ليييه البنات يرفضون الشاب اللي ****؟

[بقايا نزف]

بسم الله الرحمن الرحيم



السلام عليكم......

كيفكن....

شو عاملين ....

كل عم وانتو بخير..

كيف استعدادكن لرمضان اعاده الله علينا وعلى المسلمين بخير....

لييييييه البنات يرفضون الشاب اللي يدخن؟؟؟؟؟؟؟؟؟:confused:

كتبت هالموضوع لانه حصل معي موقف غريب..

مره كنت رايحه أنا وأبوي للسوق وكان جديد......قضيت اغراضي

صرنا انا وابوي ندور وكان فيه محلات ما نفتحن......

وهناك بأحد الزوايا........

كان فيه رجل منزوي على نفسه وكانه مسوى جريمه.........

التفت يوم شفته كسر خاطري وكانه طفل خايف.....

يعني الرجل شكله عاقل ملتحي مشا الله عليه لكن اللي صدمني انه

يدخن بشرااااااااااهه:( :(

قلت لابوي: شفته

قال : يمكن بلوى

كنت اعتقد انه مايدخن الا الشباب الدجه لمن يوم شفته قلت والله

الدخان بلوى..

بغيت اعرف راي البنت بالشاب اللي يدخن......

لانه سمعنا كثير عن رفضهن لهم......

وبرضوه سمعت انه بنات تزوجو من شباب مدخنين لكن باقل من شهر

تركوا التدخين....

يعني قلوبهم كله عطف وحنيه بما انهم يتقبلون.....

اجل لييه الناس ينظرون لهم نظره غريبه مع انه بالامكان اصلاحهم

وتوجييههم لما فيه خير لهم......

يمكن زي ماقلت بلوى .....ويمكن صديق جر صديقه وتعرفون وش كثر

الشباب يأثرون على بعض...

او يمكن ضغوط نفسيه اجبرته على التدخين..

ليه منحاول ان نساعدهم..

انت اخوي اذا كان صديقك يدخن بدل مايجرك انت حاول انه يتركه..

اما اذا كانت الشله كلها>>>>>>بلشه والله

وانتي اختي حاولي مع اللي تعرفينه ويدخن انك تدخلي عالمه وتعرفي الاسباب وتساعديه......


عموما ابي رايكم بالموضوع..........


وسلامتك......

اختكم..



بقايانزف

[ولد بريده]

اختى يقايا بعد التحيه


بصراحه ها الموضوع يقلق كثيراا من الشباب وخاصه عند الزواج

لان الشخص الذى يريد الزواج عندما يعرف اهل البنت انه متزوج يمكن يرفض عموما الشخص المدخن ليس بمجرم وعلالاجه سهل جداا بس يحتااج لصاحب صادق معه وان يترك الاماكن التى كان يدخن فيها مع اصحابه والحين نحن مقبلين على شهر رمضان فانا اعتقد ان هذا الشهر فررررصه لالالاتكررر وانا عايشت ناااااس مدخنين وبفضل الله تركو الدخان وما اقول الا الله يهدى الجميع




تحيااااااتى ولد بريده

[فهد عبدالرحمن]

هلا وغلا

اذا الموضوع مسالة ابتلاء ,, فهو تحت المجهر , ويجب ان يرتدع الانسان ويجاهد نفسة للقضاء على هذا الشيء..

اما مسالة الرفض من ولي المراءة والمراءة نفسها , فاعتقد انه لحياة اسرية خالية من الامراض والروائح المزعجة..

والراي ان يشدد ولاة الامور والبنت ايضا في مسالة القبول , للحد من ظاهرة التدخين...

[الشقردي]

اختي بقايا نزف00000
مبارك الشهر وصياما مقبولا ان شاء الله
صراحه الموضوع في اعتقادي ان التدخين يمكن في يوم من الايام
يتركه المدخن لانه والحمد لله هناك الكثير من اعطاه الله العزيمه وقوة الشكيمه على تركه
وهذا بحد ذاته ليس عائقا عن الزواج لانه لايدخل في عيوب الشخص
المستمره مثل لو ان شخصا به زكام واراد الزواج نقول مانزوجه لان به زكام ؟ طبعا لا 0 لاننا نعرف انه سيشفى باذن الله وهكذا المدخن
علما انني لا ادخن من فضل الله على شان ماتقولين يدافع عنهم
وشكرا على هذا الطرح000
=======
الشقردي

[بقايا نزف]

شكرا اخوي ولد بريده

الله يهدينا وياهم ويحقق امانيهم

اختك
بقايا نزف

[بقايا نزف]

السلام عليكم اخوي فهد

هذي وجهة نظرك وانا احترمها يمكن برايك انه تحت المجهر،صحيح انه

كلنا نتمنى انه تكون حياتنا خاليه من الأمراض

لكن برضوة لازم نحاول نقلل من هالظاهره ولا ننظر لها على انها اجرام او ماشابهه..


اختك

بقايانزف

--------------------
الاخ الغالي شقردي

مو مساله يدافع عنهم بالعكس حلو الواحد يحس بهموم غيره ويحاول يساعده

يعطيك الف عافيه شقردي


اختك
بقايانزف

[الاصيلة]

حياك الله يا بقايا نزف على هالموضوع الحساس والحيوي جدااا

واذا سمحت لي أن ادلي بدلوي

لننظر لهذا الموضوع من عدة جوانب وهي كالآتي:

1= من وجهة نظر الأسرة أو ولي الأمر
2= من وجهة نظر الفتاة أو صاحبة الشأن
3= من وجهة نظر المدخن أو الشاب
4= من جهة واقعنا الحالي

---------------------------------------------------------------------------------------
1=وأعتقد أن كل ولي أمر لا يتمنى لأبنتة أو أختة شاب مدخن
لأن غالبيتهم وأقصد(أولياء أمور الفتيات)يؤمنون بأن هذة الفتاة أمانة ويطمح لتزويجها من غير المدخنين لماذا؟
لان الولي يعتقد أن التدخين هو أساس لأمور لا سمح الله أكبر مثل المسكرات وخلافها .وأنا لا أتهم أحد من المدخنين بذلك ولكن
هي نظرة ولي الأمر للمدخن.
بعض المدخنين فيهم بعض التقصير تجاة واجباتهم الدينية.
أما الولي المدخن فغالبا لا ينظر لمسألة التدخين بأنة عائق كبير.
أنتهى

2) اما الفتات فيعتمد أختيارها بحسب البيت اللتي تربت فية فمنهن من اعتادت على أن هناك والد أو أخ يدخن فأيضا هو ليس مشكلة كبرى
وتجزم بأنها سوف تجعل منه رجل صالح يقلع عن التدخين.

والغالبية منهن تؤمن ايمانا قويا بحرمة الدخان فهي لا توافق.

3=الشاب المدخن لا يريد ان تملا عليه شروط ولكنه لا يعلم أنة ليس شرطا وانما الدخان محرم لا يريدة الناس.
وهو أي الشاب ينظر لأقرانه المدخنين والذين تزوجو وأمورهم مستقرة
ويريد أن يكون مثلهم.

4=أما واقع الحال فيقول أن البيوت ملئى بالبنات وخطر العنوسة لا سمح الله أكبر
وأعتقد أن الحل يأتي من الطرفين
من الشاب بحيث الذي يعلم ان التدخين حراااام ويكون عندة العزيمة والارادة لتركه لله أولا.
ومن طرف الفتات بانه اذا تقدم لها شاب مناسب (محافظ على الصلاة)
وعيبة الوحيد هو الدخان .
أن توافق مع العمل معه والاصرار علية بترك الدخان ولاتيأس حتى تنال
الأجر والسعادة معا.

وهذا رأيي المتواضع بين يديكم

والسلام عليكم

**الاصيلة**

[ابوتركي]

وانا ايضا لي مداخله لان الموضوع مهم جدا....................
والحقيقه ان نظرة بعض الناس للمدخن بانها جريمه فيصر على
هالعادة السيئه..ويصعب علاجها..وهي لاشك محرمه لاكن
لاتقارن والعياذ بالله بالمخدرات مع انها هي في الغالب طريق
ولاكن النصيحه مطلوبه خاصة مع الاشخاص اللذين هم في البداية
وخاصة في سن المراهقة ..وفي الغالب تكون بلوى.............

[بقايا نزف]

يعطيك الف عافيه اختي الاصليه

كلامك كله حكم

وكله ينم عن عاطفه مخلصه وصادقه


والله مادري ايش اضيف على كلامك


--------------------------

اهلين ابو تركي

صح يمكن رفض الفتاة للشاب المدخن يزيد من اصراره وتضخم المشكله عنده


وهذي مشكلتنا مع المراهقين لانه في الوقت الحالي اصبحت القنوات

الفضائية ومايظهر فيه البطل بكل لحظة غضب او انتصار بتناول السيقارة

يخيل للرائي بانه امر عادي..ولا فيه اي مخاطر على الصحه ..

مشكورين

على طاري التلفزيون

مرة ابن خالي مايتجاوز عمرة 5 سنوات كان يناظر فيلم كرتون(ننيجامغامر)

وكان اخو ننيجا يدخن...

وكانت امنيتي اني اسكر الفديو لكن هو منسجم انسجام عميق

خلص الفليم..وتفرقنا

بعد دقايق سمعت صياحه...قلت :ياربي الولد صارله شي


اثاريه جايب قلم وحاطه بين اصابعه وحاط صمغ

وجلسنا طول اليوم وحنا نحاول نفكه

قلت ليه مسوي كذا ..قال:وش حيثه يدخن

قلت هو كافر ربي يحطه بالنار وشف انت يوم قلدته لزقت يدك

قال : الله ياخذه يدخن الكافر ذا خلان اقلده

ضحكت وقلت لا تكررها مرة ثانيه

اختكم
بقايا نزف

[الخبي]

يعطيك الف عافية اختي بقايا نزف علي هالموضوع الهام

انا حقيقة وجهة نظري تختلف عن الجميع وهي كالتالي

1-ان التدخين ماظنة يستحق يكون سبب ريسي للرفض من قبل البنت الا في حالة وحدة بس اذا كان اهل العريس والعروس مايعرفون بعض زين يعني معرفتهم ماجت الا من هالخطبة,,,,,,,اما اذا كان العريس يقرب للعروس فصدقوني واللة ان التدخين مايشكل اي شي اقصد انة لو يشرب (كرز)كامل باليوم مهوب رادينة اهل البنت هذا الكلام من واقع انا شايفة بنفسي تتقولون اني ادخن بهواكم بس انا اقول الحقيقة

2-التدخين مايشك احد من العقلاء انة عادة قبيحة جدا وانا حقيقة احترم الشخص الي ذكرتية يابقايا نزف في القصة انة متغبي وهو يدخن اجل تبين مثل هالبزران والا الي مايستحون علي وجيههم الي ماتطيح الزقارة من افاميهم وين ماهم قاعدين

3-ياجماعة ترا ترك التدخين تراها حاجة مهي سهلة زي منتو معتقدين الموضوع يبيلة عزيمة قوية جدا ليش؟لان الشخص الي يدخن مايقدر يهجر المجالس الي متعود يقعد فيها واكيد هالمجالس فيها ناس مدخنين فهالشي صعب علية,,,,,,تبي تقولون لا يجي لهالمجالس اقول خلكم واقعيين ياخلق؟تبون الرجال يهجر ويغير كل ربعة ويمكن اخوانة علشانة يبي يترك الدخان,,,,,,,,,,عشان كذا اقولكم ان الموضوع صعب

4-مهب معنات كلامي هذا ان ترك التدخين شي مستحيل بالعكس هو شي سهل لمن سهلة اللة علية وياما ناس تركو التدخين بقرار مفاجي مع انهم مداخن عتيقة بالحيل

5-والطامة الكبري يقولون ان واللة ماشفت ان بعض البنات السنفاسون طايحات بالدخان عاد هذا الي عيب وشق جيب وماينبلع بالمرة هههه


تحياتي لك بقايا نزف علي هالموضوع الجميل واللة يوفق الجميع

[بقايا نزف]

هلا اخوي الخبي

بغض النظر لو انك مدخن او لا

لكن اكيد عايشة مع من ياعنون من هذه المشكله

صح يمكن موضوع ترك التدخين مو بالسهوله اللي نتصورها لأنه اعتقد

شي متعود عليه سنين طوال ماراح يتركه بدقيقه ولا يوم

مو يوم وبس لان وحده من صديقاتي تقول ان ابوها عزم على ترك التدخين

لكن ماستمر الا21يوم ورجع

اه بس

لو نقدر نساعدهم والله ماراح نتأخر لحظه وحده

االله يكون بعونهم ويقدرنا على مساعدتهم

تحياتي
بقايانزف

[الخبي]

اختي بقايا نزف اللهم امين

حنا ملنا الا اننا ننصحهم وندعو ان اللة يعصمهم من هالبلاء

[فهد]

هلا مشكور علي هذا الموضوع كم وكم مره نصحنا اللي يدخنون لاتدخنون حنا نحب مصلحتكم ماحد يسمع وانا اطلب من كل بنت انها ماتتزوج رجل يدخن وعلي فكره لو هو رجل مادخن بس هو ........
وشكرا
اخوك في الاسلام فهد

[بقايا نزف]

مشكور اخوي الخبي

هلا اخوي فهد..

شوف كلنا والله نتمنى انه تكون حياتنا خاليه من اي شي يكدر عليها

وش له الانسان غير صحته

مشكلتنا انه كل مازددنا حضارة نزيد هبل

يعني مهما كان رجال واعتقد انكم يالرجال تكرهون احد يقولكم مانتم

رجال:rolleyes: :rolleyes:

يعني اذا خليناهم على هواهم اكيد راح تكبر المشكله


وانت تقول ياما نصحناهم لكن مافي فايده

معك حق لانه الله يهدي من يشاء برحمته

--------------------------------------------

وحده من البنات راحت تحج


وكان برمي الجمرات ضغط شديد وزحمه

وتقول شفت ولدين يدخنون سيقاره ورى سيقارة

جا واحد قالهم الله يصلحكم لاتدخنون


يوم راح اشعلوا السيقارة من جديد وبدا شفط فظييع:eek:

جت حرمه جزاها الله خير وجدعت عليهم بنادول

وماتدري وش صار بعدها

------------------------

اعتقد انه شربهم للسقاير انهم يعتقدون انه راح يقضون على حاله التوتر

اللي هم فيها او حاله الغضب

اييييييه الله يقدرنا على فعل الخير


اختكم
بقايانزف

[الخبي]

اخوي فهد مااتصور ان الواحد اذا صار يدخن ان هالشيء يدل علي انة .................................وانة مهب رجال وكان الاجدر بك ياخي الفاضل ان تقول اللهم عافهم ولا تبلانا ولا انا غلطان

واذا اتفقنا كلنا ان الدخان حرام وحنا قاعدين نذم الدخان والمدخنين هنا لا لان الدخان سي بحد ذاتة ولكن بسبب انة محرم شرعا فاذا كنت تقول مهوب رجال عشانة يرتكب محرم فانت حكمت علي كل الرجال بانهم .................حتي ولو كانو مايدخنون لانهم كلهم عندهم معاصي الا مارحم ربي فالاجدر ياخي الفاضل انك بدال منت تحكم علي شخص يمكن يكون من ارجل خلق اللة واحسنهم خلقا تحكم علية انة مهب رجال عشان الدخان لانة يدخن يعني وتحكم علي واحد تافة خلقة زي وجهه ولا يخاف اللة تحكم علية انة رجال عشانة مايدخن فهذا مهب مقياس ابد

ارجو انك تكون فهمت كلامي زين الواحد وانا اخوك يجب انة يوزن كلامة وخاصة اذا كان يبتغي وجة اللة بة مع تحياتي وتقديري لك وللاخوان كلهم

[سكر وملح !!]

السلام ,,,,,,,,,,
انا حقيقة ما ادري البنات يبون رجال مايدخن بس ؟؟!!!!!!!!!!
تبون رجال يدخن والا يتعامل بالربا ؟؟؟؟؟؟
تبون رجال يدخن ولا رجال كذاب دجال ؟؟؟؟؟؟؟
تبون رجال يدخن والا رجال نمام ؟؟؟؟؟؟؟؟
تبون رجال يدخن والا رجال منافق (ماكثرهم) ؟؟؟؟؟؟؟
تبون رجال يدخن والا .........
تبون رجال يدخن والا ........
المعاصي كثيرة وكل معصيه اخف من الاعظم منها .
انا حقيقه غير مقتنع بالموضوع اذا كان هدفه توجيه البنات الى عدم الزواج من المدخنين لأن النتائج سوف تكون كارثه وتعلمون مااقصد .
اما اذا كان الهدف من هالموضوع حث الشباب والشابات على ترك التدخين فانا معك يابقايا نزف ميه بالميه .
تحياتي لك ..

شوقر وملح !!

[بقايا نزف]

يعطيك العافيه اخوي الخبي

سكروملح

كلامك صحيح وثق انه الهدف من الموضوع هو الراي الثاني اللي طرحته

وكلامك صح انت واخوي الخبي

يمكن اللي يدخن احسن وافضل اخلاق وتعامل من غيره بالمقابل

مانقص من شأن اللي مايدخنون ونقول انهم سيئين

بالعكس نسب متفاوته

لانه ماحد كامل الا وجهه سبحانه

وكلنا ذوي اخطاء وعيوب

لكن الاصلح منا انه يعرف عيوبه ويرتقي بها للافضل

تحياتي لكم
اختكم


بقايا نزف