ياليت تساعدوني

[ابتسامة حزن]

السلام عليكم ورحمة الله وبركاته

بغيت اسأل عن افضل مدرسة ثانوية حكومية للبنات علشان اختي بس بشرط تكون شمال بريدة..

يعني من ناحية المديرة والتدريس والطالبات ..

انا سمعت عن الثانوية 32 مدري هي بالهضة او الاسكان وشرايكم فيها؟

والف شكر لكم

[عناية بالبشرة]

وعليكم السلام ورحمة الله وبركاته
أهـلا بك اختي ابتسامة حــزن... حسب ما أرى واسمع وألاحظ كل الثانويات الحكوميات
راقيات ومحترمات ومديراتهن صاحبات ذمه يا غلاي ابتسامة حزن...
ولطلبك ...ماحددتي اختي ايش هي الاحياء اللي بطاقتكم
الوصول لها..شمال بريدة واسع ...
لكن اذكر ثانويه في الاسكان الجديد الكل يثني عليها بزيادة مديرة طالبات معلمات
مدرسة منظمه وراقيه من كل النواحي..
لكن خليني أتأكد لك عن اسمها واسم مديرتها اليوم ان شاء الله..
وقد تكون هي اللي تذكرين الثانيه والثلاثون..

تحيتي لك وانتظريني..

[ابتسامة حزن]

اهلين ... تحدوها البشر

انا بالريان بس ماعندنا ثانوية يعني لو تكون بالنهضة او الاسكان الجديد يعني الاحياء القريبة منا..

ويسلمو ياقلبي عالرد وانا في انتظارك...

[عناية بالبشرة]

أهــــلا بك من جديد أختي ابتسامه...
المعذرة والله تأخرت عليك يومين...لكن كلها والله اتصالات لك
أسأل المعارف من البنات المطبقات في الشمال عن افضل المدارس
الثانويه....
واذكروا لي الثانويه الثامنه والعشرون في حي سلطانه الغربيه ان ما
خانتني ذاكرتي .....
ما شاء الله يذكرنها بالثناء والكلام اللي يسر الخاطر ....
ومو متأكدة من اسمها لكن هي ثانوية سلطانه الغربيه ..
وانا اعرفها من قبل قد دعيت لحفله فيها ....
وبالنسبه للي ذكرت لك بالاسكان صارت العكس من ناحية المديرة فقط
الكلام اللي يذكر عنها تنظيميا .. فهي تختلف كل مدارس تقريبا بريدة مديرتها
مطبقه النظام فيها بالحذافير.. يعني مراييل الطالبات بالابيض والبني سوا
كأنها اهليه
وهذا المفترض تعمله جميع المدارس الحكوميه في كل المراحل الثلاث.....
وهو تطبيق الزي اللونين....

أما مديرتها فيذكرون انها شديدة للغايه مع الطالبات والطالبات يكرهونها
ويذكرونها بالسوء في المجتمع....
...


أتمنى اني افدتك اختي
ولا تدققون زيادة... جميع الثانويات الحكوميه
محترمه .. وهذا اهم شي...ومديراتهن سعوديات محافظات
ويعرفن تقاليد المجتمع والاهم الدين ...


تحيتي لك أختي

[ابتسامة حزن]

الف الف شكر لك ياقلبي...

ماقصرتي تعبتك معاي والله يعطيك الف عافية...

جزاك الله خير يالغالية والله يوفقك ......

[مديرة متميزه]

شوفي الثانوية المطورة ، مديرتها ليلى المضيان

[سيدآنه]

.
.

إذا أختك له جلد دراسة :c7: لا تفوت الثانوية المطورة اللي هي الثانوية الثانية بالصفراء

أفضل مدرسة ثانوية من ناحية التعليم ..


أمّا المدرسة 32 اللي ذكرتي أنا درست فيها المديرة شديدة مرة
وحقيقة عندها تفرقة بين الطالبات مع إنّي كنت من المرضي عليهم :c7: بس أشهد على هذا :(
المدرسة ومعلماته ما ينفعون للي تبغى معدل :(



الثانوية 23 بالاسكان هي اللي تكلمت عنها الأخت تحدوها البشر
الصراحة أحد يمدحه وأحد لا !
لكن يقولون تنفع للي تبغى معدل لأن أغلب المعلمات متعاونات بالامتحانات < هذا الكلام اللي قآلوه صديقاتي اللي درسوا هناك



الثانوية اللي بسلطانة يمدحوونه مررره



وفيه ثانوية جديدة اسمها 34 فاتحة السنة هذي بالشمال لكن ما أعرف عنها شيء
أختك بأي صف وأنا أسئل عن معلماتها :) والموقع بالظبط





الله يوفقك وييسر أمورك أنتي وأختك


:)

[ابتسامة حزن]

مشكورة يااختي مديرة متميزة على ردك...

بس الظاهر ان المدرسة اللي ذكرتيها بالصفراء ! وحنا نبغى شي قريب.!

جزاك الله خير...

سيدانة

مشكورة ياقلبي على ردك وياليت تشوفين لي المدرسة الجديدة اللي تقولين عنها 34

اختي باول ثانوي..

آمييين وتسلمي عالدعوة الحلوة..وياك ياقلبي..

جزاك الله خير

[روح لايسعهآ جسـد]

وش لك بالثانويه الحكوميه
الاهليه افضل بكثر واريح
واذا على النسبه
ترى اهم شي عندهم القياس
بالتوفيق