موضوعات ساخنة تحتاج للنقاش

[سوبر جونيور]

:x11:
السلام عليكم ورحمة الله وبركاته
مساء الخير
هذا اول موضوع لي في المنتدى واتمنى انكم تتفاعلون مع الموضوع
طبعا الموضوع راح يكون متعدد النواحي
راح ابدأ باول شي وهو الاهم:زواج البنت مبكرا......
فيه ناس مايخافون الله يزوجون بناتهم وهم صغار بعمر تحت 18 سنة والأردى ان الزوج يصير عمرة فوق الثلاثين ؟؟!! >>مستانس عميمي لاقي له أهل بايعين بناتهم عشان الفلوس! وش ذنب البنت اذا كان الابو ملحوس عقله....:for1:
انا ماعتبره زواج اعتبره اعتداء طبعا الموضوع ماراح يخلص لكن احب اختصر الموضوع
ثانيا احب اتكلم عن قيادة المرأة للسيارة اول شي الحين ليش الرجال رافضين الفكرة تماما؟؟ مو من حقنا هذا؟؟ اولا اذا كنتم تودونا لمشاويرنا ذيك الساعة تكلموا ويقولون الحرمة مايصلح تطلع من بيتها الا لضرورة؟؟بعذرنا الرجال ماودونا يجي من الدوام ينام همن يقوم بعدين يروح للاستراحة ناهيكم عن الرجال اذا قام يتزوج على مرته يقولون ياحوووول مهيييب سنعة وماتعرف تطبخ(مثلا يعني واحد من عشرين مليون عذر) المهم اذا جت تعطيه اغراض البيت يقوم يكتب عنها في المنتديات وفي كل مكااان عن ظلم الزوجة له بالورقة اللي فيها لستة اغراض مليانة !لعنبوا بليسك هذا لبطنك مو لها:e9:!!!!
طبعا انا حابة اسمع رأيكم اول (مع اني ابصم انكم بتقومون علي )بس هذي وجهة نظر وحوار لازم نحترم وجهات النظر.
انا مو حابة اكمل الين ماتشرفوني بردكم

[إمو]

والله انك صادقه يا سوبر جونيور .... منزمان وانا منقهره على هالنقطه .. اللي يقهر زياده ان الاب دايم يقول " الرجال طلبها ما اقدر ارده " وتلقين الرجال ذا عمره 80 ويهمه رضى خويه اكثر من بنته والرسول وصى بالاقربين .. ولو تلاحظين دايم ما يشاورون ام البنت ... الصراحه شي يقهر ... تعبانه بالبنت حمل وولاده وتربيه وبالنهايه كانها شغالهه عندهم مالها شور ..
اشكرك على الموظوع الرائع

[قطرة الندى]

سوبر جونيرو ...

أولاً... بما إنك جــــديده حـــــياك الله في هذا المنتدى ..

ثانياً ...بالنسبه لموضوعك ,,

في هذا الوقت مافي شي أسمه زواج صغيرات ..كله يكون برضائهن

في الأول كانت البنت تتزوج بدون شورها .. لكن الحين يكون الزواج برضاها ..

أما بالنسبه لقيادة المرأه ..

أتوقع طرح الموضوع في هذا المنتدى وتناقشنا فيه ..



تحيـــــــــــاتـــــي ,,

[سوبر جونيور]

مشكوووورة يا إمو ماتقصرين والله ماتوقعت هذا الرد الله يعطيك العافية

[إمو]

عجبتيني والله يا سوبر جونيور .. خخخخخ

[سوبر جونيور]

مشكورة قطرة ندى لكن فيه عوائل الى الآن تزوج بنتها من غير موافقتها اما لكون الاب متدين من الرجل العجوز (كما نسمع دائما)او اسباب اخرى نجهلها

وثانيا بالنسبةللقيادة انا مدريت انكم تناقشتوا فيه لكن حاب اقول وجهة نظري
مرة اخرى اشكر لك تفهمك للموضوع:)

[إمو]

معليش يا قطره ندى ... البنت اصلا بزر فاكيييد بتوافق ... (لو قلنا ان ابوها تكرم وسالها) ما تعرف شي عن الزواج .... تحسبه فستان ابيض وعرس .

[رواسي]

وعليكم السلآم ورحمة اللهـ وبركآتهـ

تطرقتي لنقطهـ حسآسهـ
وهي زوآج البنت بعمر صغير
بصرآحهـ مدري وش أقول
أنآ أعرف وآحد زوج بنآتهـ كلهم برجآل عمرهم فوق الأربعين
كل هذآ عشآن الفلوس

أنآ أقول بالنهآيهـ مآرح يخسر غير الأب
يوم ترجع لهـ بنهـ ومعهآ كومهـ من العيآل
كم بيبقى معهآ زوجهآ يعني وينتهي


شكرآً لك

[سوبر جونيور]

شـكــ وبارك الله فيك ـــرا لك اختي فتاة نادرة على مرورك الرائع و الله يكون في عونهم محد راح يقعد فيها غير الأهل اللي زوجوها ماقول الا الله يصلح حال مجتمعاتنا

[الأسيــ بنت ـاد]

مرحبــا أختـي وحيأإأكـ الله معانـا..

بالنسبــه لزواج البنت في سـن مبكر ,,

معاك حـق عائلات للحيــن تسويهــا .. بس والله نادرييين مره ,,

يعنـي البنت الحين خلاص . صارت لهـا كلمتهـا.. ومحـد يقدر يغصبهـا على شي ماتبيــه..

وكل شي يكــون برضاها .. ومايغصب بنتــه الا المريـــــض اللي يبي فلــووس وبس ..

اما اللي هامتـه بنته أكيد بيشاورهــا ولو اللي خاطبهــا أمير .. لو بتقول لا بيقول سمي .,,,

بس مثــل ماقلت لك على حســب الأب..

وبالنسبـه لموضوع قيادة الـمراءه للسياره ..

أنا أقول وش نبي نسووق .. ولو اسمحوا للحريــم بالسواقـه ريحـوا مخكــم ولاتتعبون .

جيبولكم اندنوسيــه تسوق بدالكــم << أحسن شي .

اوما إني بروح اسوق فاضيــه .. والله أجلس واروح للي أبي من دون مااتعب أحسن وأريح ..

يعطيــكـ.. العافيـــه..

تقبلينـــي :

{} الأسيـــ بنت ــاد {}

[سوبر جونيور]

مشكورة اختي الأسيـــ بنت ــاد على المرور لكني حابة اوضح بعض النقاط..
أولا مو كل العائلات تسوي كذا ولا تقولين نادريييين مررررة اذا انتي تشوفينهم قليلين فأنا اشوفهم أكثر...
وثانيا إذا انتي مو حابة تسوقين فأنا حابة, لاتقولين كذا وغيرس يبي...
وانا ماعتبره تعب بالعكس اريح لي واريح لأهلي ولامنة الرجال ..............
اتمنى انس تتفهمين المواضيع قبل لا تتسرعين وتكتبين
مع تحيات أحلى عضوة في هالمنتدى (سوبر جونيور)

[إمو]

والله انك صادقه يا سوبر جونيور .... واذا قالو اننا ما خلينا الحرمه تسوق تقديرا لها طيب ليه يمنعونه ؟؟ يسمحونه واللي مستواها اكبر من انها تسوق << على قولتهم .. لا تسوق وتجيب لها سواق .. مع انه السواق اخطر للحرمه من انها تسوق هي بنفسها << اذا كان قصدهم الخطر .. وبعدين اصلا حرمه الدين ان الحرمه تختلي باجنبي ... ومع احترامي الشديد صعبه اني اتقبل فكره اننا بالقرن الواحد والعشرين والحرمه ممنوع سواقتها .. مب هذا تحيز جنسي ؟؟ ... والادهى انهم دايم يربطون منع قياده المرأه بالدين وهو ماله دخل بالدين .. بالعكس ... مب كانو نساء الرسول يركبون الدواب ؟؟ ... والحين الكفار ما يدخلون الاسلام لانه يحسبونه انه هو اللي منع قياده المرأه .. وحريمنا ساكتين ومعارظين الفكره بعد ..

[سوبر جونيور]

اييييه وانتي الصادقة ودي انشر هالكلام في كل مكان عشان يقرونه ....
واتحدى بنت ابوها تقول لأ ,,وبعدييييين من الاخترع اصلا فكرة ان السواقة اكبر من مستوانا -انا بصراحة اول مرة اسمعها-(وشو يعني يسكتونا؟!!)
وبعدين اذا فيه خطر يا إمو بيكون هم الشباب ..يعني ننحرم عشانهم؟؟
جعلهم للي منب قايلة ماشافوا خير ابد ,يحرموننا في بلدنا ويروحون يهايطون في الدول الثانية (ايقالهم يدرسون)وهم يقزقزون بنات خلق الله ويشبعون عيونهم بالجمال همن يرجهون ويعيفون زوجاتهم او اللي بيصيرون زوجاتهم_ياخي شف شكلك اول-ماقول الا حسبي الله ونعم الوكيل ان شاء مأجورين على بلوانا

[اللؤلؤه السوداء]

معقولة الى الحين به اشخاص يزوجون بناتهم صغار !!!

ولا اشخاص يزوجون بناتهم شيبان !!!

مو هذا زمن اول يوم السعودية تحت الانشاء

عموما فيه رب بيحاسبهم بكرى اذا هم ظلمو بناتهم


اما بالنسبة للقيادة عادي سوقن من اللي مانعكن انا اذا تزوجت بدال المهر ابشري له اكسنت والا كرولا قالبه خله تكمل عليه

بس عندي سوال يدور في خلجي وابي جواب صريح مدام اني لبيت دعوتك وجيت موضوعتس

من اللي موهقكم وقايل لكم نزلو مواضيع وطالبو بهالامور ؟ ويدرون اهلك انتس كاتبتن الموضوع ؟

[سوبر جونيور]

معقولة الى الحين به اشخاص يزوجون بناتهم صغار !!!

ولا اشخاص يزوجون بناتهم شيبان !!!

مو هذا زمن اول يوم السعودية تحت الانشاء

عموما فيه رب بيحاسبهم بكرى اذا هم ظلمو بناتهم


اما بالنسبة للقيادة عادي سوقن من اللي مانعكن انا اذا تزوجت بدال المهر ابشري له اكسنت والا كرولا قالبه خله تكمل عليه

بس عندي سوال يدور في خلجي وابي جواب صريح مدام اني لبيت دعوتك وجيت موضوعتس

من اللي موهقكم وقايل لكم نزلو مواضيع وطالبو بهالامور ؟ ويدرون اهلك انتس كاتبتن الموضوع ؟

اولا انا محد قايل لي انزل هالمواضيع واطالب بس انا كنت ابي اشوف ردة فعلك على موضوعي يوم شفتك بغيت تنفقع على موضوع امو..........
وثانيا وش دخل ابوك اذا اهلي دارين ولا لا يعني انت حرمتك تعرف ولا اهلك؟؟؟اكيييد لا لأنك ولد (هذا يثبت نقطة امو)
ثانيا انت ليش متحيز اهلي دارين وانا دايم افتح هالمواضيع معهم..
بس اللي قاهرني ان البنات ساكتين وماكلين تبن ..
انت شكلك متأثربالافلام (اجل واحد غاصبني اكتب هالمواضيع هاه!!)
ملاحظة:
انت متأثررر بقوة بفلم pirates of the caribbean اجل الاقامة بجزر الكاريبي ؟؟!!
انت شكل عمرك اصغر من 17 رح وكلم اللي قدك

[الأسيــ بنت ـاد]

مشكورة اختي الأسيـــ بنت ــاد على المرور لكني حابة اوضح بعض النقاط..
أولا مو كل العائلات تسوي كذا ولا تقولين نادريييين مررررة اذا انتي تشوفينهم قليلين فأنا اشوفهم أكثر...
وثانيا إذا انتي مو حابة تسوقين فأنا حابة, لاتقولين كذا وغيرس يبي...
وانا ماعتبره تعب بالعكس اريح لي واريح لأهلي ولامنة الرجال ..............
اتمنى انس تتفهمين المواضيع قبل لا تتسرعين وتكتبين
مع تحيات أحلى عضوة في هالمنتدى (سوبر جونيور)

العفــو ..

شوفــي ياقلــبي حنــا هنـا للنقاش .. وكـل واحد يبدي وجهه نظــره حول الموضـوع المحدد ..

وكــل شخـص وله وجهه نظر ويجب عـلى الآخر احترامهــا مهمــا كــانت ..

ووجهـات النظر إما أن تحمـــل الصوااب .. أو تحمــل الخطــأ..

ــــــــــــــــــــــــــــــــــــ

وبالنسبـــه للسواقــه .. أنتي قلتــي تبين تسوقيــن أنا قلت ماابي ..

الاراء أختلفـت .. أنا بحترم وجهه نــظرك وأنتي كذلــك أحترمي واجهه نظــري ..

فكــل أنســان لــه أشيــاء يفضلهــا وله اشياء مايحبهــا..

أنا هنــا ماابي اسوق لاكــن أنتي تبغيــن ..

وبالنسبــه يوم قلت لك نجيب سواقــه.

مجــرد اقتراح لمن مثلــي من النساء اللواتــي لايريدون القياااده ..

تقبلينــــــي ::

الأسيـــ بنت ــاد

[قطرة الندى]

معليش يا قطره ندى ... البنت اصلا بزر فاكيييد بتوافق ... (لو قلنا ان ابوها تكرم وسالها) ما تعرف شي عن الزواج .... تحسبه فستان ابيض وعرس .

إمــــو....

أسمحلي الزمن تغير ...

في الماضي كانت البنت ماتعرف عن الزواج غير الفستان الأبيض ...

أما الآن بعصر القنوات الفضائيه .. والنت .. وكلام الصديقات وغيرها...

صار الصغار يعرفون بأمور الزواج قبل الكبار ..

[رمـــ نجد ــايل]

والله ماينعرفلنا حنا يالبنات إن رفظو يزوجوننا قلنا ظلمونا وإن زوجونا قلنا ظلمونا
أعتقد إن الظلم بسوء الإختيار موتزويج البنت صغيره ولا كبيره وبعدين ماأظن إن فهزمن زواج غصب يعني لو ماودك كان ترفظين
أصلن هالزمن هبل بالمبزره وحركاتهم من أفلام كرتون وشلون عاد لصارو مراهقين ومقابل هالقنوات يعني إذا مازوجوكم أبلشتوهم بالطلعات والاسواق لإشباع عواطفكم فالحلال أخير لهم ولك من الحرام
ولاكن كما ذكرت الظلم في الإختيار وليس من التزويج في الصغر هذا رائيي

[رمـــ نجد ــايل]

بالنسبه للسواقه اللـــــــــــــــــــــــــــــــــــــــــــــــ ــــــــــــــــــــه لا يجيب اليوم اللي اشوف اخواتي يسوقون ماسلمنا بالبيوت نسلم بالشوارع... الله يهديكم بس
وين الانوثة وين الملكه في بيتي وين الأميره اركب وراء وهم يوصلوني وين ما ابي وبعدين اللحين مالكم عذر السواويق انتشرت إنتشار فضيع واوين في بريده
كل وحده تحط عند بابه سواق احسن لك وارحم للرجال
وبعدين والله من الكذب اللحين لو يبي ينتظرك زوجك عند بوابة الحسون بالسياره قلتيله حط سيارك واجهت الشارع العام وشلون لاساقت الحريم وين بتخلين وجهه
او حنا يحطلنا كباري وهم تحت
ولله بغبسه

[الزنون]

الزواج اتركه لكم

اما قيادة المرأة للسيارة

انا احتري اليوم اللي تسوق فيه المرأة

طبعاً انا ما راح ارضى لاحد من قريباتي تسوق

لكن بشوف وش عند البنات اللي كل يوم نبي نسوق نبي نسوق

بشوف اذا ساقوا وش يصير

الحين عاجزين نتحملكم وانتم راكبين في باص المدرسة واستهبالكم ورقصكم قدام العالم

وناوين تسوقون

عاد من زين السواقة

تخيلوا معي يا عيال بنت تسوق واذا وقفت عند الاشارة واللي واقف على يمينها الزنون والله من الشماته

وتلقاها حاطه خشتها بالمراية تتمكيج والله من الشين

اقول اقضبوا بيوتكم وانتم معزين مكرمين

عادي اللي يبي يشن هجوم علي احتريكم يالـ......

تحياتي لكم يابنات السواقه

[سوبر جونيور]

السلام عليكم ورحمة الله وبركاته
أولا ..أبي اعرف بعض اعضاء منتدى بريده ليش ماينمون عقلياتهم شوي ويرتقون بكلامهم أقرأ انا بالمنتديات الأخرى مواضيع ولها ناقدين لا كن بأسلوب و(ادب) مع الشكر على كتابة الموضوع لاكن اللي أشوف هنا بالمنتدى لاء فيه ناقدين مع إحترامي لهم قليلن ادب وفيه أستهزاء وتقليل من الشخصيه وأستهتار حتى وصلت بكم للأستهزاء بأهاليهم ماأكتفيتو بالناقد فقد والله عيب عليكم وأرتقوا بكلامكم شوي وحاولوا تتكلمون باللغه العربيه حتى وانا بريداويه بعض الكلمات ماافهمها
خلونا نتكلم بالغه العربيه عشان الكل يستفيد ...
ثانيا...حبيبتي سوبر جونيور قيادة المرأة بمملكتنا العربيه السعوديه المحافظه ولله الحمد الأغلبيه معارض لهالفكرة سواء من الرجال المحافظين والغيورين
ومن نسائنا المحافظات على دينهن وسترهن ..
س؟؟هل يعقل أن أمرأة تريد قيادة السياره وهي محجبه بالكامل؟؟؟
إذا كان جوابك نعم فجوابك غريب ... وأما إذا كان لا فيعني أن قيادة المرأة تدعو للتبرج والسفور وهاذا مالا نرضاه .
أما بالنسبه لموضوع الزواج البكر فهاذا مو عيب ولاهو حرام والزواج أستر للبنت إحدى زوجات النبي تزوجت وعمرها(9)سنوات.
بس مو بالغصب ولا يكون من دون أخذ رأي البنت اذا شاوروها ووافقت الحمد الله

عندي ملاحظه أبي أقولها وأتمنى تتقبلوها بصدر رحب فيه أعضاء معينين يدخلون بعض الواضيع وأكثر ردودهم نقد وأستهتار بالكاتب من دون شكر ؟؟؟ اتمنى أنهم يرفعون انفسهم شوي؟؟؟؟؟؟
تقبلوا مروري
شـكــ وبارك الله فيك ـــرا لك ... لك مني أجمل تحية .

أولا انا حابة اوضح لك نقطة يمكن انتي مافهمتيها حنا ما نستهزيء بأهالينا حنا نتناقش عن مواضيع واخطاء يقع فيها المجتمع لو كان هذا الشي يصدر عن اهلنا(لاسمح الله) ماراح نناقش فيه الناس واعضاء احنا مانعرفهم لكن هذي قضايا تخص المجتمع ككل ..واذا كنتي تعترضين من طريقة عرضي للموضوع او نقاشي له فشوفي ردود الاعضاء اللي تسود الوجه شوي ويكفخوني لدرجة انهم قفلوا احد المواضيع اللي اطلعت عليها في هذا المنتدى, بسبب ردود الاعضاءالسيئة!!..
وثانيا:بالنسبة لقيادة المرأة فجوابي هو "نعم" وليــــــس بغريب لانني لا ادعو الى الفجور انما قضاء المرأة حاجاتها وعدم حاجتها لإذلال نفسها للرجل الذي لا يستطيع غير ايهامها بأنها ملكة في المجتمع وانها مخدومة من قبله و و و .. ولا نرى من ذلك شي الا انه كان كان في الماضي؟!..<<عشان تفهمين كتبت بالعربي"الفصحى"
وثالثا واخيرا:انا ماعترضت على زواج الصغار في السن كعائشة رضي الله عنا لأنه يكفيها انها تزوجت النبي!!افضل رجل في العالم !
بس انا اتكلم عن اللي يزوجون بناتهم بسبب ديون او غرض أو حتى مو شرط ممكن يصير الرجال كبير عليها مرة ...وغير كذا ماياخذون رايها!!
اتمنى انك تكونين فاهمة اللي اقصدة مو تردين كأنك ماقريتي شي

[سوبر جونيور]

والله ماينعرفلنا حنا يالبنات إن رفظو يزوجوننا قلنا ظلمونا وإن زوجونا قلنا ظلمونا
أعتقد إن الظلم بسوء الإختيار موتزويج البنت صغيره ولا كبيره وبعدين ماأظن إن فهزمن زواج غصب يعني لو ماودك كان ترفظين
أصلن هالزمن هبل بالمبزره وحركاتهم من أفلام كرتون وشلون عاد لصارو مراهقين ومقابل هالقنوات يعني إذا مازوجوكم أبلشتوهم بالطلعات والاسواق لإشباع عواطفكم فالحلال أخير لهم ولك من الحرام
ولاكن كما ذكرت الظلم في الإختيار وليس من التزويج في الصغر هذا رائيي

انت شكلك ولد ؟! اجل بنت تقول ان اهلها ظالمينها في كل الحالات!!!!!!
طيب اذا كنت تشوف ان الظلم هو في الاختيار مو في العمر طيب ليش مايزوجون الرجال وهم صغار؟؟زي ماقلت انت العمر مو مشكلة اهم شي الاختيار خلاص نجيب لهم حرمة سنعة تعرف تطبخ وتنفخ و تربي-وهذا اللي تبونه_ونقووول خلاص مافي مشكلة ولا فيه ظلم..
وبعدين انت تقول ان البنات كل همهم فلم كرتون _تكفي عاد العيال افلام ووو_اجل ليش تزوجونهم مادام كذا اهتماماتهم ؟؟
وبعدين تعال انت وش دخلك اذا ابلشنا اهلنا بالطلعات ولا لا ؟؟مستعجل عالزواج يعني؟؟تبي وحدة صغير بحجم عقليتك!خذ لك وحدة على قد عقلك بس لاتظلم الجميع برأيك المتخلف..
واخر شي حابة اقوله انه وااااضح انك ولد تدري ليه لأنك اخطأت في هذه الجملة((إذا مازوجوكم أبلشتوهم بالطلعات والاسواق لإشباع عواطفكم ))ابشتوهم هاه؟؟؟
يعني انت مو منا..
طيب مومشكلة بس كنت حابة اوريك خطأك عشان مرة ثانية ماتقع فيه اذا كنت حاب تلعب عالناس.

[سوبر جونيور]

الزواج اتركه لكم

اما قيادة المرأة للسيارة

انا احتري اليوم اللي تسوق فيه المرأة

طبعاً انا ما راح ارضى لاحد من قريباتي تسوق

لكن بشوف وش عند البنات اللي كل يوم نبي نسوق نبي نسوق

بشوف اذا ساقوا وش يصير

الحين عاجزين نتحملكم وانتم راكبين في باص المدرسة واستهبالكم ورقصكم قدام العالم

وناوين تسوقون

عاد من زين السواقة

تخيلوا معي يا عيال بنت تسوق واذا وقفت عند الاشارة واللي واقف على يمينها الزنون والله من الشماته

وتلقاها حاطه خشتها بالمراية تتمكيج والله من الشين

اقول اقضبوا بيوتكم وانتم معزين مكرمين

عادي اللي يبي يشن هجوم علي احتريكم يالـ......

تحياتي لكم يابنات السواقه

انت تحتري اليوم اللي يسوقون فيه الحريم عشان تفرغ رغباتك ومغازلتك عليهم وحنا ممنوعين من السواقة عشان اشكالك.
حنا اللي نتسهبل ونرقص "قدام العالم"في الباص ؟؟!!الله اعلم من اللي يرقم ويجدع اوراق فيها رقم جواله على البنات اللي في الباص ولا اذا كان عاقل ابتسم وقال كم كلمة !
ومالك دخل وش نسوي اذا وقفنا عند الاشارة نتمكيج ولا نتزين مو شغلك .اجل تبينا ننغف زيكم عند الاشارة..
واخر شي ابغا اقولك اني انا اول وحدة تبي تشن هجوم عليك ..
ليش ماكملت جملتك>>>(( يالـ....)) ؟؟ ولا اخلاق العالية ماتسمح لك ههههه
اخاف انك ماودك تقولها عشان ماتنطرد من المنتدى بسبب اخلاقك وذوقك العالين

[خط أحمر]

:x11:
السلام عليكم ورحمة الله وبركاته
مساء الخير
هذا اول موضوع لي في المنتدى واتمنى انكم تتفاعلون مع الموضوع
طبعا الموضوع راح يكون متعدد النواحي
راح ابدأ باول شي وهو الاهم:زواج البنت مبكرا......
فيه ناس مايخافون الله يزوجون بناتهم وهم صغار بعمر تحت 18 سنة والأردى ان الزوج يصير عمرة فوق الثلاثين ؟؟!! >>مستانس عميمي لاقي له أهل بايعين بناتهم عشان الفلوس! وش ذنب البنت اذا كان الابو ملحوس عقله....:for1:
انا ماعتبره زواج اعتبره اعتداء طبعا الموضوع ماراح يخلص لكن احب اختصر الموضوع

هذا السن ماهو عيب ولا حرام ،بالعكس ستر للبنت ،والرسول تزوج عائشه وهي بنت تسع سنوات،،،فالزواج غض للبصر وأحصن للفرج،وطالما هي ماراح تشيل دبة الغاز الى الدور الثاني مافيها شيء تتزوج بهذا السن


ثانيا احب اتكلم عن قيادة المرأة للسيارة اول شي الحين ليش الرجال رافضين الفكرة تماما؟؟ مو من حقنا هذا؟؟ اولا اذا كنتم تودونا لمشاويرنا ذيك الساعة تكلموا ويقولون الحرمة مايصلح تطلع من بيتها الا لضرورة؟؟بعذرنا الرجال ماودونا يجي من الدوام ينام همن يقوم بعدين يروح للاستراحة ناهيكم عن الرجال اذا قام يتزوج على مرته يقولون ياحوووول مهيييب سنعة وماتعرف تطبخ(مثلا يعني واحد من عشرين مليون عذر) المهم اذا جت تعطيه اغراض البيت يقوم يكتب عنها في المنتديات وفي كل مكااان عن ظلم الزوجة له بالورقة اللي فيها لستة اغراض مليانة !لعنبوا بليسك هذا لبطنك مو لها:e9:!!!!
من أسباب إلإنحلال في الأخلاق و تردي الوضع بالمملكه:
-البنقال،،لعبوا بالبيضه والحجر ولايخفى على أحد
-الجوال مع البنت،عرف القاصي والداني المغازله التي لم يعهدها باي زمن قبله
-النت للبنت ،أستراحة لقاء الشباب مع الشابات والمراهقين مع المراهقات ،صوت وصوره
-القنوات المجانه،غذت المراهقين ونشرت الفساد في البر والبحر واتبعها الكثير
-وإذا ساقت البنت راح تصير هذه المشكله الخامسه في زيادة الإنحلال ،،والأيام بيننا
فكري بكل نقطه لحالها ،،وكفى
طبعا انا حابة اسمع رأيكم اول (مع اني ابصم انكم بتقومون علي )بس هذي وجهة نظر وحوار لازم نحترم وجهات النظر.
انا مو حابة اكمل الين ماتشرفوني بردكم
خالص الشكر لسعة صدرك

[دانتيل]

مادري جلست اتابع الردود واثره يبدو لي انقلبت هواش ( كالعاده ) واجي انطهن وابعلق على الموضوع اختي انتي قلتي صغيره عمره 18!!!

من وجهت نظري سن 18 & 19 هو افضل سن لزواج البنت وبالنسبه لرجل ذكرتي 30!!

ممتاز هذا افضل عمر لزواج صدقني من واقع تجربه افضل للبنت تتزوج بهالعمر والرجل كذالك


شكرا خيتو دمتي بود

[لمعةالألماس]

..
أتمنى من كاتب/هـ الموضوع ترديد هذا الدعاء:

" اللهم يا مقلب القلوب ثبت قلبي على دينك"

الله يحفظ المسلمين والمسلمات من الفتن

ماظهر منها وما بطن ..

رزقك الله حب الطاعه والعمل الصالح...

[سوبر جونيور]

مادري جلست اتابع الردود واثره يبدو لي انقلبت هواش ( كالعاده ) واجي انطهن وابعلق على الموضوع اختي انتي قلتي صغيره عمره 18!!!

من وجهت نظري سن 18 & 19 هو افضل سن لزواج البنت وبالنسبه لرجل ذكرتي 30!!

ممتاز هذا افضل عمر لزواج صدقني من واقع تجربه افضل للبنت تتزوج بهالعمر والرجل كذالك


شكرا خيتو دمتي بود

اولا انا ماقلت ان البنت اي عمرها 18 صغيرة ان اماجبت طاري العمر ,,,الا اا كانوا اعضاء اخرين فهذا شي ثاني ونفس الشي انا ماقلت انه 30 زين للرجل انا ماأذكر اني حددت العمر بالضبط...وشكرا
دمتي بخير .

[زوجة نصراوي]

..
أتمنى من كاتب/هـ الموضوع ترديد هذا الدعاء:

" اللهم يا مقلب القلوب ثبت قلبي على دينك"

الله يحفظ المسلمين والمسلمات من الفتن

ماظهر منها وما بطن ..
رزقك الله حب الطاعه والعمل الصالح...
شـكــ وبارك الله فيك ـــرا لك ... لك مني أجمل تحية . صدقت كلامك عين الصواب
xxxxxxxxxxxxxxxxxxxxxxxxxxxxxxxxxxxxxxxxxxxx

[جوهرة بريدة]

يغلق الموضوع لتنقيحه وذلك بعد خروجه عن مساره