لو سمحت آخر موديل للعبايات؟ !!!!!! [الأرشيف]

سهاد

02-03-10, 10:39 pm

السلام عليكم ..
قدر الله عليّ ور حت لأحد الأسواق وفي محل العبايات
تفآجأة بصوت رجل الله يخلف يقول (لو سمحت وش آخر موديل للعبايات )؟!!!!
إلتفت انا والموجودين لأنه ملفت الا أشوفه رجال عليه الشرهه وظاهر عليه الكبر والثقل معه زوجته وجاي يدور له على عبايه جديدٍ موديله
مااعجبه اللي موجود اللي مخصرات ومايحتاج يبي موديل أحدث !!

قلت في نفسي لو هي حرمه (بلعناه) لأنها تحب المظاهر ومايشره عليه
لكن يجي الرجل كله بكبره يدور عبايه جديد موديله ؟؟؟؟؟؟؟
قلت الله يخلف الرجوله اللي صارت تطلق على من لايستحقها
اقل شيء اذا رضيت تلبس زوجتك العبايه المزركشه لاتجي تشتريها بنفسك والا تسأل بأعلى الصوت وتجذب انتباه الموجودين وتصير محل انتقاد وتحقير لهم ..

تشكراتي..

بورش

02-03-10, 10:49 pm

اللهم لاتزغ قلوبنا بعد إذ هديتنا
العالم في تقدم ومجتمعاتنا في تخلف
وبزعمها ان ذلك من الرقي بمكان

واقعنا مرير بحق

.

وافر احترامي ..
الوليد

رفآت

02-03-10, 10:50 pm

فاضلتي لاغرابه حين تنزع الغيرة على الزوجة
ستجدين العجب ...!
للأسف مشهد محزن فعلاً ..
وكما تفضلتي المجاهره ورفع الصوت يعتبر نقص بحق الزوج !
تقديري،،

ميرنون

02-03-10, 11:02 pm

لاتعجبي عزيزتي
الرجولة اصبحت محدوده والمرأة هي الرأس المدبر
الا من رحم ربي

تقديري لك ،،

العود الازرق

02-03-10, 11:07 pm

طمووح انثى

02-03-10, 11:14 pm

انا مااشوف فيها شي ! طيب ممكن تبيها لمناسبه خاصه ! مو شرط تتزين فيها عند رجال او سوق ! واكيد زوجها واثقه فيها وفي المكان الي بتلبسها فيه ! نحسن الظن ,,
شكرا لك

إيثــــار

02-03-10, 11:14 pm

ممكن يقصد احدث العبايات بالقماش مو بالموديل لكن خانه التعبير
لان فيه اقمشه خفيفه للعبايه ماتتعب الراس وتدرين كل شوي منزلين لنا موديل جديد بالاقمشه ..

تربوي28

02-03-10, 11:22 pm

سهاد

02-03-10, 11:24 pm

اللهم لاتزغ قلوبنا بعد إذ هديتنا
العالم في تقدم ومجتمعاتنا في تخلف
وبزعمها ان ذلك من الرقي بمكان

واقعنا مرير بحق

.

وافر احترامي ..
الوليد

أنا اشهد انه واقع مرير اذا الرجال صاروا يمشون بلا عقل ؟
ويعتقد انه متفهم والا متطور
الوليد تشكراتي ،

سهاد

02-03-10, 11:28 pm

ممكن يقصد احدث العبايات بالقماش مو بالموديل لكن خانه التعبير
لان فيه اقمشه خفيفه للعبايه ماتتعب الراس وتدرين كل شوي منزلين لنا موديل جديد بالاقمشه ..

ابي أوضح لسفيره فليعذرني من سبق ..
اختي الأقمشه انواع كثيره ماوضع يده لا هو لازوجته على احدها ولاطلب قماش خفيف او جديد لا
طلبه محدد ووقف ليعرض له كم موديل ثم قال لا وخرج
يعني لو على القماش كان قعد يشوف كل الانواع وزوجته تلمس الاقمشه اللي تبي
تشكراتي ،

سهاد

02-03-10, 11:32 pm

فاضلتي لاغرابه حين تنزع الغيرة على الزوجة
ستجدين العجب ...!
للأسف مشهد محزن فعلاً ..
وكما تفضلتي المجاهره ورفع الصوت يعتبر نقص بحق الزوج !
تقديري،،

فعلا الغيره منزوعه مؤخرا اعتقد القنوات والسفر للخارج والتقليد له تأثير
صدقتي والمحزن اكثر هو حال الرجل
أم البراء تشكراتي ،

سهاد

02-03-10, 11:35 pm

لاتعجبي عزيزتي
الرجولة اصبحت محدوده والمرأة هي الرأس المدبر
الا من رحم ربي

تقديري لك ،،

مشكله صراحه اذا غاب دور الرجل في مثل هذي الأمور
نقول على الدنيا السلام
مياده تشكراتي ،

العود الازرق

02-03-10, 11:38 pm

مشكله صراحه اذا غاب دور الرجل في مثل هذي الأمور
نقول على الدنيا السلام
مياده تشكراتي ،

حرنابكم والله ..تسبون وتقطعون بنا لو نعيي على شيء والا نرفض طلب
واذا صار معه وعطاه الدبره صار على الدنيا السلام؟
اجل اتركن الرجال بحالهم وساعدنهم على تأدية واجبهم مهب تنتفخن لاعيا يلبي طلب هههه

فديكا التميمي

02-03-10, 11:43 pm

السلام عليكم ..

قدر الله عليّ ور حت لأحد الأسواق وفي محل العبايات
تفآجأة بصوت رجل الله يخلف يقول (لو سمحت وش آخر موديل للعبايات )؟!!!!

هذي مرته الثانيه واطيتن عليه الله يرحم حالهم مهنا رجال اللحين الا ماقل...

سهاد

02-03-10, 11:46 pm

حرنابكم والله ..تسبون وتقطعون بنا لو نعيي على شيء والا نرفض طلب
واذا صار معه وعطاه الدبره صار على الدنيا السلام؟
اجل اتركن الرجال بحالهم وساعدنهم على تأدية واجبهم مهب تنتفخن لاعيا يلبي طلب هههه

ياراعي البعارين والحريم وكل ماتبي انت ودك تسبنا وبس ؟ المفروض تفرح ان فيه حريم ينتقدن مثل هالتصرف
مهب توقف لنا ؟ ههه
فيه شيء اسمه وسط اما عروس وتعدد وتشكيلة حريم وتحملن واسكتن
والا تطنيش ويخلي الدرعى ترعى ..او تجيبه مرته وتحفظه كم حرف ويقولهن لراعي المحل ومايدري وش معناه ؟؟؟؟؟

توه يصير لنا عذر عقب هذي
اجل عطن آخر موديل عباة نزل ؟ والله مابقى الا مانب قايله ههه
ماحنب تاركينكم لمين تغدون صح ..بعد مهب على كيفكم تحددون الصح لا
لازم يطابق الشروط والادله ويكون بالمعقول
تشكراتي

سارح بخياله

02-03-10, 11:50 pm

شر البلية مايضحك

ماقدر اقوول الا اللهم لاشماااته اللهم لاشمااته الله يصلحه ويهديه

طمووح انثى

02-03-10, 11:56 pm

هذا ما أسميه
ذكر
وأعتقد أن عبارة آخر موديل
لا تحتمل التأويل
ولا يمكن تبريرها بأن التعبير خانه
وعلى قولة مناسبة خاصة
يعني الزوج يبي زوجته تلبسها بالبيت
هذا مما لا أجزم بالحديث عنه عند عاقل

المناسبه الخاصه .. اقصد بها .. زواج - عزيمه ..يعني تلبسها تكشخ بها من السياره لباب القاعه او باب الاستراحه !
لان في مجتمعات عندهم هوس المظاهر حتى العباة يناظرونها ويشوفون وشي هي (اقصد الحريم طبعا) يعني تكشخ علشان الحريم مو للفت نظر الرجال ..

العود الازرق

03-03-10, 12:00 am

ياراعي البعارين والحريم وكل ماتبي انت ودك تسبنا وبس ؟ المفروض تفرح ان فيه حريم ينتقدن مثل هالتصرف
مهب توقف لنا ؟ ههه
فيه شيء اسمه وسط اما عروس وتعدد وتشكيلة حريم وتحملن واسكتن
والا تطنيش ويخلي الدرعى ترعى ..او تجيبه مرته وتحفظه كم حرف ويقولهن لراعي المحل ومايدري وش معناه ؟؟؟؟؟

توه يصير لنا عذر عقب هذي
اجل عطن آخر موديل عباة نزل ؟ والله مابقى الا مانب قايله ههه
ماحنب تاركينكم لمين تغدون صح ..بعد مهب على كيفكم تحددون الصح لا
لازم يطابق الشروط والادله ويكون بالمعقول
تشكراتي

ههههههههه ....ماجبتي طاري لرجل سنع ابد
الخيارات اللي عندك مافيه لهن رابع ؟؟؟؟؟
طيب من اللي يقرر الادله ويحدد اننا نطابق للشروط والا لا ؟
أشري عباتين بس ماتجين وحده مثلك تآكلن بسم الله علي خخخخخخخخ

سهاد

03-03-10, 08:31 am

والله خوش صرتن تقيسن رجولتنا ؟؟
طيب ليش ماحكمتي على الرجال الغيورين واللي مالين الأرض وقفت على الرخمه جايه تقيسين عليه؟
بعدين وشوله تناظرين خلي عنتس اللقافه وناضري طريقتس ياحبكن للشرافه بس
العباة اللي يرضى به واللي يشريه مهنا فرق ..حريمن طيرن عقولنا بسبب التقليد الاعمى

جازلي الخط يصلح للعميان مثلي خخخخ
المهم لاتعودين له تقزين بالخلق شكرا

يالله صباح خير .. امثال الرخمه يالبل كثروا وصار الغيور والموزون
قليل يتواجد بهالاماكن ومالنا الا نحكم على اللي نشوف
بعدين وين الغيره ااذا هو مايطلع مع زوجته ؟؟؟
يعني كل الدعوى غلط ..الحريم طيرت عقلك فعلا والدليل كل يوم تبي لك وحده جديده
وكل يوم لك جنسيه ماوقفت على الموضه
ههههه اجل لاتعودين له من قال لك قزيته هو اللي ينادي الناس يقول اسمعوا
ويخلي العمى يشوف من قوة صوته خخ

تشكراتي،

Σ f d

03-03-10, 10:20 am

-

طيب ليه مكبرينهـآ وهي صغيره .. ! http://www.buraydh.com/forum/images/icons/icon6.gif

المهم انهـآ لابسه عبايه وهو الوآجب عليهـآ .. !! http://www.buraydh.com/forum/images/icons/icon7.gif

مافي نص شرعي يقول مايجوز لبس عبايه آخر موديل .. / http://www.buraydh.com/forum/images/icons/icon10.gif

-

عذبـــــة

03-03-10, 11:56 am

الآن لو لم يلبي هذا الزوج طلب زوجته بشراء اخر موديل للعباية كان قامت الدنيا ولم تقعد لأنه رفض طلب السنيوره
وستقول عنه ظالم ولا يستحق ان يكون زوج مثالي
وفاشل ايضا في مشروع الأبوه ايضا
وسيخرج الزوج بألقاب منها غبي مقصر لاينفق بخيل عنيد اخلاقه سيئة

وهنا استجاب لزوجته على حساب الدين والعرف ونادى بصوت مرتقع لو سمحت اخر موديل للعبايات
ووصله منا انواع وأشكال التهجم مثل ليس برجل ماعنده غيره مايستحي واطيه على راسه

أتعلمون يافتيات اني انا احترت فيني وفيكم وانا انثى !! فما بالكم بالرجال ؟؟
بإختصار المرأه لايعجبها العجب ولا الصيام برجب
كان الله في عونك يارجل

ملاحظة
العباءة المزكرشة ةبآخر الموديلات ليس دليل انها تُلبس عند الرجال
فالمناسبات البعيده يًلبس لها عباءة زينه ولا يشترط ان تلبس من البيت للمناسبه
الغالبية من النساء يقمن بتبديل العباءة الساترة بعباءة الزينه داخل المناسبة

سيدآنه

03-03-10, 03:23 pm

.
.
.
.

شوفي حبيبتي
صعبه بتقيسن الرجولة من كلمة ..!

وبعدين (افرضي) ما فيه رجولة اللي مسوين زحمه بكل المواضيع علشآنها
وين المشكلة ؟

نقص دينه ..!!؟؟ مات ؟؟ حرّمت عليه الجنّه ؟؟!!!

"ممكن" أنتي أو غيرك وكثير ناس يعتقدون إن مافيه رجوله
بينما هو أحسن الناس ((( خُـلق )))

أظن ما ورد شيء عن الصحابة والسلف يقول هذا رجال وهذا ذكر بس
..... ومن الكلام اللي تقولوا

:)

سهاد

04-03-10, 02:14 pm

انا مااشوف فيها شي ! طيب ممكن تبيها لمناسبه خاصه ! مو شرط تتزين فيها عند رجال او سوق ! واكيد زوجها واثقه فيها وفي المكان الي بتلبسها فيه ! نحسن الظن ,,
شكرا لك

الله يرزقنا حسن الظن بس تتوقعين انه جايين يبحثون عن عبايه مميزه وجديد موديله
حتى تلبسه لزوجه بالبيت يعني ؟؟!!!!!!
طيب ليش يتعب نفسه ويدور شيء مابعد نزل بالسوق ههه
ليش ماتنازل واختار من الموجودات كلها مخصرات ومتوفر موديات كثار
اغديه مثل ماقلتي ..ولو اني استبعد واعتبره بعد بداية التهاون والتبرج..
مشكوووره

دريمي

04-03-10, 02:29 pm

لكنكي لم تري ماطلب ,,
قد يكون أكثر حشمه ,,

نهااار

04-03-10, 02:50 pm

وانتي ماصدقتي تسمعين كلام الرجال حكمتي عليه وحللتي شخصيته وعرفتي انها زوجته ونقصتي من رجولته ومشيتي للبيت وفتحتي الجهاز وعلى طول موضوع جديد..

يمكن باحث يستطلع .. يمكن مرسل من جهه .. يمكن اللي معه والله اعلم .. يمكن هو صاحب المحل
متفق مع العامل علشان يستدرج المغفلين .. يمكن له قصد ثاني .. يمكن قالها بقصد الاحراج للبعض
يمكن نوع من لفت الانتباه .. يمكن يمزح ..

ملاعب الأسنة

05-03-10, 01:45 am

لاتعجبي عزيزتي .....ف لبنيات حواء ..شانا عظيم ...يغلب كيد الشيطان ....

اللهم اكفيناهن .....بما شئت ..........لاتعجبي ياسمااوية ... تشكراتي ...

رزه مرتزه

05-03-10, 02:16 am

زين ماشاءالله يلبسها عبايه

وحده من قريباتي يآويلها إن لبسة العبايه حجاب وبس ربي يكون بعونها

بهالزمن نادر الرجل

الله يكون بعوننا ويسترعلينآ *_^

مشاكسة

05-03-10, 02:52 am

فتن كقطع الليل المظلم

ابو ريما الخالدي

05-03-10, 03:05 am

والله كل شخص حر بالذي يريده وهذا لاينقص من رجولته شي بل أنه يقدر ذوق زوجتة ويحترمها

والحقيقة أستغرب من بعض أرائكم
فأذا كان الرجل متشدداً قلت عليه معقد
واذا كان منفتحاً قلت مهب رجال

يكفيني حنانك

05-03-10, 04:24 am

الآن لو لم يلبي هذا الزوج طلب زوجته بشراء اخر موديل للعباية كان قامت الدنيا ولم تقعد لأنه رفض طلب السنيوره
وستقول عنه ظالم ولا يستحق ان يكون زوج مثالي
وفاشل ايضا في مشروع الأبوه ايضا
وسيخرج الزوج بألقاب منها غبي مقصر لاينفق بخيل عنيد اخلاقه سيئة

وهنا استجاب لزوجته على حساب الدين والعرف ونادى بصوت مرتقع لو سمحت اخر موديل للعبايات
ووصله منا انواع وأشكال التهجم مثل ليس برجل ماعنده غيره مايستحي واطيه على راسه

صادقه والله
حيرتو الرجال،،ان عطا وبذل ،،ماسلم
وان بخل،،ماسلم

سماويه،،،،،

خليه يدلعها،بحدود الحشمه،،هذي حلاة الدنيا
انتي تدرين عن نواياه وش يقصد بالضبط

أنثى خرافية

05-03-10, 04:58 am

طيب ليش مانصحتيه بدل ماتنزلين موضوع هنا وتسبينه ؟!

لمعةالألماس

05-03-10, 04:55 pm

الله يرزق الحريم حب الستر والرجال حب غض البصر

ويجعل رجالنا غيورين على نسائهم...

........ ولعله أرادها لزوجته لغرض لبسها بأماكن نسائية ودون الظهور بها أمام الرجال,,

كما ذكرت أختنا >> طموووح أنثى

وجزاك الله خير لغيرتك أختنا ,,,وجعلك من الذين يقولون الحق لا يلومهم في الله لومة لائم..

سمو ذات

05-03-10, 05:12 pm

.

تدرين ياسماويه .. تخيلتك متكّيه وحاطه ايدك على خدك بالمحل :)
دخل الرجال وسأل بعالي الصوت وتفرج على البضاعه وطلع وأنتي قاعده تفرجين ..
ياصبرك على الوقفه بالسوق :)

نرجع للقضيه ,,
مانقدر نحط شي بحق الرجال , الله اعلم بالسرائر وماتخفي الصدور
مع إني اشوف هالحركة بدأت تكثر
اعرف وحده زوجها طلب منها هالشي ,, تدرين ليه !!
يقول ابي اكشخ بك !! << مرسّم الرجال :)