اخر مواقفي مع التخصصي

[معلمة]

تعاني ابنتي من الربو وما يصاحبه من مضاعفات واضطر لمراجعة اسعاف التخصصي كثيرا لاني لا اتحمل مصاريف الحبيب مع الاقساط والقرض وفواتير...المهم كان الوضع اسهل الى ان بدأ القصور والاهمال
مشهد
انتظر دورابنتي في قسم النساء وداخل القسم شاب طويل عريض جايب امه ويسولف مع الممرضات والطبيبات يتراكضن له طبعا انا متعوده على الواسطات وتمرير الدور
دخل طفل لا يتجاوز عمره تسع سنوات يدفع عربة امه التي تحمل كيس ويبدو انها تتقيأ واقسم بالله ان عاملة النظافة طردته بكل قسوة فعلا رحمته قلت له لا تطلع الا لين يطلع هذاك الرجال طبعا طفل مسكين خاف وهرب وامه ملتفته عليه ومقهورة وما فيها حيل حتي تمشي العربية ولا يمها احد العاملات نايمات على الكراسي كنهن بالمطار ..المهم انتظر دور بنتي ما جا رحت ادور ورقتها لقيت كل اوراق المريضات مرمية على مكتب الطبيبة ورقتنا تحت واللي جايين بعدنا اوراقهم فوق بغيت اغير وخفت لاني من النوع اللي ما يتلاعب بالاوراق الرسمية(اما رسمية!!!)
لفت نظري بنت سودانية عمرها حوالي 13سنه جالسة مكان الطبيبة سالتها مستغربه انتي طبيبه او ممرضة ابتسمت وقالت بكل فخرانا اخت الدكتورة نجلاء ما اهتميت ورحت...ولان ابنتي كانت تعبانه وتسعل وتنكتم بالزحمة فدخلت بغرفة جانبية بها مكيف لين يفرجها الله..
فجأة دخلت البنت السودانية مع طبيبة سودانية واستشاري باطنية سوداني للغرفة وصرخت علينا اطلعي برا الطبيب حيكشف على المريضة قلت طيب وبنتي قالت ما تفهمي اخرجي فرفضت من الغيض والزعل بدأ الطبيب يكشف بدقة واهتمام ويتكلمون عن حالتها بالانجليزي على اساس احنا مانفهم تصدقون ان اللي فيها مجرد مغص دورة ومستدعين لها استشاري خصوصي شافها لحالها وراح لان اختها زميلته ..
الى الله المشتكى وحسبي الله على من وصلنا لهذه الحالة فنيا واداريا ..ونخاف نشتكي يكفخوننا بالجزمة طلعنا بكرامتنا ودفعنا فلوس يعلم الله اننا بحاجتها بالوقت اللي الدولة تدفع لقطاع الصحة مليارات تذهب هباء

[طبيبة القلوب]

على اي اساس يطردكـ ..؟؟

وكيف سمحوا للشاب الكبير يدخل على طوارئ النسآء ؟؟

[Mulberry Tree]

رأيت منظر لفتاة وامها ولكن الام ماسكتت ودخلت على المدير وضبط امورها
عموما اخيتي
لاتستعيني باحد ربك فوووق الجميع

[معلمة]

ممكن اروح للمدير ويضبط اموري لان حجتي قوية واعرف حقوقي وادرك ان شكواهم تعدلهم ويحول ياللي ماله حيلة ويخاف منهم ويعطيهم اكبر من حجمهم .... لكن اذا ذهبت للمدير فليس من المؤكد ان يكون الامر لصالح المريض لعدة اسباب:
اولا :ان يضيع الوقت في المفاهمات والهوشات بدلا من استغلال الوقت بالعلاج
ثانيا:نادرا ما يعترف الاطباء والممرضين والعاملين في المستشفيات باخطاء بعضهم في المواقف العادية بل يتبادلون الابتسامات الصفراء ويضعون ايديهم في جيوب جاكيتاتهم البيضاء .
ثالثا:ربما يكون المدير من قوم تسامحوا وكلن يصلح سيارته.
رابعا:احتمال يقول مشغول ويرسل معي السكورتي او موظف الامن.
خامسا:ان كان الوقت صلاة او طلعة مدارس او غداء اوعشاء فلا تفكر انك بتلقاه لانه راح يوصل اهله وراجع وكل تبن يامريض ويا مرافق لين تفوح دجاجتهم ويتغدى ويرجع.
سادسا:احتمال تنقلب الطاولة على واطلع انا الغلطانه لانهم اطباء وان مجرد مواطنة جاهلة .
سابعا:احتمال اصير فرجه للناس او يطلع صوتي مع القهر والانفعال ويمكن يشوفن احد يعرفن ويحبك على سالفة اني ما استحي وما شابه.
ولا يطلع احد يقول ولي امرك وينه يدافع عنك لاني مطلقة ومالي الا هالبنية واهلي بلشين بانفسهم ورايحة للمستشفى مع نقل الدوام يعني ضيم فوق ضيم.

[فارس الكلمه]

إداريا
كل ملاحظاتك إداريه للأسف و 90% من اخطاء صحة القصيم إدارية.
كل الملاحظات التي اطلعت عليها في المنتدى حول صحة القصيم إدارية .
وكأنه خلاص وقفت عجلة النمو والتطور بالمنطقة من الجانب الاداري.
وأحيانا أشعر كأن الصحة بلا مدير، ،،،

[تاج القصيم]

بالفعل وزارة الصحة عامة تحتاج إلى الإداري المتخصص القادر على حمل المرافق الصحية إلى أعلى المستويات000
ربما يسخر البعض من كيفية أن يقوم الإداري بتفعيل دور المرافق الصحية وهي التي تقدم خدمات طبية تحتاج إلى دور الأطباء، ولكن ليعلم الجميع أن ضبط الأمور الإدارية من خلال المتابعة لما يدور في تلك المرافق من تقصير ودراسة الوضع من خلال نقاط الخلل واصلاحها والرفع للمسؤلين في الوزارة وعدم إخفاء الحقائق كما هو حالياً وبتلك الطريقة ستتحسن الجودة الصحية المقدمة في المرافق الحكومية فلو نظرنا إلى من يقود الجهات الصحية هم أناس لهم من الزمن الطويل مايمنعهم من التطوير فالخوف من المنصب بتقديم المعلومات المغلوطة وأن كل مايدور على أعلى مستوى لذا أملنا بالتخصصات الجديدة التي هي بإنتظار الفرصة لكي ترتقي بالجودة الصحية ولعل خريجو إدارة الخدمات الصحية والمستشفيات قد يحلون الأزمة الازلية في وزارة الصحة فالكوادر الطبية موجودة ومتميزة ولكن الأوضاع لاتساعد على تقديم الخدمة على مايرام سواء من الأهمال أو عدم وجود الفرصة0000
تحياتي

[جراحة قلب]

أولا حبيت أوضح شي ........



يمكن المرضى اللي جوا بعدددددددددددك ووضعت أسمائهم قبلك يمكن التشخيص حقهههههههههم اخطر من أعراض بنتك
مثلا يكون بنتك عنده ألم بالحلق وزكااااااااااام وأحد المرضى اللي وضعوا دوره قبلك عنده خدش بالقرنيه أوألللللللللللللللام زائده...........)
أما اني تسكتين ع أجنبي أو أجنبيه ترفع صوته عليك هذا الشيء مالك حق فييييييييييييييه الحق معك انت لو تسطحين بالممممممممر أولا بلدك وثانيا إنتي مريضة طواريء







يعني يحق تسوين اي شي ...........

[{!ع ـبث طفلهـ ’]

يالغاليه لاتكونين بهذا القدر من التعصب ’’
أختي تعاني من الربو .. رحت معها الفجر فكان فيه مره كبيره بالسن تبكي التفت عليها وقلت سلامات ياخاله .. قالت من العشاء انا بذا وبنتي بيرقدونها ولادري وش فيها ! مسكت يدي الخاله تبين اسال عن بنتها .. محد عطانا وجه الا ممرضه مسيحيه وصفت لنا الحاله كان عندها مشكله في البنكرياس !.. اما اختي فرفضوا يعطونها ابرة للربو لين رحت للاداره .. هنا كلن يدخل ويطلع على الاداره .. والتعامل دمار

الله يعين ياختي ويقر عينك بسلامة بنتك

[خالد التويجري]

معلمة

أولاً ..,

نرحب بكِ معنا في المنتدى .
حياكِ الله وياهلا ومسهلا ... المنتدى نور
وبحول الله تفيدين و تستفيدين .,

المنتدى منبر إعلامي لكِ لإيصال صوتكِ للمسئولين .
وعلى رأسهم الفيصلان
سمو أمير المنطقه و نائبه ... حفظهم الله ووفقهم لكل خير .

أختي الكريمه أنثري أحرفكِ وبحول الله وقوته لن تضيع هباء ولا هدر ..
موفقه ومعانه .,’

ــــــــــــــــ

ثانياً ..,
أتفق معكِ على كل حرف كتبته عن مجريات الأحداث في التخصصي
ولا يختلف عنها مافي غيره .,
كل أملنا أن يتم حل تلك التجاوزات وكل املنا بأميرنا أن يتدخل لإنقاذ مايمكن إنقاذه .,
حقيقة التخصصي يعاني من كثير من تخبطات الإجراءات التي تحكمها ( النفسيات و العلاقات الخاصه )
وكما في غيرها من مستشفياتنا بالمنطقه وبريدة خاصه .,


تحياتي .,’

[الدمـــــع]

ارجع واقول أن مستشفياتنا مع الأسف تتعامل مع شركات للتعاقد ..

وهذا دمر المسشفيات ...

وخاصه ان بريدة الحين يجيها من جميع قرى القصيم مراجعين وهم مازالو يعدلون بها المسشفى ..

احنا ناقصنا .. الأمانه في الصحة وجلب موضفين اكفاء لاكن الشركات مع الاسف قايمه بدورها وتلعب على الحبلين ...


على فكرة الممرضات وبعض الاطباء .. لما خفضت الشركات رواتبهم راحو لمسشفيات خاصه ..يبون رواتب افضل

والي موجودين الحين ( مش حالك )


مبروك لمملكة البحرين المدينة الطبية بمليار ريال

[الزلزال الهلالي]

ياناس الي يروح للمستشفى قبل كل شي يدخل على المدير ويشكره ويشحطه لمين يموع المدير همن يطلب الي يبي صدقوني والله ان يستنفر جميع من بالمستشفى من اجلك ويحطونك فوق رؤوسهم..
بس اهم شي تكون كاااااااااااااااشخ ومحترم وكلامك كله شكرxشكر

[رومنسي بريدة]

فعلا شى محير مايحدث بهذا المستشفى

لاحس ولارقيب

كان الله بعونك واتمنى الشفا العاجل لابنتك

تحياتي