حـــــراج (مباشــر)

[صوت]

الغريبة ان الداخل الى السوق أحيانا يشاهد أشياء أكثر غرابة
كيف غريبة وأكثر غرابة ..؟؟

بعضهم الحين يتوقع او يفكر ان الغرابة أنثى الغراب ( الطير الأخضر المتوحش ) الذي يعيش في قمم البحار ...!
لا.. هناك فرق بينهما .. الغرابة بفتح الغاء أو الغين لا نبلش بالنحويين هي كل غريب يتداول في سوق الاسهم..!
الغرابه بضم الغاء/ين هي اللي انتم تعرفون ..!

المهم

دخلت السوق مرة ( الجردة ) السوق الذي لم اجد لأسمه معنى يبرد الكبد ..
الا محاولة التجريد من المال اللي معك بأي طريقة بعد العوده الى مصدر جرد .. حتى لو بالحلف ( ومطع ) الايمان بالصدق ..!

كان احدهم يجلس معه كيس ( بالعربي خيشة ) فيه شي يتحرك كل جزء من الثانيتين شوي أثار استغراب الجميع ..!

قال احدهم للبيع قال صاحبه نعم للبيع سم بكسر السين ..
لقطه( يعني لشه ) منه احد من يحملون حرف د/ ( اختصار دلال ) بتشديد اللام الاولى بمجرد ان قال سم..!
وبدأ يحرج عليه وهو جالس يتكلم مع الاول وصل السوم 175 ريال ..!!
زاد الى 290 في ظرف دقيقة ..
تجاوزها الى 350 في ثانيتين

ثم الى 724 في اقل من جزء من المانوميتر ( جهاز قياس الاشعاع )

ارتفع السعر الى 1003 ريال قبل يحلف ال د/ انه شغال ..!

تجمهر كل ال د/ اللي في السوق وعددهم 29 ونص عنده وهم يقولون ( محضور والا والله ما يجيب 20 )

كان هناك ...

قريبا اخبركم بالبقية فأنا اتابع مباشرة الآن ...

[شهــــــــــــــــــد]

رآح بآلي لشئ يوكل // أسولب مشوق // لاتبطي علينا http://www.5foq.com/vb/smail/sm/grins.gif

[شاها]

وشوشهد مافهمت
اللحين انتي فهمتي يوم تهزين شظافك ههه

[حـــكآآيـة رجــل]

.


<< انا عندي منقطع البث... يتابع وشوشه ..
ينتظر البث يتصلح

[شهــــــــــــــــــد]

ورآه هوآره وش انتي اكله ياخلفتهم http://www.5foq.com/vb/smail/sm/grins.gif
الرجل طلع لم السوق وبه رجل يحرج على شي بخيشته وهالشئ كل ماله يرتفع سعره
والناس مجتمعه عليه وبالحلقه الثانيه بيكمل لنا وشو هو http://www.5foq.com/vb/smail/sm/grins.gif

[شهــــــــــــــــــد]

نسيت وش توقعين ضب قميريه جوز حمام ولا شئ جامد http://www.5foq.com/vb/smail/sm/grins.gif

[شاها]

مااظنه صحو عليك ههه
عاد ماخذت العلم الا من شهيده..

[شهــــــــــــــــــد]

^^
توي شآربه حليب السعوديه http://www.5foq.com/vb/smail/sm5.gif

[صوت]

اعوذ بالله ....
ماشاء الله ...
بس رحت اصلي لقيت الموضوع طاير به ( جني )
والله الفراغ والشرافه ..
لكن الحين اعلمكم وش صار .. دقيقتين بس

[شهــــــــــــــــــد]

أغديك تخليه لبعدين لاني أتحمس ولا أنآم http://www.5foq.com/vb/images/mmm/sffdsvd.gif

[مايا]

أنا أتوقع أنه جراد
والله أعلم

[صوت]

كان هناك ... ( البقيه )

ممن يحملون حرف د/ من موظفي البللليه بعيد شوي ( يجي له 10 سم اس 0 ) نط ( يعني نبط )
او طمر بلغة اهل الحريق ( محافظة قريبة وليست نار ) او بالفصحى ( فز ونز) بين الدالات والحضور
في ظرف لمحة ( يعني لمحة اقل من رمشه عين او سين او واو ) إلا وهو فوق ( الخيشه )

قال لي ب 1004 صافي (يعني بدون انتل او اريال او تايد للتشويش )
الغريبة وليست الغرابه ان واحد د/ يزيد وهو تحت الشجره البعيده ( بس يشر بيده ) وراسه..!

ود/ الدلال يزيد على هذا وكان فيه واحد ثاني بس يحرك رقبته مره يمين ومره يسار( مروحه قعاديه ) ويهز وكل التفاته معها هزه ..!
ود/ دلال يزيد معه ..!!
1010 بس ( رقم مميز ) وصل السوم ..

د/ البللليه زعل وقال بنصادره ممنوع .. بيعه بدون ترخيص لأنه بدا يزيد على قدراته الماليه ..!!

بدون ترخيص ... إلا وواحد رافع عقاله الى اقصى حد ورا تحس انه بيلمس خشمه من رفعه .. يجي يمشي 220 كم / ثانيه داخل بينهم بأقصى سرعه وساكت (ومطنبس) بيشوف وشو ..!!!
بدون ترخيص ...!!!!

بدون ترخيص .. فتح عيونه ( قوه ) يعني (مرره ) انا وواحد من الحاضرين قاعدين نتفرج على الصور اللي بمخه والأرقام والخرابيط من خلال ( عيونه ) يوم فتحهن مرره بان كل شيء ..!!

تصدقون فيه زوجته بمخله ( فلم فديو قصير ) معها عصا عوج تقول والله يا الثور ان تشوف شي ماشفته قدام عيالك لا اخليهم (يتطنزون) بك ولا (هميتن) .. !! مر الصراف واسحب سحبك ابليس ..!!

مسكين شفت 173650 ريال قرض للبنك عليه والله رحمته ..!

ضحكت المسكين عنده غنم (جوعانات ) تشوفهن بمخه ( يثاغن).. هالجنس ودك ما يفتح عيونه ابد ابد ..!!
كنت بسكرهن بس خفت لا يقول قدام الناس ويصرخ (بيفقع) عيني صوت .. بعدين نروح في مطالبات وقضايا .. ومحاكم ..!!
فيه حكمه تقول لا تحسن لأحد في هذا الوقت خصوصا اللي يفتحون عيونهم قوووه ..!

المهم هو يردد بدن ترخيص ..
مسك فرامل اقوى ما عنده يوم شاف الخيشه بالوسط ( شوي ) والا يدعسها ( يدوسه) برجله اليسرى ..مع اني ما فرقت بين اليسرى واليمنى لأن نعاله كله يسر ..!
(ديور) ورجع بسرعه ..

شوي واعلمكم بالباقي ....

[صوت]

رآح بآلي لشئ يوكل // أسولب مشوق // لاتبطي علينا http://www.5foq.com/vb/smail/sm/grins.gif

وين راح بالك ..
بعدين ما ابطيت ... نزلت البقيه بس باقي شوي بعد ..
ارجع واكمل ...

[يركدون]

وش القصة ؟؟؟ بوه مترجم ؟؟

[شهــــــــــــــــــد]

للحين مصممه أنه شئ يوكل < رآح بالي الحين لشرآيح http://www.5foq.com/vb/smail/Emo_5.png
عجل علينـآ :)

[أنا لها]

ورآهـ مآتكمل يـ صووت .. ودي آدري وش اللي بالكيس ..!!

تـشـكـــرآآآتـ....

[صوت]

ديور ورجع بسرعه ..

تمتم وقال .. انا حسبته شريط فيديو كمبيوتر(يقصد دي في دي أو سي دي) ,,
الحراج وصل 1650 ريال ..!!
كان الجالس يأشر بيده ود/ يزيد ..!
وابو رقبه يهز رقبته وال د/ يزيد ..!
قال واحد :
من وين تجيب الزود ؟؟
رد الدلال (انظر الى د/ تحت الشجرة يزيد كل شوي !!
والتفت الى د/ يهز رقبته يزيد ..!
نط ( بزور الدلال ) وقال يا نصاب د/ اللي تحت الشجره ياكل فصفص مايزيد ..!!
وابو رقبه هذا هو اسمه ابو رقبه دائما تهتز ..!!
والله يا أنتم ( خباث ) يالدلالين ..يعني تلقط أي شيء .. وتقول يزيد ..!!

كان الصراع بينهما على اشده ..!
والجميع ينظرون الى الكيس ويراقبون كلهم له رغية في معرفة ماذا يحتوي ؟؟
صاحب الكيس ذهب توقف السوم بعد الصراع على 1800 ريال ..!!!
قال د/ :
وين راعيه ( صاحبه ) نبيع ..!!
بحثوا عنه لم يجدوه ..
بدأ ينادي وين راعيه ..
وين راعيه ...

لم يجدوه ... وبدأ الدلال ينادي نبيع ... نبيع ... وين راعيه .. نبيع ..!!!
كان صاحب الخيشه ينظر من بعيد ..
ثم تركهم وذهب ..
والدلال ينادي .. نبيع ... نبيع .. نبيع ...



تدرون ماذا في الكيس ( الخيشه )..؟؟؟



شوي وأعلمكم بالباقي ....

[مهندس الكلمات]

الى الان لم أفهم شيء
لذلك أعلن انسحابي من قراءة بقية القصة :)

[أنا لها]

أتووقع آن اللي في الكيس بس ((قطة)) ههههههههههههههههآأإ

بإنتظآركـ سيديـ ..!!

تـشـكـــرآآتـ....

[أنا لها]

آكمل يآ رعآكـ الله ..!!

تـشـكـــرآآتـ....:)

[صوت]

كان فيه واحد من المتابعين شاف صاحب الكيس رايح ..!
تبعه على طول حتى وصل اليه قال له:
كيسك ليش تركته وصل السوم 1800 ريال بتبيع أو لا ..!!؟؟
ضحك صاحب الكيس وقال :
تدري شفيه ؟؟

فيه بسه ( قطه ) مشغلتنا بالبيت (ونطت ) على الولد (ومخشته)
فضربتها ضرب ما تقدر تحرك بعده .. !!

وكنت جايبها ابرميها قرب احد المطاعم بالخبيب عشان ما ترجع للبيت ..!
لكن الدلالين لا يشوفونك شايل شي ..!!
لقط الكيس وبدا يحرج ..!!
ضحك وراح وخلاهم ..!

والرجال مستغرب والدلال يبحث عن صاحب الكيس الى اليوم جالس بالجرده ..!!!
واقفه على 1800 ريال ولا يدري وش فيه ..!!


القاكم في سالفه ثانيه ان شاء الله ...


سلام

[أنا لها]

ههههههههههههههههههههههههههههههههآإأي .. بس تآخرت بالتكملة ..

مآشآء الله علي .. الفطنة من الله كآن توقعي .. :)





تـشـكـــرآآتـ....:)

[قـتـالـه]

صوت
اول مره ادخل هالموضوع
ولي شوين اراقب الحبكه والجمل الجانبيه اللي مستحيل
يفهمها الا مخضرم اجتماعي ..,
تدري من ذكرتني فيه ؟
الكاتب سعد الدوسري في بداياته
كان له عمود بمجلة اليمامه اللي احبها
وعمود بالرياض
قبل يقرر ان يكون باحث اجتماعي ومهتم بقضايا الناس ..
ياحسافته كان اديب نجدي رائع
بوقته ماكان فيه احد يقدر يمزج اللكنات الشعبيه
بالفصحى بقالب كوميدي ممتع الا هو ..!
وانت زيه
حافظ على نفسك بهالقالب ولاتتعبث بغيره
:)