لا يُطــــــَـــاق ...!!

[" TWIX "]

http://www.dohaup.com/up/2011-03-05/admin1305809689.jpg (http://www.dohaup.com/)

أصدقائي..
أحدهم راح فيها في حادث مروري وجه بوجه مع وايت ماء..:(
والثاني في السجن متورط بسرقة أسطوانات غاز ..:(
والثالث سلفته فلوس وزاعلني بعدها ولا عاد شفته ..:(
والرابع أنحرف وصار شبهه الكلاب ما تجالسه..:d5:
والخامس شرب بانزيم .. :c2: يحسبه توت ما شفته إلا مرة بشارع الخبيب يبيع مساويك و تتن ..:d4:
والسادس دخل سوق الأسهم وانهار عليه والآن هو في اقامة جبرية في غرفة خضراء ..:cool:
أما السابع (سفن أب) ..( والبتكس ) و ( لصقة أم أسد ) سمّه ما بدك تسميه
صديق ليس كل الأصدقاء ..:g1:
صديق تجاوز اللامعقول .. جميع البلاوي والمصايب مرت به ومازال عالق بي ..:d6:
لا يريد الإنفكاك مني كأنه أرتباط الريال بالدولار ..!!
هذا الصديق ..
فيه خصلة لو مزجت بماء البحر للوثته وأصبح كبحيرةالمسك..:a16[1]:
عندما يتكيء على أريكته ممسكا بكأس شاهي خادر وأنت امامه يصب
عليك سيلا من الأسئلة وكأنك امام قاضي أرتكبت جريمة لا تغتفر
بين كل سؤال .. سؤال
لا يجعلك تستعيد أنفاسك ..:o
يسأل عن الصغيرة ولا يترك الكبيرة ..هذه طباعه..:a4:
وعندما تسأله عن أحواله وآخر أخباره وتريد أن تغوص بخصوصياته
لا يعطيك فرصة ..:10_5_2[1]
يريد من الناس أن يكونوا امامه كتبا مفتوحة وهو للغموض أقرب
وعندما تنتهي اسئلته .. يرسل إليك كلمة لتلقف ماخلفته اسئلته :
" وش جديدك "
فهذه العبارة كالمنخل لما فات من الأسئلة .. يا سبحان الله عليك ...:29_1_8[1]
لا يريد شيئا يفوته وكأنه وصي على خلق الله
قيل :
اربعة تيبس الوجه وتذهب ماءه وبهجته :-
من ضمنها : كثرة السؤال
يعني أنتبه لا ييبس وجهك وتصير محنـّط يا سين سؤال ..:a2:
ونشوفك بكرا في متحف مصر للآثار ..:f5:
ما رأيكم بهذا الصديق .. وهل عندكم هذا المنتج الغثيث ...؟!!


:11_1_218v

[قـتـالـه]

ثكلى صاحبات ,,
قتاله الثكلى تنعي حضها كلما داهمها حديث اصحاب زمن ولو شئتم الاخدود!
بعضنا كتب عليه ان تغيب الاقدار مسمى الخل الوفي في صحيفته ..,
في عالم الانثى الصديقه هي مثل تسابيح الكهان
لاتعلم جدوى نفعها من ضررها !
وبهالديره بالذات تعودت ارتداء الحداد على من اشهق وازفر همومي بين محانيها ..

تويكس !
احب مواضيعك بس هالمره أوجعتني يامال الصلاح:(
وبالنسبه لخويك ماله مثل الدقم والتحلي بأخلاق البومه :/
يعني تدخل عليه وانت شاقص كل عضلات جسمك لين تحس
ان عصب العراقيب مشتبكات مع عصب الرقبه
ولمنه استلمك بمحضر س/ج
عطه ذيك النظره البارده ابد تسنك بومه متشلبيه لها اثله قبل صلاة الفجر !
وهو لشاف استعدادك بيقمط ويقول اللي بعدوووو:d5:

[غَسَقْ,]

مَدري كَل مَا أَقول إني عَرفت الدنيا , وبخصتها
أرجع كما ولدتني أمي .. " twix " أَبشرك أنا فقدتهم كلهم !
عليك فيه لا تخليه , وزي مايقولون عض عليه لاتخلّيه يفلت

منك ما صفا لك من أخوياك إلا هو .. بعدين إذا
تبي صديق تراي حاظر

[عذبـــــة]

بعدين إذا
تبي صديق تراي حاظر

قتلتل شوفي تويكس يبي صديق ضايقة فيه الدنيا .. كل اخوياه مسجونين هالدشير
مابقى له الا هالنتفه اللي ناشب في حلقة وماخلى شي ماسأل عنه
احجزي مقعد مع حرف لايعانقة الجفاف يمكن يزهد بهالنتفة ويرسمك مع بداية السنة الجديدة :c7:

[التنين الصيني]

والله ياهو .... نشده

ورى ما تعلق بوجهوه .... شكله يابس

.....

بس .... عساوه يفزع لبغيتوه .... !

[مريااان]

اجل هذا ختم بريده الاصلي (كاالمنخل )

[قـتـالـه]

احجزي مقعد مع حرف لايعانقة الجفاف يمكن يزهد بهالنتفة ويرسمك مع بداية السنة الجديدة :c7:

تحرينوه ؟
يااخت الرجال ماهي شينه خوتهم يالله من فضلك عديهم خويا حملة حج هه
يقولتس راعي الطرب خوة الرجال عدها شروة الذهب :)
احط اللي قلتيلي او لا << متوحشه وتحس بشي ماتدري وشو :b8:

[آنثى آستثنآئيّه]

من جد يانا ما لي خلق اللي كذا
الله يعينك عليه ...

[باسم الثغر]

وين وفاء الأصحاب ياتويكس
يعني
يوم سرق واحد منهم اسطوانة غاز تبريت منه
والثاني يوم صار شبهة برضه تركته
والمسيكين الثالث على شانه بس شرب بنزيم ، المفروض هذا بالذات تصير حوله ، إفرض إنه يوم من الأيام خلص بنزينه وأقطع ، ماهنا أحد يدبره إلا أنت
وراعي سوق الأسهم فهذا ماأنصحك تتركه إطلاقا ، أقل شي تطورق فيه من عيادة لعيادة ، وتصير حوله لايسمع شي إسمه سهم أو مؤشر
أما راعي الفلوس فهذا امسح خشيشتك إنه يبي يجي ، إلا إذا وصيت الشباب يعلمونه إنك جايك فقد ذاكرة ، خصوصا الجزء اللي يتعلق بالسلف :)

أما (البتكس) فاللوم يقع عليك
يمكنك تقعد معه ولاأنت تسولف
فهو مايعرف يسولف إلا بكم عدد اخوانك ؟ وكم راتبك ؟ ووش أكلت اليوم ؟
سولف عليه وشف هو يسألك وإلا لا

تذكرت واحد من الربع
من قوم خويك (البتكس)
إذا مل من كثر الأسئلة وبغيته يمشي
وجهت له سؤال مايجي على باله
رفيقنا يتلفت ويطلع جواله ثم ماأدري إلا هو مختفي

[عذبـــــة]

تحرينوه ؟
يااخت الرجال ماهي شينه خوتهم يالله من فضلك عديهم خويا حملة حج هه
يقولتس راعي الطرب خوة الرجال عدها شروة الذهب :)
احط اللي قلتيلي او لا << متوحشه وتحس بشي ماتدري وشو :b8:

هذاك اول خوة حملة الحج كلها براءة
الحين خوياك بحملة الحج .. اول ماترجعون تلاقينه داق عليك يخطبك مسيار
عاد انتي وضميرك توافقين وتيتمين عياله .. ولا توطين على قليبك وتعدين انهم خويا بحئ وحئيئ :c7:
احط اللي قلتيلي او لا << متوحشه وتحس بشي ماتدري وشو

لاتحطينه كان الدعوى فيها خويا حملة الحج هه

[اناامل]

والله والنشبهـ

احسن لك وله كل واحد فيكم يقول وش جديدك للثاني خخخخخخخخخخ


واخوياك الثانين الله العالم من اللي ورى توهقهم يا تويكس ؟؟؟؟؟؟

[روح لايسعهآ جسـد]

سبحان الله شوي واحس اني انا صديقك :)
كل الموصفات تنطبق علي
،
مبروك التميز مع انه ابد مو لايق عليك

[انتظرتك]

شف يابعدي
واضح أنه أول مايسألك سؤال تهل اللي عندك
علشان كذا تلاقي سؤال يردف سؤال ,,
ما رأيكم بهذا الصديق .. وهل عندكم هذا المنتج الغثيث ...؟!!


يقول ماصدقينا إلا احنا ..

عندما تصادق فئات مختلفة ومتنوعة من البشر
الصالح والطالح والصغير والكبير والرجل والمرأة
فأعرف أنك ستخرج من تلك الصداقات بفائدة كبيرة
ودروس عظيمة ...


ليس العيب فقط في مالايستهويني
بل وأنما أنا اشاركه العيب عندما لا أجيد التعامل معه ..

غثيث ثقيل دم مشفوح ملقوف ردي نفس بخيل
( البخيل مايصلح للإستراحات يبلشك بالقطيه )
كلها صفات منتشرة بين الناس ,,,

فالواجب أن تكون مؤثراً ومغيراً لمن تصادقه لا أن تكون متأثراً منه ,,


بعدين ماتلاحظ أنك كثير تشكّى ؟!
نسيت موضوعك السابق ,,

[دِيم]

.
.
.



الأصدقاء الخطأ هم إختيارنا الذي نعتقده صحيحاً ..
.................................................. .......... دِيم



.
.


اللوم عليكَ أنت فقط ..
+
ديم مريحةة صديقاتها ..
تجيهن تقول عندي سالفة أبيكن ضروري وترجهن إلى أن يجتمعن وإذا اجتمعن ..
قالت كلمتين فهمن السالفة كلها ..
أما عنهن إذا مريحيني أو لا / عادي أتحمل دامني عندهن .. على قولة تيته :
الناس ما انشقت أفواههم إلا للهرج ..
والحمدلله .. :)


.
.

[ونة خفية]

يا كافي الشر !!
الله يرحم والديك إذا تحب الناس وخايف على اهاليهم يفقدون ضناهم واحبابهم
لا تصادق احد لأن وجهك واضح وجه نكبه ونحس عليهم فالعله فيك أنت
وبخصوص خويك السابع لصقة ام اسد (جونسون ) << تناسبه اكثر
فأمثاله كثير جدا و بمجرد ماتفتح له خط بأول اجابه لايمكنك الانفكاك منه
فأحسن شيء على طول توجه له نفس السؤال وكأنك صدى صوته علشان يستوعب
فضاعه سؤاله
وهالنوعيه سبحان الله تحب تستفيد من الاخرين إلى الأخير وتنشر غسيلهم بشكل فوري
وكأنهم وكاله (واس)

[" TWIX "]

قتالــة ..
ثكلى صاحبات ,,
قتاله الثكلى تنعي حضها كلما داهمها حديث اصحاب زمن ولو شئتم الاخدود!
بعضنا كتب عليه ان تغيب الاقدار مسمى الخل الوفي في صحيفته ..,
في عالم الانثى الصديقه هي مثل تسابيح الكهان
لاتعلم جدوى نفعها من ضررها !
وبهالديره بالذات تعودت ارتداء الحداد على من اشهق وازفر همومي بين محانيها ..
كسّرتي قلبي .. وانقبض وأشوي وإلا ينفجر ..
ويقول : بووووووو ..:d9:
بصراحة ودي بمجتمع تركي وإلا فرنسي كان أصادقك وآخذ أجرك..:c7:
لكن خبرتس عارف إحنا ببلد اللهم لك الحمد (بنت .. بنت , ولد .. ولد .. زوج .. زوجة .. زنقة .. زنقة .. :c7:)
ما فيه عشيق عشيقة .. على طول جمس الهيئة ..!!
أحس إن صداقة البنات ..
مثل صداقة عيال الحارة هشة .. لو تآخذ منه فيشار قلب الدنيا
وصداقة مؤقته زواج خلاص الوجه من الوجه أبيض

تويكس !
احب مواضيعك بس هالمره أوجعتني يامال الصلاح:(
أحبك الله كما أحببتي مواضيعي ..:for12:

وبالنسبه لخويك ماله مثل الدقم والتحلي بأخلاق البومه :/
يعني تدخل عليه وانت شاقص كل عضلات جسمك لين تحس
ان عصب العراقيب مشتبكات مع عصب الرقبه
أخاف يجيني شد عضلي ..وأطيح عنده ..
وبكذا بيآخذ راحته بالأسئلة ..:29_1_16[1
ولمنه استلمك بمحضر س/ج
عطه ذيك النظره البارده ابد تسنك بومه متشلبيه لها اثله قبل صلاة الفجر !
وهو لشاف استعدادك بيقمط ويقول اللي بعدوووو
:c7:
من كلامك واضح إنك مولودة على جذع نخلة بأحد سواقي مزارع العاقول أو القصيعة ..:f6:


:for12::for12:

[احمد النجم]

وعندما تنتهي اسئلته .. يرسل إليك كلمة لتلقف ماخلفته اسئلته :
" وش جديدك !!
!! أحبااط
000000
مجتمع الاصدقاء مبطلينه من كم سنه!! ;) بعد سنوات من وجع الرس والقيل والقال!!
في مجتمع الاصدقاء جلسه الاستراحه (هــم أضافي) للهموم الاخرى!!:(

من يسأل دائما فهو يعاني من التخمه ولايوجد مايشغله!!

أكــره مايضايقني (ترديد الكلام ) من قبل بعض الفضوليين!!

تويكس / فرغت أشياء بالنفس ,, وتستاهل/:19[1]:

["غرك غلاك"]

أهلين تويكس..
الحين بالله وش وراك وإيش اللي عندك
عشان يسألك..
أتوقع ما عندك الا الدجه
وطفست الراتب اللي تاخذه آخر الشهر

إلا على فكرة نسيت أسألك
إيش جديدك..

[" TWIX "]

حروف لا تعانقة الجفاف ..

مَدري كَل مَا أَقول إني عَرفت الدنيا , وبخصتها
أرجع كما ولدتني أمي ..
أنا .. وهو أنا ..:4_1_6[1]:
اللي مابه سربوت إلا صادقته ..:p
ولا مطوع إلا خاويته ..:p
ولا مهبول إلا أستركضته ..:p
ولا عربيد إلا نادمته ..:c7:
وبالأخير اطلع من المولد بلا حمص ولا متبل ..:c7:
شف وأنا أخوك ..
الدنيا تبي واحد لها مثل القذافي بايعها ويشوف الناس ( بق )
كذا اضمن لك إنك بتعيش مرتاح البال ..;)
" twix " أَبشرك أنا فقدتهم كلهم !
عليك فيه لا تخليه , وزي مايقولون عض عليه لاتخلّيه يفلت
يعني اصدقاك أمك وخواتك ..؟!!!
لا.. لا ..
صادق بنقالي البقالة وسوداني الفوال اللي جنب بيتكم
ولا تعيش كذا مخلوع من الناس ترى الوحدة شينة وأحيانا يجيك
تكاك .. أو تطيح بالحب وربي أن تبلش كذا لأن لا بد تفضفض ولو ما تلاقي
عادي تشوف جمس هيئة وإلا مطوع مسجدكم وتمسك فيه الدائري وخذ
يا شوق وياشكاوي له وبالخير ما تدري إلا إنك بين ثلاثة من الأخوان بمقر
الهيئة .. أغد رجل وارجع لصدقاك وبلا هبال ..:c7:
منك ما صفا لك من أخوياك إلا هو .. بعدين إذا
تبي صديق تراي حاظر
بسم الله علي ..:c7:
خلاص موافق ..
بس ارسل سيرتك الذاتية وشهادة حسن سيرة وسلوك << أبوي يقول لا تصادق سرابيت ..:c7:
وتزكية من أمام المسجد ..:c7:

:11_1_218v

[جبل السكر]

مرحبتين

يقولوا (تلاته مالهومش امان الصديق والحبيب والزمان)
وانتا ماشاءالله كتاب مفتوح للي يسوى ويلي مايسوى:)
ولك من كل فئه صاحب بركه يلي الين دحين مااتغيرت وصرت تولا :11_4_125v

[" TWIX "]

عذبــة ..

قتلتل شوفي تويكس يبي صديق ضايقة فيه الدنيا .. كل اخوياه مسجونين هالدشير
مابقى له الا هالنتفه اللي ناشب في حلقة وماخلى شي ماسأل عنه
احجزي مقعد مع حرف لايعانقة الجفاف يمكن يزهد بهالنتفة ويرسمك مع بداية السنة الجديدة :c7:


وأنتي في ذا المنتدى صايره مثل أبو 77 رجل ..:c7:
بالنهار بوظيفتك .. والظهر تصلحين كليجا .. والعصر تبسطين به عند الجامع الكبير .. والمغرب خطابة ..:c7:
وبعد الأخير بمشغل نسائي .. ومن 11 بالليل لين الساعة 2 طقاقة بأحد القصور ..:c7:

خلينا منك ِ ..
يقولون إن قتلتل ..
تنتظر القذافي على أحر من الجمر يجي لـ جدة وأنها فاتحة له محل لبيع الخيام والخلاقين تبي تغريه ..:c7:
كان تمونين عليها ..
وصفي لها محل فرزة للنظارات .. شكل نظرها 2 من 6 وإلا خلي نتقاط ونشطب لها
على شان ما تتوهق مع خبل ليبيا ..:c7:

:11_1_218v

[" TWIX "]

التنين الصيني ..
والله ياهو .... نشده
أحيانا يجي ضيف للاستراحة وأروح للمطبخ اصلح شاهي لا جيت اسمعه يقول :
كم علاوك ..؟!!
يعني سؤال الراتب فاتن وأنا بالمطبخ ..:f5:
ورى ما تعلق بوجهوه .... شكله يابس
مرة نايم بالاستراحة وجيت أبشب فيه خلصت 17 دسته كباريت وهو يشخر ويبتسم
شكله يحلم إنه يسأل أحد ..:f5:
بس .... عساوه يفزع لبغيتوه ....
الحق .. حق .. حمار كده
والولد ظليمته شينة عليه طاقة أفغاني ولو تجي يمه آخر الليل مثل اول الصبح
دايم أوفر المزاج ..:c9:


:11_1_218v

[" TWIX "]

اجل هذا ختم بريده الاصلي (كاالمنخل )
هذا طبعنا .. ولكل منطقة طبع معروفة فيه بزود عن المناطق الآخرى
إحنا ماهنا حليلنا وحبوبين لكن بنا أننا ( نحب ندري )
حتى نكتة حادث الحمار اللي جاء واحد يقول : أخوي .. أخوي يوم شاف وش يشوف حمار
يقولون إنه قصيمي ..:)
والعهد على الراوي وما أكذب الرواة في هذا الوقت ..:p


:for12::for12:

[مضرب مثل]

فعلا انا بليت بلوى لايعلم بها سوى الله
بصديق في باديء الامر كان غاية في الاخلاق والرجولة والاطباع الحسنه

ومع مرور الشهور والسنين ايضا وبعدما اصبحنا من افضل الاصحاب
ظهر على حقيقته الا وهي ماتسمى بـ(اللقافه)ومشتقاتها
وصلت به(الشرافه)ان يسأل عن خصوصيات العائلة وحتى اشكال اخواتي

خلونن اكمل بالعاميه ياخي بلا عربيه فصحى بلا بطيخ


طبعا انا من طبعي اني اسكت ولا اقوله انه يضايقني
بس يوم جاب طاري اشكال خواتي انفجرت بوجهه وطلعت كل اللي بقلبي
بعدها حددت مصيري معه وتركته<<<حسيت انه مرتي هع

لكنه يوم شافني تضايقت وكل اللي حوله سوو مثلي تغير مليار درجه
وطلع افضل بكثير^__^

يسلمو تويكس فاقدينك والله

[Modern]

والله ياتويكس هالنوعية كثيرة وخصوصا بالاوساط النسائية
لكن فيه نوعية تقبل تطفلهم الزايد عن حده
بسبب اسلوبهم مقدماتهم قفشاتهم اللي تسبق السؤال عن اللي يبونه

مرة ولو انها مش صداقة مثل وضعك
كلمت اربعينية عارضة نقل كفالة خدامتها
البداية انا اسألها بكم تبين نقل الكفالة
والنهاية هي تسألني اختك للحين ماعنده الا ثلاث بنات !
ومابين السؤال والجواب ساعة كلها استجواب للعبد الفقير :(

[" TWIX "]

قتالــة..

تحرينوه ؟
يااخت الرجال ماهي شينه خوتهم يالله من فضلك عديهم خويا حملة حج هه
يقولتس راعي الطرب خوة الرجال عدها شروة الذهب
شوفي يا تحرينه ..:c7:
أنا ما أبي صداقة حج وإلا مركز صيفي وإلا قروب
أنا أبي صداقة مرجلة وفزعات ومعَنَى ومهايط وعلوم رجال
عادي يوم من الأيام اتصل عليك وأقول أنتظرك أنتِ والعجرا عند الباب فيه
كم واحد نبي نواسيهم بالأرض .. :c7:

احط اللي قلتيلي او لا << متوحشه وتحس بشي ماتدري وشو
بدينا بالحياء ..!!ق
ولي .. لا يصير بتحطين وردة وإلا قلب حب وإلا تبي تقطين الرقم
وإلا تبين تصارحينن عادي قوليها ..:o
قولى احبك .. كي .. تزيد تعاستي ....فبغير حبّك .. لا اكون ... تعيسا ...:c7:


:for12::for12:
يارب تآجرني على هالورد:for12:

[" TWIX "]

من جد يانا ما لي خلق اللي كذا
الله يعينك عليه ...
:for1:
انا الآن بصدد اتصالات مكثقفه مع العقيد معمر يرسل لي واحد
من هالمرتزقة يشوف شغله معه والآن هو بها الوقت بالذات رافض الفكرة
والسبب :
يقول إن مرتزق من المرتزقة يسوى الذهب والألماس الآن ولا عدت الأزمة
ببيعه عليك بشسع نعلتك ..:)

:for12::for12:

[جلوي العتيبي]

ياكثرهم ياتويكس

يقرب رأسه ويميله للأسفل ويبداء في رش أسئلته :( نحتاج حينها لشيء من الأوكسجين لكنه لايترك لنا فرصه فأنفاسه بين شهيق وزفير أخذت كل شي وأشغلت كل من حوله .

سلم على رفيقك وقله هنيئاً لك وقتك :(

[نبض قلب]

اذا صديق عادي خله يسأل

لكن المشكله اذا اول مره تشوفه وبمجتمع عام كالمدرسه مثلا
الله لايعيده من يوم اول يوم واول ماجلست معهن على القهوه ,, يالله ابلع ريقي من الحياء ,, لاتلوموني فكل النظرات علي وكني جايه من كوكب اخر
كبار ومشفوحات << اللهم لاشماته

والله معذوره بمجرد مارفعت الفنجال ويالله يالله اخذته من الفشيله ولاني مااعرفهن
فبدا المطر ينهمر من الاسئله ,, متزوجه ,, كم عندك عيال ,, رسميه او لا,, من وين جايه ,, وتعليقات وهمز ولمز ومن تشبه ومن ماتشبه :(
واختكم في الله ماتدري من تسمع
بغيت اصيح ذاك اليوم :)

تويكس
اعانك الله على هالصديق ,, ماتدري يمكن يجيه مثل ماجاء اللي قبله ويبيع بشارع الصناعه معجنات وبعدين تتندم تقول ليتي والله مجاوب على كل اسئلته :)

[الأعرابي]

وسع صدرك واستمتع بخلق الله وتجنب ما لا يعجبك فيهم فلربما غيرك من أصدقائك يقول عنك خصله ليست حسنه .

على فكره ما معنى الصداقة ؟ لأنني أفتقد هذا المعنى منذو الابتدائية ولا أدري ما السبب ؟ نعم لي شله اطلع معه بالاسبوع مره ولكن علاقة رسمية شوي

[الأعرابي]

أَخِـلاَّءُ الـرِّجَـالِ هُـمْ كَثِيـرٌ
وَلَكِـنْ فِـي البَـلاَءِ هُـمْ قَلِيـلُ

فَـلاَ تَغْـرُرْكَ خُلَّـةُ مَنْ تُؤَاخِـي
فَمَـا لَكَ عِنْـدَ نَـائِبَـةٍ خَلِيـلُ

وَكُـلُّ أَخٍ يَقُــولُ أَنَـا وَفِـيٌّ
وَلَكِـنْ لَيْـسَ يَفْعَـلُ مَا يَقُـولُ

سِـوَى خِلٍّ لَهُ حَسَـبٌ وَدِيـنٌ
فَذَاكَ لِمَـا يَقُـولُ هُوَ الفَعُـولُ

( حسان بن ثابت )

[هماوه حتسي]

ههههههههههه اما الي يبيع مسوايك وتتن لحاله



ياخي عادي هذه الحياة قال ابن سعيد الله يرحمه


يوم كان المال عندي وكلن لي صديق -- ويوم راح المال عني تلاشت صحبتي

[" TWIX "]

باسم الثغر ..

وين وفاء الأصحاب ياتويكس
يعني
يوم سرق واحد منهم اسطوانة غاز تبريت منه
والثاني يوم صار شبهة برضه تركته
والمسيكين الثالث على شانه بس شرب بنزيم ، المفروض هذا بالذات تصير حوله ، إفرض إنه يوم من الأيام خلص بنزينه وأقطع ، ماهنا أحد يدبره إلا أنت
وراعي سوق الأسهم فهذا ماأنصحك تتركه إطلاقا ، أقل شي تطورق فيه من عيادة لعيادة ، وتصير حوله لايسمع شي إسمه سهم أو مؤشر
أما راعي الفلوس فهذا امسح خشيشتك إنه يبي يجي ، إلا إذا وصيت الشباب يعلمونه إنك جايك فقد ذاكرة ، خصوصا الجزء اللي يتعلق بالسلف
أعتبرها غلطة ومشيها يا بعدي .
نعم قالها علي بن أبي طالب :
( لا تلمني على أخواني فهم اقداري ولمني على اصدقائي فهم اختياري )
أنا الآن بصدد فلترة الأصدقاء وتصفيةشاملة اللي يبي أصدقاء يجيني بعد كم يوم
يبي يلقى كوم أصدقاء بجنب صندوق الزبالة ..:c7:
أما (البتكس) فاللوم يقع عليك
يمكنك تقعد معه ولاأنت تسولف
فهو مايعرف يسولف إلا بكم عدد اخوانك ؟ وكم راتبك ؟ ووش أكلت اليوم ؟
سولف عليه وشف هو يسألك وإلا لا
انا مسكين صدقت اللي يقول :
" استمع لصديقك وأنصت له ولا تقاطعه وأجب عما يجول بخاطره من اسئله "
مشكلتي إني أعتقدت إن هذا صديق .. وبرضه هذي غلطة ثانية ..!!
تذكرت واحد من الربع
من قوم خويك (البتكس)
إذا مل من كثر الأسئلة وبغيته يمشي
وجهت له سؤال مايجي على باله
رفيقنا يتلفت ويطلع جواله ثم ماأدري إلا هو مختفي
قله معك سلف فلوس وبتشوفه قامز سور الاستراحة قمز ..:d3:

:11_4_101[