أيش يصير بعد ماتجيبين له العيال...

[حناني تعداني]

السلام عليكم بنات ياحلوات


فيه مواضيع كثيره بنات يقولون زوجي بعد ماجبت اول مولود تعلق زوجي فيني


ووحده ثانيه تقول زوجي بعد ماجبت مولودي
الاول بعد عني واحس انه مايحبني ؟؟؟؟


طيب اليوم نبي نفتح نقاش بسيط عن نفسية الرجل
هل صحيح انو لو جبتي عيال وترستي البيت صغار بيتعلق زوجك فيك
ولا العكس صحيح خلونا نسوي استفتاء
كل وحده تقول بعد اول مولود زوجها تعلق فالبيبي وفيها ولا لا
واذا حابين تقولون رايكم وتتطرقون لاي نقطه انا اشجعكم وإلى الأمام
الوالده الله يحفظها امي عندها مثل تقول (ام عشره مقلع شجره)
يعني لوجبتي عشرة اطفال وهو ماله رغبه فيك لاتحسبين العشره بيربطونه فيك او يعلقونه فيك


الله الله بالتفاعل ولا مانع من أن يبدو التماسيح أرآئهم

بس اتمنى منكم الحظور ومتابعة الموضوع وشكر كبير مقدما

اختكم

حنـــاني تعـــــداني ..

[aljuhani]

انا متزوج وعندي عيال وبقول رايي قياسا على نفسي

بالنسبة للرجل ماراح يتغير شيء بالموضوع

سواءً جابت عشرين ولد او لم تنجب فمقدار الحب عند الرجل واحد لايقل ولا يكثر بسبب انجاب

فيه شباب متمسكين بزوجاتهم ويحبونهن لهم عشرات السنين مع ان زوجاتهم ما تنجب اطفال

والعكس صحيح

يمكن تواجد الاطفال يصبرهم على زوجاتهم

في كل مشكلة تحصل بين الزوجين بعضهم يتمنى يطلقها لانه من الاساس ماتوافق معها لكن اذا فكر بالاولاد وتشتتهم بعد الطلاق يقول ماذنبهم ويتراجع ويصبر نفسه عشان اولاده

اما المرأه قد تختلف عن الرجل

قبل الانجاب تتهدد على اي شي .. كل كلمة والثانية (طلقني) او (ودني بيت اهلي) وتجدين بعضهن ياكلن حبوب منع الحمل في البداية عشان ماتتورط بالاطفال وهي ماتعرف مصيره مع الرجل وهذا يدل على انها اذا انجبت ماراح تفكر بالطلاق حتى لو ماتوافقت مع الرجل


بعد الانجاب تحس شوي بالمسئوليه وتعرف انها مالها الا بيتها وزوجها حتى زياراتها لاهلها تكون قليلة اقل من السابق لانها تحس انها تثقل على اهلها لو تجلس يوم واحد عندهم تشتاق لبيتها عشان اولادها ياخذون راحتهم ولا يكونوا عبء على اهلها

[حناني تعداني]

مشكور أخوي على الرد....

[بدرالوابلي]

تمساح كبيـــــــــــــــــــر قادم ليرد من واقع تجربه..؟؟
ياما وياما فيه ؟؟جابن عيال والرجل مخليها على ربك !! بينه وبين نفسه يقول (اهو نصيب وخلاص )؟؟...نكمل المشوار حتى لاينفضح ماخلف الأسوار؟؟سنة الحياة ان نعيش ماكتب الله لنا من أدوار؟؟،،تعب هي الحياة وآه ياخوفي من آخر المشوار!!

[مان]

الوالده الله يحفظها امي عندها مثل تقول (ام عشره مقلع شجره)
يعني لوجبتي عشرة اطفال وهو ماله رغبه فيك لاتحسبين العشره بيربطونه فيك او يعلقونه فيك أعتقد انك أخطات المعنى هنا لمثل والدتك حفظها الله , والمعنى مفهوم للمتزوجين وبالذات الزوجات ( واسألي العطارين هم أكثر دراية بخبايا هذا المثل من خلال تعاملهم مع الوالدات النفساء ) !

بالنسبة لي أعتقد بأن الاطفال يزيدون من حب الرجل لعائلته بشكل كلي ومن ثم ينعكس ذلك الحب والرحمة على الزوجه من خلال زرع الحميمية من قبل الاطفال بزوايا العائلة بالذات في أعمارهم الاولى حينما يكونون صغار ( ياكلون القلب ) .

[tootaa]

انا توي طالعه من النفاس بمولدي الاول وقبل الانجاب وبعده نفس الشي ماتغير بالعكس النفسيه صارت تمام بوجود البيبي

[حناني تعداني]

انا توي طالعه من النفاس بمولدي الاول وقبل الانجاب وبعده نفس الشي ماتغير بالعكس النفسيه صارت تمام بوجود البيبي


الله يتمم عليك يارب....

ونورتو موضوعي بردودكم ...