مودي أهلك للسوق ؟؟أرعص هنا!!

[شقرديه]

أهلين

وإلا السلام عليكم ورحمة الله وبركاته

الحقيقة مدري منين أبدأ

الواحد منكم إذا أخذ أخته أو أمه أو زوجته أو حبيبته <<<الأخيرة خطأ مطبعي

المهم لما يوديها للسوق انتبهو معي شوفو شيصير:

1_ أول ما تركب يسأل :تبين الصراف وإلا عندهم دفع بالبطاقة؟؟

تجاوب :الصراف أضمن يمكن ما تدفع الشبكة!أو يصير خلل واتعطل!

هو: دام عندهم شبكة ما نيب منرص ساعة قدام الصراف ادفعي بالشبكة

راضين مو مشكلة المهم نروح ونقضي أغراضنا

يوصلون للسوق هات يا هواش وتلعين وتكشير ويأشر بيدة إعلان الغضب والاحتجاج على الزحمة

الضعيفة وش ذنبها ؟؟؟ الناس تبي السوق مثلها!!

لما تنزل ما يمديها تواسى إلا وهو تللللوووولولولولولوط <<<جوالها يرن

هي: الو نعم!

هو : ولعنة اذن الفجر كل ذا سوق ياله اخلصي انا عند الباب

هي ((خانقتها العبرة)) طيب بس الشبكة عطلانه واغراضي عند المحاسب اسحب لي من الصراف عشان اخذهم ((ساعة تجمع فيهم))

هو : فاضي انا الفجر يبي يذن وهات يا هواش وتطلع وتخلي غراضها

انتم هالحين ما تقولون لي ليه تعصبون ؟؟؟

خير يا طير وش صار؟؟؟

تحسبون انا يجوز لنا السوق والا ماخذين الدعوة نزهة وتمشي

والله لولا الملامة كان ما اشري ثوب

بس ادري الطنزة بتصير بي انا

وكلن يبي يقول يا حول يا زوجها العيد ما لبست له وش تسوي ببيتها اجل!

تدرون ان السوق قرف في قرف لكن مضطرين له

زحمة وهذا بزر ينشب بعباتي يحسبني امه وهذا صراخ يبي لعبة وامة معية تشتري له

والثالث ميت جوع ويصيح مال من السوق

وهذا هندي ينشب بالحلق هزا كويس هزا جديد فيه تخفيض ماما اشتري عسى مالك أم انا أمك يا الأشهب

وتجون انتم تزيدون الطينة بلة بهواشكم وصجتكم ولجتكم

وبريدة افقر مدينة من ناحية الصرافات والله ما فيكم خير أطلبو من البنوك يحطون صرافات

ومن زين الطبايع تلقا أم سادحة بزرها في الطريق تقيس عليه جزمات

طيب وخرية شوي والله دست على كم بزر لكن الشرهة على امهاتهم

هذا فيض من غيض

البقية لما أروق شوي

تحياتي

[الوطني]

يحصل كثير ... وماراح ننتهي الين نتعلم

كلنا كيف نأقلم ونهئ ونكيف انفسنا مع

ظروفنا ...

الواحد أو الوحده منا اذا راحت لمستشفى

او مكان ما نتوقع انه يحتاج وقت معين ..

نلاحظ على انفسنا اذا بدأ ذلك الوقت

في الزياده اننا نبدا نتوتر ونضجر حتى

لو كنا وحدنا ...

بعضنا يستطيع ان يتفادى ذلك بأن يهيئ

لنفسه وقت مضاعف ويتوقع بعض

الامور ويستعد لها ..

أو يخصص نهار أو ليله كامله

لأنهاء غرض معين ..

ولكن مشكلتنا هي عدم تقدير ظروف

بعضنا البعض .. في اختيار الاوقات أو

الظروف المناسبه لبعضنا البعض ..

أما بمفاجئته .. أو

بتسويف بعض الامور الحتميه .. اما

بسبب عدم الاقتناع بالمعروض .. او أي

شئ آخر ممكن تفاديه بتغيير طريقتها

المعتاده معه .. وخاصة انها متكرره

وتتكرر معها نفس الانفعالات والتوتر ..

هذا الناحيه اسبابها ليست في طبعنا..

بل في طريقتنا وسلوكنا في ادائها ..

الذي يحتاج الى تقويم وتهذيب من

الممكن ان يأتي بالاتفاق المبكر ..

أو بالتفاهم أو محاوله التفهم .

[شقرديه]

أخي الوطني رعاك الله

أسعدني جدا ردك

خاصة أنك وضعت أسباب لتغير انفعالات الرجال بعد الذهاب للسوق

وهي عدم تقدير الظروف التقدير المناسب

لكن ما ذنب المرأة والله احنا اشد طفش منكم

وأشد ملل من السوق

لو تدري شهر كأقل تقدير ما اروح للسوق مهما كانت الظروف بعد رمضان

ليتكم تفهمون وضعنا وترحمونا شوي من العصبية

لك الشكر والتقدير

تحياتي ووافر تقديري

[الاخطبوط]

بالنسبه لي انا اعصب اذا كنت بلعب مباراه او بشوف مباراه
لكن غيرها مستعد اوديهم لكن نزله للسوق معهم ينسونها ذي


تحياتي

[المستشار القومي]

ياوليدي نبي السوق .

متى يوه ؟

بعد العشاء .

سمي

اختي امي اختي الصغيره ركبوا معي .

يه متى اجي الساعه 11

جيت الساعه 11 مالقيت احد جلست انتظر لين الساعه 11 ونص

وينكم يوه

والله اختك تبي شنطه من القبه والقيناه ورحنا ل.....

للحين عادي الوضع

وصلنا البيت رحت انا لخوياي

الو ...خالد

سمي

تعال نبي نرجع اللي شريناه مايقد لختك حصه (قصير)

من هنا بدت المشاكل وبدا .

تخيل معي المشهد هذا لازم واكيد يتكر مع اي واحد اذا صار مع امك الشكوى لله لكن مع اختك ولا زوجتك صدقني راح تمل واو ما رقولن نبي السوق راح ينعاد الشريط هذا براسك وتبي تدري انك تبي تبهذل فأنت من اوه راح تلج وتلعن .........الخ

بصراحه مهب شيء يقهر ويخلي الواحد معذور؟

يازين الرجال بهم خفة الدم من هالناحيه .كله ثوب وشماغ وبس

[أبو بسام]

اله يغربل ابليسك
ياشقرقر

أجل كل هذا بالسوق

تصدقين عاد ان وصفك اطلق من لو انك مصورته بمقطع فيديو


تودية الحريم للسوق أمر عادي جدا وما يحتاج كل العصبية هذه
بس لازم يكون (مجدول لها مسبقاً)

يعيني شغل الفجأة .... صعب شوي الا اذا ماعندي شغل وفاضي عادي

[مجنون الحروف]

أهم شي لا يصير هالكلام خطا مطبعي

والثالث ميت جوع ويصيح
مال من السوق
مال من السوق
مال من السوق
هذة ضدكم يالحريم
بس الحمد لله
انا اوديهم للسوق واشتري كل الي يبونة
مو حرمتي انا عزابي
الوالدة واختي
ولا منهم خلصو
رحت للبيت
وهشتهم
على ايش هشتهم ؟؟؟؟؟؟
لانهم ما شرو كل اغراضهم
يعني فية طلعه ثانية للسوق
وانا ما احب السوق
ليش؟؟؟؟؟؟؟؟؟؟
لاني لما اشوف العباية
يجيني هوجاس بالزواج
وانا ما ودي
ادري طولت لاكن المضمون
لية ما تخلون اهلكم على راحتهم
الي بيشوفكم كل يوم بالسوق
تراها مرة بالشهر او الشهرين
ام الرجال متى ما بغي راح
احد يقدر يقول لا
باي
وتحياتي للجميع
مجنون الحروف

[البرحيه]

ههههههههههههههههههههههههههههههههههه
هههههههههههههههههههههههههههههههههه

وقسمن احبتس........
سالفة لبزران سالفه

بس والله
غريبه ماحد قال لاتعممين ترى مو كل ا لرجال تسذا

الصراحه
ترى العصبيه اللى تجيهم عشان اللى يبى يكعونه
ولا اللى تكع من عنده يوصلونه السوق والخشه تبى تنشق من الوناسه بعد يمكن ينزل ويشيل الولد ويمسك يد البنت ويشيل لأغراض ويكلم بالجوال (( ويقزقز )) << ما اعمم ادخل على لله

متى تروقين نبى الباقى >> نحيسه


شكرا لك

[الوطني]

ليتكم تفهمون وضعنا وترحمونا شوي من العصبية
--------------------------

حيلك ... حيلك .. اختي شقرديه ..

كأنك خليتي الملامه فقط على الازواج .. وانا

كنت اتكلم

عن الازواج والزوجات معا يوم اطالب ان يقوم

بعضهم بتقدير وتفهم ظروف بعض ..

صحيح ان الزوج مسئول عن تلبيه الطلبات

والقيام بالمشاوير .. وهو يقوم فعلا بذلك ...

لكن من ناحية التضجر والانفعال بصراحة

الزوجه مسئوله في اغلب الاحيان

عن عدم تكييف نفسها أو عدم حرصها على

التجانس مع ظروف زوجها أو تهيئته لمثل

هذه المشاوير .. خاصة مثل ماوضح

بعض الاخوه اعلاه ومثل مانعرف جميعا

ان مشاويركن متعبه .. طبعا هذا غير

مشاكل قيادة السياره في زحمة الاسواق ..

وغير الحالة التي تبدو عليها الزوجات في

حالة يأسهن من وجود الشئ المناسب ..

كلها عوامل تزيد من توتر وانفعال الزوج ..

[شقرديه]

الاخطبوط انت اشوى شوي

يعني مفهوم انك لما تكون فاضي فيه روحة بدون صجة ولجة للسوق

عسى دايم كذا

خاصة لأعرست

والا ودهم للسوق ورح شوف المباراة الين تخلص تعال خذهم

الله يثيبك

تحياتي

[شقرديه]

المستشار القومي

هي مو مشكلتكم بس

الوحدة منا لما تشتري قطعة نفسها تكون مضبوطة مية المية

لكن الشكوى على الله

غصب مو بإيدنا

لا تعصب اذا قالو بنرجع القطعة ما تقد لحصه

بعدين هذي حاجتنا لكم مرة في السنة

لكن انتم طووووووول السنة وحنا نكرف لكم ولا عمرنا اشتكينا

تحياتي

[شقرديه]

ابو بسام ما تعصب حتى لو كان زحمة؟؟

اذا كان كذا عوافي عليك

تحياتي

[شقرديه]

مجنون الحروف

شهد شاهد من اهلها

صح عليك

هي الأزمة بعيد الفطر حتى عيد الأضحى مو مثله

لكن اخ مجنون ليه تغربل روحك

اتزوج وانت تكره العباية السوداء بدل ما تطري عليك العرس

وبكذا بتودي اهلك وزوجتك للسوق بدون ما تخاف من تأثيرات العباة السوداء عليك

تحتح

[شقرديه]

البرحية والله في السوق انواع الغرابيل

تدرين في محل راصين ننتظر دورنا في المحاسبة

اللي قبلي الله يثيبها قاعد الكاشير ساعة يحسب لها

يوم قالها بمية وكذا

قالت لالالالالالالا


اصبر وشو عليه

وتقعد نرجع على حبة وتعيد الحساب

وانا اغلي ودي اخلص

والثانية تمر من جنبي الا وطيرتني

صبخت بي الين خرعت كتفي

مدري هي تمشي والا تحارب

شكلها معصبة ما الومها اكيد جايها كم هوشه قبل تدخل السوق

هذا غير الصرافات لي معهن حديث آخر

تحياتي ومحبتي البرحية

[شقرديه]

الوطني الزحمة مو بإيدنا نلغيها

ومشاويرنا غصب علينا

ما يرضيك عيالك شهبان من بد الناس فس العيد

وااللي نشوفه في السوق يشيب الراس

كفاية علينا بلاوي السوق

غير انكم حطونا وتروحون لاستراحة والا تمشي

يعني تروقون احنا تتفخ رجولنا من المشي

اشكر طولت بالك على عصبيتي

ولك التحية

[الرمادي]

أختي العزيزة شقردية


أنا شخصيا تصل حرارتي للأتش عندما اسمع فقط بإسم السوق !!


لن أصبح كذلك متى ماعرفت النساء كيف تشتري ماتريد !!

أيضا أراك تبالغين عندما تقولين هي مرة واحدة في السنة !!

وماذا يلبسون إذا في الأجتماعات الأسبوعية والشهرية ؟!!!

من تقتصر على طلعة واحدة في الشهر بإعتقادي لن يجد زوجها عذرا للغضب !!


ومن تعرف ماذا تريد قبل أن تذهب للسوق لن تسبب لزوجها إرتفاعا بالضغط !!

ومن تدخل للمحلات ولا تبحث إلا عن حاجتها وتترك تفتيش ماليست بحاجة إليه ستجعل زوجها يوصلها متى ماارادت وهو متبسما !!

ومن تعود من السوق ولا تذكر السوق أمام زوجها حتى يحين موعد ذهابها إليه مرة أخرى لن تتسبب لزوجها بعقدة نفسية من السوق !!


ومن تشبر نفسها وأطفالها قبل الذهاب للسوق حتى لاتختلف المقاسات فستكون كمن أهدت الجنة الى زوجها !!!

ومن تترك زوجها يكمل كتابة الرد دون ان تقول يالله بروح للسوق فستكون ملكة زمانها في نظر زوجها !!!!!!!!!!!!!!!!!!!!!



تحياتي ,,,

[شقرديه]

والله مت ضحك على الجملة الأخيرة

ياخي ما صار سووووووق


كل ذا حاقد عليه



بس حاجة وحدة لية تشبر ولدها


تشتري ماركة مقاساتهم مضبووووطة مية مية وترتاح

تحياتي وصادق دعواتي لأم فهد أن يسخرك لها وتوديها مكان ما تبي بدون عصبية وهواش