مشكلتي مع الشاب في اسواق الراشد

[غيدا]

اهلين شباب اهلين صباياا

كيفكم شخباركم اليوم كنت فاضية

وطلعت السوق اشتري اغراض وانا في اسواق الراشد

شفت شباب بصراحة كسرو خاطري كل واحد جالس في زاوية ويترصدون

يخاف ان زميلة يطيح قبله في وحده وهو حاب

يسبقه عليهاا

غيدا صارت وحده من البنات لان فيه واحد صار يمشي وري

وقلبي صار يدق ويدق بقوة خايفه من الهيئة تفكر اني راضية

بصراحة طقت كبدي منه ...وبصراحة كنت موضع شبهه

وقفت قلت له اشتبي مني من اليوم وري تبي شي

قال ابغى الرقم بكل وقاحة

قال عطيني الرقم وبروح

قلت له انت مو متربي ضحك وقال ربيني يا حلوة

الناس اتجمعت عليناا و انا خفت الهيئة تجي وتاخذني واروح فيه

بسبب الولد هذا والغريب انه ماهمه وضل واقف وما هرب من الناس

وانا كاني صرت المذنبة والناس ما فيهم شهامة وما احد وقف جنبي

شفت ما فيه فايدة خليته ومشيت ومازل وري

طلعت جوالي وتصلت في السواق يجي اروح معهاا

لاني مليت من الولد وموراضي يخليني وصار يطالع فيني ولسان حالة بيقول

وراك وراك لو توصلين القمر

اخيرا جاء السواق وكانه نازل من السماء ورحت معاه

وقلت توبه اروح لوحدي مرة ثانية

تحياتي

[جمان البحر]

هذا بسبب التهاون بالحجاب يعني لو انك لابسه عبايه ساتره أتحدى ابن أبوه يقرب لمك ...
وأكيد انك طاقه هالعبايه المخصره والطرزة وفاتحه البرقع اللي مطلع نص وجهك هذا اذا ماكنت متثلمه ..وحاطه عطر يشمه الواحد على بعد 200متر...
ومن أكبر الأخطاء انك تروحين لحالك للسوق ...المفروض امك ولااختك ولاحتى بزر يكون معك ..

وبصراحة كنت موضع شبهه


هذاك قلتيها بنفسك محل شبهه يعني لو انك متستره زين كان مافكر يقرب لمك ..

وبعدين وش الفائده من رزة الموضوع هنا ..صراحه مافيه أي شيئ يوسع الصدر ..مع احترامي لك ..
لكن أنت الان قاعده تجاهرين ....

الله يحفظنا ويحفظ بنات المسلمين ويهدي شبابنا وشباب المسلمين ...اللهم آمين .

[الفلته 9]

ههههههههههههههههههه
.
.
.
.

الله لا يكثر هالأجناس

[غلا الدنيا2007]

وااااااااااااااااااو وش تبين انتي رايحه هالمكان لحالك :eek: !!!!!!!!!!!
عاد هذي سوات تروحين لحالك لا واشين اسواق
اسواق الراشد به اكثثثثثثثثر المريضين الفاظين من الشباب اللهم لاشماته:e9:
بعدين انتي الله يهديك غلطتي ليه كلمتيه كان تركتيه وبيمل
اقول غيداء لاتعيدينه احسن لك << يقالي امون:5[1]:

[غيدا]

هذا بسبب التهاون بالحجاب يعني لو انك لابسه عبايه ساتره أتحدى ابن أبوه يقرب لمك ...
وأكيد انك طاقه هالعبايه المخصره والطرزة وفاتحه البرقع اللي مطلع نص وجهك هذا اذا ماكنت متثلمه ..وحاطه عطر يشمه الواحد على بعد 200متر...
ومن أكبر الأخطاء انك تروحين لحالك للسوق ...المفروض امك ولااختك ولاحتى بزر يكون معك ..



هذاك قلتيها بنفسك محل شبهه يعني لو انك متستره زين كان مافكر يقرب لمك ..

وبعدين وش الفائده من رزة الموضوع هنا ..صراحه مافيه أي شيئ يوسع الصدر ..مع احترامي لك ..
لكن أنت الان قاعده تجاهرين ....

الله يحفظنا ويحفظ بنات المسلمين ويهدي شبابنا وشباب المسلمين ...اللهم آمين .


اختي جمااان انا حاطة الموضوع مو مجاهرة ولكن تحذير من ان البنت اذا راحت

السوق لحالها انها عرضها للمشاكل

بعدين لما قلت اني موضع شبهه لان الولد يحق فيني مو قصدي ان لبسي زي

ماذكرتي لبس فاضح وعيوني مطلعتهاا وعطر

لا لبس عادي جدا

تحياتي لك

واتمنى ان الظن يكون حسن بيناا

[جبل السكر]

أهـــلين غيــدا

كتيــــر أمثالهـ مــانقــول إلا اللــــه يهــديهم ويصلحـــهم

ومتـل مــاقالت ريــم لــــو مــا أعطيتيــهـ بـــال وأهميـــهـ كــان طفــش وسيبكــ

وأكبـــر غلـــطهـ غلطتيهــا روحتــكـ للســـوق لـــوحدكــ وأكـــيد أخدتي درس ومــاحتتكـرر مــرهـ تــــانيهـ إن شــاءالله


جمـــــــــــــان البحـــــــــر

هـــــادا زمــــان دحــين تغيــر الحـــال
يعــاكسو أي بــنت يــلاقوها ســواء محتشمــهـ أو متبــرجهـ
ويتفننــو بالمعــاكسات يــاريت تــــوصل علـــى أرقــــام
وربـــي مــاأقــول كــدا إلا مــن واقــع عشتـــو وشـــوفت بعينــي
وطبعـــاً هـــادا نتيجــة غيــاب الــوعي الأسري والوازع الديني

أسأل الله أن يهــدي جميــع شبــاب وفتيات الأمهـ اللهم آمين


تحيتي

[فيصل...........]

اكيد شايفك مقنزعه بالجنز ياربية يحسبك
سوريه اولبنانية

عشان البنات هالحين كلهم جنوز باك

[جمان البحر]

جمـــــــــــــان البحـــــــــر

هـــــادا زمــــان دحــين تغيــر الحـــال
يعــاكسو أي بــنت يــلاقوها ســواء محتشمــهـ أو متبــرجهـ
ويتفننــو بالمعــاكسات يــاريت تــــوصل علـــى أرقــــام
وربـــي مــاأقــول كــدا إلا مــن واقــع عشتـــو وشـــوفت بعينــي
وطبعـــاً هـــادا نتيجــة غيــاب الــوعي الأسري والوازع الديني

أسأل الله أن يهــدي جميــع شبــاب وفتيات الأمهـ اللهم آمين


تحيتي




أختي رواء الروح ..

أنا ماتكلمت من فراغ وانما تكلمت عن شيء شخصي ..
فأنا ولله الحمد والمنه ملتزمه بالعباءه الاسلاميه كما يسميها البعض ...(على الرأس وأكمامها عاديه)
ولم أتعرض في أي يوم من الايام لهذه المضايقات ..

ولا يمكن أغير رأيي هذا ..الا ان كان شباب الشرقيه والغربيه غير عن شباب القصيم ..!!

وأكيد مثل ماقلتي قل الوازع الديني و سوء التربيه ..سواء للشاب أو الفتاة..
ولكن أيظاً الفتاه لها دور في ذلك فهي تشترك مع الشاب بمسألة المعاكسه ..
فلو انها احتشمت لما حاول أي شاب أن يقترب منها خصوصاً اذا هاوشته وطردته ...
والناس راح تدخل لو شافوا ان البنت صدق مسكينه .....
الا ان كان أهل القصيم وشبابهم غير ..

[فيصل...........]

طيب له ما عطيتية رقم السواك عشان ينبسط
ويروح عنك

[جمان البحر]

اختي جمااان انا حاطة الموضوع مو مجاهرة ولكن تحذير من ان البنت اذا راحت

السوق لحالها انها عرضها للمشاكل

بعدين لما قلت اني موضع شبهه لان الولد يحق فيني مو قصدي ان لبسي زي

ماذكرتي لبس فاضح وعيوني مطلعتهاا وعطر

لا لبس عادي جدا

تحياتي لك

واتمنى ان الظن يكون حسن بيناا


طيب اشرحي لي لبسك علشام ماأسئ الظن فيك ...

يعني معقوله عبايتك هي الاسلاميه ..؟؟؟ويلاحقك..!!!
أكيد لا..

[توتي]

ماشاء الله << مستانس علشان اسواق الراشد بووه ريحة هيئه

اذكر اننا انواع الدوران بوووه ولا شفنا ولا واحد من الهيئه والامووور زيطه << متوقع ان الهيئة ممنوعه تدخل هنا :)



اولا الحمد لله على السلامه

ثانيا ياروح امك شلون تهربين من الرجل وتركبين مع السواق بدون محرم :) << فاقع مرارتي هالسؤال :) معليش لاتزعلين بس هذا من خوفنا عليك

[جبل السكر]

أختي رواء الروح ..

أنا ماتكلمت من فراغ وانما تكلمت عن شيء شخصي ..
فأنا ولله الحمد والمنه ملتزمه بالعباءه الاسلاميه كما يسميها البعض ...(على الرأس وأكمامها عاديه)
ولم أتعرض في أي يوم من الايام لهذه المضايقات ..

الحمدلله اختي كلنا ملتزمين بالحجاب الشرعي الكامل
بس للعلم هادا الموضوع تناقشت فيهـ مع كتير من الشباب في موقع آخر
وللأسف كل كلامهم واحد يقولو مااااااااااايفرق عند الشباب بنت وخلاص
ربما لم تتعرضي ولكن غيركـ كتير تعــرض في كل مكاااااان نسأل الله السلامهـ


ولا يمكن أغير رأيي هذا ..الا ان كان شباب الشرقيه والغربيه غير عن شباب القصيم ..!!
والناس راح تدخل لو شافوا ان البنت صدق مسكينه .....
الا ان كان أهل القصيم وشبابهم غير ..

لا جمــان كلهم طينـــهـ وحـــدهـ إنتـــي مــاتعرفي شباب القصيم
في جامعة طيبهـ مبدعييييييييين في المعاكسات أكيد تسأليني
كيف عرفت انهم قصمان
ماشاءالله عليهم معروفين بعبارات الإفتخار يلي مسطرينها على سياراتهم
قصيمي وافتخر وغيرو <<< وضحتها في أحد ردودي في القسم العام
عن شباب القصيم

وبالنهايهـ كل مدينهـ فيهـ الصالح والطالح يعني ماأعمم

الله يهدي الجميع

[الحنتريش]

انا ماقد طبيت اسواق هالراشد مع اني اسمع انه العن من اسواق عبداللطيف جميل بجده
غيدا تسان رحتي للظران مول احسن من الراشد
وبالنسبه للي لحقتس الصراحه انتس ماعرفتي فوائد الكعب العالي الي الحين
تسان لفعتيه بالكعب او دقيتي على رجال الحسبه يضفونه
هذا بسبب التهاون بالحجاب يعني لو انك لابسه عبايه ساتره أتحدى ابن أبوه يقرب لمك ...
وأكيد انك طاقه هالعبايه المخصره والطرزة وفاتحه البرقع اللي مطلع نص وجهك هذا اذا ماكنت متثلمه ..وحاطه عطر يشمه الواحد على بعد 200متر...
ومن أكبر الأخطاء انك تروحين لحالك للسوق ...المفروض امك ولااختك ولاحتى بزر يكون معك ..
هذاك قلتيها بنفسك محل شبهه يعني لو انك متستره زين كان مافكر يقرب لمك ..
وبعدين وش الفائده من رزة الموضوع هنا ..صراحه مافيه أي شيئ يوسع الصدر ..مع احترامي لك ..
لكن أنت الان قاعده تجاهرين ....
جمان ودي ادري معين تفهمين لان الموضوع واضح انه نصيحه بعدم ذهاب البنت لحاله للسوق خوفا من الصعاليك واشوفتس ضربتي بالتأكيد على البنت بعدين لاتتهمين البنت وانتي تدرين ان الشباب الحين صار مايستحي ويفضل البنت الثقيله بمشيته والمحتشمه نوعا ما تغيرو مب على خبرتس
بعدين الي ماعنده اخت وامه عجوز وهي محتاجه السوق ضروري وش تسوي تستاجر ام الجيران مثلا؟
الموضوع مرزوز هنا عشان تنبه البنات بعدين ترا الشر وهي ماجاهرت لانه جابته كنصيحه بس اليوم ماتقدرين تفهمين المقصد ولكن بكرى حاولي واكيد بتفهمين

[الفتـ الذهبي ـى]

مكانه بالقسم العام لانو نقاش جٍدي <-- جدي ولا عمي ههههه

[عجوز سمنسي]

والله مالي خبرة بالمغزلجية حقين اسواق الراشد
لو بسوق الجردة كان علمتك

بس اتوقع انه من المفروض تحطين ريالات حديد بشنطتك علشان تصير ثقيلة واذا قرب لك الهيس الاربد تصبخينه فيها علشان ينفجر راسه

عور ويناشق قوي العين

والله متطوين المغزلجية عندكم وناسة وفله

[@ الواصل @]

الله لايعطيه العافيه الحيوان ما يستحي على وجهه هل يرضى على اخته كذا ؟؟

[جوان2007]

وش سالفة الشباب هاليومين ..ماعندهم لاشغله ولاعمله

ماغير يترززون بالأسواق..بس مادري ليه ألاالحين ماتطوروا يبون الرقم ليه مايقول ابي الآيميل تبعك

<<افتح لهم ابواب جديده

الله يهديهم ويحفظ بناتنا وبنات المسلمين من شرهم

[سيــ بريدة ــف]

كسرو خاطري

وشو كسرو خاطرتس عساه تنكسر رجلينهم بلا

لا وانا اخوتس لاعمرتس تروحين لحالك الله يستر ترى زادت المشاكل

انتبهي لنفسك والله يستر عليكم ويحفظكم ان شاء الله..

وهـ بس بعض الناس ودي يحس انه لابدى يسوي الامور ودي يحس

ان عنده اخت وام ويمكن بنت بعدين غريبه مايخاف عليهن وين الغيره

عليهن وانت تدري انه دين عليك..

[سيــ بريدة ــف]

الله يهديهم ويحفظ بناتنا وبنات المسلمين من شرهم


امين

والله يحفظ اعيال المسلمين من شرهن

والله ياجوان اننا نشوف ان البنات هن اللي يسببن لنفسهن من لبسهن

ومشيهن ونظراتهن وضحكهن وكلامهن على الواحد وتكشخهن وتطيبهن

يعني بكامل زينه لاراحت للاسواق تسذا يسببن لنفسهن المشاكل وهي

اللي تبي اذا طلعت للسوق بتسذا..

انا مالي بالاسواق بس الصدز اشوفهن بمكه والله انهن صارن هن اللي يغازلن العيال..

الله يستر على جميع المسلمين والله لايغضب علينا والله لاتجعل الشيطان يغوينا..

[جوان2007]

صدقت ياسيف كلامك درر

والله يهدي شبابنا وفتياتنا امين

[أمــ الحب ــير]

مرحبا أختي غيداء ..
طبعاً فيه كثير من المرضى اللي أبتلاهم الله في ملاحق بنات خلق الله
موبس في المجمع هذا في كل المجمعات والمولات في كل ديره ..
والحين لاحياء ولا مستحاء البنيه تكون متكشخه اومحتشمه تكون لعابه او لا سواسيه عنده بس يعجبه
جسم البنيه راح يطامر وراها مثل القطو ..,, ومو مهم تكون لوحدها او معاها أهلها اذا برقمها راح
يرقمها .. لاكن أنا عندي لك حل وفعال مره ..
أذا طامر القطو وراك حاولي تمشي ليما توصلي مكتب الهيئه ومكان تجمع الناس وبعدين صوتي بأعلى صوتك ..
حراااااااااااااااااااااااااااااااااااااااااااااااا اااامي حراااااااااااااااااااااااااااااااااااااااامي لحقو علي سرقني
وربي واللي خلقني اذا شفتيه مره ثانيه داخل للمجمع بكبره تراني مو ولد ابوي ..
طبعاً الشي هذا يعتمد عليك لاتقولي أستحي ,, والله يستر عليك اختي

أختي جمان ..
وربي ماتوقعتها منك حسبت عقليتك أكبر من ذالكلام .,,
أولا أنتي مافهمتي الموضوع عدل ..
ثانياً أتهمتيها أنها متكشخه ولابسه مخصر وعطووور وغيره ..أنتي شفتيها عشان تقولي عنها كذا ..
ثالثاً أنت ماتعرفي ضروفها بروحتها مع السواق لوحدها .. الله وحده العالم بحالها..
لاكن أنتي اتهمتي شباب الشرقيه والغربيه بس شباب القصيم كأنهم ملائكة نازله من السماء ..
أختي جمان فكل ديره فيه الصالح والطالح والخير والشر والأسود والأبيض ..,
أذا ماتدرين عن القصيم أنا بقولك أنا جيت للقصيم قبل فترة وطلعت ويا اهلي للنخيل بلازا
كان عندنا زواج لازم يروحو للسوق ومن سوء حظي مافيه غيري طبعا قلت في نفسي
منها أنا اخلص شغله لي في مركز جيان على بال مايخلصون ..
أنا نادراً ماادخل أسواق وربي لأني أكرههم ,,
لاكن تعجبت من اللي شفته وطالعته (بعيني) مغازل وهبال عيني عينك وعلناً ..
وفي مركز جيان بعد بلاوي الله يستر علينا وعليكم ,,
يعني لاتطهري ناس وناس لا .. ومو شرط أختي جمان أي وحده تكون لابسه برقع اونقاب لعابه ,,
الا اذا كان قاموسك كذا فهذي حاجه راجعه لك ..,,
واخذيها مني نصيحه لاتسيئي الظن في الناس أبداً ,,
ولاتنسي انو فوقك رب العالمين بيحاسبك على كلمه تقوليها ,,
وربي ماقلت لك ذالكلام غير انو محبة أخو لأخته ..
ومو شرط بس الشباب يغازلون فيه بنيات بعد يغازلون
قد بنت رقمت واحد معاي وربي .. كنا نمشي في حديقه وبكل بجاحه عطته
الرقم وكان اللي معاي متزوج بس تدري شسوى لها نصحها و جلست تبكي البنيه ..

يعني كلهم فيهم شرهم البنيات والشباب ..

وعلى فكره أنا ماتكلمت بكون حميه لغيري لاوربي بس حبيت أوضح لك حاجه مافهمتيها ,

وياليت تنتبهي خيتوو جمان مره ثانيه لردك وتفهمي الموضوع قبل كل حاجه ..
والشباب اللي قبلي ماقصرو وضحو لك أنها مجرد نصيحه ..
عالعموم آسف عالأطاله ..
تحيتي ..

[الكادي11]

الله المستعان نرضا على اناس ولانرضى على انفسنا ... شاب يقول مره تابعت شابان يقومون في مظايقة فتاتان وهن يمشين في الشارع وهن متحشمات ..فيقول دخلو حاره وانا دخلت مع شارع ثاني وإنا ابغى اواجههم وفعلا اوقفتهم واعطيت الساق ورقه وقلت له الله يعطيك العافيه هذا رقمي ارجو ان تعطيه اختك لكي اغازلها الجو حار ولا لي خلق اتصيد .. فثارة ثائرته ونزل هو ورفيقه لظربي فقلت على هونك افتح الورقه ففتحها ولم يجد فيها شيئ .. فقلت اثرك رجل وعندك حميه وغيره .. قال اجل وشتحسب .. قلت طيب البنات الذي من قبل شوي مالهن اخوان مثلك او خواتك غير .. فسكت وقال انا اسف فقلت ماتنفع ..بمطاردتكم لهن لو فيه احد من الحاره كان اخذ عنهن فكره سيئه لاانه طريقكم تعطي انطباع ان البنات معطياتكم وجه ... فقال اقسم باالله ما عاد اعودله وتوبه .. والله يا خوان يقول ان العروق اظهرة من الشر يوم قلت اعطه اختك ... هذا دين دين ... عفو تعف نسائكم ..

[جمان البحر]

جمان ودي ادري معين تفهمين
أفهم مع فمي ..يعني من وين الواحد يفهم ...؟؟؟
لان الموضوع واضح انه نصيحه بعدم ذهاب البنت لحاله للسوق خوفا من الصعاليك
طيب ...!!
مكانه موهنا مكانه في العام ...صح ولالا ..
واشوفتس ضربتي بالتأكيد على البنت بعدين لاتتهمين البنت وانتي تدرين ان الشباب الحين صار مايستحي ويفضل البنت الثقيله بمشيته والمحتشمه نوعا ما تغيرو مب على خبرتس
أنا مااتهمت البنت اتهام واضح لارد فيه ..كان بامكانها انها ترد علي وتقول اني على خطأ وتوضح المسأله بشكل جيد ..

بعدين الي ماعنده اخت وامه عجوز وهي محتاجه السوق ضروري وش تسوي تستاجر ام الجيران مثلا؟

طيب ..ليش مسكت هالكلمه يعني ماعندها أي أحد مقطوعه من شجره ..؟؟
وترا الناس الحين يطلعون للسوق وأمهاتهم يروحون للعروس ..يعني هذا مب عذر ..
الموضوع مرزوز هنا عشان تنبه البنات بعدين ترا الشر وهي ماجاهرت لانه جابته كنصيحه بس اليوم ماتقدرين تفهمين المقصد ولكن بكرى حاولي واكيد بتفهمين

أنا فاهمه المقصد من دون ماتقول لي ..
لكن كان من الأفضل أن يوضع في العام لافي قسم النكت لأني دخلته على أساس انه سالفه مضحكه ..


ماشاء الله يالحنتريش يعني تبي تبين لي انك ممكن تتجرأ وتغازل وحده محتشمه..؟؟؟!!!

[جمان البحر]

لا جمــان كلهم طينـــهـ وحـــدهـ إنتـــي مــاتعرفي شباب القصيم
في جامعة طيبهـ مبدعييييييييين في المعاكسات أكيد تسأليني
كيف عرفت انهم قصمان
ماشاءالله عليهم معروفين بعبارات الإفتخار يلي مسطرينها على سياراتهم
قصيمي وافتخر وغيرو <<< وضحتها في أحد ردودي في القسم العام
عن شباب القصيم

وبالنهايهـ كل مدينهـ فيهـ الصالح والطالح يعني ماأعمم

الله يهدي الجميع



أنا ماقلت ان شباب القصيم مطهرين ولا قلت دنيئين بالأخلاق وانما هم كغيرهم فيهم الصالح والطالح ..

بس صراحه ماادري وشي جامعة طيبه اللي تقولين عنها بس ياليت توضحين وش سالفتها ..

وتراي ماقربت لأي شباب ولاقلت ان شباب الشرقيه أو الغربيه أخلاقهم زفت وانما قلت ان الخطأ يقع على الجنسين ..
يعني ليش المسبه لشباب القصيم .؟؟؟؟؟؟؟؟؟؟؟؟؟؟؟؟؟؟؟؟؟؟؟

أما مسألة الاحتشام ..
بالتأكيد ان الشباب وحتى الرجال يناظرون لكنهم اذا طردتيهم وهاوشتيهم يبتعدون اذا شافوا ان شكلك وطريقة كلامك جاد ..
والناس اللي يتجمهرون راح يدافعون مع البنت اذا شافوا انها مع الحق ..

وكل كلامي قلته من قبل لكن للأسف انكم تقرون وأنتم طايرين ..

[جمان البحر]

أخوي أسير الحب أول شيء أشكرك على لباقتك في الرد ..ولكنك على مايبدو أخذتك الحميه وقرأت ردي قراءه سطحيه خاليه من أي تمعن ..
ثاني شيء خلني أمشي وياك حبه حبه ..علشان أوضح لك أخطائك في فهم ردودي ..

أختي جمان ..
وربي ماتوقعتها منك حسبت عقليتك أكبر من ذالكلام .,,

هل مقياس العقليه لديك هو أن أبرأ من أمامي دون النظر للطرف الاخر في القضيه؟؟؟
نحن لم نستمع الا لرواية قطب واحد من أقطاب القضيه لذلك لانستطيع الحكم عليها بأنها بريئه من أي شيء ..

أولا أنتي مافهمتي الموضوع عدل ..
لا أنا فاهمته زين ..وعارفه ان مقصدها هو ان بعض الشباب مايستحون ولكن لا يعني ذلك أن أصفق لها وأقول أنت على حق في كل ماقلتيه ..

ثانياً أتهمتيها أنها متكشخه ولابسه مخصر وعطووور وغيره ..أنتي شفتيها عشان تقولي عنها كذا ..
أنا ماشفتها ولاحتى انت ماشفتها لذلك حنا الان متعادلين ..
وكلامها بأن الناس مادافعوا عنها هو اللي خلاني أقول هالكلام لأن أي شخص يبي يشوفها محتشمه راح يحط في باله انه ممكن اخته المحتشمه تصير بمثل موقفها وراح يساعدها وياقف معها ..
وغير كذا هي قالت انها خايفه من الهيئه ..وتأكد أن الهيئه لو رأتها محتشمه لن تأخذها معها اذاً لماذا هي تخاف من الهيئه ؟؟بل على العكس رجال الهيئه سيدافعون عنها ..

وواثق الخطى يمشي ملكاً ...يعني ماراح تخاف من الهيئه لانها واثقه من برائتها ونفسها ..

ثالثاً أنت ماتعرفي ضروفها بروحتها مع السواق لوحدها .. الله وحده العالم بحالها..

معك حق لكن كان من الأفضل لها أن تأخذ معها أحد ..
واعلم أنه لو لم يكن معها أحد فلن يقترب منها حينما هددته بالهيئه ..

لاكن أنتي اتهمتي شباب الشرقيه والغربيه بس شباب القصيم كأنهم ملائكة نازله من السماء ..

هذه مشكلة القراءه السطحيه لردي ..
للأسف أنك لم تنتبه لعلامة التعجب التي وضعتها ..
والتي أقصد فيها استغرابي من كلام رواء الروح حيث أن الخير والشر في كل مكان ..وشباب القصيم يخطئون كغيرهم ..
وأقول لك ليست جمان هي من ترفع أناس وتنزل أناس وتعمم عليهم ..

ولا يمكن أغير رأيي هذا ..الا ان كان شباب الشرقيه والغربيه غير عن شباب القصيم ..!!

..
أختي جمان فكل ديره فيه الصالح والطالح والخير والشر والأسود والأبيض ..,
أذا ماتدرين عن القصيم أنا بقولك أنا جيت للقصيم قبل فترة وطلعت ويا اهلي للنخيل بلازا
كان عندنا زواج لازم يروحو للسوق ومن سوء حظي مافيه غيري طبعا قلت في نفسي
منها أنا اخلص شغله لي في مركز جيان على بال مايخلصون ..
أنا نادراً ماادخل أسواق وربي لأني أكرههم ,,
لاكن تعجبت من اللي شفته وطالعته (بعيني) مغازل وهبال عيني عينك وعلناً ..
وفي مركز جيان بعد بلاوي الله يستر علينا وعليكم ,,
يعني لاتطهري ناس وناس لا ..

بالتأكيد أن كل ديره فيها الخير والشر ويكون في علمك اني من أهم الأساسيات التي أنتهجها في فلسفتي الاجتماعيه هو هذه الجمله ..
الزين والشين والخير والشر في كل مكان..ولاللتعميم ..
وبامكانك سؤال أي عضو يعرف جمان في المنتدى العام ..
أو لأسهل عليك يوجد لي موضوع عن هذا الشيء ..




ومو شرط أختي جمان أي وحده تكون لابسه برقع اونقاب لعابه ,,
الا اذا كان قاموسك كذا فهذي حاجه راجعه لك ..,,
لا أنا ماقلت ان اللي تلبس برقع أونقاب هي لعابه ..ويكون في علمك اني ألبس برقع أو نقاب اذا جيت أروح للسوق أو أي مكان ولاأعترف بالغطوه ..
ولكن لم أتعرض للمضايقات ..قد أكون أتعرض لنظره حينما أفتح النقاب وتظهر عيني ولكن أسارع بتغطيته وألتفت عن الرجل ..لأبين له أنني لست ممن أراد ..

واخذيها مني نصيحه لاتسيئي الظن في الناس أبداً ,,
ولاتنسي انو فوقك رب العالمين بيحاسبك على كلمه تقوليها ,,

أنا ماأسأت الظن بأحد كل اللي قلته مجرد توقع وشيء مماشاهدته في الواقع وكان بامكانها أن تنفيه وتخبرنا ماذا ارتدت ..

وربي ماقلت لك ذالكلام غير انو محبة أخو لأخته ..
ومو شرط بس الشباب يغازلون فيه بنيات بعد يغازلون
قد بنت رقمت واحد معاي وربي .. كنا نمشي في حديقه وبكل بجاحه عطته
الرقم وكان اللي معاي متزوج بس تدري شسوى لها نصحها و جلست تبكي البنيه ..

يعني كلهم فيهم شرهم البنيات والشباب ..
ظهر الحق ...هذاك قلتها بنفسك البنات لهم دور ..

وأنا جبت طاري ان الخطأ على الولد لحاله؟؟؟؟؟؟؟؟
أنا قلت ان البنت تكون مشتركه في هالشيء ..ووضحت كلامي هذا في ردي على رواء الروح ..

وعلى فكره أنا ماتكلمت بكون حميه لغيري لاوربي بس حبيت أوضح لك حاجه مافهمتيها ,


على مايبدو انك أخذتك الحميه لبنات الشرقيه وعيالها ..
وأغضبتك هذه الجمله والتي فهمتها خطأ..
ولا يمكن أغير رأيي هذا ..الا ان كان شباب الشرقيه والغربيه غير عن شباب القصيم ..!!
وياليت تنتبهي خيتوو جمان مره ثانيه لردك وتفهمي الموضوع قبل كل حاجه ..
أعيد هذه الجمله لك ..فأنت لم تفهم مقصدي ..وأسأت الظن بي لمجرد أنك لم تنتبه لعلامة التعجب ..
هل يجب علي أن أسهب في الشرح لكي لايفهمني أحد خطأ..؟؟
ماذنبي اذا كنت قد وضعت اشاره تدل على استغرابي ...ويأتي من لا ينتبه للعلامات ويسيء الظن بي !!

والشباب اللي قبلي ماقصرو وضحو لك أنها مجرد نصيحه ..
عالعموم آسف عالأطاله ..
تحيتي ..

ايه ماقصروا بالرد علي ....لكن كلهم وأنت كذلك أخذتكم العزة وصرتوا تتكلمون عن طريق النظر بعين واحده..

[دلوعه وكلمتي مسموعه]

ياحليله شين وقوي عين هو وعيونه..

انتي صار فيك كذا اجل حنا وش نقول<يعني انا وبنات اهلي> هاذا وحنا ببريده..

كان رحتي لم الهيئه وفشلتيه ..

[الحنتريش]

أفهم مع فمي ..يعني من وين الواحد يفهم ...؟؟؟

سبحان الله عاد تصدقين توي ادري وراي لاصرت اكل اعجز افهم اثر الفم يصير مشغول مع عمليه اخرى
مير كسبنا منتس معلومه ومشكوره
أ
طيب ...!!
مكانه موهنا مكانه في العام ...صح ولالا ..

هههههههههههههههههههاي وان الي جايبه هنا يوم انتس تهوشينن
أ
وترا الناس الحين يطلعون للسوق وأمهاتهم يروحون للعروس ..يعني هذا مب عذر ..

ياليت توضحين هالجمله اكثر لاني اتغدى وافمي مشغول ولا اقدر افهم وافمي مليان اكل حسب ماكسبته منتس
يعني مايقدرون الناس يروحون للسوق الا وقت العرس؟
أ
ماشاء الله يالحنتريش يعني تبي تبين لي انك ممكن تتجرأ وتغازل وحده محتشمه..؟؟؟!!!

ههههههههههههههههههههههاي
هذا اتهام آخر اللهم اني برئ منه لان كلامي مابه اي دليل يشير الي اني من الممكن مغازلة بنت بغض النظر عن لبسها ولكن يبدو ان افمتس مليان وعجزتي تفهمين او انتس تفهمين مع غير افمتس
نعنبو بليستس انا اخاف من ظلالي وشلون تبينن اغازل اللهم لك الحمد
لكن انتي دقه قديمه لان البنات الحين هن الي يغازلن الولد المحتشم عشان تسذا منب محتشم وابصير متبرج عشان افتك منهن
ولو اقول لتس القصص الي تحصل لي تموتين ضحتس
بيني وبينتس مب غريبه بهالوقت اي شي متوقع بس تتوقعين تعطين وجه لو اغازله كاكاكاكاكا

[جمان البحر]

الحنتريش أنا أتكلم بجد وأنت قاعد تتطنز ....!!!


ههههههههههههههههههههههاي
هذا اتهام آخر اللهم اني برئ منه لان كلامي مابه اي دليل يشير الي اني من الممكن مغازلة بنت بغض النظر عن لبسها ولكن يبدو ان افمتس مليان وعجزتي تفهمين او انتس تفهمين مع غير افمتس
نعنبو بليستس انا اخاف من ظلالي وشلون تبينن اغازل اللهم لك الحمد
لكن انتي دقه قديمه لان البنات الحين هن الي يغازلن الولد المحتشم عشان تسذا منب محتشم وابصير متبرج عشان افتك منهن
ولو اقول لتس القصص الي تحصل لي تموتين ضحتس
بيني وبينتس مب غريبه بهالوقت اي شي متوقع بس تتوقعين تعطين وجه لو اغازله كاكاكاكاكا



شكلك أنت اللي ماتفهم ...!!
أنا أقول ان مافيه أحد يبي يتجرأ ويمشي ورا وحده محتشمه ولا بعد وجهه مغسول بمرق تهاوشه وتقوله رح ويعاند ...
مستحيييييييييييييييييييييييييل هالشيء يصير يعني ممكن يناظرها ..
نقول ممكن يلحقها بس يعاند ويععي يروح ما أعتقد ..

وبعدين هي ليش خايفه من الهيئه ...

[Queen of buraydh]

صدقوني ياناس


أتحددددى شاب يقرّب في بنت متحشمه ومتستره كووويس .!

[جمان البحر]

صدقوني ياناس


أتحددددى شاب يقرّب في بنت متحشمه ومتستره كووويس .!






الحمدلله هذا رأي أحد البنات المحتشمات ...وصار عندكم رأيين مب واحد يثبتن كلامي ...

يعني لاتحاولون تخالفون كلامي وانتم عارفين ان ثلاثة أرباعه صح ..وأسير الحب قال بنفسه ان البنات لهم دور بهالشيء ..يعني ثلاث أشخاص ...

[إشراق]

وأنا أتحدى

شاب يقرب من بنت محتشمه

[زهور العمر]

من وعظ اخاه سرا فقد نصحه ومن وعظه جهرا فقد فضحه






0

[نـدى الـورد]

عموماً بنت وبروحها في سوق ولا وايه سوق الراشد

الي ثلاث ارباعه شباب جيعان

طببيعي تتعرض للمعاكسه مو من شاب الا تكون فريسة اكثر من شاب

ولكن لفت انتباهي جرأتك في انك تتكلمين معه

من باب اولى عند السيوكرتي بلغيه وابعدي نفسك عن الشبهه


.

[نـدى الـورد]

على فكره غيدا

لاتزعلين مني

انتي من سمح لهم بمعاكستك اتعلمين لما؟

لانك تذهبين في مركز تجاري شبابي ان سميته لانه مكان تجمع الشباب فيه

وجعلتي من نفسك لقمة سهله لهم

انا لعلمك الأماكن هذي اتحاشى اروح فيها وانا معي محرم فما بالك بروحي؟

واحياناً كثيره افضل اروح لها وقت الظهر لغياب الشباب فيها وهم معي محرم


.

[ღعبدالله العطيشانღ]

وينهوبه ذي أسواق الراشد
لا تكون بس اللي بالشرقية

[جبل السكر]

أختـــــي جمـــان

الا ان كان أهل القصيم وشبابهم غير ..

ردي السابق كـــان علــى المقتبــس أعلاهـ

كــان مــن المفتــرض أن تكتبــي ردكــ هذا أليس كذلكـ؟

أنا ماقلت ان شباب القصيم مطهرين ولا قلت دنيئين بالأخلاق وانما هم كغيرهم فيهم الصالح والطالح ..

أليس هناكــ فـــرق بين ردكــ في المقتبس الأول والتاني

بس صراحه ماادري وشي جامعة طيبه اللي تقولين عنها بس ياليت توضحين وش سالفتها ..

جامعة طيبهـ متل جامعة القصيم تماماً أما سالفتها لا سالفهـ ولا حاجهـ بس
ذكرت لكــ الطلاب القصمنجيهـ فيها وكيف تربيتهم وسلوكهم الغير سوي وطبعاً ردي كان على كلامكــ
أهل القصيم وشبابها غير على فكرهـ سمعة الجامعهـ بالواطي


والناس اللي يتجمهرون راح يدافعون مع البنت اذا شافوا انها مع الحق ..

أضحكني ردكــ الناس لمن تتجمهر عند حادث للفــرجهـ وليس مساعدة الشخص
اللي يكون مابين الحياهـ والموت فما بالكــ بموقفها
يعني مستحييييييل تلاقي مساعدهـ

وأرجــع وأقول الفتاهـ معــرضهـ للمعاكسات بأي مكان أياً كـان حجابهااااااااا
محتشمهـ متبرجهـ سوااااااااء عند الأغلب
وياأختي بتغيري رأيكــ أولا هدا الشيء راجع لكــ إنتي تتكلمي بمنظوركـ الشخصي ونحنا كذلكـ يعني كل شخص ومايشاهدهـ من الواقع سواء داخل حدود مدينتهـ أوخارجها


أمــــا تقـــولي روحي لأقرب هيئــهـ ماأدري يــاأخت جمان إنتي بكامل قواكــ
العقليهـ أو إنتي عايشهـ بمجتمع منغلق !!
بعذرها لمن تقول أخـــاف مابعتقد البنت في وقتنا الحالي تطلب الهيئهـ
أو تروح برجليها لهم ونفس الشيء الشرطهـ
أخر شيء أفكر فيهـ الهيئهـ والشرطهـ
يمشي الشخص ورايا ولاأعطيهـ بال لحد مايطفش ويمل ولا أروح الهيئهـ
قال هيئهـ قال
ز ي مابيقولو حاميها حراميها


تحيتي للجميع

[نـدى الـورد]

وينهوبه ذي أسواق الراشد
لا تكون بس اللي بالشرقية

الله... الله

وصلت خير


هو بزاته اكبر تجمع للشباب في المنطقه الشرقيه



.

[&نجدية كووول&]

هاذولا شباب الشرقيه كنت أحسبهم طيبين لكن العكس مغازلجين درجه أولى....
كنا مره على الهاف مووون وكان الوقت الساعه6 وكنت لابسه نظاره شمسيه تخيلي قاعده أنا أناظر أخوي وولد خالي يسبحوون بالبحر ومر بجنبي واحد قعد يقول كلام مافهمت منه إلا نظاره ومدري وشو الباقي......

[جناان]

ولا أروح الهيئهـ
قال هيئهـ قال
ز ي مابيقولو حاميها حراميها
الصراحه ماقريت الردود من اولها
لكن استغربت
هذا..!!!
اجل حاميها حراميها .!!!
المقصود بهم رجال الهيئه .!!!

[شاطئ الراحة]

غيداء ...


هل تُريدين حل لهذا الموضوع .. أم أنه توضيح واقع إجتماعي .. ؟


تحيتي لكِ

[سيــ بريدة ــف]

قال هيئهـ قال
ز ي مابيقولو حاميها حراميها

غريبه الكلام منك يارواء الروح!!!!!!!!!!!!!!!!!!!!!!!!!!!!!

ليش الاتهام الغير مبرر هل صدقتي مايقوله الحاقدين

على الهيئه بسبب افعاله المشهوده في انكار المنكر..

ممكن تكون حاله وحده صارت من افراد الهيئه والخطاء حدث من الرسل

لكن مانعم الجميع وننسى ماقدموووه في مصلحة الدين اولا والمجتمع..

مانقول الا الله يديمهم ويخليهم ويقويهم على الامر بالمعروف والنهي عن المنكر

والا اكبر المصائب والبلاوي الفاسده بالمملكة ماقضى عليها

الا افراد الهيئه الله يقويهم ان شاء الله..

مااحد يكره الهيئه ويتمنى زواله الا الفاسد اللي مايرده ايمانه على ترك المعاصي

ويبي ياخذ راحته على فعل اي شي..

(( ماتحس بالنعمه الا بعد زوالة ))

لاتزعلين يااختي رواء وتقبلي كلامي بكل سعة صدر..

[جبل السكر]

أختـــي جنــان

وأخـــي سيــف بــريدهـ

أنا شوفت بعيني أخطــاء وتجـــاوزات من أعضــاء الهيئهـ نقول واحد إتنين ممكن

يخطئوا أمــا مجمـــوعهـ لا مش معقوووول ياريت أخطاء بسيطهـ نعديها لاااا

أمـــور أكبر من كدا

ليش الاتهام الغير مبرر هل صدقتي مايقوله الحاقدين

على الهيئه بسبب افعاله المشهوده في انكار المنكر..

أصـــــدق عيـــوني مــش كلام النـــاس

ممكن تكون حاله وحده صارت من افراد الهيئه والخطاء حدث من الرسل
لكن مانعم الجميع وننسى ماقدموووه في مصلحة الدين اولا والمجتمع..

الكل يتمنى ذلكــ بس أكتر من أربعهـ أشخاص وفي كل مرهـ
نفسي أكدب عيوني بس للأسف :g2:


مانقول الا الله يديمهم ويخليهم ويقويهم على الامر بالمعروف والنهي عن المنكر

والا اكبر المصائب والبلاوي الفاسده بالمملكة ماقضى عليها

الا افراد الهيئه الله يقويهم ان شاء الله..

اللهــــم آمـــين صحيح الفساد ماقضى عليهـ الا بعض رجالات الهيئهـ
بس تجاوزات البعض كل مالها تزيد نسأل الله السلامهـ


مااحد يكره الهيئه ويتمنى زواله الا الفاسد اللي مايرده ايمانه على ترك المعاصي

ويبي ياخذ راحته على فعل اي شي..

أخ سيف وربي كلامي كلو مش كرهـ في رجالات الهيئهـ بالعكس أتمنى
أن يرجع الأمر بالمعروف والنهي عن المنكر متل ماكان قبل فترهـ طويلهـ وأفضل
وخصوصاً في الوقت الحالي ماأشوف لهم تواجد بكل مكان في المدينهـ متل تواجدهم بكثرهـ قبل وفاة الملكـ فهد رحمهـ الله
وأتمنى أتمنى تتحسن صورتهم أمام العالم بعد تشويهـ وسائل الإعلام ليهم
بس زي ماقولت في بداية كلامي شوفت كتييييييييييييييييير منهم ومن خلال مشاهدتي لبعض تصرفاتهم قولت رأيي


ماتحس بالنعمه الا بعد زوالة

مالفائدهـ إذا كانت بغير إخلاص وتفاني من قبلهم وقبل كل شيء تقوى الله والخوف منهـ جل في علاهـ


لاتزعلين يااختي رواء وتقبلي كلامي بكل سعة صدر..

لا أخي ماحزعل بس لاتلومني يعني كلامي كلو من أشياء مرت عليا
ومو ذنبي أخد هادي الفكرهـ عنهم لأنهم هما من وضع أنفسهم محل شبههـ
إلا إذا تغير الحال وهادا ماأتمناهـ وربي,

ملاحظهـ فيهـ أكتر من قضيهـ لأفراد الهيئهـ في محكمة مدينة الدمام
فقط أيام وينتهي البت في قضاياهم والشكوى من بعض الأهالي
والمتسوقين طبعاً حسب ماورد في إعلامنا
الله أعلم مين الصادق ومين الكاذب في القصص الواردهـ في الأخبار

[سيــ بريدة ــف]

اختي روووواء تسلمين على تقبلك كلامي

بس يااختي للهيئه افعاله الحميدة الظاهرة في التصدي على الفساد في المجتمع

واضحة وتشهد لهم واذا كان عندهم غلطات انا اقولك صحيح ان عندهم اغلاط

بس مهب شي عند ماقامو به من افعال مشهوده لهم في توجيه الناس في امور

دينهم وتوجيههم لصلاح امور المجتمع..

ولاتنسي يااختي ان الانبياء ماعصمو من الاخطاء مهب عاد برجال ظهروا

في زمن كثرة الفتن بس المقصد اننا لو شفنا خطاء مانعم على الجميع

او حتى مانذكره علشان لايفرح بها ناس يدورون عيوب الهيئه ولو كانت بسيطة

مهب معناته انه لاصار رجل هيئه نثق به بدرجة كامله , لا , هم بشر مثلنا مثلهم..

بس فيه ناس يحاربونه في كل وقت علشان ياخذون راحتهم في كل شي بعد زوال صلاحياتهم والله لايقولة..

مااقول الا الله يحفظك يارواء ويحفظ بنات المسلمين وشبابهم..

[دلوعة جدها]

ياحليلك ياغيدا تروحين للسوق لحالك

اقو ياحظك>>>>>>>>>>>تبى تصكها عين

وبالسواق تصدقين اول مره اعرف ان السواقين للبيوت بعد احسبنهم للمدارس .>>>>هههه


الموهم مع احترامى لك موضوعك ماله داعى لاتزعلين ترانى صريحه

[جبل السكر]

ربـــي يسلـمكــ ويـــرضى عـــليكــ أخــي سيــف

كـــلامكــ علـــى العـــين والـــراس فعــلا المفــروض مــانعمم بكــل الأمـــور

علـــى عمـــوم البشر لأن التعميم يفســد الصــورهـ بكــاملها

أسأل اللـــــه للجميــع الهـــدايهـ والصــلاح

وأن يــوفق رجال الهيئهـ و يـــسدد على طـــريق الخيــر خطــاهم

تحيتي

[مـلاك الصمت !]

غيدا
تبين الصراحه .. إنتي اللي جانيه على نفسك
طالعه لـ حالك و بـ مكان تجمع شباب
و تبين الشاب يصد عنك ..؟ أكيد يبي يلاحقك لين يمل ..؟


الله يهدي الجميع ..


دمتم بخير ..!

[أمــ الحب ــير]

أخوي أسير الحب أول شيء أشكرك على لباقتك في الرد ..ولكنك على مايبدو أخذتك الحميه وقرأت ردي قراءه سطحيه خاليه من أي تمعن ..
ثاني شيء خلني أمشي وياك حبه حبه ..علشان أوضح لك أخطائك في فهم ردودي ..

مرحباأختي جمان ..
العفوو أختي ..

أولاً أنا لم تأخذني حميه لأحد ولم أقرأ ردك قرأه سطحيه بل قرأته بتمعن ورويه ..
نمشي حبحبه عشان توضحي لي ..




هل مقياس العقليه لديك هو أن أبرأ من أمامي دون النظر للطرف الاخر في القضيه؟؟؟

لو كانت الأخت غيداء مخطأه لما كتبت أساساً هنا ماحصل لها ...!!


نحن لم نستمع الا لرواية قطب واحد من أقطاب القضيه لذلك لانستطيع الحكم عليها بأنها بريئه من أي شيء ..

وأن كانت غير بريئه فما مقصدها من كتابة هذ الموضوع ..؟؟
هل يوجد شخص يبحث لنفسه عن الشبهه ..!!

وهنا وقعتي في الخطأ مرة أخرى ..




لا أنا فاهمته زين ..وعارفه ان مقصدها هو ان بعض الشباب مايستحون ولكن لا يعني ذلك أن أصفق لها وأقول أنت على حق في كل ماقلتيه ..

طيب ممكن تفكرين في حل لها مانبغى صفقه منك ...!!
نريد حلاً ..



أنا ماشفتها ولاحتى انت ماشفتها لذلك حنا الان متعادلين ..

مولازم أشوفها أنا أطالع بعيني مثل حالتها وأكثر ..
وفاهم في الأمور هذي أكثر منك ..

ألا أذا أنتي أخبر مني ..!!؟؟هنا أقول stop .. وأتوقف ..


وكلامها بأن الناس مادافعوا عنها هو اللي خلاني أقول هالكلام لأن أي شخص يبي يشوفها محتشمه راح يحط في باله انه ممكن اخته المحتشمه تصير بمثل موقفها وراح يساعدها وياقف معها ..

أختي جمان هذا دليل منك أنو أنتي للحين تجهلين في المجتمع اللي
عايشه معاه وأنك ماقد صادفتي مثل الأشياء هذي ..
أي مساعده اللي تتكلمين عليها ..؟؟
زمن المساعدات ولى وراح أحنا بزمن الفرجه ,,
الناس جاهزين للفرجه عندك مسرحيه بتقدميها بيكونون أول الحاضرين ..
لاكن مساعده أنسي الكل يقول يالله نفسي ..


وغير كذا هي قالت انها خايفه من الهيئه ..وتأكد أن الهيئه لو رأتها محتشمه لن تأخذها معها اذاً لماذا هي تخاف من الهيئه ؟؟بل على العكس رجال الهيئه سيدافعون عنها ..

هاك أنتي تردين وتقولين لوأنها محتشمه ..!!!<< هذا خطأثاني

طيب شذنبها أذا كانت تخاف من الهيئه ..!!
وماتعرف تتصرف في مثل ذالأمور لأنها ليست خبيره فيهم ..!!

تكون مو محتشمه مو ,,,



وواثق الخطى يمشي ملكاً ...يعني ماراح تخاف من الهيئه لانها واثقه من برائتها ونفسها ..

واثق الخطى ماقد عرف طريق الهيئات وغيره ..
عشان كذا خافت مابغت تعرف طريق الهيئه لأنها واثقه من برائتها ..

جمان أصابعك مو سوا وأذا أنتي ماتخافي غيرك يخاف لاتقيسي الناس
على نفسك ..



معك حق لكن كان من الأفضل لها أن تأخذ معها أحد ..
واعلم أنه لو لم يكن معها أحد فلن يقترب منها حينما هددته بالهيئه ..


والحق على عبدالحق << لازم أطالبه فيه على باله نسيت ..!!

لاحووول .. أسمحي لي أختي جمان أقولك بعد أنا مع وين تفهمين ..؟؟
أنا قلت لك في ردي السابق الله العالم وحده ..شنو ضروفها ..
ممكن يكون ماعندها أحد ..
يعني خلاص ماتروح للسوق وغيره كذا ..
تردين تقولين من الأفضل أن تاخذ أحد معاها ..!!
خلاص بكلمها تاخذ جارتهم وعيالها المره الثانيه ولا تزعلين ..





هذه مشكلة القراءه السطحيه لردي ..


صدقتي دائماً نواجه مشكله في القرائه السطحيه ..


للأسف أنك لم تنتبه لعلامة التعجب التي وضعتها ..


أي علامه أكثر كلامك وردودك فيه علامات ..


والتي أقصد فيها استغرابي من كلام رواء الروح حيث أن الخير والشر في كل مكان ..وشباب القصيم يخطئون كغيرهم ..
وأقول لك ليست جمان هي من ترفع أناس وتنزل أناس وتعمم عليهم ..

فيه تناقض بكلامك .. جمان !!
الا ان كان أهل القصيم وشبابهم غير ..
هنا رد ..
أنا ماقلت ان شباب القصيم مطهرين ولا قلت دنيئين بالأخلاق وانما هم كغيرهم فيهم الصالح والطالح ..
وهنا تغير الرد ..
ممكن ترسيني على شط ..؟؟
ياطاهرين او لا ..


بالتأكيد أن كل ديره فيها الخير والشر ويكون في علمك اني من أهم الأساسيات التي أنتهجها في فلسفتي الاجتماعيه هو هذه الجمله ..
الزين والشين والخير والشر في كل مكان..ولاللتعميم ..
وبامكانك سؤال أي عضو يعرف جمان في المنتدى العام ..
أو لأسهل عليك يوجد لي موضوع عن هذا الشيء ..

واساسياتك تناقضين فلسفتك ..!!
أنا لست من مرتادي القسم العام كثيراً
ولاكن أذا كانت فلسفتك هكذا ,,
فهي حتماً جديده (( فلسفه بلغة التناقض )) ..
سأقرأ عنها بكل تأكيد ..


لا أنا ماقلت ان اللي تلبس برقع أونقاب هي لعابه ..ويكون في علمك اني ألبس برقع أو نقاب اذا جيت أروح للسوق أو أي مكان ولاأعترف بالغطوه ..
ولكن لم أتعرض للمضايقات ..قد أكون أتعرض لنظره حينما أفتح النقاب وتظهر عيني ولكن أسارع بتغطيته وألتفت عن الرجل ..لأبين له أنني لست ممن أراد ..


حلو مافيه أعتراض على النقاب والبرقع ..أو أنها من أهم الأسباب للمضايقات ..

يمكن أنتي ماتعرضتي لمضايقات مثل غيرك مع أنو لبستي برقع ..
بس غيرك محتشم وحتى برقع مالبس وتعرض لمضايقات ..
للمره الثانيه أقول لك لاتقيسي الناس على نفسك ..
خيتو جمان أنتي لوشفتي بعيونك كان ماقلتي ذالكلام ..



أنا ماأسأت الظن بأحد كل اللي قلته مجرد توقع وشيء مماشاهدته في الواقع وكان بامكانها أن تنفيه وتخبرنا ماذا ارتدت ..

لاحووووووول كيف ماأسأتي الظن لأحد ..
وردك الأول عليها شتسمينه ..هجاء!!

أخبرتك البنيه ماذا أرتدت .. (( تقول لبسي عادي )) ..




ظهر الحق ...هذاك قلتها بنفسك البنات لهم دور ..

وأنا أخفيت الحق عشان يظهر ..
أيه قلت لك البنات فيهم حقهم مانبخس حق أحد ..كل وفيه شره ..

طيب ممكن توضحي لي مقصدك في عبارتك البنات لهم دور عندما ظهر الحق ..؟؟


وأنا جبت طاري ان الخطأ على الولد لحاله؟؟؟؟؟؟؟؟
أنا قلت ان البنت تكون مشتركه في هالشيء ..ووضحت كلامي هذا في ردي على رواء الروح ..

لابس خفت يطري عليك .. تقولي بس الولد ..!!
أنتبهي تراني بخلي الحنتريش يغازلك ويسبب لك مضايقات هه


على مايبدو انك أخذتك الحميه لبنات الشرقيه وعيالها ..
وأغضبتك هذه الجمله والتي فهمتها خطأ..

صدق والله يعني واضحه الحميه علي ..!!<< غريبه ماأشوف أنها واضحه علي ,,

لم تغضبني جملتك لأنها أساساً أتت على دفعتين ..
لكل دفعه معنى أذا وضحتيهم وضحي أيضاً أين تكمن حميتي في ردي ..؟؟



أعيد هذه الجمله لك ..فأنت لم تفهم مقصدي ..وأسأت الظن بي لمجرد أنك لم تنتبه لعلامة التعجب ..
هل يجب علي أن أسهب في الشرح لكي لايفهمني أحد خطأ..؟؟
ماذنبي اذا كنت قد وضعت اشاره تدل على استغرابي ...ويأتي من لا ينتبه للعلامات ويسيء الظن بي !!

وعلامة التعجب هذه ماذا تدل في كلامك ..؟؟
هل ستغير معنى كلامك المقصود ..؟؟
وأنا لم أسئ الظن فيك ولاكن أجبتك بماأحتواه كلامك من معنى ..
وأنا أنتبه جيداً لجميع العلامات ولاكن أنتبه للكلام أولاً.. حيث أنا أضع العلامات كثيراً ..
ولاكن أنتي اللتي لم تفهمي لماذا توضع العلامات ..
توضع علامة التعجب عندما أخبرك بشئ غريب أو مفاجأ..!!<<هكذا ..
وليس كما وضعتيها أنتي ..



ايه ماقصروا بالرد علي ....لكن كلهم وأنت كذلك أخذتكم العزة وصرتوا تتكلمون عن طريق النظر بعين واحده..

لم تأخذني العزه أختاااااه ..

ولم أتكلم بعين واحده بل تكلمت بكلتيهما ...

قد تكوني أنتي تكلمتي بعين واحده ولم تنتبهي او ربما كنتي منهكه
عندما أردتي الرد ..






خيتووو جمان أسمحي لي أقولك أذا برد المره الجايه بجيب وياي
عجراء وسبوره عشان أنا اللي بشرح لك مو انتي << لايروح بالك أنو راح أطقك
لامحشومه بس بخوفك أذا ماركزتي معاي ..

راح أشرح لك :
1- الفلسفه .. << وليست فلسفت التناقض ..
2- أصابعك مو سواسيه << طالعيني لاتطالعين أصابعك ..
3- علامات الترقيم .. (!)(؟)(,)(.)والبقيه ..

إذا أستجدت حاجه غير ذول مو مشكله كم جمونه عندنا مافيه غيرك ..
وأعتبريني أخوك الصغير يفهمك موضوع يمكن تجهلين أغلب جوانبه ..
وأنا وربي يعجبني حماسك وغيرتك بس الدنيا يقولون تعليم وانا اخوك..
وأنتي بنيه والبنيه تجهل فبعض أمور الشوارع ...

تقبلي مني كل الأحترام والتقدير ..

[أمــ الحب ــير]

وينهوبه ذي أسواق الراشد
لا تكون بس اللي بالشرقية


هلا حبيبي عبوود .. فينك ياواد من زمان مانشوفك ..

أيه طال عمرك اللي في الشرقيه في الخبر تحديداً ..
لاوفيها سينما ذالحين لاتفوتك حبيبي .. :b3:

[أمــ الحب ــير]

الله... الله

وصلت خير


هو بزاته اكبر تجمع للشباب في المنطقه الشرقيه



.


والغربيه أيضاً ..
ولا يهونون شباب العدامه والثقبه :b3:
والمقاطعات التي بجوارها ..

[أمــ الحب ــير]

هاذولا شباب الشرقيه كنت أحسبهم طيبين لكن العكس مغازلجين درجه أولى....
كنا مره على الهاف مووون وكان الوقت الساعه6 وكنت لابسه نظاره شمسيه تخيلي قاعده أنا أناظر أخوي وولد خالي يسبحوون بالبحر ومر بجنبي واحد قعد يقول كلام مافهمت منه إلا نظاره ومدري وشو الباقي......


أفاااااااا ..
يمكن عجبته النضاره وحب يشتريها منك ..:b3:

أيه نسيت انو اهل الشرقيه يتكلمون لغة الروك ..هه

[غلا عمري]

بسم الله الرحمن الرحيم

قبل كل شئ انا اتفق مع كلام اختي جمان البحر ومافي احسن من كلامها ينقال وكذلك اختنا ملكة بريده اضافه نفس كلام اختي جمان البحر

النقاب- البنطال-البرقع-المخصره-اللثمه-العطر- المشي واللعب بالجوال بالسوق- كلها اسباب والحافظ الله-

سلم فمك اخت جمان على ماقلتي ولن اضيف
الله يحفظنا بحفظه ويحفظ بناتنا وحريمنا ويحفظك

ماجد

[أمــ الحب ــير]

هلا أخوي عبدالله .. صباح الخيراااات ..

بس جمان تقول أنها تلبس برقع أو نقاب أذا كانت في السوق ..!!