... مـدونـتـي ... !!!!! صباحكم أو مساؤكم باااااااااااااااااااااااسم !!!!! [الأرشيف]

باسم الثغر

10-09-10, 08:18 pm

(( "" إلى أغلى إنسان ""
حاولت أسابق الناس
وأرسل لك مع خيوط الشمس ألماس
وأقول لك كل عام وأنت بخير
يامشعل الرقة والإحساس ))

والله إني ماأدري عن اللي مرسلها شكله يلعب علي :)
هذي أرشحها أفضل رسالة معايدة وصلتن بهالعيد == وليش ماتصير أحسن رسالة وهو يمدحن :)

باسم الثغر

11-09-10, 04:02 am

ياشين الخدرة مسيان العيد
وأشين منها إذا امتدت لآخر اليوم

باسم الثغر

11-09-10, 04:10 am

صباح اليوم اثنين من الشباب ولدن حريمهم
أهلهم خلوا عيدهم بالمستشفى == تخليتهم باسطين فرشاتهم وبواديهم بمواقف السيارات :)

قلت لهم
بزارين هالوقت شقاهم يبدأ من يوم ولادتهم
وراهم ماصبروا لثاني العيد ، على الأقل خلوكم تتعيدون مع الناس :)
.
.
الله يصلح لكم مارزقكم

باسم الثغر

11-09-10, 04:22 am

بآسم الثغر مشآآله عســى هالمدونه
عامره بالافراح والاعيـــآآآد
الله يتمم عليك بمنزلن مبآآركـ
وننتظر جديد سباحينك
(عاد كل يومن ابزروره لاني كم مرتن اشوفك بمدونتي)
رد الجميــل ياخوكـ

الفتاة الشقية

الله يبارك فيك
وماشاء الله عليك
دايم بالتهاني والتباريك سباقة

باسم الثغر

11-09-10, 06:42 am

أول إذا دخلت قسم المدونات
أدخل وأنا مستحي وفشل == خبركم مالي مطرح هون ، وخايف أحد يسألن وش جايبك عندنا :)

واللحين
بعد ماطلع قرض بنك التسليف ( حق المنتدى ) وطقيت هالمدونة وشطبتها ، وصار الصك بجيبي
صرت أدخل للقسم بكل ثقة ، ولو سألن أحد قلت له بيتنا قريب :)

المهم
تراي مابعد أثثت
اللي يبي يجيب معه طقم كنب أو مكتبة أو مواعين
ماعندي مانع

باسم الثغر

11-09-10, 07:36 am

هالأيام فترة تعديل للبرمجة
برمجة النوم

باسم الثغر

11-09-10, 06:42 pm

يقولون

(( اللمحة ذبحة ))

باسم الثغر

12-09-10, 05:36 am

الف الف مبروك افتتاح المدونه

تخربط به بالعافيه

حفيدة خالد

الله يبارك فيك
والله يجعل خرابيطي ممتعة

باسم الثغر

12-09-10, 05:39 am

الليلة حضرت زواجين
واحد من طرف الولد == سلمت وهجيت
والثاني من طرف البنت == مسكون ولاهجيت إلا بعد العشاء

الله يوفق كل من تزوج
ويجمع بينهم بخير
ويعينهم => بدينا بالمشاكل :)

باسم الثغر

12-09-10, 05:57 am

ودي أفطر اللحين
بس ناسي وشلون أفطر الصبح http://www.redcodevb.com/smiles/smiles/7/www.hh50.com-Smiles-Fear-Thought-0105.gif (http://www.redcodevb.com/smiles/) ؟!

خبركم شهر كامل مافيه فطور إلا المغرب

باسم الثغر

12-09-10, 07:01 pm

شكرت الواهب
وبوركت الموهوب

وتتربى بعزك بإذن الله

تباريكي لعاشق الخير
على المولودة الجديدة
وتباريكي لكل من عايده مولوده بأيام العيد

أعجبني ترحيب أخت حور فيها
الله يخليهن لك

باسم الثغر

13-09-10, 08:03 pm

لاكن
.
.

متى تتعدل ويكتبونها الناس

.
.
لكن

باسم الثغر

13-09-10, 08:10 pm

الذين يشاهدون محتوى الموضوع الآن : 1 ( الأعضاء 1 والزوار 0)
‏باسم الثغر

حياكم الله
ولو مافيه أحد يمكن يجي أحد بغيابي

أبصيد أحد مسير بالمدونة ولاقدرت
أبقعد أتحرى أي واحد يدخل وأمسكه :)

باسم الثغر

14-09-10, 06:39 pm

ياشينها إذا احترت بين أمرين
ماتدري إلى أيهم توجه

باسم الثغر

14-09-10, 06:49 pm

http://www.iraqup.com/uploads/20090518/6KiqW-30aU_354347049.jpg

سبحان الله على هالجمال
أعطان الله حب للخيول (( بس من بعيد :) ))

عموري
ممكن أضرب بوري بالخيل حقك :)

باسم الثغر

15-09-10, 06:44 am

مسكين ابن آدم

أسير جوعه
صريع شبعه

باسم الثغر

16-09-10, 04:29 am

يازين الجلسة هالأيام برى البيت
خصوصا من بعد العشاء

القط كاتمك أو شبك الشوي
واطلع
والله ماتنتبه إلا والشمس طالعة

باسم الثغر

16-09-10, 04:33 am

الذين يشاهدون محتوى الموضوع الآن : 2 ( الأعضاء 2 والزوار 0)
‏باسم الثغر , ‏سخافة شعب

ياهلا وسهلا
مايكفيك ولا مفاطيح
والسموحة منك تونا ساكنين ولاأثثنا بالكامل :)

ماقلت لكم أبلقط واحد :)

باسم الثغر

16-09-10, 04:36 am

الذين يشاهدون محتوى الموضوع الآن : 3 ( الأعضاء 3 والزوار 0)
‏باسم الثغر , ‏مسـ بشويش ـرعه , ‏قلب الأسد

ياهلا والله
كل واحد بالاسم
يقول المثل (( لاقيني ولا تعشيني ))
وهذاي ملاقيكم أحسن ملاقى :) == يبي يفتك من العشاء

باسم الثغر

16-09-10, 06:07 am

قاعدن أتمقل اثنين من بزاريننا يسولفون

وبداخلي أردد (( يازين الطفولة وبرائتها ))

وألمح بعيونهم (( ياليتنا مثلك كبارين ))

باسم الثغر

16-09-10, 05:53 pm

فيه أحد تعدل جدوله بعد رمضان
يبيلك تسهر يوم كامل ، علشان تعدل الجدول
.
.
على طاري الجدول المدرسين هالوقت إذا جت كلمة جدول جاهم تكاك :)

باسم الثغر

17-09-10, 03:17 am

ماأجمل الهدوووووء بعد الضجيج

باسم الثغر

18-09-10, 04:35 am

صبحكم الله بالخير

وش قصة الهجرة الجماعية من المنتدى

نصحيتي للي يبي ينسحبون
خلك جبل مايهزك ريح
ولايهمك فلان وعلان

باسم الثغر

18-09-10, 04:37 am

الذين يشاهدون محتوى الموضوع الآن : 2 ( الأعضاء 2 والزوار 0)
‏باسم الثغر , ‏بطلة العالم

والله وأصيدك يابطلة :)

يالله حيها
لا تشرهين على حوسة المدونة ، تراي توي جاي
حتى المكيفات مابعد شغلتها :)

باسم الثغر

18-09-10, 04:39 am

الذين يشاهدون محتوى الموضوع الآن : 5 ( الأعضاء 5 والزوار 0)
‏باسم الثغر , ‏هاايدي , ‏to be , ‏رووبي , ‏بطلة العالم

يالله حيهم كلهم
كل واحد باسمه

وراكم ماجيتوا أمس
يوم المدونة نظيفة وتلق :)

باسم الثغر

18-09-10, 04:53 am

اللحين التعاون ماجاب إلا هالهدف
علمون ، تراي ماشفت المباراة ، وقاعدن أشوف الإعادة

باسم الثغر

18-09-10, 11:45 pm

يموت الفتى من عثرة بلسانه
وليس يموت من عثرة الرجل

فعثرته من فيــه ترمي بـرأسه
وعثرته بالرجل تبرأ على مهل

باسم الثغر

18-09-10, 11:58 pm

عز الله إن الوفاء نادر وجوده
هو زين الطباع وطبع الكريمين

يفدي لخـليله نفسه وروحـه
ويكمل حياته بالمحبة واللين

باسم الثغر

19-09-10, 12:06 am

الذين يشاهدون محتوى الموضوع الآن : 2 ( الأعضاء 2 والزوار 0)
‏باسم الثغر , ‏عادل الحبيتر

يا مرحبا بك والكل بالمنتدى مسـرور
وأحلـى الليالـي زاد بحضوركم حلاهـا

نفرش درب اللي حضر ورد و زهور
و بحضوركـم يومنا وليلـتنا تباهـا

باسم الثغر

19-09-10, 03:34 am

صبحكم الله ياأهل الطيب بالخير
ويسعد ضحاكم والظهر والعشية

باسم الثغر

19-09-10, 03:38 am

هههه
اليوم ماسكة معي أنثر من هالقصيد ==> انتبهوا له لايهجوكم :)

باسم الثغر

19-09-10, 03:41 am

(( لست فقط محاسبا على ماتقول
أنت أيضا
محاسب على مالم تقل ، حين كان لابد لك أن تقوله ))

أعجبتني هالرسالة الواردة لي

باسم الثغر

19-09-10, 03:44 am

الذين يشاهدون محتوى الموضوع الآن : 2 ( الأعضاء 2 والزوار 0)
‏باسم الثغر , ‏بطلة العالم

اختاري
قصيدة مدح أو هجاء ==> الولد صدق روحه :)

باسم الثغر

19-09-10, 04:55 am

(( إذا قام لك حظك باع لك واشترى لك ))
هل هي صحيحة هالمقولة ؟

شوفوه موضوع بالمجلس ، جالسين الأعضاء يتناقشون فيه ==> كأن ماله دخل :)

باسم الثغر

19-09-10, 10:18 pm

عبود زمان

أحسن الله عزائكم فيمن فقدتم
وجبر مصابكم

لاحول ولاقوة إلا بالله
أصعب شي إنه تتسكر بيت كاملة
وإلا إن الشخص بملحة عين يفقد كل من حوله

طمنا عن حال وليد

باسم الثغر

21-09-10, 03:39 am

أشوف تصرف الصغار
وأقول
كيف البراءة تكب منهم كب

وأحيانا
أشوف منهم تصرفات ولعانة
لو توزع على كبار السن لسدت وزيادة

ماأدري هم مرآة تعكس تصرف الكبار
أو
طبيعة النفس البشرية

باسم الثغر

21-09-10, 03:48 am

الذين يشاهدون محتوى الموضوع الآن : 3 ( الأعضاء 3 والزوار 0)
‏باسم الثغر , ‏gondwana , ‏موسى العناز

حضوركم له ثقله بهالمساء أو الصباح الباسم
يالله إنك تحييهم

باسم الثغر

21-09-10, 03:52 am

اليوم
اتصل علي أحد الأصحاب ، لي فترة طويلة ماكلمته
وسبقني هو بالاتصال
يازين استذكار الذكريات
والله صايرن لكيع الولد مهب على خبري :)

باسم الثغر

22-09-10, 03:14 am

بادين أفقد بعض الأعضاء اللي لهم حضورهم
على الأقل عندي

ماأدري هو انقطاع وقتي وإلا أبدي

باسم الثغر

22-09-10, 03:16 am

اللي يتصل عليك ولاترد عليه
له حق يشره عليك ، حتى لو كان غالي
وإلا هي حياتك خاصة بك ، ولا لأحد خص

باسم الثغر

22-09-10, 03:23 am

اللحين
كل ماقابلت أحد أثره زعلان على الناس ، وكأن العالم مخطين عليه
طيب ياجماعة
إذا الكل هو الصح ، والناس مزعلينه
من اللي على خطأ ؟

باسم الثغر

22-09-10, 03:28 am

من المدونات اللي أعجبتن
مدونة أبونورة
أنا بصراحة ماحصل لي الشرف بمعرفته عن قرب ، لكن مدونته رائعة وتدوينه مميز => الكلام من قلب لاأحد يقول رشوة ولايحتاج ثنائي عليه :)

نترقب جديدك ياأبونورة

باسم الثغر

23-09-10, 05:19 am

هالمشاركات اللي انحذفن
شكلهن مثل اللي راكبين بالصندوق
يتطايحون ولا أحد داري عنهم :)

يالله ياشباب كود نرجع
نلقط المشاركات وحدة وحدة
ونركبهن معنا

باسم الثغر

23-09-10, 05:23 am

المشاركات حقاتي اللي انحذفن
غالبهن
زعلن على اللي يتعشون من المطاعم
وشرهن على الحريم اللي قليل طبخهن

باسم الثغر

24-09-10, 12:37 am

ياشين إذا قلت أو كتبت شي
وتم فهمك خطأ

ماأدري النظرة بين العالم سوداوية
أو
توصيل المعلومة يكون مهب مضبوط

باسم الثغر

24-09-10, 12:40 am

والله يالمنتدى
ماآمنك

أخاف أكتب لي شي
ثم بتالي الليل ، وبغفلة عين ينسرق من عندي :)
زي ماصار أمس

باسم الثغر

24-09-10, 01:28 am

يومي الوطني اليوم
مضى وسيمضي بعدم إشغال الوطن ، مثل بعض هالشباب اللي أشغلوه ، ماغير صياعة وهبال

الحمد لله
جالسين بشاليهنا وتونا قاضين من عشانا ، من يدين حدى الزقرت
وهذانا نشرب الشاهي ، ونتابع الاحتفالات عن طريق التلفزيون

راقين على الآخر

باسم الثغر

24-09-10, 02:14 am

لي شوي دايخ ولاأدري وش السالفة
فكرت وش أنا آكل وش أنا شارب

وبالأخير
اكتشفت إنه من البخور
قاعدين بغرفة ، وواحد من الربع يجرب علينا بخور توه شاريه :)

باسم الثغر

24-09-10, 03:58 am

أثر هالعالم مزيطينه باليوم الوطني

ياأخبار وصلت عنهم غربية
يقولون فيه تجديع حصيان
وغربلة

باسم الثغر

24-09-10, 05:24 am

متى يتوقف مسلسل (( القتال بين آدم وحواء ))

أنتم يالرجال مخطين ، ولامنكم أمان ، وآكلين حق المرأة

وأنتن يالحريم ماتعرفن ، ولافيكن خير ، ولاقدرتن على رجالكن
88
8
هالكلام هو اللي يدور بين الرجال والحريم

باسم الثغر

24-09-10, 06:38 am

بعض الأحيان يمر علي موقف
أحس إنه مر علي قبل
وإني أعيش من خلاله أحداث قد عشتها قبل أو مرت علي

سمعت إن لها دخل
بخلق الإنسان وبداية نفخ الروح فيه
وقيل
إنه أمر علمي بحت
مثل تأخر إرسال المعلومة من الجهة اليمنى للجهة اليسرى
وكلام مثل كذا :)
88
8
أوجه راسه :)

باسم الثغر

24-09-10, 06:58 am

88
8
من الدوشة حتى عبارة
(( أوجعه راسه ))
كاتبها خطأ

والتعديل يقول مافيه !!

باسم الثغر

24-09-10, 07:17 am

ياجماعة بما أنه اليوم جمعة

فلا تنسوا
صلاة الجمعة :)

ولاتنسوا
سورة الكهف
والإكثار من الصلاة على نبينا محمد صلى الله عليه وسلم

باسم الثغر

24-09-10, 07:21 am

الذين يشاهدون محتوى الموضوع الآن : 3 ( الأعضاء 2 والزوار 1)
‏باسم الثغر

من ياترى هذا المختفي ؟
شكلك داخل مع الباب الثاني ولاشفتك

يالله حيهم جميعا

باسم الثغر

26-09-10, 08:51 pm

وهكذا تعود المدونات للمنتدى
سالمة غانمة ، للمرة الثانية
بعد رحلة دامت ليوم

ماأدري وين راحت
بس الأكيد إنها رجعت

بادية تكثر طلعاتها هاليومين :)

باسم الثغر

28-09-10, 04:01 am

الشتاء بأوله توقه ، وبآخره تلقه

هالمقولة أسمعها من كبار السن
يعني في حال قدوم الشتاء
حاول تكون أكثر حذر ، ووتجنب البراد ومهب الريح ، وتزود الملابس حبتين
لأن الجسم متعود على حرارة الصيف ، والبرد يكون فيه ضرر

على عكس آخر الشتاء
فالجسم تعود على البرد ، وأخذ شوي مناعة
ولايضره بالغالب البرد لو جاه

هالكلام بمناسبة قدوم الشتاء

باسم الثغر

28-09-10, 04:10 am

ياأيها ( السهر )
لقد أتعبتني وآذيتني في ليلي

كل ماقلت صدت النوم مضبوط ، وضبطت البرنامج
جاء السهر
وسوى إقتحام لبرنامجي ، اللي ماعليه أي حماية :)

من اللي عنده مكافح لهالفيروس :)

باسم الثغر

28-09-10, 04:34 am

يغثن بعض الأشخاص الحساسين
اللي تكون درجة حساسيته على مزاجه
يعني
يخطي على الناس ماعنده أي مشكلة ، ويرى إن اللي يسويه أمر طبيعي ، والناس لازم يتحملونه ، أو يبرر فعله بأنه ماقصد هذا الشي ، وغيره

ولو يتعرض له أحد بأي خطأ
قامت الدنيا ولم تقعد
وتجب مراعاته بحكم إنه حساس

المفيد
(( عامل الناس بما تحب أن يعاملوك فيه ))

باسم الثغر

28-09-10, 04:37 am

أروح أحاول أنام
وعسى الله يجيبه
طبعا النوووووم

ماأدري أقول لكم تصبحون على خير وحنا الصبح
أو تمسون على خير

الأكيد
أشوفكم على خير

باسم الثغر

29-09-10, 03:18 am

بالهمة توصل القمة

بعض الناس ماشاء الله عليه
عنده إصرار وعزيمة ، متوجة بتحدي
إذا حط بباله شي يبي يسويه ، فهو يسوي ويوصل الإبداع فيه

أحد الزملاء ، كنا نتكلم بأحد الأيام عن أجهزة الكمبيوتر
يقول لي تصدق إني ماأعرف وشلون أشغل الكمبيوتر ،، يتوقع إن تشغليه شي كبير
حط بباله من ذاك اليوم يتعلم على أجهزة الحاسب ، وحركاتها
بعد ثلاثة أشهر أو تزيد شوي
ارسل لي ايميل
يقول شرفني زيارة موقعي الخاص بالنت ، ومعه زود منتدى
قلت له ماشاء الله عليك
أنا من فترة بالنت ولا غير تصفح فقط
وأنت حاط لك موقع ومنتدى

مهب سهل ذاك الولد

باسم الثغر

29-09-10, 03:50 am

لكل واحد منا بصمة خاصة فيه
بكل لمسة تسويها في حياتك
أو تعامل مع غيرك
حتى
بالأجواء المحيطة بالجلسة اللي أنت فيها
روحك لها بصمتها الخاصة
ويبقى أحيانا طيفها بعد رحيلك

ماتلاحظون الناس يقولون
فلان له جلسته ونكهته الخاصة

باسم الثغر

29-09-10, 03:52 am

88
8

وحتى بالطبخ
كل واحد له نفسه الخاص فيه

لو أجمع شخصين ، وأعطيهم نفس مقادير الطبخة
وأقولهم اتكلوا على الله واطبخوا

أكيد
طبخهم راح يكون فيه اختلاف
ويمكن واحد يكون طبخه أحسن من الثاني

باسم الثغر

29-09-10, 04:27 am

على طاري الطبخ

أحد الزملاء ، أعطاه الله نفس بالطبخ ولاأروع
وبالأيام الأخيرة حس بقدره
فصرنا نتطلبه تطلب علشان يطبخ

دائما أقول له
أنت ياأبوعبدالعزيز ، لو تجمع مقاديرك جميع ، وتسكر الكاتم صار طبخك مميز
صار كأنه أم لنا :)

باسم الثغر

29-09-10, 08:32 am

صباحكم رائع
برائحة القهوة الرائعة
فيكفي روعة
ويطيب لي منظر
شكل الكوب ، وبداخله قهوتي الساخنة ، ودخانها يتصاعد منها
لعلكم تتذوقونها لو وصفا
.
.
كل هذا تسوينه يالقهوة ، على هالصبح :)

باسم الثغر

01-10-10, 10:23 pm

يعجبني الشخص المتفائل

تصيبه مصيبة وينتظر بعدها الخير
يهون كل مصيبة تقع عليه
يرمي كل مايقلقه وما أصابه وراء ظهره
ولا كأن صار له شي
وشعاره في حياته
(( الضربة اللي ماتقتلني تقويني ))

التفاؤل شي راااائع
لنكن متفائلين

باسم الثغر

01-10-10, 11:09 pm

http://www.mlfnt.com/lives/12859600771.jpg (http://www.mlfnt.com/)

أعجبتني هالعبارة
ففيها دعوة للعمل
خصوصا أنها كتبت بتعب

طبعا من تصويري

باسم الثغر

02-10-10, 08:06 am

أستغرب وأستغرب

أصبح عند بعض الناس الخطأ صوابا
وياليتهم اكتفوا بخطأهم ، وكفوا غيرهم شرهم
فزود على هذا
ينتقدون صاحب الصواب
إذا
ماجاراهم بالخطأ

ويبرر لهم فعلهم مسمى (( مصلحتك الشخصية ))

باسم الثغر

02-10-10, 08:17 am

ماأدري وش جاين على قهاوي الصباح هاليومين
فكوب قهوة الصبح داخل جدولي بكل رضا مني
ويزيده لذة
ارتشافه وأنا أتصفح هالمنتدى

لكل من مر من هنا
كوب قهوة دافئ ، وعلى حسابي :)

وصباحكم بااااسم

باسم الثغر

02-10-10, 06:39 pm

الدنيا والحياة

ماشية مثل ماكتب الله
ضاق صدرك وإلا ماضاق
زعلت وإلا مازعلت
بكيت وإلا مابكيت
كتمت وإلا ماكتمت

الدنيا
ماتسوى لحظة قلق ، ولاضيقة صدر
حاول ترمي كل شيء من مصايبها ، وراء ظهرك
حاول تنسى أو تتناسى

ماتسوى يصيبك هم أو مرض علشانها
ألزم ماعلى ابن آدم صحته ونفسه
والباقي
يتعدل ويزين

تذكر
(( لو اجتمع الناس على أن يضروك بشيء ، لن يضروك بشيء إلا قد كتبه الله عليك ))
هذي لحالها مطمئنة

لو استشعرت اللي راح
تبي تعيش براااحة تامة ، ورضا بال وخاطر

صدق لاقيل
( دنيا دنية )

باسم الثغر

03-10-10, 11:40 pm

أحيانا
أجلس فاضي ولاعندي شي
وأتمنى أي واحد يدق علي
كان أتعلق فيه على طول
من زود الفضاوة

وأحيانا
تصكن الأشغال إلى راسي
ويتسلطون الربع
كل واحد يدق من جهة ، وأعتقد إنهم يعيشون مثل حالتي إذا صرت فاضي

باسم الثغر

04-10-10, 02:35 am

سؤال يدور ببالي كثيرا

لماذا الكثير منا يعشق الحزن دائما ؟
وإطلاق الآهات أصبح شي عادي عندنا !!

ماأدري
هو من زود النعمة اللي أنعم الله بها علينا !!
أو بالفعل حزن حقيقي ويستاهل !!

باسم الثغر

04-10-10, 04:22 pm

88
8

مايعني هذا الكلام
إن الشخص يتجاهل شعوره وأحاسيسه
فالإنسان مركب من لحم ودم وقلب ينبض

لكن
لاتجعل من الحبة قبة
وكل شيء سواء صغير أو كبير تزعل على شانه
فخل الحزن في قاموسك
شبه مختفي

باسم الثغر

04-10-10, 04:24 pm

أذكر واحد من الشباب
من الناس اللي يعشقون الحزن ، وإطلاق الآهات

يقول
أحيانا أكون جالس ومبسوط ومالي من الشيطان طريق
ثم أستغرب من روحي ، وأتسائل
ليش أنا مبسوط ؟
وأرجع أدور لي شي يضيق صدري ، لو مايستاهل

الله لايبلانا
إبليس لاعب بحسبته لعب

باسم الثغر

04-10-10, 08:04 pm

http://www.mlfnt.com/lives/12862082161.jpg (http://www.mlfnt.com/)

لكل من مر من هنا
أحلى وأحسن كوب شاي
لراعين الشاي والكيف

ولكم اختيار المذاق الخاص

باسم الثغر

05-10-10, 02:07 am

كنت جالس قبل شوي ، وجالس بجنبي حدى بزراننا اللي ماوصل سنه العشر سنوات
كان بيدي كتاب أتصفحه
وكل شوي ألتفت له
وألقاه سااااااارح ، وضارب بالهواجيس
وعلى هالحال أكثر من ثلث ساعة

ألتفت عليه
وقلت له وأنا أخوك توك على الدنيا وهواجيسه وغرابيله
اصبر شوي على الأقل لما تتعدى العشرين :)

قال لي
لا عادي !! :)

باسم الثغر

05-10-10, 02:25 am

عموري
ووالله يانا مرهق ماعمره تعود على دوامين

من 7 الي 1 مرشد طلابي
ومن 8 الي 4 الفجر وظيفة

أعرف واحد من الزملاء
كان مثلك يدرس بالجامعة الصبح
ويشتغل العصر إلى نصف الليل ، والله ياهو تشحطط شحططه
صح إنه تعب ، وأذكر ماكنا نشوفه إلا أحيان بالشهر مرة
لكن يقول أحس بلذة ، أهمها إثبات وجودي ، وإني راضي عن نفسي
الرجال بعد تخرجه من الجامعة حاليا ماشاء الله عليه
ماسك إدارة شركة كبيرة بالرياض
راتبه مايقل عن العشرين ، غير البدلات والسيارة آخر موديل

من صبر نال

باسم الثغر

06-10-10, 01:40 am

أبو الريش
أحسبه بس أنا , هذي فايدة المنتديات يصير لك شيئ وتدري ان غيرك مثلك وتطمئن , أول يصير لي أشياء وأقول وشلون أدري غيري بوه هالشيئ ولالا

أجل أنت مثلي ذكي :)

لاتخاف على روحك وأنا أخوك
مثلك مثل الناس مامن بعايد
بس
بعضهم يقدر يصنف اللي فيه
وبعضهم ماينتبه للي فيه ، أو مايدري وش اللي يصير له
أو يخاف الناس تضحك عليه :)

تذكرن بنفسي
كنت مثلك أتوقع إني بس أنا اللي لحالي يصير لي هالشي ، وتوقعتها ميزة تفرق عن غيري
وبعدين اكتشفت إن العالم مثلي مامن فرق

باسم الثغر

06-10-10, 03:08 am

شفت فلم التايتنك
وبدون شعور كملته للآخر ، مع إني قد شفته كم مرة

فعلا
مهما بلغ الشي من عظم وأبهه
يبقى فوقه عظيم ، سبحانه بأمره تعوم البواخر في البحر وتتعلق الطائرات في الجو

باسم الثغر

10-10-10, 12:42 pm

هاليومين
صار الماء يبرد بالمواصير
يعني
موسم الشتاء بدأ يرسل تحذيراته

باسم الثغر

11-10-10, 07:55 pm

يازين التغيير والتجديد لاصار نابع من الداخل

باسم الثغر

11-10-10, 08:48 pm

الأيام تتلاحق ملاحق ، والدنيا تركض ركض
يقال
راحة ويسر المعيشة
وسهولة الوصول والحصول على الشي
ودخول التقنية بحياتنا
كل هالأشياء
لها دخل بسرعة الزمن والوقت

باسم الثغر

13-10-10, 03:58 pm

هل أصبح إحسان الظن بالغير
فيه شيء من الدلاخة ؟

باسم الثغر

14-10-10, 02:28 pm

كل واحد منا يسأل نفسه

وين تتوقع نفسك بعد خمس سنوات ؟

باسم الثغر

15-10-10, 03:38 pm

http://www.mlfnt.com/lives/12871424521.jpg (http://www.mlfnt.com/)

نظارتي الشمسية

غالبا ماأستغني عنها ، خصوصا إذا كان الجو مشمس :)
بعد ماعرفت إنها تقي العين من أشعة الشمس الفوق بنفسجية أو تحت == ماأدري أيهن

الأكيد
إن العين ترتاح لما تلبسهن
بس
الله يعينك إذا تعودت عليهن

باسم الثغر

17-10-10, 02:40 am

بنت فقر تزوجت شخص غني
تقول وكأنها مو راضية عن حالها :

أول كنت أجوع
لأني ماألقى شي آكله

واللحين أجوع
علشاني أسوي رجيم

يعني بكل الحالآت محكوم علي بالجوع

فعلا
القناعة كنز

باسم الثغر

17-10-10, 02:56 am

تعجبني الأكلات الشامية
مثل

القرصان والجريش والمطازيز
وخصوصا نثرية الرز :)

أجل قال أكلات شامية

باسم الثغر

17-10-10, 08:31 pm

بعد ماسددنا ديون البيت والأثاث وريشنا شوي => يقصد المدونة

أفكر تفكير جاد
أبني لي شاليه
للراحة الاستجمام => يقصد بروفايل
وهذاي أدور لي أرض وأشوف لي مصمم مضبوط => مايعرف يسوي شي :)

مافهتم
دبروه ياجماعة
لو تمسكونه الطريق :)

باسم الثغر

18-10-10, 10:55 pm

88
8

الأراضي غالية :)

باسم الثغر

19-10-10, 01:40 am

الصراحة

شي جميل ومكاشفة رائعة
بس
من يتقبلها ؟
ومتى تكون مقبولة ؟
ومتى تكون جارحة ؟

يعنى
وين اللي يعرف
الوقت اللي يلزم يكون فيه صريح
والوقت اللي الصراحة تكون فيه قاتلة

هذا
غير من يتقبلها منك
ومن يرفضها

باسم الثغر

19-10-10, 01:45 am

88
8

طبعا
ماأنسى الشخص الدنيء
اللي ينتقم ويسفل باللي قدامه
تحت مسمى الصراحة

باسم الثغر

25-10-10, 10:38 pm

كل واحد يسأل نفسه
كيف حنا مع المواعيد والدقة فيها ؟

والله
من تفويت المواعيد
ونستغرب إذا تأخر الواحد نصف أو ساعة
نعتبره وافي بمواعيده

باسم الثغر

26-10-10, 10:21 pm

ماقد شفت ضيق إلا بعده فرج
ولو تأخر
77
7
رحمة من رب العالمين بنا نحن المساكين

باسم الثغر

27-10-10, 02:41 am

كثير من نقاط الإختلاف بين الناس

تكون بدايته سوء الفهم
ويمشي على إساءة الظن
وخاتمتها العناد

لو افتكينا من هالثلاثة
كان كثير من المشاكل مالها وجود

باسم الثغر

28-10-10, 11:34 am

الدنيا ماقد صفت لأحد !!

بس
وين القناعة

باسم الثغر

28-10-10, 11:46 am

الذين يشاهدون محتوى الموضوع الآن : 3 ( الأعضاء 2 والزوار 1)
‏باسم الثغر , ‏آلـأنس

إطلالة مشرقة في صباح مشرق

حياكم الله بهالصباح الباسم

باسم الثغر

29-10-10, 05:38 am

يعجبن الرسام المبدع
إذا مسك قلمه وريشته وبدأ يرسم
أنا
أعتبره يعزف مهب يرسم
لأني أطرب معه وأستمتع وأتلذذ برسمه

وشلون يحول أوراق بيضاء وألوان وريشة
إلى صورة جمالية ممتعة

ناس فنانة ومبدعة

باسم الثغر

29-10-10, 10:41 pm

88
8

أحيانا أدور مقاطع لرسامين منزلين فديو كامل وسريع
وهم يرسمون أحد لوحاتهم

أتابعها باستمتاع حتى النهاية
ذوق وفن وإبداع

باسم الثغر

31-10-10, 10:29 pm

تكرار المعرفات بالمنتدى
وش السر فيه ؟

عجزت أطيح بواحد مسجل بأكثر من معرف
العضو لو يغير الصورة الرمزية حقته أو لون الكتابة
ضيعته ولاأدري من هو :)

باسم الثغر

01-11-10, 10:41 pm

بعض الناس
واثق من نفسه بزيادة
لدرجة إنه يبخصك بشي تبخصه بخص

ماهنا أصعب علي
من إذا جان واحد يبخصن بشي أعرفه زي اسمي

باسم الثغر

03-11-10, 12:11 am

مكنون القلب

متى وكيف يطلع ؟؟

باسم الثغر

03-11-10, 08:26 pm

بمناسبة الجو الحلو

أفكر بطلعة نشوي فيها
أغدين أجمع الشباب ، يوسعون صدري وأوسع صدورهم عقب هالأسبوع

عسى الله يآمرهم الليلة أو بكرى

باسم الثغر

03-11-10, 08:31 pm

على طاري الشوي

قد جربتوا تشوون البطاطس على الجمر مباشرة
اللي يبي يسويها
امسك ثمرة البطاطس
وبعد غسلها قطعها أرباع وتبلها بشوي ملح
ثم لفها بقصدير
وحطها على الجمر مباشرة
وبعد نصف ساعة تقريبا تزود شوي أو تنقص شوي
طلعها وشل القصدير
وتهنى بنكهة البطاطا المدخنة

وبالهناء والعافية

باسم الثغر

04-11-10, 03:02 pm

يوم الخميس

بهاليوم
أحيانا تجتمع علي المناسبات المفاجئة
وأحيانا أبلش بعمري ولاألقى لي مكان أروح لمه ، فأبدى أدور فلان وعلان ، وبالأخير تقلب على سهرة وحداني :)

باسم الثغر

06-11-10, 02:32 am

الهدوووووووووووء
شي رائع

باسم الثغر

08-11-10, 02:44 am

يقولون

اشرب
أول القهوة
وتالي الشاهي

وين راعي المزاج يعلموننا هو صح وإلا لا ؟

باسم الثغر

08-11-10, 02:57 am

ياسرع الدنيا

أمس دخل عام 1431هـ
وهذانا دخلنا آخر شهر من السنة
والله من حدث وحدث صار فيها
والله من نفس فقدناها ونفس شرفت على هالدنيا

الله يرحم من رحل
ويحفظ من بقي

لاتنسون التكبير بهالعشر

باسم الثغر

09-11-10, 03:43 am

هاليومين مايجين النوم ليلا
ماأدري وش العلة ؟

شكلي أببدى أحب
علشان يكون سهري على الأقل له فايدة :)

باسم الثغر

10-11-10, 02:18 am

كيف تفرق بين من يصاحبك لذاتك
ومن يصاحبك لشي يرجوه منك ؟

مشكلة إذا اختلطوا عليك الناس

باسم الثغر

12-11-10, 01:14 am

يازين ريحة السمر

توي جاي من جلسة ولاعبين بالسمر لعب = طبعا حطب السمر
مع ناس شرواكم
ولاأروع

ماأجمل الجلسة لاصارت مع ربع لهم مقدارهم ، ومن زمان عنهم ، وجو رايق

باسم الثغر

12-11-10, 07:07 pm

(( تسعة أعشار الخلق بالتغافل ))

ليس الغبي بسيد في قومه
ولكن سيد قومه المتغابي

يعني
طقها حوله عن بعض الأشياء ، علشان ماتفقد هيبتك وشخصيتك

باسم الثغر

14-11-10, 03:18 am

الترحال والسفر ، بين فترة والثانية
فيها من وسعة الصدر والخاطر شي كثير
تفتك من الغثا والغرابيل اللي ملاحقتك بكل مكان
احزم عفشك وافقل جوالك وسافر بحفظ ربك ، ودور لك ديرة تستاهل المعنا

قبل كم يوم كنت أسولف مع دكتور نفسي
قال لي
الإنسان خصوصا بهالزمن يتعرض لضغوطات نفسية كثيرة
إن ضغط على نفسه ، ولارفه عنها بين فترة والثانية
لزقت فيه الأمراض النفسية والعصبية ، وعاد وش اللي يفكه منها

المهم
رفه عن نفسك ، ولاتضغطها أكثر من اللازم
ترى كل يموت وحاجته ماقضاها

باسم الثغر

15-11-10, 06:46 am

إنسان يشبه إنسان ثاني ببعض الصفات الخلقية => شي طبيعي وكثير يصير

الغريب
مجتمع كامل يتشابهون وشبه يتفقون بشكل واحد متشابه (مثل كبر العيون أو بياض البشرة وغيره)
هذي اللي ماأدري وشلون أو السبب ؟
هو أكل معين أو أجواء منطقتهم أو جينات وراثية ؟

=
=

تأمل بجمال خلق الله

باسم الثغر

17-11-10, 04:50 am

من أجمل رسائل المعايدة التي وصلتني اليوم

(( ليتنا أثناء ذبحنا لأضاحينا هذا اليوم وإراقتنا لدمائها
نذبح ونريق دم الحقد والحسد والطباع السيئة
ففي إراقة دم كلاهما أجر ))

كل عام وأنتم بخير وعافية

باسم الثغر

18-11-10, 11:45 am

يازين قومة الصبح وأنت ماأنت مشغول ولا عندك دوام
خصوصا هالأيام الحلوة لا حر ولابرد

رح اطلع وتمش وشف الأنفس ماهنا أزين منها
وضف لك كم حبيب وعزيز على قلبك
شب الضوية وزل القهوة وتحلو من القدوع
وهات من السواليف الحلوة وسعة الصدر
=
=
توي داخل من رحلة خفافية جزمنا عليها بعد صلاة الفجر

باسم الثغر

25-11-10, 11:38 pm

أسعد الله مساي ومساكم

الثقة بالنفس شي رائع
أستغرب أحيانا من أشخاص مايثقون بأنفسهم وتصرفاتهم
مع إنهم
أحسن بمرات كثيرة من أشخاص واثقين ثقة عمياء بأنفسهم ، وهم من جنبها

باسم الثغر

26-11-10, 09:19 pm

الثقة بالغير والآخرين
تحتاج تركيز أكبر وغوص بأعماقهم أكثر

وصعب جدا
إنك تثق بشخص ماتعرفه ، أو تعرفه معرفة بسيطة

باسم الثغر

28-11-10, 06:11 pm

أبو الريش

بعض الأصوات تغريك وانت تكلمه بالجوال

صوته يخليك ترسم شكله على اللي أنت ودك

ولا راحت وقابلته وشفته لقيت عكس ماتتصور

أحباط

لكن يظل الأسلوب والمعامله فوق الشكل

</b></i>

كلامك صحيح

على منحى ثاني

كان بيني وبين واحد عمل
وقاعد أكلمه حوالي ستة أشهر ولاقد شفته
وكنت أتوقعه بأواخر العشرين
ويوم قابلته وأثره شايب !!

وواحد ثاني نفس الشي
رسمت شكله ببالي على إنه أسمر ونحيف
وطلع شكله أبيضاني وتيحة :)

أحيانا توقعاتي تصيب وأحيانا تخيب

باسم الثغر

01-12-10, 02:03 am

كل مابغيت أجلس أتصفح النت
أفتح التلفزيون قبله

المشكلة منب أتابع شي فيه
بس شي بالخاطر

ماأحب أتصفح إلا فيه شي يلج عندي

باسم الثغر

01-12-10, 02:07 am

اليوم كنت عند طبيب
وقال لي
معروف إن هالوقت تكثر فيه الأمراض
بمناسبة دخول الشتاء
مابين إنفلونزا ومشتقاتها
فيقول
عليك بالوقاية علشان تفتك من العلاج
يعني تدحملوا وهجوا عن المصاخين
وينصح للي فيه بداية صخنة بشرب حليب ساخن مع عسل طبيعي

باسم الثغر

01-12-10, 02:13 am

بالمناسبة

أحينا إذا صار الواحد منا فيه التهاب باللوزتين
تلقاه يشرب حليب ممزوج بفلفل أسود

والغريب
إن الفلفل مهيج للوز ، ولاهو بمسكن

بس إذا صار اللي فيك برد بدون التهاب اللوزتين
فالفلفل الأسود للبرد وحدة بوحدة

=
=

الرجال شغال طبيب اليوم :)

باسم الثغر

01-12-10, 02:15 am

الذين يشاهدون محتوى الموضوع الآن : 3 ( الأعضاء 3 والزوار 0)
‏باسم الثغر , ‏حفيدة خالد

ياهلا ومراحب بحفيدة
أنورت وأسفرت المدونة

وياهلا بالمخفي
لو تظهر علشان أرحب فيك أكثر

باسم الثغر

01-12-10, 02:20 am

بعد فاصل الترحيب
أستكمل نصائحي الطبية = منتب سهل :)

إذا صار فيك كحة وأتعبتك وعجزت لاتنام منها
فادهن رجليك بفكس
والبس شراب ونم
وبإذن الله الكحة راح تتوقف من ساعتها

=
=

هذي ماجربتها
بس كل من جربها يمدح نتائجها

باسم الثغر

03-12-10, 03:18 am

والله ياحنا مبطين مصلين العشاء

يازين الشتاء
ليله ليييييل
تصلي العشاء وتمل ولابعد جت الساعة 12

باسم الثغر

04-12-10, 04:41 am

أستغرب من التناقضات اللي يعيشها بعضنا
يعني
البعض يعارض وبشدة أمر من الأمور
وبجهة ثانية يسوي شي يناقض الأمر اللي يعارضه وهو مايشعر

مثلا
بعض الناس اذبحه ولايآكل من طبخ الشغالة ، بحكم إنها مهب نظيفة و و و وغيره
ولو تطبخ الشغالة قوم الدنيا وماقعدها ورفض إنه يآكل من طبخها
وبنفس الوقت
يطلع من البيت وهو ماتعشى زعلان علشان الشغالة هي اللي طابخة
ثم يمر له مطعم من هالمطاعم اللي يحوفون الطبخ فيها بنقالية ويطلب شاورما وعصير
مايدري من اللي مزينها ولاعن نظافته ، مع إني أجزم إن أنظفهم أوسخ من أوسخ شغالة

باسم الثغر

04-12-10, 05:20 am

بعض الناس ماشاء الله عليه
تجلس أنت وإياه ، ولاودك تفترقون
ماغير سوالف وفلة حجاج وسناعة وقرامة ، مستعد يسولف معك بأي موضوع تفتحه ، كثير الابتسامة وسيع الصدر ، بعضهم صدره تلبق فيه طيارة :)
كأنك متجمل عليه بجلستك معه
وهالنوعية الساعات معه تروح كأنها دقايق

وبعضهم
ياكافي كأنه نازلة فيه مصيبة قبل جلستك معه بدقايق أو كأنه مغصوب على الجلسة
الكلمة تجرها منه جر ، والسالفة كود تقدم معروض علشان يآمره الله يسولف
ماأدري هو طبع أو نوعية الجلسة ماخشت جو معاليه
وهالنوعية
أحاول أسولف عليه مرة ومرتين وثلاث وأكثر وجربت معه كذا فن يمكن حداهن يوافق ميول عنده ، وإن شفت ماحولك أحد
فأنا رديت فيه ، ولسان حالي يقول مانب مهبول أسولف على جدار أو تمثال
الغريب إنه هو من يحرص على الجلسة

فعلا
الحي يحييك والميت يزيدك غبن

باسم الثغر

04-12-10, 05:24 am

الذين يشاهدون محتوى الموضوع الآن : 2 ( الأعضاء 2 والزوار 0)
‏باسم الثغر , ‏♥ »صـ?ـًبة المزاجْ « ♥

يالله حيها وياهلا وسهلا

ترى السهر مهب زين

باسم الثغر

08-12-10, 03:33 am

من العام ماكتبت بالمدونة :)

كل عام وأنتم بخير

باسم الثغر

12-12-10, 12:33 am

والله يابعض الناس يعجبك
خصوصا إذا صار شي ضايمهم جميع

اليوم
وأنا أمشي بالسيارة
لاحظت السيارات اللي تقابلن تكبس لي وبحماس
حتى واحد منهم احتسب وهدأ سيارته وييأشر بيده
طبعا فهمت إن الدعوى ((ساهر))
وفكنا الله منه

يعجبن راعي الفزعة

باسم الثغر

12-12-10, 01:10 am

الذين يشاهدون محتوى الموضوع الآن : 2 ( الأعضاء 2 والزوار 0)
‏باسم الثغر , ‏أبو الريش

أبوالريش
أسفرت وأنورت المدونة بمرورك
تراي من المتابعين لمدونتك الرائعة ، واصل إبداعك

باسم الثغر

12-12-10, 01:55 am

دائما أهوجس بالعالم
وش راح يكون بعد عشر سنوات ؟؟

اليوم
أسولف أنا وواحد من الشباب
قال لي وش تتوقع تكون بريدة بعد خمس سنوات ؟؟
قلت له
لاحظها هالوقت وقبل خمس سنوات
والفرق اللي صار هو اللي راح يصير بعد خمس سنوات

باسم الثغر

13-12-10, 12:18 am

بالمناسبة ..

مدونتك جميلة أخي فيها نصائح وفوائد تضيئها بساطة اسلوبك

واصل أخي (باسم الثغر)

أسأل الله لك ابتسامة دائمة

حكايا حائرة
أشكر لك ذائقتك وثناؤك

ياجماعة
شوفوا العالم الذويقة
وشلون يعرفون المدونات الزينة :)

باسم الثغر

13-12-10, 12:54 am

كثير من الناس
يشتكون من الصداااااع

والغالب
إن أهم أسباب الصداع هو ارتفاع ضغط الدم ، خصوصا بهالزمن لكثرة ضغوطات الحياة
فمن الطبيعي يرتفع الضغط

واللي يرتفع ضغطه ولاهو مصاب بالمرض
يشرب (بردقوش) مغلي
وبإذن الله حول الساعة وكلش راجع لمكانه الطبيعي

الله يشفي الجميع

باسم الثغر

13-12-10, 02:18 am

كل يوم آخذ على نفسي عهد إني بكرى
أبنام بدري ، وأخلي عني السهر

وهذا انا لي حول السنة
وأنا على هذا الوضع

بإذن الله أببدى من بكرى :)

باسم الثغر

13-12-10, 02:30 am

المفروض
كل واحد يصير له برنامج رياضي يومي ، مابين مشي وغيره

صدقني
راح تحس بالفرق في جسمك وعقلك
يبي يصتصح جسمك وتحس بالنشاط طول يومك
ويبي يصفي مزاجك ويروووووق

أعرف واحد
بعمر الـ 50 وله برنامج رياضي يومي
ماقد تركه لو كان ماكان

ولو تشوفه تحس إنه بأول الـ 30
حيوية وشباب

باسم الثغر

14-12-10, 02:33 am

وهذاي أعود للسهر مرة ثانية

هذا وأنا آخذ على نفسي عهد البارح

باسم الثغر

16-12-10, 03:52 am

والله يانفسي تحتاج إلى إعادة نظر

فعلا
والنفس كالطفل إن تهمله شبّ على
حب الرضاع وإن تفطمه ينفطم

باسم الثغر

16-12-10, 03:58 am

اكرهـ أن أرى صورتي بالجوال

أبو الريش

تصدق إني مثلك
بس
مع إختلاف
أنا أكره أسمع تسجيل صوتي كره عجيب
أحسه شين مره

ماأدري وشلون المغنيين والمنشدين يسمعون أصواتهم :)

والغريب
لقيت أكثر من واحد يتفق معي بهالراي
وواحد قال لي سجل صوتك أكثر من مرة
وكرر سماعه
وراح تتأقلم عليه ، وتحس إن صوتك أحسن من (( محمد عبده ))

باسم الثغر

16-12-10, 05:44 am

الراس بدأ يتطروخ والنوم لعب بعيوني لعب
حاطن عودان كبريت علشان مايتسكرن

ياطول ليل الشتاء
مبطين مصلين العشاء
وآذان الفجر توه

لو حنا بالصيف
كان قد له أذن الظهر ==> لاتشرهون تراي سهران :)

ماخبرتوا لي مسجد يبكر بالصلاة
يازين من زرق يصلي بالرياض ، ورجع ينام == علشانهم يصلون قبلنا :)

باسم الثغر

16-12-10, 06:31 am

يالله نصلي
ونشيل عودان الكبريت

تصبحون على خير

باسم الثغر

16-12-10, 09:31 pm

سبحان الله
الأجواء اليوم أجواء رمضانية ، وكملها طلعتي ومعي كم واحد نفطر برا
كانت جلسة مع شبة النار ولاأروع

إلا متى صلاة التروايح ؟؟ ==> تراه مكثر الفطور :)

باسم الثغر

18-12-10, 02:47 am

إن العيون التي في طرفها حور
قلتلننا ثم لم يحيين قتلانا
يصرعن ذا اللب حتى لاحراك به
وهن أضعف خلق الله أركانا

هل السر في ذات العيون ، أو عين عن عين تختلف ؟؟
وباقي أعضاء الإنسان آثارها مثل العيون ، أو هذي خاصية للعين فقط ؟؟

باسم الثغر

20-12-10, 01:56 am

المزاج

اليوم آخذ إجازة
يحتاج راااااااحة

باسم الثغر

23-12-10, 06:24 pm

أسعد الله مسائي ومساؤكم

باسم الثغر

23-12-10, 06:44 pm

سبحان الله والحمد لله
ولاإله إلا الله والله أكبر

سبحان الله والحمد لله
ولاإله إلا الله والله أكبر

سبحان الله والحمد لله
ولاإله إلا الله والله أكبر

سبحان الله والحمد لله
ولاإله إلا الله والله أكبر

سبحان الله والحمد لله
ولاإله إلا الله والله أكبر

سبحان الله والحمد لله
ولاإله إلا الله والله أكبر

سبحان الله والحمد لله
ولاإله إلا الله والله أكبر

سبحان الله والحمد لله
ولاإله إلا الله والله أكبر

88
8

كتب اللي أعلاه
لثلاث أمور

نذكر الله
ونكسب أجركم
وأجرب الخطوط => مع إن شكل أغلبهن متشابهات

باسم الثغر

24-12-10, 10:27 pm

والله خير حافظ

البارح كنت أمشي بشارع شبه سريع
وكنت أحربش بالمسجل ، وعين عليه وعين على الطريق
وأتفاجأ ببزر طول كفر السيارة يركض ويخطم علي ، وياالله يالله أوقف السيارة ، رحمة من الله سبحانه لهالصغير ورحمة بوالدينه
والله
إنها لحظة من الثانية
تصورت فيها الصغير مصدوم
تصورت نفسي وأنا شايله بين يديني للمستشفى
رحمت برائته وهو يركض مايدري وش يبي يصير له

اللي غثن وبط كبدي
يوم وقفت أبشوف أهله ، وناوي أسفل فيهم
نزلت إمرأة من سيارة بالشارع المقابل ، الظاهر إنها أمه
نزلت من سيارتي
ولاشعوريا رحت لمها وعطيتها هوشة تليق بمقامها كأم مهملة مع إني ألتمس لها بعض العذر ، كون الموقف صار قدامها
ورحمة من الله ماصار بوجهي أبوه وإلا شخص كبير كان صارت علوم
وش ذنب هالصغير تغتال برائته سيارة
وش ذنبه إذا صار مايميز بين اللي يضره وينفعه

77
7
إلى اللحين محتميتن كبدي

فعلا
حفظ الله فوق كل شي

باسم الثغر

24-12-10, 11:34 pm

كل مادخلت المنتدى
أشوف فيه أقسام ثانية ، ولا عمري عتبت عليهن
فاليوم مسكت معي ورحت أتمشى بباقي أقسام المنتدى
الحقيقة لقيت أقسام حلوة ، بس تحتاج زيادة تفاعل
مثل قسم الطبيخ وقسم السفر والسياحة وقسم التصوير وغيره

باسم الثغر

26-12-10, 10:47 pm

قلب الأسد
الحين صح كل بيت له ريحه خاصه مادري وراه هههههه

الحين مب اذا رحتوا لناس تلقون ريحة بيتهم تختلف عن ريحة بيتكم ههه

صادق

ومثلها السيارات
تلقى سيارة كل شخص لها ريحة خاصة فيها
وتخلتف عن غيرها

باسم الثغر

26-12-10, 11:10 pm

كلما دخلت المنتدى
وشفت معرفات الأعضاء

أهوجس
كم واحد منهم أعرفه معرفة شخصية ؟؟
وهل فيه أحد منهم يقرب لي ؟؟

تخيلت نفسي
شيل وحط أنا وأحد الأعضاء ، ثم يصير أخوي وإلا زميل لي

مع العلم
إني ماأعرف أحد شخصيا بالمنتدى ، ولاأحد يعرفن => الدعوى جحادة :)
مع إني أتشرف بمعرفة الكثير

باسم الثغر

27-12-10, 11:56 pm

كثير من البنات المتزوجات
يسيرن على والدينهن
وكل وحدة منهن تبدى تتشكى زوجها ، وكأنه أجرم خلق الله ، وتوصل ببعضهن لحد الصياح ، ومبدعات بحبك المشكلة
ثم الوالدين ، وخصوصا الأم المسكينة ، تهدي بنتها وتحاول تهدي الوضع ، وتتحمل الكثير علشان تركد الأمور ، كل ذا خوف إن بنتها ترجع لها مطلقة

واللي يغث
بتالي الليل كل وحدة من البنات يضفها زوجها ، وتقلبها سمرة وفلة حجاج هي وإياه ، ولاكأنها مجلعدة فيه قبل شوي وغاثتن أمها المسكينة

البنت كبت اللي عندها وفضفضت كل اللي بخاطرها
والأم صايرتن مجمع مشاكل لبناتها

باسم الثغر

29-12-10, 12:15 am

أحيانا
أكون واقف عند الإشارة ، والمفروض أكون أول واحد يمشي إذا افتحت الإشارة

فأتفاجأ بسيارة تجي من اليمين ، وتوقف عرض
ماأدري
سواق السيارة مايفشل من نظرات الناس له وهو واقف خطأ
أو إنه زود وساعة وجه

اللي يرفع الضغط
لما تفتح الإشارة
يبي له شوي علشان ينتبه سعادته ويمشي

ياليتهم
يستعجلون يشغلون كميرات ساهر اللي عند الإشارات
هذي تبي تصيد عالم تعبانه

باسم الثغر

29-12-10, 12:35 am

مشتهي

صفيحة شامية
أو
شرحات بالعجين

إن خبرتوا لي أحد يضبطهن صح

باسم الثغر

29-12-10, 12:48 am

العام الماضي
وزي هالأيام ، بعز البرد والجميدة

سيرت أنا وربع لي على واحد من الشباب عمله جنوب المملكة
تصدقون ياجماعة
إنهم مايجيهم برد أبد ، ولايوجسونه نهائيا ، المكيفات على البارد ولاعمرها طفت عندهم أبدا
وإذا صارت عندنا قفيصة وعز البرد ، يصير عندهم الجو أحلى شي

كان يقول لنا هالكلام ، ومتوقعين يقوله يرغبنا علشان نسير عليه
ولا صدقت إلا لما سيرت عليه

جلسنا عنده كم يوم ، كانت ولاأحلى
وتمشية بأجواء وأماكن راااااائعة
الله يذكرك أيامك ياأبوعزيز بالخير
شكلي أبعزم نفسي عليه هالسنة ، وأزرق لي كم يوم == موجسن برد يوحش

باسم الثغر

30-12-10, 12:59 am

www.formspring.me/basmbasm

وهذا الشاليه حقي :)
أبشركم ضبطناه على الخفيف
ومابقي لنا إلا زيارتكم واقتراحاتكم

باسم الثغر

31-12-10, 04:12 am

يومي الخميس والجمعة
يحوسن جدول النوم

أجلس أضبط فيه كل الأسبوع
ثم لاتضبط ينحاس

شكلنا نبي نقول لهم مانبي خميس وجمعة :)

باسم الثغر

31-12-10, 06:55 pm

درة بريدة
تلاحظون مثلي :
أحياناً اذا صرت ناوي على جهاز الصرافه خصوصاً اذا صرت عجل .. وانا مقبل على الصرافة بسيارتي يصير واحد يدخل من قدامي شوي شوي يمشي ويسبقن عليه "طبعاً من دون ماينتبه عليّ" ..
يعني سلّط هذا يبي يصرف يوم شافن جاي ومستعجل يجي قبلي >> وأغلب المرات يكون أوقات ميته مثل الظهر أو آخر الليل بس أحس ان حظي شين ..
طبعاً أنا عارف انه مهب رداة حظ ولا شي بس مواقف تجي بالصدفة .. لكن من جد غرييبة الصراحة . >> وش نسوي لك طيب
أثره مو أنا بس اللي متعقد من هالمسألة :)

شي غريب
أقبل على الصرافة وهي مافيها أحد
وقبل لاأوصل ، تصير الثلاث سيارات اللي قدامي كلها تصفط عند الصرافة
واللي يرفع الضغط
أغلبهم يتسلط يتنبل عند الصرافة ، يسدد فواتير كل عائلتهم
مع إنه بي طبع
إذا شفت إني أبتأخر عند الصرافة ووراي سيارات ، أمشي وأنا ماخلصت شغلي
أحس إني أكثر واحد يصرف ويمشي بوقت قياسي

باسم الثغر

01-01-11, 01:44 am

88
8

على طاري ردى الحظ والتساليط

أحيانا أشك إن الإشارات يدرن إني أبمر من عندهن
إذا صرت مستعجل يتسلطن علي وكل إشارة كلما أقبلت عليها تسكر ، وترصن لها شوي
وإذا صرت فاضي أو معي شي بيدي أبسويه مثل أبكتب رسالة بالجوال ، كل الإشارات يفتحن لي ولاهنا أزين منهن :)

باسم الثغر

01-01-11, 02:06 am

كل شخص له تشخيصة بالشماغ خاصة فيه

هالأيام كنت بمجلس مليان رجال
وأشوف تشخيصهم بالشمغ
الغالب منهم من يوم عرفته وهذي شخصيته ماتغيرت

باسم الثغر

02-01-11, 03:03 am

وش معدل ومستوى الصراحة اللي المفروض يكون بين الناس ؟؟

باسم الثغر

02-01-11, 03:22 am

قريت قبل شوي موضوع بالمجلس (لهلاوين) عن الكفالة
فتذكرت سالفة بسيطة صارت لي

يقول الراوي (اللي هو أنا)

أذكر كفلت واحد عند المرور ماعنده تأمين
وأنا جايبها فزعة وعلوم رجال
وكنت متوقع إنه يسدد والأمر مجرد كفالة يعني شغل روتين
بعد فترة
تفاجأت بالمرور داقين علي
ويقولون إنك كافل واحد ولاسدد
اتصلت على الرجال وأنا متوقع إنه يبي يستحي ويفشل من شغله
قال لي
خلاص أحول لك المبلغ ورح وده لهم
قلت الشكوى لله حوله
المصيبة يوم رحت وأثر المبلغ ناقص ، كان موقف محرج لي
مااستحيت من الرجال ، رجعت واتصلت عليه
قال خلاص أنا أراجعهم
وقلت أنا خلاص أمسحه من راسي إني أكفل أحد وأنت أولهم

الذين يشاهدون محتوى الموضوع الآن : 2 ( الأعضاء 2 والزوار 0)
‏باسم الثغر , ‏to be

توبي
ألف هلا وسهلا
ودي أتسلف من واحد ، ماودك تكفلن :)

باسم الثغر

02-01-11, 08:28 pm

يمدحون مكة هالأسبوعين
يقولون الحرم فااااااضي

يازين من زرق واعتمر
وأخذ له يومين حلوين

باسم الثغر

03-01-11, 12:09 am

على طاري مكة
تمسك معي أحيانا
وأمشي من القصيم قبل المغرب
ومع شروق شمس اليوم الثاني وأنا راجع
أقل من 24 ساعة

يازين الطيارات
تروح وتجي مايفقدك أحد
ولاأحد يطلبك هدايا وحقاق :)

باسم الثغر

04-01-11, 02:04 am

التجديد والتغيير بالحياة شي حلو
حاول إنك تغير بحياتك بأي طريقة
حتى لو شي بسيط لاتحقره

مثلا
غير ترتيب غرفتك
أو
طريقة لبسك
أو
مكان جلوسك
إلى درجة إنهم وصو إنك تغير بالطريق اللي تسلكه كل صبح
واللي
ماأعرس يعرس
واللي معرس يعرس ثانية :)

يعني
أضف شي جديد بحياتك

راح تحس بالأكشنة والحماس والسعادة بالحياة

الله يسعد أيامي وأيامكم

باسم الثغر

04-01-11, 02:15 am

على عكس التغيير
الرتابة بالحياة مملة جدا

بعضهم جدوله وطريقة حياته هي هي من سنوات
من يقوم الصبح لما ينام وهو يمشي بالثانية
وبيته لو يتحرك فيها شي من مكانه لاحظ وتنبه له

أستغرب منه مايمل ويكسل

باسم الثغر

05-01-11, 01:25 am

هالرابط هو وصف الشالية حقي :)

www.formspring.me/basmbasm

سيروا علينا
ووسعو صدوركم

باسم الثغر

06-01-11, 03:56 am

المتواجدون الآن
(الأعضاء 26 والزوار 71)
‏باسم الثغر , ‏ممرضه عسكريه , ‏أي شيء , ‏لسعه شقااوة , ‏المتمرده , ‏الصقر11 , ‏الـست صبـيـبـه , ‏الكيان الشامخ , ‏تفاصيل , ‏حكايا حائرة , ‏رزه مرتزه , ‏رووونااا , ‏زعيـــــمة , ‏عذبـــــة , ‏هلالي اخلاق , ‏[مَلحَن يَقُوطَر] , ‏وسيعن صدره , ‏نونـــــــــــــه , ‏نقوووشهـ , ‏قلب الأسد

اللحين كلما دخلت وأثر المنتدى حاطن اسمي الأول
الله يجزاه خير
حاشمن وأحرجن من كثر مايقدمن :)
ماأدري وش أنا آكل اليوم :)

صبحكم الله بالخير

باسم الثغر

06-01-11, 04:09 am

وترجع ليلة الخميس والجمعة
ويرجع السهر مرة ثانية

ماقلت قبل
نبي نقولهم يلغونها :)

باسم الثغر

06-01-11, 04:30 am

اللحين أيهم أحسن طبخ
الرجال وإلا الحريم ؟

باسم الثغر

06-01-11, 04:34 am

8
88

على طاري الطبخ

اللحين ليش الطباخ لاجاء يطبخ يلبس طاقية طويييييلة

باسم الثغر

06-01-11, 03:16 pm

دائما يعجبن الشخص الواقعي

وأحب يعيش الشخص على سجيته

بس
أحيانا الوضع يحكم عليك إنك تخفف واقعيتك شوي

باسم الثغر

07-01-11, 06:43 pm

يوم الجمعة يصنفه كثير من الناس
بأنه يوم خادر

واللي يظهر
إنها آثار إجهاد وسهر يوم الخميس
فصارت الدقة بيوم الجمعة

بالنسبة لي
يعجبن كثير الوقت اللي بعد صلاة العشاء من يوم الجمعة
وأحسه يمشي بسرعة
ماأدري ليش ؟

باسم الثغر

08-01-11, 02:18 am

اليوم ماسكة معي أسمع عبدالباسط

رائع جدا بكل نفس وترتيل
ويخششك جو روحاني

ياليت من لقى له قراءة صافية

باسم الثغر

08-01-11, 10:15 pm

مساكم الله بالرضى والسعادة

باسم الثغر

09-01-11, 02:30 am

باسم الثغر

ترى ينتظرونك بقسم الصحه والغذاء

أبوالريش

والله فشيلة
توي أدري
رحت طيران لمهم ، وتشرفت بالمشاركة

بصراحة
القسم أعجبن
الرجال راح يتمشى هناك

باسم الثغر

11-01-11, 11:25 pm

مساؤكم باسم

سبحان الله
بعض الناس أعطاه صوت جميل جدا
سواء قرأ قرآن أو قعد يترنم بقصايد ، لاشعوريا تخش معه جو

اليوم
وقفت عند مسجد لصلاة العشاء
ونزلت من السيارة والإمام يصلي
وكان صوته راااائع وأعجبتن طريقته بالقراءة
توقعته شاب بالعشرينات أو أكبر شوي
ويوم خلصنا من الصلاة ، خالف كل توقعاتي
طالعت فيه وأثره كبير بالعمر ، أقل شي عمره بالخمسين وطالع
وهذا اللي أثار استغرابي

باسم الثغر

13-01-11, 02:59 am

يازين ريحة البخور
خصوصا إذا تعطرت ثم تبخرت
الرائحة رائعة

وأعرف واحد من الشباب
يحط على كسرة البخور شوية دهن عود ثم يحطه على الجمر ، والرائحة برضه رائعة

باسم الثغر

15-01-11, 12:42 am

ودي بحاسة سادسة
أقدر أقرأ أفكار الشخص اللي قدامي أو جنبي

والله من العلوم اللي تبي تبان وعشيات تبي تنكب :)

باسم الثغر

15-01-11, 02:26 am

مافيه علاج لكثرة النسيان ؟؟

باسم الثغر

15-01-11, 02:31 am

88
8

وعلى طاري كثرة النسيان

واحد من الشباب
يحط ورقة على الطبلون مكتوب فيها اللي يبي ، علشان ماينسى
ويكتب كلمة وحدة تدل على الشي اللي هو يبيه
مثلا
يبي يشتري شي من المكتبة
يكتب مكتبة ، ثم إذا شافها يتفطن

مرة من المرات
تقابلت أنا وإياه
وأثره ميت من الضحك
يقول كتبت كالعادة وحطيت الورقة بمكانها المعتاد
وبعدها ناظرت الورقة ، وينفقع راسي
ماأدري وش هالشغل اللي أنا كاتبه بالورقة

النسيان شي صعب

باسم الثغر

15-01-11, 02:37 am

88
8

رفيقي هذا
قلت له
نصيحتي لك
حاول تعتمد على عقلك وذاكرتك بكل شي
لأنه شكل الذاكرة عندك مجيمة من عدم الاستخدام ، وتحتاج شوية تدريب
علشان كذا حاول ترتب أشغالك وتعدهن عدد ، وتربطهن شي من حياتك
تبي تجلس فترة تنسى بعض الأشغال
ثم فترة يبي يتقلص النسيان
إلى ما تصير الذاكرة توب التوب

ناظرن وهو يبتسم ابتسامة شريرة :)
قلت وش عندك
قال
يامغسل الموتى من يغسلك

باسم الثغر

15-01-11, 02:51 am

أكثر شي ماأتذكره
هو أسماء الأشخاص ، خصوصا اللي أقابلهم أول مرة
أنحرج منهم إذا قابلتهم مرة ثانية
أخبص بأسماؤهم ، وكل واحد أولف له اسم جديد

بالأخير
لقيت لي طريقة حلوة علشان أحفظ الأسماء
وهي
أي واحد يعطين اسمه
أحاول أربطه بشخص قريب لي ويحمل نفس الإسم
وحاليا
الطريقة حلت نسبة بسيطة من المشكلة

المشكلة
إذا عطان أحد اسمه ، ولا لقيت أحد أعرفه له نفس الاسم :)

باسم الثغر

16-01-11, 02:11 am

من الأسباب اللي ساعدت على كثرة النسيان عندنا ، وتعطيل ذاكرة الحفظ
اقتحام التقنية لحياتنا

مثلا
كل واحد منا معه جهاز جوال
وإذا أخذت رقم أي واحد
أسجله بجهازي
وعيني ماتشوف الرقم إلا يوم سجلته
وإلا كل مابغيت أتصل عليه أو أرسل له رسالة
دورت على اسمه واخترته

لو
الواحد منا كل مابغى يتصل على رقم محفوظ بالجوال
يحاول يتذكر الرقم ويتصل بدون البحث عن الإسم

والله من مرة ومرة يقالي أبشغل الحافظة
وسويت هالطريقة
وأرسلت لأرقام على بالي حافظها
ثم أتفاجأ بأرقام غريبة تتصل علي
يقولون
وش عندك يالحبيب مرسل لنا :)

باسم الثغر

16-01-11, 11:05 pm

على طاري النسيان
نسيت أحط لكم رابط الشاليه حقي :)

www.formspring.me/basmbasm

حياكم الله

باسم الثغر

19-01-11, 01:48 am

بعض الناس
يخطئ عليك ويبيك تضحك ولاتزعل عليه
وكل هذا من باب المزح
طيب نمشيها

بس
أتصرف معه زي ماتصرف معي
والغريب يزعل
وتعليله مايحب المزح الثقيل

ماكنت أنت تمزح كذا يابن الناس !!

والله يالنوعيات هذي تسبب لي أزمة

باسم الثغر

19-01-11, 01:55 am

مافيه أصعب

من إنك تكون فرحان
وقدامك واحد ضايق صدره
أو
تكون زعلان
وقدامك واحد مبسوط من الفرح

ماتدري أنت تخفف فرحك بالأوله
علشان هالحزين
أو
تضيع حزنك بالثانية
علشان ماتكسر بخاطر هالفرحان وتضيع عليه لحظات الفرح

باسم الثغر

20-01-11, 05:23 am

بيني أنا وصرافات الراجحي أنواع المشاكل ووقفة الخواطر
أهمها
إنها تكون خربانة إذا وقفت عندها
أحيانا أعني لها معنى ، وأتعدى كم صرافة لبنوك ثانية
وبالأخير تكون خربانة
وإلا تعذر عملية السحب
وأنا منصح ماغير أدور صرافاتهم
ممكن
يكون كثر الضغط عليها هو السبب

حاليا
ماأوقف عند صرافة خاصة فيهم ، لو أشوفها وأنا مار من عندها تحلف وتقسم إنها مافيها خلاف :)
مادامت صرافات البنوك الثانية ماتقصر ، وغالبا تكون مضمونة

هذا غير إنها أحيانا تآخذ البطاقة ولاترجعها

باسم الثغر

21-01-11, 09:54 pm

(( ماكل مايقال يصدق ))

والله يابعض الناس
أستغرب منهم

أقل ماعليه إنه يحرك لسانه ويتكلم
ويبدأ الكذب على أصوله
الغريب إن اللي يكذب بعد شوي يناقض روحه
وأحيانا يصدق كذبه
وأحيانا يدري إن اللي قدامه ماصدقوه ، وشغال ماجاب خبرهم

أستغرب
من وين يجيبون هالكلام

يقال
إن الكذاب لما يكذب الكذبة ، يضطر إنه يكذب بعدها عشر كذبات
علشان ماتتفركش الكذبة

باسم الثغر

23-01-11, 11:15 pm

مهما كان

اللي بيني وبينه عيش وملح
مايمكن أنساه
حتى لو فرقنا الزمن وتزايدت بيننا المسافات

ولو
ماشفته مرة ثانية

باسم الثغر

24-01-11, 06:25 pm

( الظفر مايطلع من اللحم )

صحيح وإلا لا ؟؟

باسم الثغر

25-01-11, 01:08 am

وش
طريقة التعامل مع الأحمق اللي لك عنده مصلحة ؟؟

باسم الثغر

25-01-11, 10:13 pm

فعلا

(( فكر قبل أن تعمل ))

حكمة بالصميم

باسم الثغر

27-01-11, 09:40 pm

وش رايكم هالجلسة ؟؟

http://www.u06p.com/up/upfiles/I8749436.jpg (http://www.u06p.com/up/)

باسم الثغر

27-01-11, 09:42 pm

وهذي لكل من مر من هنا

http://www.u06p.com/up/upfiles/lxB49649.jpg (http://www.u06p.com/up/)

باسم الثغر

29-01-11, 08:18 pm

ليش
خاصية تعديل الردود بالمنتديات تحدد بمدة بسيطة

ليت تكون بالمنتديات
خاصية لكل عضو
يعدل ويحذف ردوده متى مابغى

باسم الثغر

30-01-11, 10:07 pm

عـــــ 1432 ـــــام
و
سنــــ 2011 ـــــــة

هالسنة قادمة بقوة
وبداياتها فيها أحداث غريبة
ماندري وش مخبية لنا بعد

الله يستر من الجاي
و
الله يحفظ المسلمين بكل مكان

باسم الثغر

01-02-11, 12:02 am

أفكر بتصميم زين
للشاليه اللي بالرابط

www.formspring.me/basmbasm

لازم بكل صفحة نرزه لكم
نبي نكثر سبل التواصل ونقطع عليكم الأعذار :)

باسم الثغر

01-02-11, 12:38 am

الأعضاء من خلف الشاشات

هل تعيشون على واقعكم وطبيعتكم من خلال معرفاتكم ؟؟
أو
شغلكم بالمنتدى يختلف عن طبيعتكم ؟؟

دائما
أشوف الأعضاء ومعرفاتهم وكلامهم بالمنتدى
وأحاول أتصور واقع حياتهم

باسم الثغر

01-02-11, 01:10 am

أحيانا
إذا سولف لي أحد عن شخص ثاني ماأعرفه
أو
كلم علي واحد ماأعرفه ، ثم بغينا نتقابل

أطلب من الدماغ برنت صورة هالآدمي
وأحاول أتصور شكل هالشخص اللي ماقد شفته
أخذ هالتصور بناء على معطيات من الأحداث اللي مرت بي

وأحيانا تصيب وأحيانا تخيب

باسم الثغر

01-02-11, 01:17 am

عاشق
وين المصري

ياحسافته وسع صدري شوي وراح

يالله من وده يصير يماني ويجي يسألن

تعالوا العبوا علي ميخالف خخخخخخخخخخخخخخ

أثر هالمصري بينك وبينه شيل وحط
مهب بس عندي :)

باسم الثغر

01-02-11, 01:59 am

ليش الحريم ، وأعني البنات

نباتيات يعني مايحبن اللحم

ماأدري هو تصنع وتمثيل أو فعلا صحيح
وليش الوحدة إذا كبرت تغيرت ونست إنها كانت قبل رقيقة :)

باسم الثغر

01-02-11, 02:16 pm

يقولون

رسوم تجديد الاستمارة بعد ارتفاعه
رجع على التخفيض

عسى يكون صحيح
ونجدد الاستمارة
لها فترة منتهية

باسم الثغر

02-02-11, 09:53 pm

تدحملوا زين
يقولون جاينا برد قوي

شكل أسبوع الإجازة بعيون الموظفين :)

باسم الثغر

03-02-11, 08:15 pm

ماأكثر الأصحاب حين تعدهم
ولكنهم في النائبات قليل
وفي رواية ماعندك أحد

أحيانا أشوف هالبيت واقع بكل تفاصيله

باسم الثغر

05-02-11, 02:11 am

الله يحيي كل من مر من هنا
تفضلوا اجلسوا
والقهوة بالطريق

http://www.u06p.com/up/upfiles/oeh57339.jpg (http://www.u06p.com/up/)

باسم الثغر

14-02-11, 12:03 pm

من يفعل الخير لايعدم جوازيه ،،، لايذهب العرف بين الله والناس

أحيانا يمر علي أشخاص بحياتي
من كل قلبي أتمنى لهم كل خير
ولاأدري كيف أشكرهم أو أرد لهم جميلهم

أسعد الله صباحكم بكل خير وعافية
حبيت على هالضحوية
أقهويكم مع تحلية بسيطة
لكل من مر وسير هالتحلاية المرتبة
وتستاهلون أكثر

http://www.u06p.com/up/upfiles/R4i70789.jpg (http://www.u06p.com/up/)

باسم الثغر

14-02-11, 12:47 pm

أحيانا الطلعات البسيطة الغير مرتبة لها نكهة حلوة

الفجر
مرن واحد من الزملاء
قال لي فلان وفلان
تراهم ينتظروننا وقهوتهم بمكان يحبه قلبك

نطيت معه
ونصيناهم أثر الضو وحولها القهوة والحليب
ويحتروننا بس نجلس
ووافق الجو حلو

بعض الناس الجلسة معهم تدفع لها فلوس

وياماحلا شبة الغضي حزة فجير
في راس طعس ماأحد قد مشابه

جاه الربيع وصادق الغيم بالخير
يوم الأرض استوت وغدت مثل غابة

باسم الثغر

15-02-11, 01:38 pm

يازين أجواء هالأيام

ياليت بريدة
أجواءها طول السنة مثل كذا

كان مايحتاج نسافر بالصيفية ماغير بهذلة وخساير

والله من التشهوي :)

باسم الثغر

16-02-11, 02:31 pm

الانتظار صعب وصعب جدا
خصوصا إذا صار الشي اللي تنتظره يترتب عليه أشياء ياتسويها ياماتسويها

باسم الثغر

16-02-11, 02:49 pm

الأحداث للإنسان غالبا تجي ورى بعض سواء أحداث سعيدة أو حزينة
مثل انفراط السبحة

إذا جاك شي يوسع صدرك تراه يبي يلحقه كم حدث توسع صدرك
وإذا جتك مصيبة أو شي يضيق الصدر فتراه يبي يلحقه كم حدث مثله
هذا اللي لاحظته

الله يسعد أيامنا وأيامكم

باسم الثغر

19-02-11, 05:13 pm

أحيانا أحب أمسك لي غرفة أو شقة صغيرة مهب مرتبة
وأحاول أعيد تصميمها وتأهيلها وترتيبها من جديد

هاليومين
أتمشى بالبيت وأقول للوالد
عطن لك كم ريال وأضبط لك البيت بأحلى صورة
قال أنت عطن كم ريال وأشري لك بيت جديد :)
حضور بديهة مسكت

باسم الثغر

20-02-11, 06:49 pm

مافيه أتعب من نومة العصر
تقوم من النوم ماتدري هو حنا إلى اللحين العصر أو جاء المغرب
أو جاء بكرى :)

والله من مرة ومرة
فزيت من النوم بسرعة
أحسبه الفجر مادريت إنه مسيان الضعيف :)

باختصار
قد ماتقدر لاتنام العصر

باسم الثغر

23-02-11, 01:50 pm

يالله حيهم

دخلت أمس على الخياط أبفصل ثوب
وبعد أخذ المقاسات
احترت أختار قماش شتوي وإلا صيفي
وبالأخير قلت له تدري فصل لي ثوبين شتوي وصيفي
جونا هاليومين ماتأمنه يصير حر ويصير برد

باسم الثغر

24-02-11, 02:52 pm

كل جيل من الناس
أشوفه مهب راضي عن الجيل اللي بعده
ويحس إن جيله هو منقذ العالم والحياة قائمة على وجوده وهو الخبير بالحياة وعنده مخزون خبرة توازي شخص عاش ألف عام
فالجيل اللي قبله ماطلع على التطور اللي هو طلع عليه ويعرفه
والجيل اللي بعده مستهتر ولاهو يقدر الحياة ولاعنده تحمل مسؤولية

يعني
الجيل اللي يعيشه حاليا
هو الجيل المميز ولاراح يمر على الكون زي جيله

حتى أنا
الجيل اللي بعدي مهب جايزن لي بتاتا ألبتة ويمكن الجيل اللي قبلي يجيه رشق :)

اليوم مشتغل شايب ولاهو بجايزن له أحد :)

باسم الثغر

25-02-11, 03:14 am

تفضلوا

http://www.u06p.com/up/upfiles/CS788596.jpg (http://www.u06p.com/up/)

باسم الثغر

26-02-11, 02:13 pm

الله يهدي هالخياط
ماضبط الثياب ، مزود بكل ثوب متر وزود ، صاير مثل البشت
ماأدري هو كرم منه أو قل تدبير

صرنا مثل الحريم
تتردد على الخياط ألف مرة
علشان يركز عليها الفستان

الأكيد
إني جاحدن الموضوع عن الأهل
خوفا من الطنزة :)
لأني مانب أخليها لهم إذا أحدهن رجعت للخياط تعدل وتبدل :)

باسم الثغر

28-02-11, 11:38 pm

اللي يبي قهوة يالله يالله يمديه يلحق :)

www.formspring.me/basmbasm

باسم الثغر

03-03-11, 07:03 pm

واحد أعرفه احتاج لخدمة
فحاولت إن أقدم له ماأقدر
وعلمته إني أبحاول فيها محاولة جادة ولاأدري عن النتيجة يمكن يتم له الأمر ويمكن لا

سويت جهدي وشكل الأمر ماتم له
إتصل علي الرجال يتشره وخاطره شايل لأني ماخدمته
قلت له يافلان
تراي أنا اللي رشحت نفسي لمحاولة خدمتك بدون طلب منك
وعلمتك من الأساس إن النتيجة ماأدري عنها
وماعلى المحسنين من سبيل

للأسف
صرت بنظره أنا المخطي

واللحين مانبي لاجزاء ولاشكورا

باسم الثغر

09-03-11, 01:16 pm

أسعد ربي صباحكم

الصداقة بين شورعنا والمطبات والحفر

متى تبي تنتهي ؟؟ ومتى يصير بينهم طلاق ؟؟

ضاربن لي حفرة ، ويكفي لمن حفرها ولازينها هالتحاسيب اللي جته

باسم الثغر

11-03-11, 03:26 pm

ضحكت على هالنكتة

يقول لك :
إذا اجتمع 4 مصريين ألفوا كتاب
إذا اجتمع 4 يابانيين اخترعوا آله
إذا اجتمع 4 سوريين ألفوا مقال
إذا اجتمع 4 بريطانيين كتبوا حكمه
اما إذا اجتمع 4 سعوديين لعبوا بلوت :)

هاللعبة بالذات ماأعرف لها أبدا
معقولة ياجماعة السمعة حوسة لهالدرجة :)

باسم الثغر

11-03-11, 04:54 pm

http://www.u06p.com/up/upfiles/Jrb47705.jpg (http://www.u06p.com/up/)

هالفنجال لكل من مر من هنا
شاركونا هالجلسة

www.formspring.me/basmbasm

باسم الثغر

12-03-11, 01:42 pm

يقولون

إن اليابان تطالب أحمد الشقيري (مقدم برنامج خوطر) يجي ينفث عليهم ، وكذلك يبي يآخذون من متابعي البرنامج
يشكون إنه جايتهم عين ماصلت على النبي :)
عقب هالإعصار

بعض الناس فسحة
ماأدري من وين يجيب هالحتسي

باسم الثغر

14-03-11, 09:07 pm

أي شي بالحياة
تبتعد عنه وتروح وتخليه
يبي يجي لك ركض ويتبعك

وأي شي
تلحقه وتتبعه
يبي يبعد عنك ويروح ويخليك

باسم الثغر

16-03-11, 09:16 pm

ليش
الطيبة تفسر ضعف

باسم الثغر

18-03-11, 06:12 pm

اليوم الجمعة = يوم الأوامر

أوامر ملكية قوية جدا ورائعة
ونظرتها ثاقبة وبعيييييدة جدا

يكفينا منها هيئة مكافحة الفساد
هالهيئة تبي تضبط شي كثير إن الله يسر لها عملها

باسم الثغر

18-03-11, 07:59 pm

اليوم وأنا أتابع خطاب الملك عبدالله
وبآخر الخطاب قال (( وادعوا لي ))
هاللكلمة بصراحة أثرت فيني جدا ورقرقت الدمع بعيني
الكلمة طالعة من أب لأبناؤه

حفظك المولى ياخادم البيتين

باسم الثغر

18-03-11, 11:37 pm

كل من دخل المدونة
يريح هنا
ويتمقل غروب الشمس خلف البحر

http://www.u06p.com/up/upfiles/g8E75447.jpg (http://www.u06p.com/up/)

باسم الثغر

20-03-11, 10:01 pm

لو حط كل واحد ببيته ميزان شخصي
ويمر عليه باليوم مرة وحدة
يتابع وزنه هو زاد وإلا نقص
حتى يوصل للوزن المثالي

صدقوني
طريقة حلوة
وتبي تعرفون أوزانكم قبل مايعلمونكم الناس
سمانين أو نحفانين

السمنة زايدة
وكل يوم نشوف تضخم بالأجسام
ماغير أكل وقل حركة

دعوة
لنتجه للأوزان المثالية

باسم الثغر

23-03-11, 09:20 pm

وظلم ذوي القربى أشد مضاضة
علي من وقع السهام المهند

أصعب الجروح لاصارت من قريب وعزيز وغالي ، لاأنت تقدر تقول له شي ، ولاتقدر تقاشره
وزود عليها تزود الشرهة عليه

باسم الثغر

26-03-11, 01:55 am

http://www.youtube.com/watch?v=1ZPkJq8gS7Q

تجربة يوتيوب

باسم الثغر

26-03-11, 02:58 am

8
88

حسيت إني مبرمج كمبيوتر

بعد ماضبطت حركة اليوتيوب :)

باسم الثغر

26-03-11, 03:00 am

الذين يشاهدون محتوى الموضوع الآن : 2 ( الأعضاء 2 والزوار 0)
‏باسم الثغر , ‏بيارق الأمل

[b]
هلا بك

هالوقت محايد
ماتدري تقهوي ضيفك وإلا تعشيه :)

باسم الثغر

31-03-11, 02:45 pm

قبل كم يوم
كنت واقف عند الإشارة وخاش جو مع ألحان طربية
وخلال انسجامي
وقف بجنبي فان وعليه كتابة بالجنب
توقعته لأحد الشركات
يوم التفت وأثره الفان حق الجنائز
بصراحة توحشت
وقصرت صوت المسجل بدون شعور
تصورت نفسي وأنا مسدوح بهالفان

أذكر قديم
كنت راكب مع واحد من الشباب
ونفس الشي طربان
مرينا من عند المقبرة
فسكر المسجل

يقول
كل مامريت من عند المقبرة
أطفي وأوقف الأغاني
لآخر يومي
ومن بكرى أرجع وأنسى اللي صار أمس

قلت له
كل ماأصبحت ، مر من عندها

باسم الثغر

01-04-11, 10:59 pm

كنت بزيارة للمستوصف
وأثناء فلة الحجاج ودقت السوالف مع الطبيب
تطرقنا للسمنة والنحف
والأوزان المثالية
وأثره معلق جدولين عنده
للأوزان المثالية للرجال والنساء حسب الطول وكتلة الجسم

جدول الرجال
http://www.u06p.com/up/upfiles/TP684106.jpg (http://www.u06p.com/up/)

جدول النساء
http://www.u06p.com/up/upfiles/0JQ84106.jpg (http://www.u06p.com/up/)

والله الله بالأوزان المثالية

باسم الثغر

03-04-11, 03:04 am

تطيب الحياة وأسمو بها
إذا كان قلب لقلبي قريب

باسم الثغر

07-04-11, 05:09 pm

كثرة الجلوس على الكمبيوتر وتصفح النت متعبة جداً
خصوصا على العيون
وحياتنا هالوقت مليانة من الأجهزة ، تلفت يمين تلقى شاشة يسار شاشة حتى عند الإشارات حطوا تلفزيونات => والله يابعضهن يعمن العين من قوة إضاءتهن

بالنسبة لي
كلما جلست على الكمبيوتر أقصر الإضاءة إلى الآخر
ومع ذلك
أحس بإرهاق وتعب بعيوني وأحيانا صداع بالراس

سمعت إن فيه نظارات خاصة لمشاهدة التلفزيون والكمبيوتر
لو تبحلق بالشاشة ساعات مايجيك شي

اللي يعرف عنها شي ، وعن المميز منها
يعطين خبر بعد ماتسيرون علينا

www.formspring.me/basmbasm

باسم الثغر

07-04-11, 05:16 pm

فروالة
اييه فيه شيء فيني ماعجبني
الا وهو ( التسميه قبل الأكل )
يعني ما أسمي الا بالوجبات الدسمه اللي هن الغداء والعشاء
أمــــــا الشاي والشوكلاته والبطاطس والعصاائر و ...... الخ
الخفايف أقـــــــصد
ما أسمي قبل ما آكل
مدري ليه ما أعدهن من الاكل >>اجل اييش هههههههه

قاعدن أتذكر
أنا أسمي إذا بغيت أتقهوى وإلا لا ؟

صارت التسمية
بالوجبات الثقيلة فطور غداء عشاء فقط
وعسانا نتذكر

يازين الواحد يتذكر التسمية بكل حياته اليومية وتكون بباله دائما

باسم الثغر

18-04-11, 01:03 am

أقبل الصيف
الله يعين على الحر
والله ياعندنا شمس ماترحم خصوصا الظهرية

الشتاء له ذكرى لذيذة
مع إنه يلذع من البرد

باسم الثغر

21-04-11, 07:02 pm

تجيني أحيانا بعض الهواجيس

مثلاً
ماودي أنام ولايجيني النوم أبد
وتستمر باقي حياتي طبيعية ، بس بدون نوم

يقال إن الإنسان يقضي ثلث عمره بالنوم
يعني لو ماكان فيه نوم بالحياة
كيف نبي نستغل هالثلث النائم

الله سبحانه وتعالى
حكيم عليم بعباده

منورين

باسم الثغر

11-05-11, 07:41 pm

كح كح كح
من زمان عن هالمكان

تضامنا من هالغبار
تركت الحضور للشاليه هالأيام

والله ياهو مغبر

يالله إنك تحيي كل واحد بإسمه

باسم الثغر

15-05-11, 01:30 am

اختلاف الفهم عند الناس شي غريب
هالمشكلة أواجهها كثير مع بعض الناس
أقول كلام أقصد فيه شي
ويفهمه شي ثاني

أعتقد تكون رواسب سابقة عند الشخص
علشان كذا نتوقع السيء دائماً