أبو فارس .. نقل مدارس .. !!

[الذاهـبـة]

السلام عليكم و رحمة الله ..

قدر الله و جعلني أنثى .. تعيش في المملكة العربية السعودية ..

و من عامة الشعب أيضاً ..

وهذا سبب كافي جداً .. لأخبركم أني لا أمتلك سيارة خاصة ..

ولا يسمح لي بقيادتها ..

لكن .. بين الفينة و الأخرى .. " يبخون " علينا من المسكنات ..

حتى نسكت و نرضى .. هه !!

ماعلينا ..

المهم أنني تورطت _ و عدد لا بأس به من زميلات العمل _ بتعذر وسيلة النقل ..

وحيث أنه يصرف لنا بدلات ( نقل )من المعازيب .. إذن : كل وحدة تبلع العافية ..

و تبحث لها عن " نقل " يتناسب مع كينونتها .. !

فاجتمعنا ننقب و نبحث عن ( نقل ) بمواصفات قياسية ..

فكل واحدة منا .. أخذت قلم و ورقة مفكرة .. و جعلت تكتب شرطها .. هه !!

فمثلاً ..

1. سيارة جديدة واسعة .. و مكيفة !

2. سواق سعودي .. ذكر مسلم عاقل بالغ قادر فاهم ..

3. مــــــــــــايسرع .. * شرطي الخاص *

4. يحترم المواعيد .. * كثر منها *

و غير ذلك ..

بدأت عندنا حالات الطوارئ .. و تحولت جوالاتنا إلى E.R

وذلك لإمتلائها بأرقام .. أرقام .. أرقام .. مسجات و بطاقات اعمال .. هه !!

و البركة في صديقاتنا و معارفنا .. فزعــــــــــــات عسانا ما نعدمهنش .. :) :) :)

لااااا إله إلا الله ..

من بيدق على كل ذولا .. :( !!

استعرضنا الأرقام ..

أبو خالد نقل سعودي
<<< رفيقنا بالمنتدى .. كااااااااااااااك

ابو محمد نقل
<<< وبالمساء يبيع قرصان ..

ياسر نقل فلسطيني
<<< عووووذه .. قطيعه مانبي متوحشات من هالجنسية !

نقل سوداني 1
نقل سوداني 2

<<< ياحول مالهم أسماء ؟!

شركة نقل .. وكسي
<<< إذا غيروا اسمهم و خففوا سرعتهم .. ركبنا معهم .. هه !!

شركة نقل .. راحة الطريق
<<< راحة طريق .. بس تعب جيوب .. ولازم 12 بنت .. من وين نأمن هالعدد !!

:
:
:

طلبنا أول رقم و كان نقل مصري الــ g ـنسية ..
-السلام عليكم .. تنقل مدرسات يا أخوي ؟
-و عليكم السلام و رحمة الله و بركاته نعم يا أختي الفاضلة أنقل مدرسات إن شاء الله ..

* الصراحة إني لان قلبي من قوة إيمان هذا المصري الله يجزاه خير ..
و كدت أرى دمغة السجود على جبينه .. سبحان الله الورع باين بالتليفون !!

- طيب بكم ؟
- لن أحدد بارك الله فيكي أنتم بأه حددوا و شوفوا ..

* وااااو .. والله انه انسان خيّر .. من جد أمي داعية لي *

- طيب وشي سيارتك ؟
- مرسيدس موديل 40 قبل الميلاد .. و مافيهاش مكيف للأمانة .. !

* ايه عادي .. أصلاً فرصة نسوي ساونا بالطريق .. هه !

- طيب ممكن تعطينا صورة من الإقامة .. و مكان عملك و اسم كفيلك ؟
- إيه ؟ أولي تاني كده ؟

* بسم الله ؟! وش به ذا المسلسل المصري ؟!

- اسمعي بأه أنا لي بالصعوطية خمسة و تلاتين سنة .. و معروف بين كوووول اهل
بريدة .. آل إيه ؟ عاوزه إيه يختي ؟ بأولك إيه .. خلاص .. موش حــ وصّل حد ..
ماشي كده ؟!

<<< مازالت الكشرة مهجوجة .. أثر الإنقلاب المفاجئ !!

- وع من زينك يا لطعمية .. والله لأبلغ عنك البلدية .. عشان تعرف ترفع صوتك علي .. ويعه بلا ويعه .. عندي 564546 رقم سواق غيرك .. تحسبنا بنموت ؟!

* طبعاً هذا كله بعد ما قفلت الخط .. هه !!


******************

هذي سيارة أبو محمد .. سواق سعودي .. تجاوز عمره 66 سنة ..
http://www.mitchell.derbycounty.co.uk/schoolbus.jpg

ولو .. كشخة هالشيبة .. هه !

بس مشكلة مامعه محرم ..

أمممممممم

الشكوى لله تراه شايب يعني اطمئنوا يا بنات .. لو تنفخ عليه طاح .. !

ركبنا معه أول يوم .. بعد ما اتفقنا على رسم التوصيل ..

الرجل محترم جداً .. و سيارته مهضومة ..

صحيح إننا كأننا ( نكته تجوب الشوارع ) .. بس ميخالف ..

أهم شي نوصل الدوام السعيد .. هماه ؟!

أكثر شي أزعجنا بهذا النقل .. هو سرعته الجنونية .. و مع الدوار يمشي على كفرين ..!

بصراحة مادري ليه الشياب يحبون السرعة .. !!

أجل وش خلوا للكامري .. أبو خشم رملي !

و فضلاً عن ذلك .. لعب في حسبتنا من كثر ما يمسك " بريكات " ..

لدرجة أن وحدة من البنات حامل .. و خفنا عليها تجهض أو ينقلب البيبي .. !!

الله يجزاه خير .. ما ينفع .. أبد ..!!

جرب اللي بعدو .. !


******************

* أبو مرزوق *

ياهوووووو اسمه الصراحة رهيب .. ذكرني بموضي الشمراني و الشلة ..

ابو مرزوق يجيب معاه محرم ..

كل يوم شكل ..

مرة وحدة عصلا .. غبية

و مرة دبية .. تهبل خفيفة دم ..

و مرة عجيّز .. ما تسمع .. وبس نايمة .. أو الله محرم !!

و من أول ما استقلينا سيارته .. ( جمسن حمرا تلاعب الهوى )

و انا قلبي قارصني ..

أممممممممممم

غير أنه على طول مشغل ( أغاني ) .. و لاهو معتبر اللي معاه .. شي !!

حتى شكل أذانيه .. ما يطمن .. كبار و دائرية .. كأنها طيران .. !

و عينه زايغة .. !!

ركبنا معه يوم .. و من بكرا .. جاء بسيارة فورد فيكتوريا مادري من وين زارفها ..

ولو ما عرفناه من أذانيه .. ماكان ركبنا معه .. قال إيش ؟؟ الجمس الملكي عطلان ..

و اضطر أنه يوقفنا بالشارع بوسط الطريق .. و ينقلنا بسيارة ثانية ..

وحنا مثل الشغالات المهربات .. ماغير نهزهز روسنا .. ماندري ليه كذا طيب ؟!

آه .. يا عيشتن قشرا ..!

من عقب العز .. صرنا " ترانزليت " تحت هالشموس !!

ومازالت الاتصالات قائمة على قدم .. و عظم .. هه !!


________________

رسالة لكل من تسمح له نفسه ( وهو قادر ) بــ ترك محارمه عرضه لهؤلاء ..

اتقوا الله في بناتكم .. اتقوا الله في أماناتكم

كيف تنام و أنت ( الرجّال ) .. وما تدري عن اسم الرجل اللي ينقل أختك .. !

الدنيا مازالت بخير .. نعم

و أهل الذمة و الامانة موجودين و باقين .. نعم

لكن الحرص واجب ..



اللهم هل بلغت ؟!

[ابوخالد382]

الحقيقة يالذاهبه ,عيالي قاعدين يناظرونن أقرأ وأضحك:36_1_1[1] ومستغربين وش فيه رمزهم ,إنهبل ,قالوا نجيب لك قران تشربه...اللي مايدري مايدري....
عموما هذه معلقة رائعة تحكي معاناة الكثير من بناتنا كل صباح,,,بس تبين الصدق تراك سويتي لي غسيل مخ ,وبديت أفكر بجد بموضوع قيادة المرأة ,وخصوصا بعد ماقريت عن أبو إذان كبار أبوعيون زايغه ....لاتحرميننا من هذه الدرر الثمينة سيدتي...دمت بخير

[عاشق ديرتي بريده]

:for2: استاذتي كاتبه موضوع :for2:

لاتعليق لدي لان استاذتي هي اللي كاتبه الموضوع فانا طالب اقراء فقط !!


<< مبسوط مايدري وراه

[سـمـا]

المشكلة القرى لازم سواق


لا واللي عندنا يقول ماراح ادخل الحارة تطلعين براس الشارع هالعجاز عساه للماحي


يعني تخيلي بالهفجور قايم انا وابو الشباب وقاعدين نتحراه براس الشارع علمه


لا وستين كيلو وياخذ الف عساه مايتهنا بهن قولو اميين


لذلك اقولك اللي في القرى لازم نقل

وكذلك اذا صار المسؤول دوامه بعيد يعني صعبة يطلع ويشيله ويرجع


يعني فيه ظروف كثيرة تخلي صاحب البيت يسلم اهل بيته لهسواقيين

بس أن شاء الله ربي يفرجه ونصير نسوق لو دباب

[امرؤ القيس]

اختي ام هشام <<<<<< اللي مايعرف اسم ولدي ما اعرف اسم ولده خخ

ماعلينا 00المهم


بالامس كنت عازم نفسي عند ابوي الله لا يحرمنا منه ويعطيه طولة العمر

وبعد صلاة المغرب اجرى اتصال بواحد يودي ويجيب ومعه مرته عشان يروح باختي تدرس ورى الشمس بخمس كيلو

تصدقي اننا خمس رجاجيل كلهم شلولخ وكل واحد ياقع على زنده الحمار اعزكم الله بس ماعطانا وجه لانه يدري بالبير وغطاه ولا احد قايم من فجر الله يودي عرضه الى ماوراء الجبال خخخخ

صراحة مأساة يعانن منها خواتنا

الله يعينكن

شكرا لك واعانك انت واختي والبقية

[جمان البحر]

هههههههه... والله موضوعك يمس الوتر الحساس ..

الله يعيننا وياك ... عاد تصدقين لو يخلون على الاقل الحريم يوصلن حريم وتختصر القيادة النسائية على ذلك كان سلمنا من كثير من المشاكل خصوصاً من أمثال ابومرزوق ..مع اني ضد قيادة المرأة الا اني الآن أقول خذوا هالاقتراح السابق فقط ...

[الذاهـبـة]

الحقيقة يالذاهبه ,عيالي قاعدين يناظرونن أقرأ وأضحك:36_1_1[1] ومستغربين وش فيه رمزهم ,إنهبل ,قالوا نجيب لك قران تشربه...اللي مايدري مايدري....
عموما هذه معلقة رائعة تحكي معاناة الكثير من بناتنا كل صباح,,,بس تبين الصدق تراك سويتي لي غسيل مخ ,وبديت أفكر بجد بموضوع قيادة المرأة ,وخصوصا بعد ماقريت عن أبو إذان كبار أبوعيون زايغه ....لاتحرميننا من هذه الدرر الثمينة سيدتي...دمت بخير

اهلا بك استاذ ابو خالد و مشكور على الإطراء ..

ممكن نفكر بــ حل ؟

ترى عن نفسي و الله ما اسوق ولا أفكر أسوق بحياتي ..

عقب حادث جرى علينا العام الماضي .. الله لا يعيد الشر على المسلمين ..

يعني تبت إلى الله توبة نصوحا ..

بس اعتقد لو المؤسسات الحكومية تأمن للموظفات نقل خاص ..

مو أحسن ؟

مثل الموجهات التربويات .. عندهن جموس تحت الطلب ماشاء الله عليهم ..



حياك الله استاذ ..

[شموع تحت المطر]

الذاهبــــــــــــــــــــة فديت قلبتس...

ذكرتين بحالنا اللي مضى..تصدقين مافي أحد ببريدة ماركبنا معه..انواع اللعنه...

وومارتحنا الا بالسواق..... بس وين اللي يقتنعون... قسم انهم مهزلة هالنقل وخرابيطهم..

[الذاهـبـة]

:for2: استاذتي كاتبه موضوع :for2:

لاتعليق لدي لان استاذتي هي اللي كاتبه الموضوع فانا طالب اقراء فقط !!


<< مبسوط مايدري وراه

فشلتني :)

شوف استاذ عاشق بريدة ..

ربي ماخلق لي قلبين في جوفي .. ما أقدر أكتب مواضيع و أردرد .. !!

لذلك أنا اخترت أني انشغل بالردود .. و أترك المواضيع للكتاب الحقيقيين ..

وعموماً ..

لي موضوع يطرح كل 6 أشهر .. و تقدر تبحث عن مواضيعي السابقة

في معرفي السابق ( الذاهبة ) بدون مد ..

و تراك بتلاقي تفشيلات واجد .. يعني ردود لي يوم أنا بزر توني ما انفطمت .. هه !



و عساك دوم مبسوط ان شاء الله .. و الجميع ..

[@عيون الصقر@]

الله يكون بعونكن يالحريم وسيلة المواصلات مشكله
وين الامين
وين الملتزم بمواعيده
وين ابو سعر مناسب
وين ابو اخلاق مناسبة
وين العاقل مايسرع
وين القنوع اللي ياخذ ثنتين وانتي الثالثه
وين ووين ووين الله يرزقكم بقرار يخليكم تصفطون الكامري عند الباب

7
7
7
7
7
7
7
7
7
http://www.mitchell.derbycounty.co.uk/schoolbus.jpg

حليل هالباص بس ماكنه قصير ومدربح ويمشي جميع شكله حق طالبات محو الامية

[الذاهـبـة]

المشكلة القرى لازم سواق


لا واللي عندنا يقول ماراح ادخل الحارة تطلعين براس الشارع هالعجاز عساه للماحي


يعني تخيلي بالهفجور قايم انا وابو الشباب وقاعدين نتحراه براس الشارع علمه


لا وستين كيلو وياخذ الف عساه مايتهنا بهن قولو اميين


لذلك اقولك اللي في القرى لازم نقل

وكذلك اذا صار المسؤول دوامه بعيد يعني صعبة يطلع ويشيله ويرجع


يعني فيه ظروف كثيرة تخلي صاحب البيت يسلم اهل بيته لهسواقيين

بس أن شاء الله ربي يفرجه ونصير نسوق لو دباب

هلا بك يا غالية

أم ارجوان بقول لك شي ..

تعرفين حنا السبب في استغلال هالناس ؟

اكيد أنتي تعرفين كم بيكلفك لو تستقدمين سواق خاص بك ؟

أو أحد من البنات اللي معك بنفس القرية

لو كلكم جبتوا سواق واحد .. ترى راتبه 600 ريال أو أكثر شوي

و قدرتوا تدبرون اموركم ..

بس مشكلتنا .. مانعرف ندبر ..

خلاص هو قال 1000 يعني 1000

شوفي الحين الشغالات بكم اجارهم ؟!

3000 ثلاثة آلاف ريال !!!!!!!!

يعني ست أضعاف راتبها الحقيقي

و مع ذلك .. حنا نقول إيه ميخالف ..

مادام كل شي عندنا ايه ميخالف .. خلاص أكيد كلن بيلعب علينا .. !!

حياك الله حبيبتي ..

[راشد الصليحان]

بقولك قصة عن الناقلين السعوديين .........

هذولا يالذاهبة هم اكثر ناس يتزوجون ثانية وثالثة
واحياناَ مسيار<<<< لاعبين بالقش :36_1_3[1]
عايشين على التلقيط من هالمدرسات او الموظفات الأرامل والمطلقات ..!




اعرف رجل خمسيني ..يسولف لي عن تجاربه خلال 15 سنة مع نقل المعلمات خارج بريدة
يقول تزوجت 4 مدرسات بتراب الفلوس كلهن يوافقن على زواجي منهن بمهر ماشي الحال لأنهن يبغن رجل محترم ..!! وباقي منهن زوجتين على ذمتي واحدة مدرسة والثانية كاتبة..<<<<انواع الروقان وحنا قاعدين على واحدة ..!
وش عليه مراهق بالخمسين (مثل حسينوه ) !!:5[1]:
كل ما الاقيه بمناسبة يقول للحين انت موظف ماتقاعدت مبكر ..؟؟ اقوله لا للحين
مدري إلا هو قايل خخخخخخخخخخخخخخخخخخخخخخخ والله إنك ضايع تعال إلحق على عمرك
فلوس وتقدير ..ويحصل زواج من واحدة طارفة تبي رجل مالي هدومة..!


بصراحة يالذاهبــة ...أحياناَ (ترق لهاتي )...ودي اسوي مثله لكن وين اودي نفسي بين زملائي اللي اتمنظر عندهم وعامل ويني عند نفســي ...!

الخمسيني سواااق المعلمات ....إذا قلتله استحي وين اودي وجهي من اصدقائي ..!
يضحك كثير وتقطع مصارينه ...ويقول خلهم ينفعونك ..!

تصدقين يالذاهبــة بعد سردك الجميل عن واقع حال المعلمات ..جزمتيني انظم إلى عالم الناقلين :)
وش حيثنا من نأخذ نصيبنا ...!! بس الشيبان اللي يعددون ..؟؟



مرة وحدة عصلا .. غبية

و مرة دبية .. تهبل خفيفة دم ..

على فكرة مدري وش بلاك على الحريم السايكل ..؟؟:4_16_1[1]

شكرا لطرحك الذي اخرجنا من حالة اليأس والملل ..

[الذاهـبـة]

اختي ام هشام <<<<<< اللي مايعرف اسم ولدي ما اعرف اسم ولده خخ

ماعلينا 00المهم


بالامس كنت عازم نفسي عند ابوي الله لا يحرمنا منه ويعطيه طولة العمر

وبعد صلاة المغرب اجرى اتصال بواحد يودي ويجيب ومعه مرته عشان يروح باختي تدرس ورى الشمس بخمس كيلو

تصدقي اننا خمس رجاجيل كلهم شلولخ وكل واحد ياقع على زنده الحمار اعزكم الله بس ماعطانا وجه لانه يدري بالبير وغطاه ولا احد قايم من فجر الله يودي عرضه الى ماوراء الجبال خخخخ

صراحة مأساة يعانن منها خواتنا

الله يعينكن

شكرا لك واعانك انت واختي والبقية

اهلا بك استاذ أبو عدي ..

ترى عدي بطل العالم .. من مبطي ..

بس والله أنا أذكر حداكم اسمه ابو مازن .. ولا عاد ادري منهو ..

لا تواخذنا طال عمرك ..

والله يخلي لك الوالد .. و يخليك لــ عدي ..

و مبروك تعيين البنت ورا الشمس ..

ترى قريب بالحيل الحمد لله .. أشوى من بنت جيراننا طلع تعيينها بكوكب الزهرة

بس الظاهر مهب مداومه هناك ..

حياك الله ..

[مــنــال]

طريقة عرض الموضوع حلوة :)

جزاك الله خير يالذاهبة على هذه التوعية .

هناك من لا يستطيع توصيل زوجتة أو أخته و لكن يجاهد في البحث عن سائق طيب يعرفه .

و هناك من يحاول الإمساك بأي مشكلة صغيرة حتى يجبرها على ترك وظيفتها و كثير هن النساء اللا ّتي لا تتفوه بضيق من هذه الأمور

عند زوجها أو عند أخوتها حتى لا تجبر على ذلك .

في احد السنين تم تعيين احدى قريباتي معلمة في " الليث " و كان اخوها بالرغم من مشاغلة في مكة و ادارته لمكتب عقار

لم يخلي نفسه من هذه المسؤولية و كان يذهب بها في مساء الجمعة و يأتي بها عصر الأربعاء هكذا لمدة سنتين

إلى أن تم نقلها في مدرسة بمكة .

حتى أنها دائما ً تذكره بالخير هي وصديقتها التي كانت تذهب معهم في كونه لم يتذمر من هذه المشاوير يوما ً

و لم يبين لها تعب و مشقة العودة لحالة برغم أن كثرة السواقه بالطريق شاقة عليه لوجود اصابه

أو عرج برجله اليمين .

و كل شيء بأجره إن شاء الله يالذاهبة .

و كان الله في عونكن .

[فيصل...........]

الذاهبة
سراحة معاناة الشايب ماتبنة والشاب بعد
لا عاد ابشرك انحلت كلها كم سنة وكل وحد وسيارتها بدون شايب وشاب واندونيسي
يلة من قدكن

[الذاهـبـة]

هههههههه... والله موضوعك يمس الوتر الحساس ..

الله يعيننا وياك ... عاد تصدقين لو يخلون على الاقل الحريم يوصلن حريم وتختصر القيادة النسائية على ذلك كان سلمنا من كثير من المشاكل خصوصاً من أمثال ابومرزوق ..مع اني ضد قيادة المرأة الا اني الآن أقول خذوا هالاقتراح السابق فقط ...

اهلا و مرحبا جمان البحر ..

هو الصراحة اقتراح جميل ..

يعني نجيب سواقات .. بس أخاف تزعل أو تضيق علينا .. و تتركنا

تعرفين حريم نفوسهن خايسة .. هه !!

[جلوي العتيبي]

بالفعل معاناة .

لا ويتشرطون ..أذكر أحدهم يمر قريبتي قبل الفجر بساعه ولو ماتصير عند الباب مشى وخلاها :( ياهو طيب انت تأخذ 1500 ريال ... معجبك والا دور غيري .

بس رغم المعاناة والخطر هي شر لابد منه للي خارج الديره .

لكن اللي يخلي زوجته أو بنته مع هذه النوعيه وهو قادر على توصيلها اعتبره لايستحق أن يتولى أمرها .

من أول ما استقلينا سيارته .. ( جمسن حمرا تلاعب الهوى )

و انا قلبي قارصني ..

أممممممممممم

غير أنه على طول مشغل ( أغاني ) .. و لاهو معتبر اللي معاه .. شي !!

حتى شكل أذانيه .. ما يطمن .. كبار و دائرية .. كأنها طيران .. !

الله يرزقهم حسنات كثر مانقنقتوا عليهم ..بس المشوار طويل والروتين يولد إنتقاد كل شيء :)


الأدهى والأمر يالذاهبه اللي ينقلون بدون محرم .!! وبعض المعلمات الفاضلات يجوز كل شيء عندهن متى مادعت الحاجه!!

[بنت البدائع]

[size=5][font=Arial Narrow][color=#0000FF]حلو حلو حلو

ياكثر مشاكلنا مع النقول

هذي أنا أيام الكلية أنا وزميلاتي كل إسبوع طابين بجمس شايب

راحت سنتين على هالحال

أما السنتين الباقية جانا عز مابعدة عز

تقاعد أبوي من شغلة وصار يطاردبي أنا وخوياتي أجمع وأنواع الفله

بس بيني وبينك جانا شي نكد علينا

الشرطه والهيئه جاهم فترة تشددوا على المحرم

وإضطريت صرت أرتز قدام جنب الوالد وإنحرمت من السواليف والبسطه

[الذاهـبـة]

الذاهبــــــــــــــــــــة فديت قلبتس...

ذكرتين بحالنا اللي مضى..تصدقين مافي أحد ببريدة ماركبنا معه..انواع اللعنه...

وومارتحنا الا بالسواق..... بس وين اللي يقتنعون... قسم انهم مهزلة هالنقل وخرابيطهم..

هلا بك عزيزتي شموع

فعلاً اغلب ( النقل ) هنا مهازل ..

و أغلب البنات اللي يركبون معهم ساكتين .. و راضين ..

مثل ما قالت منال ..

الله يعين الجميع ..

[لمبـة شارع]

<<<<<<<<<هذا المستخدم زادت عليه الجرعة شوي..



بالعادة سطر...



سطر وربع...



سطر و.. هه


يعني ...يمشي الحال مع شوية تسطيل



لكن عاد كذا معليش.!!!

يبيلنا اسبوع نقاهة !!






زاد اقول وش ذيك الغلقة لنا ستة اشهر!!

وأمي تقول وش هالهالة السوداء على عيونك !

وأنا احسبها من قل النوم!!

أثرها اعراض انسحابية !!

____________________________




http://www.mitchell.derbycounty.co.uk/schoolbus.jpg



بس عاد لاتنكرين ذاهبة ان هالباص ماشاء الله عليه باين عليه ولد عز !!!

حتى شوفي وشلون رطب ومتورم !!

كنه من عيال المعازيب الله لايضره !!

مانقصه إلا بشت !!


______________________

وبعدين وش فيهن أذاني ابومرزوق ؟؟


لاتقعدين بعد انتي تقولين كارثة طبيعية و عقوبة من سماع الاغاني !!!


أيوالله اللي قعدنا بلاسحور اليوم !!



الذاهبة...

إذا في صاحباتك لو ثنتين صاملات..

إجزموا وجيبوا لكم سايق خاص..

كثير ناس صاروا يسوون كذا..

حتى بعد يستفيدون منه بأغراض استثمارية





الذاهبة ...

نعطيك المجلس الاجتماعي وكل مواضيع راشد ومنتديين جدد بقراطيسهن ..وتعطيننا هالموضوع؟؟؟

[امرؤ القيس]

حتى شوفي وشلون رطب ومتورم !!

كنه من عيال المعازيب الله لايضره !!

مانقصه إلا بشت !!

هلا والله ضمنت ترقية

[الذاهـبـة]

الله يكون بعونكن يالحريم وسيلة المواصلات مشكله
وين الامين
وين الملتزم بمواعيده
وين ابو سعر مناسب
وين ابو اخلاق مناسبة
وين العاقل مايسرع
وين القنوع اللي ياخذ ثنتين وانتي الثالثه
وين ووين ووين

والدم العربي وين ؟؟

والشعب العربي وين ؟؟

ويــــــــــــــــــــــــــــن .. ؟!

وين الملايين ؟؟

وين السواقين ؟؟

ويـــــــــــــــــــــــــن .. ؟!

اهلا و سهلا استاذ عيون الصقر .. بس هذي حماسية شوي .. !

http://www.mitchell.derbycounty.co.uk/schoolbus.jpg

حليل هالباص بس ماكنه قصير ومدربح ويمشي جميع شكله حق طالبات محو الامية


لا تحقره ..

تراه يطير .. !

[الناقد1]

طبعاً غريبه أصلت الذاهبه ابتداءً لموضوع
ولكن تزول الغرابة إذا عرفنا أن الأمر يتعلـّق بتلك المعاناة
كانت خليلتي تبصُرني باعتراض حينما اقول بأن قيادة المرأة للسيارة مباحة ، وخلال أيـّام مصر الجميلة كنت أقول لها انظري لهذه المنقّبة التي وارت يديها بالجوارب ، إنها تقود سيارتها بكل حشمة واحترام ، هل من الممكن أن اقول أن قيادتها للسيارة حرام ، وأن ذيك التي تزاحم العالم في الميكروباص قد نالت من سبل العفاف مالم تنله تلك ؟
ياسيدتي
لولا مخرجات قيعان الجفاف العاطفي ، لقلت اطلقن يا سعوديات كفرات سياراتكن للريح :)
لقد رق قلبي لنسائنا بصورة لم ترق لـ" كسافة المصريات "
وأنا أتردد إلى الرس لأشهر معدودة ، كنت أشاهد صوالين وتوبيسات من الفجور تنفر نفور يوم المشهد !
يدعوني الفضول والفراغ أحياناً إلى التطلع بوجوه السائقين فألعن آباء تلك النساء الذين أودعوهن تلك الأيدي " خارج نطاق الخدمه "
لن أنسى ذيك البدائعية التي كنت أشاهدها تقف على طريق سريع تنتظر النقل ، وفي شدة البرد ولمسافة تبعد تقريبا 100 متر عن بيتهم الرابضة لوحدها في ذيك المزرعة
أي شقاء هذا ؟
لقد كدت أن اقول فيها " عصيدة " شعر ولكن الله سلـّم :)

كنت سأقول بأن الموضوع سيتجه نحو قيادة المرأة للسيارة ، ولكني وقعت فيما حاذرت منه

* كنت سأقول لك ابحثي أي حديث يقوله الرجال في مجالسهم عن هؤلاء السائقين ، فجاء أخينا راشد بالخبر اليقين !

دمت بعيداً عن كسافة النقل

[شموع تحت المطر]

بعد اذنك يالذاهبة...

طيب بما انه جات سيرة الموضوع...

وش رايكم باللي يركبـــــــــــــــــــــــون مع السواق لحالهم ...يعني حرمة لحالة ...وحطوا بأعتباركم الظروف اجبرتها غصب تسوي كذا....

يعني وش نظرتــــــــــــــكم....

تهمني الاجابـــــــــــة....؟؟

[امرؤ القيس]

بعد اذنك يالذاهبة...

طيب بما انه جات سيرة الموضوع...

وش رايكم باللي يركبـــــــــــــــــــــــون مع السواق لحالهم ...يعني حرمة لحالة ...وحطوا بأعتباركم الظروف اجبرتها غصب تسوي كذا....


هذا طال عمرك بسيطة 00


بجدة عادي جدااا

وفي الشرقية نعين ونعاون خخخ

وفي الرياض عيب

وفي القصيم حرام ويطيح بالنار

وفي الشمال -- كلش ولا ها العلم

وفي جيزان وضواحيها 00 قد هي خربانه خربااانه

[شموع تحت المطر]

وفي القصيم حرام ويطيح بالنار

يالهـــــــــــــــــــــــوي..ياخرابي....

[امرؤ القيس]

يالهـــــــــــــــــــــــوي..ياخرابي....

طييب اسكني بجدة او الشرقية اهووووووون

[the-moon]

الذين يشاهدون محتوى الموضوع الآن : 16 ( الأعضاء 11 والزوار 5)
‏the-moon, ‏راشد الصليحان, ‏لمبـة شارع, ‏امرؤ القيس, ‏شموع تحت المطر, ‏الذاهـبـة, ‏ام ارجوان, ‏بنت البدائع, ‏عبدالله التويجري, ‏Oo ManaL oO

ياكثر مايشار إليك باللبان هه
خطبة مجلجلة أستاذة ذاهبة اليوم لباسك صالح

إلا على طاري أبو إذان هذا يذكرن ببزر عندنا منول نسميه الفيل
تراه مهب دب لا بس هذاك إذان وشوي طفل الله يرحم حاله
يقولون إنه لامنه جاء ينام إذن فراش وإذن غطاء يالله من فضلك

وهالحين تزحرين كم شهر وتطلعين هالمخروقة

[الذاهـبـة]

بقولك قصة عن الناقلين السعوديين .........

هذولا يالذاهبة هم اكثر ناس يتزوجون ثانية وثالثة
واحياناَ مسيار<<<< لاعبين بالقش :36_1_3[1]
عايشين على التلقيط من هالمدرسات او الموظفات الأرامل والمطلقات ..!




اعرف رجل خمسيني ..يسولف لي عن تجاربه خلال 15 سنة مع نقل المعلمات خارج بريدة
يقول تزوجت 4 مدرسات بتراب الفلوس كلهن يوافقن على زواجي منهن بمهر ماشي الحال لأنهن يبغن رجل محترم ..!! وباقي منهن زوجتين على ذمتي واحدة مدرسة والثانية كاتبة..<<<<انواع الروقان وحنا قاعدين على واحدة ..!
وش عليه مراهق بالخمسين (مثل حسينوه ) !!:5[1]:
كل ما الاقيه بمناسبة يقول للحين انت موظف ماتقاعدت مبكر ..؟؟ اقوله لا للحين
مدري إلا هو قايل خخخخخخخخخخخخخخخخخخخخخخخ والله إنك ضايع تعال إلحق على عمرك
فلوس وتقدير ..ويحصل زواج من واحدة طارفة تبي رجل مالي هدومة..!


بصراحة يالذاهبــة ...أحياناَ (ترق لهاتي )...ودي اسوي مثله لكن وين اودي نفسي بين زملائي اللي اتمنظر عندهم وعامل ويني عند نفســي ...!

الخمسيني سواااق المعلمات ....إذا قلتله استحي وين اودي وجهي من اصدقائي ..!
يضحك كثير وتقطع مصارينه ...ويقول خلهم ينفعونك ..!

تصدقين يالذاهبــة بعد سردك الجميل عن واقع حال المعلمات ..جزمتيني انظم إلى عالم الناقلين :)
وش حيثنا من نأخذ نصيبنا ...!! بس الشيبان اللي يعددون ..؟؟





على فكرة مدري وش بلاك على الحريم السايكل ..؟؟:4_16_1[1]

شكرا لطرحك الذي اخرجنا من حالة اليأس والملل ..

ماشاء الله .. !!

بعد بعد .. !!

ردك هذا يحتاج إلى تأطير ..

اصبر أجيب إطار و أرد عليه ..

<<<< تتخيل أشكال المعددين .. ماشاأووو الله .. !!

[شموع تحت المطر]

طييب اسكني بجدة او الشرقية اهووووووون

لامانروح ،،القصمان يغيرون رايــــهم...

اشوا ان امي نايمـــــة...!!!!

[لمبـة شارع]

16 ( الأعضاء 9 والزوار7)
‏لمبـة شارع, ‏عاشق ديرتي بريده, ‏العندليب, ‏راشد الصليحان, ‏فراشة نجد, ‏شموع تحت المطر, ‏سارة عبدالعزيز, ‏الآديب العاشق, ‏الناقد1

شششششششششش



هوا ياناس هوا ..

وخروا شوي

لا احد يخطــّم..

اللي يبي يكتب رد يقدم معروض..!!

[اسم العضو]

http://up.graaam.com/p10ic/964f18b7a4.jpg (http://www.graaam.com/)

يوجد لدي سيارة نقل ظريفه وسريعه لكن بدون محرم يا ذاهبه وممكن قيادتها بنفسك اللون لون المريول المدرسي ..

أن اعجبتك أو ممكن تغييرها ....


سلام ....

[الذاهـبـة]

مرحبا استاذ راشد الصليحان

بصراحة ما استغرب هذا التفكير ..

لأن الرجال عموماً ينحصر تفكيرهم في هذا الامر ..

بالنسبة لك ..

حاول تشتري فان ..

و تمسك القرى البعيدة جداً ..

لأن كل ما أبعدت القرية .. كل ماكانت معلماتها صغار السن و خريجات جدد ..

ماكسيمم 4 سنين ..

و الله يوفقك إن شاء الله بالوجه المبروك ..

بس أنتبه تقرق عليهن .. !!!!

[جليدان]

تصوير رااااائع من جد
هادف وساخر
واهنيك على هذا الأسلوب السهل الممتنع ...

[الذاهـبـة]

طريقة عرض الموضوع حلوة :)

جزاك الله خير يالذاهبة على هذه التوعية .

هناك من لا يستطيع توصيل زوجتة أو أخته و لكن يجاهد في البحث عن سائق طيب يعرفه .

و هناك من يحاول الإمساك بأي مشكلة صغيرة حتى يجبرها على ترك وظيفتها و كثير هن النساء اللا ّتي لا تتفوه بضيق من هذه الأمور

عند زوجها أو عند أخوتها حتى لا تجبر على ذلك .

في احد السنين تم تعيين احدى قريباتي معلمة في " الليث " و كان اخوها بالرغم من مشاغلة في مكة و ادارته لمكتب عقار

لم يخلي نفسه من هذه المسؤولية و كان يذهب بها في مساء الجمعة و يأتي بها عصر الأربعاء هكذا لمدة سنتين

إلى أن تم نقلها في مدرسة بمكة .

حتى أنها دائما ً تذكره بالخير هي وصديقتها التي كانت تذهب معهم في كونه لم يتذمر من هذه المشاوير يوما ً

و لم يبين لها تعب و مشقة العودة لحالة برغم أن كثرة السواقه بالطريق شاقة عليه لوجود اصابه

أو عرج برجله اليمين .

و كل شيء بأجره إن شاء الله يالذاهبة .

و كان الله في عونكن .

حياك الله يالغالية ..

و الله يحلي أيامك ..

بصراحة هذا الإنسان اللي ذكرتيه أنا اعتبره من الرجال دقة قديمة ..

يعني مثل أبضايات باب الحارة ..

اللي يطلق عليهم رجال ..

و لا كيف الرجل يترك محارمه يركبن مع أجانب .. و عرابجة و يالله سترك .. !!

و بالنسبة للمضايقات ..

والله ماودي اتكلم بعدين أخاف أسبب مشاكل و هو في النهاية أمر خاص ولا يعمم

على جميع سائقي النقل ..

المهم الإشارة إلى أن بعضهم يسبب مضايقات للبنات ..

و يتعمد يسولف معهن ..

و يتعمد ينسى المحرم ..

و الله يسترنا بستره و يحفظنا جميعا ..

[تلميذة الحياة]

ايه الله يآجرنا ياربي ..

لا وبعد إذا طرت عليهم قالوا حريمنا بهن وحريمنا مالابهن ..

صيرووااا رجاال ونصير حريم ..

موضوع جد يحكي عن معاناة ومشاكل التوصيل بالسعودية

انا اقترح عليك تنشرينه بأحد الجرايد ..
.

[امرؤ القيس]

لامانروح ،،القصمان يغيرون رايــــهم...

اشوا ان امي نايمـــــة...!!!!


لا غيروا رايهم 000و اثرك متقاعدة قبل خمسطعش سنة

[سارة عبدالعزيز]

بعد هذه المعانات التي سطرتها زميلتي واستاذتي الذاهبة
لمن أطلقت ساقها خلف المهنة وتركت الحشمة من أجل
حفنة دراهم معدودات ليس لسد رمق العيش بل استزادة
وتكاثر في الأموال بان واتضح أن المرأة بيتها ألزم لها
من الحل والترحال كل صباح ومغامراتها التي لاتنتهي
(وقرن في بيوتكن)

[امرؤ القيس]

بعد هذه المعانات التي سطرتها زميلتي واستاذتي الذاهبة
لمن أطلقت ساقها خلف المهنة وتركت الحشمة من أجل
حفنة دراهم معدودات ليس لسد رمق العيش بل استزادة
وتكاثر في الأموال بان واتضح أن المرأة بيتها ألزم لها
من الحل والترحال كل صباح ومغامراتها التي لاتنتهي
(وقرن في بيوتكن)


يعني مافيش قيادة للمرأة خلاص

[الذاهـبـة]

الذاهبة
سراحة معاناة الشايب ماتبنة والشاب بعد
لا عاد ابشرك انحلت كلها كم سنة وكل وحد وسيارتها بدون شايب وشاب واندونيسي
يلة من قدكن

السراحة تكسفنا يا فيصل .. وش اقول بس .. !

بس على كل هالضغوط .. يتسلط علينا الضحك و الوناسة ..

سبحان الله .. !!

شكراً لحضورك ..

[اسم العضو]

http://up.r3darab.net/uploads/f628c44e07.jpg (http://up.r3darab.net)

وممكن هذه السيارة لأبنك الله يحرسه ويحفظه ..


سلام ....

[شموع تحت المطر]

ياأبو عدي.. قسم انك هبلت بي

ترا انا اتكلم من جدي....

ابي اعرف وش تقولون...

[الذاهـبـة]

بالفعل معاناة .

لا ويتشرطون ..أذكر أحدهم يمر قريبتي قبل الفجر بساعه ولو ماتصير عند الباب مشى وخلاها :( ياهو طيب انت تأخذ 1500 ريال ... معجبك والا دور غيري .

بس رغم المعاناة والخطر هي شر لابد منه للي خارج الديره .

لكن اللي يخلي زوجته أو بنته مع هذه النوعيه وهو قادر على توصيلها اعتبره لايستحق أن يتولى أمرها .



نعم ..

هذا الكلام ..


الله يرزقهم حسنات كثر مانقنقتوا عليهم ..بس المشوار طويل والروتين يولد إنتقاد كل شيء :)



قسم بالله ما تعمدت القز ..

بس اذانيه الله يهديها هي اللي فارضة نفسها بقوة ..



الأدهى والأمر يالذاهبه اللي ينقلون بدون محرم .!! وبعض المعلمات الفاضلات يجوز كل شيء عندهن متى مادعت الحاجه!!



والله انا ما ألوم الحريم ..

مسكينة الحرمة تبي تثبت وجودها بهالكون ..

تتحمل لحد ما تطيش .. !!

[Queen of buraydh]

جبتيها ع الجرح يالذاهبه ..

اتفق مع رأي اي لمبه .. الله يخلي لنا الاندونيسي

[الذاهـبـة]

[size=5][font=Arial Narrow][color=#0000FF]حلو حلو حلو

ياكثر مشاكلنا مع النقول

هذي أنا أيام الكلية أنا وزميلاتي كل إسبوع طابين بجمس شايب

راحت سنتين على هالحال

أما السنتين الباقية جانا عز مابعدة عز

تقاعد أبوي من شغلة وصار يطاردبي أنا وخوياتي أجمع وأنواع الفله

بس بيني وبينك جانا شي نكد علينا

الشرطه والهيئه جاهم فترة تشددوا على المحرم

وإضطريت صرت أرتز قدام جنب الوالد وإنحرمت من السواليف والبسطه

هلا هلا هلا ..

طيب اسمعي ميخالف تقولين للوالد ينقلنا ؟!

عاد كشخة انتي المحرم .. من قدك :)

الله يخلي لك أبوك .. و يستر عليكم ..

[عازفة ألحان الليل]

الذاهبة
ارفع قبعتي احتراما لموضوعك <<< المشكلة مالها قبعة

[امرؤ القيس]

ياأبو عدي.. قسم انك هبلت بي

ترا انا اتكلم من جدي....

ابي اعرف وش تقولون...

المعاناة جعلتنا نهب لنصرتكن ونحاول التخفيف لو بكلمة

بس ما اظن احد بيسمعنا لأن المسؤولين نايمين ولا ودنا نقلقهم تعرفي قايمين بدري تقريبا الساعة 11 الظهرررر

[عاشق ديرتي بريده]

الذين يشاهدون محتوى الموضوع الآن : 16 ( الأعضاء 13 والزوار 3)
‏عاشق ديرتي بريده, ‏اسم العضو, ‏شموع تحت المطر, ‏الذاهـبـة, ‏ام ارجوان, ‏امرؤ القيس, ‏فيصل..........., ‏الفنانه والمبدعه, ‏تلميذة الحياة, ‏The Princess


وانتم تبي تبتلون متنبلين بذا !!!!
:15[2]:
تعالوا شوفو واحد ماسك ايد زوجته وهو بالسوق !!!:1856:

[امرؤ القيس]

وانتم تبي تبتلون متنبلين بذا !!!!

وانت يقالك ماتنبلت او تنبلت وخلصت بدري

وبعدين وش يعرفك انه ماسك ايد زوجته وش ها الشهابه اعوووذ با الله

[الذاهـبـة]

<<<<<<<<<هذا المستخدم زادت عليه الجرعة شوي..



بالعادة سطر...



سطر وربع...



سطر و.. هه


يعني ...يمشي الحال مع شوية تسطيل



لكن عاد كذا معليش.!!!

يبيلنا اسبوع نقاهة !!



اهلا استاذ لمبة شارع ..

جرعات الهبال مايحتاج قرّب القرقيعان .. ليلة 15 .. !!

زاد اقول وش ذيك الغلقة لنا ستة اشهر!!

وأمي تقول وش هالهالة السوداء على عيونك !

وأنا احسبها من قل النوم!!

أثرها اعراض انسحابية !!

الله يفك تغلقنا حنا بعد .. هذا فيض من غيض .. أو غيض من فيض ..

صراحة مافيني أفتح غوغل .. هه !!

كنه من عيال المعازيب الله لايضره !!

مانقصه إلا بشت !!

طبعاً ..

عشان البرستيج .. !


وبعدين وش فيهن أذاني ابومرزوق ؟؟


لاتقعدين بعد انتي تقولين كارثة طبيعية و عقوبة من سماع الاغاني !!!

فيها انزلاق غضروفي ..

و طبلة الأذن عنده صارت توماتيك .. دفرنسين بعد .. !


الذاهبة...

إذا في صاحباتك لو ثنتين صاملات..

إجزموا وجيبوا لكم سايق خاص..

كثير ناس صاروا يسوون كذا..

حتى بعد يستفيدون منه بأغراض استثمارية

السواق عطية الله ..

مير الظروف الحالية .. حائلة .. !!


نعطيك المجلس الاجتماعي وكل مواضيع راشد ومنتديين جدد بقراطيسهن ..وتعطيننا هالموضوع؟؟؟

هات ألفين و خمس .. و ضفه ..

[عاشق ديرتي بريده]

وانت يقالك ماتنبلت او تنبلت وخلصت بدري

وبعدين وش يعرفك انه ماسك ايد زوجته وش ها الشهابه اعوووذ با الله

تنبلت شوي وطلعت ولقيت قلب ضب حاط موضوع به واحد ماسك ايد زوجته !!

[بنت البدائع]

هلا هلا هلا ..

طيب اسمعي ميخالف تقولين للوالد ينقلنا ؟!

عاد كشخة انتي المحرم .. من قدك :)

الله يخلي لك أبوك .. و يستر عليكم ..

الذاهبه أبعلم عليك الوالدة :)

الحين هي ماحطت إيده على قلبة الا يوم خلصنا من النقل

تجين أنتي تزيدين البلاوي

من ناحيتي أنا موافقه بس بشرط:

لي نص الراتب حقك :)

[الحصان الأسود]

تدوير النقل في بدايت الدراسه ماينفع

لأنه

حيخلصووووووووه

:)

[اتعبني خطااااك]

تسيييييييييييييييييييييييف تذاء فاتن موضوعك والله اني كل يوم اقول ياليت
الاقي نص موضوع لذاهبه
واخرتها ينزل وانا ماادري
عالعموم تسلمين

وياليت ها الرجال يساااااعدون ويفزعون مهب المره تطلع مع ه الرجل والزواج او الاخ نايم

[فور يو]

للأغلب من المدرسات

وشوله هالمرمطه والطلعه بالعاير من الفجور على شان الفين وإلا ثلاثه يروح منها نصها

لأبو مرزوق وطقته ولزوم العمل والباقي يادوب مصروف شخصي يكفي ثلاثة أيام ...

ناس غاويه تعب وشقى على لاشيء يذكر ويستحق ...

اعذب تحيه للكل .

[هدووء]

يازين الجلسه بالبيت لاسواقين ولا حاقه
والزيارات الله يخلي لنا البابا
مستريحه ومريحه بسم الله علي
تحيتي إلك يالذاهبه على هالموضوع الراااايق

[جورينا]

الذاهبهـ ؛؛

حياكـ الله حبوبهـ ؛؛

تصدقين يا بعدي ذكرتين يوم اطريتي السواقين بابو مشعل الله يذكره بالخير لاجاك كل صبح وبدء يشعر بأم مشعل تسيف تسذا حب ورومانسية وهي ما غير تهزهز بها لراس ؛؛ ولا نمر بن عدوان ؛؛
عاد تصدقين ذكرتين بوحدة من البنات العام كانت تدرس بقرية اسمه قطن بعد عقلة الصقور والمشكلة ليته رسميه على بند ويجيه السواق الساعة 3 بالليل والمشكلة الراتب 2500 يروح منه ألفين للسواق ويبقى له خمسمية ريال وعنده جلفً طول بعرض ما غير سهر وتسدح لأشغل ولا مشغله ومخلي ها لسواق يودي محرمه ويجيبه ؛؛

الله يكون بعونكن ويرزقكن من يقوم بتوصيلكن من محارمكن بلاء منة هالسواقين

[العبرى]

الله لايحيجنا لهم ولا للراتب

ونتوظف جنب البيت ونروح رجليه بعد <<< حلمي بس

بصراحه عشت الموقف وقلت..

يمه..!

عاد ماادري وش ابي بأمي..

اللي ذكرت سالفتها فراشة نجد مهبوله صدق

أجل من ثلاث..!

المهم..

اشوف الحاجه تلح على البعض وتجبرهم

واللي للفشخره...

استغفر الله ماودي اتطنز..!



تحيتي,,,

[شموع تحت المطر]

اعرف وحدة كانت تطلع الساعة 2 ونص باليل تصورا وتروح لقرية على طريق الطايف

من شد الرعب خذت مسدس معه..لانه قرية لادعيتوا على احد ادعوا علية يحط فيها...

بس انها كانت معينه رسمية راحت اسبوع واضربت اجازات لحد مانقلت..

اللي يعاني جواء الديرة عذاب واللي برا الديرة عذابين..

[ثلوج دافئه]

أمي أنصدمت يوم شافتني أضحك تقول بنتي أنهبلت
أسلوبك رائع وشيق بصراحه معانة يالذاهبه الله يعينكم الله يستر أذا أتوظفت شكلي بعاني مثلكم عاد أنا مايقهرني الاالي يتأخر بمواعيده أو مايحترم الناس الي معه كلشي يهون ولا التأخير

[البرحيه]

شوفي الله يرضى عليتس

قبل يومين كان عند المعازيب شركتن يابانيه
عشان سالفة السواقة اللي مهيب خالصتن ابد
وها الشركة .. تبي توقع او قولي وقعت الا شوي عقد مفاده
انها ..تركب جنحان للحريم .
يقول حق الشركة ان الجنحان مواصفات عالميه توديكن ..الين جلاجل
بس اللي مدقرن للموضوع..ان اليابان.. يبون بكل راس .سطل
خام................وشسمهم معيين الا بربع سطل ...

تراهم حاسينننبتس...لاتحسبينهم ماحسوبتس... عندهم احساس >>:a2::a2:

شكرا لك

[الملاك الوردي]

؟؟؟؟؟؟؟؟؟؟؟؟؟؟؟؟؟
لي عودة وتعليق

[..روز..]

السلام عليكم ...


ألحق ما ألحق ألحق ما ألحق >>>دايم أجي متأخرة للمواضيع الي عليها القيمة

الذاهبة .. شوفي كيف الدنيا فرحت يوم نزلتي موضوع ، تكفين كل يوم تعالي لمنا ...



بالنسبة للنقل أنا ماواجهت فيه مشاكل لأن الشنبات الي عندنا ماخلوني أحتاج لأحد.. الله لايحيجهم إلا لوجهه ..


بعد ما أعرسوا الشنبات تكفل أبوي الله يحفظه بمهمة توصيلي .. وكنت إذا قلت له من بيوديني بكرا ..؟؟ يقول : أنا وأنا أبوك >>>فيها دفء مستخبي


لكن الحين المسافات تباعدت وكثروا الي يداومون بأسرتنا ..

فأضطريت إني أروح مع نقل خاص ... وكل ماركبت قلت : سقى الله أيام أخواني وأبوي بالخير ..




الإتفاق إني أسلمه المبلغ كل شهر ..

لكن الأخ يدق علي كل اسبوعين يحسبني مغفلة وإلا مغفلة ... تقدرون تقولون استغفال مغفل من قبله >>>أتحدى أحد يقولها خمس مرات




لكن الحين ما ألومه على الي يسويه .. لأن أبوي وأمي كل مادق علي يقولون : عطيييييييييييييييه

أقول حرامي .. تونا باقي اسبوعين !! يقولون : نبلع البعير ونغص بالإبرة !!؟؟ عطيه بس ...


الله يسحق كل الأبر ...!


حتى البنات الي معي أسألهم أنتم تحسبون له ..؟؟ يقولون : هاه ... لا ... بس نحس إنه ما أمدانا .
عشان كذا صرت ما ألومه ... يعني لقى استجابة سريعة ... محد دقــّـر له إلا أنا حبتين همن قشعون أهلي عن طريقه ..




وياكثر المتعذبااات .. ولو فسحوا لهم مجال سواقة كود لازم يبنون دور ثاني وإلا تصلّح لهم مدينة جديدة لأن الرياض صايرة القاهرة ...>>>ديرة الخاشع الورع (بفتح الواو) الي كلمتيه ..


فأحسن حل بساط الريح ...

[فارس الميدان]

استاذتي الذاهبة /

تدرين مشكلة النقل بس بالقصيم الي متأزمه بقوه عن غيرها من المدن

بالشرقية والرياض وجدة وغيرها مافي صعوبه خاصه بالنقل الداخلي لان المدينه مليانه ( لومزين ) وشركة الومزين تتعاقد مع معلمات بالصباح ياخذها يوديها المدرسه وكذا المعلمه مرتاحه ..
واكلف ماعليها لو ماتحصل احد يوديها تنزل الشارع العام وتوقف لومزين وطلع المدرسه

اما عندنا ببريده لا

مافي لومزين والنقل انواع المذله والتعنطز

الحل ان يكون في بريده شركة لومزين كبيره على مستوى حاجة المنطقه ويكون شغلها على التلفون مو لازم دوجان بالشوراع يضيقون علينا ..
وان جيتي للحق ؟
المفروض انك تجيبي سواق وتريحي بالك من البهذله هذي
انصحك بالنيبالي
خلك مثلي جبت سواق نيبالي منها ياكل الكلاب الي بالحاره ومنها يودي ويجيب الحريم .. وراتبه ما يتعدا 500 او 600 اذا هو غالي
عليه مندي كلابه وسلق يحبه قلبك وكل شي ياكله وكافر يعني لما تروحي مشوار مايزعجك (ماما يبغا روح صلي بعدين يجي ) وهو يكذب مايصلي بس محسوب مسلم عليك عشان التأخير ..
النيبالي ماغير مرتز بالسياره وديانته يعبد كفيله وبس ..

[اسم العضو]

طيب عندي أفتراح ليش مايسمحون نجيب ونستقدم سائقات نساء للمدرسه والعامله والموظفه والطالبت مثل الشغالات ومربيات الأطفال ؟؟؟؟؟


مدري عيت تركب , ركبوها أنتم ؟!!


سلام....

[ابوخالد382]

8
8
8
تصدقون يالربع إن اللي يشرب التوت على فراغ ينقز مر علطول.:36_1_5[1]

[اسم العضو]

8
8
8
تصدقون المتسوي مع علباته مايدري عن نفسه هو رايح ولا جاي

ما غير يدربي ها لدميجه

يخاف شغا لتهم تعرف تسوق ويبلش .....



سلام....

[نجم النعايم]

السلام عليكم و رحمة الله ..

قدر الله و جعلني أنثى .. تعيش في المملكة العربية السعودية ..

و من عامة الشعب أيضاً ..


اللهم هل بلغت ؟!
مساكييييييييييييييييييين, الله في عونكم

مسألة نقل المدرسات يااختي الفاضله, يبيلها اعادة تنظيم

وسلامتكم,,,,

[~ مي ~]

أكثر شي أزعجنا بهذا النقل .. هو سرعته الجنونية .. و مع الدوار يمشي على كفرين ..!

بصراحة مادري ليه الشياب يحبون السرعة .. !!

أجل وش خلوا للكامري .. أبو خشم رملي !

و فضلاً عن ذلك .. لعب في حسبتنا من كثر ما يمسك " بريكات " ..

كنك تتكلمين عن شايبنا ابو محمد هههههههههههههههههه
كم مرة ومرة تدربينا على بعض من كثر البريكات ....



- طيب وشي سيارتك ؟
- مرسيدس موديل 40 قبل الميلاد .. و مافيهاش مكيف للأمانة .. !

* ايه عادي .. أصلاً فرصة نسوي ساونا بالطريق .. هه !

انتبهي تاخذون نقل بدون مكيف ....
اشوف صارت موضة عادي عندهم لاخرب المكيف ماعندهم نية
يزينونه .....هذا ابو محمد جننا على بال مازين مكيفه ....
ادخل البيت اشوف وجهي تقل رية لاحول الله ...... لااااا وبظرف اسبوعين
بس كان وقت الامتحانات وصعبة اغيره (اصلا ماراح القى) بسبب الحر
جاني تينيا ملونة بس الحمدلله كانت بسيطة ...... وهي اساسا تجي من الحر
بلا ساونا بلا بطيخ انسلخنااااااااااا ......
ودي براحة الطريق بس حاطني احتياط حشاااااا والله لو انا مقدمة على الجامعة
.............
مرسي يالذاهبة عالموضوع المهضوم ..... وان كان مأساة بالنسبة لي آآآآآآآآآآه ...

[اسم العضو]

عاشق تقول أختنا
شوف الكلك على اصوله ومن سرعته بالدوارشفت لوحات الباص الخلفيه


سلام...

[إشراق]

الذين يشاهدون محتوى الموضوع الآن : 4 ( الأعضاء 3 والزوار 1)
‏عاشق ديرتي بريده, ‏اسم العضو


متنبل هنيه الله يصلحه

[@ قرطبة @]

أستاذتي في الفن الساخر , الذاهبة وبـــــــــــــــــــــــــــــــس :

لست ممن يعلم من أمر موضوعك شيئًا , وإلا لأعطيتك بضاعتي المزجاة بلا تردد , وإنما وددت أن أقدم نصيحة إخوانية لك , ألا وهي :

آمل أن تتوجهي سريعًا لكتابة الرواية , فلدي شعور فيّاض بأنك ستبدعين فيها أيما إبداع .

أقولها صادقًا بلا تزلف ولا تملق ولا بهرجة , ولست أقولها خبطًا لزقًا .

موفقة أختي أم غســــــــــــــــــــــــان .

( الاشهب وعياله المقاريد ) .

[اعلامي متعقل]

............. الذاهبة ..........ما سطرته اناملك الذهبية


شدني ... كثيرا .... فرغم ان هذه القضية طرقت

الاف المرات وكتب عنها وعلق عليها مرات ومرات


إلا ان هذا الطرح يفوق كل تلك الاطروحات

فطـــــــــــــرحك

جعلني ابتعد .. قليلا عن الشاشة ...

راجعا بجمجمتي ... اللي الخلف موجها

ناظري اللي الافق .. كي اعيد التفكير

بهذه القضية ...

وبعد معركة فكرية ذاتية


خرجت .. بما هو آت قد يكون .. هذا ا لآت

بعيدا عن الموضوع


بس هذي نتائج <<<<<< النظر اللي الافق



اولا .. العنوان " ابو مرزوق .. لتوظيف العاطلين "

^
^
^
^


أيهم .. اهم عمل المرأة .. ام عمل الرجل ..

ايهم .. أشد وطئه جلوس الرجل .. عطال بطال

ام المرأة ..

هل .. المرأة يعيبها .. جيبها .. ام الرجل

هل .. العاطلون عن العمل .. اكثر

ام المتضررات من انعدام وسائل النقل

هل .. تتضرر ... الاسرة كثيرا ببقاء


ابنها .. دون عمل .. ام ابنتها


هل .. بقاء .. الرجل .. دون عمل .. يترتب

عليه .. مشاكل .. اجتماعية .. ام .. المرأة


هل .. بقاء المرأة دون وظيفة .. يمنعها

عن الزواج .. ام .. الرجل

... وخرجت .. اكوام .. من .. هل .. وهل .. وهل


فارجعت ناظري ... الي الجهاز



... انها مسألة أولويات .. اذن


فحريم البلد .. ده ..

مش أعز من رجلتهم ...


" على قولت صاحبك بتاع الورع "



ولك .. وللجميع خالص الود والاحترام ...


..... واحلى .... تحية ... للقصـــيــبــي .. والعبــيد


.. وسارعي للمجد والعليا .. رددي الله اكبر يا موطني

^
... بترول ايه ياعم <<<<<<< هذي خاطمه قوة ^ ذي عنده بحل

[الذاهـبـة]

طبعاً غريبه أصلت الذاهبه ابتداءً لموضوع
ولكن تزول الغرابة إذا عرفنا أن الأمر يتعلـّق بتلك المعاناة


أهلا و سهلا استاذ الناقد1 ..

شرفتنا بحضورك .. ولعل التأصيل يحتاج فعلاً إلى المعاناة ..

" يا جمس خبرني عن أمر المعاناه .. هه !! "

كانت خليلتي تبصُرني باعتراض حينما اقول بأن قيادة المرأة للسيارة مباحة ، وخلال أيـّام مصر الجميلة كنت أقول لها انظري لهذه المنقّبة التي وارت يديها بالجوارب ، إنها تقود سيارتها بكل حشمة واحترام ، هل من الممكن أن اقول أن قيادتها للسيارة حرام ، وأن ذيك التي تزاحم العالم في الميكروباص قد نالت من سبل العفاف مالم تنله تلك ؟

جرت العادة أن نرفض بالبداية ..

لكن بعد المفاوضات .. قد يلين راسها شوي .. و تقبل .. !

عموماً المقارنة ظالمة ما بين القيادة في القاهرة .. و القيادة هنا ..

هناك السيارات ما تمشي .. و الطبلون ما يتعدى 40 ..

لكن هنا .. أممممممممممم .. ولو مازلت أنا أيضاً معارضة .. !

ياسيدتي
لولا مخرجات قيعان الجفاف العاطفي ، لقلت اطلقن يا سعوديات كفرات سياراتكن للريح :)

أممممممممم !!

عفواً .. هل أنت من العـــُلمانية بشيء ؟!

لقد رق قلبي لنسائنا بصورة لم ترق لـ" كسافة المصريات "
وأنا أتردد إلى الرس لأشهر معدودة ، كنت أشاهد صوالين وتوبيسات من الفجور تنفر نفور يوم المشهد !
يدعوني الفضول والفراغ أحياناً إلى التطلع بوجوه السائقين فألعن آباء تلك النساء الذين أودعوهن تلك الأيدي " خارج نطاق الخدمه "
لن أنسى ذيك البدائعية التي كنت أشاهدها تقف على طريق سريع تنتظر النقل ، وفي شدة البرد ولمسافة تبعد تقريبا 100 متر عن بيتهم الرابضة لوحدها في ذيك المزرعة
أي شقاء هذا ؟

والله ثم والله .. أن بعض الحالات .. ما يحتملها رجل كامل الرجولة ..

فما بالك بــ فتاة عشرينية لم تطرق أبواب الدنيا الكبيرة بعد .. !

لقد كدت أن اقول فيها " عصيدة " شعر ولكن الله سلـّم :)

فعلاً .. سلمت من العصيد !


دمت بعيداً عن كسافة النقل

جزاك الله خير استاذ الناقد .. و سعيدة لمرورك ..

[الذاهـبـة]

بعد اذنك يالذاهبة...

طيب بما انه جات سيرة الموضوع...

وش رايكم باللي يركبـــــــــــــــــــــــون مع السواق لحالهم ...يعني حرمة لحالة ...وحطوا بأعتباركم الظروف اجبرتها غصب تسوي كذا....

يعني وش نظرتــــــــــــــكم....

تهمني الاجابـــــــــــة....؟؟

حياك عزيزتي .. و الموضوع موضوعك طال عمرك ..

أما عن رأيي في المسألة .. إذا كان عدد البنات 2 فما اكثر ..

أو برفقة عيالها الصغار ..

و داخل المدينة .. و سواقهم الخاص ..

فلا حرج بإذن الله ..

[الذاهـبـة]

ياكثر مايشار إليك باللبان هه
خطبة مجلجلة أستاذة ذاهبة اليوم لباسك صالح

إلا على طاري أبو إذان هذا يذكرن ببزر عندنا منول نسميه الفيل
تراه مهب دب لا بس هذاك إذان وشوي طفل الله يرحم حاله
يقولون إنه لامنه جاء ينام إذن فراش وإذن غطاء يالله من فضلك

وهالحين تزحرين كم شهر وتطلعين هالمخروقة

اهلا استاذ مون ..

طيب هذا رفيقكم الفيل .. وش كان يحب ياكل يوم كان صغير ؟

بطاطس شيتوس .. ؟

لأني شاكة بأبو مرزوق .. هه !!

عاد شرفتنا يا استاذ مون .. و مشي حالك مخروقة مخروقة ..

أزين .. ولا موضوع عن تركيب الضروس .. ؟!

[الذاهـبـة]

شششششششششش



هوا ياناس هوا ..

وخروا شوي

لا احد يخطــّم..

اللي يبي يكتب رد يقدم معروض..!!

اللهم زد و بارك ..

هذي العالم المجتمعة .. هي راس مالي .. !

[الذاهـبـة]

http://up.graaam.com/p10ic/964f18b7a4.jpg (http://www.graaam.com/)

يوجد لدي سيارة نقل ظريفه وسريعه لكن بدون محرم يا ذاهبه وممكن قيادتها بنفسك اللون لون المريول المدرسي ..

أن اعجبتك أو ممكن تغييرها ....


سلام ....

إلا عاجبتني و نص ..

بس لو عندي هالسيارة .. و الله ما أروح الدوام ..

شرفتنا استاذ اسم العضو

[الذاهـبـة]

تصوير رااااائع من جد
هادف وساخر
واهنيك على هذا الأسلوب السهل الممتنع ...

اهلا بك استاذ جليدان ..

اشكرك للإطراء .. و الحضور ..

[ممكن اكون بكونك]

وربي انك خليفة امروئ القيس في المعلقات

[ابوخالد382]

خلك مثلي جبت سواق نيبالي منها ياكل الكلاب الي بالحاره ومنها يودي ويجيب الحريم .. وراتبه ما يتعدا 500 او 600 اذا هو غالي
عليه مندي كلابه وسلق يحبه قلبك وكل شي ياكله وكافر يعني لما تروحي مشوار مايزعجك (ماما يبغا روح صلي بعدين يجي ) وهو يكذب مايصلي بس محسوب مسلم عليك عشان التأخير ..
النيبالي ماغير مرتز بالسياره وديانته يعبد كفيله وبس ..
حسبي الله على النيبالي,,وأقول كلبنا الألماني وينه حق الإستراحه؟؟أثر نيبالينا مسويه مندي...على فكره ثالث كلب الماني نجيبه وإذا قعدنا فتره وسافرنا كم يوم وجينا ,,قال :هدا فيه دوق روح فين!!!أنا مابي معلوم...تحياتي يافارس .

[الذاهـبـة]

ايه الله يآجرنا ياربي ..

لا وبعد إذا طرت عليهم قالوا حريمنا بهن وحريمنا مالابهن ..

صيرووااا رجاال ونصير حريم ..

موضوع جد يحكي عن معاناة ومشاكل التوصيل بالسعودية

انا اقترح عليك تنشرينه بأحد الجرايد ..
.

هلا بك عزيزتي تلميذة الحياة ..

اعجبتني عبارتك .. صيروا رجال ونصير حريم

أدت الغرض .. :)

وشكراً للحضور والاقتراح ..

بس من قناعتي الشخصية .. المنتديات أقوى من الصحف ..

و أسهل للنشر ..

ولا تحتاج بروتوكولات و لا تعقيدات

حياك ِ

[الذاهـبـة]

بعد هذه المعانات التي سطرتها زميلتي واستاذتي الذاهبة
لمن أطلقت ساقها خلف المهنة وتركت الحشمة من أجل
حفنة دراهم معدودات ليس لسد رمق العيش بل استزادة
وتكاثر في الأموال بان واتضح أن المرأة بيتها ألزم لها
من الحل والترحال كل صباح ومغامراتها التي لاتنتهي
(وقرن في بيوتكن)

حياك الله اختي الكريمة سارة ..

أوافقك الرأي .. إن كانت المسافات بعيدة ..

و مكلفة .. و النقل مش مضبوط ..

و من غير حاجة ملحة ..

نعم البيت أولى بقرارهن .. !

[الذاهـبـة]

جبتيها ع الجرح يالذاهبه ..

اتفق مع رأي اي لمبه .. الله يخلي لنا الاندونيسي

يا هلا و غلا كوين الكريمة

شرفتينا عزيزتي ..

نعم الأندونيسي عطية الله .. ( هبة من الله ماتقدر بثمن .. )

[الذاهـبـة]

الذاهبة
ارفع قبعتي احتراما لموضوعك <<< المشكلة مالها قبعة

اهلا بالغالية .. فنانة

والله يرفع قدرك و يعز شانك

عادي ارفعي النقاب :)

[الذاهـبـة]

الذاهبه أبعلم عليك الوالدة :)

الحين هي ماحطت إيده على قلبة الا يوم خلصنا من النقل

تجين أنتي تزيدين البلاوي

من ناحيتي أنا موافقه بس بشرط:

لي نص الراتب حقك :)

ماشاء الله تبارك الله ..

لا و الله .. قدعه يا بت ..

يابنت البدايع و ماحلفتيني .. قسم بالله إن حسابي بالماينس .. ( - )

الراتب مافيه بركة مادري ليه ؟

مع إني خيره و بنت حلال و أصلي و أحب الناس .. هه !!

عاد انا فرحت قلت واسطة .. مو طالبين واجد ..

أتاريك انتي تبين نص الراتب .. و ماندري عن أبوك بعد كم يبي ..

سلمي لي ع الوالدة .. و ترى كلنا مدامات و كل وحدة تقول الشين عندي ..

يعني لا توجس خيفة .. !!

شكراً على الحضور يا قمر ..

[الذاهـبـة]

تدوير النقل في بدايت الدراسه ماينفع

لأنه

حيخلصووووووووه

:)

اهلا بك استاذ الحصان الأسود

على طاري ح يخلصوه ..

فعلاً كلمنا واحد سعودي .. قال .. أمممممممممم

أنا مرتبط والله عندي بنات كثير أوديهن و أجيبهن

لكن شوفوا ..

لكم من الساعة 7 و خمس .. إلى 7 و ربع ..

فاضي بهذا الوقت ..

!!!!!!!!!!!!!!!!!!!!!!!!!!!

عشر دقايق يبي يلف ع بيوتنا و ينقلنا .. !!

لا والله .. خلهم يخلصوه أحسن ..

:)

[الذاهـبـة]

تسيييييييييييييييييييييييف تذاء فاتن موضوعك والله اني كل يوم اقول ياليت
الاقي نص موضوع لذاهبه
واخرتها ينزل وانا ماادري
عالعموم تسلمين

وياليت ها الرجال يساااااعدون ويفزعون مهب المره تطلع مع ه الرجل والزواج او الاخ نايم

هلا و غلا بك .. طيف الغالية

و مافاتك إلا الشر إن شاء الله ..

اللي يقهر يا طيف ..

انهم يتشددون من نواحي عايدية .. مافيها شي .. !

و يتساهلون بأمور .. قد تجلب المصيبة ..

هذا كله لأن بعض الناس يهتمون للعادات و التقاليد أكثر ..

و رابين على سياسة : العيب .. !

و تهميش التفكير الواعي السليم .. المستمد من العقيدة و الدين ..


شرفتينا يا قمر ..

[الذاهـبـة]

للأغلب من المدرسات

وشوله هالمرمطه والطلعه بالعاير من الفجور على شان الفين وإلا ثلاثه يروح منها نصها

لأبو مرزوق وطقته ولزوم العمل والباقي يادوب مصروف شخصي يكفي ثلاثة أيام ...

ناس غاويه تعب وشقى على لاشيء يذكر ويستحق ...

اعذب تحيه للكل .

اهلا بك استاذ فور يو

طيب وقف لحظة بقول لك على حسبة بسيطة ..

هذي وحدة من زميلاتي ..

توظفت معلمة في قرية بعيدة .. براتب 2500 ريالز

و يتم تقسيمه كالتالي :

1000 ريالز .. عشان يرضى سعادة زوجها خروجها من المنزل و يسكت .. !

1000 ريالز .. عشان سائق النقل .. طبعاً القرية بعيدة .. !

300 ريالز .. عشان متقاطة مع زوجة ابوها في شغالة أندونيسية .. و الراتب النص بالنص

يبقى للبنت 200 ريال فقط ..

و كل هذا ليه ؟

عشان شهادة الخبرة .. !!

شفت الكسافة كيف ؟!

[الذاهـبـة]

يازين الجلسه بالبيت لاسواقين ولا حاقه
والزيارات الله يخلي لنا البابا
مستريحه ومريحه بسم الله علي
تحيتي إلك يالذاهبه على هالموضوع الراااايق

ماشاء الله عليك يا هدووووء ..

الله يسعدك و يتم عليك و يخلي لك البابا ..

سعيدة بتواجدك حبيبتي ..

[إشراق]

مرحبا يالذاهبه

من زمان ودي اسألك بس مالقيت مناسبه غير بمتصفحك

ليش ماتدخلين خاص لها

يوم فرحت بدخلتي له انقطعتي

[عازفة ألحان الليل]

اهلا بالغالية .. فنانة

والله يرفع قدرك و يعز شانك

عادي ارفعي النقاب :)
ارفع النقاب هوو وخزياه خخخخ

[فور يو]

1000 ريالز .. عشان يرضى سعادة زوجها خروجها من المنزل و يسكت .. !



اهلا بالفاضله الذاهبه ...

ياحيف بس على بعض الشنبات اللي ماهي على ارجال ...!

ياخذ الف على شان يرضى ...!

و من من ...؟

من زوجته اللي المفروض هو اللي يتكفل بالنفقه عليها ...

يا حيف بس والله على بعض الشنبات اللي ماهي على رجال يرضى ان ام عياله

تتمرمط على شان 200 ريال في الشهر يعني تقريبا سته اريال وخمسه وسبعين هلله باليوم ...!

اعذب تحيه للكل .

[بنت البدائع]

ماشاء الله تبارك الله ..

لا و الله .. قدعه يا بت ..

يابنت البدايع و ماحلفتيني .. قسم بالله إن حسابي بالماينس .. ( - )

الراتب مافيه بركة مادري ليه ؟

مع إني خيره و بنت حلال و أصلي و أحب الناس .. هه !!

عاد انا فرحت قلت واسطة .. مو طالبين واجد ..

أتاريك انتي تبين نص الراتب .. و ماندري عن أبوك بعد كم يبي ..

سلمي لي ع الوالدة .. و ترى كلنا مدامات و كل وحدة تقول الشين عندي ..

يعني لا توجس خيفة .. !!

شكراً على الحضور يا قمر ..


هلا بك أستاذة

يمكن أغثك بكثر ردودي بس ودي أهمق شوي

ياحبيلك هالأيام ماتنفع الواسطه وخصوصاً بالفلوس

ومن ناحية أبوي لاتشيلين له هم تراة مايطلب واجد

ياقلبي هو أقسم كانت معنا ثنتين من البنات يروحن ولايدفعن أجرة

وحده يتيمه ووحده حالتهم ضعيفه وأبوي شارط عليهم مايدفعون ولا ريال

عاد شفتي حظك الردي ( لو أنا طالعه على كرم أبوي كان أفدتك ولاطلبت شي) :)

[سـمـا]

ابشركم تكرم نقلنا وقال خلاص اشيلك من باب البيت <<<<شر البلية مايضحك


بعدين اللي يقول اجلسو في بيوتكم والله ماخذنا الشهادة علشان نحطه بالمطبخ


بعدين الحياة تغيرت اللحين يعني لازم الزوجة والزوج يخرجون للعمل علشان يكفو مصاريف البيت والعيال


واكبر دليل هالغلا اللي تعرضلنا


بس ربنا يعين

[لمبـة شارع]

الذين يشاهدون محتوى الموضوع الآن : 2 ( الأعضاء 2 والزوار 0)
‏لمبـة شارع, ‏فاطمة الوليعي

إنا لله وانا اليه راجعون.!!

جت هذي !!

شرط تبي تقول لك..:




أختي الذاهبة

اركبي في المرتبة الاخيرة ..

ثم اغمضي عينيك


ثم ركزي

بهدووووووء

هدووووووء

وتخيلي نفسك انك تاخذي حمام ساونا..

ثم ركزي اكثر


واقنعي نفسك انك فوق السحاب


تتأرجحين هناك...

بكل هدوء...

ثم يوم بعد يوم

بتلقين نفسك مرتاحة...

جربيها ما راح تخسري شي...

[فاطمة الوليعي]

ههههه الله لا يحللك يا لمبة

جت هذي !!

اسمي فاطمة !!!

[فاطمة الوليعي]

مرحبا الذاهبة ..

وراء ما تقولين .. خلونا نسوق .. وتريحيننا .. << وده تسوق

أنا لي معاناة يسيرة معهم ..سابقا ..

.. ينقبض قلبي من أول ما أركب معهم
الى أن أصل ..
سبحان الله .. عكس الراحة النفسية .. مع زوجي أو أخواني ..

فاتخذت قرار .. ما أروح معهم .. حتى لو تأخرت مشاويري أيام وأسابيع .. !!!!

الشكوى لله ..

ان شاءالله يأتي الفرج .. قبل نعجز !!!!

[لمبـة شارع]

اسمي فاطمة !!!

طيب اختنا فاطمة..

ولو اني عارف انك مارح تفوتينها...



المهم عطي الذاهبة والاخوات من تجربتك مع النقل

[الذاهـبـة]

شوفي الله يرضى عليتس

قبل يومين كان عند المعازيب شركتن يابانيه
عشان سالفة السواقة اللي مهيب خالصتن ابد
وها الشركة .. تبي توقع او قولي وقعت الا شوي عقد مفاده
انها ..تركب جنحان للحريم .
يقول حق الشركة ان الجنحان مواصفات عالميه توديكن ..الين جلاجل
بس اللي مدقرن للموضوع..ان اليابان.. يبون بكل راس .سطل
خام................وشسمهم معيين الا بربع سطل ...

تراهم حاسينننبتس...لاتحسبينهم ماحسوبتس... عندهم احساس >>:a2::a2:

شكرا لك

اهلااا بالبرحية .. عاش من شافك .. يا أختي الكريمة ..

تستحقين براءة اختراع على هالفكرة ..

يعني نبي نصير ( معلمات بالاجحنة ) .. @.@

بس الظاهر السمينة ما يركبون لها جوانح .. يخلونها تشرب ريدبول ..

شكراً لحضورك يا مهوية .. :)

[الذاهـبـة]

الذاهبهـ ؛؛

حياكـ الله حبوبهـ ؛؛

تصدقين يا بعدي ذكرتين يوم اطريتي السواقين بابو مشعل الله يذكره بالخير لاجاك كل صبح وبدء يشعر بأم مشعل تسيف تسذا حب ورومانسية وهي ما غير تهزهز بها لراس ؛؛ ولا نمر بن عدوان ؛؛
عاد تصدقين ذكرتين بوحدة من البنات العام كانت تدرس بقرية اسمه قطن بعد عقلة الصقور والمشكلة ليته رسميه على بند ويجيه السواق الساعة 3 بالليل والمشكلة الراتب 2500 يروح منه ألفين للسواق ويبقى له خمسمية ريال وعنده جلفً طول بعرض ما غير سهر وتسدح لأشغل ولا مشغله ومخلي ها لسواق يودي محرمه ويجيبه ؛؛

الله يكون بعونكن ويرزقكن من يقوم بتوصيلكن من محارمكن بلاء منة هالسواقين

هلا و غلا بالكريمة .. فراشة نجد

حياك يا قليبي

أبو مشعل هذا وشو .. ؟!

مايستحي يتغزل بزوجته قدامكن .. !

غريبة !!

سعودي هو أكيد ؟! مهب عادة يتغزلون بلحالهم شلون بحضرة غرباء .. هه !!

يا حبي لك يا فراشة نجد .. شرفتي الموضوع ..

مشكورة

[الذاهـبـة]

الله لايحيجنا لهم ولا للراتب

ونتوظف جنب البيت ونروح رجليه بعد <<< حلمي بس

بصراحه عشت الموقف وقلت..

يمه..!

عاد ماادري وش ابي بأمي..

اللي ذكرت سالفتها فراشة نجد مهبوله صدق

أجل من ثلاث..!

المهم..

اشوف الحاجه تلح على البعض وتجبرهم

واللي للفشخره...

استغفر الله ماودي اتطنز..!



تحيتي,,,

مرحبا بك استاذة العبرى الغالية

تصدقين .. أن في هذي المشاوير البعيدة ..

يطلع قلب المره ..

و تكتسب خبرات و تعرف مناطق .. و يصير عندها حصيلة جيدة ..

عن الرحلات .. و أعطال السيارة .. و سرعة القرارات في بعض المواقف ..

يعني ترى لها ميزات إيجابية

بس اللهم .. يتدبر لها نقل موفق و يخاف الله ..

سعيدة بوجودة ياغالية ..

[الذاهـبـة]

اعرف وحدة كانت تطلع الساعة 2 ونص باليل تصورا وتروح لقرية على طريق الطايف

من شد الرعب خذت مسدس معه..لانه قرية لادعيتوا على احد ادعوا علية يحط فيها...

بس انها كانت معينه رسمية راحت اسبوع واضربت اجازات لحد مانقلت..

اللي يعاني جواء الديرة عذاب واللي برا الديرة عذابين..

إذا رسمية .. عادي تاخذ اجازة استثنائية لين الله يفرجها

فعلاً هذا تخطيط سليم ..

و بالمناسبة يابنات ..

ترى لازم تتعلمون كيف تدافعون عن انفسكم

بأي اسلوب و طريقة تناسبك

و مو ضروري أحمل أسلحة مادية

المهم .. ما اكون ضعيفة و مستسلمة .. !

[الذاهـبـة]

أمي أنصدمت يوم شافتني أضحك تقول بنتي أنهبلت
أسلوبك رائع وشيق بصراحه معانة يالذاهبه الله يعينكم الله يستر أذا أتوظفت شكلي بعاني مثلكم عاد أنا مايقهرني الاالي يتأخر بمواعيده أو مايحترم الناس الي معه كلشي يهون ولا التأخير

:) اهلا و سهلا ثلوج دافئة ..

أهون أنه يتأخر عليك ولا تتأخرين عليه

لأن لو تأخر عليك .. أنتي بيرتفع ضغطك و تنقهرين شوي .. بس تداومين ..

لكن لو تأخرتي عليه .. ماراح ينتظرك .. بيمشي .. و يخليك .. !

مشكورة يا كريمة للحضور و الإطراء ..

والله يرزقك بوظيفة ما حلمتي فيها .. :) :) :)

[الذاهـبـة]

؟؟؟؟؟؟؟؟؟؟؟؟؟؟؟؟؟
لي عودة وتعليق

حياك ِ .. في أي وقت ..

سعيدة يا فندم

[الذاهـبـة]

السلام عليكم ...


ألحق ما ألحق ألحق ما ألحق >>>دايم أجي متأخرة للمواضيع الي عليها القيمة

الذاهبة .. شوفي كيف الدنيا فرحت يوم نزلتي موضوع ، تكفين كل يوم تعالي لمنا ...



يا هلا بك يا غالية ..

و شكراً ياقلبي على هالكلام الحلو ..

ولو أكتب كل يوم ما كان شفتي احد داخل الموضوع ..

ما تحرمشي منكم يارب .. فأنتم راس مالي :)


بالنسبة للنقل أنا ماواجهت فيه مشاكل لأن الشنبات الي عندنا ماخلوني أحتاج لأحد.. الله لايحيجهم إلا لوجهه ..

آمين .. الله يجزاهم خير .. و نعم فيهم والله ..

بعد ما أعرسوا الشنبات تكفل أبوي الله يحفظه بمهمة توصيلي .. وكنت إذا قلت له من بيوديني بكرا ..؟؟ يقول : أنا وأنا أبوك >>>فيها دفء مستخبي

الله يخليه لك يارب ..

لكن الحين المسافات تباعدت وكثروا الي يداومون بأسرتنا ..

فأضطريت إني أروح مع نقل خاص ... وكل ماركبت قلت : سقى الله أيام أخواني وأبوي بالخير ..

الشكوى لله .. الظروف أقوى من الرغبات .. يا وخيتي ..

الإتفاق إني أسلمه المبلغ كل شهر ..

لكن الأخ يدق علي كل اسبوعين يحسبني مغفلة وإلا مغفلة ... تقدرون تقولون استغفال مغفل من قبله >>>أتحدى أحد يقولها خمس مرات




لكن الحين ما ألومه على الي يسويه .. لأن أبوي وأمي كل مادق علي يقولون : عطيييييييييييييييه

أقول حرامي .. تونا باقي اسبوعين !! يقولون : نبلع البعير ونغص بالإبرة !!؟؟ عطيه بس ...


الله يسحق كل الأبر ...!


حتى البنات الي معي أسألهم أنتم تحسبون له ..؟؟ يقولون : هاه ... لا ... بس نحس إنه ما أمدانا .
عشان كذا صرت ما ألومه ... يعني لقى استجابة سريعة ... محد دقــّـر له إلا أنا حبتين همن قشعون أهلي عن طريقه ..

صادقة ..

وفيه بعضهم من وسع الوجه يرسل رسالة يقول : والله محتاج .. و العيد قرب

فياليت لو تعطوني حقي ..

تش !!


وياكثر المتعذبااات .. ولو فسحوا لهم مجال سواقة كود لازم يبنون دور ثاني وإلا تصلّح لهم مدينة جديدة لأن الرياض صايرة القاهرة ...>>>ديرة الخاشع الورع (بفتح الواو) الي كلمتيه ..

إلا إذا سقنا .. بيسوون الشوارع دورين ..

فوق حريم و تحت الرجال ..

أحسن حنا نمسك الشوارع الجديدة .. بس الله يفكنا من تسليك الهاتف و البلدية و المصلحة ..

عشان ما يحوسون شوارعنا .. هه !!


فأحسن حل بساط الريح ...

أو عصا العجوز الساحرة .. :)

حياك الله يا قمر .. شرفتينا ..

[الذاهـبـة]

استاذتي الذاهبة /

تدرين مشكلة النقل بس بالقصيم الي متأزمه بقوه عن غيرها من المدن

بالشرقية والرياض وجدة وغيرها مافي صعوبه خاصه بالنقل الداخلي لان المدينه مليانه ( لومزين ) وشركة الومزين تتعاقد مع معلمات بالصباح ياخذها يوديها المدرسه وكذا المعلمه مرتاحه ..
واكلف ماعليها لو ماتحصل احد يوديها تنزل الشارع العام وتوقف لومزين وطلع المدرسه

اما عندنا ببريده لا

مافي لومزين والنقل انواع المذله والتعنطز

الحل ان يكون في بريده شركة لومزين كبيره على مستوى حاجة المنطقه ويكون شغلها على التلفون مو لازم دوجان بالشوراع يضيقون علينا ..
وان جيتي للحق ؟
المفروض انك تجيبي سواق وتريحي بالك من البهذله هذي
انصحك بالنيبالي
خلك مثلي جبت سواق نيبالي منها ياكل الكلاب الي بالحاره ومنها يودي ويجيب الحريم .. وراتبه ما يتعدا 500 او 600 اذا هو غالي
عليه مندي كلابه وسلق يحبه قلبك وكل شي ياكله وكافر يعني لما تروحي مشوار مايزعجك (ماما يبغا روح صلي بعدين يجي ) وهو يكذب مايصلي بس محسوب مسلم عليك عشان التأخير ..
النيبالي ماغير مرتز بالسياره وديانته يعبد كفيله وبس ..

اهلا بك استاذ فارس الميدان ..

ترى عنوان موضوعي هذا اخترته تيمناً باسمك ..

عشان يتبارك .. أنت كلك بركة ما شاء الله ..

مادريت أنك تبي تخربها و الهرجة كلها مندي كلابه .. و سلقلق .. الله يعزكم ..

بالنسبة لـ الليموزين .. بصراحة مادري ليه هو ممنوع هنا بالقصيم ؟؟ أو حرام ؟؟

ماعمر عيني شافت سيارة أجره .. هه

وش السالفة !


والسواق ضرورة .. من جد .. في ظل تزايد عدد الحرمّا

و ندرة الرجال .. الله المستعان ..

بس عاد نيبالي .. هه !! هذا ياكل لحوم البشر ..

ما ينفع أبد ..

شكراً لحضورك و تشريفك ..

[الذاهـبـة]

مساكييييييييييييييييييين, الله في عونكم

مسألة نقل المدرسات يااختي الفاضله, يبيلها اعادة تنظيم

وسلامتكم,,,,

حياك الله نجم النعايم ..

اعادة تنظيم .. !!

أصلا ما نعتبرها عملية قائمة بحد ذاتها .. عشان نجي نطلب اعادة تنظيم ..

يعني الدعوى فوضى ..

اي و الله مساكين .. شفت كيف عاد .. !!


شكراً لحضورك .. :)

[الذاهـبـة]

كنك تتكلمين عن شايبنا ابو محمد هههههههههههههههههه
كم مرة ومرة تدربينا على بعض من كثر البريكات ....


اهلا و سهلا بالغالية مي

أتحداك تجيبين شايب ما يحب يمسك بريك ..

أكيد فيه سر .. !!

احتمال من كثر الهواجيس .. يهوجس يهوجس .. و فجأة ... امسك بريك ..


انتبهي تاخذون نقل بدون مكيف ....
اشوف صارت موضة عادي عندهم لاخرب المكيف ماعندهم نية
يزينونه .....هذا ابو محمد جننا على بال مازين مكيفه ....
ادخل البيت اشوف وجهي تقل رية لاحول الله ...... لااااا وبظرف اسبوعين
بس كان وقت الامتحانات وصعبة اغيره (اصلا ماراح القى) بسبب الحر
جاني تينيا ملونة بس الحمدلله كانت بسيطة ...... وهي اساسا تجي من الحر
بلا ساونا بلا بطيخ انسلخنااااااااااا ......
ودي براحة الطريق بس حاطني احتياط حشاااااا والله لو انا مقدمة على الجامعة
.............
مرسي يالذاهبة عالموضوع المهضوم ..... وان كان مأساة بالنسبة لي آآآآآآآآآآه ...


بسم الله عليك .. اعوذ بالله لا عادت من نقل .. !!

أما موضه .. عندهم خراب المكيفات صراحة مادري ..

يمكن يكلف كثير تصليحه ؟ أو يتعمدون يخربونها عشان نضطر نصلحها لهم .. !؟

مرسي يا حبوبتي لحضورك ..

[الذاهـبـة]

أستاذتي في الفن الساخر , الذاهبة وبـــــــــــــــــــــــــــــــس :

لست ممن يعلم من أمر موضوعك شيئًا , وإلا لأعطيتك بضاعتي المزجاة بلا تردد , وإنما وددت أن أقدم نصيحة إخوانية لك , ألا وهي :

آمل أن تتوجهي سريعًا لكتابة الرواية , فلدي شعور فيّاض بأنك ستبدعين فيها أيما إبداع .

أقولها صادقًا بلا تزلف ولا تملق ولا بهرجة , ولست أقولها خبطًا لزقًا .

موفقة أختي أم غســــــــــــــــــــــــان .



اهلا و سهلا بك استاذ قرطبة ..

سعيدة جداً بتشريفك .. وحضورك .. و رأيك الذي أفخر به ..

و اسمح لي سيدي

رحم الله امرئ عرف قدر نفسه ..

لا أظن أني أمتلك مقومات الروائية الناجحة ..

ابتداءاً من الفكرة .. مروراً بالحصيلة اللغوية .. إلى مضمون و شكل العمل الروائي ..

فقط يكفيني أن أستعرض من خلال شخصيتي و أسلوبي البسيط ..

ملاحظاتي .. همومي .. و آمالي ..

و يكفيني جداً قرائي في منتدى بريدة العزيز على قلبي ..

شاكرة لك مرة أخرى ..

( الاشهب وعياله المقاريد ) .

^^

بالضبط هذا عنوان روايتي الجديدة باللغة الفرنسية ..

[أبوفالح]

يا مال الإياب

بالرغم من طول الموضوع .. إلاّ أني قريته بالكامل فهو خفيف لطيف ممتع

نرجع لسالفة معانات المدرسات مع السوّاقين والتردد

أنا شخصياً قبل كم سنه كنت أتردد على قريه نائية وفيها جلد مهب صاحي .. وبحكم أني أحب النسنسة والهجات والدوران حول الشعبان القريبة من المدرسة فقد كنت أجي بسارتي الخاصة ولا أقبل التردد مع زملائي إلاّ في فصل القيظ .. الشاهد من السالفة :

كان بجوارما مدرسة بنات ، وجميع المعلمات من بريدة والمسافة لا تقل عن 200كم منها30 كم جلد رهيب ... المهم هالمسكينات كل أسبوع يتغير سوّاقهن ولا صمل معهن أحد .. وكذا مرّه نلقاهن نازلات عن السيارة والسائق يعفرت بالكفر المبنشر .. ومره أسحبوهم خوياي عن غيصة طين .. أيه نسيت أعلمكم .. في موسم الأمطار تصبح ذيك المطينة دردبيس والسيارة تروج وتموج وتهلك ما قطعتها ..

طبعاً .. صارت بيننا وبين المدرسات معرفة عن بعد .. فالمسكينات من كثر ما شفناهن يناقزن بالسيارات عرفنا كل شئ عنهن .. وكنا نظحك عليهن ونرحمهن في نفس الوقت .. طبعاً سواقينهن يشرفوننا في المدرسة ويشاورنا عن الطريق ومن خلاله عرفنا مآسي كثيرة .. كتغيير السيارة الرفيعة عشان وحده حامل .. والله صدق .. كنا نعيش بساطة المعرفة ونخوة التعاطف .

وعلى طاري .. السواقين .. فقد وصلني الدور وبغيت أصير سوّاق من عرض هالسواقين .. لكن سوّاق محترف أكثر منهم لأني أعرف المكان زين ومتردد قبلهم .

طبعاً .. العرض جاني عن طريق والد إحدى المدرسات واللي نابينه عشان يوديهم ، فالمدرسات عارفات أني أتردد لوحدي وعارفات منهو أنا .. يعني كل شي عــ المكشوف ، وتذكر أن العرض كان مغري .. مادري 200 أو حول كذا .. المهم المجموع كان عشرة آلاف ريال .. لكن من دباشتي عييت

يكفي .. والله مادري وش كتبت فوق .. لكن واضح أني كثرت الهرج وأبحرت في تذكر تلك الأيام

بمان الله

[@ ابتسام @]

حياكـ الله حبوبهـ ؛؛

تصدقين يا بعدي ذكرتين يوم اطريتي السواقين بابو مشعل الله يذكره بالخير لاجاك كل صبح وبدء يشعر بأم مشعل تسيف تسذا حب ورومانسية وهي ما غير تهزهز بها لراس ؛؛ ولا نمر بن عدوان ؛؛


هههههههههههه يا ملحهم لو انا مكانك كان اسجل في الجوال على طول لانهم فلته ’’

وننبسط عليهم اذا اجتمعنا مع البنات .

************

احمد اللي عزني من عز ابوي الى عز زوجي هم اللي يودوني و يعطوني زود فلوس على راتبي بس عشان اوافق اقوم للدوام .


الله ييسر لخواتي امورهم يارب .

[الملاك الوردي]

هي كلمة بس من وزير الداخلية

يعتمد

تكفى تكفى ريحنا ياااااااااااااااااامير

[هامة حاسوبية]

كيف تنام و أنت ( الرجّال ) .. وما تدري عن اسم الرجل اللي ينقل أختك .. !

والله إنك صادقة !!

ذكرتين بوحده ياقلبي تقول كنت واقفة عند باب الشارع أنتظر النقل عشان أروح للكلية

تقول طلع أبوي ومر جنبي عشان بيطلع عن البيت ، والتفت علي وناظرن

قال : فلانة !! أنت للحين ماتخرجتي ؟! >> ياقلبي عليه مايدري إن بنته للحين تدرس وإلا قاعدة بالبيت !!

صدق أبوان آخر زمن الله لا يبلانا !!




لا والمشكلة يالذاهبة إن الشباب العاطلين عن العمل كثر التراب

وإذا جيتي تدورين نقل مالقيتي !!

أنواع الزنقة !!

وإلا تلقين واحد وعينه زايغه !!

أذكر أختي - معلمة - كانت تروح مع نقل ومدرسته على بعد ساعة ونص تقريبا

المهم كانت معه لمدة ترم واحد فقط وآخر الترم أخذت إجازة عشان بتتزوج

السواق مايدري ليش ما بتروح معه ، بس عقب عرف إنه بسبب زواجه ، تدرين وش قال ؟؟

" خساااااااااره كنت حاط عيني عليه وتزوجت خلاص ؟!! " >> طبعا يقوله وهو معصب ولا خاف من أحد !! وعقب البنات قالوا لأختي !!

والمشكلة الكبرى إن عمره حول الخمسين وهي بنت بالعشرين

عمي بشكلك يابو عيون زايغة >> هذي من ردودك يالذاهبة أنا مالي دخل هع هع



بس بجد موضوع مهم تشكرين عليه


تحيتي

هامة حاسوبية

[الذاهـبـة]

............. الذاهبة ..........ما سطرته اناملك الذهبية


شدني ... كثيرا .... فرغم ان هذه القضية طرقت

الاف المرات وكتب عنها وعلق عليها مرات ومرات


إلا ان هذا الطرح يفوق كل تلك الاطروحات

فطـــــــــــــرحك

جعلني ابتعد .. قليلا عن الشاشة ...

راجعا بجمجمتي ... اللي الخلف موجها

ناظري اللي الافق .. كي اعيد التفكير

بهذه القضية ...

وبعد معركة فكرية ذاتية


خرجت .. بما هو آت قد يكون .. هذا ا لآت

بعيدا عن الموضوع


بس هذي نتائج <<<<<< النظر اللي الافق



اولا .. العنوان " ابو مرزوق .. لتوظيف العاطلين "

^
^
^
^


أيهم .. اهم عمل المرأة .. ام عمل الرجل ..

ايهم .. أشد وطئه جلوس الرجل .. عطال بطال

ام المرأة ..

هل .. المرأة يعيبها .. جيبها .. ام الرجل

هل .. العاطلون عن العمل .. اكثر

ام المتضررات من انعدام وسائل النقل

هل .. تتضرر ... الاسرة كثيرا ببقاء


ابنها .. دون عمل .. ام ابنتها


هل .. بقاء .. الرجل .. دون عمل .. يترتب

عليه .. مشاكل .. اجتماعية .. ام .. المرأة


هل .. بقاء المرأة دون وظيفة .. يمنعها

عن الزواج .. ام .. الرجل

... وخرجت .. اكوام .. من .. هل .. وهل .. وهل


فارجعت ناظري ... الي الجهاز



... انها مسألة أولويات .. اذن


فحريم البلد .. ده ..

مش أعز من رجلتهم ...


" على قولت صاحبك بتاع الورع "



ولك .. وللجميع خالص الود والاحترام ...


..... واحلى .... تحية ... للقصـــيــبــي .. والعبــيد


.. وسارعي للمجد والعليا .. رددي الله اكبر يا موطني

^
... بترول ايه ياعم <<<<<<< هذي خاطمه قوة ^ ذي عنده بحل

اهلا و سهلا استاذ اعلامي متعقل

شرفتنا بحضورك ..

عفوا الاستفسارات أعلاه .. لا تقاس على وجه العموم

بل أعتقد أن لكل حالة .. مقياس و أولوية .. و شروط خاصة ..

يعجبني في ردك .. البحث عن بدايات المشكلة .. !!

شكراً ..

[الذاهـبـة]

وربي انك خليفة امروئ القيس في المعلقات

اهلا و سهلا / ممكن أكون بكونك ..

الله يجعلني إن شاء الله ... :)

شكراً لحضورك ..

[شديد الملاحظة]

الأخت الكريمة : الذاهبة

أذكر مرة كنتي في حوار مع أحد الإخوة وأظنه عمر الغريب وقلتي له إنك موظفة في بنك إسلامي وداعية !

ماعلينا ! بغض النظر عن المصداقية !

موضوع جميل للغاية وسهل الهضم .

تقبلي تحياتي ..

[الذاهـبـة]

مرحبا يالذاهبه

من زمان ودي اسألك بس مالقيت مناسبه غير بمتصفحك

ليش ماتدخلين خاص لها

يوم فرحت بدخلتي له انقطعتي

هلا بك بنت بريدة الثانية ..

أمممممممممم

كنت ادخل بمعرفي الأول ..

وبصراحة ماعندي شي أضيفه للقسم ..

عشان كذا ما احرص على الدخول هناك ..

عموماً ..

إن بغيتي تأمريني بأي شي .. فعندك الرسائل الخاصة ..

و ابشري بسعدك عزيزتي ..

منورة .. :)

[الذاهـبـة]

مرحبا الذاهبة ..

وراء ما تقولين .. خلونا نسوق .. وتريحيننا .. << وده تسوق

أنا لي معاناة يسيرة معهم ..سابقا ..

.. ينقبض قلبي من أول ما أركب معهم
الى أن أصل ..
سبحان الله .. عكس الراحة النفسية .. مع زوجي أو أخواني ..

فاتخذت قرار .. ما أروح معهم .. حتى لو تأخرت مشاويري أيام وأسابيع .. !!!!

الشكوى لله ..

ان شاءالله يأتي الفرج .. قبل نعجز !!!!

اهلا و سهلا استاذة فاطمة الوليعي ..

والله العظيم ما ودي اسوق ..

مو كله زهد .. بس الله العالم فيني روعة ..

والقرار هذا انطبخ و صار جاهز .. بس باقي يتسبك شوي ..

شرفتينا استاذة .. :)

[ღعبدالله العطيشانღ]

ضحكت على أبره اللي تقوله روز .. أذكر المثل يقال كذا (( جرعت البعير وغصيت بالبيضه )) وألا يازاهبة !
والله يالذاهبه إنك مشغله حالك بالك وأعيالك وزوجك << بدأ يمون
ما لك بوجع الراس والبهذله كل صبح عشان بنهاية الشهر تاخذين لك طفسه لا تسمن ولا تغني من جوع !
ما ورى ما خدمتي للدوله كفيتي ووفيتي .. كبري الوساده وريحي نفسك وأستانسي بقيه حياتك
ولا تنامين ألا إذا جاك النوم ولا تقومين ألا إذا شبعتي .. كبري الوساده بس يا حجيه وأبعدي عن الضغط والسكر !
بس قضيت تبين شيء يالله مع السلامه
إذا تبين سواق تراه والم وموجه هالسياره كمان

[..روز..]

ضحكت على أبره اللي تقوله روز .. أذكر المثل يقال كذا (( جرعت البعير وغصيت بالبيضه ))


تدري عاد .. أهلي مايغصون بالبيض ، يغصون بالأبر بس ...

لأني من طلعت على الدنيا وأنا أسمعها منهم ...

أترك حقتك وخذ حقتي لأن مستوى المبالغة فيها أشد ..!

الحديث دايم يذيل بعبارة (وفي رواية كذا وكذا)


الأمثال من باب أولى ...


عبدالله .. قل شكراً لأني ضحكتك >>>>تراي ما أخذته من أخواني ! :)

[لمبـة شارع]

على الرغم من أن ماكانت تسمى(رئاسة تعليم البنات) تمتلك ميراثا ضخما من الخبرة بالنقل..تجسدّت على شكل أسطولها الأصفر العظيم..الذي يدار بطريقة متقدمة وديناميكية إلا أن حظ العاملات منه هو فقط شيء من الذكريات حينما كنّ طالبات..
لا أدري لماذا لا تفكر وزارة التربية والتعليم بتقديم الخدمة للعاملات على شكل باصات صغيرة فخمة (فئة 24 راكبة) تكون مكيفة ..ويتم تحصيل رسوم متناسبة معها ...
أعتقد ان الامر سيحل الكثير من الاشكالات أقلها تقليل الزحام في ساعات الذروة..

[شموع تحت المطر]

تبونهم يحطون لخلق الله باصات توديهم لمدارسهم

هالحين باصات المدارس الغوهـــــن.. عاد شلون للمعلمات

يمنون عليهن انهم موظفينهن ..عـــاد يبي يتكفلون بروحتهن وجيبتهن..والله لو حنى بالامارات..

[الذاهـبـة]

يا مال الإياب

بالرغم من طول الموضوع .. إلاّ أني قريته بالكامل فهو خفيف لطيف ممتع

نرجع لسالفة معانات المدرسات مع السوّاقين والتردد

أنا شخصياً قبل كم سنه كنت أتردد على قريه نائية وفيها جلد مهب صاحي .. وبحكم أني أحب النسنسة والهجات والدوران حول الشعبان القريبة من المدرسة فقد كنت أجي بسارتي الخاصة ولا أقبل التردد مع زملائي إلاّ في فصل القيظ .. الشاهد من السالفة :

كان بجوارما مدرسة بنات ، وجميع المعلمات من بريدة والمسافة لا تقل عن 200كم منها30 كم جلد رهيب ... المهم هالمسكينات كل أسبوع يتغير سوّاقهن ولا صمل معهن أحد .. وكذا مرّه نلقاهن نازلات عن السيارة والسائق يعفرت بالكفر المبنشر .. ومره أسحبوهم خوياي عن غيصة طين .. أيه نسيت أعلمكم .. في موسم الأمطار تصبح ذيك المطينة دردبيس والسيارة تروج وتموج وتهلك ما قطعتها ..

طبعاً .. صارت بيننا وبين المدرسات معرفة عن بعد .. فالمسكينات من كثر ما شفناهن يناقزن بالسيارات عرفنا كل شئ عنهن .. وكنا نظحك عليهن ونرحمهن في نفس الوقت .. طبعاً سواقينهن يشرفوننا في المدرسة ويشاورنا عن الطريق ومن خلاله عرفنا مآسي كثيرة .. كتغيير السيارة الرفيعة عشان وحده حامل .. والله صدق .. كنا نعيش بساطة المعرفة ونخوة التعاطف .

وعلى طاري .. السواقين .. فقد وصلني الدور وبغيت أصير سوّاق من عرض هالسواقين .. لكن سوّاق محترف أكثر منهم لأني أعرف المكان زين ومتردد قبلهم .

طبعاً .. العرض جاني عن طريق والد إحدى المدرسات واللي نابينه عشان يوديهم ، فالمدرسات عارفات أني أتردد لوحدي وعارفات منهو أنا .. يعني كل شي عــ المكشوف ، وتذكر أن العرض كان مغري .. مادري 200 أو حول كذا .. المهم المجموع كان عشرة آلاف ريال .. لكن من دباشتي عييت

يكفي .. والله مادري وش كتبت فوق .. لكن واضح أني كثرت الهرج وأبحرت في تذكر تلك الأيام

بمان الله

اهلا و سهلا استاذ ابو فالح ..

شرفتنا يامال الغنيمة ..

طيب سؤال ..

مادمت رايح جاي على هالمنطقة ..

ليه ما تشيل معك Mدرسات .. و ترزق الله .. ؟!!

بعدين حلوة مرة سالفة : أنتم عرفتوا المدرسات .. و هن عارفاتك زين ..

شلون يعني طلعتوا من بريدة .. وصرتوا في كاليفورنيا .. !!

حرية زايدة ماشاء الله .. !

طبعاً ..

أتحدى أبو فالح يخش مرة ثانية ع الموضوع ..

عشان كذا بحش فيه و آخذ راحتي بعد .. هه !!

[الذاهـبـة]

هي كلمة بس من وزير الداخلية

يعتمد

تكفى تكفى ريحنا ياااااااااااااااااامير

سلام يا امير(ن)لك الناس تنصاك=ياللي عليك الخلق ورد ومصادير
لك القصيد يساق لامن ذكرناك=قرايح(ن) بين النفل والنوايير

حياك الله يا وردي ..

[ღعبدالله العطيشانღ]

تدري عاد .. أهلي مايغصون بالبيض ، يغصون بالأبر بس ...

لأني من طلعت على الدنيا وأنا أسمعها منهم ...

أترك حقتك وخذ حقتي لأن مستوى المبالغة فيها أشد ..!

الحديث دايم يذيل بعبارة (وفي رواية كذا وكذا)


الأمثال من باب أولى ...


عبدالله .. قل شكراً لأني ضحكتك >>>>تراي ما أخذته من أخواني ! :)

والله ممكن أن فيه كائنات بشريه تاكل أبر .. الناس منتالي بدو يخرفون
مو يقولون أن الجوعان ياكل الحصى .. كما هو الحال عندكم تاكلون أبر !
بس ما راح أقول شكرآ .. لإني ما ضحكت .. خفت يكون تصحيحي للمثل غلط بس ستر الله !
بس أنا ملقفوف وقلت أني ضحكت .. والضحك عندي مكرر أبديآ .
ترا يا روز إذا صححتي معلومة هذا المثل ممكن تكوني بعيون أهلك جهينه وألا نفيل وألا شككاري !
والله يابنت الحلال حقتك حلوه بس ما ودي أصير مضحاكه لغيري وألا ما تنعاف أبد !
الحين أنا تأكدت أني ذكي !
عاد أنا من يوم إني صغير وأنا عبقري تصدقين عاد يوم كنت بخامس إبتدائي كان فيه شي أبيض ينقط مع إذني جاء أبوي وداني لأقرب ورشة يوم فحصوني طلع المخ عندي كثير ومن كثره بدا ينقط جاء اليماني حق الورشة ركب لي جلب وشد أذاني و لاعاد نقط شي بس للحين أسمع صوت تنسيم اذا أسرعت بالمشي يعني إذا حطيتها بالرابع ، وكان فيه شايب بحارتنا أسمه أبونوال دايم يقول أنت لك مستقبل باهر بس ما أدري ليه كان يتوقع إني أصير رئيس عصابة اذا كبرت !

شكرآ لك على هالضحكه

[ضحاوي]

iهلا وغلا يالذاهبه

محد تلطح مثلي مع هالسواقين درست خارج بريده وأغلب مشاويري ليموزينات

وانواع وأشكال الله لا يوريها مسلم خخخخخخخخخخخخخخخخخخخ

الهندى اللى ريحته خياس وسيارته تقطر زيت وبعد حاط أغنيه هنديه

السودانى اللى يأخذ المشوار وين أذنك ياجحاا قال هنيا ولف ام الطريق

المصري اللى يلزق عشان يوصلك الف مشوار وبعد سرعة الف حصان عشان يلحق

السعودين وهم أشكال

ياتركبين مع شايب مخرف .......ماغير يذب بالحكومه وتشكين انه دبوس خخخخخخخ

او واحد حاط ال أف أم وهيمان ابو الشباب وكل مره مضيع اللفه

واللى يرز عمره تقول الوليد بن طلال

واللى يسوى تحقيق تقول داخله قسم شرطه مو لموزين خخخخخخخخخخ

والاشكال كثير

بس الحمد الله افتكيت من هالدراسه وهمهاااا ووأنا وبكل شرف اشجع سواقة المرأه خخخخخخ

يسلمو على الموضوع ذهبوبه

[شمس الرياض]

هلا بالذاهبه
رائعة في طرحك
موضوعك اول ماقريته ماقدرت ارد عليك من البداية
تدرين كل مره ادخل الموضوع واقراْ واطلع احاول اكتب اتذكر صديقتي اللي راحت ضحية نقل معلمات
الله يرحمها كان عمرها 23 تعينت في قريه قريبه من الرياض وكانت تقول لي تعالي معنا قلت والله لو كيلو خارج الرياض ماطلع صحيح اني انسانه مؤمنه بالقضاء والقدر ولكن مخاطر النقل كثيرة
والوزارة لا تعمل لحل المشكلة الاهمال يزيد والاستهتار في الارواح مستمر
ولكن الوضع يالذاهبه اذا وصل لحصاد الارواح هذا امرا لايحتمل كلمتين في الجرايد وانتهى الموضوع
حتى هالضحايا اكثرهم على نظام البنود يعني موت وخراب ديار .

تحياتي وتقديري

[جناان]

سرد راائع
لمأساة يعااني منها الكثير .!!
والله اني استغرب من هالشيبان وسرعاتهم الجنونيه
يلف وهو مسرعه ويخلي الي بالباص خلطه .
حليل هالباص بس ماكنه قصير ومدربح ويمشي جميع شكله حق طالبات محو الامية
عيون الصقر والتعليقات
الباسمه >> تذكرت موضوع لي قديم هههه

تحيتي للجميع

[المتزن]

ع(ز)مة على ع(ز)مة يا ست ..

أستازة ورئيسة قسم .

========

ما أدري , بس أعجبتني بل أثارتني طريقة طرح الموضوع , فالموضوع مستهلك لكن طريقة طرحه رائعة وجعلته كأنه جديد .

طبعاً مهيب منحلـّة المشكلة , بس أهم شيء الوناسة وحب الوطن :)


وتقبلي تحياتي 00
المتزن

[The Free Man]

وااااو

تصدقين توي احس بمعاناتكم
والله يكسرن الخاطر هالحريّم

مالكم الا كعابي لمين يفرجها ربك
عاد اذكر اول إذا جت حرمة تقطع الشارع يوقفون كل السيارات لمين تعبر بسلام
اما الحين اللي بايعتن عمره تقطع الشارع
الظاهر الحريم يبي يسون مثل اللي بفلام كرتون تطلع العصاقيل والكعب العالي عشان يوقفن السيارات:)


يسلمو استاذتي الذاهبة
موضوع شيق وهادف

[علشانك بس]

سواقنا المصري قبل اسبوع اعتذر قال دورو غيري
والله اننا بلشنا ندور
ولقينا واحد ياحليله سعودي لاركبنا لف المرايه اللي قدام وجهه عشان مايناظر اللي ورى من الزهد والحيى ماشاء الله عليه هههههه
ليت كل السواقين مثله الله يستر عليه

[فيصل...........]

ابشركم يابنات قصدي يابلات
فيه سائق سعودي معه طائره اذا جيتوا فوق مدرستكم ينزلكم ببرشوت
للمناطق اللي مالها طرق او بعيده اسمة ابو رويشد لنقل لابلات
المنحوسات في العيين

[الذاهـبـة]

والله إنك صادقة !!

ذكرتين بوحده ياقلبي تقول كنت واقفة عند باب الشارع أنتظر النقل عشان أروح للكلية

تقول طلع أبوي ومر جنبي عشان بيطلع عن البيت ، والتفت علي وناظرن

قال : فلانة !! أنت للحين ماتخرجتي ؟! >> ياقلبي عليه مايدري إن بنته للحين تدرس وإلا قاعدة بالبيت !!

صدق أبوان آخر زمن الله لا يبلانا !!




لا والمشكلة يالذاهبة إن الشباب العاطلين عن العمل كثر التراب

وإذا جيتي تدورين نقل مالقيتي !!

أنواع الزنقة !!

وإلا تلقين واحد وعينه زايغه !!

أذكر أختي - معلمة - كانت تروح مع نقل ومدرسته على بعد ساعة ونص تقريبا

المهم كانت معه لمدة ترم واحد فقط وآخر الترم أخذت إجازة عشان بتتزوج

السواق مايدري ليش ما بتروح معه ، بس عقب عرف إنه بسبب زواجه ، تدرين وش قال ؟؟

" خساااااااااره كنت حاط عيني عليه وتزوجت خلاص ؟!! " >> طبعا يقوله وهو معصب ولا خاف من أحد !! وعقب البنات قالوا لأختي !!

والمشكلة الكبرى إن عمره حول الخمسين وهي بنت بالعشرين

عمي بشكلك يابو عيون زايغة >> هذي من ردودك يالذاهبة أنا مالي دخل هع هع



بس بجد موضوع مهم تشكرين عليه


تحيتي

هامة حاسوبية



اهلا و سهلا و مرحبتين

حياك هامة حاسوبية

الصراحة حرام ينقال عليهم أهل ..

اذا ما يدري بنته متخرجة او ما تخرجت .. !!

و حنا دايماً إذا شفنا بنات ضالات .. نقول : وين اهلهن ؟؟ !!

سبحان الله ..

عايشين و موجودين بس ماكأنهم موجودين ..

والحافظ الله على كل حال ..


عاد أبو عيون زايغة والله انهم يقهرون ..

تعرفين الحارس و السواق بس يقزقزون بالبنت لين يحفظون شكلها صم ..

أحيان إذا طلعت أويق .. يقول لي : تو ماجا .. ماجا ..

أهب شلون يعرفنا .. !!

منورة يا قليبي .. :)

[الذاهـبـة]

هههههههههههه يا ملحهم لو انا مكانك كان اسجل في الجوال على طول لانهم فلته ’’

وننبسط عليهم اذا اجتمعنا مع البنات .

************

احمد اللي عزني من عز ابوي الى عز زوجي هم اللي يودوني و يعطوني زود فلوس على راتبي بس عشان اوافق اقوم للدوام .


الله ييسر لخواتي امورهم يارب .

ياقلبي .. ماشاء الله عليهم اهلك يحبونك

الله يخلي لك أبوك و زوجك و عيالك

حياك في موضوعي ..

[الذاهـبـة]

الأخت الكريمة : الذاهبة

أذكر مرة كنتي في حوار مع أحد الإخوة وأظنه عمر الغريب وقلتي له إنك موظفة في بنك إسلامي وداعية !

ماعلينا ! بغض النظر عن المصداقية !

موضوع جميل للغاية وسهل الهضم .

تقبلي تحياتي ..

حياك الله استاذ شديد الملاحظة ..

عفواً استاذي وش المشكلة .. ؟؟

أنا اتحدث عن مشكلة تؤرق الكثير ..

و عندما أكتب عن قضية .. ليس بالضرورة أعني نفسي ..

لأن تناولها يقتضي معايشتها ..

اشكرك استاذ شديد الملاحظة للحضور ..

والملاحظة :)

[الذاهـبـة]

ضحكت على أبره اللي تقوله روز .. أذكر المثل يقال كذا (( جرعت البعير وغصيت بالبيضه )) وألا يازاهبة !
والله يالذاهبه إنك مشغله حالك بالك وأعيالك وزوجك << بدأ يمون
ما لك بوجع الراس والبهذله كل صبح عشان بنهاية الشهر تاخذين لك طفسه لا تسمن ولا تغني من جوع !
ما ورى ما خدمتي للدوله كفيتي ووفيتي .. كبري الوساده وريحي نفسك وأستانسي بقيه حياتك
ولا تنامين ألا إذا جاك النوم ولا تقومين ألا إذا شبعتي .. كبري الوساده بس يا حجيه وأبعدي عن الضغط والسكر !
بس قضيت تبين شيء يالله مع السلامه
إذا تبين سواق تراه والم وموجه هالسياره كمان

حياك الله ..

[الذاهـبـة]

على الرغم من أن ماكانت تسمى(رئاسة تعليم البنات) تمتلك ميراثا ضخما من الخبرة بالنقل..تجسدّت على شكل أسطولها الأصفر العظيم..الذي يدار بطريقة متقدمة وديناميكية إلا أن حظ العاملات منه هو فقط شيء من الذكريات حينما كنّ طالبات..
لا أدري لماذا لا تفكر وزارة التربية والتعليم بتقديم الخدمة للعاملات على شكل باصات صغيرة فخمة (فئة 24 راكبة) تكون مكيفة ..ويتم تحصيل رسوم متناسبة معها ...
أعتقد ان الامر سيحل الكثير من الاشكالات أقلها تقليل الزحام في ساعات الذروة..

تحصيل رسوم .. أو خصم من الراتب ..

هذا حل جيد ..

و حبذا لكل المؤسسات و الادارات النسائية ..

مو بس المدارس و المدرسات ..

[الذاهـبـة]

iهلا وغلا يالذاهبه

محد تلطح مثلي مع هالسواقين درست خارج بريده وأغلب مشاويري ليموزينات

وانواع وأشكال الله لا يوريها مسلم خخخخخخخخخخخخخخخخخخخ

الهندى اللى ريحته خياس وسيارته تقطر زيت وبعد حاط أغنيه هنديه

السودانى اللى يأخذ المشوار وين أذنك ياجحاا قال هنيا ولف ام الطريق

المصري اللى يلزق عشان يوصلك الف مشوار وبعد سرعة الف حصان عشان يلحق

السعودين وهم أشكال

ياتركبين مع شايب مخرف .......ماغير يذب بالحكومه وتشكين انه دبوس خخخخخخخ

او واحد حاط ال أف أم وهيمان ابو الشباب وكل مره مضيع اللفه

واللى يرز عمره تقول الوليد بن طلال

واللى يسوى تحقيق تقول داخله قسم شرطه مو لموزين خخخخخخخخخخ

والاشكال كثير

بس الحمد الله افتكيت من هالدراسه وهمهاااا ووأنا وبكل شرف اشجع سواقة المرأه خخخخخخ

يسلمو على الموضوع ذهبوبه

اهلا و سهلا .. حياك الله يا ضحاوي الغالية

الصراحة .. توصيفك بليغ جداً ..

والله ماكذبتي ..

السوداني لو تقطعينه ما يوقف عند اشارة ..

يلفلف .. يلفلف .. عادي يجيك دوار البحر .. بس اهم شي ما يوقف عند اشارة

والله غريبين .. !!


نورتي الموضوع .. :)

[الذاهـبـة]

هلا بالذاهبه
رائعة في طرحك
موضوعك اول ماقريته ماقدرت ارد عليك من البداية
تدرين كل مره ادخل الموضوع واقراْ واطلع احاول اكتب اتذكر صديقتي اللي راحت ضحية نقل معلمات
الله يرحمها كان عمرها 23 تعينت في قريه قريبه من الرياض وكانت تقول لي تعالي معنا قلت والله لو كيلو خارج الرياض ماطلع صحيح اني انسانه مؤمنه بالقضاء والقدر ولكن مخاطر النقل كثيرة
والوزارة لا تعمل لحل المشكلة الاهمال يزيد والاستهتار في الارواح مستمر
ولكن الوضع يالذاهبه اذا وصل لحصاد الارواح هذا امرا لايحتمل كلمتين في الجرايد وانتهى الموضوع
حتى هالضحايا اكثرهم على نظام البنود يعني موت وخراب ديار .

تحياتي وتقديري

حياك الله عزيزتي شمس الرياض ..

ورحم الله صديقتك شهيدة الواجب ..

و إن شاء الله أنها في جنة الفردوس الأعلى مع الشهداء و الصديقين ..

اللهم آمين ..

في كل دولة .. للرأي العام شأن خاص و وقع كبير في تسيير السياسة و الأمور العليا ..

و مهما كان ينظر له بعين اعتبار .. لا تنكر ولا تحجب

عندنا ..

إذا وقعت حادثة مؤلمة .. تحركت أقلام كتابنا .. و كتبوا المقسوم

و نشروا و تذمروا ..

و ما أن تجف أقلامهم إلا و همهم في طي النسيان ..

يعني أكتبوا وسعوا صدوركم .. بس هاه .. لا أذن صاغية ..

متفقين ؟!

لعل الأمر خيرة .. ولعل لهم سياستهم الخاصة في هذا .. !!

شرفتينا يا غالية ..

[الذاهـبـة]

سرد راائع
لمأساة يعااني منها الكثير .!!
والله اني استغرب من هالشيبان وسرعاتهم الجنونيه
يلف وهو مسرعه ويخلي الي بالباص خلطه .

عيون الصقر والتعليقات
الباسمه >> تذكرت موضوع لي قديم هههه

تحيتي للجميع


اهلا و سهلا جنان الكريمة

أعتقد انه لابد من اعادة النظر في غذاء الشياب ..

لانه قطعياً له سبب في تصرفاتهم و سلوكياتهم و سرعتهم الجنونية ..

حياك الله يا غالية ..

[الذاهـبـة]

ع(ز)مة على ع(ز)مة يا ست ..

أستازة ورئيسة قسم .

========

ما أدري , بس أعجبتني بل أثارتني طريقة طرح الموضوع , فالموضوع مستهلك لكن طريقة طرحه رائعة وجعلته كأنه جديد .

طبعاً مهيب منحلـّة المشكلة , بس أهم شيء الوناسة وحب الوطن :)


وتقبلي تحياتي 00
المتزن

اهلاً بك استاذ المتزن ..

استازة ايه و هباب ايه ..

آل سبع صنايع و البخت ضايع ..

اللهم لا شماته ..

حياك الله استاذي .. و ابشرك ماهنا أغلى من الوطن عندنا ..

و مبسوطين ع الآخر .. خصوصاً بعدما جربنا شرايح السمبوسة حقت زوجة سواق النقل ..

كلهم بركه الله يجزاهم خير

:)

[الذاهـبـة]

وااااو

تصدقين توي احس بمعاناتكم
والله يكسرن الخاطر هالحريّم

مالكم الا كعابي لمين يفرجها ربك
عاد اذكر اول إذا جت حرمة تقطع الشارع يوقفون كل السيارات لمين تعبر بسلام
اما الحين اللي بايعتن عمره تقطع الشارع
الظاهر الحريم يبي يسون مثل اللي بفلام كرتون تطلع العصاقيل والكعب العالي عشان يوقفن السيارات:)


يسلمو استاذتي الذاهبة
موضوع شيق وهادف

اهلا و سهلا The free Man

تصق نفسي بسيارة دودج تشارجر بيضاء ..

بس اغير البواجي حقتها ..

ياسلام ..

الصراحة أدوخ على خشمها .. ياماشاء الله ..

أحس انها رولز رويس ..


حياك استاذ فري مان .. و شكراً للزيارة ..

[الذاهـبـة]

سواقنا المصري قبل اسبوع اعتذر قال دورو غيري
والله اننا بلشنا ندور
ولقينا واحد ياحليله سعودي لاركبنا لف المرايه اللي قدام وجهه عشان مايناظر اللي ورى من الزهد والحيى ماشاء الله عليه هههههه
ليت كل السواقين مثله الله يستر عليه

ماشاء الله ..

كويس لقيتوا نقل زين ..

الله يسمّت عليكم

* ترى ذي دعوة جدي بس لا تساليني عن معناها .. *

مشكورة يا قمر للحضور .. :)

[الذاهـبـة]

ابشركم يابنات قصدي يابلات
فيه سائق سعودي معه طائره اذا جيتوا فوق مدرستكم ينزلكم ببرشوت
للمناطق اللي مالها طرق او بعيده اسمة ابو رويشد لنقل لابلات
المنحوسات في العيين

الله يبشرك بالخير ..

عطنا إيميله .. و صورة للطيارة و البراشيت ..

:)

حياك الله فيصل ..




و شكراً جزيلاً لجميع الأخوات الفاضلات و الاخوة الكرام

لإثراء الموضوع ..

تحية و تقدير للجميع ..

[محب الحقيقة]

الاخت الذاهبة مبارك عليكي الشهر

كتابة جيدة تشكرين عليها وقد رشحتك كافضل كاتبة لكن معليش تحملي تعقيبي هذا ..

إذا كانت لكي معاناة في العمل التربوي .. فبنات المملكة قاطبة ممن إمتهن سلك التعليم لديهن نفس المعاناة .. وكل يبي مدرسته جنب بيته مع الاسف .. ونسي الجميع ان الطبيعة الجغرافية والتركيبة السكانية لشعب المملكة.. يا ناس حرام عليكم أنتن في رباط ام ان تقبلن العمل في أي منطقة أو بقعة من الوطن الحبيب .. أو اتركهن لمن يريده ويسعى له ؟؟

[خالد العبدالله]

شي رائع وشيق ..هذا السرد..

لكن ماشدني هذه المعاناه التي تتكبدها المدرسات...

واذكر كنا نطلع الى القرى والهجر في رحلات عمل لكن اكثر مانشوف المدرسات وكانو يعطونا الأمان اذا شفناهم .. بوسط البر...

المهم حصل لنا موقف ان أحد سيارات نقل مدرسات كانت متعطله وقفنا من باب الفزعه فقط !!..لاتفهمين غلط والمكان في صحراء لا ولد ولا تلد...يعني حنا نخاف اذا وقفنا ..

المهم لقينا السياره مفوره عاد وشلون تفهمين مفوره ..يعني مرتفعه حرارة السياره .. اعتقد كذا فهمتي..

ولا فيه أمل تزين السياره ...طبعا بعد المحاوله..

المهم أحد المدرسات قالت فزعه شباب ودونا وشكله خويك العصلا .. وبعد المشاورات مع الشباب قلنا على بركة الله نوديهم..رغم تعطيل وتأخير مهمة عمل التابعه لنا..كان عدد المدرسات خمس واللي معي ثلاثه ومعنا جيب شروكي يعني جيب صغيرومليان اجهزه اكترونيه ..المهم تنازل الشباب وقالو حنا نبي نجلس وانت ياخالد ودهم وتعال ولا بعد ابفوت الفرصه ههه ....

المهم ركبت العصلا قدام والباقي في الخلف.. ومشينا على بركة الله واصبحة مهمتي من مشرف الى نقل خاص مدرسات..واصبح الحديث مكشوف بيني وبينهم والمواقف التي حصلت لهم كثيره مثل هذه المواقف وفي النهايه بديت اوزعهم على مدارسهم...وفي الأخير نزلت العصلا وقالت جزاك الله خير وياليت نشوفك كل يوم لاسمح الله اذا تعطلت السياره تكون موجود.. تستخف دمه ..عاد قلتله تبون ارجعكم قالت شكله كذا ..طيب واللي معي وشو اسوي فيهم وخاصه المهندس المصري وش يبي يفكن من السانه ..قالت خل ابو صالح يرجعهم...(سواق النقل)

المهم رجعت الى الشباب ولقيتهم فلينه مع ابو صالح قهوه وشاهي وسواليف..يالله ركبتهم في السياره..

رجعت لبريده ورجعت الى ذاك المكان والذاكره مازالت تتذكر الموقف وخاصه (العصلا)...

دمتي بالف خير ..الذاهبه..

والله يكفي المدرسات شر طوارق الطريق...
وفعلن عشة معناة المدرسات وكان الله بعونهن..