عاجل: أبي استراحة تنفع لشبكة..:(

[شفاء]

السلام عليكم..

الله يعافيكم أبي استراحة تكون حلوة ومرتبة تنفع لشبكة.. تكون ببريدة طبعاً
وعطون رقمها..

وعلمون وش احتاج للشبكة بعد.. أحس محتاسة مرة ادعوا لي:(

وأي محلات للشوكلاته والهدايا عطون اسمائها وعلموني كم ممكن تكلف

وكم تتوقعون كل حفلة الشبكة كم تكلف

الله يوفقكم..

[هادي الطبع]

تبغين بالشمال ولى بالجنوب

[شفاء]

بالشمال الله يعافيك..

[العبرى]

للأسف إستراحات في بريده ماأعرف..

إن شاء الله البنات ببريده يساعدونك..


تحتاجين للشبكه..حسب طبعكم وعاداتكم..وطبع أهل العريس..

طبعاً لوازم العروس فستان..وكمالياته..المكياج والتسريحه أقرب مشغل يسويها..

بخصوص الحفل..

وترى أغلبها كماليات مو ضروريه..

ترته..وحلويات تقدم مع القهوه..وشوكولاتات..وموالح وفطاير مع الشاهي..

وعصير..

حسب الناس اللي بيجون..يفضل تسألون قبل لو قدرتوا أو تحسبون عددهم إذا تعرفون

اللي ممكن يجون..

شريط..دف وأفراح..مع المسجل وتوصيلاته..

ورد طبيعي عند إستقبال الضيوف أو توديعهم..

هدايا تذكاريه..ممكن تكتفين بالورد..مربوط فيه عبارة أو أي كلمة تذكاريه مع التاريخ..

وممكن دهن عود لو العدد قليل..

وممكن شوكلاته مغلفه بشكل حلو..وغير المقدم لهم طبعاً..وفخمه..مثلاً من باتشي

وإذا بتسوون عشاء الله يعينكم..

وفيه ناس يحطون بوفيه مع الذبايح..

وممكن تكتفين ببوفيه حلويات مع الذبايح..

إنتي وميزانيتك وعادات أهل العريس وعاداتكم..

وممكن ترى تستغنين عن كل شيء وتقولين إرسلوا الشبكه <<< صدق ترى

وإذا تذكرت شيء بقولك..



تحيتي,,,

[الملتاعه]

أختي

العبرى كفت ووفت لكِ ولها الشكر

دمتم بووود

[وسن]

بنت عمي حطت شبكتها بإستراحة كـــادي ..شمال
حلوة وأنيقة

[شفاء]

العبري... أنا ناوية اتكلف بالشبكة وانبسط به مع صديقاتي، والزواج اخليه عادي..
بس المشكلة مامعي وقت.. أحس صار الموضوع بسرعة، الله ييسر الأمر بس:(
عاد شكلي لا ضاقت بي الدنيا بقول ارسلوا الشبكة وبس !.
الله يجزاك خير.. كفيتي ووفيتي والله.

الملتاعة.. شكراً الله يجزاك خير

وسن.. طيب ياحبي لتس تعرفين كم رقمها؟

[فاصله]

كادي الآن قاعه للمناسبات
,
بعد أن كانت استراحه
,
وسعرها 5000 ريال
,
وجدا حلوه للمناسبات ,
والله يوفقك إن شاء الله وييسر أمرك

[متغربه]

شفاء ارسلت لك عالخاص كل اللي سويته انا بشبكتي ياليت تقرينه واي مساعده انا حاضره

[صاحبة السموالفكري]

يا ربييييييييه !

كل هذا تتسونه بالشبكة , أجل بالعرس وش تتسوون ؟!

ياويليييييه على البذخ والصرفيات الي مالها أم ولا أبو !!

بصراحة ولا تزعلن : بعذرهم لو بتلوا يتكلمون عن غلاء المهور وتكاليف الزواج !

على بالي هالظاهرة انتهت والا هي ظاربة أطنابها لما الحين بمجتمعنا <<<< مالها علم بالعروس !

[العبرى]

عذراً..رد على صاحبة السموالفكري

من قال إن العريس له دخل بتكاليف حفلة الشبكه..؟

غلاء المهور ماله دخل بالشبكه

وغالباً اللي يندفع وينعمل بالشبكه ماينعمل بالفرح..!




تحيتي,,,

[ولد الشمال]

صاحبة السمو الفكري

أنا معك بوجهة النظر انه هذا تبذير وفسق أجل بالعرس وش بيصير


حنا أهل الشمال ماعندنا موضوع الشبكة وإن حصلت تكون في بيت العروس وتكون وختصرة ومقتصره على أهل العروس وأقربائها والعريس تجي أمه وخواته وبس .




تحياتي

[صاحبة السموالفكري]

عذراً..رد على صاحبة السموالفكري

من قال إن العريس له دخل بتكاليف حفلة الشبكه..؟

غلاء المهور ماله دخل بالشبكه

وغالباً اللي يندفع وينعمل بالشبكه ماينعمل بالفرح..!




تحيتي,,,



معاليش حبيبتي

نورين لأن السالفة ما دخلت مخي !

الحين هالصرفيات على الشبكة مو من المهر خيتو ؟!

ومو الي يدفع المهر هو الزوج ؟!

يعني سيم سيم !! وفي رواية : صبه احقنه !!


وحتى لو قلتن إن هالصرفيات من أبو البنت والا أهلها والا جدها الأكبر والا والا ...

مو لو يحطونها في بيتهم تاثيث والا شي مفيد أحسن من المظاهر الي ما تنفع ؟!


وحتى قولتك ان الي يسوونه بالشبكة ما يسوونه بالعرس بعد ما دخلت مخي , لأن أكثر الي ذكرتوه من مصاريف تنعمل بالزواجات على حد علمي من ضيافة ولبس ووووووو !!!!!

ولو كان الامر زي ما تقولين فالسالفة من جد تضحك لأنهم بيكونون زي الي يترك الفريضة ويصلي السنة !!

أقصد لاقسمهم الله دافعين دافعين ومتكلفين متكلفين يحطون خسايرهم بالعرس مير أهون !!

[العبرى]

معاليش حبيبتي

نورين لأن السالفة ما دخلت مخي !

الحين هالصرفيات على الشبكة مو من المهر خيتو ؟!

ومو الي يدفع المهر هو الزوج ؟!

يعني سيم سيم !! وفي رواية : صبه احقنه !!





هلا فيك..

اللي يدفع المهر أكيد الزوج..لكن المتعارف عليه قيمة المهر تكون من الزوج

وهو الذي يحدد..أما بماذا تنصرف..فهذا ليس شأنه..

هذا إذا كان المهر قبل الشبكه..لكن الأغلب الشبكه قبل بعدين المهر..!





وحتى لو قلتن إن هالصرفيات من أبو البنت والا أهلها والا جدها الأكبر والا والا ...

مو لو يحطونها في بيتهم تاثيث والا شي مفيد أحسن من المظاهر الي ما تنفع ؟!




إذا كان الاب مقتدر..فلن يمانع بتحمل تكاليف الحفل..

وإن لم يكن..لاأعتقد بأن هناك فتاة تحمل أبيها فوق طاقته..

ستضع الأهم والضروري بالنسبه لها..وتستغنى عن الكماليات..

حتى تجديد الأثاث قد يكون مظاهر..لا أكثر..!

لكن تنفع..!






وحتى قولتك ان الي يسوونه بالشبكة ما يسوونه بالعرس بعد ما دخلت مخي , لأن أكثر الي ذكرتوه من مصاريف تنعمل بالزواجات على حد علمي من ضيافة ولبس ووووووو !!!!!

ولو كان الامر زي ما تقولين فالسالفة من جد تضحك لأنهم بيكونون زي الي يترك الفريضة ويصلي السنة !!

أقصد لاقسمهم الله دافعين دافعين ومتكلفين متكلفين يحطون خسايرهم بالعرس مير أهون !!





بالعكس الشبكه تختلف..فمثلاً إذا قدمت بالشبكه سلتين من كلاً من (الحلى - الفطائر - الموالح )

حجمها لن يكون بحجم المقدم بالزواج..وعددها كذلك..وتشكيلتها..مثلاً بالشبكه ممكن أجيب فطائر قيمة الحبه بريال أو ريالين..وبالزواج صعب أن أفعل ذلك لأن العدد كبير..!


الشبكه شيء خاص..لأهل العريس وليس للمعازيم وكلام الناس ومدحهم..!

الشبكه تحضرها العروس من أولها لآخرها..!


عسى أن تكون الفكره وضحت..والشبكه بأول الأمر وآخره حسب عادات الأطراف المعنيه..!




تحيتي,,,

[صاحبة السموالفكري]

هلا فيك..

اللي يدفع المهر أكيد الزوج..لكن المتعارف عليه قيمة المهر تكون من الزوج

وهو الذي يحدد..أما بماذا تنصرف..فهذا ليس شأنه..


يعني هي هي !! المهم ان الفلوس منه بالنهاية , وبذلك كلامي عن غلاء المهور مازال بمحله !

هذا إذا كان المهر قبل الشبكه..لكن الأغلب الشبكه قبل بعدين المهر..!


برضه هي هي ! يعني منين تتصرف بالله ؟! أكيد بتتسلفهم لما يجي المقسوم من الزوج المسكين !!


إذا كان الاب مقتدر..فلن يمانع بتحمل تكاليف الحفل..

وإن لم يكن..لاأعتقد بأن هناك فتاة تحمل أبيها فوق طاقته..

ستضع الأهم والضروري بالنسبه لها..وتستغنى عن الكماليات..

هذا الي أنا أقوله من الصبح يا قلبي .. ليه فتياتنا ما يفكرن بالضروري والمهم ويخلن عنهن الكماليات الي مالها داعي ؟!
متى يبي يصير عند فتياتنا حسن إدارة وحنكة وتفكير مستقبلي ؟!
ليه دايم نظرتهن سطحية وآنية ووقتية وبس ؟!!!
ليه دايم يفكرن بالمبهر وووووووو بغير اتزان وحكمة وعقل مستنير؟!!

حتى تجديد الأثاث قد يكون مظاهر..لا أكثر..!

لكن تنفع..!

لا يا قلبي .. فهمتين غلط , أنا قصدت تاثيث بيت الزوجية كإعانة لذلك الزوج المسكين الي حفيت رجليه وهو يجمع بهالمهر ثم يشوفه يبعثر بغمضة عين على أشياء مالها داعي !!
وما قصدت تجديد أثاث بيت الأهل كما فهمت !! <<<<< ما بقى الاهي بس !! وش بقى بهالرجل حتى ينتفونة الأهل بعد ؟!!!



بالعكس الشبكه تختلف..فمثلاً إذا قدمت بالشبكه سلتين من كلاً من (الحلى - الفطائر - الموالح )

حجمها لن يكون بحجم المقدم بالزواج..وعددها كذلك..وتشكيلتها..مثلاً بالشبكه ممكن أجيب فطائر قيمة الحبه بريال أو ريالين..وبالزواج صعب أن أفعل ذلك لأن العدد كبير..!


كلام غير منطقي لأنه مهوب لم جادة الاقتصاد .. تدرين ليه ؟!
لأنك مستحيل تنفين انكم تتقدمون ضيافة للمعازيم بالزواج !! حتى وان اختلفت النوعيات بس الضيافه شي أساسي !!
وبذلك تعترفين ان صرفيات ضيافة الشبكة صرفيات ( تضاف ) إلى صرفيات ضيافة الزواج ! وتعتبر ( عبئا إضافيا زائدا عليه ) !! صح والا لا ؟!

ونفس الكلام ينسحب على صرفيات اللبس والمكياج وتسريحة الكوافيرة والتذكارات وووو !
يعني ما تدخل المخ ان العروس تبي تتزين بالشبكة وتجي شيفة بالعرس !!



الشبكه شيء خاص..لأهل العريس وليس للمعازيم وكلام الناس ومدحهم..!

الشبكه تحضرها العروس من أولها لآخرها..!


وإن كانت كذلك ايضا تظل مصاريف إضافيه مالها أم ولا أبو !!


عسى أن تكون الفكره وضحت..والشبكه بأول الأمر وآخره حسب عادات الأطراف المعنيه..!




تحيتي,,,

ما هو ما خرب بيتنا الا هالعادات الي نركض وراها بدون لحظة تفكير او مراجعة للنفس لفرز الصالح وطرح الطالح !!!

[العبرى]

يعني هي هي !! المهم ان الفلوس منه بالنهاية , وبذلك كلامي عن غلاء المهور مازال بمحله !


أنا أقصد أن الزوج يدفع وفق حدوده الماديه وقدراته..

لا يوجد عندنا من يحدد مهراً..ولم أسمع يوماً بذلك..

فالزوج حر يدفع 30 أو 40 أو 50 ..دون طلب أهل العروس منه..!



برضه هي هي ! يعني منين تتصرف بالله ؟! أكيد بتتسلفهم لما يجي المقسوم من الزوج المسكين !!

هنا..لم أفهم ماذا تعنين..؟ومن المقصود..؟


هذا الي أنا أقوله من الصبح يا قلبي .. ليه فتياتنا ما يفكرن بالضروري والمهم ويخلن عنهن الكماليات الي مالها داعي ؟!
متى يبي يصير عند فتياتنا حسن إدارة وحنكة وتفكير مستقبلي ؟!
ليه دايم نظرتهن سطحية وآنية ووقتية وبس ؟!!!
ليه دايم يفكرن بالمبهر وووووووو بغير اتزان وحكمة وعقل مستنير؟!!

وماهو الضروري في حفل الشبكه..ليتكِ تذكرينه لكي تستفيد الأخت..

أليس الضيافه..أليس أن تتجهز بلبس وماكياج وغيره..؟

ماذكرته خيارات لن توضع جمعيها..وتجهيز اللبس بإمكانها تدبير ذلك..وليس شرطاً أن

يكون الفستان جديداً..!


لا يا قلبي .. فهمتين غلط , أنا قصدت تاثيث بيت الزوجية كإعانة لذلك الزوج المسكين الي حفيت رجليه وهو يجمع بهالمهر ثم يشوفه يبعثر بغمضة عين على أشياء مالها داعي !!
وما قصدت تجديد أثاث بيت الأهل كما فهمت !! <<<<< ما بقى الاهي بس !! وش بقى بهالرجل حتى ينتفونة الأهل بعد ؟!!!

وأنتي أيضاً فهمتيني غلط..

كنت قد فهمت من كلامك أن الأثاث تجديد من الأب لمنزل الأسره..

وطبعاً ليس من العريس..>>> وين حنا فيه..!!!


كلام غير منطقي لأنه مهوب لم جادة الاقتصاد .. تدرين ليه ؟!
لأنك مستحيل تنفين انكم تتقدمون ضيافة للمعازيم بالزواج !! حتى وان اختلفت النوعيات بس الضيافه شي أساسي !!
وبذلك تعترفين ان صرفيات ضيافة الشبكة صرفيات ( تضاف ) إلى صرفيات ضيافة الزواج ! وتعتبر ( عبئا إضافيا زائدا عليه ) !! صح والا لا ؟!

ونفس الكلام ينسحب على صرفيات اللبس والمكياج وتسريحة الكوافيرة والتذكارات وووو !
يعني ما تدخل المخ ان العروس تبي تتزين بالشبكة وتجي شيفة بالعرس !!

صحيح..الضيافه شيء أساسي ولا أنكرها..

لكن مثلاً في الزواج لن أقدم عصير طبيعي للمعازيم..!

أتقارنين قيمة عشرين كأس مثلاً..بقيمة كؤوس لكل المعازيم في الفرح..؟

ثم لمَ تقديم أنواع من الحلويات في الفرح..

صحن البقلاوة مثلاً بخمس وعشرين..يكفيني لعشرين شخص منه إثنان..

بالفرح كم أحضر..؟

وإن أحضرت هذا لن أحضر ذاك..


وأنا لاأعترف بأن الشبكه صرف زائد على الزوج..

إذ بالإمكان عمل كل شيء داخل المنزل..حتى الضيافه..!


وإن كانت كذلك ايضا تظل مصاريف إضافيه مالها أم ولا أبو !!

مصاريف إضافيه لا شك بذلك..لكن مادامت العروس هي التي تريد عليها بتحمل ذلك..!


ما هو ما خرب بيتنا الا هالعادات الي نركض وراها بدون لحظة تفكير او مراجعة للنفس لفرز الصالح وطرح الطالح !!!







[/QUOTE]

تلك آفه..قد لاتنزع من المجتمع إلا بنزعة الأرواح..!

[مارغريت تاتشر]

أنا معك يالعبرى

الشبكه بالعكس شي حلوو للعروس بالذات لآنه تكون مقتصرة على اهلها وأهل العريس

أنا صديقتي سوت الشبكه وفلتها وأستأجرت وفصلت وديجية وبوفيه وكل شي براسها سوته والصراحه انبسطت لكـن أضافت على الشبكه الاعتيادية أنها ملكت وطبعآ لآنها حسب عاداتهم وتقاليدهم يعني خير البنت تعزم وهي ماملكت (( عادات وتقاليد العائلة ))
كانت تقول لو مااسوي الا زواج عائلي مايهمني ..

ولكــن الآن تزوجت بأحدى القصور الفخمه وجرى مايجري على العالم والحمد لله مبسوطه ولآأحس انها تكلفت او اسرفت .. بالعكس جرى لها مايجري للعالم..

المهم

يمدحون البركه بس مدري عنها ماشفتها ..
ايوه والمملكه حليوه تنفع للشبكه اذا الضيوف مايتعدون 25 شخص

[صاحبة السموالفكري]

العبري

هلا فيك اختي

المشكلة انك فصفصتي ردي , بس تركت أهم عبارة يدور حولها مضمون النقاش , وهي قولي :

( ما هو ما خرب بيتنا الا هالعادات الي نركض وراها بدون لحظة تفكير او مراجعة للنفس لفرز الصالح وطرح الطالح !!!)

لكن يا قلبي يكفيني منك اقرارك الي قلت فيه

( مصاريف إضافيه لا شك بذلك..لكن مادامت العروس هي التي تريد عليها بتحمل ذلك..! )

فأنتتعترفين أنها مصريف ( اضافيه ) !! ولكنك تمررينها من مبدأ ( المخرج عاوز كده ) ! قصدي العروس تبي هالصرفيات !!

طيب وش رايك وفق هالمنهج الغريب اني أروح واقش كل الي أشوفه ويعجبن بالسوق ؟ وش رايك ألف الدنيا بالخطوط السعودية ؟ وش رايك أسوي لنفسي (كل يوم ) نيو لوك بالمبلغ الفلاني ؟

مو المبدأ انه الي أبيه عادي أسويه ؟!

يا اختي مع احترامي مبدؤك هذا يكسر كل قوانين التفكير المتزن وكل مبادئ التخطيط الناجح ويحطم بلا هوادة أنظمة الاقتصاد والصرف المنضبط !!

كنت أتمنى منك مناقشة مظاهر الاسراف والصرف غير المنضبط أكثر من محاولة ( تبرير ) الصرفيات الي مالها داعي !!

[قصيدة شاعر]

أختي

صاحبة السمو الفكري


كلامك منطقي وعين العقل -الحين حنا نحاول الحد من خساير الزواج

ومصاريفه يطلع لنا موضوع الشبكة <<أحسها عادة قديمة


والحمد لله أحس في صحوة مب بسيطة عند البنات عن هالموضوع

[العبرى]

مارغريت تاتشر..

هلا فيك

هذا المتبع غالباً..أن الشبكه تكون نفسها حفلة الملكه..

ويكون الفرح عادي ومختصر..




أهلاً صاحبة السمو الفكري

أكيد مصاريف ولاأحد ينكر..لكن كل شخص هو أعلم بحددوه وكيف يوفر من المصاريف..


وأكيد أن من يريد شيء عليه أن يسعى للحصول عليه مادام منطقياً..حتى لو كان بقناعاته..

لا تنظري للأمر أنه منهج غريب..

هي رغبات وقناعات..!

أنتي مقتنعه جزئياً بأن هذه المصاريف لو كانت بالزواج أفضل..

وأنا أرى العكس..!


ولا مجال لمقارنة حفلة تأتي بالعمر مره..مع السفر وكل لحظه طالع برأسي موال..!

هذا مرض..!


ترين هذا المبدأ يكسر كل قوانين التفكير المتزن..

عليكِ إذاً بمساعدة الأخت السائله بذكر ملتزمات الحفل المقتصد وإفادتها..

فهي أحوج بإقناعك..وأحوج للإقتصاد..مع العلم بأنها هي من ذكرت

لا تهمها المصاريف..!




تحيتي,,,

[الفتـ الذهبي ـى]

الله يوفقك .. << يفكر بالعرس الله يعين :)

[بنت بريدة سابقا]

الله يوفقك اهم شيء

ومقدما بارك الله لكما وبارك عليكما وجمع بينكم بخير

[قناص]

الله يرحم ايام زمان لاشبكه ولا فكه
كله لاصار يوم العرس زبطو امورهم
الله يوفقك ويجمع بينكم بخير مع اني اتوقع انك تزوجتي قبل ماادخل للموضوع واشارك ومالك منا الا الدعاء بظهر الغيب