اقتراحاتكم حول الدوار الزراعي

[the lion]

بسم الله الرحمن الرحيم، اما بعد:

شباب اليوم ودي تشاركوني بموضوع الدوار الزراعي لاني كل مامريت من عنده اشوف حادث او شبه حادث وش تقترحون انه يصير لعلى وعسى ان يأخذ باقتراحاتكم ومن جهتي لااقترح شي لاني صراحة عمري ماشفت دوار يحتوي على ست طرق يعني خمسة معقولة شوي ولكن ستة طرق هذي اللي ماهي معقولة ولهذا اردت ان تقترحون حل.
وشكرا لكم

[القصيمي]

الحــل برأيي إقامة جسـر(كوبري) يربط طريق الملك عبدالعزيز ((شارع الخبيب سابقاً))من جهة الجنوب بطريق الملك عبدالعزيز من جهة الشمال((طريق المدينة سابقاً)) وبهذا يكون حل جذري لكثير من المشاكل التي يعانيها هذا الدوار .

[the lion]

القصيمي هذا اقتراحي زمان بس الحين مافي امل اقترح الاقتراحات لان الجسور صارت مقتصرة على مدن محددة للاسف.
وشكرا لكم

[البارق]

هلا ابو فارس
ماشاءالله عليك
كل يوم تأتي بموضوع رائع
وموضوعك اليوم دوار الزراعي مافيه احد
مايشتكي من خطورته 00 وفي نظري مافيه حل
إلا مثل ماقال اخي القصيمي جسر يربط بين شمال
وجنوب طريق الملك عبدالعزيز وإن شاءالله يأتي
اليوم الذي نرى فيه حل هذه المشكلة التي أقلقت
كل من يتردد مع هذ الدوار 0

من الأعماق اشكرك ابو فارس على مشاركاتك الجميلة
ولك مني التحية والتقديــــــر000

[التاج]

أخي أبو فارس



كالعادة موضوعات مهمة




أتقف مع أخويّ القصيمي والبارق



فيما ذهبا إليه من حل




فإقامة جسر هو الحل




تحياتي لك

التاج

[المستطرف]

تحياتي للجميع....

أما أنا أقترح بعدم السماح للبدو والأجانب بالمرور من هذا الدوار لأنهم يخطمون ولا يراعون افضلية المرور لمن.... مجرد رأي فقط.

قابل للصواب والخطأ........... وشكراً،،،

[مُشرق]

أقول لو تبتل تقترح ماعطوك وجه


ولو تشتكي من اليوم إلى بكرة ماعطوك وجه


وش تفعل ‍‍!

[المستطرف]

أخــــــوي : الحـــــــــــــذر ، تحيه طيبه...

أنا من شفت الهمزه واضعها أنت تحت حرف الذال في أسمك دريت أنك ماعندك

سالفه ياغالي أمه.......

أو هذي الحروف العربيه الجديده ... ولكني أتوقع أنها عربيه ممزوجه بالاردو.....

..... واذا أشتكيت ما أحد ردلي أقول ..( حسبي الله ونعم الوكيل ))...

[مُشرق]

إلى

المستطرف



أول شي فتح أعيونك
شكلك توك قايم!!!!

المهم

أن الذي تحت الذال كسرتين

-----------------

ولو عندك سالفة , (في الحاسب ماتقدر تكتب ذال تحتة همزة) !!!!


______________

وليس مقياس الشخص بالأسم , فالأسماء هي لتفرق بين هذا وذاك


وإنما المقياس بالمشاركات الهادفة التي لاتتعرض للآخرين ولا تسبب الجدال

الغير مفيد . فليس عيب أن ترسل رسالة خاصة وتوضح الخلل


أخوك


الحذِر

[الكشميري]

السلام وعليكم ورحمة الله وبركاته

اقتراح طيب اخوي ابو فارس


لكن انا اتفق مع الاخوان انه محد راح يسمعلك وذا اسمعولك
فبشر بان شاء الله بالجسر بعد 50 سنه اذا هم استعجلوا بالموضوع


عشان كذا اوقل مالك الا اذا جيت تاخذ الدوار تقول:

غمض عيونك وقل بسم الله,لاحول ولا قوة الا بالله,اللهم الشكوى لله,لن يصيبنا الا ماكتب الله لنا,انا لله وإليه راجعون.

وذا عديت بسلامه ونجوت بأذن الله تكفى عطني خبر
بالجهاز الكشميري ــــ 150150



تحياتي لكم.

[رمال بريدة]

هذا هوالحل
http://forum.buraydh.com/showthread.php?s=&threadid=17934

[رمال بريدة]

وهذا بحث للموضوع سابق ولكن لاحياة لمن تنادي .
فالبلدية وإدارة المرور تعودوا على تخفيض رؤوسهم للتدقيق في كتابة مقادير الغرامات فهم لايعرفوا كيف يصمموا الدوارات وقد سبق أن كتب في الجرائد والمنتدى أكثر من مرة
وهذه واحدة منها
http://forum.buraydh.com/showthread.php?s=&threadid=10042

[the lion]

اشوفكم كلكم ياشباب متشائمين وانا اولكم بس حنا هنا نكتب مافي صدورنا والباقي على الله لانه فعلا هذا الدوار راحت بسببه ارواح كثيرة خصوصا انه في الصبح مزدحم لوجود مجمع الامير سلطان فالطلاب والمدرسين وغيرهم.
وشكرا لكم

[أبو حكيم]

أبو فارس موضوعك منتاز وأتوقع أن يحققون رغبتك بأسرع وقت بس .......... ردد ياليل مطولك .... ههههههه


القصيمي أنت قمة ولكن المحافظة عليها شيء صعب ....تمسك لاتطيح
تستاهل 1262 مشاركة والله سلفني بعضها علشان أصير بروفيسور مثلك ههههه

البارق ..... التاج ماأوسع صدوركم علينا أحسن مشرفين ولاأحلى وتحياتي ؛؛؛؛؛؛؛؛؛ عندي وردتين وحده للبارق والثانية للتاج 0


المستطرف والله من الشين 29 مشاركة وبس قريت أكثرهن ولقيت حتسي لك عليه ......... وحاط حيلة بالحذر مادري ان الحذر أستاذ مساعد وهو توه عضو معيد .. وخاش في عين الرجال وماسكه غلط وده بس يدري وش سالفة الشخطتين اللي تحت الذال .........ههههههه ....... الشوف شجر يالله حسن الخاتمة0
أشوف المدينه اللي ساكن فيها مابوش!!!!!! أنت ساكن في خيمة؟

قاعد اقرأ الموضوع اللي كاتبه أبو فارس .......... وفجأة 180درجة يغير الموضوع المستطرف!!!!!!
سؤال شخصي للمستطرف؟؟؟؟؟؟؟؟؟؟؟؟؟؟؟؟؟؟
وشلون مستطرف يعني أنت بطرف الفرشة ؟
أو ثقيل دم ..... وودك تصير طريف ؟ على فكرأعرف واحد بالرياض الجنسية تركي وأسمه طريف ...... ماله دخل

الكشميري ........... الناس طاحت بالأنتر نت وهو إلى الحين أطلع خمس وعشرين ....... لا وكاتب 150150 الله يخلف علينا
مازال في براثن الكنود ......... أدعوله

معليش يا الكشميري أعرفك شخصيا" والله انك تنحط على الجرح ويبرا بس مجرد مداعبة من الوزن الثقيل باي باي

زميلكم ومحبكم تالي آدمي بس لاتزعلون مع الأيام تعودون على مزحي ههههههه


أتحداكم تردون ......

طبعا" مشاركاتي قليلة وذلك لأني أمتثل ( خير الكلام ماقل ودل ) بلمشاركات طبعا"

[the lion]

هههههههههههههههههه وش السالفة يااخوي تالي آدمي طايح بالعام سب وتقول خير الكلام ماقل ودل الله يقطع بليسك

[المستطرف]

أخوي الحذر كيف الحـــــــــــــــال

أنت الحقيقه كنت ناوي تداويها ولكنك أعميتها...........

أو مثل مايقول المثل العامي ((( مابه شق بس تخر )))

يا أخي وهل يمكن أن يكون كسرتين تحت الذال ....في الاسم وسط (( الحـــــــــذر )) نترك الحكم الى أصحاب اللغه العربيه.....


آه ثم آه ثم آه لوكان سيبويه حيا لارأيت العقاب الشديد الذي قد يصل الى القتــــــــــــــــــــــــــــــــــــل ؟؟؟؟



بعدين تقول الاسم للتفرقه بين هذا وذاك يالفاهم.... البعره تدل على البعير.... والأثر يدل على المسير.... وشكراً...

****

.............. تالى أنســـــــــــــان هلا ومرحبا بك



بس هناك سؤال هل هذه خفت دم أو خفت عقل ؟؟؟

*** أسئل الله العظيم رب العرش الكريم أن يشفيك ويرد لك عقلك....

والحقيقه من قرأتي للموضوع أكتشفت أنها خفت عقل أسئل الله العافيه مما أبتليت به.........
............................................تحــــ ــــــــــياتي

[القلم الجاد]

حتى موضوع أقامة جسر أو حل لمشكلة تقاطع أو دوار

لا نقدر على حلها (((( بدون الخروج عن الموضوع )))

و أختراع الدعابات والأستهبال ,,,


متى نتعامل مع مطالبنا بجدية ..........


هل وصلنا الى مرحلة اليأس ... مثل رد أخونا أعلاة ....

ليش كذا ياجماعة الخير ... ليش ؟؟؟

[أبو حكيم]

abu_faris
هلا والله أنت كلامك عسل ............ وراه ماتصير أبو عسل
بدل أبو فارس تراي أعرف واحد يقالله أبو فارس مات

تدري وراه





حادث الله ينجينا واياك من الحودث



قل آآآآآآآآآآآآآآآآآآآآآآآآآآآآآآمين






أبناديك من اليوم ورايح أبو عسل ............تسمحلي؟

[the lion]

هههههههههههههههههههه خذ راحتك اخ تالي بس صراحة كبرت راسي الحين اصدق اني عسل وبعدين لاتخوفن همن اغير اسم ولدي تراي يالله يالله لقيت اسم لولدي القادم انشالله وشكرا لك

[أبو حكيم]

للمستطرف .......... ياحبيلك وراك زعلت

ماتبي أحد ينتقدك ......... ماأقول لك شي عقب ذي

على فكرة أكتشفت أنك تنهز ....... ويبين عليك


بعدين وراك تغلط علي شخصيا" بقولك

( بس هناك سؤال هل هذه خفت دم أو خفت عقل ؟؟؟)

يعني سؤالك وجيه .............. بس يوم جيت أجاوب وإذا بك تجاوب بدالي
أول مرة أشوف واحد يسأل سؤال ويجاوب على سؤاله

بقولك

(*** أسئل الله العظيم رب العرش الكريم أن يشفيك ويرد لك عقلك....)

إتهام باطل .......... بس لو تركت لي فرصة أجاوب !!!!!!!!!!!



بعدين لاتحمق ....... أحس إن الكيبورد راح وطي من قوة الرعص!!!!!!!!

بعدين مالها داعي تتهمنا شخصيا" بالجنون ...... رد على موضوعي ......... موضوعيا" وليس شخصيا" 0



(((((((( رسالة الى القلم الجاد))))))))

لك أسلوبك ............. ولنا أسلوبنا .......

أنا شخصيا" أحترم أسلوبك ولا أدعوك لأسلوب غيره

لأني أحترم كتاباتك ............

أنت متحمس أكثر وأنا أكثر

قد تقدر فيني ماتريد ولكن أخي تأكد انني متابع ومطالب

وإذهب الى موضوعي ( ردد ياليل مطولك .... مدخل بريدة الجنوبي)

ولك فائق تحــــــــــــياتي


يالله أبتسم وخل عنك ال.....................


محبك تالي آدمي

[ابو جخر]

صراحة انا اول مشاركة لي في هذا المنتدى ومما شدني للتسجيل هذا الموضوع دوار الزراعي لاني اعاني منه كثيرا وشكرا اخوي ابو فارس على الطرح اما بالنسبة لاقتراحي فانا اقترح مثل ماقالوا الاخوان وهو نفق او جسر بشرط ان يردم الشارع الذي بعد طريق الملك عبدالعزيز الذي هو متفرع من حي الصفراء حق المشاغل والا وش رايكم ياشباب لانه سوف يعطي نتيجة باذن الله

[المستطرف]

أخــــــــــي تالي آدمـــــــــي تحيه من اعماق قلبي

الحقيقه أنك أحرجتني بهذا الاسلوب المرح .... وربما أني يوم أرد عليك وأنا لم أفطر ومثلك عارف أن الواحد اذا كان جوعان تصير النفس على كيفكفك يعني دمار x دمار......

وأكرر أسفي لك وللأخـــــــــوان الذين أنا غلطت عليهم....


آســـــــــــــــف.... آســــــــــــف ..... آســـــــــف..



آمــــــــــــل من الجميع قبول اسفي وعدم المؤاخذه ،،،

أخوكم// المستطرف..

[التاج]

تحية طيبة للجميع




وتحية خاصة للإخوان :




المستظرف



تالي آدمي



الحذر



وإن كنت خرجت عن الموضوع إلا إنني أتيت لأثبت أننا إخوة





قد نختلف كثيراً ولكننا نجتمع تحت لواء حب مدينتنا الغالية بريدة




فدعونا نجتمع لإبراز مدينتنا ولاكتشاف جمالها




أما جمالنا نحن فهو قائم على الاحترام المتبادل




وأظننا حققنا الكثير منه ولا نحتاج لمن يذكرنا بذلك





شاكر ومقدّر سعّيك الحثيث لحل المشاكل





ولا نستغني عن مشاركاتكم وأطروحاتكم النيرة




أخوكم



التاج

[the lion]

شباب هذا موضوع مهم بالنسبة لنا فارجوكم بدل التلفظ بالكلمات وتوجيهها من واحد الى واحد شاركوا لكي كل واحد يستفيد من الاخر والمحصلة الفائدة للجميع وشكرا لك اخ ابو جخر على الاطراء ولو ان اسمك غريب يعني واذا ماعليك امر ولا فيه ازعاج تقولي ليش ابوجخر وشكرا لك

[ابو جخر]

صراخة ياابو فارس قصة تسميتي طويلة اخاف اذكرها يزعلون الاعضاء ولهذا افضل عدم ذكرها

[مُشرق]

المستطرف / السلام عليكم ورحمة الله وبركاته .

كل أبن أدم يقع في الخطأ , وأن المسلم يفرح بإخوانه إذا قال خيراً مدحوه
وإذا قال سوء أصلحوا له الخطأ بالتي هي أحس .

فيا أخي المستطرف / جزاك الله خيراً على هذا التنبيه القوي ......
فمع ذلك قبلته . فأقول سوء الأدب والألفاظ لا تأتي بخير .

أن شغل بعيوبك عن عيوب الناس فإذا وجدت خطأ أو زلة تريد إصلاحها فأرسل رسالة خاصة تبين له الخطأ . أو أنك تريد فقط لتبين لناس أنك قوي الاستهزاء والسخرية من الآخرين . وإذا لم تستح فصنع كما شئت .

فأنا معترف بالخطأ , والحمد لله أصلحت الخطأ .

والشخص إذا لم يفيده الكلام الحسن .





تتركه ينعق كما شاء!!!!!!

[خزامى نجـد]

السلام عليكم جميعا ....

في الحقيقه كل زوار مدينه بريده ..يستغربون كثرة الدوارات فيها

فهل وجود هذه الدوارات يخدم ديناميكية السير ....أم أنه يعطل المسير

أنا لم أرى بكثرة هذه الدوارات في أي مدينه من مدن المملكه " ولا حتى العاصمه "


فلماذا يا ترى ؟؟؟؟؟؟؟؟

[the lion]

انا اقولك ياخت خزامى نجد لانه بكل اختصار لايكلف شي ابدا بس يحطون بلك على شكل دائرة وصلى الله وبارك ولذلك نحن نناشد بالجسور والانفاق لكي ترتفع كفاءة الشوارع والطرقات
وشكرا لكم