وراه الرجال يخافون من حريمهم !!!

[عاشق ديرتي بريده]

استغرب من اللي يخافون من حريمهم
ليش بعض اواكثر الرجال يخافون من حريمهم !!!
اعرف واحد اذا دق جواله وهو قاعد معنا بالاستراحه يتغير وجهه ويصير حمر
ويبعد ويكلم زوجته واذا رجع اخذ مفاتيحه وقال مع السلامه
ندري ان المتصل زوجته اذا تغير وجهه
انا ماادري ليش يخافون من الحريم
اللي يشوفهم يقول ان العصمه بيدها (الطلاق)
وش الهيبه اللي ببعض الحريم اللي تخلي الرجال يصيرون جبناااء !!!

اعرف واحد لو يعطيك كف كان ينشطب وجهك من قوته بس اذا دقت زوجته صار انسان ثاني الحين اذا حمقنا عليه نقوله ترا نعلم زوجتك لاننا ماحنا قده بالهوشات !!

وفيه ناس ودها تتزوج حرمه ثانيه بس يخاف من زوجته !!


صحيح ياجماعة الخير ليش الزوجه تخوف !!!

[الخيّال]

ههههههههههه والله مادري الصراحه ليه هذا اللي اقدر اقوله

وشكرا

[عاشق ديرتي بريده]

ههههههههههه والله مادري عنهم الصراحه (اللي يخاف من مرته يجي ويقول لنا ليه)

وشكرا


المشكله ياعيال حارتنا مايعلمون وكلا يقول مااخاف !!

[العصامي]

من منّــا لايخاف من زوجته ؟؟؟
في زمن إنقلاب المفاهيم أصبح الرجلُ يخاف من زوجته 00
والمعلمُ يخافُ من تلميذه 00
والمواطنُ يخافُ من الوافد 00

[عاشق ديرتي بريده]

من منّــا لايخاف من زوجته ؟؟؟
في زمن إنقلاب المفاهيم أصبح الرجلُ يخاف من زوجته 00
والمعلمُ يخافُ من تلميذه 00
والمواطنُ يخافُ من الوافد 00

طيب ليش الخوف يالعصامي !! ودي ادري

[The Free Man]

:ash:
لأن الحريم يخوفن رجالهن :36_1_12[1

[ابوخالد382]

أخي عاشق ,الأسباب كثيرة منها:أن تكون الزوجة أغنى من الرجل وبالتالي لها أفضال عليه وهي إستغلت الوضع لصالحها ,أو تكون قد أقرضته مبالغ كبيرة أو إشترت سيارة له وساهمت في بناء البيت ,,,كذلك بعض الأزواج سيئي الخلق يكون إما إبتلاه الله بالمخدرات وقد ضبطته متلبسا وبالتالي يرضخ لها خوفا من أن تفضحه,,,كذلك ربما تكون ضبطته مع إمرأة أخرى ومن ثم يتعهد لها بالتوبة وتصفح له ويضل الرجل خائفا من زوجته درءا للفضيحة ,,,كذلك بعض الرجال يكون لديه ضعف في شخصيته جراء تربيته الناقصة مما ولد لديه شخصية ضعيفة ومهزوزة تستغلها المرأة لصالحها.....الأسباب عديدة ياعاشق وصدقني الرجل هو من يتسبب بجعل المرأة تركبه...ودمت بخير.

[عاشق ديرتي بريده]

:ash:
لأن الحريم يخوفن رجالهن :36_1_12[1

عزالله انك جبتها !!
بس وشلون يخوفنهم !!

[راشد الصليحان]

اخي عاشق
الرجل والمرأة عبارة عن فارس ومهرة ...!
بعض الفرسان تحتقره المهرة !!
وبعضهم كل شوي يحاول الركب فيركب ويسقط !!
وآخر يركض بجانبها المهرة على امل فرصة ..!
وآخر يعرف كيف يعسفها فتذعن لها طائعة !!

شوف من اين انت ..؟؟

[عاشق ديرتي بريده]

أخي عاشق ,الأسباب كثيرة منها:أن تكون الزوجة أغنى من الرجل وبالتالي لها أفضال عليه وهي إستغلت الوضع لصالحها ,أو تكون قد أقرضته مبالغ كبيرة أو إشترت سيارة له وساهمت في بناء البيت ,,,كذلك بعض الأزواج سيئي الخلق يكون إما إبتلاه الله بالمخدرات وقد ضبطته متلبسا وبالتالي يرضخ لها خوفا من أن تفضحه,,,كذلك ربما تكون ضبطته مع إمرأة أخرى ومن ثم يتعهد لها بالتوبة وتصفح له ويضل الرجل خائفا من زوجته درءا للفضيحة ,,,كذلك بعض الرجال يكون لديه ضعف في شخصيته جراء تربيته الناقصة مما ولد لديه شخصية ضعيفة ومهزوزة تستغلها المرأة لصالحها.....الأسباب عديدة ياعاشق وصدقني الرجل هو من يتسبب بجعل المرأة تركبه...ودمت بخير.

كلامك يابو خالد والله منطقي
بس قسم بالله اعرف ناس محترمين قوووه ولاهم بحال اخذ قروش من حريمهم واخلاقهم فوق ماتتصور بس سبحان الله بهم طبع الخوف من الوليه !!

[عاشق ديرتي بريده]

اخي عاشق
الرجل والمرأة عبارة عن فارس ومهرة ...!
بعض الفرسان تحتقره المهرة !!
وبعضهم كل شوي يحاول الركب فيركب ويسقط !!
وآخر يركض بجانبها المهرة على امل فرصة ..!
وآخر يعرف كيف يعسفها فتذعن لها طائعة !!

شوف من اين انت ..؟؟

والله ياقلهم ياراشد اللي قدر يعسفها !!
بعضهن عسفت زوجها واهله معها !
الحين كل الحريم صارن خيالات !!!

[ابوخالد382]

كلامك يابو خالد والله منطقي
بس قسم بالله اعرف ناس محترمين قوووه ولاهم بحال اخذ قروش من حريمهم واخلاقهم فوق ماتتصور بس سبحان الله بهم طبع الخوف من الوليه !!

عاشق ترى البيوت أسرار,,,,وياماتحت السواهي دواهي...أقول ربك ستار على عبيده.

[عاشق ديرتي بريده]

عاشق ترى البيوت أسرار,,,,وياماتحت السواهي دواهي...أقول ربك ستار على عبيده.


سبحانه
بس يابوخالد مهما يكون ماتوصل الخوف منها

[ابوخالد382]

سبحانه
بس يابوخالد مهما يكون ماتوصل الخوف منها

تخيل ياعاشق,زوجتك ضابطتك مع وحده,,أو كافشك وأنت تحشش أو معك حبوب أوخمر,,أو معه كمبيله بثلاث مئة ألف ريال....ماتصير طلي تجرك وين ماتريد وتنافض منها,,خصوصا إذا سمعتك عند الناس حلوه وصورتك عند الأسرة كبيرة...

[عاشق ديرتي بريده]

تخيل ياعاشق,زوجتك ضابطتك مع وحده,,أو كافشك وأنت تحشش أو معك حبوب أوخمر,,أو معه كمبيله بثلاث مئة ألف ريال....ماتصير طلي تجرك وين ماتريد وتنافض منها,,خصوصا إذا سمعتك عند الناس حلوه وصورتك عند الأسرة كبيرة...


ذولا شواذ يابوخالد
انت تدري انه فيه ملتزمين يعني من البيت للمسجد يرجد خوف من زوجته !!!

[شاطئ الراحة]

وراء كل رجلاً عظيم إمراءة عظيمة ..

مهما وصل الرجل لدرجة الطغيان إلا ان المراة تعرف كيف تتعامل معه .. بعكس الآخرون ..

تحياتي لك

[تلميذة الحياة]

ههههههههههههههه

غريبه والله ..

انا احس انه انعكست المفاهيم الحين !!

يعني قبل بزمن الاولين معروفين الرجال بقساوتهم على حريمهم وعيالهم !!

ومايمشون مع عيالهم وحريمهم الا بالضرب ..:b4:

واتوقع انعكست هالنظره على عيالهم وصار العكس ..:e7:


.

[عاشق ديرتي بريده]

وراء كل رجلاً عظيم إمراءة عظيمة ..

مهما وصل الرجل لدرجة الطغيان إلا ان المراة تعرف كيف تتعامل معه .. بعكس الآخرون ..

تحياتي لك

هلا شاطي
بالوقت الحالي صاير وراء كل امراءه عظيمه رجل !!!

[عاشق ديرتي بريده]

ههههههههههههههه

غريبه والله ..

انا احس انه انعكست المفاهيم الحين !!

يعني قبل بزمن الاولين معروفين الرجال بقساوتهم على حريمهم وعيالهم !!

ومايمشون مع عيالهم وحريمهم الا بالضرب ..:b4:

واتوقع انعكست هالنظره على عيالهم وصار العكس ..:e7:


.

يحق لك تضحكين
زوجك يبي يبدا يخاف منك

[ابوخالد382]

ذولا شواذ يابوخالد
انت تدري انه فيه ملتزمين يعني من البيت للمسجد يرجد خوف من زوجته !!!

شكلك ياعاشق ,,,أنت تغيبى علينا,,,,,ياأخي وهناك من لايدخن ولايتعاطى المخدرات والخمور,,ومع ذلك يكون إبتلاه الله بملاحقة النساء والبزران ,,ربما تم ضبطه...أو يكون تركيبته الشخصية فيها خلل....الرجل الحقيقي لايخاف من زوجته إلا إذا كان هناك شيء قد عرفته الزوجة يقلل من إحترامها له وإحتقاره وبالتالي يكون أسير لديها....صحصح ياعاشق.

[عاشق ديرتي بريده]

شكلك ياعاشق ,,,أنت تغيبى علينا,,,,,ياأخي وهناك من لايدخن ولايتعاطى المخدرات والخمور,,ومع ذلك يكون إبتلاه الله بملاحقة النساء والبزران ,,ربما تم ضبطه...أو يكون تركيبته الشخصية فيها خلل....الرجل الحقيقي لايخاف من زوجته إلا إذا كان هناك شيء قد عرفته الزوجة يقلل من إحترامها له وإحتقاره وبالتالي يكون أسير لديها....صحصح ياعاشق.


ابو خالد وربي فيه رجال حقيقين على قولتك يخافووووووون خوف من حريمهم
الحين الشيخ القاضي اللي كلا يخاف منه ويحترمه وله هيبته
ينتفض عند زوجته !!!
لاتقول وش يدريك اعرف واحد اخوه قاضي بالمحكمه ويقولي عنه !!

[عاشق ديرتي بريده]

ابوخالد الحين انت مااقتنعت ان ان اكثر الرجال يخافون من حريمهم !!!
ولا بعد رجال حقيقين !!

[فتاة المستقبل]

ونااااااااااسه , يخاف من ؟؟
يعني على كيفي , لاماصدق ياعاشق بريده ..
علمون ياحريم وشلون ؟؟ ترى والله مادبر شئ

[عاشق ديرتي بريده]

ونااااااااااسه , يخاف من ؟؟
يعني على كيفي , لاماصدق ياعاشق بريده ..
علمون ياحريم وشلون ؟؟ ترى والله مادبر شئ


ابشري يافاطسه
اكثر الرجال يخافون الحين منكن !!

[فتاة المستقبل]

ابشري يافاطسه
اكثر الرجال يخافون الحين منكن !!
ايه بس يخافون من وشو ؟؟؟
علمون ياكافي , ودي أتعلم من اللحين ؟
علشان لاشب تسبدي دليت أخوفه , غدينا ندور لنا حل ثاني بدل الدموع

[عاشق ديرتي بريده]

ايه بس يخافون من وشو ؟؟؟
علمون ياكافي , ودي أتعلم من اللحين ؟
علشان لاشب تسبدي دليت أخوفه , غدينا ندور لنا حل ثاني بدل الدموع

هذا اللي قاهرني يافاطسه
يخافون بس ماادري على ايش يخافون بس المهم انهم يخافون !

[ملكة الشوق]

سلاااااااااااااااام انت تقول. . اذا دق جواله وهو قاعد معنا بالاستراحه يتغير وجهه ويصير حمر..

طيب يمكن يستحي يكلم عندكم .. او يستحي منها..لا لا ماأضن زوجته يستحي منها ..
بس الله ههههههههه ياليت كل شي يمشي على شورنا حنا ........

[ابوخالد382]

ونااااااااااسه , يخاف من ؟؟
يعني على كيفي , لاماصدق ياعاشق بريده ..
علمون ياحريم وشلون ؟؟ ترى والله مادبر شئ

إسمعي يافاطسه ضحك,لايوهقك عاشق ,وبعدين ماتدرين إلا الطراقات نازلة عليك...هذولا اللي يخافون عندهم مرض نفسي أو ممسوك عليهم زلة...غير هالكلام مافيش .... إنتبهي .....

[shahd2007]

اووووووووووم الفله حلو بديتو تخافون من الحريم خلاص ابتزوج :36_1_18[1

[ولــد نعمـة]

أنا اعتقد ان الرجال يبون الستر عندما يخافون من زوجاتهم لأن بصراحه المرة أكلف ماعليها ترفع سماعة التليفون ويالله خذ من الهمق اللي والله ماتخلص الا الصبح ورجلي سوى ورجلي حط وخذ من السواليف اللي مالمها داعي ....... يعني بإختصار أنواع الفضايح ..............

تحيــــــــــــــــــــــــياتي خيـــــــَو<<<< شكلك إلى الحين كسلان على المواضيع >>>>>

[ابوخالد382]

هلا ,,,,وينك ياعاشق ...وين رحت؟؟؟؟؟ شكل المعزبه قفلت على الحاسب وقالت :يكفي ...يعني أنت ذروق ياعاشق...هع هع:36_2_4[1]

[المتزن]

اللي يخاف من زوجته .. مهوب رجل ولا يستحق أن يقال له رجل .

والله لا يبلانا .

أحترمها , نعم ..
أقدرها , نعم ..
أستشيرها , نعم ..
أعتز بها وبآرائها , نعم ..
وكل هذا واجب عليّ تحتمه عليّ أخلاقي وتربيتي .

لكن أخاف منها , فلا وألف لا , لأني سأحتقر وأستصغر نفسي قبل أن تحتقرني وتستصغرني هي والآخرون .


وتقبل تحياتي 00
المتزن

[شاطئ الراحة]

وت ذا مينق أوف ( مادبر ) ..

[ملكة الشوق]

اف قويه ذي(( يا المتزن))

,,وينكم يشباااااااااااااااااااب تشوفو الكلام ((اللي يخاف من زوجته .. مهوب رجل ولا يستحق أن يقال له رجل...
ههههههههههههه حلو ذي ......... ياليت تخاااااااافون .......
ما اتوقع رجل يخاااااااااااااااااااااف ...

[ابو ريناد]

يعيش الكثير منا حياة أسريه تختلف من شخص للأخر .

درجة التفاهم بين الزوجين تختلف ، الزوج مُسيطر على الوضع
وفي مكان آخر الزوجة هي المُسيطرة .

ليس معني السيطرة انه خوف أحدهما من الأخر بقدر ما تكون غالباً
احترام وتقدير وتضحية لتواصل السفينة السير الى بر الأمان

هل هي مسألة خوف او هو الاحترام المتبادل ؟

هل معني أنه يحترم زوجته ويحاول إرضائها تعتبره يخاف منها ؟

هل معني ان زوجته تقدره وتحاول أرضائه أنها هي تخاف منه ؟

لماذا يخرج علينا أحيانا من يقول ان فلان يخاف من زوجته لمجرد التزامه معها والعكس؟

لماذا نجد نساء يلومن بعضهن البعض لمجرد تطبيق بعض المبادئ؟
أخي عاشق دمت بود

[عبدالله الحلوه]

عاشق ديرتي

لا اعتقد بأن الرجال يخاف من المرأه حتى لو كان هناك مايخاف منه .. فالرجل بطبيعته لايقبل الخضوع حتى لو اضطر إلى التضحيه بأشياء كثيرة

لكن ربما يكون ماتفسره بالخوف تطبيق خاطئ لبعض المفاهيم المعاصره فنحن ربما نعيش فترة تحول اجتماعي كبير مما جعلنا نعيش بعض المصطلحات كالرومانسيه والمشاركة بالرآي وأشياء اخرى كثيرة

البعض لم يفهم تلك المصطلحات بالشكل الصحيح وبالتالي قام بتطبيقها بشكل خاطئ


تحياتي ,,,

[همر,, حمر]

حبيبي شاطئ الراحة
المفروض السؤال يكون
وت أز ذا ميننق أف
وبالنسبة للموضوع الشيق هذا
ممكن مو خوف من أم العيال مثل ما انت تتصورة
بس مكانتها عند زوجها مهما كانت شخصيتة تخضعه لها
حلوة اللبن مثل ما يقولون وتمون
تحياتي

[اميرة الورد]

انا اتوقع ان الرجل اذا خاف من زوجته معنى ذلك انها قويه وهو بالدبره
وبعد غلط ان الزوجه ماتكون قويه امام زوجها بس مودرجت انه يخاف لا بس يكون عنده وفاء لها يعني مايسوي اشياء من وراها وهي ماتدري ياعمري لازم تكون ذكيه وقويه بس ما يخاف يهاب بس...

[هامة حاسوبية]

عاشق

ربما المسألة ليست خوفا بقدر ماهو احترام متبادل وربما شوق >> وحده مأمله خير :)



تحيتي

هامة حاسوبية

[مخي وحده لا يكفي]

اسمحلي يا أخ عاشق
فيه فرق بين الخوف وبين احترام المرأه وتقديرها والالمام بحقوقها ومعرفة واجباتك وأحترام وقتك وبيتك
بغض النظر عن اي ظروف او اسباب سواء مادية او ماسكة زلات
ومع هذا فيه نساء شريات"الشركسيات" يكدرن صفو الحياة وما يعجبهن العجب مشكلجيات مع اهلهن ومعه ومع اهله ومع الشغالات وتتوقف سلطتهن حسب رخاوة الرجال اما يدعسن على رأسة اذا طاطى لهن ويركبن على ظهره ويدلدن رجلينهن
واذا هو قد المسئولية ووسيع صدر عدلهن او اختار ابغض الحلال وكل واحد رجع لحياتة الاولانيه

[الجوري ..!]

هه هاللي يخافون واحد من مليون .. طيب هو ليش اساسا يروح الاستراحه !! والله مايشتت العائله الا هالاستراحات .. اموووت واعرف وش يسوون ؟؟؟
اعرف ناس يروحون من المغرب لين الساعه 4 الفجر .. مع العلم انه عنده عائله ودوام و و و و !!
ويبدي هالاستراحه على اولوياته .. طيب ليش هو يخاف من مرته !! لانه بكل بساطه حااااس ان الخطا راكبه من ساسه ل راسه << زين انه حاس لا بعضهم شين وقوي عين !
طيب خلنا من الرجال .. ليش فيه حريم يخافون من رجالهم مع العلم انهن ماقصرن مع رجالهن بأي شي ؟؟!!!

تقبــل مروري ..

[قهورررري]

هلا عاشق ..
أنا بعطيك الكلام اللي أنا أشوفها بصراحه وبحثت عن هذا الشيء من المتزوجين كثير .. حتى وجهي مثل ما يقولون (( مغسول بمرقه )) لين طلعت بنتيجه معروفه بسبب هذا الخوف .. سوى كان من أصدقاء أو قرايب مني ..
أسمعها بالمتختصر المفيد !
إذا الرجل بحياته العزوبيه بالماضي كان قوي الشخصيه والكل يهابه وبعد الزواج تغير الحال ..
يعني دقق بالسطر اللي فوق .. كان قوي قبل الزواج .. وبعد الزواج ذهبت هذه الشخصيه وصار ضعيف
أعتبر هذا الشخص يموت موت في الجنس .. لأن الرجل الجنسي مستحيل أنه يرفض أو يرد بإشياء ترفضها الزوجه بتاتآ .. الجنس خلاه يخضع لهذه الزوجه حتى لو كان على حساب رجولته .. يخاف يطواعه قلبه ويعصي لأوامره ويندم وينحرم من هذا الجنس
صدقني هذا هو الحل الأوحد لهذا الخوف ..
أما إذا كان ضعيف الشخصيه من أيام العزوبيه وكمان بعد الزواج فهذا عاد من حينه كمخه ..

شكرآ

[~ مي ~]

انتم تشوفونه خوف وهو يشوفه شئ ثاني
هذا تفكيركم عن الرجال اللي يهتم بالمرأة
ويأخذ برأيها ويساندها في كل شئ .....
الخوف بمعناه المتعارف ...
انه يرتعد ويرتجف ويتصبب عرقا والكلمات تأتي متلعثمة
اذا كان امام زوجته وبدون سبب يذكر لخوفه ....
اذا كان هذا ماتقصده فأعتقد انه لايوجد مثل هذه النمونة
ربما للمبالغة في الحديث تترك أثرررر .....
اريد تعبير او معنى حقيقي للخووووف (بدون سبب)؟؟؟؟؟؟
اما اذا كان بسبب فيستاهل حقه وماجاه ......

[عتبيه في القصيم]

بسهوله جدا
تقدر اي وحده تسطير على الرجال
لدرجة توصل عن بعض الرجال
مانقدر نقول انه يخاف منها لكن
تقدر تتحكم فيه
والله يا بنات مو صعبه ابدا
واسهل مما تتخيلون
واي رجال تشفون زوجته
مسيطره عليه
هذه انسانه ذكيه
وعرفة كيف تكسبه وتستغله
بس بعض النساء هداهم الله
يستغلون الزوج لاشياء سيئه جدا
والبعض منهم تعرف تستغله لمصلحتها
ومصلحة بيتها واولادها

صدقوني مو صعبه المسأله ولا محيره

[قـلـبي بـريدة]

السلام عليكم

هناك بعض الاسباب للحالة الي ذكرت مثل :
1 - التكافؤ بين الزوجين مثل العمل او مرحلة التعليم.
2 - ضعف الشخصية من الاصل .
3 - فارق العمر .
4 - التأخر عن الزواج من قبل الرجل وضروف اخرى مثل الطلاق .

المهم انا اشبه المرأة با امريكا
امريكا لا تأمنها وليست دول تاريخيه مثل الصين التي تحترم الصداقة حتى وان قلة المصالح.
امريكا تمشي على منهج اليوم صديقي وبكرى عدوي

المرأة وامريكا وجهان لعمله واحده اذا سيطرة على احد او حطت ايده تجد انه تذله مذله مابعده مذله حتى وان اظهر المحبة والصداقة فحين اذا المطالب سوف تزيد
يعني اذا سيطروا على شي ما يرضيهم لو عطيتهم كل شي.

ولكن قد تكون خيره للبيت لأن بعض الرجال فاشل وخاصه بإدارة البيت وتدابير المعيشة.

واتمنى لا تنتشر هذه الظاهره لأن قد عشت بمجتمع تسيطر عليه المرأة غالبا والله شفت العجب.


على كل حال

مع الوقت المرأة تبدأ تحقر وتكره نوعية هالرجال لأنه مايحس بأي مسؤولية او حتى هي ما تحس بأنوثته بالرغم ان هالمسكين بمفهومه وطريقته يتوقع انه يرضيه .





اما عن الزواج بالثانيه فالكثير يخاف من انهيار بيته الاول لأن بعض النساء تطبق القاعدة الي تقول يا (( انا يا الطلاق ))

ودايما التفكير يصب نحو الاولاد



ما اقول الا الله يعافينا ولا يبلانا

[البـــBADERـــدر B.D.Q]

ههههههههههههههههههههههههههههههههه
ياحبي لك يا عاشق انت ومواضيعك

والله ان اعيوني تطير من الي يخافون من حريمهم واستغرب وليش كل هالخوف:(
هذا والمراه الي تدور على رضا زوجه وماتبيه يزعل ووووو ...الخ
والاخير هو الي يخاف منه ههههههههههه
اذكر وواحد اذا جا يكشت للبر لازم يوجوج بمرته ومن سوق للسوق ومن مطعم للمطعم كله علشان ترضى عليه وتخليه يكشت من اخوياه :)
وواحد من العيال يدخن واذا يرروح للبيت يتبخر ويعطر السياره وحالته حاله مهوب كله احترام للمشاعره لا كله خوف منه وخوف من زعله
يعني لو كله احترام للمشاعره كان نقول على يعين وراسي بس خوووف :(
عاشق والله ماودي اضحك اخاف بيوم من الايام اصير من هالي يخافون
بس ترى ماراح يحل مشكلتي غيرك المهم تشوف لي حل :)

[فتاة المستقبل]

وت ذا مينق أوف ( مادبر ) ..
وأنت ما طاحت عينك الا على ذي
ذس از (ما أدبر)

[عاشق ديرتي بريده]

سلاااااااااااااااام انت تقول. . اذا دق جواله وهو قاعد معنا بالاستراحه يتغير وجهه ويصير حمر..

طيب يمكن يستحي يكلم عندكم .. او يستحي منها..لا لا ماأضن زوجته يستحي منها ..
بس الله ههههههههه ياليت كل شي يمشي على شورنا حنا ........

والله حمر من الخوف ياملكه
وانتي توك تدرين ان كل شي يشمي على شوركم الحين
يمكن لنا عشر سنين والا مور بيد الحريم

[عاشق ديرتي بريده]

إسمعي يافاطسه ضحك,لايوهقك عاشق ,وبعدين ماتدرين إلا الطراقات نازلة عليك...هذولا اللي يخافون عندهم مرض نفسي أو ممسوك عليهم زلة...غير هالكلام مافيش .... إنتبهي .....

ابو خالد خلها تتعلم وشلون تخوف زوجها
وبعدين يابوخالد كل الناس الحين مرضى نفسيين !

[عجوز سمنسي]

ابشرك انا اذا اعرست ماراح اخاف من زوجتي

لاني قوي ورااااااااااااقل ولا اي راااااااااااقل

ايه هين بس

اعتقد من رخامة بعض الرجال خوفهم من حريمهم

اعرف شخص زوجته اذا عزمت اهلها تطرده من البيت تقول لاتفشلني عند اهلي

قصص السيطرة والذل من قبل المرأة على الرجل اصبحت منتشرة


الله لايولي علينا حريمنا وربي مروح فيها وطي

تبون تدرون صح ؟

روحوا شوفوا المديرات في المدارس

حريم وعطيتها صلاحية وش تبي تسوي؟ تبي تدوسكم دوووووووووس

[عاشق ديرتي بريده]

اووووووووووم الفله حلو بديتو تخافون من الحريم خلاص ابتزوج :36_1_18[1

خلاص اعرسي وبعد كم شهر شوفي وشلون زوجك يرتجف اذا شافك !!
لايهمك اذا بدا يقلب عيونه عليك ايقاله قوي تراوه خرطي !!

[عاشق ديرتي بريده]

أنا اعتقد ان الرجال يبون الستر عندما يخافون من زوجاتهم لأن بصراحه المرة أكلف ماعليها ترفع سماعة التليفون ويالله خذ من الهمق اللي والله ماتخلص الا الصبح ورجلي سوى ورجلي حط وخذ من السواليف اللي مالمها داعي ....... يعني بإختصار أنواع الفضايح ..............

تحيــــــــــــــــــــــــياتي خيـــــــَو<<<< شكلك إلى الحين كسلان على المواضيع >>>>>

تمام عليك ولد نعمه
يبون الستر ويقولن خلنا نرضيها ونفتك
هذا هو الخوف بعينه وعلمه

والله بدا يروح الكسل شوي

[عاشق ديرتي بريده]

هلا ,,,,وينك ياعاشق ...وين رحت؟؟؟؟؟ شكل المعزبه قفلت على الحاسب وقالت :يكفي ...يعني أنت ذروق ياعاشق...هع هع:36_2_4[1]


هههههههه
لا بس صار عندي شغل اهم من المنتدى :4[1]:

[عاشق ديرتي بريده]

اللي يخاف من زوجته .. مهوب رجل ولا يستحق أن يقال له رجل .

والله لا يبلانا .

أحترمها , نعم ..
أقدرها , نعم ..
أستشيرها , نعم ..
أعتز بها وبآرائها , نعم ..
وكل هذا واجب عليّ تحتمه عليّ أخلاقي وتربيتي .

لكن أخاف منها , فلا وألف لا , لأني سأحتقر وأستصغر نفسي قبل أن تحتقرني وتستصغرني هي والآخرون .


وتقبل تحياتي 00
المتزن

المتزن والله كلامك فعلا كلام متزن بس المشكله الاحترام وصل مرحلة الخووووووف !

[عاشق ديرتي بريده]

اف قويه ذي(( يا المتزن))

,,وينكم يشباااااااااااااااااااب تشوفو الكلام ((اللي يخاف من زوجته .. مهوب رجل ولا يستحق أن يقال له رجل...
ههههههههههههه حلو ذي ......... ياليت تخاااااااافون .......
ما اتوقع رجل يخاااااااااااااااااااااف ...

هو صادق مهوووب رجل
وانتي مصدقه انه فيه رجال الحين ثلاثة ارباعهم شماغ وثوب بس
الربع الباقي رجال صحيح بس قله !
لااحد يزعل ياشباب اللي يبي يزعل يعتبر نفسه مع الربع الاخير بس هذي الحقيقه !

[عاشق ديرتي بريده]

يعيش الكثير منا حياة أسريه تختلف من شخص للأخر .

درجة التفاهم بين الزوجين تختلف ، الزوج مُسيطر على الوضع
وفي مكان آخر الزوجة هي المُسيطرة .

ليس معني السيطرة انه خوف أحدهما من الأخر بقدر ما تكون غالباً
احترام وتقدير وتضحية لتواصل السفينة السير الى بر الأمان

هل هي مسألة خوف او هو الاحترام المتبادل ؟

هل معني أنه يحترم زوجته ويحاول إرضائها تعتبره يخاف منها ؟

هل معني ان زوجته تقدره وتحاول أرضائه أنها هي تخاف منه ؟

لماذا يخرج علينا أحيانا من يقول ان فلان يخاف من زوجته لمجرد التزامه معها والعكس؟

لماذا نجد نساء يلومن بعضهن البعض لمجرد تطبيق بعض المبادئ؟
أخي عاشق دمت بود

مانقول مافيه احترام واللي يحترم زوجته كلا يحترمه
بس مهوب جاي للاستراحه يبي يقعد وينبسط واول مايقعد تدق عليه ويقول مع السلامه !

[ღ ][ وحيدة كالقمر ][ღ]

عاشق

والله مواضــــــــــيعك شكلها بتخلينا معشر النساء عفاريت قدام الرجل

أنت تبي تفسدنا قبل نعرس <<<<تبي تسطر

أجل لاجاء ماعلي إلا أطير عيوني فووووق ويروح ملح لأن خلقتي لاطيرت عيوني أهلي مايخافون مني أبد<<<إيه هين

تحيتي

[ولــد نعمـة]

عاااااااااااااااااااااااااد خلوناا واقعين بعض الحريم لاشفته ماتقول إلا سعلُوه .. يعني باختصااار تخوَف
تشكرررررررررررررررررررراااات أفندم......

[عاشق ديرتي بريده]

عاشق ديرتي

لا اعتقد بأن الرجال يخاف من المرأه حتى لو كان هناك مايخاف منه .. فالرجل بطبيعته لايقبل الخضوع حتى لو اضطر إلى التضحيه بأشياء كثيرة

لكن ربما يكون ماتفسره بالخوف تطبيق خاطئ لبعض المفاهيم المعاصره فنحن ربما نعيش فترة تحول اجتماعي كبير مما جعلنا نعيش بعض المصطلحات كالرومانسيه والمشاركة بالرآي وأشياء اخرى كثيرة

البعض لم يفهم تلك المصطلحات بالشكل الصحيح وبالتالي قام بتطبيقها بشكل خاطئ


تحياتي ,,,


هلا اخوي عبدالله كلامك هذا كلام منول على وقت ابوي وابوك
بس الحين قبلو الخضووع وقالوا مالك بوجع الراس تراها تنكد عليك اذا ماطعتها !!

[عاشق ديرتي بريده]

حبيبي شاطئ الراحة
المفروض السؤال يكون
وت أز ذا ميننق أف
وبالنسبة للموضوع الشيق هذا
ممكن مو خوف من أم العيال مثل ما انت تتصورة
بس مكانتها عند زوجها مهما كانت شخصيتة تخضعه لها
حلوة اللبن مثل ما يقولون وتمون
تحياتي


هم يقولون مهوب خوف يقولون احترام
وانا اقولهم على غيرنا هه

[عاشق ديرتي بريده]

انا اتوقع ان الرجل اذا خاف من زوجته معنى ذلك انها قويه وهو بالدبره
وبعد غلط ان الزوجه ماتكون قويه امام زوجها بس مودرجت انه يخاف لا بس يكون عنده وفاء لها يعني مايسوي اشياء من وراها وهي ماتدري ياعمري لازم تكون ذكيه وقويه بس ما يخاف يهاب بس...

هو اصلا ماخاف منها الا علشانها قويه ( توحش )

[عاشق ديرتي بريده]

عاشق

ربما المسألة ليست خوفا بقدر ماهو احترام متبادل وربما شوق >> وحده مأمله خير :)



تحيتي

هامة حاسوبية




اي احترام ياهامه تتكلمين عنه
واحد يقول والله مادوي اسافر بس العقرب اللي عندي تبي السفر !!

[اتحادي مووووت]

الرجال الي يخاف من الحرمه

مو رجاااااااااال...

[عاشق ديرتي بريده]

اسمحلي يا أخ عاشق
فيه فرق بين الخوف وبين احترام المرأه وتقديرها والالمام بحقوقها ومعرفة واجباتك وأحترام وقتك وبيتك
بغض النظر عن اي ظروف او اسباب سواء مادية او ماسكة زلات
ومع هذا فيه نساء شريات"الشركسيات" يكدرن صفو الحياة وما يعجبهن العجب مشكلجيات مع اهلهن ومعه ومع اهله ومع الشغالات وتتوقف سلطتهن حسب رخاوة الرجال اما يدعسن على رأسة اذا طاطى لهن ويركبن على ظهره ويدلدن رجلينهن
واذا هو قد المسئولية ووسيع صدر عدلهن او اختار ابغض الحلال وكل واحد رجع لحياتة الاولانيه

هلا بك اخوي
فيه احترام وحب بس الشركسيات قدرن يقلبن الاحترام سلاح لتخوف الزوج !!

[shahd2007]

خلاص اعرسي وبعد كم شهر شوفي وشلون زوجك يرتجف اذا شافك !!
لايهمك اذا بدا يقلب عيونه عليك ايقاله قوي تراوه خرطي !!

متاكد انت يعني اذا طير عيونه وبدا يقلبهن اقول خير عسى ماشر:36_1_18[1

[عاشق ديرتي بريده]

هه هاللي يخافون واحد من مليون .. طيب هو ليش اساسا يروح الاستراحه !! والله مايشتت العائله الا هالاستراحات .. اموووت واعرف وش يسوون ؟؟؟
اعرف ناس يروحون من المغرب لين الساعه 4 الفجر .. مع العلم انه عنده عائله ودوام و و و و !!
ويبدي هالاستراحه على اولوياته .. طيب ليش هو يخاف من مرته !! لانه بكل بساطه حااااس ان الخطا راكبه من ساسه ل راسه << زين انه حاس لا بعضهم شين وقوي عين !
طيب خلنا من الرجال .. ليش فيه حريم يخافون من رجالهم مع العلم انهن ماقصرن مع رجالهن بأي شي ؟؟!!!

تقبــل مروري ..


الزوجه اقل شي تخاف لانها خايفه تتطلق بس ابو شنب وشوله يخاف هو وكشرته
وبعدين وانتن اذا سمعتن الاستراحه تحسبونا جايبين بنات وقاعدين معهن
والله متبطحين بالاستراحه وكل واحد يتطنز بخويه لين يمل ويروح

[عاشق ديرتي بريده]

هلا عاشق ..
أنا بعطيك الكلام اللي أنا أشوفها بصراحه وبحثت عن هذا الشيء من المتزوجين كثير .. حتى وجهي مثل ما يقولون (( مغسول بمرقه )) لين طلعت بنتيجه معروفه بسبب هذا الخوف .. سوى كان من أصدقاء أو قرايب مني ..
أسمعها بالمتختصر المفيد !
إذا الرجل بحياته العزوبيه بالماضي كان قوي الشخصيه والكل يهابه وبعد الزواج تغير الحال ..
يعني دقق بالسطر اللي فوق .. كان قوي قبل الزواج .. وبعد الزواج ذهبت هذه الشخصيه وصار ضعيف
أعتبر هذا الشخص يموت موت في الجنس .. لأن الرجل الجنسي مستحيل أنه يرفض أو يرد بإشياء ترفضها الزوجه بتاتآ .. الجنس خلاه يخضع لهذه الزوجه حتى لو كان على حساب رجولته .. يخاف يطواعه قلبه ويعصي لأوامره ويندم وينحرم من هذا الجنس
صدقني هذا هو الحل الأوحد لهذا الخوف ..
أما إذا كان ضعيف الشخصيه من أيام العزوبيه وكمان بعد الزواج فهذا عاد من حينه كمخه ..

شكرآ

هههههههههه والله انك صادق هذا من اسباب الخوف ويمكن يكون اهم سبب

[عاشق ديرتي بريده]

انتم تشوفونه خوف وهو يشوفه شئ ثاني
هذا تفكيركم عن الرجال اللي يهتم بالمرأة
ويأخذ برأيها ويساندها في كل شئ .....
الخوف بمعناه المتعارف ...
انه يرتعد ويرتجف ويتصبب عرقا والكلمات تأتي متلعثمة
اذا كان امام زوجته وبدون سبب يذكر لخوفه ....
اذا كان هذا ماتقصده فأعتقد انه لايوجد مثل هذه النمونة
ربما للمبالغة في الحديث تترك أثرررر .....
اريد تعبير او معنى حقيقي للخووووف (بدون سبب)؟؟؟؟؟؟
اما اذا كان بسبب فيستاهل حقه وماجاه ......

طيب يامي اللي يواعد ربعه يبي يكشت معهم وبعد هو اللي يبي يكشت يعني هو اللي مصمم عليها ويوم جاء يوم الكشته سكر جواله لمدة يومين ويوم رجعنا قلنا وينك قال والله صار عندي شغل !!!!!!

[عاشق ديرتي بريده]

بسهوله جدا
تقدر اي وحده تسطير على الرجال
لدرجة توصل عن بعض الرجال
مانقدر نقول انه يخاف منها لكن
تقدر تتحكم فيه
والله يا بنات مو صعبه ابدا
واسهل مما تتخيلون
واي رجال تشفون زوجته
مسيطره عليه
هذه انسانه ذكيه
وعرفة كيف تكسبه وتستغله
بس بعض النساء هداهم الله
يستغلون الزوج لاشياء سيئه جدا
والبعض منهم تعرف تستغله لمصلحتها
ومصلحة بيتها واولادها

صدقوني مو صعبه المسأله ولا محيره


عتيبيه شكل اللي عندك خاتم فضه باصبعك
الله يعينه عليك بس ارحميه شوي ترا الشباب يضحكون عليه !!

[فتاة المستقبل]

إسمعي يافاطسه ضحك,لايوهقك عاشق ,وبعدين ماتدرين إلا الطراقات نازلة عليك...هذولا اللي يخافون عندهم مرض نفسي أو ممسوك عليهم زلة...غير هالكلام مافيش .... إنتبهي .....
أجل لاصارت الدعوى طراقات هونا مانبي نتعلم ,أخاف يصبخن على رأسي وأروح فيها
بس يقولون اللي تسيطر على زوجها وتقيوى عليه هذي ذكيه << عاد أنا مادري هن يقولن كذا .

[عاشق ديرتي بريده]

السلام عليكم

هناك بعض الاسباب للحالة الي ذكرت مثل :
1 - التكافؤ بين الزوجين مثل العمل او مرحلة التعليم.
2 - ضعف الشخصية من الاصل .
3 - فارق العمر .
4 - التأخر عن الزواج من قبل الرجل وضروف اخرى مثل الطلاق .

المهم انا اشبه المرأة با امريكا
امريكا لا تأمنها وليست دول تاريخيه مثل الصين التي تحترم الصداقة حتى وان قلة المصالح.
امريكا تمشي على منهج اليوم صديقي وبكرى عدوي

المرأة وامريكا وجهان لعمله واحده اذا سيطرة على احد او حطت ايده تجد انه تذله مذله مابعده مذله حتى وان اظهر المحبة والصداقة فحين اذا المطالب سوف تزيد
يعني اذا سيطروا على شي ما يرضيهم لو عطيتهم كل شي.

ولكن قد تكون خيره للبيت لأن بعض الرجال فاشل وخاصه بإدارة البيت وتدابير المعيشة.

واتمنى لا تنتشر هذه الظاهره لأن قد عشت بمجتمع تسيطر عليه المرأة غالبا والله شفت العجب.


على كل حال

مع الوقت المرأة تبدأ تحقر وتكره نوعية هالرجال لأنه مايحس بأي مسؤولية او حتى هي ما تحس بأنوثته بالرغم ان هالمسكين بمفهومه وطريقته يتوقع انه يرضيه .





اما عن الزواج بالثانيه فالكثير يخاف من انهيار بيته الاول لأن بعض النساء تطبق القاعدة الي تقول يا (( انا يا الطلاق ))

ودايما التفكير يصب نحو الاولاد



ما اقول الا الله يعافينا ولا يبلانا

يعني نهاية كلامك انه يخاف منها !!هو وشنبه

[عاشق ديرتي بريده]

ههههههههههههههههههههههههههههههههه
ياحبي لك يا عاشق انت ومواضيعك

والله ان اعيوني تطير من الي يخافون من حريمهم واستغرب وليش كل هالخوف:(
هذا والمراه الي تدور على رضا زوجه وماتبيه يزعل ووووو ...الخ
والاخير هو الي يخاف منه ههههههههههه
اذكر وواحد اذا جا يكشت للبر لازم يوجوج بمرته ومن سوق للسوق ومن مطعم للمطعم كله علشان ترضى عليه وتخليه يكشت من اخوياه :)
وواحد من العيال يدخن واذا يرروح للبيت يتبخر ويعطر السياره وحالته حاله مهوب كله احترام للمشاعره لا كله خوف منه وخوف من زعله
يعني لو كله احترام للمشاعره كان نقول على يعين وراسي بس خوووف :(
عاشق والله ماودي اضحك اخاف بيوم من الايام اصير من هالي يخافون
بس ترى ماراح يحل مشكلتي غيرك المهم تشوف لي حل :)


المشكله يالبدر يخافون والعصمه بيدهم
اجل لو الطلاق بيد الزوجه وش يبي يسون ذولا !!
واذا جيت تتزوج خلك حولي ادبرك

[عاشق ديرتي بريده]

وه تعبت ابروح اصلي
اتحادي لاتتكلم عن الخوف من الزوجه لين تتزوج !!!!!!!!
اللي ماتزوج يقول والله يانا ابربي زوجتي وبعد شهرين تصير ربته !!!

[عاشق ديرتي بريده]

ابشرك انا اذا اعرست ماراح اخاف من زوجتي

لاني قوي ورااااااااااااقل ولا اي راااااااااااقل

ايه هين بس

اعتقد من رخامة بعض الرجال خوفهم من حريمهم

اعرف شخص زوجته اذا عزمت اهلها تطرده من البيت تقول لاتفشلني عند اهلي

قصص السيطرة والذل من قبل المرأة على الرجل اصبحت منتشرة


الله لايولي علينا حريمنا وربي مروح فيها وطي

تبون تدرون صح ؟

روحوا شوفوا المديرات في المدارس

حريم وعطيتها صلاحية وش تبي تسوي؟ تبي تدوسكم دوووووووووس


اهلا يارااااااااقل
بحل ياصديقي اجل اذا الدعوى فيها طرد من البيت ويفشل !!!
والله السيطره كاثره اليومين

[عاشق ديرتي بريده]

عاشق

والله مواضــــــــــيعك شكلها بتخلينا معشر النساء عفاريت قدام الرجل

أنت تبي تفسدنا قبل نعرس <<<<تبي تسطر

أجل لاجاء ماعلي إلا أطير عيوني فووووق ويروح ملح لأن خلقتي لاطيرت عيوني أهلي مايخافون مني أبد<<<إيه هين

تحيتي


هلا وحيده اصلا انتن عفاريت قدام رجالكن بس اللي ماتزوجن مايدرن لين يجربن
تحسب الرجال يخوفون بس اذا شافته عرفت انه ماعندك احد

[عاشق ديرتي بريده]

عاااااااااااااااااااااااااد خلوناا واقعين بعض الحريم لاشفته ماتقول إلا سعلُوه .. يعني باختصااار تخوَف
تشكرررررررررررررررررررراااات أفندم......


يازين الصريح
يالله يابنات شوفن !!

[عاشق ديرتي بريده]

متاكد انت يعني اذا طير عيونه وبدا يقلبهن اقول خير عسى ماشر:36_1_18[1

ايه قوليها وانتي واثقه
على طول يبي يعمش بعيونه يبي يقول اجرب عيوني ههه

[عاشق ديرتي بريده]

أجل لاصارت الدعوى طراقات هونا مانبي نتعلم ,أخاف يصبخن على رأسي وأروح فيها
بس يقولون اللي تسيطر على زوجها وتقيوى عليه هذي ذكيه << عاد أنا مادري هن يقولن كذا .


هن صادقات وكل اكثر البنات الحين ذكيات
بس اعرفي وشلون تلعبين عليه !!! انتي واسلوبك

[فور يو]

وش الهيبه اللي ببعض الحريم اللي تخلي الرجال يصيرون جبناااء !!!



الهيبه اخوي عاشق اللي عند الحريم هم الرجال الدلوخ والرخوم واللي ماعندك احد .

[ابو ريما الخالدي]

لاأعتقد أنه خوف
هو في أساسه أحترام وتقدير

[خوية نموووووووله]

هههعععععععععععععععع ونااااااااااااااسه

[قهورررري]

الزمن هذا .. هو زمن المرأة وحدها صدقني
ما راح يمر زمن مثل هذا الزمن لهن .. شوري عليكن ياحريم أغتنمن كل صغيره وكبيره دام العصمه والفك والربط بإيديكن لا تفرطن فيها ..
بوقتنا هذا المرأة هي أساس كل شيء .. والإعلام هو السبب في هذا
حط المرأة هو السجانه بعد ما كانت هي السجينه
وحطها هي المالكه بعد ما كانت هي المملوكه
أعطها دفعات معنويه كبيره .. خلاها قويه ومتمرسه أمام أيآ كان من الرجال
تدري لي يا عاشق الإعلام خص المرأة لحاله بهذا الوصف !
المرآة طبيعتها ضعيفه العقل والعاطفه تسايرها وين ما كانت .. حاول الإعلام العلماني أنه يدخل فيها مقومات القوة لأجل أنها تسيطر على جو العائله اللي هي عايشة معاهم .. وتعرف أنت دين المرآة مثل المصريين
تحلل اللي تحبه وتحرم اللي ما تحبه
ما قدر الإعلام ألا السيطره على عقل المرأة لأنها الوحيدة اللي قادره على هدم بيت زوجها وقادره على التحكم في تيار هذا المجتمع !
وبعدين راح يضيفوا خيارات كثيره بعد هذه الدفعات المعنويه للمرأة .. الشيء حبه حبه
الغزو الفكري يطبخ على نار هادئة .. وراح بالأخر يكون في حلول كثير ..
وخوف الرجل من زوجته هذي أول الحلول التي أستفاد منها بنو علمان

شكرآ

[عاشق ديرتي بريده]

الهيبه اخوي عاشق اللي عند الحريم هم الرجال الدلوخ والرخوم واللي ماعندك احد .


عزالله انك جبتها والله انهم دلوووخ مهب رجال

[عاشق ديرتي بريده]

لاأعتقد أنه خوف
هو في أساسه أحترام وتقدير



صحيح ابوريما
هو احترام وتقدير وصل لمرحلة الخوف والخوف الشديد عند البعض !!!

[بيسان]

ههههههههههههههههههه
اي والله وناااااااااااااااااااسه

[عاشق ديرتي بريده]

هههعععععععععععععععع ونااااااااااااااسه


يحق لك تقولي وناسه
حصلتو اشباه رجال او رجال دلووخ

[عاشق ديرتي بريده]

الزمن هذا .. هو زمن المرأة وحدها صدقني
ما راح يمر زمن مثل هذا الزمن لهن .. شوري عليكن ياحريم أغتنمن كل صغيره وكبيره دام العصمه والفك والربط بإيديكن لا تفرطن فيها ..
بوقتنا هذا المرأة هي أساس كل شيء .. والإعلام هو السبب في هذا
حط المرأة هو السجانه بعد ما كانت هي السجينه
وحطها هي المالكه بعد ما كانت هي المملوكه
أعطها دفعات معنويه كبيره .. خلاها قويه ومتمرسه أمام أيآ كان من الرجال
تدري لي يا عاشق الإعلام خص المرأة لحاله بهذا الوصف !
المرآة طبيعتها ضعيفه العقل والعاطفه تسايرها وين ما كانت .. حاول الإعلام العلماني أنه يدخل فيها مقومات القوة لأجل أنها تسيطر على جو العائله اللي هي عايشة معاهم .. وتعرف أنت دين المرآة مثل المصريين
تحلل اللي تحبه وتحرم اللي ما تحبه
ما قدر الإعلام ألا السيطره على عقل المرأة لأنها الوحيدة اللي قادره على هدم بيت زوجها وقادره على التحكم في تيار هذا المجتمع !
وبعدين راح يضيفوا خيارات كثيره بعد هذه الدفعات المعنويه للمرأة .. الشيء حبه حبه
الغزو الفكري يطبخ على نار هادئة .. وراح بالأخر يكون في حلول كثير ..
وخوف الرجل من زوجته هذي أول الحلول التي أستفاد منها بنو علمان

شكرآ

هذي صارت تخفيضات ياقهووووري
بس تصدق انك صادق فرصه لكن يابنات

[عاشق ديرتي بريده]

ههههههههههههههههههه
اي والله وناااااااااااااااااااسه

كم عندنا من نمله ؟؟؟؟؟
اضحكي يارب تطحين برجل بمعنى الكلمه اول ماتهوشينه يشوتك بووز ويقولك اعقلي تراني ماني من ذولاك !!!

[بيسان]

كم عندنا من نمله ؟؟؟؟؟
اضحكي يارب تطحين برجل بمعنى الكلمه اول ماتهوشينه يشوتك بووز ويقولك اعقلي تراني ماني من ذولاك !!!

هههههههههههههههههههه
فال الله ولا فالك
وبعدين مافي الا نملة وحده
وبعد تعال فيه طرق تخلي الوحده تحط رجله خااااااااااتم بأصبعها بس مو خكري وخريف على قولة الحريم لكن نص ونص

[عاشق ديرتي بريده]

هههههههههههههههههههه
فال الله ولا فالك
وبعدين مافي الا نملة وحده
وبعد تعال فيه طرق تخلي الوحده تحط رجله خااااااااااتم بأصبعها بس مو خكري وخريف على قولة الحريم لكن نص ونص

لا والله بالوقت هذا تحطين زوجك خاتم وهو بكامل قواه العقليه !!!

[بيسان]

ههههههههههههههههههههههه
هذي الوناسه بس تصدق احب العصبي واحب اعصبه أكثر ابدا اناقز من الونااااسه احس اني احرق دمه بشوووووووويش

[عاشق ديرتي بريده]

لا ترا العصبي دمار يحمق ويطلقك وهو مادري !!!!

[بيسان]

تبى الصدق مو فارقه معااااااااااااااااي ههههههههههههههه

اكره شي عندي الزواج ولا جا احد يخطبني قعدت اضحك واقول وراه داعيه عليه امه ياحراااااااام

ولا صمم على الزواج اقعد اصيح

يبيلي حل ياترى من يقول الحل؟؟؟؟؟<<قضيه الأمم المتحده صارت

[عاشق ديرتي بريده]

تبى الصدق مو فارقه معااااااااااااااااي ههههههههههههههه

اكره شي عندي الزواج ولا جا احد يخطبني قعدت اضحك واقول وراه داعيه عليه امه ياحراااااااام

ولا صمم على الزواج اقعد اصيح

يبيلي حل ياترى من يقول الحل؟؟؟؟؟<<قضيه الأمم المتحده صارت

لاقضيه ولاشي مصيرك تعرسين !!
اعرسي وانتي صغيره ازين منك تعرسين وانتي عجوز
<<< يتخيلها عجوز وحامل ههه

[~ مي ~]

طيب يامي اللي يواعد ربعه يبي يكشت معهم وبعد هو اللي يبي يكشت يعني هو اللي مصمم عليها ويوم جاء يوم الكشته سكر جواله لمدة يومين ويوم رجعنا قلنا وينك قال والله صار عندي شغل !!!!!!

طيب شووو المشكلة يعني اللحين بتقنعني انه سكر جواله عشانه
خايف من حرمته ........
لاااااااا الحين اقتنعت وما قول الا الله يعين اخوياك عليك
اي واحد بيتحجج بتقولون على طووووول ايه خايف من حرمته ......

[بيسان]

يصير خير :(<<تكره الزواج بشكل لايطاااااااااااااق

[بيارق]

بعض الرجال ضعيف الشخصيه او مايدبر نفسه فا تستغله زوجته

[عاشق ديرتي بريده]

يصير خير :(<<تكره الزواج بشكل لايطاااااااااااااق

وانتي تحسبين كل المعرسين يحبون الزواج !!!!
اعرسي بس مثل الناس
اقل شي انتي تحصلين احد يخاف منك !!!

[عاشق ديرتي بريده]

طيب شووو المشكلة يعني اللحين بتقنعني انه سكر جواله عشانه
خايف من حرمته ........
لاااااااا الحين اقتنعت وما قول الا الله يعين اخوياك عليك
اي واحد بيتحجج بتقولون على طووووول ايه خايف من حرمته ......

انتي تدرين ليش سكر جواله !!!!
زوجته قالت مافيه كشتات واستحى منا وسكر جواله !!

والله لايجيب لك الصمررررقع

[عاشق ديرتي بريده]

بعض الرجال ضعيف الشخصيه او مايدبر نفسه فا تستغله زوجته


ياكثــــــــــــــــــرهم ذولا يابيارق

[رتاج]

ابشرك انا اذا اعرست ماراح اخاف من زوجتي

لاني قوي ورااااااااااااقل ولا اي راااااااااااقل

ايه هين بس


احلى مصلح عمره الاندر تيكر

اقول سمنسي انتا خلك تدور على زوجة المستقبل واجلس دور ودور و دور واذا لقيتها نقول لك يالله حسن الختام ههههههه

[عاشق ديرتي بريده]

احلى مصلح عمره الاندر تيكر

اقول سمنسي انتا خلك تدور على زوجة المستقبل واجلس دور ودور و دور واذا لقيتها نقول لك يالله حسن الختام ههههههه


بس مصيريه يلقى ويتزوج وتشوفين وش يسوي بزوجته والله مايخليها ترفع عيونها عن الارض ماهو رااااااااااااقل حقيقي

[رتاج]

بس مصيريه يلقى ويتزوج وتشوفين وش يسوي بزوجته والله مايخليها ترفع عيونها عن الارض ماهو رااااااااااااقل حقيقي

وي وي عليك يا عاشق كده انتا تشجع سمنسي ويأخذ بنفسه مقلب

والله يا خوفي لا تنقلب الايه ويصير هو الا ما يرفع عيونه عن الارض

[فتاة المستقبل]

طيب شووو المشكلة يعني اللحين بتقنعني انه سكر جواله عشانه
خايف من حرمته ........
لاااااااا الحين اقتنعت وما قول الا الله يعين اخوياك عليك
اي واحد بيتحجج بتقولون على طووووول ايه خايف من حرمته ......

مادري ليش أي شئ يتصرف به الرجل لصالح المرأه يفسرونه خوف .
عاد تخيلي زوجي يخاف ويرتجف من << يع أستغفر الله,, الله لايبلان

[التنين]

انت ياعاشق ديرتي شكلك من تب بعيد من اللي يخافون من حريمهم انتبه

[عاشق ديرتي بريده]

مادري ليش أي شئ يتصرف به الرجل لصالح المرأه يفسرونه خوف .
عاد تخيلي زوجي يخاف ويرتجف من << يع أستغفر الله,, الله لايبلان

يافاطسه فيه تصرفات يسونها الرجال ونقدرها لانه يقدر زوجته
بس اللي يصير وجهه حمر ويرتبك لانها دقت بالجوال هذا هو اللي نتكلم عنه !!

[عاشق ديرتي بريده]

انت ياعاشق ديرتي شكلك من تب بعيد من اللي يخافون من حريمهم انتبه

لو انا اخاف كان ماكتبت الموضوع
شف الاعضاء اللي يخافون من حريمهم ماجو يردون يقول مالك ومال وجع الراس اخاف تجي الوليه وتقراء رده ههه

[OOOyousefOOO]

عاش ديرتي :

هالسؤال الصراحه حلو مره وجاء في وقته؟

الإجابه طول الله عمرك

أنه بعض الرجال يخطئ في البدايه ويحترم زوجته ويبي يونسها وبيعيش شهر العسل ومايدري إلا هي مطوله على هالسالفه.
والبعض يالذيب يخاف على زعلها ويفكر أنه تصير مشاكل هو بغنى عنها ويدري أنه لو حصل طلاق بيموت ماأعرس من كثر الديون اللي عليه.
البعض يابعدي تلقاه يسايرها مادام يحس هو أنه مااحد بينفعه غيرها (مايحتاج توظيح)
والبعض ياأخيي تلقاه طمعان بورث ويسايرها ولو أنه ماأتوقع كذا لأنه هذي بالمسلسلات بس.
والبعض ياخيو يخاف أنه تصير مشكله بينهم بعدين يتدخلون اهلها وتصير مشاكل مالها أول ولا ثاني.
والبعض البعض البعض هو شخصيا ذروووووووق.
والبعض مسكين يآكل عشاه البس وهو يناضر فما بالك لا أخذ وحده لسانها يلوط أذانها.
والبعض والبعض يخاف تطلع كلمه منا أو منا أو شي بالجوال بعدين تمسك عليه عند أخوياه خاصه لاصارو يدورون القلهي بالإستراحات ويحبون التعليق.
والأغلبيه منهم أيقاله يحبها ويحترمها (الله يهني سعيد بسعيده)

وكل هذا مجرد هرج لاتآخذون منه شي

[عجوز سمنسي]

احلى مصلح عمره الاندر تيكر

اقول سمنسي انتا خلك تدور على زوجة المستقبل واجلس دور ودور و دور واذا لقيتها نقول لك يالله حسن الختام ههههههه

والله ياريتاج ابدور وادور وادور الييييييييييين الاقي بنت الحلال

بس تدري وش اكتشفت؟

الحرمة لاتعطيها وجهه وتمشي معك زي المسطرة

تبي ترخي اعصابك لها تركبك وتلعن صيرك وخيرك

خلك سمنسي في حالات وملعون جدف معها في اكثر الحالات

كذا تمشي معك الدنيا

عندك حريم بذا الله لايوريك اللهم ياكافي

تشفط عمرك وصحتك وجيبك

والنتيجة ؟ مارايت منك خيرا قط

خلك عزوبي احسن لك

[رتاج]

الحرمة لاتعطيها وجهه وتمشي معك زي المسطرة

خلك عزوبي احسن لك

تصدق يا سمنسي اللي بتأخذك تلقى امها وابوها وقبيلتها داعين عليها
بس يمكن تدخل الجنه بسبب صبرها عليك هههههههههههههه

[عجوز سمنسي]

تصدق يا سمنسي اللي بتأخذك تلقى امها وابوها وقبيلتها داعين عليها
بس يمكن تدخل الجنه بسبب صبرها عليك هههههههههههههه

لاتشوه سمعتي ياريتاج تكفى

ترى كثير من البنات متوسط لهن ابو خالد عندي يبونن اتزوجهن وهذاني قاعد اختار وانقي

انا سمنسي يابعدي لكن انا مو اي اي ولا زي زي

انا الشايب السمنسي لازم اللي تاخذني تحط عينها في الارض وهي تكلمني

حريم الحين لاحياء ولاحشمة

نبي الوحدة اللي اذا نظرت اليها اعجبتنا واذا امرناها اطاعتنا واذا خرجنا حفظتنا

مو اذا نظرنا اليها حومت تسبودنا واذا امرناها قعدت تهايط لها ساعة

حريم ماتختشيش

[فيصل...........]

تتطابق لاجابات وتختلف التوجهات
ولا استطيع الأ ان اقول المراءة تمتلك
اغلا شي لايمكن للرجل الحصول علية
الا برضاها فلماذا لايخاف منها؟

[خالد العبدالله]

مرحبا اخوي...نفس تفكيري ...

ليش الرجال يخافو من الحريم..

مستحيل تلقا جواب... تدري ليش...بسبب أنك لو تسأل من يخاف من زوجته قالك يالله الستر..وحنا مو ناقصين وجع راس..ومشاكل....

وغالبن المرأه تسيطر على الرجال بعد الأنجاب بكم ولد بسبب أنه تمسكه مع اليد اللي توجعه وغالبن من يسيطر عليه من الرجال هم طبيعتهم حنونه لايستطيعون أن يفارقو اولادهم او أن يتم طلاق ويتشردو اولاده ولذك تجده يصبر على بلاواه ....لعل الله أن يحدث بعد ذلك الفرج....

وممكن احتمال ثاني أنه يحب زوجته وصار يقبل منها أي شي وأي أهانه وهيا تستغل هذه النقطه ...يضرب ابو الحب اللي كذا..

وممكن كما قال بعض الأخوان تكون الزوجه هي من تنفق على الرجل او يكون دخل المرأه اكبر ..ويكون الرجل بذلك ضعيف القلب والشخصيه فتحدث المشكله...

وممكن أن تكون المرأه قوووية شخصيه وقوية النفوذ وذكيه يعني بعباره أخرى سياسيه..فتفعل ماتريد..

وللمعلوميه أن المرأه الذكيه أول ماتبحث في الرجل عن عيبه لكي تمسكه عليه وتجعله طريق لبداية السيطره فحاول أن لايمسك عليك شي...أو لاتظهر عيبك أن كان لك عيب ..

وقالو في المثل....
العود من أول ركزه.. ... يعني الأول اللي يسيطر في بداية الزواج هو اللي راح يسطير على زمام الأمور..طبعا تكون السيطره بذكاء مو عنجهيه وعربجه..

لذا يجب على الرجل أن يكون مسيطر في بداية حياته ويكون قد هذه السيطره أو يعطي زمام الأمور لزوجته اذا كانت أهل لذلك ...وللمعلوميه فيه بعض النساء عن ألف رجل في الراي والأستشاره..والتوجيه والأداره...يعني أذا كانت زوجتك لها القدره في إدارة شؤن اولادي والبيت لايمنع أن تكون هي المسيطره على البيت فقط ..مع التفاهم معها في أمور الحياه وتقسيم المهام...

ودمت بيخر

[&نجدية كووول&]

لافظ فوك يا خالد

[شموع تحت المطر]

ياحـــــــــــزن هالحريم اللي مالكم كلام غيرهن...


طيب وراه ماتقولون وشولة تشخصون علينا انتم وتسووون هيبة

وانتم ماعندكم الا الدجــــــــــــــــــــــــة..

الاحترام وارد بين الطرفين وهو اســــاس كل شي...


تحيتي..

[khuzama2000]

ليس كل الرجال بل بعضهم يعني لاتتعمم

[عجوز سمنسي]

ياحـــــــــــزن هالحريم اللي مالكم كلام غيرهن...


طيب وراه ماتقولون وشولة تشخصون علينا انتم وتسووون هيبة

وانتم ماعندكم الا الدجــــــــــــــــــــــــة..

الاحترام وارد بين الطرفين وهو اســــاس كل شي...


تحيتي..

يجب ان يكون عدم الاحترام هو الاساس مع الحريم

الحريم تعطيها وجه تدوووس في حوض بطنك ومصارينك

تعطيها العين الحمراء تمشي معك بالعدال وتقول لك سم ياسيدي

والله انكم مهكاكة بس للاسف مالقيتوا رجال تدوس على خشومكم

[رتاج]

يجب ان يكون عدم الاحترام هو الاساس مع الحريم

الحريم تعطيها وجه تدوووس في حوض بطنك ومصارينك

تعطيها العين الحمراء تمشي معك بالعدال وتقول لك سم ياسيدي

والله انكم مهكاكة بس للاسف مالقيتوا رجال تدوس على خشومكم


بعد كلامك هذا يا سمنسي نطالب بإنشاء جمعية مناصرة حقوق المرأة ههههههه:b2:

[فديتك]

الرجال مايخافون من زوجاتهم عبث

سبحان الله الرجل مايخاف الا اذا كان مسوي شي غلط بحق حرمته وعياله

اما اذا كان ماشي صح ولا قصر عليهم بأي شي فانه مستحيل يخاف

وكذلك الحرمه اذا ماغلطت بأي شي ومأديه حقوقها على أكمل وجه مستحيل تخاف منه او تشكي لأحد

الزبــده ......

يعني اذا اتأخر بجلوسه بالاستراحه وبالسهر والكهكهه معهم اكيد بيخاف من حرمته وبيخاف من حنتها عليه

لكن خلوه يرجع الساعه عشر 10 ولا 11 مستحيل يخاف منها وبهذا مستحيل يكون فيه أي نقاس حاد بينهم

يعني الغلط بالأول والاخير عليه .. لايتأخر عليها ويقوم بكل احتياجاتها على أكمل وجه وماعليه بيمشي وكلله ثقه

هذا من وجهة نظري والله اعلم

سلااااااااااااااام

اختكمـــــــــــ فديتك ..........

[عاشق ديرتي بريده]

عاش ديرتي :

هالسؤال الصراحه حلو مره وجاء في وقته؟

الإجابه طول الله عمرك

أنه بعض الرجال يخطئ في البدايه ويحترم زوجته ويبي يونسها وبيعيش شهر العسل ومايدري إلا هي مطوله على هالسالفه.
والبعض يالذيب يخاف على زعلها ويفكر أنه تصير مشاكل هو بغنى عنها ويدري أنه لو حصل طلاق بيموت ماأعرس من كثر الديون اللي عليه.
البعض يابعدي تلقاه يسايرها مادام يحس هو أنه مااحد بينفعه غيرها (مايحتاج توظيح)
والبعض ياأخيي تلقاه طمعان بورث ويسايرها ولو أنه ماأتوقع كذا لأنه هذي بالمسلسلات بس.
والبعض ياخيو يخاف أنه تصير مشكله بينهم بعدين يتدخلون اهلها وتصير مشاكل مالها أول ولا ثاني.
والبعض البعض البعض هو شخصيا ذروووووووق.
والبعض مسكين يآكل عشاه البس وهو يناضر فما بالك لا أخذ وحده لسانها يلوط أذانها.
والبعض والبعض يخاف تطلع كلمه منا أو منا أو شي بالجوال بعدين تمسك عليه عند أخوياه خاصه لاصارو يدورون القلهي بالإستراحات ويحبون التعليق.
والأغلبيه منهم أيقاله يحبها ويحترمها (الله يهني سعيد بسعيده)

وكل هذا مجرد هرج لاتآخذون منه شي


كلام جدا ممتاز ويالله يارجال ياللي تخافون اقروء الرد تراوه مفيد
بس اخي يوسف مااضن كل الامور هذي تخليه يخاف منها بزووود !

[عاشق ديرتي بريده]

تتطابق لاجابات وتختلف التوجهات
ولا استطيع الأ ان اقول المراءة تمتلك
اغلا شي لايمكن للرجل الحصول علية
الا برضاها فلماذا لايخاف منها؟


هلا فيصل
ترا الرجال برضو يملك اغلا شي ولايمكن للمراءه الحصول عليه الا برضااااااه

[عاشق ديرتي بريده]

مرحبا اخوي...نفس تفكيري ...

ليش الرجال يخافو من الحريم..

مستحيل تلقا جواب... تدري ليش...بسبب أنك لو تسأل من يخاف من زوجته قالك يالله الستر..وحنا مو ناقصين وجع راس..ومشاكل....

وغالبن المرأه تسيطر على الرجال بعد الأنجاب بكم ولد بسبب أنه تمسكه مع اليد اللي توجعه وغالبن من يسيطر عليه من الرجال هم طبيعتهم حنونه لايستطيعون أن يفارقو اولادهم او أن يتم طلاق ويتشردو اولاده ولذك تجده يصبر على بلاواه ....لعل الله أن يحدث بعد ذلك الفرج....

وممكن احتمال ثاني أنه يحب زوجته وصار يقبل منها أي شي وأي أهانه وهيا تستغل هذه النقطه ...يضرب ابو الحب اللي كذا..

وممكن كما قال بعض الأخوان تكون الزوجه هي من تنفق على الرجل او يكون دخل المرأه اكبر ..ويكون الرجل بذلك ضعيف القلب والشخصيه فتحدث المشكله...

وممكن أن تكون المرأه قوووية شخصيه وقوية النفوذ وذكيه يعني بعباره أخرى سياسيه..فتفعل ماتريد..

وللمعلوميه أن المرأه الذكيه أول ماتبحث في الرجل عن عيبه لكي تمسكه عليه وتجعله طريق لبداية السيطره فحاول أن لايمسك عليك شي...أو لاتظهر عيبك أن كان لك عيب ..

وقالو في المثل....
العود من أول ركزه.. ... يعني الأول اللي يسيطر في بداية الزواج هو اللي راح يسطير على زمام الأمور..طبعا تكون السيطره بذكاء مو عنجهيه وعربجه..

لذا يجب على الرجل أن يكون مسيطر في بداية حياته ويكون قد هذه السيطره أو يعطي زمام الأمور لزوجته اذا كانت أهل لذلك ...وللمعلوميه فيه بعض النساء عن ألف رجل في الراي والأستشاره..والتوجيه والأداره...يعني أذا كانت زوجتك لها القدره في إدارة شؤن اولادي والبيت لايمنع أن تكون هي المسيطره على البيت فقط ..مع التفاهم معها في أمور الحياه وتقسيم المهام...

ودمت بيخر

اخوي خالد مشكور والله يعطيك العافيه على الاضافه هذي
لااستطبع ان اعلق على كلامك فهو كلام وافي

[عاشق ديرتي بريده]

ياحـــــــــــزن هالحريم اللي مالكم كلام غيرهن...


طيب وراه ماتقولون وشولة تشخصون علينا انتم وتسووون هيبة

وانتم ماعندكم الا الدجــــــــــــــــــــــــة..

الاحترام وارد بين الطرفين وهو اســــاس كل شي...


تحيتي..

ومن قال ان ماعندنا الا الدجه
بس اللي ماعنده الا الدجه هو اللي فشلنا وخلى نفسه مضحاكه بين الناس بخوفه من زوجته

[عاشق ديرتي بريده]

ليس كل الرجال بل بعضهم يعني لاتتعمم


مستحيل اني اعمم
فيوجد رجال لاتستطيع زوجته ان ترافع طرف عينها عليه
وهذا هو الرجل الصحيح

[عاشق ديرتي بريده]

يجب ان يكون عدم الاحترام هو الاساس مع الحريم

الحريم تعطيها وجه تدوووس في حوض بطنك ومصارينك

تعطيها العين الحمراء تمشي معك بالعدال وتقول لك سم ياسيدي

والله انكم مهكاكة بس للاسف مالقيتوا رجال تدوس على خشومكم

سمنسي ترا بعض الرجال عطى زوجته العين الحمراء
بس طلعت هي العن منه وعطته عنين حمر!!

[عاشق ديرتي بريده]

الرجال مايخافون من زوجاتهم عبث

سبحان الله الرجل مايخاف الا اذا كان مسوي شي غلط بحق حرمته وعياله

اما اذا كان ماشي صح ولا قصر عليهم بأي شي فانه مستحيل يخاف

وكذلك الحرمه اذا ماغلطت بأي شي ومأديه حقوقها على أكمل وجه مستحيل تخاف منه او تشكي لأحد

الزبــده ......

يعني اذا اتأخر بجلوسه بالاستراحه وبالسهر والكهكهه معهم اكيد بيخاف من حرمته وبيخاف من حنتها عليه

لكن خلوه يرجع الساعه عشر 10 ولا 11 مستحيل يخاف منها وبهذا مستحيل يكون فيه أي نقاس حاد بينهم

يعني الغلط بالأول والاخير عليه .. لايتأخر عليها ويقوم بكل احتياجاتها على أكمل وجه وماعليه بيمشي وكلله ثقه

هذا من وجهة نظري والله اعلم

سلااااااااااااااام

اختكمـــــــــــ فديتك ..........

هلا فديتك فيه نقاط قلتها مفيده وصحيحه
بس فيه ناس تجي بدري ولاتسوي شي غلط بس سبحان الله به طبع الخوف منها !

[ابوخالد382]

مستحيل اني اعمم
فيوجد رجال لاتستطيع زوجته ان ترافع طرف عينها عليه
وهذا هو الرجل الصحيح

هذولا ياعاشق إنقرضوا سنة السبله,وجاك جيل النيدو,اللي لو تخرفش قرطاسة أو يتدربى قوطي بالسطح تغبى وراء زوجته من الذراق ,وبعضهم يقولون روحي شوفي من اللي بالسطح.تشششششششش:36_2_2[1]

[عاشق ديرتي بريده]

هذولا ياعاشق إنقرضوا سنة السبله,وجاك جيل النيدو,اللي لو تخرفش قرطاسة أو يتدربى قوطي بالسطح تغبى وراء زوجته من الذراق ,وبعضهم يقولون روحي شوفي من اللي بالسطح.تشششششششش:36_2_2[1]


ههههههههههههههههههههههههههههههههههه
ابو خالد صحيح وشو اللي يخرفش ببيوتنا

[فراشة الالماس]

بكل صراحه لان الرجال ماهم رجال مثل اول الله المستعان

ارجو انكم ماتزعلون من الواقع لانه فعلاً واقع واكيد يبي يطلع منكم اللي ينفخ صدره من كلامي بس معليش هذا واقعكم.

[عاشق ديرتي بريده]

بكل صراحه لان الرجال ماهم رجال مثل اول الله المستعان

ارجو انكم ماتزعلون من الواقع لانه فعلاً واقع واكيد يبي يطلع منكم اللي ينفخ صدره من كلامي بس معليش هذا واقعكم.


لا ليش نزعل وننفخ صدورنا
فعلا اللي يخاف من زوجته مهوب رجال !

[ابوسليمان22]

يصير خير :(<<تكره الزواج بشكل لايطاااااااااااااق

يا نملة كاشخة كرهك للزواج هذا من الشيطان .

اعرف بنات نفس طريقتك ولكن بعد الزواج تغير حالها.

[ابوسليمان22]

اما بالنسبه لموضوعك يا عاشق يقولون ذروق ولا يقولون الله يرحمه.

تبي الصراحه ما يخاف الرجال من زوجته الا انه ضعيف شخصيه ونفسية .او لا قيتن عليه زلة .

الرجال اللي يخاف من زوجته صدقن اول ما يحتقره زوجته .لأن المرأه اساسا تبي رجل .ما تبي واحد شبيه رجل.

احيانا من حبه لزوجته يبدأ يخاف انها تزعل عليه فيخطئ في معاملته لها وهو لا يشعر.

[فديتك]

هلا فديتك فيه نقاط قلتها مفيده وصحيحه
بس فيه ناس تجي بدري ولاتسوي شي غلط بس سبحان الله به طبع الخوف منها !



انا عارفه ان كلامي صحيح وهذا الحاصل

لكن انك تقول هذا رجل فيه طبع الخوف من حرمته هذا شي مو صحيح ابدا

واذا كان فيه شي من الصحه فانه يكون مو طبيعي ولا يكون فيه مرض نفسي مسيطر عليه ومخليه يخاف منها

بطبيعة الحال الزوجه هي اللي تخاف من الزوج

لكن على كلامك تقول العكس صحيح

اكيد لهذا اسباب من اهمها ان فيه مرض نفسي ورجل غير سوي

وسلااااااااااااااااااااااام

اختكمــــــــ فديتك ..............

[فتاة المستقبل]

اما بالنسبه لموضوعك يا عاشق يقولون ذروق ولا يقولون الله يرحمه.

تبي الصراحه ما يخاف الرجال من زوجته الا انه ضعيف شخصيه ونفسية .او لا قيتن عليه زلة .

الرجال اللي يخاف من زوجته صدقن اول ما يحتقره زوجته .لأن المرأه اساسا تبي رجل .ما تبي واحد شبيه رجل.

احيانا من حبه لزوجته يبدأ يخاف انها تزعل عليه فيخطئ في معاملته لها وهو لا يشعر.

والله العلي العظيم أنك صادق << بسم الله عليكم مايخفى عنكم شئ , كل شئ تدرون عنه
ومثل ماقلت المرأه تريد رجلا بمعنى الكلمه ...

[دلـع]

وااااااااااااااااااااااااااااااااااااااااااااااوك

انا راح انهبل
ادعوا لانفسك وكثروا من هالدعوة>> اللهم لا تجعل الحريم اكبر همنا<<

وهذا اللي اشوفه بهالمنتدى كل كلمة والثانية الحريم

[الـ مها]

انت هيييه اصحا هذا مايسمى خوف ذا يسمى احترام وش به يعني لامنه طاع مرته وسوا الي تبي

يعني لمتى تتبل بكم فكره ان المره الي تطيع رجله وهو لا والعياذ بالله مايطيعه ترا عادي شي طبيعي مابه شي ذا يدل على التفاهم بينهم مو خوف

انتم عندكم الرجال الي يطق على مرته وحده والي يتفل بوجهه ولا يعطيه وجه والي يستقوي ويطلع عضلاته عليه

عييب لاتسقوون علينا الي بيطلع قوته يطلعه على رجال مثله مو على حرمه


وانت ياعاشق خير كل مواضيعك حريم حريم طاعوشته اركد كل ذا هابلاتك الحريم بس مالوووومك والله بريداوي

[M!Ss GreeN]

ههههههههههههههههههههههههههااي

شكل المدام صاكتن عليك

ياخي مواضيعك دايم تدغدغن اضحك عليها بقووه

ليه كل مواضيعك عن الحريم

تقل ماعمرك شفت حرمه اللهم ياكافي

بعدين واذا خاف منها عادي يحبها ومايبي يزعلها ليه حاطينه خووف

دايم تحبون تحطمون وتقللون من رفع المعنويات

ياخي كل شئ تعكسونه هذا الي يبي يطير رجالنا منا

حرجكم يعني اذا يحبها ومايستغني عنها خليتوه يخاف

واذا تركها وجحدها قلتوا قليل ادب

وش الحل معكم صدق ردين عقل

[سلطانو]

اذا كانت شخصية الرجل قوية فاكيد مايخاف من زوجتة
هناك رجال شخصيتهم ضعيفة فيكون عند المراة ضعيف