فيني غصة :( .. متى ينقرض فيتامين (و) العفن !

[T U L I P]

السلام عليكم ورحمة الله
غصة يمكن تروح لو فضفضت اسمحوا لي :(

متخرجة بامتياز من عدة سنوات ومعي خبرات ومعي دورات وتقدمت على وظيفة
وببالغ الرضى كنت بتقبل لو كانت مو من نصيبي وذهبت لمن تستحق
ووالله لأدعي لها بالتوفيق وادعي لنفسي بالعوض والخيره فيما اختاره الله ..
لكن ان تكون صريحة وتقال من قبل احد الموظفين:
الوظيفة بتروح للي معها الواسطة !!! يعني اغسلي يدك :(
شي محبط صح ..
ومحزن للغااااية
..
بالأمس كانت الواسطة من المحرمات وكانوا يتهامسون بها همس واغلب الاحيان ما يدرى عنها
اليوم صارت من البديهيات وتقال بكل وسااااااعة وجه !

...
طيب ..

اللي بياخذ الوظيفة على حساب احد مستحق .. او اللي كان السبب والواسطه ..
ما يحس بدمعه اسى ممكن تنزل من المستحق نفسه وقتها
مرارة الخذلان .. ومرارة الاحساس بالضعف .. ومرارة الانكسار
وشلون ينام مرتاح ومبسوط وهو السبب بقطع رزقه
طيب هذا مظلووووووم ما يخاف يدعي عليه !


ليش بس :(
وشلون بياخذ راتبه وهو مرتاح .. واللي كان المفروض انه يشغل وظيفته بأمس الحاجة لراتب يغطي احتياجه
وممكن يكون احتياج عائلة كاملة!
هالشخص اللي شغل الوظيفه عن طريق واسطه ما يدري ان الله سبحانه وتعالى ما راح يطرح البركه بشغله
ما يدري انه ممكن تجيه مصايب وبلاوي يكون الله سلطها عليه بسبب هالشيء
ما يدري ان راتبه ما راح يكون مبروك وممكن يجي بيوم يتساءل (انا وين يروح راتبي يخلص ما احس فيه )
والكلام موجه للي يتوسطون بعد
.
الواسطه او الشفاعة مطلوبه لو كانت ما تضر احد .. لو كانت موب على حساب احد ..
لو كانت من باب طرق ابواب الرزق مو باب من ابواب سرقة الرزق :(

الله يرزقنا اخير مما نتمنى .. انا واثقه تمام الثقه انه كل شي بأمر الله
وانت تريد وانا اريد والله يفعل ما يريد
لكن هي فضفضة ورسالة حبيت اسطرها عذرا لو كانت حروفي مبعثره كتبتها واعتمدتها هنا مباشرة
مغلفة بالمرارة لعل وعسى الرسالة توصل للمعنيين اصحاب الواسطات ويعرفون البلاوي اللي تجيهم وش سببها

*
فضفضة قابلة للنقل الاداري لو كان مكان الموضوع غلط والعذر منكم سلفا
.
والسلام عليكم

اختكم
tulip