امنيتي اصير بلبل بالانقليزي

[صرخة دمعه]

والله اني صاقس امنيتي اني اصير بلبل بالانقليزي

قولولي وشلوووووووووووووووون

ارسلولي اسماء كتب تعليميه او اشرطة فيديو

لاتقولون سافر براااااا


لاني مره قلت لامي ودي اسافر الى انجلترى عشان اتعلم قلينزي

قالت مايخالف لكن بشرط::

اروح معك
او

تلبس عباة هناك........قلت يمه وش هالهرج رجل كبر ......البس عباة

قالت ايه اخاف عليك من بنات انجلترى ينحتنك لان عيونهن حاره وتراهم كلهم شهبان.......


الصراحه الشرط صعب والخيارات اصعب.......قلت اغدين اتعلم بديرتي
ازينلي حول امي وربعي........

لكن انتم عليكم مسؤليه كبيره الحين......وهي تعليمي ماعلي منكم


تبونن ماطيع امي......اباجلس هنا وتعلمونن غصب عليكم

ولا اعلم امي.....قولوا امين الله يخليها لي لاتصيرون مثل بنات انجلترا

لان امي تقول اكاليوم به عرس بلندن وقامت حدى البنات ترقص
وشعرها كثير واصل لظهره........

يوم رجعوا البيت اهله بدت تصيح صابته عين ماصلت على النبي

ولاذكرت الله ..........


انا انشالله اباتعلم الانقليزي عشان ادعوا الى الله

واثبت هويتي الاسلاميه امام العالم بشكلها الصحيح


لان الوقت هذا لازم تعلم هاللغه عشان توصل رسالتك


وكذلك لي سبب اخر لتعلمها وهو رغبتي بقراءة الكتب الادبيه الانقليزيه

لان ميولي ادبيه

ودي بعد اكتب شعر باللغه الانقليزيه

لاتضحكون وشدراكم .....يجي يوم وتعرفون منهو انا




فيه مشكله كبيره ودي تشلركوني الراي فيها وهي

المناهج اللي بالدراس العامه المتوسطه والثانويه

والله ماستفدنا منها اي شيء

تصدقون في مره من المرات جاني سؤال بالاختبار يقوووول

وات زور نيم؟وش اسمك

كتبت ييس .نعم
ماله دخل ابد بالموضوع هههههههه

ينبغي ان نعيد كتابة هالمناهج وطريقة التدريس طريقه ساذجه وقديمه


شوفوا بزارين لبنان يرطونون قلينزي وفرنسي

طولت عليكم بااااااااااااااي وشرايكم بلبل

[الدمـــــع]

اي واحد يقول كلمة انجليزية قل مثلة :for6:


اسف دمي خفيف
ابصراحة ممكن فيه عدة امور اول من اهم الوسائل لكي تكون قد تتعلم تلك الغلة انك تحبها يعني يعني راكبة في مخك انك تبي تتعلم .......... يعني ايكون عندك اهتمام 100%
وانك على حسب معرفتي كل يوم تحاول تحفضلك كلمتين اربع يعني على حسب مقدرتك ........... ابصراحة تصدق عندي اخوي ما درس انجليزي ولا دراسة بس انه يحب هذه اللغة واصر انة يتعلمها من صغرة الحين مشالله علية بلبل على قولتك بس اهو احب هذه الغة وحب يتعلمه ابصراحة اهو في المستشفى يشتغل ممكن هذا الدافع الي خلاه يتعلمها يعني هذا الي ساعدة

ابصراحة فيه اشياء كثيرة لا زم تتعلمها انشالله يجي واحد بلبل بالانجليزي في هذا النتدى يقول كيف صار بلبل وتحياتي لك

يا صرخة دمعة:for8:

[عبير]

السلام

اهلا وسهلا بك صرخة دمعة في هذا المنتدى وان شاء الله تجد فيه ما يسرك ويعينك بعد الله على تعلم هذه اللغة

واتمنى ان يأتي اليوم اللي نشوفك به ترطن مثل البلبل

أخي.... اذا كنت فعلا عازم على تعلم لغة اخرى ضع في بالك دائما انه يجب ان يكون لديك دافع حقيقي لتعلمها وليس مجرد كلام وتريد تنفيذه بسرعة لانك سرعان ما تشعر بالملل اذا لم يكن لديك دافعا .

أخي.. ابتعد عن اليأس تماما لأن تعلم لغة أخرى لا يتحقق في يوم وليلة لذلك لا تدع صعوبتها تثنيك عن تعلمها ولا تجعل كثرة الاخطاء التي تقع فيها تقودك الى اليأس فمن لا يخطيء لا يتعلم.

عند تعلمك للغة قم بالمهارات الاربع الاساسية للغة وهي القراءة والمحادثة والاستماع والكتابة قدر ما تستطيع (وركز على الاستماع والمحادثة) وكل مهارة من هذه تحتاج الى كلام بلحاله

والفرص لتعلم اللغة كثيرة فيه كورسات ومواقع انترنت وكتب رهيبة وخاصة لكم يالشباب تقدر تتكلم مع الأجانب (هنود وفلبينين وباكستانيين وغيرهم ) بس خل عندك عزم

الله يحفظك لأمك ويحرسك من عيون بنات بريطانيا :p :p

لك تحياتي

[صرخة دمعه]

تسلم اناملك عبير لكن المشكله

مابينتيلي وش اسوي عشان اتعلم


ماحطيتي اسامي مواقع ولاكتب


جيتيي تهوشين بس ههههههههههههههههههه:for1: :for1: :for1: ;)

[السعودي]

يا من أصم أذاني من صرخة دميعاته .... كيف حالك أخــي عساك بخير ... حياك الباري أخــي ... صراحة إني اسجل حبي لك في الله ... وذلك لما تملكه من طيبة في القلب ... والدليل على ذلك أن الذي في قلبك يكون على طرف الكيبورد

ــ أخــي الحبيب ... لو بس أتعبت روحك شوي وقمت بإستعراض محتويات الروابط في منتدى بريدة ( منتدى اللغة الإنجليزية ) لوجدت الشيء الكثير والمفيد سواء للمبتدىء أو المتقدم في اللغة الإنجليزية

ــ وبعدين تعلم هــذه اللغة ليس بالهين فهي لا تحتاج قدر كبير من الذكاء بقدر ما تحتاج لواحد يكون صاحبة حافظة قوية ويسجل ويخزن كل كلمة أو مفردة إنجليزية في دماغه ....

ــ تحياتي لك أخــي ... وإن شاء الله نراك بلبل و حبارى وعصفور وكناري وببغاء إنجليزي ... وإن بغيت شبك حمامة إنجليزي

ــ أخــوك المداعب لأخيه ..... وقل آمين الله يبيض وجهك ويسود شعرك

[البكيراويه]

صرخه دمعه..تعال بس انا اعلمك..هذولا يتفلسفون عليك...اسمع بس الحكي....
انا ادرس في قسم اللغه الانجليزيه ولادخلته والله عشان اكشخ مثل مافيه غيري كثير..بس الجميع لاحظ قدرتي على اني امسك اللغه بسرعه ...وانا لسى باولى...لانه اساسا كانت خلفيتي قبل لا ادخل كبيره جدا عن اللغه..
والحين اتكلم وافهم انجليزي...
لو سالتني ايش كنت اسوي اقولك....
1) كنت اربع وعشرين ساعه عن القناة الثانيه..واتابع كل شيء مترجم او ماترجم...(اقولك شيء الحين صرت اتابع كل شيء مو مترجم والحمد لله افهم<<<تتكلم جد)...
2) فيه عند مكتبة العبيكان اشرطة مسرحيات وقصص واشعار بالانجليزي...بس انصحك فيها بعد مرحلة متقدمه...ممتازين تسمعهم بكل مكان...
3) فيه منهج بس ماادري اذا متوفر بالسعوديه او لا,,اسمه منهج (follow me)....ممتاز جدا وممتع وسهل ومرفق باشرطة فيديو تعليمية.....
4) حاول تستخدم كل كلمة تعرفها في كل مكان...ولاتستحي ..
واتكلم مع ناس يعرفون انجليزي...شيء جداااا مهم..واقرا انجليزي ..
5) لاتنسى ابدا انا لغتك لغة القرآن الكريم...




وشكرا:g1:

[محب الصحابه]

هلا ...أخوي صرخه دمعة...

تعلم أي لغة في العالم يحتاج لوقت...وجهد...ليس من السهوله أن تتقن لغة بحجم

اللغة الإنجليزيه في مدة قصيرة ...

اذا كنت تريد أن تتحدث اللغة الإنجليزية كما يتحدثها اهلها الناطقون بها...فمن

المستحسن ان تسمع لإذاعة صوت امريكا ( voice of America )

فهذا يزودك بحصيلة لغوية ومصطلحات عصرية حديثة لا توجد في الكتب...إضافة

الى النطق الصحيح للكلمات...

اما اذا كنت تريد شي يمشي الحال يمكن أن تسمع لإذاعة البرنامج الأجنبي

التابعة لإذاعة السعوديه....

الإعتماد على حاسة السمع في تلقي اللغة مع الممارسة الدائمة هو الأسلوب

الصحيح...لإكتسابها..

إحرص على إكتساب اللغة الإنجليزية بطريق بعيده عن متابعة الأفلام الأجنبية

والأغاني ...

وعقبااااااال ما نشوفك بلبل بالإنجليزي...:cool:




تحياتي وأشواقي / حبوب,,,,

[صرخة دمعه]

يسلموا هالايادي واشكركم على الردود

اما اباسمع الاذاعه فهاذي صعبه
اما شراء الكتب هاذي اصعب واما اباناظر القناة الثانيه فكثري منها

لي عشرين متابع فلم كرتون ولااستفدت شيء ماغير اوكي وسوري


دبروني بطريقه بسيطه واللي يرحم والديكم

والا اباسافر بسرررررررررررعه :for9:

[ابو هيثم]

يا حليلك ...

تبي تعلم .. ولا انتب مزينن شي ...

يعني تبي نفتح راسك ونحطبه بزر امريكي ... :) :) :)

لازم تسمع او تقرا ... اختر وحدة من الثنتين ولا خلك على يس ونو ..

شف اذا كنت جاد .. ابيك انا ترص على نفسك شهر واحد بس ..

خلنا انتعاهد انا وياك ... شهر واحد ... تدري وش نسوي ..

اسمع ..

به بجرير .. قصص مرتبة من 1 - 6 ...

1 100 كلمة ..
2 200 كلمة

3- 600 كلمة ..

المهم ..

تروح انت لم جرير ... وتشري ثلاثة قصص امهات المرحلة يالله خل اعلمك .. مرحلة تسمى level وتنطق ( ليفل ) ..

اقول تشري امهات المرحلة الاولى او الثانية ...

زين وتقرا الاولى .. 20 صفحة تقريبا ..

صح انك تبي تمل لانك منتب فاهمن شي .... بس خل المعجم ==> dictionary وتنطق ( ديكشنري ) .. اقول خل المعجم بجنبك ...

واقرا كل جملة واللي ما تفهم حط تحته خط ودوره همن اكتبه بورقة الكلمة الانجليزية و معناته .. وفيه مترجم ناطق ( ==> speacker وتنطق ( سبيكر ) ) يعني يعطيك المعنى وينطقلك الكلمة ..

خل الخص الكلام اللي فوق كله ...

تشري الكتب المرحلة الاولى 3 كتب ...

تبدا تقرا الكتاب الاول .. والصفحة الاولى منتب فاهمن شي وكل كلمة تلقاه تبي تكتبه بورقة وتكتب معناه ..

همن تبي تصير الصفحة الثانية اسهل شوي وتبي تفهم .. ونفس الحكاية اي كلمة اكتبه بورقة واكتب معناته ...

وكذا كذا لا وصلت الصفحة الاخيرة تبي تقاره وانت فاهمه ..

همن تعيد تقرا القصة كله والكلمات اللي تحته خط يبي يصير نصهن تذكر معناهن ونصهن ما تذكر معناهن واذا عدته يبي يصير عندك كلمات ما تعرفهن .. عادي ..

امسك الثانية وزين نفس الحركة .. والثالثة ونفس الحركة .. ما تخلص الثالثة الا وانت تقرا بسرعة ما تحتاج للديكشنري ( شفت انك فهمته ) كثير ... وشوي وشوي .. تبي تعلم ..

انا ما تعلمت الا كذا ..

بس مهب قصة .. كتاب فيزياء وكيمياء ... ويصير علي اختبار ..

ومجموعة الكتب اسمه مجموعة البطريق .. ( penguen >> الظاهر انه تسذا وبالعربي البطريق وتنطق بينغوين .. )

هي المسالة رهيبة .. بس تبي شوي جلد وشوي صبر .. وهذولي اللي مهب صيارات عندك .. <<< احبطتبك صح ..

اذا تبي نبدا انا وياك جميع انا شارين مجموعة هالايام ..


وهنك تقولي منب زينة ترا ابحدد موقعك واجي اسطرك .. <<< :)

[عبير]

تسلمون اخواني على هالنصائح

يالله عاد يالصرخة القرار راجع لك تبي تتعلم والا لا؟؟

اقول ابو هيثم..
محموعة القصص اللي تتكلم عنها بجرير القصيم والا عندكم بالشرقية
لاني ناوية اليوم اروح لجرير اشري كتب وأوسع صدري فترة هالامتحانات

[صرخة دمعه]

تسلم ابو هيثم وانشالله ابابيض الوجه لكن شهر تقل شوي

وتراي ابامشي على خطك لكن والله ان ماصرت بلبل ارطن

ان تعشين عشاء ماراح ولاجاء...............

وانت ياعبير خلي عنك القرايه وقت الاختبارات وشلون توسعين صدرك بشيء ماله دخل بدراسك

كانك صاقه ادرسي دروسك ازيلك الحين تسقطين نبلشبك وتقبلوا تحياتيييييي





:D

[ابو هيثم]

الاخت عبير ..

مادري والله .. بس اكيد كل فرع عندهم .. انا دخلت فرع اسواق الراشد وفرع الخبر وكلهم عندهم ..

حجمه صغير .. به رسمة بطريق فوق ...

الاخ صرخة الدمع ..

انك تصير بلبل .. توك عليه .. اول شي لازم تعرف تقرا .. وهمن تكتب املاء .. همن المرحلة الاخيرة تسمع .. وتسمع .. وبالاخير تكلم والتكلم صعب خصوصا ببريدة لانه قليل اللي يهرج انكليزي يعني ما تقدر تسوي ( practice ) وهذي تنطق براكتيس .. وتعني تطبق .. يعني ما تقدر تطبق ..

انت لا شريتهن عطن خبر ونبدا انا وياك ..

واذا بغيت اكتبهن لك صفحة صفحة . على هذا المنتدى ..
منه يستفيدون غيرنا ...

ومنه توجعك عيونك .. :) :)

ومنه عشان اضمن انك صادز مهب تلعب علي تقول قريتهن كلهن وانت تقرا الرياضية ..

شكرا ..

[صرخة دمعه]

تسلم ابو هيثم والله اني الافيو فروم هارت قايللك اعرف قلينزي شوي هههههههه

الكتب اللي قلت ان سالله اشريهن بالعطله وتراي كتبت اساميهن عشان مانسى

لانه عندي اختبارات بالجامعه.........المشكله اني بقسم لغه عربيه يعني لو يدرون بي كان قصو رقبتي........لاتعلمونهم اولاه زين

مشكلتي يااحبتي يافريند اني ماعرف اربط بين الجمل والحروف بس

والا الكلمات اعرف نص اللغه منشحط...........
والله مره من المرات اختبرن واحد من خوياي مدرس قلينزي

بالكلمات وقالي ابد مانقصك الا انك تعلم وشلون تربط بين الجمل والحروف الحروف الجر وغيرهن.........

اشكر جميع اللي وسعوا صدورهم معي لاني بلشه قولوه تراى مازعل........................

وهاذي ورده لكم ايقالي رومانسي :for12:

[ولدعنيزة]

صدز انك حقنه بس ميخالف

اسمع إذا بغيت تعلم اللغة بدون تكاليف وبمدينتك

عليك ببعض الأمور :

أولا : لازم همة تكسر الحصى .

ثانيا : تزاعل ربعك كلهم بالصيف .

ثالثا : انس شيء اسمه عروس و إلا عزا يم .

رابعا : دور لك غرفة صاده متطرفة بالبيت وهادئة .

خامسا : علم اهلك لا احد يدخل عليك وعلم أمك بهدفك لا تقول ولدي ملاطف و إلا انهبل .

سادسا : انتبه للمكيف لازم يكون زين وبارد لأنه حر عندنا يشوي العصفور .

سابعا : جب ورقه وقلم وماصه بالغرفة وكم قاموس إنجليزي عربي وإنجليزي إنجليزي .

ثامنا : سو فور مات لجهازك ولا تنزل فيه إلا برامج تعليم اللغة الإنجليزية ولا ترتبط بالانترنت ابد مهما كانت الأسباب .

فيه برنامجين زينات برأيي والبرامج كثيرة :

البرنامج الأول : English for kids وهذا برنامج مهم يعلمك اللغة الإنجليزية البسيطة ويبيله شهر تقريبا صبح وعصر .

البرنامج الثاني : برنامج كبير ومهم بصراحة ومتطور مرة اسمه Learn To Speak English وهو غالي شوي حوالي أربعة ألاف ريال عند مكتبة جرير بالعليا بس لا يهمك تحصله عند البنقاليين بحراج العليا بثلاثين ريال لأنه ثلاث سيديات .

ويوجد برامج كثيرة اذكر فيه برنامج عند البنقاليين من 20 سيدي عرضه علي ب150 ريال بس ما شريته .وراح تحصل مئات البرامج التعليمية .

بس اللي قلت لك أهمهن ويمكن يبيله شهر بعد .

الشهر الثالث اقترح عليك تلقي خطبه بنيويورك لأنك أتقنت اللغة الإنجليزية وألف مبروك .