القشد ..بطريقة ام المقداد حتى العزوبيه بيصلحونه.. [الأرشيف]

ام المقداد

10-12-04, 09:53 pm

:)السلام عليكم ورحمة الله وبركاته..
اليوم بحطلكم طريقة ..
القشده المقداديه ..
سهله ورائعه ولذيييييييييذه مع القهوه..
واكيد ياعمري العزوبيه اللي متغربين عن اميماتهم..
بيدعون لي ان شاء الله..
لأنه اسهل منها مافيه..
ولاتبي وقت ..
يالله نجي للجد..
المقادير:
3 كاس تمر مكنوز ان اردتم كامل او منزوع النوى ..
اصبع ونصف زبده صغيره..غير مملحه.
نصف كأس دقيق بر
نصف كأس دقيق ابيض
علبة قشطه
ملعقة قرفه مطحونه <<موب لازم للعزوبيه اكيد ماعندهم :D
وش بعااااااااد :rolleyes:
بس .. نبدأ....
الطريقه :
قدر متوسط << العزوبيه اكيد ماعندهم الا هالقدر :D
نذيب فيه الزبده على نار هادئه ثم نضيف لها الدقيق
بنوعيه..ونحرك على نار هادئه لمدة 10 دقائق حتى يتغير لون الدقيق..
بعد ذلك نضيف القشطه ونحرك باستمرار 10 دقائق اخرى..
ثم نضيف عليه التمر ونقلبه خمس دقائق..
ثم نحطه بالفريزر :for7:
لاااااااا

امزح :D
مااستبعد تسوونها :mad:
بعد مانقلب التمر نكون مجهزين ملعقة القرفه <<غير إلزاميه للعزاب :)
نرشها على التمر ونقلبه ثم نطفي عنه على طول
ونقدمه مع القهوه ..
وبالعافيه والهنا على قلوبكم.

ămōяẻ

10-12-04, 10:17 pm

الله عليك

روعة

انا مااعتقد اي بنت

ماتعرف تسويها

حنا اللي مافي امل نعرف

ولكن ابطبعها واجرب

ابى اجرب لحالي
عشان!!!!!!!!!!

مشكورة

الشماسي

10-12-04, 10:20 pm

مشكوره اختي ام المقداد على الموضوع

وياليت من بعض الاعضاء يقدمون لنا مثل هالمواضيع الرائعه اللي تساعد بعض الشباب على معرفته بالطبخات السهله

الحمدلله الوالده ماتقصر ولكن الله يستر من التعيين مستقبلا إن الله شاء وتم قذفي إلى منطقه متوحشه فيلزم ان استفيد مثل هذه المواضيع لخدمة نفسي >>>>مهب دايم بسكوت وكيك

يعطيك العافيه ولاهنتي وننتظر الابداع

ومع التحية

هواجـــيـــس

10-12-04, 10:26 pm

يعطيك العافيه خيتوووووووو

بس حنا نحط حليب بدل القشطة :)

بس بجرب طريقتك يمكن تطلع الذ

يسلمووووو خيتووو

النسيان

10-12-04, 10:55 pm

مشكوووووووره خالتي ام المقداد ترى خالتي من التقدير بس بس

واله يذكر رمضاااااااان بالف خير ياختي ام المقداد

بنت الشرقيه

10-12-04, 10:55 pm

الله يعطيك العافيه ام المقداد
تكسبين اجر في هالعزابيه
واهم شي انها اكله ذات سعرات حراريه عاليه
وتدفي بالشتاء
:)

ماجد الأول

10-12-04, 11:29 pm

الله يعطيك العافية
أنا أموت في القشد خصوصا في الصباح بعد الفجر وقبل الدوام
وإذا كان ساااااخن ما فيه ألذ منه
راح أوري الأهل طريقتك
يمكن فيها شيء جديد

مع التحية

المجمعة ديرتي

10-12-04, 11:31 pm

يم يم يم يم يم يم يم يم يم يم

سلت لعابي مشكوره ام المقداد

شقرديه

11-12-04, 12:02 am

اثره كذا القشده

وانا هاكه على اهلي سنين

اخربط لهم واقول ذا قشد

هههههههههههههههههههههه

الله يعافيك ام المقداد

بجربها ودعواتي لك

دامك تعلمينا الطبخ الزين

ابي طريقة الدخن

وشلون يسوى؟؟

الف شكر

أبو بسام

11-12-04, 12:57 am

خالتي ام المقددا <<<<< (مسكت عليها خالتي)

معليش اقدر اطلبها من مطعم؟؟؟ ;)

بس يكون عندهم توصيل للمنازل :for5:

خخخخخخخخخخ :D

كسووووووووووول :(

الرمادي

11-12-04, 01:00 am

اختي الفاضلة ام المقداد

بالإضافة إلى طريقتك الرائعة بالإعداد فأنتي اجدتي في إيصال الدرس الى البنات بطريقة لاتجرح كبريائهن :)

كلهن يتعلمن من درسك مبسوطات وكأنهن عارفات الموضوع من زمان

بالعافية عليهن المهم أن يتعلمن الدرس جيدا فمن العيب ان يكون زوجها أكثر إجادة منها لمثل هذه الطريقة :)

على فكرة أختي ام المقداد لا أعتقد بأن هناك من يطلع للبر ولايعرف يسوي القشدة والدخن وقرص الجمر فهي وجبات أساسية في عز المربعانية

تحياتي ,,

النسيان

11-12-04, 01:07 am

ياسلام عليك يالرمادي

فعلا الشباب مثلي ومثلك ومثل كل الاعضاء يعرفون طبعا ابو بسام ياخي فشلتني الحق سو تعديل لردك هههههه او تدري ترى حتى انا مثلك
يابنات اي والله تعلمن تعلمن طبخ الماما مو مطول بكرا بو العيال والعين المووف قصدي الحمرا

ام المقداد

11-12-04, 01:19 am

ياهلا بكم كلكم ..
حياكم الله وبياكم..
هلا بعموري ايه اطبعه وانا امك يجيك وقت وتحتاجه..
الله لايبعدك عن اميمتك :)
بس خل التجربه لاطلعوا اهلك منا ولامنا لاتقعد تفشلنا وتلزقه بي
تقولهم هذي طريقة ام المقداد :(
حياك الله.
*******
هلا ابو عراده..
الله لايبعدك عن اميمتك ان شاء الله تعيينك يبي يصير بوسط الديره
والله يرد بناتنا وعيالنا هاللي ملوفين بكل محل..
يابعد الدنيا هم :(
حياك الله وابشر بالطبخات الزينه مادام لقيت التشجيع <<انشحطت :D
*******

فيافي نجد

11-12-04, 02:11 am

يووووه حبيبة الكل ام المقداد

تاعبه روحك ليه

كان قلتي لي بجي اساعدك :D

بس ليتك خليتيهم يجربونه مثلج :)

مشكووووره حبيبتي طريقة جديدة بجربها اكيد بتكون رووووووعه

MiSs_7o0oRyAh

11-12-04, 04:16 am

http://www.geocities.com/miss_7o0oryah/basmlah.gif
السلام عليكم ورحمة الله وبركاته..
اااااااااااااااالله قشد والله يانا اموت عليه ..
الف الف شكر لكي حبيبتي ..
بصراحة فكرة القشطة اعجبتني شكلي بجربها .. حنا نحط لبن ..
بس اكيد القشطة حلوووة
الف لف شكر ...

http://www.geocities.com/miss_7o0oryah/sob7ank.gif

ام المقداد

11-12-04, 07:42 am

هواجـــيـــس هلابك وغلا..
جربي القشطه وبتدعين لي إن شاء الله :)
********
غريب الجواء..حياك الله اخي..
ليش انتم ماتسوون القشد إلا برمضان :confused:
مالنا غنى عنه كل الشتا..يالله من فضلك.
*******
بنت الشرقيه حياتس الله اختي الغاليه..
الله ياجرهم العزوبيه والله حياتهم متعبه
لكن الله يخلف عليهم بالزوجات الصالحات :)
واكيد القشده من اهم الوجبات اللي تعطي
طاقه في الشتا.
*******

ام المقداد

11-12-04, 08:00 am

ماجد الأول حياك الله اخي الفاضل..
ومعاك حق القشد مع قهوة الصباح ماينتفوت..
الله يجعله عليكم بالعافيه.
*******
المجمعة ديرتي حياك الله اخي الفاضل..
الله يجعله عليكم بالعافيه..
واكيد ام سليمان تظبطه الله يعطيها العافيه.
*******
شقرديه حياتس الله اختي..
اجل لاعبتن على اهلتس ياحول :D
جربيها ولاتنسيننا من دعواتك الطيبه..
وابشري بطريقة الدخن قريب بإذن الله.
*******

ام المقداد

11-12-04, 08:12 am

أبو بسام حياك الله اخوي الفاضل..
معليش تهون خالتي عند ام المقددا :confused:
من المطعم ؟ اكرم الله النعمه :(
قشده ومن المطعم يسويها ابو هنود ماتجي ذي :(
خل عنك العجز وسولك قشده بقدر ذبايح بما انك زوول وخله بالثلاجه لما يقضي الشتا :D
***********
حيا الله مديرنا الرمادي..
الله مير يسلمك ..
البنات كلهن خير وبركه
واكيد الوحده منهن مستعده تتعلم كل شي
علشان ترضي زوجه.
**********
فيافي نجد حياتس يالغاليه
تساعدينن :) لاياما للعافيه تشقق حلقي وانا اناديتس
قبل اكتب الموضوع ..رادتن بي
قلت اكيد البنيه تذاكر الله يعينها .
والله كان ودي اخليهم على المثلج بس خفت يدعون علي :D
*********
MiSs_7o0oRyAh حياتس الله ومرحباً بتس..
نورتي المنتدى ..
ماشاء الله عليتس يازين كتابتس تفتح النفس :)
وبالنسبه للقشده كنت ازينها اول باللبن بس ماحبها حامضه
بالقشطه طعمها لذيذ ورايق <<تأثير الدعايات :D
هلا بتس الله يجعله بالعافيه.

كرباج

11-12-04, 12:20 pm

طيب ليش القرفه ماتلزم للعزاب ؟

سؤال يبحث عن اجابه

يازين التمر مع قشطه المراعي

مشكوره ياطبختنا الماهره

تشاااااااو

خـــــــــــــــالـــــــــد

11-12-04, 04:35 pm

الف شكر اختي ام المقداد

انا اموووووووت في القشد وشبه يوميا اكله الوالده والاهل كلهم يسوونه بس ما يحطون فيه قشطه باقولهم ونجرب طريقتك

ام المقداد

11-12-04, 04:44 pm

هلا كرباج..
سؤالك إجابته سهله..
لأنه اكيد ان القرفه المطحونه ماهيب
ضمن قش العزوبي..
ماتلقى بالمطبخ إلا قهوه وهيل
وملح ..
وقدر متعفط متوسط الحجم <<:D اللي بيسوي فيه القشده.
حياك الله .
*******
هلا اخوي الفاضل خالد..
الله يخليلك الوالده ويرزقك الزوجه الصالحه.
وعطهم هالوصفه إن شاء الله بيدعون لي.
خاصه اختك الفنانه بالطبخ :D تراي مانسيتها
سلم لي عليها.
*******

البرحيه

11-12-04, 07:14 pm

تسسسسسسسسلم يدك
الى الأبد

بس ودى افضفض اذا ما عنتس مانع وترها قبل كل شئ طالعه من حاملة لواء العجازات:for7:
بدا الهذيان
مرقوق + مطازيز + جريش + قرصان +حنينى+ كليجا+ الخ الخ كل وحده اصعب من الثانيه ليه من بد العالم حنا اصعب اكلات
يجرن ها التفكير منهى اول حرمة سوت الطبخات هذى وراه ما فكرت بالجيل اللى يبى يجى بعده ولا هى فشخره يعنى انى قرمة ووو وشلون انتشرت
مع انه ما فيه وسائل

حتت مرات اقول لله يرحمه ويبشبش الطوبه اللى تحت راسه وبنفس الوقت
اشيل عليه واقول من قالة تكتشف طبخات صعبات ما ودى اسهب بالفضفضه
اخاف ا:( جيب العيد

وقسمن احكى جد الجد دايم افكر تسذا واحيانا اتخيل شكل الحرمه اللى اخترعت المرقوق والمطازيز
خاصه اذا نويت اسوى واحد من الذكور اعلاه ومجرد ما اسمع التعليمات تمسط الهمه عندى الين تحرولت :for4:

شكرا لك

ام المقداد

11-12-04, 08:41 pm

هلا والله ببرحيه يالله انك تحييها ..
ابد ياعمري خذي راحتك بالفضفضه..
وقولي كل اللي بقليبتس..
راح اكتب لكم قريب بإذن الله طرق سهله جداً
لكل اللي ذكرتيهم..
سهله الى درجة انك ممكن تتهورين وتسوين
جريش وحنيني كل يوم :D <<بعيده ذي.
بس ترا كل شعب طبخاته من الامكانيات والمنتجات
اللي متوفره حولهم بالبيئه هذا بالنسبه لأول..
تدرين ماكان عندهم إلا البر..
فقامت اللي انتي تتخيلينها الله يرحمها تتفنن علشان
ترضي سي السيد..
وجات على روسنا حنا :( <<الجيل الزوولي.
لكن ان شاء الله بعطيكم اسهل طرق لعمل الاكلات الشعبيه
بس ابيكم تدعون لي بالفرج امانه :(

شقرديه

11-12-04, 09:43 pm

يالله حي البرحية والجماعة كلهم

البرحية اصلن شباب منذ مبطي يحبون هالخرابيط

اما شباب هالحين يبون سلطات وشوربات

على بالهم الى كلو شلطة بيصيرون لبنانية

لكن يجيهم برد نجد يلوهبهم الين يحنون للماضي

تدرين لا تاخذين الا واحد مودرن

ما ياكل الا شلطات ومحاشي اريح لك وفكي عمرك

الله يقطع بليسك ويغربل عدوينك

نسيت وش مرجعني هنا

بقولكم ان قشد ام المقداد ما يفووووت

شيء

جناااااااااان

تحياتي ومحبتي

خزامى نجـد

11-12-04, 10:44 pm

مممممممممممممم

وش ذا الريحه الحلوه

ايه هذي الأصاله مو تقولون سلطات

الله يعطيك العافيه ام المقداد بصراحه خطوة رائده في سبيل سعودة المطابخ السعوديه بابناء الوطن الافذاذ وتعريفهم على تراث الاجداد اللي ينقط سمن وعسل

يا حبيلك يا ليتك تواصلين وتسوين لنا سلسلة ام المقداد للأكلات الشتويه الشعبيه

وياويلي من هالرمادي كاشفنا وكاشف بناتنا وفاضحهن في ارجاء المنتدى

استرو ما واجهتوا يا ناس وسووا قشد المقداديه وادعو لها

تحياتي
خزامى

ام المقداد

11-12-04, 11:29 pm

هلا والله بكبوس منتدى المرأه <<ماتعرف تمدح :D
شقرديه الله يسلمتس
ويجعله عليتس بالعافيه
وصدقتي اختي اللي ماله اول ماله تالي..
*****
خزامى نجد الله يعافيك ويسلمك
ويوم قلتي خطوه رائده <<تخيلت نفسي صرت وزيرة المطابخ <بيروحون فيها :D
الله مير يسلمتس..
وبمناسبه الشحطه الرياديه ابشري بالاطباق الشعبيه وإن بغيتي الغربيه
وخلي عنتس بس الرمادي وغيره من الشباب مالهم غنى عن بنات ديرتهم
يالله من فضلك.
لو انهن عجازات شوي <<شوي بس :for7:
******
نجي للجد لاتنسون ام المقداد من دعواتكم ان الله يفرج كربتي:(
هذا اللي اطلبه منكم بس.

العبرى

16-12-04, 01:22 am

ياسلااااااااااااااام لذيذة من الطريقة وشلون

لو أذوقه صدق...

تسلم يدينك أم المقداد
والله يفرج كربتك ويزيح همك وغمك..

سلامـــــــــــــــي للجميع,,

ام المقداد

17-12-04, 04:32 am

هلا بالعبرى :for12:
الله يسلمك ياذوق..
وان شاء الله يعجبك لاذقتيه
مثل ماعجبك وصفه..:)
الله يجزاك خير ويستجيب مادعيتيلي ويجعل لك مثله.

أشرقت

17-12-04, 05:11 am

تسلم يدينك أم المقداد ويعطيك العافيه
تصدقين توي اعرف طريقة القشد منك
لانه قليل نصلحه!!!!
لااحد يدري
تحياتي

ام المقداد

17-12-04, 05:22 pm

هلا والله بأشرقت..
لاماحدن داري :)
بس لازم تدعين لي اجل ؛)

هاكر

17-12-04, 07:46 pm

ام المقداد ......

(( حفظكي الله ))

ام المقداد

17-12-04, 07:59 pm

حياك الله اخي هاكر..
آمين الله يجزاك الجنه.

قناص

19-12-04, 12:19 pm

ام المقداد ماتزينين لي بمطبقه وارسل لتس احد ياخذه؟
تراي والله اني مشتهي القشده وسعابيلي اغرقن الكيبورد يوم قريت الموضوع

غريب

19-12-04, 02:06 pm

السلام عليكم

وهذا هو القشد ...!!!

وكل مره اقول للأهل الله يعينكم على الطبيخ قشد وغيره واثاري الدعوه من 5 الى 10 دقايق !!!

ياعيني ... افضحي المستور كمان وكمان ..

بارك الله فيك

ام المقداد

20-12-04, 04:11 pm

قناص..
الله يرزقك الزوجه الصالحه اللي تضبط لك القشد
بارك الله فيك.
**********
غريب ..
طريقة القشد المتعارف عليها تأخذ اكثر من ساعه
واشتق الاسم من قشد الزبده اي تظهر طبقة قشد
من كثرة بقاء الزبد على النار ..
يعني كان اهلك متبعين الطريقه القديمه فهي صعبه وممله..
انت عطهم بس هالطريقه وخلهم يدعون لي..
*********