اليوم أنا وبنــات جــامعة الامام داومنا في الشوارع [الأرشيف]

مشاهدة النسخة كاملة : اليوم أنا وبنــات جــامعة الامام داومنا في الشوارع

..روز..

30-04-07, 02:45 pm

السلام عليكم ورحمة الله وبركاته ...

اليوم في الطريق وأنا رايحة الجامعة قلت لأبوي إني بغيب الثلاثاء والأربعاء .. جاي على بالي أدلّع نفسي مليت من التعب والغثا

أبوي من الفرح بغى يسجد سجود شكر بالطريق لأن المشوار بعيد مرة علينا

فجأة وبدون مقدمات حسيت إني بموت اليوم ... ماأدري كيف جاء هالفال الشين براسي

حتى إني اقتنعت .. وجلست أقرا الأذكار الي تقي دخول النار والأدعية المهمة ..ومن الحماس صوتي ارتفع فقال لي أبوي : روز وش فيك ؟؟

أنا : مافيني شي لكن عندي إحساس إني بموت اليوم

هو : تشفيــــــــــــــــــــــــــــــــــــــــــــــ ــــــــر

نزلت للجامعة .. نسيت موضوع الموت .. وجري جري على قاعتي ..

بعد عشر دقايق من بداية المحاضرة هجموا على قاعتنا بنات : اطلعوا من القاعات ..! اطلعوا من القاعات . .. ! اخلوا المبنى ..!

لحظة !! أنا أذكر إن فيه آدمية بجنبي ..! شلون طارت ؟؟

طلعوا البنات من القاعة وأنا للحين مو مصدقة الخبر .. أخاف أطلع ويصير استهبال وإلا إشاعة متخلفة ..

لكن يوم فضت القاعة صدق .. ومارجع أحد .. قالت لي صديقتي شكل الدعوى جد ..

ما ادري ليه كنت مستهينه بالموضوع حتى إني شلت شنطتي وتركت عبايتي .. بس هي الله يعافيها شالتها لي ..

حبّت إنها تلطّف الجو شوي ..

قالت روز .. احتمال هذا آخر يوم لنا (بعدين قلبت على اللغة العربية) لأجل ذلك سأعترف لك بشيء..

أنا : ماهو ؟؟

هي : سأعترف لكِ بأنني كنت أنعتك بالحمقاء

أنا : سأعترف لك بأنني كنت أغار منكِ

هي : سأعترف لكِ بأنني حتى أنا كنت أغار منكِ

قطع علينا ضحكنا صوت موظفة الأمن ..

بسرعة بسرعة على تحت ..البسوا عباياتكم وعلى تحت

التفت للجهة الثانية القاها تصارخ أخلوا المبنى أخلوا المبنى

والي قدامي تطالعني : بسرعة البسي عباتك وانزلي .. الحين الحين

والمكان فيه تدافع وصراخ بنات .. والموظفات كلامهم يخوف أكثر

بعدين شميت ريحة كهرب .. وعرفت إنه التماس

فيه هذا اللحظة أنا خفت ..كيف عرفت إني خفت ؟؟ لأني حسيت إن سيقاني ضعيفة وإني بأطيح ..

وتذكّرت أعز صديقاتي .. كانت بقاعة ثانية ولا أدري عنها ومن قرادة حظي ماجبت معي الجوال اليوم

والموظفات على روسنا : انزلوا انزلوا .. طيب وش فيه أنزل من كذا ؟؟ هذانا قاعدين ننزل...

الأسياب كانت مرة مزحومة .. وصلنا للبوابات وكانت مشرّعة ، لبسنا عباياتنا وطلعنا ...

----------------------------------

يوم طلعت لقيت أمة لاإله إلا الله برّا ...!

سوااااااااااااااااااااااااااااد عظيم ..!

ماشاء الله ما أدري كيف الجامعة شايلتنا ..

شلون ما انفجرت من زمان..

عاد الوضع برّا الي يصيحون والي يضحكون .. ووحدة قاعدة تسولف مع صديقاتها ونقابها بيدها ..! ما أدري على بالها ضرورة ويجوز تكشف وجهها..

وياحرام تشوفون البنتين بعباية والثلاث بعباية... حالة !!

المهم حمستنا الشمس ليييييييييييييييين قلنا بس..

الجو مرة حار .. ومافيه ظل ..

طبعا جت سيارات الدفاع المدني ...

وحنّا طوووووووول الوقت برّا .. مادريت إلا جاء رجل الأمن يصارخ : يالله على قاعاتكم .. على قاعاتكم .. ادخلوا

أقبح جملة سمعتها ..! على كيفكم هو..؟ تروعون العالم بعدين تقولون ارجعوا..

بس البنات ياطول لسانهم قاموا يقولون لرجل الأمن كلام أستحي أقوله بيني وبين نفسي ..

دخلنا الجامعة لكن أكثر البنات ظلوا برّا ..

وكانت الكهربا طافية .. كشفت وجهي وطالعت البنات وجيههم تللللللللللللمع من الحر .. عاد الي حاطين مكياج سالفة ثانية..

فصخت عباتي ورحت لقاعتي حطيت الشنطة والعباية بعدين رحت جري جري جري لقاعة صديقتي ...

ولا لقيتها

رجعت وأنا كلّي إحباط وأقول لنفسي : ليه يا روز ماجبتي الجوال معك

وألمحها واقفة عند قاعتي

طيراااااااااااااااااااااااااااان لمها سلمت عليها .. قالت إني دخلت قاعتكم أدوّر عليكم .. لقيتها فاضية ..يوم شفت شنطتك حسيت بأمان ..

زي ماقلت الكهربا كانت طافية .. يعني مافيه مكيفات.. يعني مافيه دراسة ...

الجامعة كانت فاضية نوعا ما .. جلسنا نسولف شوي ونتمشى بالأسياب ..

بعدين فجعنا صوت صراخ ..

كنا بالدور الثالث والصوت من الدور الأرضي..

طلّيت أشوف وش السالفة ..لقيت رجال الدفاع المدني مقتحمين المكان بدون إحم ولادستور فردة فعل طبيعية من البنات إنهم يصارخون

طيب مادام الموضوع هيّن ليه هالإقتحام؟؟؟

مريت بمجموعة بنات أحبهم بس علاقتي معهم سطحية قلت لهم : بنات تراني أحبكم من زمان بس ماقد قلت لكم وهذاي الحين قلت لكم ..

ضحكوا وقالوا وحنّا نحبك .. ووحدة قالت روز انتبهي تغيرين كلامك بكرا...!

المهم ..مرّ وقت .. وحنا ماندري ...(نطلع) وإلا (نجلس) ..؟

فجأة تذكرت إن خالتي دكتورة في الجامعة .. لاحظوا تذكرت فجأة ..

دخلت عليها ولقيتها لابسة عبايتها .. قالت لي تعالي معي .. الحين البسي عبايتك واطلعي معي ..

قلت لها : أنا أرجع مع باص خاص وهو موجود تحت

لا لا تعالي معي

أنا : لامعليش بأرجع معه

قالت أجل اطلعي هالحييييييييييييييييين وقولي لصديقاتك يطلعون

حسيت إن الوضع خطير نوعا ما ..

قلت لصديقاتي لازم نطلع

وحنّا نازلين سمعنا صوت الجرس من جديد ...

توجهنا لمكان البوابات وكان الإزدحام مرة شديد .. وبوسط هالزحمة وبهالأوضاع الكئيبة لمحنا فلاش ..

وأثرها بنت تصور...!!!!!!

بعدين مرّة ثانية رجعت تصور هالوقحة وبفلاش بعد ..! ياعيني عالبجاحة ..

موظفات الأمن مابيدهم شي .. والتصوير كان من جهتهم .. قاموا يدعون عليها :

الي صورت جعل ايدها تنكسر.. جعل ربي يعاقبها .. الله لايحللها ولايبيحها

الحمد لله كنا وراها يعني ماطلعنا بالصورة ..بس لو كنا شايفينها ماخليناها .. مندعسة بالزحمة تصور العالم..

فعلا انسانة حقيرة ومتخلفة ...

طلعنا وأثر الدنيا زحمة .. والإسعافات منتشرة .. والشرطة بكل مكان .. حالتهم حالة ..

والبنات يركبون أي باص يشوفونه سواء كان خاص وإلا تبع الجامعة ..

والدنيا حر مووووووووووت .. ركبت الباص حقي ولقيت العدد مكتمل والبنات يحتروني .. يعني أنا الي قاطعتهم ..من الفشيلة صرت أصغر من النملة ..

لكن الحمد لله صارت وحدة منهم تنظر صديقتها بتركّبها معها ...

قالوا البنات بننزل نشتري موية من البقالة .. يوم نزلوا قلت طفش أنتظرهم بروح مع صديقاتي لين يرجعون ..

نزلت لصديقاتي وهالني المنظر.. الشوارع كلها بنات وموية بنات وموية بنات وموية ...

والوضع مرة مضطرب ..

وياحرام رجعوا البنات مامعهم موية يقولون خلّصت !!

بس يوم ركبوا باشر عليهم السواق بموية الله يعافيه

والحمدلله وصلت لبيتنا بسلام وما متّ ...

والحمدلله على سلامة الباقين ..

للعلم ..المركز مفتوح له أقل من ثلاث سنوات وهذا ثاني التماس يصير ..

المهندسة اليوم تصيح .. تقول أنا كنت خايفة من هالشيء من زمان .. لكن هم يرفضون يدخلوني غرفة الكهرب وأنا عارفة إن فيها مصيبة لأني لاحظت إن الأسلاك سالب وما أدري إيش كلام مافهمته أنا >>>أنا = روز

لكن الي عرفت إن فيه تلاعب غير طبيعي .. حتى هي تقول ماخليت أحد ماكلمته وماخليت خطاب إلا ورفعته مابقى إلا الملك عبدالله هو الي ماكلمته

تقول حتى المكيفات يكتبون إنها (من النوع الفلاني والي قيمته عشرة آلاف) والي موجود قيمته ألفين بس

ويحسبون قيمة خمسين ريموت للأستاذات ومافيه إلا ريموت واحد ، هذا غير الطابعات وأجهزة الكمبيوتر ..

من جد مهزلة ..

عاد نشوف وش بيسوون >>>>>>عارفة إني بردد ياليل ماطولك

آآآ صح ..! أول كنت مخططة أغيب الثلاثاء والأربعاء .. الحين كل البنات بيغيبون معي :)

اتعبني خطااااك

30-04-07, 02:54 pm

ياعمري
الله يكون بعونكم
والشكولله ترئ الصبر زين

ثامر الناصر

30-04-07, 03:04 pm

بقدر ماهي محزنة القصة الا انك لطفتيها بالطرافة بعض الشي ..

لكن الصراحة مصيبة .,. واللي قهرني وشلون رجال الامن يقولون لكن ادخلن للقاعات مرة ثانية والالتماس موجود وخصوصآ انكن طلعتن !!

والحمد لله على سلامة الجميع واحمدي ربك الان جاك غياب يومين بعذر لانك كنتي تبي تاخذيه بدون عذر ..

وفي اي جامعة حصل الكلام جامعة الرياض ؟؟

واللي تقهر صحيح اللي تصور جعل يديها للكسر والله تصور هالبنات صز ماتستحي والله !!!

وشكرا

نصر 2010

30-04-07, 03:20 pm

الحمد لله على سلامة الجميع

حبة سكر

30-04-07, 03:24 pm

الزنبقة

30-04-07, 03:28 pm

ليتك مخططة على اسبوع
دام الدعوة صارت للجميع ..
يالله الحمدالله على السلامة .. تعيشون وتاكلون غيره .

آHــــــــــاT

30-04-07, 03:39 pm

يووووووووووووه
يا كثر قرقك

عجزت اكمل مليت

لكن اقول الحمد لله على السلامة

@ ابتسام @

30-04-07, 03:58 pm

فلم مش بطال

الله يعينكم على هالتسيب

هادي الطبع

30-04-07, 04:11 pm

حمداًلله على سلامتكم

خـــــــــــــــالـــــــــد

30-04-07, 04:14 pm

الحمد لله على سلامتكم

و لاحظت من سردك ..

1- عدم التنظيم في مهالجو الموقف من قبل الدفاع المدني واداره الكليه .. مره اطلعوا و ومره ارجعوا ومره مداهمه رحال الدفاع !!

2- لكن الي عرفت إن فيه تلاعب غير طبيعي .. حتى هي تقول ماخليت أحد ماكلمته وماخليت خطاب إلا ورفعته مابقى إلا الملك عبدالله هو الي ماكلمته
تقول حتى المكيفات يكتبون إنها (من النوع الفلاني والي قيمته عشرة آلاف) والي موجود قيمته ألفين بس

اذن لصوص المناقصات حقيقه و ليس كلام العامه !!!

دينا

30-04-07, 04:31 pm

يا قلبي الحمد الله على اسلامه
وياحبيلك انتي واسلوبك

عطر الندى

30-04-07, 06:15 pm

الحمد لله على سلامتكم

بنت المملكة

30-04-07, 06:52 pm

الحمد لله على سلامتكم.... وعلى طول أرسلت رسايل لصديقاتي الي بالجامعة معك.. أطمن عليهم..بس بعض البنات الله يهديهم يقهرون لا افتشوا.. ومسوين فيها حركات..

Miss_Autumn

30-04-07, 07:37 pm

عبيـــر الـــورد

30-04-07, 07:53 pm

أهليييييين روز

الله يقطع إبليسك يا عليك اسلوب ما شاء الله ,, عيني عليك بارة ,, الله لا يضرك

شوفي أنا جيت من رداة حظي متأخرة يعني على فتحة الباب وانطلاق القطعان .. كان

السواد على امتداد الأفق .. أصلاً تحسين إنهم زي النمل وبزر شايلهم وراكمهم على بعض ....

يا ربيه ما أمل من تغزلي فيهم ... المهم أنا جيت ودخل أبوي عند المكان إللي دايم يوقفني فيه .. شاف

رجل الأمن وقاله : فيه شي يعني نغيبهم ...ضحك حق الأمن ورفع يدينه وقال كيفك ... أبوي وقف مكان

الباصات وقال (( تغيبين )) أنا كني مقروصة على غير عادتي (( لااااا ما أقدر )) هو (( ليه عندك اختبار))

أنا أبرر (( لا بس مستهلكة كل غيابي )) وأنا دارية إنه ما فيه تحضير بس قلت أخلي صديقتي داخل وأنا لا ...

تأبى المروءة المهم أبوي راح للبقالة وجاب لي شراب تفاح <<< حللللوة شراب ... أنا استحيت فيه وشربته

يوم وصلنا للجامعة مرة ثانية ... قال أبوي (( الله يا كثرهم ما كنت أدري إن العدد كبير لهالدرجة )) أنا في

بالي (( هه ما شفت شي )) وقف أبوي وكلمت وحدة من البنات لأن صديقتي يوم دقيت ردت أختها ((هي ناسية

الجوال ..ليه في شي )) على طول (( لا بس أنا أبيها )) البنت إللي كلمتها كانت خايفة (( عبير أنت وينك ؟؟؟))

أنا (( بالسيارة ألحين أبي أنزل وينكم ؟؟ )) ردت وهي ودها تصيح (( أنت مهبولة احمدي ربك إنك توك بالسيارة

ارجعي لبيتكم )) أنا ودي أصطرها وبنفس الوقت قلت ما أبي أكذب على أبوي وأقول ما فيه شي سألتها (( أنت

شفتي شي وإلا لا ؟؟؟ )) قالت (( لا )) تبي تكمل كلامها أنا (( خلاص هذاني جايتكم )) وقلت لأبوي إللي كلمتها

تقول ما شفت شي ..... المهم أنا ودي أنزل وأبوي معيي (( اصبري )) سمعت حق الأمن يقول ارجعوا لقاعاتكم

قلت لأبوي اسأله أنزل سأله وقال كيفكم بس ما فيه شي ... وقف أبوي عند مكان كللللله بنات يبي ينزلني أنا

فررررحانة إلا أسمع صراخ من جهة أبوي ... ورا بنات قليلات أدب يصارخون (( آآآآآآآعععععععه آآآآعععععه

<<< على بالهم رقيقات .. أبوها ينزلها والدنيا ترجع شوفوا شوفوا )) وبتلوا يصارخون أنا وصلت معي

والله كان ودي أفتش وأشر بيدي خيييييير بس عاد مسكت نفسي <<<< قوية خخخخخ

دخلت بالجامعة وشفت البنات إللي تصيح وإللي تخم صديقتها وأنا كني بزر طايرتن بوهتي وما غير أوايق

بوجيهم أدور البنات .... ولقيت صديقاتي وضحكنا .... يا ربيه يوم جميل بحق بس البنات خربوه شوي

تراني يا روز مختصرة الأحداث مررررة أخاف أطول عليك فيه أشياء صارت بعدين شكلك ما لحقتي عليها

إيه الحمد لله على السلامة .... يمكن بعدين أرجع وأقول بعض المواقف إللي شفتها

تقبل مروري الثقيل خيتووووووو

لحن الحياة

30-04-07, 08:30 pm

الحمد الله على سلامتكم ..... وماتشوفون شر

صراحه خيتووو أسلوووبك مرره حلوووو ... مشاء الله عليك ...

أختي روز اسمحي لي بـ علق على رد من الردوود
ففي جميع الأحوال..لا يوجد شيء تفعله الحكومة الموقرة من غير أخطاء و أضرار أو سلبيات قد تكون اكبر من ايجبابيات ربما..!

ودي أعرف وش دخل الحكومه.. الحكومه ياحبيبتي موظفه ناس لـ هذا الشي بس هم مايقوومون بـ واجبهم ...
وإلا الحكومه ماتقصر أبداً أبداً... وهذا شي لازم نشكر ربنا عليه ... لانها أكبر نعمه...الله يديمك ياحكومتنا ....

وبعد روز تعليق ثاني...

يا ربيه يوم جميل بحق بس البنات خربوه شوي

ههههههههههههههههههههههههههههههههههه

الله يقطع بـ ليسيك يا عبير الورد ... وربي مت ضحك أجل البنات
يصحووون وأنتي يوم جميل ... بس تصدقين أحسن شي أنو تشوفين أشكال البنات في ذلك الوقت يحلوو التشمت>>> استغفر الله

~رووووز~

تقبلي مروري يالغلا

شكــــراً لك

جبل السكر

30-04-07, 08:43 pm

الحمــــدللـــه عــــلى ســــــلامة الجمــــيع

الــــــدول فــي تقـــــدم ونحــن فــي تأخـــــــر،،

تحيتـي

the-moon

30-04-07, 09:20 pm

شموع تحت المطر

01-05-07, 12:17 am

ويستمر مسلسل الاخطأء

والضحية القادمه لااحد يعرف من هي......

الحمدلله على سلامتكم،،وهذي استفتاحية مدير الجامعة

الجديد..

الالماني

01-05-07, 12:59 am

الحمدلله على سلامتك وسلامتي بس انا مستانسه مرررره لان محاضرة سميه السلطان راااحت
بس عاد انا ضاق صدري من اللي سون البنات اليوم لا والمشرفات اللي يهاوشن البنات ادخلوا مافيه شي وهي لابسة عباته تبي اسرعله تطلع واللي قاعده تلط بخشته مكياج والرجال يدخلون واللي تدق للعسكري تحيه قلة ادب بس توي اكتشف ان البنات مايستحن
بس اللي اعجبن من هذا كله هوش المهندسه ام احمد على الموظفات وعلى الحجازيه اللي يقالي مهندسه وانا اسمع اللك عبد الله بس ماادري وش السالفه

هههههههههههه

صحيح والله تدق للعسكري تحية والله أنها فسقانه
شكلها مو بها لدنياء يعني ترللي يعني المخ بح مافيش
لكن الله يهديها ويهدي كل بنت من بناتنا

..روز..

01-05-07, 01:37 am

ياعمري
الله يكون بعونكم
والشكولله ترئ الصبر زين

هلابك طيف ..

زي ماقلتي الصبر زين ..أصلاً دراستنا بهالجامعة جهاااااااااد..

مشكورة على مرورك

بقدر ماهي محزنة القصة الا انك لطفتيها بالطرافة بعض الشي ..

لكن الصراحة مصيبة .,. واللي قهرني وشلون رجال الامن يقولون لكن ادخلن للقاعات مرة ثانية والالتماس موجود وخصوصآ انكن طلعتن !!

والحمد لله على سلامة الجميع واحمدي ربك الان جاك غياب يومين بعذر لانك كنتي تبي تاخذيه بدون عذر ..

وفي اي جامعة حصل الكلام جامعة الرياض ؟؟

واللي تقهر صحيح اللي تصور جعل يديها للكسر والله تصور هالبنات صز ماتستحي والله !!!

وشكرا

مشكور أخوي ثامر على كلامك الطيب ..

ورجال الأمن مايدرون عن شي .. محتاسين مثلنا ..

وبالنسبة للغياب حظي خدمني ولأول مرة :)

هذا حصل في جامعة الامام الي بالبطحاء .. بجنب المحكمة الكبرى ...

والقبيحة الي تصور جتها دعاوي أشكال وألوان .. تستاهل

مشكور على حرصك الله يبعد عنك كل مكروه ..

الحمد لله على سلامة الجميع

الله يسلمك من كل شر ...

..روز..

01-05-07, 01:43 am

الحمدلله على سلامتك وسلامتي بس انا مستانسه مرررره لان محاضرة سميه السلطان راااحت
بس عاد انا ضاق صدري من اللي سون البنات اليوم لا والمشرفات اللي يهاوشن البنات ادخلوا مافيه شي وهي لابسة عباته تبي اسرعله تطلع واللي قاعده تلط بخشته مكياج والرجال يدخلون واللي تدق للعسكري تحيه قلة ادب بس توي اكتشف ان البنات مايستحن
بس اللي اعجبن من هذا كله هوش المهندسه ام احمد على الموظفات وعلى الحجازيه اللي يقالي مهندسه وانا اسمع اللك عبد الله بس ماادري وش السالفه

الحمد لله على سلامتك حبة سكر ..

أجل فرحتي عشان محاضرة علوم القرآن فاتتك ..! إيه والله ماتنلامين ..

وياحياتي توك تكتشفين إن البنات مايستحون ...؟

آه بس متى أتخرّج ..!

ياعمري المهندسة ... هي أكثر وحدة شلت همها ..

عموماً .. الحمد لله على سلامتك وسلامة صديقاتك وإن شاء الله ماتشوفين مكروه ...

عقبال التخرّج (بالسلامة ) :)

..روز..

01-05-07, 01:57 am

ليتك مخططة على اسبوع
دام الدعوة صارت للجميع ..
يالله الحمدالله على السلامة .. تعيشون وتاكلون غيره .

اسبووووووووووع !!!!!

هههههههههههه لو دارية كان خليتها شهر...

الله يسلمك من كل شر ...

يووووووووووووه
يا كثر قرقك

عجزت اكمل مليت

لكن اقول الحمد لله على السلامة

معليش أنا طوّلت في الموضوع وماراعيت الناس المهمين والي ماعندهم وقت مثلك ..

ياليت تعذرنا يا أخ آهات >>>>حتى مبين من اسمك انك مشغول ما أدري كيف تجرأت أنا وطوّلت موضوعي .. !!!!

أجل تقول الحمدلله على السلامة ..؟؟؟

هه ! الله يسلمك يا أخ ..

فلم مش بطال

الله يعينكم على هالتسيب

الفيلم حلو بس كله كومبارس ..

صحيح الدعوى كلها تسيّب .. بس وش بيدنا ..؟؟؟ ليت الإضراب ينفع

شكرا على مرورك

حمداًلله على سلامتكم

هلابك أخوي هادي ..

الله يسلمك من كل شر ..

Tulane

01-05-07, 02:01 am

الله يعينكم ي روز بصراحه موقف ماتحسدون عليه

..روز..

01-05-07, 02:04 am

الحمد لله على سلامتكم

الله يسلمك أخوي خالد ...

اذن لصوص المناقصات حقيقه و ليس كلام العامه !!!

ما أدري كيف يرضون ياكلون من مال حرام .. وماأدري كيف مستسهلين الأمر...

المشكلة إن المهندسة دارية عن كل شي بس محد ملقيها وجه ..

يا قلبي الحمد الله على السلامه
وياحبيلك انتي واسلوبك

هلابك دينا ..
تسلمين ياعمري .. والله يسلمك من كل مكروه ..وياحبي لك أنتِ ومرورك ..

وهج المشاعر

01-05-07, 02:05 am

يا ويلي ويلاااااااااااااااااااااااهـ

لمبة شارع

01-05-07, 02:18 am

روز

اقول لك الصدق!!!؟؟

قريت الى النصف وبعدين نزلت للردود عشان آخذ الزبدة!!!

لقيتهم تكلموا عن فوضى التنظيم في حال الطواريء

اللي خلاني اسجل هذا الرد هوليش عجزت اواصل في القراءة للآخر ؟

..روز..

01-05-07, 02:20 am

هلابك أخوي شايب سمنسي

دائما أحب اقرأ لك سرد ممتع وغير ممل

تسلم لي يالشايب .. دايم تخجلنا ...الله يخليك ..

دائما ياروز في البلد التنظيم عشوائي والا من النفترض انه وفي اي حالة طارئة تكون فيه استعدادات منظمة من مخارج للطوارئ وقاعات مؤمنة وتوفير اجواء ملائمة للحالات هذي

طبعا لايمكن يكون عندنا مثل كذا لاننا مو في بلد غربي عاش على حب التنظيم والمسؤول مسائل والاستقالة جاهزة عند اي غلط

والله فشلة ..! مابقى شي على يوم القيامة وحنّا للحين ماتطورنا .. الدنيا بتنتهي .. بتخلّص ! وحنّا نخطي خطوة لقدام وعشر لورا ...

لكن خليها على ربك

ليتني كنت موجود كان اسوي فيها فزعة ( مو لله ) بس نبي نشوف الغنادير ( شايب مراهق) لاتشرهون عليه

طالعة من قلب ....!

ههههههههههه

الحمد لله ماكان فيه تجمع شباب ولاشي .. هذا أحسن شي في الموضوع ...وترا لو جيت بترتاع من أشكالهم .. وإلا بتفتح باب سيارتك وحدة عربجية وتقول لك وصلني لبيتي ...

تحياتي لقلمك الممتع

مشكور وهذا من ذوقك ....

نسيت اقول اني اشم ريحة غيرة وحقد في بعض الردود

غيرته وحقده على نفسه ... وده يقول تراني موجود انتبهوا لي ومالقى غير هالطريقة ...

حنيش الملز

01-05-07, 02:22 am

الحمد لله على السلامه

..روز..

01-05-07, 10:47 am

الحمد لله على سلامتكم

الله يسلمك ياعطر الندى ...

الحمد لله على سلامتكم.... وعلى طول أرسلت رسايل لصديقاتي الي بالجامعة معك.. أطمن عليهم..بس بعض البنات الله يهديهم يقهرون لا افتشوا.. ومسوين فيها حركات..

هلابك بنت المملكة ...الله يسلمك ، والحمد لله على سلامة صديقاتك ...

والي افتشوا الله يعافيهم ولايبلانا ...

..روز..

01-05-07, 10:58 am

.
[ اقتحااام - تصويييير - بنات صاروا مُفتيات.! ] = شعب الله بالخير..! = راايح فيها..!
.
بالنسبة للالتماس ومشاكل المبنى .. والمشاكل كلها بشكل عام..!
.
أعتقد هالاشياء هذي:
.
اشياء طبيييييييييييييعية .. المفروض اعتاد عليها الشعب السعوددي من زماان ..! :)
.
ففي جميع الأحوال..لا يوجد شيء تفعله الحكومة الموقرة من غير أخطاء و أضرار أو سلبيات قد تكون اكبر من ايجبابيات ربما..!
.
و ما [ يزيد الطين بلّه ] انه في اغلب او جميع الاخطاء الواقعة..
يكون لديهم علم بوقوعها..لكن رغم ذلك..يتم التجـاهل..او في قائمة الانتظار..او حتى خارج القائمة..!! :)
.
عموما..ما اقول الا الله يصبر الجميع..من شعب..وحكووومة..!
.
.
و الحمد لله على سلامـتـك أختـي روز..وسلامة من معـك..
.
وعلى فكرة ذكرتيني في التماس كهرب صار في مدرستي الابتدائية قبل تقريبا 6 او 7 سنوات..! < لاحظوا من كم واخطاء حكومتنا موجوده < :)
وكانت الحالة نفس الحالة واشد..اطفال و صراخ + بكااااااااء و اغماءاات..!! ودفاع مدني و بوليس واسعاف واولياء امور و وو و و...!
لكن الحمدلله...وقتها العآلم كـآنوا باقي ما عرفوا موبايلات الكاام....فـ نجوا المعلمات من التصوير..! :)
.
اعتذر ع ـالاطـآلـة..
.
.
تقبلوا أطيب تحيـة
.
miss autumn

أهلين أختي miss autumn

الجملة الي تحتها خط مافهمتها :) والصراحة أنا ما أحب أسوي نفسي فاهمة ..

بالنسبة للالتماس أنا متعودة عليه من أيام الثانوي ...وكانوا يطلبون منا إننا مانشغل المكيفات عشان العداد مدري الطلبون مايتحمل ..

دراسة ممتعة بحق !!

وكانت المدرسة مهددة بالسقوط لأن عمرها الإفتراضي انتهى من زمان .. بعد ماطلعنا منها بسنتين قفلوها

أمنيتنا كانت إنها تنهد بخميس أو جمعة .. لكن للأسف واصلنا دراستنا فيها ثلاث سنين بها المبنى الي يكح ..

عموماً الله يسلمك أختي .. ولاتشوفين مكروه بنفسك وبمن تحبين ...

ولد الديره

01-05-07, 10:59 am

الحمد لله على سلامتكم

..روز..

01-05-07, 11:15 am

أهليييييين روز

الله يقطع إبليسك يا عليك اسلوب ما شاء الله ,, عيني عليك باردة ,, الله لا يضرك

شوفي أنا جيت من رداة حظي متأخرة يعني على فتحة الباب وانطلاق القطعان .. كان

السواد على امتداد الأفق .. أصلاً تحسين إنهم زي النمل وبزر شايلهم وراكمهم على بعض ....

يا ربيه ما أمل من تغزلي فيهم ... المهم أنا جيت ودخل أبوي عند المكان إللي دايم يوقفني فيه .. شاف

رجل الأمن وقاله : فيه شي يعني نغيبهم ...ضحك حق الأمن ورفع يدينه وقال كيفك ... أبوي وقف مكان

الباصات وقال (( تغيبين )) أنا كني مقروصة على غير عادتي (( لااااا ما أقدر )) هو (( ليه عندك اختبار))

أنا أبرر (( لا بس مستهلكة كل غيابي )) وأنا دارية إنه ما فيه تحضير بس قلت أخلي صديقتي داخل وأنا لا ...

تأبى المروءة المهم أبوي راح للبقالة وجاب لي شراب تفاح <<< حللللوة شراب ... أنا استحيت فيه وشربته

يوم وصلنا للجامعة مرة ثانية ... قال أبوي (( الله يا كثرهم ما كنت أدري إن العدد كبير لهالدرجة )) أنا في

بالي (( هه ما شفت شي )) وقف أبوي وكلمت وحدة من البنات لأن صديقتي يوم دقيت ردت أختها ((هي ناسية

الجوال ..ليه في شي )) على طول (( لا بس أنا أبيها )) البنت إللي كلمتها كانت خايفة (( عبير أنت وينك ؟؟؟))

أنا (( بالسيارة ألحين أبي أنزل وينكم ؟؟ )) ردت وهي ودها تصيح (( أنت مهبولة احمدي ربك إنك توك بالسيارة

ارجعي لبيتكم )) أنا ودي أصطرها وبنفس الوقت قلت ما أبي أكذب على أبوي وأقول ما فيه شي سألتها (( أنت

شفتي شي وإلا لا ؟؟؟ )) قالت (( لا )) تبي تكمل كلامها أنا (( خلاص هذاني جايتكم )) وقلت لأبوي إللي كلمتها

تقول ما شفت شي ..... المهم أنا ودي أنزل وأبوي معيي (( اصبري )) سمعت حق الأمن يقول ارجعوا لقاعاتكم

قلت لأبوي اسأله أنزل سأله وقال كيفكم بس ما فيه شي ... وقف أبوي عند مكان كللللله بنات يبي ينزلني أنا

فررررحانة إلا أسمع صراخ من جهة أبوي ... ورا بنات قليلات أدب يصارخون (( آآآآآآآعععععععه آآآآعععععه

<<< على بالهم رقيقات .. أبوها ينزلها والدنيا ترجع شوفوا شوفوا )) وبتلوا يصارخون أنا وصلت معي

والله كان ودي أفتش وأشر بيدي خيييييير بس عاد مسكت نفسي <<<< قوية خخخخخ

دخلت بالجامعة وشفت البنات إللي تصيح وإللي تخم صديقتها وأنا كني بزر طايرتن بوهتي وما غير أوايق

بوجيهم أدور البنات .... ولقيت صديقاتي وضحكنا .... يا ربيه يوم جميل بحق بس البنات خربوه شوي

تراني يا روز مختصرة الأحداث مررررة أخاف أطول عليك فيه أشياء صارت بعدين شكلك ما لحقتي عليها

إيه الحمد لله على السلامة .... يمكن بعدين أرجع وأقول بعض المواقف إللي شفتها

تقبل مروري الثقيل خيتووووووو

هلابك عبير الورد ...

أولا ً الحمد لله على سلامتك ..

ومشكورة على كلامك الحلو الي في البداية ولو إني كنت كاتبة موضوعي وأنا طايرة لأني أبغى أنام >>>بدت تطلع الأعذار

أحييك على صياغتك للمشهد .. طلع مشهد تصويري ولا أحلى ...

أجل قاموا البنات يتشرهون على أبوك ...؟؟؟؟؟؟

إيه وش يعرفك بالرقة والدلع .. ليتك فاتشة وقايلة لهم (خير!!)

الي يسمعهم يقول إن أبوك مدخّلك بالعدّاد ومسكّر عليك ...

والله يهديك ياعبير تراك ماطولتي علي ولاشي ..ومرورك مهضوووووووووووم بس ليتك كملتي وش صار لأني ماكتبت لكم إلا الي شفت وعاينت..

حمّستيني :)

أختي لحن الحياة ..

الله يسلمك ياالغالية وأشكر لك مرورك ....والبيت بيتك قصدي المتصفح متصفحك ...

الحمــــدللـــه عــــلى ســــــلامة الجمــــيع

الــــــدول فــي تقـــــدم ونحــن فــي تأخـــــــر،،

تحيتـي

الله يسلمك أختي رواء الروح ...
شرفتيني بمرورك ...

الرأي الأول

01-05-07, 11:21 am

روز

صباحك ورد

كنت اعتقد انها معركه بينك وبين نفسك

لكن اكتشفت انها معركه مع اكثر من طرف اولا تدبير الامور بالنسبه للاداره

وثانيها الطوارى

وقت الطوارى يجب ان يكون الجميع مسئول خاصه بالتنظيم

وليس للهروب ولبس العبايات

لكن اللى اعرفه ان مشكلة الكهرباء دايم بالكله يعنى معقولة ماحلت

اشكرك على سردك تلك المشاهد التى تعبر عن اقصى درجات الفوضى

تحيتى لك

..روز..

01-05-07, 11:24 am

الحمد لله على سلامة كل بناتنا
واهم شيء طلعوا مافيه خسائر أرواح
ياليت وقفة من الحكومة لمراجعة وضع المباني الحكومية
فالذي يحصل مهزلة تتكرر كثيراً وإدارة مثل هذه الطوارئ أسوأ من الطوارئ نفسها

أتمنى للجميع السلامة وأن تعود الدراسة على خير مايرام
السؤال / اين وقع هذا تحديداً ؟

الله يسلمك أخوي ..

هذا صار بجامعة الامام مو الي في الملز الي في البطحاء ...

ويستمر مسلسل الاخطأء

والضحية القادمه لااحد يعرف من هي......

الحمدلله على سلامتكم،،وهذي استفتاحية مدير الجامعة

الجديد..

أهلين أختي شموع .. الله يسلمك من كل مكروه ..

ومسلسل الأخطاء للأسف مافيه حلقة أخيرة ..
وبالنسبة لمدير الجامعة.... الي أعرفه إنه من سنين هو المدير بس توّهم يحطونه في الصورة ..

أخوي الألماني مشكور على مرورك ...

الله يعينكم ي روز بصراحه موقف ماتحسدون عليه

هلابك كبرياء ...الله يجنبكم هالمواقف وأمثالها ...

الزراق

01-05-07, 11:25 am

الحمدلله علي السلامه

المخمليه

01-05-07, 11:26 am

الحمد لله على سلامتك بالغاليه
وموضوع حلو

..روز..

01-05-07, 11:39 am

وهج المشاعر ... كل الشكر على تفاعلك

روز

اقول لك الصدق!!!؟؟

قريت الى النصف وبعدين نزلت للردود عشان آخذ الزبدة!!!

لقيتهم تكلموا عن فوضى التنظيم في حال الطواريء

اللي خلاني اسجل هذا الرد هوليش عجزت اواصل في القراءة للآخر ؟

وأنا ش الله مكلفني أتكهن لك بالسبب ؟؟

لكن الأظهر والله العالم عشان موضوعي مافيه فرصة إنك تتهاوش فيه مع أحد .. وأنت إذا ضاق صدرك تحارشت مع ظلك... خصوصا وإنه في الأيام الأخيرة نفسيتك زفت ومطنقر على العالم ...

قريته كله وإلاقريت كلمة ماتفرق عندي ....

أنا أكره الإسهاااااب .. بس هالمرّة عشقته :)

..روز..

01-05-07, 11:49 am

ومن حريق مريع في جامعة البنات في بطحاء الرياض الى حريق ثانوية البنات بالشقـــه

لاحول ولاقوة الا بالله

الأسباب مقدما ( زيادة احمال وشوط كهرب )

ياوزارة التعليم العالي الغالي
ياوزارة التربيه والتعليم
ارحمونا من هالمباني المستهلكـــــه
أبنية تعود للقرون الوسطى وكهرب طل وحوسة وتكدس مثل ( علب) السردين

الحمد لله انا سجلت أختي في جامعه عربيه ( والاختيار يا القاهره أو بيروت )...

أخوي حنيش الملز ..مثل ماقلت الأسباب مقدما ( زيادة احمال وشوط كهرب )

مشكور على مرورك والله يوفق اختك بدراستها ..

ولفت نظري توقيعك ... مرة أعجبني ..

الحمد لله على سلامتكم

الله يسلمك من كل شر...

روز

صباحك ورد

كنت اعتقد انها معركه بينك وبين نفسك

لكن اكتشفت انها معركه مع اكثر من طرف اولا تدبير الامور بالنسبه للاداره

وثانيها الطوارى

وقت الطوارى يجب ان يكون الجميع مسئول خاصه بالتنظيم

وليس للهروب ولبس العبايات

لكن اللى اعرفه ان مشكلة الكهرباء دايم بالكليه يعنى معقولة ماحلت

اشكرك على سردك تلك المشاهد التى تعبر عن اقصى درجات الفوضى

تحيتى لك

أخوي الراي الأول

صباحك طاعة ...

والمشكلة ما انحلّت مع إن المهندسة تصيح عليهم من زمان ومحذرتهم من احتمال وقوع هالشيء..

كل الشكر لمرورك اللطيف ...

أختي منسمة ألف مرة ..

الله يسلمك .. ومشكورة على مرورك ..

أخوي الزراق ...

الله يسلمك من كل شر ..

مدام vip

01-05-07, 12:07 pm

عوض البشري

01-05-07, 12:17 pm

الله يعيينكم

بس الشئ الغير مفهوم ليه ماحطوا نقطة تجمع معروفه في حالات الحريق سووا عليها تجارب يعني يسوون خطة اخلاء او يسوون فرضية حريق

وهذا الشئ لازم يعمل في كل المرافق الحكوميه

على العموم الحمدلله على السلامه ولاتعودينها وتنسين جوالك

ămōяẻ

01-05-07, 12:30 pm

الف سلامة

اهم شي النجاح
وافتكى منهم

سردك رهيب
يصلح تكتبين رواية

والمشاكل الحريق اعتبرها شي عادى متعودين

بس ماتلاحون اكثر الحريق بمدراس البنات ليه ودى اعرف
والله من قل الاهتمام

..روز..

01-05-07, 12:48 pm

الحمدلله على السلامة

كذلك حصل في كلية التربية الاقتصاد المنزلي قبل سنتين .. ولكن ما طلعوا للشارع كثر ما دخلوا رجال الاطفاء على البنات و معاهم عساكر و ممرضين اسعاف وعلى رأسهم العمر يجوب الكلية برفقه العميد .... طبعاً .. من قدهم ... (( زملاء ))

الله يسلمك من كل شر ...

والي حصل في كلية التربية شكله حريق من كلامك .. يا أختي خلي الدفاع يدخل ولا البنات يطلّعون للشارع كل شوي دايخة علينا وحدة من الحر ..

مدام vip

أحس إنك معصبة وأنتِ تقولين (زملاء!!) ..

مشكورة على مرورك يا الغالية .. :)

الله يعيينكم

بس الشئ الغير مفهوم ليه ماحطوا نقطة تجمع معروفه في حالات الحريق سووا عليها تجارب يعني يسوون خطة اخلاء او يسوون فرضية حريق

وهذا الشئ لازم يعمل في كل المرافق الحكوميه

على العموم الحمدلله على السلامه ولاتعودينها وتنسين جوالك

أخوي عوض البشري ..

أشياء كثيرة غير مفهومة .. لكن ياويلك إن قلت لهم شي هم أعلم الناس وهم أبخص ...!!

الله يسلمك من كل شر .. وجوالي بشبّكة تشبيك بشنطتي ..وحتى إن غبت من الحرص ، بخليه هو يداوم ...!

بإذن الله ماراح أنساه والحياة دروس ...

..روز..

01-05-07, 12:56 pm

الف سلامة

اهم شي النجاح
وافتكى منهم

سردك رهيب
يصلح تكتبين رواية

والمشاكل الحريق اعتبرها شي عادى متعودين

بس ماتلاحظون اكثر الحريق بمدراس البنات ليه ودى اعرف
والله من قل الاهتمام

هلابك أخوي عموري ...الله يسلمك

هذانا نشيل ونحط بالجامعة والحمد لله الي باقي أقل من الي راح ..

ومشكور على مدحك للسرد الله يخليك ....

أول مرة أنتبه إن الحرايق وهالمصايب ماتصير إلا بأماكن البنات ...

يمكن لأن البنات دايم مبانيهم جديدة ومقرطسة ..!

قصدي إنها مباني منتهية ....

وتلّمح للمسؤولين إنها مو قد المسؤولية فماتلقى طريقة للفت انتباههم إلا بإشعال نفسها ..!

طبعاً أنا أقول يمكن ...!

مشكور على مرورك .......

قلم بريدة الأبيض

01-05-07, 02:24 pm

ما استعنيني روز بسلالم النجاة
بجد ترى هـذي الأمور ماتحتاج تفكير
دوووووووووووووووووسة وحدة للساحة؟؟
ألف سلامة للجميع00

لمبة شارع

02-05-07, 12:17 am

وأنا ش الله مكلفني أتكهن لك بالسبب ؟؟

لكن الأظهر والله العالم عشان موضوعي مافيه فرصة إنك تتهاوش فيه مع أحد .. وأنت إذا ضاق صدرك تحارشت مع ظلك... خصوصا وإنه في الأيام الأخيرة نفسيتك زفت ومطنقر على العالم ...

قريته كله وإلاقريت كلمة ماتفرق عندي ....

أنا أكره الإسهاااااب .. بس هالمرّة عشقته :)

ياروز الله يحفظك شكرا لك على تعبيرك وفق انطباعك الحر...ولن اسألك لماذا خضتِ في نواياي...وسامحك الله دائما...

أنا فقط ياروز قلت لك ماجاء في بالي عندما قرأت نصف المقال ..هذا كل مافي الامر وآسف اني سألتك لماذا لم اكمل القراءة...وعلى كل حال فقد قرأت النص كاملا هذا اليوم واستغربت تكرار الأعطال في شبكة الكهرباء وتجاهل تنبيهات المهندسة ولو أثرتم الامر بالصحف ربما تحدثون تأثيرا....

روز ...انت عضوة موضوعية دائما فلا تجعلي الانفعال يخرجك من طورك الموضوعي المعتاد...طبعا إن شئتي...ومسألة التهيوش ياروز ليست في أزمة فبإمكاني التقاط احد الرود واختلاق مشكلة حوله لو كان الامر كذلك...وتعلمين ان مناخ المنتدى جاهز للتهيوش في اي لحظة ..ولا نعاني نقص في الهوشات بل نعاني ازمة اريحية وموضوعية

بإمكانك روز عدم الرد على هذا التعقيب حتى لا ندخل في منطقة تشنج كالمعتاد عند اي تماس حروفي في هذا المنتدى...

الحصان الأسود

02-05-07, 04:30 am

روز

الف الف الف الف الحمدلله على سلامتك ..

وسلامة البنات ..

من هناك

02-05-07, 04:34 am

خليهم يسمعون ان جامعه بلبنان به صارور يمشي
والله وبالله ان تسّير المملكه جسر جوي كله مبيدات علشان صارور بجامعة بيروت ييي على عيونن ان شاءالله !

تاج القصيم

02-05-07, 04:55 am

الحمد لله على سلامة الجميع
الصراحة موضوعك يبي جلسة
لكن ماعندكم خلاف الحمد لله ارجعوا لقاعاتكم

Tulane

02-05-07, 07:18 am

،،،،،،،،،،،،

خطأ مطبعي

Tulane

02-05-07, 07:20 am

اقتباس:عوض البشري
بس الشئ الغير مفهوم ليه ماحطوا نقطة تجمع معروفه في حالات الحريق سووا عليها تجارب يعني يسوون خطة اخلاء او يسوون فرضية حريق

وهذا الشئ لازم يعمل في كل المرافق الحكوميه

ي عزي لك ي عوض
هذا الكلام بدول اوروبا و بالمناطق اللي عندها اهتمام وحرص بحياة الفرد وافراد المجتمع مو هنا ي حظي

وسوري ع العوده بس لازم اقول هالكلمتين لأني ان ماكلتهم بيطق فيني عرق

متغربه

02-05-07, 07:48 am

Miss_Autumn

02-05-07, 03:57 pm

HEll0
.
.
اختي لحن:
ودي أعرف وش دخل الحكومه.. الحكومه ياحبيبتي موظفه ناس لـ هذا الشي بس هم مايقوومون بـ واجبهم ...
.
طيب والحكووومة لييش تووظف هالناس الي ما عندها لا ضمير وما تحس بالمسؤولية ولا هي جديرهـ بالشغله الي اعطتها اياها الحكومه..؟
كل شيء في النهاية راجع للحكومه وهي المسؤولة عنه....!
.
وإلا الحكومه ماتقصر أبداً أبداً...
هي صحيح ما تقصر..لكن مو ابدا ابدا..! :)
.
وهذا شي لازم نشكر ربنا عليه ... لانها أكبر نعمه...الله يديمك ياحكومتنا ...
هو بالفعل الف الحمدلله على النعمة هذي..ونعمة وجود حكومة نعمة كبيرة عندما ننظر إلى دول تنعدم فيها الحكومه...! وينعدم دورها..!
.
لكن لو اطلنا النظر الى هذي الدول الي لا حكومة لها...راح يزيد اعجابنا بوضعنا مهما ساءت الاحوال فيه..و سنظل كما نحن..!
لكن لو نظرنا ايضا الى دول اخرى حكومتها وتنظيمها وكل ما فيها بخصوص التنظيم رائع..!
راح تتغير نظرتنا لما نحن فيه..صحيح سنرضى فيه..لكن ستكون هناك رغبة للوصول الى ما وصلت اليه تلك الحكومه..!
وهذا شيء غير مستحيل..!!
.
.
.
الجملة الي تحتها خط مافهمتها والصراحة أنا ما أحب أسوي نفسي فاهمة ..
روز..
.
ووحدة قاعدة تسولف مع صديقاتها ونقابها بيدها ..! ما أدري على بالها ضرورة ويجوز تكشف وجهها..
^
خلعها حجابها بحجة الضرورة..! ( رغم اني اتوقع انها خلعته بحجة [ الحرررر الشديد ] ) هو ما اقصده بـ [ بنات صـاروا مُفتيات ] ..

اتمنى يكون وضح لكِ القصد..
.
.
أطيب تحيـة
.
آنسـة الخـريـف
miss autumn

..روز..

02-05-07, 04:15 pm

ما استعنيني روز بسلالم النجاة
بجد ترى هـذي الأمور ماتحتاج تفكير
دوووووووووووووووووسة وحدة للساحة؟؟
ألف سلامة للجميع00

الله يسلمك ...

وأي سلالم الله يخليك ..؟ مصدّق إننا مهمين ..؟؟؟؟

ياروز الله يحفظك شكرا لك على تعبيرك وفق انطباعك الحر...ولن اسألك لماذا خضتِ في نواياي...وسامحك الله دائما...

أنا فقط ياروز قلت لك ماجاء في بالي عندما قرأت نصف المقال ..هذا كل مافي الامر وآسف اني سألتك لماذا لم اكمل القراءة...وعلى كل حال فقد قرأت النص كاملا هذا اليوم واستغربت تكرار الأعطال في شبكة الكهرباء وتجاهل تنبيهات المهندسة ولو أثرتم الامر بالصحف ربما تحدثون تأثيرا....

روز ...انت عضوة موضوعية دائما فلا تجعلي الانفعال يخرجك من طورك الموضوعي المعتاد...طبعا إن شئتي...ومسألة التهيوش ياروز ليست في أزمة فبإمكاني التقاط احد الرود واختلاق مشكلة حوله لو كان الامر كذلك...وتعلمين ان مناخ المنتدى جاهز للتهيوش في اي لحظة ..ولا نعاني نقص في الهوشات بل نعاني ازمة اريحية وموضوعية

بإمكانك روز عدم الرد على هذا التعقيب حتى لا ندخل في منطقة تشنج كالمعتاد عند اي تماس حروفي في هذا المنتدى...

لمبة شارع .. الصراحة أنا ماقريت ردك كلّه لكني لقطت بعض الكلمات من السطور الي فوق والي تحت عشان آخذ ( الزبدة )!!

لكن الي خلاني( أسجّل هالكلام ) ..ليه عجزت أقرا ردّك كلّه ...؟؟؟؟؟؟

هذه بتلك :36_1_12[1

وآسف اني سألتك لماذا لم اكمل القراءة..

أسفك مقبول يالمبة ...

روز

الف الف الف الف الحمدلله على سلامتك ..

وسلامة البنات ..

الله يسلمك من كل شر ... مشكور يالحصان ...

..روز..

02-05-07, 04:23 pm

خليهم يسمعون ان جامعه بلبنان به صارور يمشي
والله وبالله ان تسّير المملكه جسر جوي كله مبيدات علشان صارور بجامعة بيروت ييي على عيونن ان شاءالله !

ههههههههههههههه

دحكتني من صماصيم ألبي ...

ييي على عيونن إن شاء الله >>>>>أعجبتها الجملة

تكفى لا تقارننا بلبنان ....

الحمد لله على سلامة الجميع
الصراحة موضوعك يبي جلسة
لكن ماعندكم خلاف الحمد لله ارجعوا لقاعاتكم

الله يسلمك من كل شر .. هذانا رجعنا لقاعاتنا .. وهو احنا نِئدرَ نئول حاقة ؟؟؟؟

،،،،،،،،،،،،

خطأ مطبعي

ادفعي عشرة ريال .

..روز..

02-05-07, 04:30 pm

يوووووووه

الحمد لله على سلامتك ياروز

انا قريت الخبر بالجريده بس مادريت انك معهم

لكن انا مستغربه البرود اللي حصل لك

لو كنت مكانك والله لاهج لبيت اهلي على رجولي من الخوف

لكن الحمد لله اللي ماصار لكم شي

ولازم يشوفون حل للموضوع

الموضوع ماينسكت عليه

الله يسلّمك يامتغربة .....

وبالنسبة للبرود والله غصب علي .. ما أعرف أخاف ..

إلا من الحرامي >>>>ياقدمهااااااااا

لامن جد .. الحمد لله أنا متزنة في المواقف الي زي كذا .. يعني أموت بحريق ولا أموت مدعوسة بالزحمة ...

وبالنسبة للوضع المهندسة شاااااااااااابّة عليهم .. وتكلمت في جريدة الرياض أمس

بس ما ادري وش بيصير ..

مع إني سمعت إنهم أقالوها .. لكن أتوقع إنها إشاعة ... وإن شاء الله تكون إشاعة ...

مشكور ة متغربة صار لي زماااااااااااان عنّك ....

!!نوف!!

02-05-07, 04:33 pm

الحمد لله على سلامتكم

بس وين الجامعه هذي بالرياض ولا بالقصيم

ومبروك عليك الغياب ههههههههههه

..روز..

02-05-07, 04:35 pm

HEll0
.
.
.

روز..
.

^
خلعها حجابها بحجة الضرورة..! ( رغم اني اتوقع انها خلعته بحجة [ الحرررر الشديد ] ) هو ما اقصده بـ [ بنات صـاروا مُفتيات ] ..

اتمنى يكون وضح لكِ القصد..
.
.
أطيب تحيـة
.
آنسـة الخـريـف
miss autumn

تسلمي يا آنسة على هيك توضيح .. مشان الله اعزريني ..امبارح كان مخي مكركب ومو على بعضو..

هلّق فهمت واتضح اللبس ... بأه لا تآخزيني خيتو...

بخاطرك :)

..روز..

02-05-07, 04:36 pm

الحمد لله على سلامتكم

بس وين الجامعه هذي بالرياض ولا بالقصيم

ومبروك عليك الغياب ههههههههههه

الله يسلمك ..

في الرياض الجامعة مو في القصيم ...

والله يبارك فيك :)

خلف المعطف

02-05-07, 04:38 pm

الحمد لله على السلامه انتي وصديقاتك
تقبلي مروري

..روز..

02-05-07, 04:44 pm

الله يسلمك يابنّوتة ....مشكورة على المرور.

§¤~^~¤§ شوكلاته مالحه§¤~^~¤§

02-05-07, 07:32 pm

الحمد لله على سلامتك بصراحه اعجبني سردك للقصه روعه..

ابوقش

02-05-07, 07:50 pm

الحمد لله على السلامه ستر الله عليكم ..

اميرة الورد

03-05-07, 01:43 am

بصراحه فلم اكشن حلو
الحمــــــــــــــــــــــــــــــــداللــــــــــ ــــــه على سلامة الجميع

..روز..

04-05-07, 09:47 am

الحمد لله على سلامتك بصراحه اعجبني سردك للقصه روعه..

الله يسلّمك ...

وفرحت إن السرد أعجبك .. بعد لو تدرين إني كتبته كلّه يوم جيت أعتمده انحذف !!!!

ورجعت أكتبه من جديد وأفكاري أنواع الحوسة ..

وطبعا النفسية كانت جميييييييييييييييييييييلة ...

الحمد لله على السلامه ستر الله عليكم ..

الله يسلمك من كل شر

بصراحه فلم اكشن حلو
الحمــــــــــــــــــــــــــــــــداللــــــــــ ــــــه على سلامة الجميع

مسكينة راح عليك الفيلم :)

والله يسلمك من كل شر