ماتخلص اليوم............. تعال بكره

[ع البال]

سأذكر موقف حصل لي ببلدية بريدة يبين مدى خدمتهم لهذا
المنطقة وأبنائها .


ذهبت كأي مواطن يحتاج البلدية في أستخراج فسح بناء أو غيره المهم .

طلبوا مني بعض الأوراق من صك وكروكي ومراجعة بعض الجهات
مثل الصرف الصحي والكهرب والهاتف وقلت لهم سموا وبشروا
وخلصت كامل الأوراق مع ملف علاقي أخضر .

يوم كملت الأوراق بعد أيام من مراجعة دوائر حكومية أخرى .

رجعت للبلدية لإستكمال إستخراج التصريح قال لي الموظف الشاب الطموح ( ولاحض أن الساعة الأن 10 صباحا يعني تونا بدري ) :

ماراح تخلص اليوم تعال بكرة تلقاها جاهزة .


قلت أبشر بجي بكره .

جينا الساعة 11 من يوم بكره المذكور قام وطلع لي ملفي الخضر زايد فيه بس تعبئة طلب وأمرني بتوقيعه من رئيس قسمه .

قلنا له سم نوقعه ........ وقعناه ورجعنا .

قال وقعه من مدير البلدية ....وقلنا له سم نوقعه
لكن مدير البلدية بجتماع ..... أخذ المعاملة السكرتير وقال الكلمة المشهورة .......... تعال بكرة .


سؤال يحيرني بس
هل يحسبون المواطن صايع نايم بالبيت ماعنده شغل غيرهم؟
الواحد عنده وضيفة ومسؤل
طيب أنا وظيفتي خدمية مثلي مثلهم يبوني أترك مراجعيني
وأطنش وراكض وراء معاملتي بالبلدية ؟

هذا الشاب الطموح ليش ماخلص المعاملات اللي تجيه من رئيس قسمه ومدير البلدية وأول مايجيه المواطن تكون معاملته خالصه؟
ليش الذل كننا نشحذ .


ولاهي أول مرة قبل سنتين كانت لدي معاملة إستخراج صك لأرض تابعة لي وكانت المعاملة لدى مهندس مصري قعدت المعاملة عنه أسبوعين يوم راجعته قال بكل برود : جيب المخطط من الإرشيف
قلت له : الحين المعاملة عندك أسبوعين تستنى احد يجيب المخطط لك .
قال : أمااااال أنا أجيبه .

قلت كلمتي المشهورة : أبشر .

وروح للأرشيف وجيب أصل المخطط للباشا ( لاحظ جبت أصل المخطط لو أنا ماخذه معي أو مشققه راح المخطط فيها )وسلمته المخطط وقال كلمته المشهورة تعال بكرة .


متى نخدم المواطن الخدمة التي يستحقها ؟

[بريده الغاليه]

اصبر مفتاح الفرج تصبر يا بعدي

[خارطة الطريق]

الصبر الصبر الصبر

[البرتقالي]

والله العظيم لو يبي توقيع من المدير تعال وشف

تعال بكره لانه مشغول ولا يمديك

[خازوق]

ايش اقول ايش اخلي
والله معاناتك معاناة كل واحد ماله واسطه او معقب من داخل البلدية
حبيبي اذا اردت ان تخلص معاملتك فاعمل مثل ماعملت وهذا ليس سرا لكني لم اكتشفه الا بعد حين وهو : كان لي معاملة فسح بناء وصممت ان اعملها بنفسي وقلت لا للواسطه مع العلم باني استطيع فعل ذلك والكل مستعد يخدمني ليس حبا بي ولكن لموقعي الوظيفي ...واستغرق ذلك بدون مبالغة 5-6 شهور مع العلم ان اوراقي مكتمله وللاسف لم اكن اعرف اصول اللعبة وقد اخبرني بها مسؤل كبير بالدولة عندما شكوت له هذا الموضوع بان قال لي كان يجب عليك اعطاءها لمعقب من البلدية ... واخذت برايه لاستخراج فسح بناء لعمارة اخرى فوالله لقد وصلني فسح البناء الى مكاني بغضون 3 ايام !!!!
اخي ..دع عنك كلمة ابشر فهم لايريدونها بل يريدون كلمة كم تبي!!

[الطائر الحر]

السلام عليكم ورحمة الله وبركاته


موفق بإذن الله ... لك مني أجمل تحية .

[رجـ شموخ ــل]

انت اخوي على نياتك البلديه ادفع نخلص لك معاملاتك باسرع مايمكن ياخي حتى اذا تبي اوراقك تخلص لازم تروح لمكتب واحد منهم تسوي عنده الرفع المساحي ولا تلاقي اوراقك موقفه

[عسل كامل الدسم]

أستغفرالله صرنا نتشائم من موضفين البالدية رشاوي وقل ذمة إلامن رحم الله

الله يهديهم ..لو كل شخص منهم اشتغل في ذمه كان ماتسمع (بكرى)

[احلااهم واتحداهم]

ان الصبر مفتاح الفرج

[قـلـبي بـريدة]

للاسف اغلب المؤسسات الحكومية كذا بالسعودية عامه


لكن ما عمري رحت للبلدية للامانه



لكن جربت المرور والاحوال والاتصالات والكهرب والمستشفيات


افضلهم الاحوال

[شميساوي]

والله انك صادق اخوي ....

انا قبل شهر كنت اطامر من شان اطلع رخصه للمحل تابع لي ,,,, وبهذلوني بهذله ...

لا واللي يقهر ان المحل انا شغال فيه لي 6 سنوات من اول ما طلع ويقول لي ان فيه احد قبلك

مطلع فيه رخصه .... لازم تسوي لنا اقرار من المالك ومن مكتب التأجير ,,, ان المحل تبعك اللحين

المشكله ان فيه واحد من المعقبين واقف بجنبي ,,, قال ما تعرف المراقب ,,, قلت له ليش ,,,

قال لي يمشيها لك بدون اقرار .... انا دايم يمشيها لي ......

والله لعب ,,, تعرف احد تمشي امورك ما تعرف احد ((( اجل الله يعينك )))

[بـرنـس بـريـده]

البلديه ماتبي واسطه ولا فلوس لأنهم شبعانين من الغرامات والإعلانات ووووو

تبي الزين يراجعهم ويخلصونه اوراقه وهو جالس بالكرسي

[كفاني عذاب]

كان حطيت 500 في الملف وانتهى الامر علطول المعاملهـ خالصهـ

[أبو الريش]

لابغيت تشوف المهزله والفساد الأداري والمرمطه,,,

شف دائما للإداره لاتلوم الموظف أبداً أنا إذا صار لي أي موقف مماثل لموقفك على طول يبادر لذهني الأداره,,,,

لأن الأداره المتفاعله والمواظبه في كافة أقسامه وتسعى لراحة المواطن ويتكون أداره متعلمه وتحمل شهادات في المعامله الذكيه مع الموظفين ماتلقى فيها تذمر,,,,

لكن لاكنت الإداره من خريجين الأبتدائيه الليليه ,,, فأنصحك لاتحط الملامه عليهم ,,,,,