سرك في بير

[فتحي الشقاقي]

السلام عليكم ورحمة الله وبركاته

كل عام والجميع بخير

سرك في بئر

حفظ الاسرار اصبح معدوووووم
سرك في بئر فايض
لذلك احفظه لنفسك ابركلك

الناس الحين ماعاد تحفظ اسرار ،،

من ناحيتي .. اتضايق اذا احد قالي شي وبعدها قال ( لا يطلع الهرج )
تجيني قشعريره .. اتمنى النسيان بس ما اقدر
اتحقرص وبعدها اقرب درج من الربع اقوله
ولما اخلص ارجع اقوله (ترا الرجال يقول لا يطلع الهرج لذلك لاتصير خرطه وتعلم احد هاه)
عاد الدرج الي اقوله طوالي يتفاعل معي
وش دعوى فتحي
لا لا اعتبر نفسك ماعلمتني هه
على هامان يافرعون
من الاصل انا ما حفظته تجي انت اللي مالك صلاح تحفظه عشاني هه

مدري عشان الناس مخلصه سوالفها وصايره تحب التفضيح بالاسرار ؟
او يمكن الناس تعتبر الكلام المحفوظ ماله قيمه
ومع ان قيمته في صاحبه اللي موصي انه ما يطلع حق احد
الا ان الناس صار عندها برمجه
يعني على حسب سرك
اذا هو سر كبير وشي غريب تفضل السكوت
وعلى شوي شوي هذا يقول لهذا وهذا يقول لهذا تحصل السر طلع بس بصمت وكل واحد يسوي نفسه مايدري عن شي هه
لان كل واحد قايل للثاني اسكت لا يدري احد

واذا هو شي عادي ، اعتبره قالها لو توصي من هنا الى بكرا >> بس عساه يحسن الصياغه لان بعضهم يحط تهويل والبعض الاخر يحط بهارات دسمه ..

بصراحه مشكله حفظ الاسرار ..
وخصوصا اذا فيه احد واثق فيك

وش السواه يالربع ؟

السر تحفظه على حسب مضمونه او على حسب الشخص الي قاله ؟
ولا يجي احد يقول انا احفظ السر مهما كان


لابد وان يكون لك صاحب تثق فيه تروح تسرسرله عن اي شي جديد عندك
وهذا الصاحب له صاحب .. وعلى هالحال
يعني الجميع مستحيل فيكم احد يحفظ الاسرار


طيب عند من تحفظ سرك ؟

من ناحية النساء رجاء خاص لا احد يتدخل
شي معروف ان السر الي تبيه ينفضح قله لاي وحده .. واعتبره صار بكل لسان ..

والظاهر ان الرجال لحقت النساء بالفضيحه :)

[السعلوووه]

اجل انت قرقه ياخ فتحي

الله يكفينا شرك وشر اشكالك كل شي عاد الا ان سري يطلع ...


على قولتك احفظه لنفسي اصرف واريح للمضغه

[السعلوووه]

ناحية النساء رجاء خاص لا احد يتدخل

اسفه مانتبهت للجمله ولا تسان مارديت

اعتبره مو موجود

بايوو

[طائر اليمامه]

كيف تعيب على من يكشف سرك
وانت من ضاق صدرة في حمل سرة

والله ما اعتقد ان فية احد يستاهل ان يحمل سرك
لانك ما تظمن صديق اليوم يمكن يكون عدو الغد

[ღعبدالله العطيشانღ]

صباخ الخير يا دب وكل عام وأنت بخير !
المشكله إذا كانسرك مجموعة كلمات في كل مرة تصاغ بطريقة مع زيادة ملح وبهار << وصحة وعافية برعاية الجزيرة والعربية )
ما فيه حفظ للسر بهالوقت يا حبي ! وأكبر دليل محاكيك ستر عنز وخراره بنفس الوقت
زمان يقولون أن السر إذا طلع من أثنين تأكد أن سرك مفضوح .. أما الآن صرنا خرطي كل ما شفنا أحد بدينا نهذر عليه .. والمشكله لو قلت هذا السر لشخص واحد محبب لك وقلت له رجاء لاتقول لإحد .. بعد شوي أنت ياصاحب السر هاذره على شخص ثاني وقايله لا تقول لإحد ! لين مشارق الأرض ومغاربها عارفه بسرك وأنتي اللي مخبرهم كل أبوهم .
الواحد يجيه صداع براسه إذا ما فضح سره بنفسه !
وأزيدك من الشعر بيت .. الحين الحريم المتزوجات بدن يفضحن بإسرارهم ووصل لحد غرفة النوم .. هذا ما أتضح لي يا حبي في كلام بعض العضوات هنا !
يالله أن الشكوى لك يارب .. أحلق عيني إذا تزوجت ألا بشرط تكون طرما ومقطوعه من شجره !
ونسيت أقولك ممكن السر الوحيد اللي تحتفظ فيه المرأة هو عمرها .. أمصع رقبته ولا تسأله عن عمره اللهم يا كافي !
المشكله العظمي يا فتحي الإشاعات الكاذبه .. هذي اللي تهد حيلك إذا صارت على راسك !
يجيك واحد من هالمقاريد يتناقل بعض الأخبار من هنا وهناك وهي ليس لها أساس من الصحه وهي كثيره ولا يسع المجال لذكرها ..
بالنهايه / أما أن يكون سرك حبيس الادراج فهذا لا يصدق وسلم لي على هذا الصديق اللي راح أثق فيه بيوم من الأيام !

خارج النص بما إنك حاط صوره هالخال بسألك ( ودي أدري ليه بزران الخوال يلبسون فنيلة ولا يلبسون سروال أنا أتوقع عشان التهويه وألا وش رايك يا فتحي بما إنك منهم << مالبس سروال الا بسادس لا وبعد تراه عايدن رابع مرتين !

بايووووووووووووووووووووووووو

[قمر زماني]

يافتحي عذراً أبرد مع إني من النساء لكن ما أقدر أصبر
أنا عندي أسرار وما علمت به أحد
وما يسمونن أهلي إلا الجحوده
موب أي شيء أقوله ولا كل شيء أنقله
تراك ظلمت الحريم
وأنا اعترض على ظلمك
تقبل تحيتي موصولة بمحبتي

[طخطيخ الشمال]

اااخى فتحى الشقاقى :

ايضا ازيدك من الشعر بيتـــاً

اى معامله حكوميه متكـــــــوب

عليها سرى جد أ تجد كل الموظفين

يتسابقون على قرائتها حتى ينشرونها

[علشانك بس]

أهلا بفتحــي الأسمراني ,,,
اولا كل عام وانت بخيـر ,, عن نفسي بتدخـل هالمره << جاية ونافشه ريشها ,,
تبي سرك في بير ماله قاع عطه حرمه مثلي ,, انا اذا أخذت السر اجدعه بالبير وانسى انك قلتلي اياه ,,
جرب وقولي سر وتشوف ,, اذا ماوصل لأعضاء منتدى بريدة ستي مااكون علشانك بس << انواع التناقض هالبنت ,,
المهم مايحتاج اتكلم عنكم يالرجال ,, أول ماينقال له سر الواحد منكم أول مايقوله لزوجته ,, بعدين هي بدورها تقوله لأهلها وتقول لاتقولون لأحد وأم زوجته تبي تقول لخواتها وهكذا ,, شركة الاتصالات تكسب الاف الريالات بسبب هالسر ,,
ومايكتفي بزوجته ,, اذا راح لإستراحته كمل ,, وياقلبي ياصاحب السر ليته قايل له ياخوي قل لكل الناس ,, يمكن يتعيجز ولا يقوله لأحد ,,
المهم ,, ترى اصابعك مو سوى ,, مثل ما الحريم مالهم سد ,, ترى الرجال مايهونون ,, متشققين مع كل مكان ,, يمشون ويهذرون ,, يبي لهم عين حمراء عشان يتعدلون ,, ناس ماتختشيش ,,
يالله فوووتـّــك بعافيـة ,,

[مياسة]

السر عند الاثنين فرج .. وعند الثلاثة فتح الباب وخرج ..:)

حفظ الاسرار دليل على احترام وتقدير خصوصيات صاحب السر ..


بس يا اخي اكريم .. هناك من النساء تمثال لحفظ الاسرار .. ولا يقتصر هذا على رجل او مرأة !!

[Queen of buraydh]

اذا كنت انت يالرجل لا تحتفظ بالسر ؟ اجل الحريم شيسوون ؟


بوقتنا هذا .. ( لا تثــــق بأحد سوى والدتك )

دمت بخير

[فيصل...........]

قلب الرجل صدوق كاتم للاسرار التي تخصه
فاذا خرج سره من مكنون كنزه
فقد انكشف

تقبل مروري

[جورينا]

فتحي الشقاقي ..

وعليكم السلام ورحمة الله ..

حياكـ الله ..

على قولة امي دايم تردد هالمثل ..

( السر بين اثنين محدن درا به وان درا الثالث اعرف ترا السر انباح )

عاد انت افهم المثل ومنهم الأثنين ومنهو ثالثهم ..

:) ..

[عبد الله الفقير]

سر ..!

بير ..!

هذي المقولة أصبحت من أوراق الماضي و تقلبات الزمن القديم .. لم يعد هناك سر و لم يعد هناك بئر
مل ما هو موجود أخبار و احاديث تصل بسرعه البرق لمن لا تريد أن يعلم ..!

عزيزي .. أصبحنا الآن نعاني من قلة الأمانة و حركة اللسان و التي تريد التحدث عن كل أمر .. مع كامل
إحترامي لمدعي الأمانة و حافظي الأسرار إلا أن السر بات معنى لا وجود له بل هو أصبح ذا معنى
عكسي و رجعي .. أصبح هو الحديث عند الناس و التفاخر بالكلام به ..!

مودتي لكــ ..!

[أم خماس]

00]من ناحية النساء رجاء خاص لا احد يتدخل


تــامر أمر ...

واذا صدر السمــاح خبرنـا عشان نتكلم بارك الله فيكـ ,,,!!

[الطاحونة]

من ناحية النساء رجاء خاص لا احد يتدخل
شي معروف ان السر الي تبيه ينفضح قله لاي وحده .. واعتبره صار بكل لسان ..

والظاهر ان الرجال لحقت النساء بالفضيحه :)


الله يعينك من نون النسوة...!!!


(( كل عام وأنت بخيــــــــــــر ))

[@ ابتسام @]

من ناحية النساء رجاء خاص لا احد يتدخل

ابشررر


أحلق عيني إذا تزوجت ألا بشرط تكون طرما ومقطوعه من شجره !



واضف لشروطك مشلولة حتى ما تكتب شي من الاسرار بالنت

.......................

[فتاة المستقبل]

اسفه مانتبهت للجمله ولا تسان مارديت

اعتبره مو موجود

بايوو


فهمتي غلط يالسعلوه ..

شوفي العبارة اللي كاتبه ..

"طيب عند من تحفظ سرك ؟

من ناحية النساء رجاء خاص لا احد يتدخل "

قصده من العبارة السابقة ..

من ناحية أن النساء لايحفظن السر ..لاحد يتدخل بهاذي ..

يعتبر أن أشاعة السر من البديهيات لدى المرأة..

مع أني أخالفه بهاذي ..

أصلا لو أنها شئ ملازم للمرأه لما ذكر رسول الله صفة حفظ الاسرار للمرأة المسلمة حسنة التبعل لزوجها ..

هذا دليل على أنه يوجد نساء حافظات للأسرار ..

[ملاك الحبر]

في هذه الأيام ،، عليك بأن تحتفظ بأسرارك لنفسك ..............


لان السوالف الآن ما تحلى إلا بنشر غسيل كل من تعرف !!


بالنسبة للحريم فيه من الصحة كثير ،، لانها فعلا توصل للأسرار الخاصة


لكن اقسم بالله ان التقيت بحياتي من هم قد حفظ السر لكن اعتبرهم حالة خاصة
وحتى الان ماندري
و السر ممكن يفشى بعد عشر ، عشرين سنه !!



اكثر ما اكرهه اقتحام اسراري ،،

واكثر ما لا انطق به هو اسراري ،،

باختصار لم يسبق لي البوح باسرار حياتي ابداً ،، ويعجز كل من حولي عن معرفتها ،، لاني مستحيل اثق بشخص لم اعيش معه سنوات كي اغمض عيناي مرتاحه على كل ما قلت.....



تحيتي لك

[السعلوووه]

اها فاطسه ايه سذا فهمت عافيه عليتس

[....الأمير....]

تعلمت أن أحتفظ بسري في نفسي مهما كان


مع انه ثقيل في نفسي

وأنصح الجميع بعدم كتم أسرارهم لأنها راح تأثر فيهم

انا أتمنى أن أبوح بأسراري لكن في نفسي لا أعتقد أني وجدت شخص مناسب

وجآآري البحث

دمت بخير فتحي