]

جزاك خيراً وكثر من أمثالك



وأنا أشد على عضدك

[المراهق الكسلان]

باااادرة رااائعة ياراعي الاوله انت سق وحنا ربعك ومعك ..................

[malk]

فكرة طيبة

وأنا مستعد بأي مبلغ يحتاجه المسجد .

وإن أردتم التكفل بأرض المسجد ..

وبارك الله فيكم

[راعي الاوله]

تسلم وبارك الله فيك اخوي malk وكثر من امثالك........

ومجهودك الي عرضته شي نفتخر فيه وراح يكون محل اهتمام الجميع ... وانشالله يتم المووع على خير...


راعي الاوله

[فيتامين]

مااااااااااااااااشااااااااااااااااااااااااء الله

اعانه على الخير ودلاله عليه........


وسجلن معاكم يابعدي.........


واهل الخير واجد.........


همتكم ياشبااااااااااااب يالله خل نبداء....

[البكيراوي]

اول شئ تحية .. لاخونا راعي الاولة

على الفكرة الرائعه ...

وانا معكم بإذن الله ..

وعندي تعليق بسيط ...

هو ان يأخذ الموضوع مجراه الرسمي .. اقصد ان تعرض الفكرة على إحدى المؤسسات الخيرية .. المنتشرة في بلادنا ولله الحمد لتتولى هي متابعة الموضوع ويكون جمع المبالغ عن طريقها ..ويكون بطريق رسمي موثوق فيه من مؤسسة خيرية معروفة ..

ودمتم بخير

[المحيميد 1]

اقتراح جيد ويعطيك العافية

[صماع]

انا ماعندي مانع ومخطط المسجد علي والتربع جاهز
نحتري الاشارة

[صماع]

التبرع

[اكار شوكولانا]

متى نجيب القروش

[صماع]

أنا معكم قدام

[وائل]

وش اللي صار في ذا الموضوع ؟


لحد الآن ماسك فلوسي وأنتظر المطالبة بدعمي !


هل هذا الموضوع ( شاهد ) آخر أننا أمة كلام ؟


لا نجيد العمل كما نتعاطى الكلام بمهارة !

أعذروني لقسوة عباراتي .. فقد لامس هذا المشروع شئ في نفسي


لكنني احبطت أيما أحباط ، ليتراكم على احباطات سابقة من مجتمعي


الله يقيض لهذا المشروع وغيره الاستيقاظ والتفاعل والنجاح والنصره


وحسن النية والعاقبة ..


والله ولي ذلك والقادر عليه