موقف أو مواقف لم ولن تنساها يوم كنت في الابتدائية .. أرجو من الجميع المشاركة

[تراب]

السلام عليكم ...
في هذه الزاوية أرجو من كل عضو أن يذكر بعض المواقف على الاقل موقف واحد الي احصلت له أيام الدراسة في الابتدائية ....

أبدا انا بسم الله

والله للحين أذكر اكا اليوم الي رحت فيه للمدرسة كان اول يوم من الدراسة وكنت في صف اولى ابتدائي .. قالي واحد وش اسمك يا شاطر ؟ جيت كريته صيحه :3: ابن الحلال بلش بي !!

اذكر يوم كنت في فصل ثاني ابتدائي .. كانت ماصتي قدام . جاء لمي واحد ماصته في الاخير قال تبادل ماصات قلت لا ! قال بقروش قلت بس مهوب كل السنه. قال ميخالف ( مخ تجاري من يوم أنا صغير) قال ما معي الا ريالين. قلت طيب أبأجرك ماصتي لمدة اسبوع بس . قال زين أخذت الريالين للحين مانسيت شكل الريالين كان واحد منهن منقطع وملزق بشطرطون. رحت للمقصف وشريت خبزه بجبن وشاني أنواع الكيافه . يوم راح الاسبوع جيت لمه علشان اقوله انتهى العقد وابي ماصتي وهو يروح لماصته . يوم قلت له يالله خلاص ابي ماصتي انتهى الاسبوع . قبل ما اكمل كلامي ما دريت الا وجهي مال مائه وثمانين درجة من الكف الي عطانياه !!! رحت لماصته وانا اصيح وقضيت السنه كله وانا جالس بالاخير .

صحيح هك علي بس اعطتني درس ها لصفقه التجاريه معه وهي:
1- اني يجب ان اكتب عقد أجار بيني وبينه مع وجود شهود.

يا الله قولو انتم وش صار لكم ؟؟؟؟

[~ ر و ز ~]

فكرة رائعة تشكر عليها اخوي تراب ..

أما تخليت عن مكانك مقابل ريالين :D وعلى بالك مخ تجاري هههههه واللي عطاك الكف :D ماعلمت عليه الاستاذ !!

والمواقف كثييييير لكن بقول هالموقف اللي عجزت انساه..

اذكر وانا تقريباً بثاني ابتدائي فيه حفلة للامهات في نهاية السنة وكنت بقول انشودة وفيه كذا مدرسة تلبسنا الشرايط الحمر .. يوم نادونا قالن المدرسات تعالي ياروز استغربت شلون يجيبوني من وراء.. وهي تلبسني تقول لزميلتها والله من كبر اللي بهالراس خللي نمشية قبل تنقد علينا <== هذي معناته تطنز او تيب عليهم :D
انا فهمت انها تقصد ان راسي كبير :D قلت لها :D
اولاً انا راسي مهب كبير :mad:
ثانياً وعععع من زين شرايطكم علشان يحطن بشعري اخلي ابوي يشريلي احسن منهن :mad:
<== قمة البراءة :D
والى الحين وانا اضحك انها كانت تقصد عقلي مهب راسي :D

واذا تذكرت مواقف برجع ان شاء الله ..

تحياتي..

~ ر و ز ~

[ارم سترونق]

الصراحة موضوع ولا اروع


واذكر يوم كنت في ثالث ابتدائي


كان عندنا مدير الله لايوريك يخوف الجدران الله يذكره بالخير كان يخلي

المدرسة كلهم يلبسون شمغ :4: عاد وقتها كنت ماطيق شىء اسمه شماغ

نرجع لموضوعنا كن فيه طالب مافيه امل يحل واجب وكان كبير بالعمر

فقالي المدرس رح وده للمدير (ومير) اروح اوديه وانا الي انتفض من الخوف من

المدير المهم قلت للمدير ان الاستاذ يقول انه موب يحل واجبات

وقته دق تلفون على المدير بعد ماسكر السماعة المدير شافن انا الي خايف

ويضربن انا وخلى الي ماحل الواجب انا من الخوف سكت ماقت شىء

واكلته علقة لاكن الله يسامحه ويحلله

[تراب]

السلام عليكم
الصراحة تذكرت موقف ثاني يوم كنت في ثاني ابتدائي...

كان اول درس علينا هجاء . و كان أول موضوع في الهجاء هو (ناجحون) ... ناجحون من الصف الاول الى الصف الثاني ... الخ

قال المدرس ابيكم تكتبونها ثلاث مرات مع كتابة التشكيل لا رحتو للبيت (يعني واجب) ...

الصراحة كانت صعبة القطعة يجيلها اربعة اسطر مع التشكيل !! لا وبعد ثلاث مرات نكتبها .... الي حصل انا ما اعرف اكتب وحاولت اني انتحر !!!!!!!! صحيح والله ... الي سويته رحت للمطبخ واخذت ملعقة وقعدت اضربها راسي ودي اموت وحاولت أبلع قرطاسة بس ما قدرت .... طبعا ما انتم مصدقين لكن هذا الي حصل !!!!!!!!!

الحمد الله الحين انا حي أرزق والحمد الله اني ما بلعت القرطاسة كان ما ادري وش يبي يصير على معدتي ؟؟؟؟؟

[الفراشة]

سلااااااااااااااااااااااااام
الموقف الي بقوله مو لي لوحدة من بنات الجيران مرة المراقبة دخلت عليهم قالت يابنات السعوديات يجلسن وغير السعوديات ياقفن الاخت بالله وقفت ودار بينها وبين المراقبة حوار:::
المراقبة:اسمك ؟؟؟؟
البنت :فلانة بنت فلان الفلاني
المراقبة :!!!!!!!!!!!!!!!!!!!!!!!!!وشو!!!!!!!!!!!!!!!!!
البنت: عادت اسمها
المراقبة : متاكدة
البنت :ايه
المراقبة سايرتها
من وين ياحبيبتي ؟؟؟؟
البنت:من بريده
مادرت البنت ولا كل الي بالفصل فاطسين من الضحك وجلست تصيح ياعمري هي تقول لاهلها شايفنن مضحكه عندهم ومارضت ذيك السنة تروح للمدرسة الا يوم عرفت ليه ضحكوا عليها
تحياتي
الفــــــــــــــراشـــــــــــــة

[تراب]

اذكر موقف ان دل فهو يدل على بعض الغباء الي كنت اتمتع به يوم كنت في الابتدائية !!!

اذكر من اول كنا نشري الفطور من المقصف .. عاد هكا المقصف ما عنده الا بيض مسلوق و شاهي ... الزبده كان الشاهي يباع بكيسان (كان تذكرونهن الكيسان الدبيات ) يحط سكر بالكاس ثمن يصب ماء حار ويحط لبتون يعني ما يحرك السكر ... عاد انا كنت اشرب الشاهي واحس بطعم مر ( لان السكر ما حرك) انا ما ادري ليش طعم الشاهي مر ؟؟ قعدت اشوف بعض الطلاب يكسرون عودان من الاثله الي موجوده بوسط حوش المدرسة ويحركون الشاهي ... رحت سويت مثلهم ( طبعا السكر ذاب) يوم شربت والله الشاهي حلو وما هنا زينه ... بديت كل يوم لا شريت شاهي رحت للاثله واخذت عود وحركت وشربت واستانست ... لكن يوم رحت للبيت سوت الوالده شاهي وصبت لي ببياله .. رحت ادور على عود اثله من المزرعة يوم لقيت جيت مستانس علشان ابحرك الشاهي على شان يطلع زين مع ان السكر منحينه ذايب بالبريق ... الخلاصة اني من غباي كنت احسب عود لاثل هو الي يخلي الشاهي حلو !!!!!!!!!!!!!!


عاد معذور اكا السنه ما اخذنا بالعلوم المذيب والمذاب !!!!

[البكيراوي]

اخوي تراب !!

هلا بك !!

لازم في الابتدائي لو اقول شئ بالتمهيدي والا بالروضة ما يصلح ..:D
<<<<<<<<< يا حـــول من عمره 4 سنين وهو يدرس :(

اقول هذا يوم اني ابسجل بأول إبتدائي !! راح معي سماحة الوالد اول يوم !!

وانا على اني دارس تمهيدي وروضة !! الا إني اكـــــره الدارسة ولا ابيه !!

المهم اني ابوي دخلن الى الفصل وجلسن مع العيااااال

والاباء كانوا يتفرجووون علينا عند البااااااااب !! ( عـاد تخيلوا )

وكل واحد منا ينـــــاظر ابوووووه لا يطلع :D

شوي شوي الاباء بدوا يطلعون على خفيف !! إلا انا !! ذهــــــين محجر لابوي !!

كل شوي اناظره :p

عاد صحيح اني ذهــــــين وما ينهك عليّ بس ابوي اذهـــــن ّ!!

قال ابوي للمدرس خل الولد يكتب على السبورة :cool:

انا شفت هالسبورة اللي تـــــلق !! خضــــــراء !! وعليه الطبـــــاشير الجديدة !!

تقطــــرت السعابيل ..

واقووووووووووم واكتب على السبورة !!

والمــــدرس يصفق لي !!

يــــا ســــــــــــــلام شاطر !!


واتشقق من الفـــــرحة !! من قدي كاتب بالسبورة اول يوم !!

والتفت :confused: :eek:

واذا بسماحة الوالد !! قد ذهــــــــــب

طبعا مبااااااااااشرة :3: :3:

لا عــــــــــيب !!

انا من يوم اني صغير وانا قعـــــــرة وما انتحارش :mad:

يوم شفت الوضع كذا !!

واطــــــــلع من الفصل على طوووووول ما يردن الا باب المدرسة !!

والقى الحااااااااااارس السوداني الله يذكره بالخييييييير !!

جلست سااااااااعه عنده مزلب الحصة !! واحتري ابوي يجي

البــــــــــــراءة تتـــــــقطر !


موضوعك زيــــــن ويحتاج إلى تفاعل الاعضاء

[تراب]

والله ثم والله لن أدخل هذا المنتدى بعد هذا اليوم !!

نعم والله أقسم بالذي رفع السماء بلا عمد أن يكون هذا اليوم هو أخر يوم لي في هذا المنتدى .

والله إني حزنت وقلبي انجرح ولكن اشكي بثي وحزني الى الله ..

لماذا يا مشرفين هذا المنتدى لماذا ؟؟؟؟؟؟؟؟؟

أكتب موضوع أحذركم فيه من عضو جديد لا يخاف الله . وأطالبكم بحذف موضوعه الساقط ...

ولكن أتفاجئ بحذف موضوعي (الذي يحذركم منه) أما موضوعه فما يزال موجود...(عنوان موضوعه :قصيدة متأثر فية بالمرة أحب أسمع رأيكم فيها ) واسم العضو فهد المطرفي.

لا تحسبون اني زعلت علشان موضوعي حذف ... لكن أزعلني والله أن موضوعه ما يزال موجود.... وهو يدعو الي الفحشاء !!!!!!!!!!


قبل الختام .... حبيت أقول : رغم المده القصيرة التي عشتها في هذا المنتدى الا أنها والله كانت حلوه وصراحة كان يشغل وقت فراغي في غربتي وكنت أحس اني مازلت في السعودية وخصوصا بريده ..

أيضا وداع حار لي منتدى السوالف والطرائف ....


اللهم أرنا الحق حقا وارزقنا اتباعه وارنا الباطل باطلا وارزقنا اجتنابه