الألفيـــــــــــــــــه ** ارجو المشاركه من الجميع ** لعبه من نوع ابجد هوز رهيبه

[(عروس الهلالية )]

هلا وغلا بهل بريده والله الاعزاء

البارح

اوووووه قصدي اليوم كنت منسدحه قدام التلفزيون ومعي فنجال شاهي وصحن فصفص
وطرى على باالي قصه ولعبه تهبببببل مره

اتمنى انها تنال على ذوقكم المصرقع


اسمعووووووو تفاصيل اللعبه او القصه




احم احم <======= تكلمي بسرررررعه


انا بكتب قصه وهي عباره عن بدايه لقصه وتتكون من سطر او اكثر بس اهم شي ما تقل عن سطر وتبدا اول حرف بالقصه بحروف الهجاء

وطبعا اول حرف من حروف الهجاء هو حرف الالف

واللي يجي بعدي يكمل ما بديته بس بالحرف اللي بعد الالف اللي هو الباء ويكون بدايه حديثه ويكمل عادي بس اهم شي البدايه تكون بالحرف اللي بعده

وهكذا اللين تنتهي القصه بآخر حرف من حروف الهجاء وهو حرف الياء


اتمنى انكم تكونو فهمتو شي لاني انا اصلا ما فهمت شي

المهم نبدأ

بسمي القصه قصه
** الالفيــــــــه الصرقوعيه على الطريقه البريداويه **


حرف الالف


أ
==

أول ايام الاسبوع الماضي قبل الفجر بساعتين ونص كنت جالسه بغرفتي اتفرج على مجله المختلف ويوم صارت الساعه 4 واربع دقايز دخل علي المصرقع الخبل الجنرال وقالي وبكل شمووووووخ ........؟؟


اللي بعدي يكمل ويجب ان يكون اول حرف من تكمله قصته يبدأ بحرف الباء ثاني حروف الهجاء

واللي بعده بثالث حرف وهكذااااااااا

وخلونا نشوف وش تصير نهايه هالقصه ؟


بالتوفيق



تحياتي
عروس الهلاليه

============

[الجنرال]

السلام عليكم

ياحبك للمضاربة..كاني شابفك قبل بس وين ما ادري;) ..



.......

المهم..فكرة حلوة....

وهذا ردي:

بنت قومي نامي علشان ماتنامين بكرى بالمدرسه زي المرة الماضيه.....

وترجعين للبيت لك صياح يمه يمه راسي يوجعني من ضربة الطاولة.....

المهم ان المدرسه المهبوله راحت ثاني يوم للمرسة..وشافتها طالبتها الملقوفه

منيره لان المدرسه المهبوله كان اخر عباتها متقطع....

اللي بعدي كمل ايش قالت الطالبه....

[فريـــد]

مرحبا ..

أنا معكم .. :

تتتاتي ماشاء الله ( مادري وش معنى تتتاتي بس مالقيت كلمة تبداء بحرف التاء:D ) وليش عباتك مقطوعة .. يمل البلى ان شاء الله أنتي ووجهك اللي تقل باقي عشانا البارحة .. ماتستحين على وجهك .. أنتي لكي وجه أصلا .. وفي هذه اللحظة دخلت المديرة .. وناظرت المدرسة بنظرة قوية وقالت لها .. :


( كملوا عاد .. وابلش ياللي يبي يجي بعدي .. حرف الثاااااااء .. شد حيلك :D )

[العبرى]

ثوي..ثوي!!

وث الثالفه,,حثكم طالع للثارع,,

قثرو اثواتكم ثوي,,فثلتونا!!! :mad:


وأنتي عثانك اثتاذه تثرخين على بنات الناث!!


أثرحولي,,وبالتفثيل وث الثالفه,,

عثان أحل الموضوع بثويث,,

(على فكره المديره ثرما :D ,,فلت من حرف الثاء)

:D :D

تحياتي

العبرى

[~ ر و ز ~]

جت الطالبة الملقوفة تبي تكلم قطعت عليها المديرة وقالت : بــــــــــث ولاكلمة لا تكلموا الكبار يثكتون الثغار :mad: اثتاذة عروث قولي وث الثالفة :4:
ردت عروس : منيروووة الملقوفة تنطز بي علشان عباتي مقطوعة :mad: كيفي مقطوعة متنتفة ان شاء الله اجي بدون عباة مـــــزاج <== حاطة اصبعها السبابة وتأشر على راسها :D
قالت المديرة :

كملوا عاد :D
ملحوظة : اقول العبرى ماصارت وش هالمديرة لكِ كل حرف تنطقة ثاء ( ش ص س ) :D

تحياتي ..

~ ر و ز ~

[الداحوس العمى]

السلام عليكم:1:

نكمل وقفنا على حرف الحاء بعد قالت المديره {المشكله ثرماء كلش ثاء}
----------------------------------------
حقرص بقرص من جاه يقرص استغربت عروس وهي تناظر المديره وش تحقرصين

عليه ياأستاذه ناظرتها المديره بضحكه وقالت احقرص على عقلتس الله يخلف

وناظرتها عروس بنظرة غضب وقالت:
-------------------------------------------------
ياللي بعده يكمل;)

[د.ارجونــــــان]

خلقك خلقك تراني مالي خلقك أبعدي عن وجهي قبل ما أخلقبس خلقه :D
اللي بعـــــــــــــــدوة:

شكر وتقدير لعروس الهلاليه على هالتنسيم :)

اخــــــــــــــوكم:



د.ارجونــــــــــــان

[(عروس الهلالية )]

دبيه وثقيله طينه ولا لتس داعي بالمدرسه كلها (( آه بس ليتني اصير مديره المعارف يوم بس )) ناويه افصلك واعين نفسي مكانتس <=== اكلم نفسي طبعا
وطبعا ماعجبها المديره الثرما كلامي وطلعت واخذت اغراضها وهي عند الباب تدرون وش صااااار .............



اللي بعدو ؟
حرف (ذ)

[~ ر و ز ~]

والله مااصعب من حرف الثاء الا الذال :D طيب :

ذُهلت :eek: وش تشوف !! منيروووة الملقوفة مسكرة الباب وتقول : هعععع :D مافية طلعة :4: انتي تدرين وش سويتي بابلا عروس :mad: كلًش ولا ابلا عروس :4: قالت المديرة : طيب وانتي تذكرين وث ثويتي فيها :3: منيروووة اعقلي لاوريث ثيء ما ثفتية :mad: ردت منيرة :

كملوا :D
وقبل كذا لاحظوا ان منيروووة مأجرة الدور الثاني يعني انها تسوي اي شيء :D

~ ر و ز ~

[د.ارجونــــــان]

منيييروة:
روحي عن وجهي قبل لا أجدعس برا المدرسه;) ===> المأجرة:D كلش ألا عروسوة .....


اخـــــــــــــوكم:


د.ارجونــــــــــــان

[الداحوس العمى]

السلام عليكم:1:
----------------------------------------
زعلتي يامنيره موقصدي قالت المديره قومي ياعروس حبي رأسها ترا البيت حقها
عروس عصبت قوه وبدأت تزمجر وقالت العلم لايباع بالبيدجان يااستاذه ومثل هذولي
ماقولهم الا0000000
------------------------------------------------------
وكملوا:p

[~ ر و ز ~]

ياويلي شكلكم فهمتوا غلط :D
انا اقول انها مأجرة الدور الثاني يعني مهب صاحية وماجرة عقلها ( مهبوووولة ) :D تعمل اي حاجة ..
وانتم فهمتوا انه ماجرة المدرسة :p ههههههه
على العموم نكمل ..
حرف السين اممممم :rolleyes:
ســــم يسمهم وبلا يبلاهم <==( دعوة عجوز :D ) مانقصنا الا هالاشكال يذلوننا :mad: ماعاش من يذلني وانا عرووووس :4:
كل هالفترة ومنيرووة متنحة بعروس :eek:
بعدين قالت منيرووة:

كملوا :D
0 حرف الشين 0

~ ر و ز ~

[(عروس الهلالية )]

كل هالفترة ومنيرووة متنحة بعروس
بعدين قالت منيرووة:


حرف الشين


شوفي يا عروس الاباااااااليس يا انا يا انتي بهالمدرسه وترى اذا مو عاجبتس يا بنت الهلاليه ترى الشرقيه قريبه من الرياض كلها كم كيلو وانتي بالدمام اشربي من مويه البحر اللين ينفقع بطنتس.......
طارت عيون عروس الهلاليه من منيروووووووه ووسع ووجها ومن غير تفكير اخذت عروس من فوق مكتب المديره خرامه الدفااااااااتر ....................

اللي بعدوووووووووووو



تحياتي
عروس الهلاليه
===============

[الداحوس العمى]

السلام عليكم:1:

الاخت روز ;) كلمينا على قدنا علشان نفهم محنا مأجرين برضه:D

حرف الصاد
--------------------------------------
صكي اثمتس يامنيروه لاصكتس بالخرامه {قالت عروسه}والخرامه بيدها ورافعتها
فوق

المديره نقزت تقل مقروصه وقالت انا احب روسكم كلكم بس بلا فضايح

منيره مصره ان عروس تتأسف منها مستقويه بنت الذين

رزت منيره برطمها وطلعت لسانها{اللي كله ديرمان} وقالت
---------------------------------------
كملوا ضاد:D

[د.ارجونــــــان]

ضرسي ياضرسي آه ياضرسي هذي المديرة تصرف عشان ترحمه عروس :D
<======= والله ياماله دخل:D :D .

اخــــــــــــــــوكم:


د.ارجونــــــــــــان

[الداحوس العمى]

السلام عليكم:1:

والله يانت خليتها اكشن ياد-ارجونان نكمل حرف الطاء
------------------------------------------------------------------------

طقيتيني ليه ياأبله آآآآآآآآه ياضروسي آآآآآآآآآآآه ياسنوني:3: :3:

اي وحده منا قالتها المديره وعروس في وقت واحد:4: :4:

منيره: انت لا انت المهم حداكن واللي تتاسف مني تكون الثانيه اللي طقتني :p

امسكته عروس مع يدها وقالت 00000000
--------------------------------------------------------

كملوا حرف الظاء:D

[~ ر و ز ~]

من وين اجيب حرف الظاء :(
طيب :
(ظلم .. ظلم والله قهههههههههر :4: بنت ماتسوى شيء تجي تذلنا ماصارت
:mad: ) <== هذا قالتة بنفسها :D
وقالت لمنيروة لما مسكتة مع يدها : طقيناك هاااااه :4: طيب تعالي للطبيبة علشان تقلعة وتفتكين يالله امشي :mad:
ردت منيرووووة :
( حرف العين )

تحياتي..

~ ر و ز ~

[الداحوس العمى]

السلام عليكم:1:

قالت منيره حرف العين
----------------------------------------------------------------
عيني آآآآآآآآه ياعيني:3: قالت المديره: وشبه عينتس بعد يامنيره

منيره:ابله عروس بخقت عيني آآآآآآآهياعيني ابي امي ابي ابوي يابوليس:4:

عروس: اوجع يوجعتس يامنيره قلبتي عادل امام اعقلي عاد ولا والله والله اني

لاادبغتس همن تشتكين صح وامسكتها مع شوشتها

منيره خافت من عروس شكلها صادقه بكلامها ضحكت وقالت..................

----------------------------------------------
كملوا الغين:D

[(عروس الهلالية )]

منيره خافت من عروس شكلها صادقه بكلامها ضحكت وقالت..................


غاليه يا بعد امي وابوي انتي
والله اني بس حبيت امزح معتس واشوف هو انتي بالتس طويل والا لا .. طيرت عيوني طبعا انا عروس الهلاليه من سماجتها الشينه واخذت الخرامه هالمره صدق وصكيتها على عينها <==== بعد بعد ما بقى غير منيروووه ترفع ظغطي وانا عروس
وصرخت المديره باعلى صووووووتها .................




اللي بعدووووووووو حرف ( ف )

تحياتي
عروس الهلاليه
===========

[د.ارجونــــــان]

======================
فقعت عينه المهبوله وش سويتي بالبنت يامهبوله قالت عروس: أقول:4: تراها قافله أسكتي قبل ماأكمل عليس. المديرة:D لا وش دعوا يابعدي عروسوة
خافت المديرة:D .
اللي بعدووووووووووووة.

اخـــــــــــــــــوكم:
http://hanigh.jeeran.com/دكتور.gif

[(عروس الهلالية )]

هلا وغلا

فقعت عينه المهبوله وش سويتي بالبنت يامهبوله قالت عروس: أقول تراها قافله أسكتي قبل ماأكمل عليس. المديرة لا وش دعوا يابعدي عروسوة
خافت المديرة .


حرف ال ( ك )

كان ودك يا عروس ننقل منيروه من المدرسه كلها ترى ماعندي مانع يا بعد تسبدي كله ولا انتي عاد يا عروس انتي الداخله وحنا الطالعين
قلت لها انا عروس طيب يا حضرة المديره ممكن استخدم التلفون ثواني
المديره اكيد تفضل .

عروس :- الو لو سمحت مدير عام الاداره العامه لتعليم البنات قله عروس الهلاليه تبيك ضروري
المدير العام :- هلا والله ببنت اختي الغاليه وعروس ولدي عروس الهلاليه وشلونك يا بعد عرقي

عروس الهلاليه اقول خاااااااالو طارت عيون المديره ومنيروووه ..؟
هلا سمي .. اقول خاالو ابيك بساااااالفه اسمع ..........................


اللي بعدووووووووووووووو
حرف ( ل )

تحياتي
عروس الهلاليه
=================

[(عروس الهلالية )]

عروس الهلاليه اقول خاااااااالو طارت عيون المديره ومنيروووه ..؟
هلا سمي .. اقول خاالو ابيك بساااااالفه اسمع ..........................


لبيــــــه يا بعد خالتس انتي
اقول فيه بالمدرسه ثنتين فاقعين مرارتي وجايبين لي مصيبه وابيك تشوف لهم حل ،، ترى اذا ما ريحتني منهم ماني معرسه على ولدك سليمان

قال خالي افا وانا خالتس ابشري دقايق بس ويجيك قرار يخليتس تنبسطين وتتشققين وقولي خالي ماقاااااااااااله

قفلت انا عروس الهلاليه الخط والتفت على منيروووووه وهي طايره عيونها وقالت عرو سوووووووه .....................


اللي بعدوووووووو
حرف ( م )


تحياتي
عروس الهلاليه
==============

[د.ارجونــــــان]

مبروك قرار تعيينكم ببيوتكم:D
اللي بعدوة..
اخــــــــــــوكم:

[(عروس الهلالية )]

مبروك قرار تعيينكم ببيوتكم

ناظرتها المديره نظره قووووووووويه قالت عروس الهلاليه ناظري الى بااااااتسر انتي وحبيبة قلبتس منيروووووة ان ماخليتكم تشحذون بشوارع بريده ما اكون بنت ابوووووووي
قبل ما اكمل كلامي نطت فيني منيرووه وقالت ..........


اللي بعدووووووووووو
حرف ( هـ )


تحياتي
عروس الهلاليه
===============

[الداحوس العمى]

السلام عليكم:1:

مراحب جميعا

والله ينتي شربكتيها ياعروس وشلون نطلع منها;) حرف الها

-----------------------------------------------------------------------------------------------------
هاتي التلفون {قالت منيره} ان ماخليت خالتس يجي يعتذر لي بالمدرسه ماكون منيره

منيره: الو الوزاره لو سمحت وصلني بوكيل الوزاره بسرعه

منيره:الو:3: :3: الحقني عموووووو يبي يطردوني من المدرسه وبعد ابخقوا عيني

المديره:بصوت منخفض ومبحوح الله يخليتس منيره لاتجيبين اسمي انا ماسويت لتس شيء

الوكيل: يابعدي انتي منهم ذولا عطين اسماءهم ووريتس بهم

منيره: تضع يدها على السماعه وتخاطب عروس هاه اقوله على الاسماء ونخليها خل:D

عروس: تحك راسها وتقلب عيونها طيب سكري ونتفاهم

منيره: معليش عمو ان احتجتك اتصل عليك شكلهم ماودهم نصعد الموضوع اكثر

ونزلت السماعه بهدوء وهي تبتسم ابتسامه صفراء والتفتت منيره الى المديره

وعروس بسرعه وقالت.......
--------------------------------------------------------------------------
ياللي بعدوه قربا من النهايه والتقفيل

[(عروس الهلالية )]

ونزلت السماعه بهدوء وهي تبتسم ابتسامه صفراء والتفتت منيره الى المديره

وعروس بسرعه وقالت.......

وشفيكم مطيرين عيونكم فيني اول مره تشوفون وحده عندها واسطه قوويه بالوزاره

طبعا انا عروس الهلاليه وصلت معي وعلى طول سحبت من فوق طاوله المديره ورقه قلم وسجلت استقالتي وجدعتها بوجهه المديره

وقلت لها وقعي بسرررررعه قبل لا ينفقع فيني وريد الحين ويتطشر دمي الغالي بمكتبتس اللي كله فايروسات وخشش تجيب الطاعون

والله امي قايله لي وش تبين بهالمدرسه والتدريس خوذي ولد عمتس وروحي لابوظبي .. بس انا خبله وعنيده ماسمعت الكلام

التفتت منيروووه على عروس الهلاليه اللي هي انا وقالت .................

[البكيراوي]

يـــا سلام عليك يا عروس الهــلالية ..

على هالقصة اللطيفة والفكرة الرائــعه والتي جعلت أعضاء المنتدى يشاركونكِ بها لنحصل على قصة جميلة لطيفة رائعه ..من تــأليف عروس الهلالية وحوار الداحوس العمى إضاءة د.أرجونـــان وهندسة صوت الجنرال وتصوير روز وإعداد تقهو وإخراج البكيراوي


قصة رائعه وفكرة جميلة وننـتظـر المزيــد من الابــداع .

[د.ارجونــــــان]

يالله عروس مرة ثانيه حرف الألف ( أ ) :D :D
أحبطتوا ====>:D http://smilies.sofrayt.com/1/r/mdrbig.gif[Automated by GetSmile]
تسلمين لي عروس بس واصلي زي هالأبداعات الرائعه....................... وشكرا

[(عروس الهلالية )]

دامي بديتها بختمها وشكواي لله


اممممممممممممم وين صلنا


التفتت منيروووه على عروس الهلاليه اللي هي انا وقالت .................

ياليتتس سامعه كلام امك وريحتينا من الاول يا بنت الهلاليه
طبعا انا عروس الهلاليه ما رديت عليها ولبست عبايتي ودقيت على السواق ورحت للبيت .. فتحت امي لي الباب قلت لها تراني قررت قرار لا رجعه فيه

قالت امي خير بشري الله يكفينا شر قاراتس وانا امك

قلت قررت اتزوج ولد عمي واطس ابوظبي
امي ماصدقت خبر ودقي على ابوي وابوي ماصدق خبر دق على عمي وعمي ما صدق خبر ودق على ولده اللي هو العريس وملكنا واعرسنا وسافرت وكل هذا حصل باسبوع واحد

وابشركم ابوظبي حلوه والعرس زين بس كرف ولعنه خيري وطبخ ونفخ
بس والله والله وبالله انه ارحم من منيروووووووووه ومديرتها


وتوته توته خلصت الحدوته وعساها حازت على رضااكم يا اروع منتدى


قبل لا امشي احب اشكر اخوي الغالي البكيراوي على تشجيعه الدائم اللي خلى لي حافز بالمتابعه والتواصل في هالمنتدى الغالي

وايضا اشكر الغالي د. ارجونان على روحه المرحه وتفاعله المتألق
وجمع من شارك وساهم بسرد هذه القصه اللي مدري كيف طلعت



تحياتي
عروس الهلاليه
===========