المساعد الشخصي الرقمي

مشاهدة النسخة كاملة : المستحيلات ثلاث: الغول.. والعنقاء.. والمسيار...!!!

مدير خبرة
05-03-11, 03:16 pm
اللي يسمع سواليف الناس.. وتعليقات الجرايد عن زواج المسيار..
يتوقع أنه أول مايلف من العاير اللي بعد شارعهم على اليمين..
بيلقى بقالة مكتوب عليها " تخفيضات.. زواج مسيار .. ببلاش.."
وإذا لف من العاير اللي ورا بيت ولد خالة جيرانهم.. بيلقى بنت واقفة
ومعها لوحة مكتوب عليها " البنات .. يبن زواج.. المسيار.." وفيه كم بينة وراها يهتفون معها..

لا...
ومن زود ضمانهم ان زواج المسيار.. شي مفروغ منه
طلعوا زواجات شبيهه..
هذا مسفار... وذاك مطيار.. والثالث وناسة.. والرابع فرند..
ويالله... كل شي ببلاش..!!!

اللي انا متاكد منه ان فيه أحد بيقرأ كلامي هنا ويتشقق من الفرح..
يوم انه يتأكد أن مافيه شي اسمه زواج مسيار.. وانها سواليف مثل سواليف ألف ليلة وليلة
يعني.. توليف بتوليف..!! وأكيد ان الحريم المتزوجات أول من يبي ينسبط بهالشي..

قبل يومين كنت مع رفيقي أبو داقش..
وحنا ندلعه أبو داقش.. لان اسمه عبدالعزيز... صح ان ابو داقش مالها علاقة بعبدالعزيز
بس اصلها كان (أبو داقز) بس حنا غيرنا ال(ز) إلى (ش)
ابو داقش خبري به قبل سنة وشوي.. يوم كان يجي معنا بالاستراحة..
وكان يومه بس يتأووه.. وماعلى لسانه إلا (أويلالالالاه... بس )
واذا قلنا وش سالفتك.. درينا انه يتحلطم على معزبته... اللي مهيتته ولا جابت خبره
لانها ماشاء الله عليه.. موجهة.. وراتبه كثر راتبه مرتين ونص..
وعشان كذا معطيته أشكل.. ولا حطت له قيمة..
وعاد هو من شي يوجسه... وانه متزوج ومو متزوج...
قرر يتزوج مسيار.. لان ظروفه على قده.... وماعنده يفتح بيت ويشيل هم مرة..
وابتدا المشوار..
قصدي رحلة البحث عن (مسيارة).. يسير عليه..

وطبعا لزمته ( أويلالالالالالاه بس...!!)
هي مفتاح طلبه للمسيار... يعني يتأوه عشان يقولون الناس وشبك..
ثم يهد عليهم معاناته... وانه يبي مسيار...
وعلى هالحال..!!!!

يقول أبو داقش...
بعد إحدى التأوهات... مسكن واحد بعد أحد الاجتماعات
وقال له.... عندي لك...!!!!
يقووووووول دورن ماتلقان... قلت له: صادق أنت..؟
واعده ذاك الرجال من بكره... وراح لمه رفيقنا... وقال له عندي لك بنت جلال
صح ان عمره 39 سنة... وعنده كم رجل وكم بنت... بس تراه بتعجبك
فكر أبو داقش... قال يعني أكبر من بأربع سنين..؟
يوم قلب التفكير ثانية.. قال : ايه صح.. أثري محروم من حنان الام... أغديه تعوضن عنه
ووافق ابو داقش....
جاك اخو البنت... قال ترا المهر 20 الف.. وحاول يكاسره ابو داقش.. وسوى له تخفيض خمسة الاف
بعد يومين.. جاء أخو البنت... قال ان مزنة.. تقول صح ان عندي عمارتين.. وعندي راتب..
بس لازم يتحمل أجار الشقة اللي بنقعد به.. مع انها بتسكنه بعمارتها..
وبعد تفكير... وبعد ماسوى له دسكاوند... قال أخوه لها شرط ثاني..
قال ابو داقش.. وشو الشرط..؟
قال انه تقول مهب سامحن خاطري يعطي زوجته الاوله ليلة وانا لا.... أبي ليلة..!!!
أومر يطلع أبو داقش جواله... ويفتح اللوحة حقته.. ويرفعه كنه يبي يكلم...
قال لاخوه... خلاص.. ارد عليك..!!

يعني عجوز.. وتبي ليلة..!!!

بس أبو داقش ما ايس هالمرة...
بس أنه خفف من تأوهاته....
وقرر أنه يروح للشيخ (...............) وهو معروف انه يزوج الناس..
وسالفته مع الشيخ... ومحاولاته الثانية.... بقولها في المرة الجاية...
عشان ما اطول على اللي يقرون السالفة..
>>> كل هذا وماطول...

انتظروا باقي قصة أبو داقش والمسيار....
| ~ ســمــو ~ |
05-03-11, 03:42 pm
هه

والله معلومه ممتازه :)

فعلا الزواجات هذي مجرد مسميات وهي غير موجوده على ارض الواقع ههه >>> تدري ليش قلت كذا ههه


/


اما ابو داقش *_*
الله يحيره ويديره على قولة جدتي ويبتل يقول اولااااااااااااااه لين يموت بعد عمر طويل :)




بانتظارك ..
الهوى ـآ الغــايب
05-03-11, 03:44 pm
ايييه وش صااار <~ منسدح ومتحمس هههههه
جلوي العتيبي
05-03-11, 04:08 pm
ياكثر اللي يقولون أويلاه بس :)
دِيم
05-03-11, 04:12 pm
.
.
أنا خفت ياخذ أم ديسكاونت ... ويتورط مسيار وخوف وشينه ..:(


/


كمّل كمّل > فرصة نعرف ألاعيبكم ..
التنين الصيني
05-03-11, 04:16 pm
اقووول .... علينا

قل لـ ابوداقش .... اللي يدور زين .... يحصل

والمسيار عالم آخر .... ما انصحه يدخل هالعالم
دِيم
05-03-11, 04:19 pm
ما انصحه يدخل هالعالم

النصيحة تجي عن تجربة ..

لايكوووون .....http://www.buraydh.com/forum/images/icons/icon10.gif
التنين الصيني
05-03-11, 04:22 pm
النصيحة تجي عن تجربة ..

لايكوووون .....http://www.buraydh.com/forum/images/icons/icon10.gif

السعيد من اتعض بـ غيرهِ .... :a16[1]:
دِيم
05-03-11, 04:24 pm
السعيد من اتعض بـ غيرهِ .... :a16[1]:

لا يكون السعيد أبو داقش وغيره أنت ... ؟ http://www.buraydh.com/forum/images/icons/icon10.gif
التنين الصيني
05-03-11, 04:28 pm
لا يكون السعيد أبو داقش وغيره أنت ... ؟ http://www.buraydh.com/forum/images/icons/icon10.gif

وااااوه .... <<< دمعت عيوني من الضحك ههههه

.....

والله انهم يرحمون .... خلاااص يصير إدمان

من وحدة لـ وحدة .... ويالله !
To Be
05-03-11, 05:28 pm
النصيحة تجي عن تجربة ..

لايكوووون .....http://www.buraydh.com/forum/images/icons/icon10.gif

ما قصرتي ديم :)


طيب اللي عندها عمارتين ام ديسكاونت وعيالين :(

إلى الحين شاغره :) ؟



بانتظارك ولا تصيف علينا :)
التنين الصيني
05-03-11, 11:33 pm
ما قصرتي ديم :)




تسذا .... تسذا

زين .... اوريك

...............

الا يوم انك تسأل هي شاغرة ولا لا... ودك تصير خبرة مثلي ؟

ولا تبي الشقة .... ؟
القلم الصريح
05-03-11, 11:39 pm
نسمع جعجعه ولا نرى طحنا
باسم الثغر
05-03-11, 11:46 pm
اللحين وشو المسيار ؟؟ :)
علمونا تكفون

(( أويلالالالالالاه بس )) :)


أي شي
كمل سالفة أبو داقش
هالرجال شكله ماينلعب عليه
بريداويهـ
05-03-11, 11:56 pm
متابعه
والتعليق بعد الـ the end

<-- لخلصت القصه بنسخه والصقه ببريدي (للاستفاده)


تحياتي
هنؤؤنه
06-03-11, 12:00 am
وش السالفه..؟
متحمسين ربعنا على زواج المسيآر
والمشكله متزوجين؟؟؟:)

والله انكم تخوفون
الحمدلله ان ماكو زواج مسيار عندنا
استريحوا بسhttp://www.buraydh.com/forum/images/icons/icon10.gif



متابعه لـ ابو داقش
والله يرحم حال زوجته المسكينه~
مدير خبرة
06-03-11, 12:18 am
هه

والله معلومه ممتازه :)

فعلا الزواجات هذي مجرد مسميات وهي غير موجوده على ارض الواقع ههه >>> تدري ليش قلت كذا ههه


/


اما ابو داقش *_*
الله يحيره ويديره على قولة جدتي ويبتل يقول اولااااااااااااااه لين يموت بعد عمر طويل :)




بانتظارك ..


حرام عليك مشرفتنا العزيزة..

الرجال من حر مايوجس يدور مسيار..

ادعي له ..

تكسبين أجره.. واجر بنيه الحلال اللي بياخذها
مدير خبرة
06-03-11, 12:19 am
ايييه وش صااار <~ منسدح ومتحمس هههههه


حياك ياهوى غايب

السالفة بالطريق...
مدير خبرة
06-03-11, 12:21 am
ياكثر اللي يقولون أويلاه بس :)


أسفرت وأنورت..

تو الموضوع ماتنور صدق

وترا أبستغل مرورك وأطلب منكم الموافقة على الطلب الذي سيقدم مني بتغيير المعرف

وعلى أويلاه..

أجل أبخلي أبو داقش يدور لك... على دربه

لان فيه ناس بعد كثارين موصينه...
مدير خبرة
06-03-11, 12:21 am
.
.
أنا خفت ياخذ أم ديسكاونت ... ويتورط مسيار وخوف وشينه ..:(


/


كمّل كمّل > فرصة نعرف ألاعيبكم ..


هلا بك ديم..

لا ابشرك... الرجال لليوم يحوووووس

ومالقى من يذمره...

والعلوم بالجاي..
مدير خبرة
06-03-11, 12:24 am
اقووول .... علينا

قل لـ ابوداقش .... اللي يدور زين .... يحصل

والمسيار عالم آخر .... ما انصحه يدخل هالعالم


النصيحة تجي عن تجربة ..

لايكوووون .....http://www.buraydh.com/forum/images/icons/icon10.gif





السعيد من اتعض بـ غيرهِ .... :a16[1]:



لا يكون السعيد أبو داقش وغيره أنت ... ؟ http://www.buraydh.com/forum/images/icons/icon10.gif





وااااوه .... <<< دمعت عيوني من الضحك ههههه

.....

والله انهم يرحمون .... خلاااص يصير إدمان

من وحدة لـ وحدة .... ويالله !


هلا بك اخوي التنين
واختي ديم...

المسكين ابو داقش
لليوم محتار ويدور..

اكسب فيه أجر ودله على الدرب...

انت تقول صارت ادمان..
الا اذا تقصد التدوير ادمان..؟
هذا شي ثاني
مدير خبرة
06-03-11, 12:26 am
ما قصرتي ديم :)


طيب اللي عندها عمارتين ام ديسكاونت وعيالين :(

إلى الحين شاغره :) ؟



بانتظارك ولا تصيف علينا :)


هلا بمشرفنا...

تبي نشوفها لك..

بس انت تبيها والا تبي العمارتين..

الجاي بالطريق
مدير خبرة
06-03-11, 12:27 am
نسمع جعجعه ولا نرى طحنا


هلا بك ياقلم صريح

اختصرت القصة ... بعبارة...

شكرا لك
مدير خبرة
06-03-11, 12:28 am
اللحين وشو المسيار ؟؟ :)
علمونا تكفون

(( أويلالالالالالاه بس )) :)


أي شي
كمل سالفة أبو داقش
هالرجال شكله ماينلعب عليه





سم السالفة بالطريق...

إما ماينلعب عليه...

تابع وبتشوف
مدير خبرة
06-03-11, 12:29 am
متابعه
والتعليق بعد الـ the end

<-- لخلصت القصه بنسخه والصقه ببريدي (للاستفاده)


تحياتي



هلا بريداوية..

تراي راعي طويلة.. وسعة صدر

والسالفة طويلة..

وتشرفين القصة اذا نقلتيها..

بس على الله يكون ابو داقش تزوج ذاك الوقت...

وتصير النهاية مثل الافلام العربية.... سعيدة
مدير خبرة
06-03-11, 12:31 am
وش السالفه..؟
متحمسين ربعنا على زواج المسيآر
والمشكله متزوجين؟؟؟:)

والله انكم تخوفون
الحمدلله ان ماكو زواج مسيار عندنا
استريحوا بسhttp://www.buraydh.com/forum/images/icons/icon10.gif



متابعه لـ ابو داقش
والله يرحم حال زوجته المسكينه~


هلا بهنؤؤنة

والله ان بعض الرجال بعذرهم...

وابشرك..

زواج المسيار... مثل بيضة الصعو

ينسمع به.. بس ماتنشاف..

مشكورة على المتابعة
مدير خبرة
06-03-11, 12:33 am
أبو داقش والشيخ عطالله..


بعض الشباب قالوا لابو داقش.. وراك ماتروح للشيخ عطالله.. ترى يقولون زوج كثارين..
أبو الشباب ما كذب خبر.. ويوم طلع من دوامه ذاك اليوم عقب الظهر.. ماجاه نوم
بس يتحقرص.. وده تجي صلاة العصر عشان يروح لم الشيخ عطا الله.. وياطوووله ذاك الظهر..!!

صلى العصر.. وأول مرة بحياته يمكن يدخل المسجد قبل الامام..
كل عمره إذا مافاتته الصلاة كاملة.. فهو لازم تفوته ركعة أو ركعتين..
ويوم دخل تسنن.. وكل ماهم يقرأ قرآن.. قال له إبليس.. اصبر ترا الامام جاء
دخل الامام.. وصلى العصر.. ومير يطلع أبو الشباب عند الباب.. ويرتز بسيارته..
ويحتري.. ويحتري.. وهو ماغير يهوجس يخاف أن المسجد له باب ثاني..
وبالأخير.. طلع الشيخ عطا الله.. ومع أنه مهب كبير بالعمر..
بس أبوداقش يحترم العلماء والمطاوعة.. وعشان كذا.. على طول تنيوط راس الشيخ عطالله..
وجغفه ذيك الجغفة.. من يدري.. يمكن تكون سبب بدخول الجنة.. خاصة إذا كانت نيته سليمة..

وشلونك ياشيخ.. وش علومك.. ومن هالكلام...
وما صدق على الله يوم سأله الشيخ : أنت وشخبارك..؟
ومير يطلع ذيك التنهيدة (إييييييييه بس ياشيخ.. خله على الله..!!)
يوم بدأ الشيخ ينشده عن علومه.. ودخلوا بموضوع الزواج..
وقاله أبو داقش أنه يبي مسيار عشان ماعنده قدرة يصرف على بيتين..
وبعد نقاش.. قال له الشيخ : أنت صامل..؟ وإلا من هالشباب اللي ماغير تطن لهم ويقولون نبي مسيار..
قال : أفا ياشيخ... إلا صامل وزود..
قال له الشيخ أجل بكره بعد صلاة العصر تمر علي.. ومالك إلا بالعلم الطيب..

أول مرة يحس أبو داقش بطوووول الوقت..
وكلشن سووواه.. لعب بلاي ستيشن مع ولده حسان.. وشاف كل برامج قناة فنون..
ومر على القنوات التلفزيونية كله... ويالله جاء بكره العصر..

يوم صلى.. وياقف للشيخ عند باب المسجد.. ويسلم على الشيخ ويحب راسه مثل أمس..
ومير يوصف له الشيخ بيت ناس أجاويد بجنوب الديرة.. قال تروح لهم.. وتراي متفق معهم
قال أبو داقش ممكن أعرف وشهي البنت..؟
قال له الشيخ: بنت عمره 24 سنة.. وأبوه متكفل يحط له سواق.. وخدامة.. وبيدفع آجار البيت بعد
قمط أبو داقش بجبينه.. وقال : بنت..؟ يعني ماتزوجت..؟
قال الشيخ : ايه بنت.. ! هذا رزق وساقه الله لك.. بسرعة قبل تروح عليك..

ومير يركب سيارته.. ويفحط ذيك الفحطة.. يخاف ياصل يلقاهم معزلين..!

وصل البيت.. فيلا فخمة.. حجر طبيعي أصفر.. أثار العز واضحة على العائلة..
فرك عيونه.. حك راسه... يخاف يصير يحلم وهو مايدري...!!
وقبل يرن الجرس.. فتح الباب .. وطلع منه سواق إندونيسي.. أنيق
قال : إنتا داقش أبو.. انتا فيه تفدل..
ومير يدخل للمجلس.. وماغير تطير بوهته وهو يشوف هالنعمة.. والثريات ..
ولفت انتباهه أن شكل الابواب غير.. بس قال يمكن هذي الموضة..!!
وقال بقرارة نفسه.. الله يرحم أيامك يامزنة.. لاعبتن علينا بكم هالريال اللي تعطيننا اياهن آخر كل شهر.. لكن الله بيرزقنا ونغتني عنك وعن قروشك..!!
قطع حبل تفكيرة صوت شي.. يحرحر .. وزي اللي يزحف.. ومير يشوف قدامه ذاك الرجال اللي ماعمره شاف أكبر منه..
أبيض وشعره ناعم... بس وزنه وزن الممثل الكويتي شعبان عباس..
ويشيل معه صينية.. فيها حلا.. وقهوة.. وشاي.. ومير يقوم أبو داقش ويسلم عليه.. وهو مايدري وش السالفة..
وشوي .. يدخل رجل عمره بهالستين.. وشعر ابيض.. وطويل.. ووزنه متوسط
ويهلي ويرحب بأبو داقش.. ويسلم عليه حب.. وطلع هالرجال أبو البنت..
وقعد يهمق عليه بسواليف.. من نمونة : حنا شارين رجال.. وماعطيناك بنتنا إلا عشان تحشمها وتصونها..
وأبو داقش كان متوتر شوي.. وخايف ياخذ راحته.. يكون فيه كاميرا والا أحد يويق مع الباب..
شوي.. قال الابو.. تفضل.. تشوف البنت..
استغرب أبو داقش ليش هو يروح.. ورا هي ماتجي..!؟ بس عشانه مؤدب.. ماقال ولا كلمة..
قام مع أبو البنت.. ودخل هو وياه المقلط.. ولفت انتباهه.. بآخر المقلط هناك..
فيه مجموعة بطانيات متكومة على بعض.. أول ماشافهن.. استغرب وقال من شوي الغرف عندهم عشان ينامون بالمقلط..!؟
بس استغرب أن أبو البنت كان متجه لم هالبطانيات.. وشوي وياقفون قدامهن..
ويجيك الابو.. ويرفع غطوة البنت..
وأثاريها ياحووول هي اللي متكومة كنها بطانيات..
وياحول وجهها صايرن كنه حبة خال بجسم فيل... ماتشوفه..
أول ما انتبه أن فيه آدمية قدامه.. فز.. وفرمل.. وبغى يقول (يمه..) بس تماسك..
قال أبو البنت : هذي دلال وأنا خالك.. والله أنها من أحب عيالي على نفسي
وأبو داقش قاعد يفكر.. وراح باله وشلوني بون يطلعونها معه..؟
فكر بعد.. قال هي الحين عنده أبوه يصرف عليه.. لكن لو جان بكره عيال مثله.. منين أبوكلهم..؟
وما انبت هالا وأبو البنت يناديه.. خلاص نمشي..؟
قال وهو يطلع للمجلس.. يالله .. مشينا
يوم وصلوا للمجلس قال له أبو البنت.. اقعد كمل قهوتك..
قال أبو داقش.. لا والله مستعجل.. وعندي كم مشوار قبل آذان المغرب..
وما عطى الابو أي فرصة يرد عليه..
وقال : في أمان الله...


وبكذا فشلت محاولة أبو داقش الثانية..
مع أنه ماعتب على ذاك المسجد من يومه.. يخاف يسأله الامام عن اللي صار..

محاولة أبو داقش القادمة..
مع هكور الدبور... وهو واحد من الشباب محترف انترنت..
قال له يوم سمعت سالفته مع البنت المتينة... سنعك علمي يا أبو داقش
وهذي بنقراها بكره إن شاء الله
جلوي العتيبي
06-03-11, 12:40 am
أسفرت وأنورت..

تو الموضوع ماتنور صدق

وترا أبستغل مرورك وأطلب منكم الموافقة على الطلب الذي سيقدم مني بتغيير المعرف










بوجودك الله يحفظك

النور نوركم

أبشر كلنا لك ماعليك إلا كتابة طلب في قسم الشكاوي والملاحظات وأبشر بسعدك .

الباقي خله على الصامت
هنؤؤنه
06-03-11, 12:43 am
المشاركة الأصلية كتبت بواسطة مدير دبرة http://www.buraydh.com/forum/tl4s-boryda/buttons/viewpost.gif (http://www.buraydh.com/forum/showthread.php?p=4563718#post4563718)


http://www.buraydh.com/forum/clear.gif

هلا بهنؤؤنة

والله ان بعض الرجال بعذرهم...

وابشرك..

زواج المسيار... مثل بيضة الصعو

ينسمع به.. بس ماتنشاف..


مشكورة على المتابعة











الله يبشرك بـ الخيرhttp://www.buraydh.com/forum/images/icons/icon10.gif
قصيمي تحت المطر
06-03-11, 12:48 am
خذ وخل وانا اخوك .. بعض العاالم يحب السووواليف الي مااااله سنععع
مدير خبرة
06-03-11, 12:53 am
بوجودك الله يحفظك

النور نوركم

أبشر كلنا لك ماعليك إلا كتابة طلب في قسم الشكاوي والملاحظات وأبشر بسعدك .

الباقي خله على الصامت


مشكوور يامديرنا المتميز

ما امداني احط الطلب

واسوي تحديث... إلا والاسم متغير

ألف شكر..

وماقصرتوا
مدير خبرة
06-03-11, 12:54 am
المشاركة الأصلية كتبت بواسطة مدير دبرة http://www.buraydh.com/forum/tl4s-boryda/buttons/viewpost.gif (http://www.buraydh.com/forum/showthread.php?p=4563718#post4563718)


http://www.buraydh.com/forum/clear.gif

هلا بهنؤؤنة

والله ان بعض الرجال بعذرهم...

وابشرك..

زواج المسيار... مثل بيضة الصعو

ينسمع به.. بس ماتنشاف..


مشكورة على المتابعة











الله يبشرك بـ الخيرhttp://www.buraydh.com/forum/images/icons/icon10.gif


عاد مهب تاخذون راحتكم..

وتسفهون الرجال... وماكن عندهم حريم

صح المسيار طلع فشنك...

بس الثانية.... تدور اللي يقول تعال :)
مدير خبرة
06-03-11, 12:56 am
خذ وخل وانا اخوك .. بعض العاالم يحب السووواليف الي مااااله سنععع


هلا بك ياخوي تحت المطر...

وفيه أحد ملزم عليك تطب هالموضوع..؟

عيونك أمانة عليك..

ولا تخليه تقرأ إلا ماتشوف أنه عز السنع..

والله يقويك وينفع بك وبمواضيعك...
| ~ ســمــو ~ |
06-03-11, 04:46 am
ههههههههههههههههههههههههه
هههههههههههههه
هههههههههههههههههههههه

ســــآآآآآآده يالله انك تجعله حول هالنوع لمين يمل هه


استغفر الله الله يشفيها اللي شافها ابو داقش صراحه مافهمت وش مرضها بس من بغى يقول يمه وانا .... لاتعليق هه


بانتظار القادم :)
العصامي
06-03-11, 08:13 am
مدير ديرة

قصّة صاحبك أبو داقش .. أو بالأصح معاناته ممتعة وشيّقة ..

زواج المسيار ليس ( كبيض الصعو ) يذكر .. ولا يشاهد ..
فلو لم يكن للصعو بيضٌ لما رأيتَ فراخها !!
ولكن زواج المسيار ظاهرة إنتشرت .. ثم اندثرت ..
وسبب اندثارها حسب المعطيات حولي ..
هي نتيجة لأمرين اثنين لا ثالث لهما ..
الأول : وعي المرأة وقناعتها بأن هذا النوع من الزواج غالباً مـايفتقد فيه روح الإنسجام ..
الثاني : وهو الأهم .. أنانية الرجل وحرصه على إشباع رغبة آحادية
مع إهمال الجوانب الأخرى التي لا تقوم العشرة الزوجية بدونها ..
مدير خبرة
06-03-11, 09:08 am
ههههههههههههههههههههههههه
هههههههههههههه
هههههههههههههههههههههه

ســــآآآآآآده يالله انك تجعله حول هالنوع لمين يمل هه


استغفر الله الله يشفيها اللي شافها ابو داقش صراحه مافهمت وش مرضها بس من بغى يقول يمه وانا .... لاتعليق هه


بانتظار القادم :)


ياحوووول يابو داقش...
هو يلقاها من حظه الردي..
والا من دعوات أمثالك..؟

والبنت اللي شافها..
ومن الكلام عن أخوها اللي يشبه شعبان حسين..
ومن كلامه عن وشلون بيشيلونها.. ووش بيوكل عياله منها..
واضح أنها ماشاء الله عليها... متينة حيل..
تقول لمريم الغضبان الله يرحمها إذا شافتها... ودي أصير رشيقة مثلك... :)

شكرا مرورك مشرفتنا المتميزة
مدير خبرة
06-03-11, 09:11 am
مدير ديرة

قصّة صاحبك أبو داقش .. أو بالأصح معاناته ممتعة وشيّقة ..

زواج المسيار ليس ( كبيض الصعو ) يذكر .. ولا يشاهد ..
فلو لم يكن للصعو بيضٌ لما رأيتَ فراخها !!
ولكن زواج المسيار ظاهرة إنتشرت .. ثم اندثرت ..
وسبب اندثارها حسب المعطيات حولي ..
هي نتيجة لأمرين اثنين لا ثالث لهما ..
الأول : وعي المرأة وقناعتها بأن هذا النوع من الزواج غالباً مـايفتقد فيه روح الإنسجام ..
الثاني : وهو الأهم .. أنانية الرجل وحرصه على إشباع رغبة آحادية
مع إهمال الجوانب الأخرى التي لا تقوم العشرة الزوجية بدونها ..


حياك ربي أخوي العصامي

وكلام جميل ومرتب...

واستنتاجاتك بأسباب اندثار زواج المسيار... منطقية..

مع أن المنطق يقول أن بعض النساء.. ستكون في ظل تسليمها بهذا الأمر
أن تبقى بدون زواج... في حال عد رضاها بزواج المسيار...

شكرا لمرورك وردك الجميل