حـلــمــي افـنــدي ..

[فتحي الشقاقي]

السلام عليكم

مرحباً بالجميع

هذا الله يسلمكم الاحلام احيانن تخلي الواحد يقوم من نومه يضحك
أمس حلمت حلم لو يسمعه مفسر احلام اعتزل التفسير من غباء الحلم

حلمت ان واحد من الاصدقاء ماسك بزوكا بيرميني :b4:
وانا مقفل على نفسي بالغرفه وطالع مع الدريشه احاكيه عشان احاول اقنعه ما يرمي
وكنت اقوله ياخي انت مهبول ، اذا رميتني بالبازوكا بتنفجر الغرفه واموت ومايصير عندك صديق اسمه فتحي
قال عادي انا برمي
انا لما شفت ابو الشباب جازم يرميني بالبازوكا فكرت بالهروب
بعدين فتحت باب الغرفه وطلعت راسي مع الباب واثاريه مقابلني وقلت يا ابن الحلال تعوذ من الشيطان ولا ترمي ..
هو اول ما شافني مطلع راسي كبس ، بووووو:b1:
انا طلعت من الغرفه اناقز :a3: قبل الرميه وبالصدفه جت الرميه من تحتي وصار الانفجار تحتي .. انا طرت فووووووووق وصرت اشوف الاشجار تحتي
وانا طاير بالسماء ،، شفت ناس يلعبون كورة في ملعب مزروع يحبه قلبك ،، وشفت نفسي بطيح عندهم مثل الطياره الي تنوي الهبوط ..
طحت عندهم على ظهري ومافي ولا واحد منهم جاء عندي او استغرب الموقف
انا لما شفت الوضع كذا ، اشرت لواحد ماسك الدفاع بالفريق وقلت لو سمحت ممكن العب معكم ؟
قال ايه ، انا قمت وتنفظت ولعبت معهم بالهجوم ولما سجلت قول جو كل الاعبين يركضون عندي من الفرحه ، انا بعدها صحيت :36_1_2[1]

.................................................. ......................

الاحلام بعضها غريب سبحان الله

هذا الله يسلمكم بعد ما صحيت من الحلم تذكرت فكره كانت من اجمل الافكار الي مريت فيها على جهل ،،

قبل حوالي كم سنه جت طفه في جميع القنوات الفضائيه حول تفسير الاحلام
لدرجة ان الرادو ما سلم منها ..
كانت برامج تفاسير الاحلام هي الناجحه والمربحه في ذيك السنه ،
وكنت من اشد المتابعين لها حتى صار عندي حصيله كبيره من شدة المتابعة
مع العلم اني ماقد حلمت ابد ،، بس كان عندي مجرد فضول فقط لا غير
بعدها
انا فكرت اني العب على الناس واسوي نفسي ( مفسر احلام )
ونشرت رقم الجوال ، وما كنت اتخيل ان الناس لهذي الدرجة هبلاء
والله ياجماعه اني في خلال اسبوع واحد فقط من كثر الاصالات ماكنت قادر الحق على بعضها .. وخاصه من العنصر النسائي
ترا الحريم دايم حلووووم ..
الله يذكر الشيخ المطلق بخير ، كنت جالس معه في مناسبة بمكة المكرمة ودق جواله
قال هذي اكيد وحده ماخذه غفوه وداقه علي افسر حلمها هههه
المهم
انا ابتلشت بالعالم ومن كثر الاحلام ضيعت الطاسه
الناس عليهم احلام غريبه عجيبه
وكنت اذا تعجبت من الحلم وحسيت انه غريب اقول ( ابغاث احلام هذي ومالها تفسير غير انك ضارب نثريه ونايم وانت شبعان جزاك الله خير )
واذا دقت علي وحده صوتها حلو .. الله الله انواع البشاير
انتي بتتزوجي واحد غني ومثقف وجميل ..
واذا دقت وحده صوتها شين اقول اكثري من الورد ترا بتجيلك مصيبه ههه
المهم ان واحد من الشباب عرف
وجاء نصحني وبعدها تركت التفسير > مصدق انه مفسر احلام هه

لذلك انا الي ابي اعرفه /
الاحلام هذي ليش تتعدى المعقول ؟
يعني ليش ماتكون احلام على نفس الوضع الطبيعي للانسان بخلقته ؟

هل فيه احد عنده تفسير سليم للسؤال هذا ؟

[المتزن]

شف يا حلمي افندي قصدي يا فتحي افندي :)

أول شيء : اسمه ( أضغاث ) أحلام مهوب ( أبغاث ) , لا أرجفك :)

ثاني شيء : أكثر الحلوم لازم تصير خارجة عن المعقول , والا وشلون تصير حلوم أجل ؟؟!!

مثله مثل الأمنيات .. يعني لازم تخالف الواقع شوي .

ثالث شيء : أنا ما أذكر اني حلمت حلم صح .. كلهن أبغاث http://buraydh.com/forum/images/icons/icon10.gif

يعني يطلع الحلم ( مبغوث ) فأول شيء ممكن أشوف روحي قاعدن عند جيراننا وحريمهم وبناتهم ثم فجأة ألقان بالدوام وقاعدتن معنا شغالة تقهوينا وحنا نتداول الأسهم .

هماي قايل لك أبغاث :)


وتقبل تحياتي 00
المتزن

[شموع تحت المطر]

أنــــــــا عن نفسي اعطي الاحلام أشكـــــــل وماهتم فيها....

وأستحقر اللي يلجنا عند حلم تافه مثل وجهه

خلاص حلم يعني ننساه...

أجـــــــــــل تفســــــر...والله انك خطير أنت وولدك....

[عبدالله الوشمي]

( ابغاث ) ( ابغاث )( ابغاث( ابغاث ) ( ابغاث ) ابغاث )( ابغاث )( ابغاث )( ابغاث )( ابغاث )( ابغاث )( ابغاث )( ابغاث )

أنا ما جازلي بكلامك وأحلامك إلا هالكلمة ما أدري منين طلعتلك .........!

[بنت البدائع]

أقطعه ..

لايصير أنت اللي أدقدق علية ومسوي سليمان الفايز..

والله أنا ماأبطيت جتن حالة أول ماأصحى من النوم أمسك الجوال وأدور على المفسرين واحد واحد

ويفسرون لي أحلام ويطلع تفسيرها زين(ن) بالحيل وأطير من الفرح ما أصدق خبر

بس ترى أحلامي مو (أبغاث) على قولتك

أحسها قوية وترمي لمعنى بالواقع حقي ..

عندي رقم مفسرة بحايل إذا سمعتوا به ياعمري هي يعجبن إسلوبه

وشكلي غاثته بكثر أتصالي

كل مادقيت علية واطرح له الحلم ,

وأول سؤال له أنتي متزوجه ؟

وأقوله أنا لا:

تقول إيه هذا رجّال نشمي يبي يجيتس :)

وكل ذاك اليوم وأنا حاطه أيدي على خدي أحتري هالنشمي يجي ولاشفت شي :)

[اسم العضو]

اخي فتحي
انا كل أحلاامي ابيض واسود عمري ماحلمت حلم ملون مناي احلم حلم ملون زي باقي خلق الله ..

سلام ..

[قرناس]

فتحي الشقاقي


هذا من كثرة الأكل الله يسلمك تلبدها رزيزه وتلحقها كأس اللبن
وتنجضع على جنبك اكيد بتجيك زي هالحلوم
اجل طايح في ملعب مزروع خخخخخخخ وجايب قول بعد

قيل قديماً
البطنة تذهب الفطنة

تذهب الفطنه للصاحي اجل في سابع نومه ايش بيكون حاله

عموما
حسب علمي المتواضع

ان الأحلام ثلاثة انواع

1 -- رؤيا صادقة .. وتأتي الى الأنبياء كوحي كرؤيا ابراهيم عليه السلام في ذبخ إبنه اسماعيل .. وغالباً لا تحتاج تأويل .

2 -- رؤيا صالحه .. وهذه هي التي تحتاج الى تأويل .. كرؤيا يوسف عليه السلام

3 -- اضغاث احلام .. وهذه من الشيطان يتلاعب بها على ابن آدم .
او يكون سببها هو احلام وأماني لم يستطع الأنسان تحقيقها في الواقع
فيراها تتحقق في منامه .
مثلا كالسجين تجد انه دائما يحلم انه طليق !!


عاد هالحلوم لا تنسيك سالفة القزم :5[1]:

تحياتي واشواقي

[عاشق ديرتي بريده]

الذي يفسر هو الرؤيه وليس الحلم !!

ولكن اختلط الحابل بالنابل وصار كل شي يفسر !!!


تبي افسر حلمك هذا يافتحي

انت رجال لك اعمال خير ولكن مقصر بصلواتك وموتك قريب فالذي بحاول ان يرميك هو ملك الموت ولكن اجل الله اخذ روحك لكي تتوب لكي تلقى الله بجنات النعيم التي هي بالحلم الملعب المزروع !!

جاءك انذار فهل انت مستجيب !!
تراني مفسر احلام لاتضحك !!

[حصيصه الامريكيه]

ع طاري الحلوووم000
عمررك شايفا احد محلم انه دجاجه تعضه !!!

وياليت بعد تفسرره


نتضـــرك ((( علشان التفسيــر :)

[ابوخالد382]

لقد لازمت بعض مفسري الأحلام فترة من الزمن,,وأستطيع القول أن حلمك يدل على أن منيتك قريبة جدا وعليك أن تتوب إلى الله وتتحلل من الناس وترد الديون اللي عليك أو ستقذف في النار كما قذفت في الملعب......:6[1]:

[المتزن]

عاشق ديرتي بريدة / أبو خالد

خوفوا الله لا تهبلون بالرجال .


وتقبلا تحياتي 00
المتزن

[وميضُ البرق]

أجل ياكثر الأبغاث عند ربعنا!!سالفتنا بقهوة العصر وش حلمت به يافلان!فكرت أسوي كتاب بهالحلوم يكون بمثابة إملاءات!
إلا عندي حلم كل شهر أشوفه طبعًا ماقد حلمت غيره _يقولون أهلي من الدلاخة_يعني لو كنت داقة عليك قبل تهون وش بتفسره؟!
إذا وافقت عرضت لك الحلم ،بس لاتردنا عاد!

[عاشق ديرتي بريده]

عاشق ديرتي بريدة / أبو خالد

خوفوا الله لا تهبلون بالرجال .


وتقبلا تحياتي 00
المتزن

اخوي المتزن
ماقصدي اخوف الرجال بس هذا اللي شفته وانا اقراء الحلم !!!

[جمان البحر]

صراحة حلمك وناااااسة ..أجل طرت وطحت على ملعب ...مت ضحك وانا أقرأه ..

أجل أنا كد حلمت اني أشوف صارور وانسدحت على الأرض وصرت اشوف الجدار مابين جسم الصارور والارض يعني كأنه فتحة تحت الباب ... وقمت من النوم وانا أتعوذ من ابليس واتراجد من الخوف ...المهم بنفس ذاك اليوم شفت صارور كبييييييييييير سوّا لي رعب ...

يعني تراي شييييييي أحلامي تصير بنفس اليوم مب مثل حلمك ما يتحقق أبد ..

المهم انك لاتفسر أحلامك الا اذا تعديت الاربعين علشان تصير عاقل ..وتصير أحلامك راكدة مب طيران وملاعب ..

[علشانك بس]

فتحي الله يعافيك كل يوم حلم وتعال قص علينا حلمك
والله ياعليك حلوم توسع الصدر
انا عن نفسي كل حلومي ابغاث ههههههههه
ماتلقى ولا حلم اضغاث الله يخلف علي
شف تسانك ماهونت عن التفسير علمن تراي توي اخذه غفوه وابي من يفسر لي حلمي
تسنه فلم هندي هالحلم عيى يقضي قمت وافطرت ورجعت اكمله
عاد الى الحين ماقضى بكمله بالليل همن لاقضى بدق عليك تفسره لأنه مايعرف لأبغاث الأحلام الا انت
اشكرك يامفسرنا

[الذاهـبـة]

أبغاث باشا ..

شخبارك .. ؟ هه !!

* أحسن .. أحد قالت تغلط عند قصمان .. ؟ والله ما يفكونك أبد .. *

بالمناسبة ترى الأبغاث غير الأضغاث اللي حنا نعرفها .. و نشوفها ..

يعني تقدرون تقولون .. درجة ثانية من الأحلام الكذبية ..

عاشق بريدة .. ابو خالد ..

فال الله ولا فالكم ..

مايجوز لكم و الله ..

تفسير الحلم عند العصيمي .. لا يتعدى تفسيرين ..

1. إن كانت بنت فإن تفسير الحلم هو : زواجها قريب ..

2. إن كانت مدام .. فإن تفسير الحلم هو خير إن شاء الله قادم .. و قد يكون وظيفة جديدة أو منزل ..

ولا يرد على اتصالات رجال .. هه !!

[جلوي العتيبي]

فتحي

عاشق يقول :
انت رجال لك اعمال خير ولكن مقصر بصلواتك وموتك قريب فالذي بحاول ان يرميك هو ملك الموت ولكن اجل الله اخذ روحك لكي تتوب لكي تلقى الله بجنات النعيم التي هي بالحلم الملعب المزروع !!

والحلم على أول تفسير يعني الله يغفر لك .

الشيء الثاني كل حلم حاول توجه الرحله غرب وتطب بملعب العيال وتحسم لهم المباريات :)

والله أبغاث :)حلوه يافتحي

[إشراق]

أبغاث ههههههههههه

ياكثر الأبغاث والأبغاث

[عازفة ألحان الليل]

ههههههههه ازين شي يافتحي انك طلعت عقول الناس غبييييييييييه تعجبني
اما بالنسبة للاحلام الغير واقعية ان الاحلام عبارة عن نفسيتك يعني اي شي
تفكرفيه او ترغبة بشدة او..... الى آخره وتكون لاتستطيع الوصول اليه او لا تستطيع اعلانه علنا
يقوم الحلم بنيابتا عنك .. ولاتنسا اذا كنت متعب ايضا تحلم بكوابيس
هذي من وجهة نظري .

[فتحي الشقاقي]

المتزن
شف يا حلمي افندي قصدي يا فتحي افندي

أول شيء : اسمه ( أضغاث ) أحلام مهوب ( أبغاث ) , لا أرجفك

هههههههه تصدق توي ادري ،، وانا دايم اسمع المفسرين يقلون اضغاث احسبها ابغاث
يارجال المعنى واحد لا دقق خلك حليل

ثاني شيء : أكثر الحلوم لازم تصير خارجة عن المعقول , والا وشلون تصير حلوم أجل ؟؟!!

مثله مثل الأمنيات .. يعني لازم تخالف الواقع شوي .

صدقت بس حتى الامنيات مافيها تداخل وتضارب مثل الاحلام

وهذاك قلتها .. الاحلام مره عند الجيران وفجأه في الدوام تقهويك شغاله >> انواع التضارب والخبطه

سبحان الله ..

المتزن مرحيب فيك مرحيب

[فتحي الشقاقي]

أنــــــــا عن نفسي اعطي الاحلام أشكـــــــل وماهتم فيها....

وأستحقر اللي يلجنا عند حلم تافه مثل وجهه

خلاص حلم يعني ننساه...

أجـــــــــــل تفســــــر...والله انك خطير أنت وولدك....

اهم شي ولدي هههه

صدقتي المفروض الواحد مايفسر حلمه الا اذا تكرر اكثر من مره في كم ليله

بعض الناس ياخذ غفوه ويشغل العالم هه

مرحبا بك

[فتحي الشقاقي]

( ابغاث ) ( ابغاث )( ابغاث( ابغاث ) ( ابغاث ) ابغاث )( ابغاث )( ابغاث )( ابغاث )( ابغاث )( ابغاث )( ابغاث )( ابغاث )

أنا ما جازلي بكلامك وأحلامك إلا هالكلمة ما أدري منين طلعتلك .........!

هههه

طلعت من العجله + شوي جهاله = فتحي (:

[فتحي الشقاقي]

بنت البدائع
أقطعه ..

لايصير أنت اللي أدقدق علية ومسوي سليمان الفايز..

والله مو بعيده يطلع انا .. ههه

والله أنا ماأبطيت جتن حالة أول ماأصحى من النوم أمسك الجوال وأدور على المفسرين واحد واحد

ويفسرون لي أحلام ويطلع تفسيرها زين(ن) بالحيل وأطير من الفرح ما أصدق خبر

ايه بعض المفسرين جزاهم الله خير يفرحون بالي صوتها حلو .. التفسير يدخل من باب التفائل عندهم ههه
صوتك حلو يطلع معك حلم حلو ههه .. عاد الحرمه ما تصدق خبر وتعلق حياتها في تفسير حلم واي شي حلو تقول اييييييييييه هذا اكيد حلمي ههه
لذلك كل ما حلمت دقت على مفسر وعلى هالمنوال ..

عندي رقم مفسرة بحايل إذا سمعتوا به ياعمري هي يعجبن إسلوبه

وشكلي غاثته بكثر أتصالي

كل مادقيت علية واطرح له الحلم ,

وأول سؤال له أنتي متزوجه ؟

وأقوله أنا لا:

تقول إيه هذا رجّال نشمي يبي يجيتس

ايه المفسر يقصد نفسه يبي يجيك بس انتي مافهمتي قصده ههه من اليوم يلمحلك >> انتي متزوجه هههه
كان قلتي ايه وشفتي وش يطلع معك هه ..

وكل ذاك اليوم وأنا حاطه أيدي على خدي أحتري هالنشمي يجي ولاشفت شي

وصفي البيت للمفسر وصدقيني بيطق الباب ...

بالتوفيق >> احلا احلا بيتزوجها مفسر احلام ههه

[فتحي الشقاقي]

اخي فتحي
انا كل أحلاامي ابيض واسود عمري ماحلمت حلم ملون مناي احلم حلم ملون زي باقي خلق الله ..

سلام ..

يمكن فراشك ابض بسود ،، عشان كذا الشاشه عندك مو صافيه

انصحك بفراش كله الوان وان حصل بعد مفرش كله ورود عشان تتهنا بالاحلام الورديه هه

بالتوفيق

[@عيون الصقر@]

ههههههههههههههههه ابغاث
الله يرجك انت وحلمك
يافتحي بيه بن فتح الباب بن يارب خلي جمعه بن روح الفؤاد ياظالمني.

مر علي وقت لو انعس حلمت
قلت وش السالفه
رحت اشتريت كتاب تفسير احلام
واحطه تحت المخده
وتوقفت الاحلام نهائي

خساير مايعلم فيها الا الله

[فتحي الشقاقي]

قرناس
فتحي الشقاقي


هذا من كثرة الأكل الله يسلمك تلبدها رزيزه وتلحقها كأس اللبن
وتنجضع على جنبك اكيد بتجيك زي هالحلوم
اجل طايح في ملعب مزروع خخخخخخخ وجايب قول بعد

صدقت والله متسحر رزيزه ومدسمها بلبن الهنا لين عجزت اقوم >> على الله اسمن شوي

قيل قديماً
البطنة تذهب الفطنة

تذهب الفطنه للصاحي اجل في سابع نومه ايش بيكون حاله

وما ادراك في واحد نايم 12 ساعه طقه وحده ..

حسب علمي المتواضع

ان الأحلام ثلاثة انواع

1 -- رؤيا صادقة .. وتأتي الى الأنبياء كوحي كرؤيا ابراهيم عليه السلام في ذبخ إبنه اسماعيل .. وغالباً لا تحتاج تأويل .

كل ما قريت هالقصه اموت من الصياح .. قصتها تهول وخاصه لما يلقيها عبدالعزيز الاحمد في قصيده بلسانه وصوته الجميل ..

2 -- رؤيا صالحه .. وهذه هي التي تحتاج الى تأويل .. كرؤيا يوسف عليه السلام

هذي الرؤيا المفترض من الانسان ان يتعلم منها الصبر على تحقيق ما تؤوله .. لان يوسف صبر اربعين سنه حتى تم رؤياه

ربعنا يبي الحلم والتفسير اليوم وبكرا يتم التفسير ..

3 -- اضغاث احلام .. وهذه من الشيطان يتلاعب بها على ابن آدم .
او يكون سببها هو احلام وأماني لم يستطع الأنسان تحقيقها في الواقع
فيراها تتحقق في منامه .
مثلا كالسجين تجد انه دائما يحلم انه طليق !!

صدقت وهذا الي صاير مع ربعنا

عاد هالحلوم لا تنسيك سالفة القزم

تحياتي واشواقي

اما لو يجيني القزم بالحلم كان انتحر .. ماتحملته بالدوام اتحمله بالمنام
>> بس بقوله انه تحش فيه برسل الرابط هه

شرفتني استاذ قرناس وتحياتي لشخصك وكرمك الرائع

[فتحي الشقاقي]

الذي يفسر هو الرؤيه وليس الحلم !!

ولكن اختلط الحابل بالنابل وصار كل شي يفسر !!!


تبي افسر حلمك هذا يافتحي

انت رجال لك اعمال خير ولكن مقصر بصلواتك وموتك قريب فالذي بحاول ان يرميك هو ملك الموت ولكن اجل الله اخذ روحك لكي تتوب لكي تلقى الله بجنات النعيم التي هي بالحلم الملعب المزروع !!

جاءك انذار فهل انت مستجيب !!
تراني مفسر احلام لاتضحك !!

الله يرحم الحال يا عاشق .. كلنا بنموت
تصدق صارلي اسبوع يقلون العيال بالاستراحه نحس انك بتموت قريب وبالصدفه قبل مدة قابلت القسومي مغسل الموتى ووصيته قلت الله الله فيني يابوعبدالله


عاشق
صدق انت مفسر ؟

ياخي عندي الوالده عليها حلوم دايم اطيح فيها انا بالذات ومشكلتها تفسر حلمها بنفسها

قبل مده حلمت ان واحد من اصابعها يوجعها وجت لمي قلت انت مسوي شي ؟
قلت لا
ومن شين حضي
من بكرا ابوي جاي يكفلني بالهيئة هه

قالت بقلبي اهم شي صدق حلم امي هه

[فتحي الشقاقي]

ع طاري الحلوووم000
عمررك شايفا احد محلم انه دجاجه تعضه !!!

وياليت بعد تفسرره


نتضـــرك ((( علشان التفسيــر :)

هذي وحده من صحباتك او قرايبك طيبه وعلى نياتها وانتي دايم تتطنزي فيها
خوفي ربك
هذا والله اعلم


ولا تعالي عند عاشق ديرتي بريده يفسرلك الحلم

[فتحي الشقاقي]

لقد لازمت بعض مفسري الأحلام فترة من الزمن,,وأستطيع القول أن حلمك يدل على أن منيتك قريبة جدا وعليك أن تتوب إلى الله وتتحلل من الناس وترد الديون اللي عليك أو ستقذف في النار كما قذفت في الملعب......:6[1]:

اقول يا رجال تمسك بس

انا ملازمك منذ الصغر واعرفك زين .. اطلق مفسر لازمته انت هو فتحي ايام كان يستهبل هه
ومن قال ان علي ديون هه

استغفر ربك يابوخالد روعتني الله يهديك
وانشاءالله اني معك بالجنة بالفردوس يابوخالد ..

[فتحي الشقاقي]

عاشق ديرتي بريدة / أبو خالد

خوفوا الله لا تهبلون بالرجال .


وتقبلا تحياتي 00
المتزن

وما ادراك يالمتزن صارلي مده ماغير هواجيس ومفهي
واحد من شلة الدوام عندي ماسكني على جنب يقول اشك انك مسحور واتمنى تلازم شيخ حتى ينفك السحر الي فيك هه

وجاء ابو خالد وعاشق زادو الطين بله هه

[فتحي الشقاقي]

أجل ياكثر الأبغاث عند ربعنا!!سالفتنا بقهوة العصر وش حلمت به يافلان!فكرت أسوي كتاب بهالحلوم يكون بمثابة إملاءات!
إلا عندي حلم كل شهر أشوفه طبعًا ماقد حلمت غيره _يقولون أهلي من الدلاخة_يعني لو كنت داقة عليك قبل تهون وش بتفسره؟!
إذا وافقت عرضت لك الحلم ،بس لاتردنا عاد!

عاد انا حاسس ان عندي الهام + خبره بالحلوم والتفسير .. لذلك هاتي حلمك

انتظرك

[فتحي الشقاقي]

اخوي المتزن
ماقصدي اخوف الرجال بس هذا اللي شفته وانا اقراء الحلم !!!

اهم شي اذا مت ادعلي بالرحمة ..

..........

[اعلامي متعقل]

طيب واللي ما عمره حلم ...وش رايك شيخ فتحي .. خصوصا انني اعاني من احلام اليقضة

يعني ... اخوك المسكين عالم ذرة .. واحيانا فضاء .. واحيانا .. ماردونا .. واحيانا حاكم للعالم

واحيانا .. اللباقي مشفر ... تحياتي ,, سي فتحي

[فتحي الشقاقي]

صراحة حلمك وناااااسة ..أجل طرت وطحت على ملعب ...مت ضحك وانا أقرأه ..

أجل أنا كد حلمت اني أشوف صارور وانسدحت على الأرض وصرت اشوف الجدار مابين جسم الصارور والارض يعني كأنه فتحة تحت الباب ... وقمت من النوم وانا أتعوذ من ابليس واتراجد من الخوف ...المهم بنفس ذاك اليوم شفت صارور كبييييييييييير سوّا لي رعب ...

يعني تراي شييييييي أحلامي تصير بنفس اليوم مب مثل حلمك ما يتحقق أبد ..

المهم انك لاتفسر أحلامك الا اذا تعديت الاربعين علشان تصير عاقل ..وتصير أحلامك راكدة مب طيران وملاعب ..

اذا قلتي صارور لحقيها في الله يعزك لانوه تقل حامت اكبدنا ،،
وتفسيره اتوقع والعلم عند الله ،، انك اذا دخلتي دورة المياه الله يعزك تتأخري او تعملي حاجات مش سليمة .. مثال / فيه ناس تغني بالحمام الله يعزك او تسمع اغاني او تبارغ في الترويشه وهذا شي مو حلو لان الحمام الله يعزك مكان للشياطين

على طاري احلام الي بالاربعين ،، مره اخوي محلم ان الملك فهد الله يرحمه ايام كان عايش كان يسبح في البحر وغرق ،، جاء اخوي وانقذه ،، عاد اخوي جالس عند الوالد يحكيله الحلم قال ابوي ليتك ما انقذته خل نفرح في موته لو بحلم ههه
استغفرالله .. على العموم كلهم ماتو .. ابوي والملك فهد واخوي >> خايف من الحكومه

يذكرون ان واحد محلم انه استلم الحكم بالمملكة العربية السعودية
وعين خوياه كلهم امراء المناطق وبعضهم وزراء
عاد لما صحا من نومه جلس عند اخوياه وقال حلمه وقال وش عينهم بالحلم
خوياه انبسطو .. من بكرا كلهم عند المباحث ممسوكين
الحكومه تقول ليش تحلم
وخوياه عند المباحث يقلون ترا حنا بالواقع والحلم رافضين التعيين هههههههههههههههههههههههههههههههههههههههههههههههههه ههههه



ماودك تقول شي الحين ،، الدنيا توحش

[فتحي الشقاقي]

فتحي الله يعافيك كل يوم حلم وتعال قص علينا حلمك
والله ياعليك حلوم توسع الصدر
انا عن نفسي كل حلومي ابغاث ههههههههه
ماتلقى ولا حلم اضغاث الله يخلف علي
شف تسانك ماهونت عن التفسير علمن تراي توي اخذه غفوه وابي من يفسر لي حلمي
تسنه فلم هندي هالحلم عيى يقضي قمت وافطرت ورجعت اكمله
عاد الى الحين ماقضى بكمله بالليل همن لاقضى بدق عليك تفسره لأنه مايعرف لأبغاث الأحلام الا انت
اشكرك يامفسرنا

ههههههه
والله انا نادر اني احلم .. واذا حلمت ما اذكر احلامي من شدة انها أبغاث كاااااااك

وبعدين متأكده انك تحلمي انتي ؟
اخاف متابعه مسلسل على بالك حلم .؟

.......

اذكر مره واحد في حملة حج
وهم راكبين الباص كان فيه معهم واحد مفسر احلام ماسك المكرفون ويفسر احلام الحجاج بالدور ..
عاد جاء واحد من قرادته وقال حلم .. تفسيره قال بالميكرفون قدام العالم
انت متزوج وحده مسيار وكيت وكيت وكيت

زوجته صاحب الحلم كانت في نفس الحمله .. اغمي عليها وماكمت حجها هههه
زوجها مسيكين للحين جالس يقنعها انه ماتزوج والتفسير خرابييييييط

.........

اذا خلص مسلسلك .. مدري حلمك

عطينا خبر تراي متحمس احس انه قريب من مسلسل جرح الزمن كااااك

[فتحي الشقاقي]

الذاهبة
أبغاث باشا ..
أضغاث يا ستي هه
شخبارك .. ؟ هه !!
على خبرك هه
* أحسن .. أحد قالت تغلط عند قصمان .. ؟ والله ما يفكونك أبد .. *
عسى الله يتمم نقلي للامارات وافتك من ذا القصمان والشهابه
بالمناسبة ترى الأبغاث غير الأضغاث اللي حنا نعرفها .. و نشوفها ..

يعني تقدرون تقولون .. درجة ثانية من الأحلام الكذبية ..
على بالي بترقعها
جت الذاهبة تعميها في الاخر >> كذبية هه
عاشق بريدة .. ابو خالد ..

فال الله ولا فالكم ..

مايجوز لكم و الله ..
كلش ولا طاري الموت عند البدو هه

تفسير الحلم عند العصيمي .. لا يتعدى تفسيرين ..

1. إن كانت بنت فإن تفسير الحلم هو : زواجها قريب ..

2. إن كانت مدام .. فإن تفسير الحلم هو خير إن شاء الله قادم .. و قد يكون وظيفة جديدة أو منزل ..

ولا يرد على اتصالات رجال .. هه !!

فالك وفالهم طيب
استاذه الذاهبة مايجوزلك تدخلي في نية الرجال

.................

استاذه الذاهبة تفسير الاحلام شي عجيب جداً سبحان الله

يذكرون ان أبن باز اتصل على المفسر الرومي
وقاله خف الله يرومي هبلت في العالم

تصدقين الذاهبة ان الرومي يذكر الوقت والتاريخ في تفسيره للحلم .؟

يعني عادي يقول انك بتولدي بعد اسبوع تاريخ كذا ... وساعة كذا ...

عاد يقلون ان الشيخ ابن باز رحمة الله عليه نصحه وقال لاتفسر الاحلام بهذي الكثره ومن هالكلام ...

المهم ان الشيخ ابن باز لما خلص قال للرومي حلم ..
قال الرومي ياشيخ انت بتروح لمؤتمر في الطائف يوم الاثنين
والساعه 9 الصبح بتنزل مكة تاخذ عمره والساعه 11 بترجع للطائف عشان المؤتمر..
الشيخ سكر السماعه
ولما دارت الدنيا
يذكرون ان الشيخ ابن باز تم حلمه والي ذكره في سواقه
لما طلعو من مكة الساعه 11 الصبح قال السواق حق الشيخ ترا هذا تفسير الرومي يا شيخ
الشيخ تعجب منه ههه

بصراحه تفسير الاحلام يختلف من شخص لشخص وتحس انه الهام من ربي

[فتحي الشقاقي]

فتحي

عاشق يقول :


والحلم على أول تفسير يعني الله يغفر لك .

الشيء الثاني كل حلم حاول توجه الرحله غرب وتطب بملعب العيال وتحسم لهم المباريات :)

والله أبغاث :)حلوه يافتحي

يقال ان الحلم على جناح طائر اذا فسر يقع
مو شرط يقع الي يقول عاشق بس يقع من جناح الطائر تفسير الحلم الاكيد ..
فالنا طيب
والورد يحمي المؤمن ،، وانا متوكل على ربي ومؤمن وما اخاف من الموت >> يقولها وهو كأنه فيه العبره ههه


ابشر بدون حلم اجي والعب معكم .. وترا فيني ميزه ماقد لعبت مع فريق وانهزم
وماقد حضرت مباراه وانهزم الفريق الي جاي عشانه ..
حضي حلو زي حلاتك يابو شهد

موفق يالذيب

ومعليش ع الهزيمه مع نجران ههه >> شكل هذا تفسير حلمي >> الهلال مهزوم

[فتحي الشقاقي]

ههههههههه ازين شي يافتحي انك طلعت عقول الناس غبييييييييييه تعجبني
اما بالنسبة للاحلام الغير واقعية ان الاحلام عبارة عن نفسيتك يعني اي شي
تفكرفيه او ترغبة بشدة او..... الى آخره وتكون لاتستطيع الوصول اليه او لا تستطيع اعلانه علنا
يقوم الحلم بنيابتا عنك .. ولاتنسا اذا كنت متعب ايضا تحلم بكوابيس
هذي من وجهة نظري .

كلامك خطاء

لو اي شي ارغبه بشدة جاني بالحلم ،، كان طول عمري نايم احلم في رغباتي الي لم ولن تتحقق بالواقع

الي معقول ان الواحد اذا تعبان او مرهق او متضايق او مكثر اكل بهذي انا معك
تجيه كوابيس
وبعض الناس الغرب انه يسولف وهو نايم
بصراحه قبل مدة اضطريت انام مع خالتي الي تبلغ من العمر 55 سنه في غرفه واحده ..
انا في سرير وهي في سرير .. لا احد يجي يقول وش نومه مع حرمه هه
المهم اني عجزت انام منها طول الليل
ماغير تسولف والغرب انها تسولف بصوت عالي بس ماتميز كلامها كأنها تهذري وتون
انا بصراحه اتضايقت
ومن بكرا قلتها يا خاله بصراحه انتي متعبه بالنوم
لان تسولفي .. قالت لا لا مو صحيح
قلت طيب تراي بسجل صوتك بالجوال اليوم اذا نمنا
قالت اوكي
لما نمنا سجلتها
من بكرا قامت من النوم وسمعتها ومير تزعل .. قالت ليش تسجلني يالشين
ههههه
تقهر بصراحه ليش تزعل وش اسوي فيها انا اذا حلومها سوالف بصوت واضح ههه

[عبدالله30]

أهلا أخي فتحي0

تفسير حلمك 00انك كثير الأحلام والتمني تطير مع أحلامك وخيالاتك لكنك لاتعمل على تحقيقها0

بس أنا ودي ادري هل العمى يشوف بالحلم ولا لا؟؟

تحياتي لك وأحلام سعيدة0

[فتحي الشقاقي]

ههههههههههههههههه ابغاث
الله يرجك انت وحلمك
يافتحي بيه بن فتح الباب بن يارب خلي جمعه بن روح الفؤاد ياظالمني.

مر علي وقت لو انعس حلمت
قلت وش السالفه
رحت اشتريت كتاب تفسير احلام
واحطه تحت المخده
وتوقفت الاحلام نهائي

خساير مايعلم فيها الا الله

هههههههههههههه
ههههههههههههه
ههههههههههههه

والله انك مجنون يا خوي حمودي الكــ
اجل خساير مايعلم فيها الا الله
هههههههههههههههههههههههه

والله اني مت ضحك ..>> عليك دخلات مجنونه يالصقر

الحلوم الي عندك لو تخفف من وزنك بتروح
احسن يالدب

[فتحي الشقاقي]

××××××××××××××××

[فتحي الشقاقي]

طيب واللي ما عمره حلم ...وش رايك شيخ فتحي .. خصوصا انني اعاني من احلام اليقضة

يعني ... اخوك المسكين عالم ذرة .. واحيانا فضاء .. واحيانا .. ماردونا .. واحيانا حاكم للعالم

واحيانا .. اللباقي مشفر ... تحياتي ,, سي فتحي

ماردونا هههه
قديم انت .. وينك عن النجوم الجديده رونلدينو والشلة
احلامك غريبه انت .. يبدو انك راعي مخمخه بالحياه ههه
هذي الاحلام كثير تراود الي ينام وهو محشش >> تراي ما تهمك لا تفهمني غلط

اما عن الي مشفر ههههه
اعتقد انه يدخل كسبب في عدم رغبة الشباب بالزواج خخخخخ


نورتا يابوي

[فتحي الشقاقي]

أهلا أخي فتحي0

تفسير حلمك 00انك كثير الأحلام والتمني تطير مع أحلامك وخيالاتك لكنك لاتعمل على تحقيقها0

بس أنا ودي ادري هل العمى يشوف بالحلم ولا لا؟؟

تحياتي لك وأحلام سعيدة0

هلا وغلا بعبودي هلا حبيبي
اجل كثير الاحلام والتمني ههههه راحت عليك .. كنت دايم اقولها ايام كنت مفسر .. لان كل الناس تحلم وتتمنى هههه


اما عن السؤال ؟
هل الاعمى يشوف بالحلم ؟؟؟؟
بصراحه انا مثلم ما ادري ..
ياليت احد ينورنا بالجواب

بس مشكله في احد اعمى بالمنتدى عشان يعرف وش نكتب
ياليت احد يسأل ويعطينا خبر

[عازفة ألحان الليل]

كلامك خطاء

لو اي شي ارغبه بشدة جاني بالحلم ،، كان طول عمري نايم احلم في رغباتي الي لم ولن تتحقق بالواقع

الي معقول ان الواحد اذا تعبان او مرهق او متضايق او مكثر اكل بهذي انا معك
تجيه كوابيس
وبعض الناس الغرب انه يسولف وهو نايم
بصراحه قبل مدة اضطريت انام مع خالتي الي تبلغ من العمر 55 سنه في غرفه واحده ..
انا في سرير وهي في سرير .. لا احد يجي يقول وش نومه مع حرمه هه
المهم اني عجزت انام منها طول الليل
ماغير تسولف والغرب انها تسولف بصوت عالي بس ماتميز كلامها كأنها تهذري وتون
انا بصراحه اتضايقت
ومن بكرا قلتها يا خاله بصراحه انتي متعبه بالنوم
لان تسولفي .. قالت لا لا مو صحيح
قلت طيب تراي بسجل صوتك بالجوال اليوم اذا نمنا
قالت اوكي
لما نمنا سجلتها
من بكرا قامت من النوم وسمعتها ومير تزعل .. قالت ليش تسجلني يالشين
ههههه
تقهر بصراحه ليش تزعل وش اسوي فيها انا اذا حلومها سوالف بصوت واضح ههه
يعني ماقد حلمت بشي ترغبة بشدة
طيب كامثال الجوع او العطش اذا كنت عطشان وترغب الماء لازم تحلم به
هذا قصدي يعني ترغب بأي شي
اما خالت هذي سلم لي عليها هههههههه

[فتحي الشقاقي]

الفنانه والمبدعة
يعني ماقد حلمت بشي ترغبة بشدة

لا والله ياليت

طيب كامثال الجوع او العطش اذا كنت عطشان وترغب الماء لازم تحلم به

لا ماقد عطشت .. اذا عطشت اقوم اشرب ماء وارجع انام
واذا جعت اقوم اكل وارجع انام ..

الاكل والشرب متوفر واقرب من الحلم لو احتجته هههه

هذا قصدي يعني ترغب بأي شي

على كذا شكلك تعبي بطنك اكل وشرب بالاحلام هههه

غريب الي يصير معك ..

اما خالت هذي سلم لي عليها هههههههه

عساك ما تنامي معها .. انواع الافلام وهي نايمه والي يقهرك انها تسولف وتهاوش بعد مع انو بالاحقيقه هي مره طيبه وما تهاوش هه >> يوم نامت بانت على حقيقتها
انا حدتني الضروف انام معها في سفره غبيه ..

كثيره عندي سوالف النوم مع العالم والمواقف بس مابي اقلب الموضوع سوالف ،، بيني وبينك اشوف الناس تقل كشت شوي
يقلون انهم مايبون المواضيع المطاطيه هه

[مــنــال]

مرحبا أخي فتحي ..

فيه أحلام يحلم بها الشخص نتيجة التفكير الكثير و القلق من امر ما ..

وفيه مثل حلمك لا يتعدى كونه مغامرات :)

لكن فيه أحلام تجبرك على الرغبة في تفسيرها ..

مره وحدة جات قالت لنا الظاهر القيامة بتقوم في جيل بنتي و عمر بنتها خمس سنوات ، قالت ودي افسر الحلم ..

المهم ، طلع لها في الحلم أنها غاصت في بحر و شافت أشياء غريبة و ايضا ً رأت ابنتها محتضنه أحد الأنبياء

و هيأتها مرتاحة إليه ، المهم .. لما فسرته طلع الحلم بعيد عن ماكانت تظنه ..

قال لها المفسر : أن ابنتها في المستقبل لربما تكون من الدعاه إلى الخير وبشرها في ابنتها خيرا ًو هذه الأم حقيقة مهتمة بإبنتها

و أدخلتها تحفيظ قرءان من سن صغيرة و ابنتها ذكية ماشاء الله و عقلها أكبر من سنها ..

لذلك لربما بعض الأحلام تكون إشارة أو تنبيه للمرء ..

و لو أنني أفضل تواجد أختنا فاطمة الوليعي ، فهي لديها خبرة و مطلعة في هذا و متأكدة أن تداخلها سيكون ثري إن شاء الله .

[the_moon]

مر علي وقت لو انعس حلمت
قلت وش السالفه
رحت اشتريت كتاب تفسير احلام
واحطه تحت المخده
وتوقفت الاحلام نهائي

خساير مايعلم فيها الا الله
هههههههههههههههههههههه الله يقلع بليسك معت من الضحك خخخخخخخ

على طاري احلام الي بالاربعين ،، مره اخوي محلم ان الملك فهد الله يرحمه ايام كان عايش كان يسبح في البحر وغرق ،، جاء اخوي وانقذه ،، عاد اخوي جالس عند الوالد يحكيله الحلم قال ابوي ليتك ما انقذته خل نفرح في موته لو بحلم ههه
استغفرالله .. على العموم كلهم ماتو .. ابوي والملك فهد واخوي >> خايف من الحكومه
ماودك تقول شي الحين ،، الدنيا توحش
ههههههههههههههههههه
صدق أنت مابك مكينه هو هالحين أصلاً بقى شيء ماقلته

إلا أقول يافتحي واللي ماتسد حلم
آخر حلم أذكره والله العالم إنه من خامس إبتدائي حتى أبغاث مهب هاك الحلم
وش رايك وش العلاج لايصير بس تحت مخدتي كتاب الأحلام حق عيون وإلا وش بلاي ما أحلم

[فتحي الشقاقي]

مرحبا أخي فتحي ..

فيه أحلام يحلم بها الشخص نتيجة التفكير الكثير و القلق من امر ما ..

وفيه مثل حلمك لا يتعدى كونه مغامرات :)

لكن فيه أحلام تجبرك على الرغبة في تفسيرها ..

مره وحدة جات قالت لنا الظاهر القيامة بتقوم في جيل بنتي و عمر بنتها خمس سنوات ، قالت ودي افسر الحلم ..

المهم ، طلع لها في الحلم أنها غاصت في بحر و شافت أشياء غريبة و ايضا ً رأت ابنتها محتضنه أحد الأنبياء

و هيأتها مرتاحة إليه ، المهم .. لما فسرته طلع الحلم بعيد عن ماكانت تظنه ..

قال لها المفسر : أن ابنتها في المستقبل لربما تكون من الدعاه إلى الخير وبشرها في ابنتها خيرا ًو هذه الأم حقيقة مهتمة بإبنتها

و أدخلتها تحفيظ قرءان من سن صغيرة و ابنتها ذكية ماشاء الله و عقلها أكبر من سنها ..

لذلك لربما بعض الأحلام تكون إشارة أو تنبيه للمرء ..

و لو أنني أفضل تواجد أختنا فاطمة الوليعي ، فهي لديها خبرة و مطلعة في هذا و متأكدة أن تداخلها سيكون ثري إن شاء الله .

ماشاءالله ياسعدها في بنتها ،، وربي يصلحها ويحفظها

قبل مدة وحده محلمة انها جالسه في حديقه ملكها

وجاء السديس امام الحرم وجلس ياكل من ثمار حديقتها

ولما سألت عن تفسير الحلم قال الشيخ انك متكلمة في حق السديس

قالت الحرمه والله ياشيخ ما اذكر اني قايله شي في حق السديس

قال الشيخ انتي قايله شي بس اتذكري .. قالت اذكر اني قلت ( ان الشريم احس من صوت السديس ) وهذا الي قلته

قال الشيخ هذا الي خلاه ياخذ من اعمالك

...

منال منوره الله يحفظك

[فتحي الشقاقي]

هههههههههههههههههههههه الله يقلع بليسك معت من الضحك خخخخخخخ

ههههههههههههههههههه
صدق أنت مابك مكينه هو هالحين أصلاً بقى شيء ماقلته

إلا أقول يافتحي واللي ماتسد حلم
آخر حلم أذكره والله العالم إنه من خامس إبتدائي حتى أبغاث مهب هاك الحلم
وش رايك وش العلاج لايصير بس تحت مخدتي كتاب الأحلام حق عيون وإلا وش بلاي ما أحلم

ذامون

والله انا زيك ما اذكر اني حلمت ابد .. ماتشوفني فرحان وجاي اكتب موضوع عشان حلمت هالمره ..
سبحان الله احس الناس الي تحلم هذي في شي يسوونه يخليهم يحلمون بستمرار
والله يافيه واحد من العيال مدوخنا في احلامه
كل يوم يحلم في واحد من شباب الاستراحه ويجي ميت من الضحك يقص القصه
تصدق احلامه كلها استح ...
ماخلى احد ما بر فيه هالولد بتفسير حلمه ، الظاهر انه يحب كل الناس بنات وعيال