مواصفات زوجة المستقبل اصبح في الوقت الحالي (( حضك ونصيبك )) ومن السبب !!! [الأرشيف]

صـعب المنـــال

26-02-08, 06:16 pm

السلام عليكم ورحمة الله وبركاتة

الموضوع مبين من عنوانه أنا قدر الله علي وقررت إني أتزوج أو بالأصح واجهت اصرارات والحاحات من أهلي إني أتزوج وبمعنى آخر غصب عني لأني اكبر إخواني وتعرفون الزواج شر لابد منه فهذي مو قضيتي ولا هو المهم قضيتي هي ؟؟

إن أهلي أو خواتي هن اللي حاطات المواصفات من عندهن ومقررات ومخلصات بس يتنظرن أبوي يعطيهن الموافقه لاحضو يعني أنا زي الأطرش بالزفة !!

المهم اليوم جو لمي خواتي وقالن لقينا لك وحده مواصفاتها كذا وكذا ومادري ايش وخرابيط فاضيه مع إن كل المواصفات اللي يبونها أنا ماني مقتنع فيها بس كل ماتكلمت قالو ((لاتفشلنا قدام الناس)) لازم نزوجك مو أي زواج ولا أي مره يعني الشغله كلها فخفخه وطهبلت حريم والمشكلة إني قسم بالله ماتشرطت كل الي أبيه أنها تكون اجتماعيه وخفيفة دم ومقبولة بس والي ذكروها لي أهلي مافيها من ذولي ولا ذره وهذي المصيبة ..

والحين أنا بين مو نارين بس بين عسبان مولعه والمشكلة لازم ارضي أبوي ولازم ارضي خواتي على حساب حياتي ومستقبلي !!

ومع كل اللي يصير لي أحاول امنع أهلي أو اتعلث بأي شي عشان نأخر السالفة شوي ومافيه علثه ولا أعذار إلا وقلتها ..

لاكن أنا أبي اعرف هل كل الحريم تفكيرهن كذا يعني معقولة الواحد إذا بيتزوج لازم يمشي بشور أهله وكلمت الحريم هي اللي تمشي وحنى بلوشي لانهش ولاننش يعني هذا زواج وعشرت عمر مو خرابيط وطهبله ؟؟

الأسترليني

26-02-08, 06:38 pm

المسأله بسيطه جدا ولا تحتاج تفكير كل اللي عليك تسويه هو انك تحرك براطمك الله لا يهينك وتقول معي حرفين

اول حرف (((( لام ))))

ثاني حرف (((( ألف ))))

اللام + ألف = لا

شفت وشلون العمليه بسيطة جدا

الأسترليني،،

بنت البدائع

26-02-08, 06:42 pm

والحين أنا بين مو نارين بس بين عسبان مولعه والمشكلة لازم ارضي أبوي ولازم ارضي خواتي على حساب حياتي ومستقبلي !!

ياخوي طفّ نارك بيدّك قبل تولع فيك للأبد ,,,
الزواج لك الرأي الأول والأخير فيه ,, ورأي الأهل ثانياً ,,

تماكن عمرك ولاتظلم نفسك وتظلم بنت الناس معك

لاكن أنا أبي اعرف هل كل الحريم تفكيرهن كذا يعني معقولة الواحد إذا بيتزوج لازم يمشي بشور أهله وكلمت الحريم هي اللي تمشي وحنى بلوشي لانهش ولاننش يعني هذا زواج وعشرت عمر مو خرابيط وطهبله

شور الأهل شي أساسي لكن مو بطريقة إرغام وإجبار على شي مايرضي الولد
الإتفاق×الإتفاق ....

موفق ودمت بود ....

باونتي

26-02-08, 06:59 pm

انت الرجال

الكلمة كلمتك

مين اللي بيتزوجها اهلك والا انت

ماارتحت بلاش ارفض وبقوة

عشان ترتاح انت ولاتظلم البنيه معك

الله يوفقك ويكتب لك مافيه الخيره

جبل السكر

26-02-08, 07:07 pm

بصراحه مشكلتكـ غريبهـ (حالهـ شاذهـ)
اللي أعرفوانوالأهل يبحثو عن العروس حسب مواصفات الابن
واتوقع اخواتكـ اهتمو بالجانب الشكلي فقط
وحط في بالكـ استحالهـ تجتمع الصفات المطلوبهـ كلها في شخصها
يعني حتلاقي صفهـ وصفهـ لا
وهنا بيدكـ تحل الموضوع الا اذا كونت مستسلم
ونصيحتي لاتقدم على خطوهـ الا وإنت مقتنع فيها
يعني لاترتبط الا بالانسانهـ التي تراها مناسبهـ لكـ ولا تلتفت لضغوط أهلكـ
صحيح حتتعب في البدايهـ بس بالنهايهـ حتكسبها لأنها حياتكـ ومستقبلكـ تستحق أن تجادل أهلكـ بإستخدام اسلوب الإقناع لان الموضوع يخصكـ وحدكـ

واجهت اصرارات والحاحات من أهلي إني أتزوج وبمعنى آخر غصب عني لأني اكبر إخواني وتعرفون الزواج شر لابد منه فهذي مو قضيتي ولا هو المهم قضيتي هي ؟؟

كيف غصب عنك يعني ماوصلت لسن الزواج ولا تبغى (تعنس) :)
وفي نقطهـ مهمهـ حبيت أوضحها الزواج سنة الحياهـ وليس شر لابد منو

لاكن أنا أبي اعرف هل كل الحريم تفكيرهن كذا يعني معقولة الواحد إذا بيتزوج لازم يمشي بشور أهله وكلمت الحريم هي اللي تمشي وحنى بلوشي لانهش ولاننش يعني هذا زواج وعشرت عمر مو خرابيط وطهبله ؟؟

هذا يرجع للعادات والتقاليد لأن الحريم يعرفوا بعض أكتر
وهدا مايعني بأن كلمة الحريم هيا يلي تمشي إلا إذا كان الإبن سلبــي
مالو رأي ومتل ماذكرت انو زواج وعشرة عمر وهدا الموقف يتطلب منكـ بأن يكون لكـ رأيكـ الخاص ولأن رأيكـ مهم لابد يكووووووون مسمووووووع

ختاماً
أسأل الله لكـ التـــوفيق في إختيار الزوجهـ الصالحهـ

تحيتي

سماااهر

26-02-08, 07:07 pm

للأسف هذه العاده درج عليها الناس .. تدخل الأهل وحكمهم باأختيار
الزوجة للابن دون سماع رايه ...وقد يكون الأختيار غير مرغوب ...
لكنه يحقق رغبه أهلة الذين لم يتركوا الفرصة لابداء رأيه ..وبهذه الطريقه
يتم الزواج على اسس غير سليمة...لذا قل أن يكتب النجـــــــــــاح.

شف عاد لاتصير ولد "الماما"و تسكت قلهم مواصفاتك اللى تبغي
وخلهم يبحثون عنها ولا وصى رفيقك ...
قلهم هذى عشرة عمر مو لعبه... ماكل شي يتعبر..!!!!!!!!!

أبوالبراء

26-02-08, 07:14 pm

واله العظيم انكم كلكم صااااااااااااااادقين في كلامكم يااااااااااااااااااخوي ارفض والي مو عاجبه يروح يبلط البحر ههههههههههههه اااااااااااااااااااااافا انت شنب افتله عليهم لا تكون ذنب ااااااااااااااهـ راحة علوم الرجال وينك ياصلاح الدين .
ههههههههههههههههههههههههههههههههههههه

اقول اعطهم اقنووووووووووور وبس

تحياتي ابو البراء

حزام الأمان

26-02-08, 07:23 pm

أهلك غريبين مين الي بيتزوج ؟؟؟ هم والا أنت ؟؟؟؟

* ويــن الوفــا *

26-02-08, 07:55 pm

لا خواتك مختاراته>>> وبعدين فيها وفيها صدقني خلك عند كلمتك وانت اللي قرر لانه خاص فيك بعدين ماخبرت الاهل اللي يقرروا مستقبل الولد او البنت لانك انت اللي تعيش معاها !!!!!

رحيل

26-02-08, 08:11 pm

طبيعي مثل ما قالوا الأخوان إنك ترفض

إذا ما إرتحت قل "لا" دامه يمديك لا يجيك يوم وتتحسف

وبعدين أنت الله يهديك فاتح لهم المجال على الآخر ومقفله على نفسك

بصريح العباره قلهم إذا تبوني أتزوج أتزوج بالمواصفات اللي أبيها وغيره لا

وبعدين إذا الحين ماخذت قرار بموضوع يخصك وش بتسوي لما تتزوج ؟

أتمنى إنك تتختار عروستك بنفسك ولا تفرض عليك

وترى بهذا الزواج مو تظلم نفسك بس حتى اللي تترتبط فيها بتنظلم معك

تلميذة الحياة

26-02-08, 08:54 pm

كل شي بيدك..

انت وين كلمتك؟؟!!

والله غريبه شكلك حاط عينك على وحده ثانيه صح ؟.. <<اذا كذا خبر اهلك يخطبونها لك ..

واذا غير كذا بإمكانك ترفض وبسهوله ..:)

أبو تهاني

27-02-08, 12:39 am

لاكن أنا أبي اعرف هل كل الحريم تفكيرهن كذا يعني معقولة الواحد إذا بيتزوج لازم يمشي بشور أهله وكلمت الحريم هي اللي تمشي وحنى بلوشي لانهش ولاننش يعني هذا زواج وعشرت عمر مو خرابيط وطهبله ؟؟

صعب المنال الله يرزقك بالزوجه الصالحه العاقله المتواضعه .. آآآآآآآمين

يا خلفهم الدعو ما هي يوم أو يومين

الدعو عشرة عمر

لا تخطب إلا و أنت مقتنع و إذا كنت أنت فدائي

و تبي تضحي بنفسك علشان خاطر خواتك و أمك

فكر بالزوجه وش ذنبه المسكينه ؟؟

لأنه هي اللي راح تخسر أكثر منك إذا طلقته

و صدقني إن الرجال ما يقدر يعيش أو يتقبل زوجته إذا طابت نفسه منها

و ما بني على باطل فهو باطل

نـدى الـورد

27-02-08, 12:42 am

صعب المنال الله يرزقك بالزوجه الصالحه العاقله المتواضعه .. آآآآآآآمين

يا خلفهم الدعو ما هي يوم أو يومين

الدعو عشرة عمر

لا تخطب إلا و أنت مقتنع و إذا كنت أنت فدائي

و تبي تضحي بنفسك علشان خاطر خواتك و أمك

فكر بالزوجه وش ذنبه المسكينه ؟؟

لأنه هي اللي راح تخسر أكثر منك إذا طلقته

و صدقني إن الرجال ما يقدر يعيش أو يتقبل زوجته إذا طابت نفسه منها

و ما بني على باطل فهو باطل

نعم صحيح

,

علشانك بس

27-02-08, 02:36 am

ماشاء الله خطبات ووناسه ,,
اولا مبروك مقدما وقبل الهوشات ,, ثانيا انت تحسبك بمصر يوم انك تقول لا انا بختار ,, ولازم اعرفها واعرف طبيعها ومدري كيف ,, لا عسى ربي يووفقك ,,
انت هنا بالسعوديه ,, ماتدري الا وهم مدخلين لك عروستك على حسب مواصفات تم اختيارها من قبل الاخوات الملاقيف ,, وانت كيفك عاد جازت لك ماجازت لك هذي مشكلتك ,,
اكثر نسب طلاق بالعالم تلقاها بالسعوديه ,, لانهم يدخلون له عروسته وهو مايدري وش تكون ,, لايعرف وجهها زين ولا اطباعها ولا اي شي فيها ,, تلقاه شايفها الشوفه الشرعية ويكتشف بعد الزواج انها مهبولة ولا حولا ولا يجيها حالات نفسية ,, يازينهم في سوريا ومصر يطلع معها ويشوفها ويعرف وش تكون ويسولف معها ,, واذا شاف انها تصلح له وحصل بينهم قصة حب خطبها ويعيشون في سبات ونبات ويخلفوو صبيان وبنات ولاطلاق ولا شي ,, ( لااحد يجي لمي يقولي ترى اللي يسوونه حرام ,, لاني وقتها بسفهه ولانب راده عليه ,, انا ذكرت طريقتهم لانها فقط جايزتن لي فقط بغض النظر عن حكمها الشرعي ) ,,
شوري عليك ياصعب المنال انك تنحاش وفي رواية تهج من البيت ,, ولازم تغيب عن البيت مايقارب لشهر كامل ,, بعدين دق عليهم واذا جلسو يصيحون ويتوسلون لك يبونك ترجع قولهم ياتزوجوني بالمواصفات الي انا ابيها ولا بنتحر ,, وقتها بيقولون لك تعال ونخطب لك اللي تبي ,, بكذا تكون مازعلت اهلك ,, وتتزوج اللي انت تبي ,,
هذي مجرد نصيحه اتمنى تطبقها لانها بتنفعك بعد مشيئة الله ,,,
يالله فووووتك بعافية ,, والف مبرووك مقدما ,,,

شموع تحت المطر

27-02-08, 02:51 am

شكل خواتك طافاتن بك عشانك الولد البكر..

وش هالخربطة يختارن لك.. اجل هي لوحة يكشخون فيها عند الناس..

اتركهن بس لاتطيعهن ومهب زعلين واذا زعلوا مصيرهم بيرضون..

مافيه نار ولاشي.. انت مصدق عمرك..:) :)

مبروك مقدماً..

هامة حاسوبية

27-02-08, 03:23 am

http://filaty.com/i/710/f3dd562.h---11.gif

أنت من سيتزوج وليس أهلك

اختر المواصفات التي تريدها ، من ناحية الشكل والتعامل والدين والأخلاق ، ودع لأهلك مهمة البحث

ولكن لا تكن مسرفاً في طلباتك ، فالجود من الماجود :)

http://filaty.com/i/710/f3dd562.hh----2.gif

& جمال الطفوله &

27-02-08, 05:01 am

مبروك مقدماً ..

بس واضح من كلامك ان خواتك موكبار بالعمر
ويتفهمون وضعك ..

وضح لهم ..

وفهمهم .. وش تبي

وش ماتبي بالمواصفاات ...

والله يوفقـــك ..

صـعب المنـــال

27-02-08, 02:10 pm

الاسترليني مشكور على المرور ووجهت نظرك سليمه بس معي انا باتت وصارت موضه قديمه لأنهم اذا قلت لا يسألون عن السبب ..

بنت البدائع اشكر مرورك وتعليقكشور الأهل شي أساسي لكن مو بطريقة إرغام وإجبار على شي مايرضي الولد
الإتفاق×الإتفاق ....

شور الاهل شي اساسي بس ماني قادر افهمهم اني انا الي بتزوج مو هم يعني الاختيار لي مو لهم هذا الي ماني قادر اوصلهم ..

باونتي مشكور على المرور

انت الرجال

الكلمة كلمتك

مين اللي بيتزوجها اهلك والا انت

ماارتحت بلاش ارفض وبقوة

عشان ترتاح انت ولاتظلم البنيه معك

الله يوفقك ويكتب لك مافيه الخيره

عارف اني انا الرجال بس الامور هذي مافيها انت الرجل والكلمه كلمتك لازم يكون للأهل رأي وانا ابي يعطوني رأي مو يجبروني بس ماني قادر اوصلهم الشي هذا..

بسكاتي اذلك

27-02-08, 02:41 pm

يؤيؤيؤ والله حاله سالفتك قريبه من سالفة امي تروح تخطب من ناس وهي ماقالت لخوي

بس مااخطبت يعني تلمح يوم قالت لخوي قالها من قال اني ابتزوج وامي ضاع وجهه <= هذي اللقافه

وكل مادقت امي على الحرمه بدت الحرمه تلمح لها بخوي:(

بس الله يكون بعونك عاد عندنا احنا العرب الأن هذي المشكلة

واجهت الكثير من البنات والشباب على الزواج الاجباري او الزواج الانتقام من نفسه

واقصد الانتقام من نفسه هو ان تتزوج الفتاة أو الشاب بشخص لا يحبوه يعني اقصد

أن احرق دم محبوبتي الأولى او محبوبي الاول

وراح ارجع لصلب الموضوع وهو الزواج الإكراه او الاجباري يأما اناس عانت من هذا

الزواج وبيوت امبنت على الاساس الغلط من الأول والضحاية هم الأطفال

والعمر ليمر من الطرفين بدون وجود حميم بينهم او حب متبادل والغلط يرجع

للأهل هم من وافقو على هذه الجيزة يعني اتخذ قرارك بنفسك قبل مايطيح الفاس بالراس

وبعدها ماينفع ياليت:(

والله يوفقك يارب ويكتب لك اللي فيه الخيـــــــــــــــــر

العريف

28-02-08, 04:07 pm

خلف المعطف

28-02-08, 04:23 pm

مرحبا اخوي صعب

موضوعك رائع يناقش ظاهره منتشره بالسعوديه خاصه

اخوي انت قل لـ امك وهي راح تفهم الوضع

والله يوفقك ويزوجك بالزوجه الصالحه

طله قمر

28-02-08, 05:18 pm

ياخي ليش مكبرهااااااااااا

الراي الاول والاخير بيدك وربي يووووووفقك

اختك طله قمر

صـعب المنـــال

28-02-08, 08:28 pm

اول شي اشكر كل من مر على الموضوع واعطاني رأيه وكان ودي اعلق على كل رد بس والله ماعندي وقت لاكن اشكركم كلكم وترا المسأله مو سياره او حاجه عاديه للي يقول ارفض وقل لا وخلك رجل يعني خلونا واقعين شوي ترا هذا زواج يعني مو لعبه والمسأله مو بس فيني انا بكثير من الشباب والي ماجرب اقوله الدور جاي عليك والله يعينك والي مر الشي هذا عليه واعتبره انه شي عادي اقوله معليش انت مستعجل وفوق الازم ترا هذي عشرت عمر مو اي شي

صـعب المنـــال

28-02-08, 08:39 pm

عزيزي

كل اللي قالوا لك ( ارفض ) وانت اختار بنفسك وانت رجال و و و

كلهم مع احترامي لهم (هرج) تدرون ليش !

لانه لو يجوا واحد من اخوانهم ويقول ابي بنت الفلان وانا اشوف فيها اللي يناسبني وهي ( قصيرة) مثلا او الزين ماهناش او موب ذاك اللي

بيقولوا له (لا) او رح انت اخطبها بنفسك

يعني ياجماعة خلونا واقعيين هذا الحاصل

وزواج الشباب خصوصا ( اللي اهله شايفين فيه شوفة ) يجي على اختيار الاهل وعلى قولتهم ( حنا أبخص)

وبعدين وش بيقولون الناس عنا ( مانعرف نختار لولدنا) او ( هذا ذوقنا ) او ( هذا اللي قدرنا عليه) !!

يعني الزواج بالنسبة للأم والخوات مجرد ( فشخرة) وترزز قدام الناس بالعزايم لكن انت يالشاب المغلوب على أمرك اللي بتعيش معها كل عمرك ( تنطق ,, ) !! أو ( انت تعدلها على كيفك ) !!

خلها بالقلب عزيزي

العريف تكفا قرب راسك ابوسك قسم بالله انك وطيت على الجرح هذا الي ابوصله لهم وماني قادر وهذي هي مشكلتي ذكرت لهم وحده وعلى قولتك يقولون مافيها زود يعني بالعربي مافيها الفشخره والطهبله حقت الحريم وانه تفشل مايترززبه بالعزايم والعروس وهذا هو الي مضيق صدورهم ومادري وشلون اوصلهم اني اكره ماشوف الفشخره والترزرز وطاح حنكي وانا اهرج ولا حيات لمن تنادي وهذي هي مشكلتي ..

شموووخ

28-02-08, 08:48 pm

وتعرفون الزواج شر لابد منه فهذي مو قضيتي ولا هو المهم قضيتي هي ؟؟
الزواج شرعه الدين الاسلامي لحكمة ايجابيه والكل يعرفها
وماشرعه الدين وحلله فهو خيرا لنا
وعسى ان تكرهوا شئ وهو خيرا لكم
مادري ليش هالنظره للزواج بانه شر..!!

إن أهلي أو خواتي هن اللي حاطات المواصفات من عندهن ومقررات ومخلصات بس يتنظرن أبوي يعطيهن الموافقه لاحضو يعني أنا زي الأطرش بالزفة !!

والحين أنا بين مو نارين بس بين عسبان مولعه والمشكلة لازم ارضي أبوي ولازم ارضي خواتي على حساب حياتي ومستقبلي !!

ومع كل اللي يصير لي أحاول امنع أهلي أو اتعلث بأي شي عشان نأخر السالفة شوي ومافيه علثه ولا أعذار إلا وقلتها ..

البنت غالبا هي من تجبر على الزواج وان رفضت في داخلها بعض الصفات او كرهتها مع اني اتوقع بهالزمن قليلون هم من يجبرون على الزواج
والحين ماشاءالله بعض الرجال يجي ويقول لاهله انا ابي اتزوج فلانه يسميها بالاسم اخطبوها لي يمكنها حالات نادره بس تصير بالمجتمع

وانت رجل تملك امرك وتملك حرية الاختيار فمن حقك ان تضع الشروط التي تريدها وتجعل عملية البحث سهله بالنسبه لامك واخواتك
ولا اظن ام او اخت تختار لاخيها اي شي بل اتوقع انها بتصفط له الشئ الزين
بس لا ضير من ابداء وجهة نظرك بالموضوع فانت من سيتزوج ويرتبط بحياة جديده وليس هم فلا تجعلهم في قفص الملام ان لم يروق لك الحال بعد الزواج

لاكن أنا أبي اعرف هل كل الحريم تفكيرهن كذا يعني معقولة الواحد إذا بيتزوج لازم يمشي بشور أهله وكلمت الحريم هي اللي تمشي وحنى بلوشي لانهش ولاننش يعني هذا زواج وعشرت عمر مو خرابيط وطهبله

اكيد لازم تمشي بشور اهلك بس تحت قناعاتك مو تمشي ولا تدري وش الطبخه ولا تاكل بس تسد الجوع مع انك ماهضمت الطبخه
لا تحسسني بمدى ضعفك وانت رجل
فاهلك وخاصة الام يريدون لك السعاده ولابد من مصارحتهم بالامر ان لزم يعني لو فيه شغله ما اعجبتك قول يايمه هالشغله مابيها انا ابي كذا وكذا وكذا وصدقني اذا امك تبي لك السعاده بتاخذ طلباتك في عين الاعتبار

&نجدية كووول&

29-02-08, 02:04 am

صعب شوف الناس تختلف بأذواقهم كلن ناس ولهم متطلبات غير الثاني

لكن أهلك بما أنك العود فيحبون أنهم تكون زوجتك قد مقامكم وحظك شين دايم الأول تجارب

لكن أنت كون صريح مع أهلك ليش تكون رسمي عادي قول لهم أني أبغى مواصفات زوجتي اللي أنت

ترغبها وقول ماأبي تكون جمال بس دون خفة دم ومثقفة ومحترمة وبعدين أذا مانفع لمح لهم أنك تحب

المرأة تكون بالمواصفات اللي تحبها وبعدين ياصعب لازم تضغط على أهلك لأنة عشرة عمر صعب الواحد

يسكت وبعدين تندم تخيل أخوي اللحين نخطب لة بالأول هو ساكت وحنا نخطب اللي تجوز لنا

بس هو مستحي شكلة أو مدري وش فية لكن اللحين قال مواصفاتة

اللة يوفقك ويرزقك بالزوجة اللي تتمناها........

تالا miss,,,

29-02-08, 04:22 am

لا مافيهااا حاجه انت عليك انك تقول للوالده المواصفات اللي تبيهااا وهي تبي راحتك بالاخير والا خواتك خلهن على جنب بالموضوع ....هذي نصيحه مني ....واا انت ببالك وحده قول للوالده وصدقني كل حاجه راح تكون مثل ماتبي بس انت اترك الحياء ....
وانشالله تتوفق بوحده تريحك وتعيش معهااا بسعاده وتلقى فيهاااا كل اللي تبيه ...

فيصل...........

29-02-08, 04:36 am

انت كلم الوالدة وقلها تسرق لك الصوره حقتها

لكن انتبه لا تكون صورة اختها وانشالله تتوفق

][(مشعل)][

29-02-08, 05:13 am

فيصل هو مايبي الزين يبي خفة الدم :)

اخوي صعب المنال انت استخير

والله يكتب لك اللي فيه الخير

وعاد هذي كتبت ربك الله كاتبه لك وهذا نصيبك

فيصل...........

29-02-08, 07:09 am

فيصل هو مايبي الزين يبي خفة الدم

ههه عاد هذه صعبة ايش اقولك يازن دمها

ثقل الدم اعتقد لا بد منه خاصة اذا بحث عنه الشخص

يقع بالعكس لكن يارجل اهم شي حرمة وتلد

ولا تشغل نافوخك

البـــBADERـــدر B.D.Q

01-03-08, 01:19 pm

صعب المنال والله ياعليك خشه وانت بلش ههههههه

طعبوز ياخوي الموضوع بالاول والاخير لك يعني انت المعني الاول بالموضوع ولازم تكون الكلمه كلمتك
على عيني وراسي كل الكلام الي قلته انهم مهب راضين يفهمون الصفات الي انت تبيه او انهم اخذين مساله الزواج مساله ترزز قدام خلق الله

نصيحتي لك صعب المنال
امسك الوالده الله يخليه لك اذا انت تقدر وتعطي معه وتفاهم معه بالنقاش الهادي وحاول تفهمه ان هذي عشره عمر وحياه سنين مهيب يوم وليله وانتهى الموضوع
الزواج راحه وارتياح مهيب كشخه وفشخره
وصدقني عمر الزين ماكتمل دايم المزيونه تجيبك عله وترفع الضغط وتجيب الهم << زاد الطين بله يبي يخلي طعبوز يدخل على اهلوه برشاش ههه

على العموم اياني واياك تقدم على خطوه وانت منتب مقتنع به واذا انت ماتبي تتزوج لا تتزوج ولا تخليهم يجبرونك لاني اعتقد اذا انجبرت راح تكون نتيجه الزواج الفشل

B.D.Q

العريف

01-03-08, 04:26 pm

العريف تكفا قرب راسك ابوسك قسم بالله انك وطيت على الجرح هذا الي ابوصله لهم وماني قادر وهذي هي مشكلتي ذكرت لهم وحده وعلى قولتك يقولون مافيها زود يعني بالعربي مافيها الفشخره والطهبله حقت الحريم وانه تفشل مايترززبه بالعزايم والعروس وهذا هو الي مضيق صدورهم ومادري وشلون اوصلهم اني اكره ماشوف الفشخره والترزرز وطاح حنكي وانا اهرج ولا حيات لمن تنادي وهذي هي مشكلتي ..

عزيزي صعب المنال

استغربت اني وطيت على الجرح :)

ببساطة لأني مثلك :)

يعني اخوك مجرب ووضعه نفس وضعـــــــــك :)

جبل عمر

01-03-08, 06:33 pm

اله يعينك وشوري عليك قللل لالالالا ولا وصل للبنت إنك ما تبها

دلوووعة بريده

01-03-08, 10:12 pm

صعب المنال ,,,

زوجتك بالمستقبل راح تكون زوجتك انت لوحدك فقط !

فهي شريكة حياتك وملازمه لك طوال العمر ,,

انا برأيي ان تتفهم مع اخواتك ووالدك بهدوء ونقاش يصل الى حل سليم ..

بالعكس في مثل هذه الفرص رأيك الشخصي أهم واولى من رأيي بقية الاسره ..

واتوقع اهلك اختارو لك الزوجه من غير اخذ رأيك بسبب سكوتك وجعل الامر في يديهم !

تريد ان تبني اسره ناجحه سعيده باذن الله اهم شي ان تختار زوجتك على وفق الشروط الي تتطلبهااا

تحياتي

//

خـــــــــــــــالـــــــــد

01-03-08, 10:20 pm

اخي صعب المنال

اسمح لي ان اضحك , واضحك

رجل و هذا موقفك !!

هذا زواج .. يعني مشاركه في كل شيء

و اذا انت غير مقتنع بالمواصفات و سوف تقدم عليه ... فالله يعينك من اللي بتجني بعد الزواج ..

صـعب المنـــال

02-03-08, 04:43 pm

عزيزي صعب المنال

استغربت اني وطيت على الجرح :)

ببساطة لأني مثلك :)

يعني اخوك مجرب ووضعه نفس وضعـــــــــك :)

العريف بما ان مشكلتي مثل مشكلك والحال زفت وش رايك نسوي مضاهره بشارع القنات اليوم بعد العشاء ونرفع شعارات لاللزواج ونكتب تحته الزواج سبب رئيسي لأمراض الضغط والسكر وتجلط الشرايين >> حسيت اني ابعلق على باب المنتدى اليوم

ونسيت نرفع شعارات ثانيه مكتوب فيها مانبي نختار حنى خل البنات هم الي يختارون ويخطبوننا من اهلنا >> صع صع شكلك تبي تصير الحلقه الاخيره

صـعب المنـــال

02-03-08, 05:04 pm

اخي صعب المنال

اسمح لي ان اضحك , واضحك

رجل و هذا موقفك !!

هذا زواج .. يعني مشاركه في كل شيء

و اذا انت غير مقتنع بالمواصفات و سوف تقدم عليه ... فالله يعينك من اللي بتجني بعد الزواج ..

اخوي خالد اضحك ياعمي اضحك الي يده بالماء مو مثل الي يده بالنار ..

اخوي خالد اكيد ماراح اوافق على هذا الزواج لاكن كيف اقنعهم ان طهبلتهم ماتمشي علي يعني شغلات الحريم هذي اكرهها مالي خلقها ابي وحده عاديه هذا الي ماني قادر اقنعهم فيه

جمان البحر

08-03-08, 06:25 pm

أحد أقاربنا طلب من اهله انه يتزوج ولا عنده أي شروط على قولته أهم شيء انها مقبولة وسنعة ..

ويجون اهله ويحطون ذيك المواصفات الطويلة العريضة (اخته مثل خواتك تبي الفشخره قدام العالم ) لكن تخيل حتى أبوه تدخل بالمواصفات :)
وهو ساكت مخليهم على راحتهم ..
والحمدلله لقى زوجه جمعت مواصفات أهله وبالذات أخته وبعد سئنعة و بنت مربية زييييييين يعني مع انه حالته المادية حلوة الا انها ماتطلب شيء غالي مثل باقي البنات وتفكيرها فووووووووق <<<جمون تبي تمسك الخط السريع بالمدح ...
طبعاً لو اقعد الى بكرا أمد فيها ماكفيتها ..
ماشاء الله عليها ..الله يوفقهم بحياتهم ..

قريبنا الآخر تشرط وتشرط وامه تشرطت وجت البنت بالمواصفات اللي يبون وبالنهاية تطلقت ..ليش ؟؟
لأنه يوم شافها ماحبها مره واستحى يقول لأهله هالشيء ويفشلهم قدام أهل البنت ..لكنه بكذا ظلم نفسه وظلم البنت المسكينه لأنه ماتكلم الا متأخر ..

في النهاية والمختصر المفيد أهم شيء انك تقتنع وتقنع أهلك وتستخير ربك ..وبعدين ممكن اللي اختاروها أخواتك تكون أفضل انت ماعمرك جلست معها ولا مع الثانية فما تعرف من فيهم أجمل من الداخل ..

ولا تنسى أهم شيء صلاة الاستخارة ..