(المعهد التقني للبنات)إستفسار

[ملاك الحبر]

موجودة..



بس أنتي كيفك ؟؟

تراني مدري وش نتيجتك...؟؟

خبريني


تراني ما أنسى أحبابي

واللي في نفس المكان اللي ندرس فيه

[قهررررر أحبه]

الله يرحم حالكن بس على الدراسه
أرحمن انفسكم مالكن بوجع الراس
شوري عليكن بطلن دراسه وخرابيط قبل لا تعنسن وتقولن ليتي وليتي , وإذا فات الفوت ماينفع الصوت
سبحان اللي خلقن يابنات ياحبكن للبهذله وأشغال النفس بغير فايده
عسى اللي ياخذ أعقولكن مايتهنابه
صدق اللي يقول بنات السعوديه مصريات .

تحياتي

[ملاك الحبر]

الغالي قهررر
>>شكرا على الإطراء
مصريات
أنت يعجبني فيك تفهمك
للمرأة وشؤونها في الحياة
لـــــــــــــــــــــــــــــــــــــــــــــــــ ـــكــــــــــــــــــــــــــــــــــــــــــــــ ــــــــــــن
الدراسة مو عائق أبد قدام الزواج والإرتباط
وغريب هالبلد يطري العنوسة لخريجات الثنوي أو طالبات الكليه


الله يعينهم

هالبلد ما يحب البنت اللي تنجز ... ودي أدري ليش!

أنا عارفه أن البنت لها مصير في الإنجاب والمسؤولية
ومصير مخلوقة من شانو ومصير أمومة رائع

بس ما يعني أنها انسانه بدون طموح وآمال

والشخص اللي بيرتبط فيها
إذا كان بجد يحبها راح يقدر هالشيء
ويسعى معها إذا كانت تستطيع التوفيق بين مسؤولياتها...
مو يحبطها
أو يحبط عزيمتها...
حقيقة: المرأة تنعشها هواياتها وسعيها وراء آمالها أكثر من الرجل...!!

بس ما ألومكم

أنتم هنا حتى الشاب ما فيه طموح
همه الاول والأخير من الدراسة الحصول على الراتب



والمجتمع الله يعينه على نفسه....

آل إيه..



تحياتي..........لك

[قهررررر أحبه]

أنتم هنا حتى الشاب ما فيه طموح
همه الاول والأخير من الدراسة الحصول على الراتب ..
عايشه لوحدي لا تحاولين تقولين أنو مو همك ألا الدراسه والتعلم
الراتب وما أدراك ما الراتب مايهمك
هذا كلام ينافي الصحه الله يعافيك
إذا سمعتك قايله هالكلام مره ثانيه بصراحه بنظر لك نظره إستحقار وتكبر ونفاق للناس .
لأنك بهذا تكابرين بكلامك وتحاولين تقولي أن الوظيفه مو كل طموحي .
ودي اصدقك بس مو قادر والله
لأننا بزمن الإنسان همه الأول والأخير البحث عن الماده فقط لا غير .
أما غيره يابنت الناس يخلف الله ..
وسلميلي على كل من طلب العلا وسهر الليالي ..

تحياتي لمن ملك حياتي

[*بدايعيه*]

هلا والله
" عايشه بوحدي "
كيفكـ ؟؟
ويسلموووووو على سؤالك عن النتيجه ...
الحمدلله ابشرك نتيجتي حلوووه
وان شاء الله دووووووووووووم
اخبار المعهد مافيه جديد عنه ؟؟

يقولون غيروا المناهج ؟؟

تحياااااااااااااتي


~~~~~~~~~~~

قهـــررر احبـــه

اقتباس: الله يرحم حالكن بس على الدراسه أرحمن انفسكم مالكن بوجع الراس

امين ويرحمك ويانا
ياخي قل لي وش نسوي نحط رجل على رجل وننتظر احد يصرف علينا
الدنيا الحين كلن همه نفسه .......ووووبــــــــــــــس

اقتباس: شوري عليكن بطلن دراسه وخرابيط قبل لا تعنسن وتقولن ليتي وليتي

وليه ابطل ... هذا يعتبر من طلب العلم ..ويكفيك قوله عليه الصلاه والسلام لطالب العلم وفضله
وحنا هنا من طلاب العلم

والعلم لا يمكن احد يشبع منه ... لو تظل طوول عمرك تطلب العلم ما راح تندم ابد

واذا على قولتك اعنس .. على الاقل اصرف على نفس وما اكون محتاجه لاحد

بعدين هم مافتحواها الا اكيد محتاجين عنصر نسائي بهالشغله

خصوصا انا هالايام بكل مكان وشغله فيه فرووع نساء
عندك ( البنوك - المستوصفات - الشركات - مدارس )

وكلن وله نظرته ورأيه ... وعنده حريه شخصيه

انا اقوولك مو كل الناس اللى يدرسون يبغون يتوظفون يمكن تسليه وقضاء وقت وخوووف من الفرااغ

وبيني وبينك البنت كل ماطالت اوقات فراغاها مو من صالحها راح ينعكس عليها وانت اعلم باللى يصير هالايام كلهم من الفراغ القــــــــــــــــاتل

وبعدين الوحده اذا خلصت دراسه وجلست بلا وظيفه تكون عاقله واعيه وفاهمه الدنيا صح ما ينخاف عليها...


وهذى وجه نظري ..

"وجه نظر لا تفسد للود قضيه "

تحيـــــــــــــــــاتي واحتــــــــــــــرامي

[ملاك الحبر]

مرحبا قهرررر
أعتبرك إنسان ذو اهتمام بالمجتمع
وشخص جدا يبدي رأيه وصراحته
بس بقولك أشياء

أساسا مافيه أنسان يرضى بوظيفة بدون راتب...
هي العامل والحافز الأول له...
وأكيد المادة بهالزمن كل شيء


لكن قبل ما يتوظف هل فكر بإنجازاته للمجتمع قبل الراتب؟؟
هل مجال دراسته كان مبني على طموح؟؟
هل يستمتع في عمله؟


اللي يفكر بالراتب(هذا مستوحى من كلامك لأنك دايم تطري الإحباط وأنه كل شيء مسكر

(ودي أصدقك بس مو قادر)
يعني كأنك تقول:
لازم البنت تجلس بالبيت بعد الثنوي

بالنسبة لتفكيري بالوظيفة هذا شيء أنت تطرقت له صدقني
ولا أنا كنت أكتب معلومات عن نجاحي وكنت أسأل عن نتايج البنات...

ليش تتكلم وكأني
نسبت إلى نفسي المثالية...
أبدا ما حبيت هالشيء


تقول أنظرلك نظرة استحقار>>>واستغرب أكثر وين اللي في كلامي ومبادئي وطريقتي في حياتي يستحق الإستحقار


أنا ما قعدت أكتب في جرايد وصحف عن نفسي
أنا كتبت كلامي
بعد كلمات جارحتني لنظرتك لمستقبلنا بسوداويه


الكلام اللي قلته عني بعتبره مشاعر إنسان تجاهي

هو حر بوجة نظرة
الوظيفة مع أنها كلام سابق لأوانه راح تكون حريتي الشخصية مستقبلا
بدون ما يوجه لي الآن نظرةنفاق أو غيرة،،وأنا لسا طالبة

مع أني توقعت أسمع مبروك النجاح
إلا أني سمعت كلام غير

أنا الحين فرحانه بلإجازة
والدنيا ماتسوى


ومشكور قهرر كلامك ناتج عن اهتمام

وبدايعيه مشكورة

ولاتحرومنا طلتكم



مع السلامة

[قهررررر أحبه]

أوف أوف ماشاء بعد ناجحه ..
ماشاء الله ألف ألف مبروك وعقبال تحققي كل اللي تطمحين له يارب .
صح لسانك على كل حرف كتبتيه
كلامك كله على العين والراس .
كل اللي ذكرتيه كلام حقيقي وواقعي لغيري أنا
أنتي ممكن تكوني فاهمه وش مقصودي من كلامي
بس ما أظن أن غيرك راح يفهم اللي أنا أقصده
مثل ماقالت بدايعيه بكلامها أن البنت تحاول أنه تسد الفراغ اللي هي فيه
وذكرت بعد ذالك قالت .. أحلا شيء أن الإنسان هو اللي يصرف على نفسه
كلام حلو وجميل من بدايعيه ..
عايشة لوحدي لو تلاحظين طريقة أسلوب بدايعيه وتصفيف الكلام كذا أنا أمشي معك برأيك
أسباب دراستنا .. ذكرت هي
أولآ ... سد الفراغ وتضييع الوقت .
ثانيآ ... لجل الوظيفه لكي أصرف على نفسي ما يكون أحد له فضل علي .
ثالثآ ... قالت للعلم .
هذا كلام صريح ومفهوم وهذا هو الواقع .
أما كلامك ياعايشة يعني فيه مبالغه نوعأ ما
لأننا بزمن ومجتمع ما يفكر ألا بالماده
أحنا بهذا الوقت كل واحد منا مضغوط نفسيآ وماديآ
مو قادر الإنسان أنه يكون له خلق يطلب العلم للتعلم أكثر مما هو مجبور عليه بدراسته
حتى الحاله الماديه صعب الحصول عليها في هذا الوقت ..
يعني الزبده من كلامي ولا راح أعمم الكل لا
تقريبآ 99% من اللي أنا ذكرت كلهم البحث لأجل الماده ..

تحياتي لمن ملك حياتي

[rymas]

مرحبا بنوتات كيف حالكم

اقصد كيف حالكن يا فتيات؟

بدايعية كيف تغيرت المناهج وش اللي صار فيها

[ملاك الحبر]

66 هلا ومرحبا...قهرررر
أول شي الله يبارك فيك

ماشاء الله عليك .. .. تتكلم بموضوعية أكثرمن بعض الأعضاء اللي أواجههم بمعنى أنك لا تخرج عن الموضوع ...
ولا تضيع الفائدة من النقاش ...

الكلام اللي قالته بدايعيه حبيبة قلبي.. أكيد طبيعي ومنطقي وللناس إختلافهم..
وأوضاعهم المختلفة.....وماكان فيه داعي أكرر كلامها لأنك قريته..

المجتمع مستحيل يكون ذو طبقة وحده..ووضع واحد .. وتفكير واحد...
تلقى
بنات ما يسمح لهم أساسا بإكمال الدراسة
بنات يدرسون للحصول على الوظيفة فقط...
بنات يقضون وقت فراغهم..
بنات يتسلون ويحبون سوالف الصبح والجمعة..
بنات يحبون حياة التعليم العالي والوناسة،،ومصيرهم غير مهتم فيه لدرجة كبيرة..
بنات تحتفظ بالشهادة عز لها ..وحتى يجي اليوم اللي تحتاجها فيه..
بنات يتوظفون ويتغير وضعهم مثلا بعد الإرتباط ..ويتركون الوظيفة...
وياما بنات وبنات...


أحس أنك حطيت للناس تفكير واحد...
مع أن الناس يختلفون...
انت حصرت تفكير المجتمع بشيء واحد(المادة)
مع ان المجتمع رغم تغيرات كبيرة فيه
مازال يحتفظ بالمخلص من أبناءة
مازال يحب الإرتقاء
مازال فيه الأمل
وفيه حياة جميلـــــــة بعيدة عن المادة..
فيه ليالي تحت القمر...مليانه اهتمامات ثانيه..
وفيه حب..

أنا والله عارفه حقائق المجتمع اللي انت تتكلم عنها...وأعرف حقائق ثانيه بعد تقهر وتجرح

بس أنا
عايشة بنصفين المجتمع الأثنين...
وما خليت واحد منهم يحدد مصيري..
القدر هو اللي بيحدد كل خطوة بحياتي...


أحيانا الناس اللي حولك يحكمون نظرتك للمستقبل...
لكن أبحر في الحياة و الناس..
عمر التشاؤوم ما يفيد..



ذكرت لك نقطة عن حب العمل والإستمرارية فيه...مع كونه في الوقت نفسه هدفك الأول للحصول على المادة..

إذا كان أخوي (....)هدفه الأول الأخير من وظيفته الراتب ...

ويتعب في دوامه..

(أعتقد أن الكثير أرهقتهم الدوامات)

لكنه يمــــــــــــــوت في عمله وطبيعة شغله..
وش اللي يمنعه أنه يخلي حافزه الثاني يحثه على الإستمرارية في العمل ويحب حياته أكثر...

ويحس أن يحصل على المادة بالوقت اللي لا يكره السبيل إليها
كل هذا كان مبني على طموحه .. وأهدافه قبل ..وحرصه على النجاح ,,
يتعب في الدوام ...بس يحبه...





(لن تعيش دون إدراكك لإختلاف الآخر)





تحـــــــــــــــــــياتي،،،

[قهررررر أحبه]

عايشة لوحدي
هلا وحده ونصف مرحبآ (( وأنتي أفهميها يا فهيمه
صدقتي والله وصح لسانك
وأنتي تتكلمين بهذه الطريقه تذكرت موضوع مقادير الحب ..
بس الحين أن فهمت عليك وفهمت وش تكون نظرتك للمجتمع في هذا الزمن
ومثل ما قلتي لي أنتي سابقآ إنك تعرفين وش يدور بخاطري , برضه أنا الحين أقولك أعرف وش اللي يدور براسك , وحده بوحده .
أنا يوم أخالفك بكلامك بقولتي إني أستحقرك لإنك أنتي تتكلمي عن مجتمع واحد عميتي الجميع بكلامك .
الحين أنتي حددتي أشياء في المجتمع ..
منهم لقصد الماده
ومنهم لسد الفراغ
ومنهم لأجل العلم والتعلم
ومنهم ما إلى ذالك
بكذا أنا أؤيدك بهذا الرأي وبقوه ..
بصراحه راق لي تعليقك الأخير
وبالذات وأنتي تتكلمي عن نفسك ..
كل ردك لي الأخير قمة في الروعه وبالذات عندما قلتي القدر هو اللي بيحدد كل خطوة بحياتي ...
أما قولتك لي أني فاهم ومهتم با أمور المجتمع , هذي كثير لي منها .. عارف أن هذي طنزه منك لي بس بمشيها من شان خاطر إحترامك لي وسعة بالك معاي .
أنا ما أقدر أناقشك بكل اللي كتبتي لإنك تتكلمي عن نفسك وأنتي أدرا بحالك
الكلام اللي ذكرتيه عن نفسك إذا هو حقيقي وصادقه أنتي فيه , بصراحه أنا أحسدك بكل ميزه تميزتي فيها .
وسلميلي على من خلفك و رباك .
عليك أسلوب الله لا يضرك وكلمات مفهومه وصريحه وتتناقشي بسعة صدر ولباقة بطريقة معهوده من كل ردودك في حسن التعامل مع الأعضاء ومهارتك بإقناع الطرف الأخر بثقافه غير موجوده في بنات هذا الوقت ..
أنتي مدحتيني بقولتك أني أفضل من بعض الأعضاء , وأن جيتي للحقيقه أنتي أفضل من هالشيبان اللي بالمنتدى بطريقة محاورتك من الأعضاء ...

فيه نقطه أنا ما فهمتها منك أو إنك نسيتي تكمليها ..
عايشة بنصفين المجتمع الأثنين...
وما خليت واحد منهم يحدد مصيري..
السطرين اللي فوق هم اللي أنا ما فهمتهم أو إنك أنتي قاصده هذا الشيء ممكن ..

تحياتي لك ولمعلوماتك الله يوفقك ..

تحياتي !!!!!!!!!!!!!!!!

[ملاك الحبر]

مراحب
مرحبا كل مالها تتقلص
حلو أنه وصلك اللي أقوله..
أجل الدنيا توحش..

ردي كان الموقف محدده والموقف كاتبه من كتابي

فيه نقطه أنا ما فهمتها منك أو إنك نسيتي تكمليه)))
عايشة بنصفين المجتمع الأثنين...)))))
وما خليت واحد منهم يحدد مصيري))))..

تدري ليه كتبت هالكلام

لأن عيني تشوف المجتمع بكل أشكاله
السيء والجيد
السلبي والإيجابي
الحلو والمر
الرائع والفاشل
التقدم والتأخر
المجال والامجال
الممكن والمستحيل

عيني ما تنظر لأفراده أو مشاكله أو عاداته بنظرة واحدة
ممكن تكون هالنطرة حلوة فقط..
وممكن تكون سيئة فقط

لــــــــــــــيش؟؟

لأنك إذا أحسنت الظن بقوة في زمن مثل هذا ...راح تصدمك الأيام بالناس اللي تواجههم
وإذا أسئت الظن بكل من حولك راح تتوقع الشر حتى بمواقف الخير ويسيطر عليك التشاؤم ولأن الحياة فيها سعاده


المجتمع خليط من نصفين

لازم تعيش وتندمج فيهم كلهم
تبتسم للخير
وما تسكت عن الشر


يعني مثل فيه ناس تحب المادة
فيه ناس المادة ما يحصلون عليها
وفيه ناس المادة لاتشكل سوى زاويتين من الزوايا الأربع في الحياة

وإذا واجهك إنسان ما عنده إحترام
بكرى تواجهه اللي إحترامه فوق وصفه



محد يحدد مصيري بوضح لك
ومن وحي المجتمع
1
إذا كان فيه إنسان ما يحب المجال اللي أنت تحبه ويعترف لك بهالشيء؟ ويحاول يكرهك فيه..ويسبه قدامك..

2
إنسان ثاني(مثالي بزيادة) يحاورك بموضوع الزواج ويقولك لاتختار فلانه.. فلانه مو من نفس المستوى الإجتماعي
وفلانه لا أبوها ما يعجبني
وفلانه من الربع اللي ما نحبهم
لازم تختار زين
وش يقول عنا فلان لو أخذت من الفلان
وكانت أسبابه غير منطقيه في رأيك

3
وإنسان ثاني يحبك
ومقصده الأول والأخير الخير لك
لدرجة انه يختارلك المجال الرائع في نظره هو
ويتوقع منك الموافقة
وأنت مستحيل تحب هالمجال

4
ولو حكيت عن سالفة ما مر عليها إلا أسبوعين
بنت
عمرها 23
والآن بتتزوج واحد مع علمها التام بأنه مدخن
مع إقتناعها التام بأنها لا تريدة
وضعه الإجتماعي غير مقتنعة فيه
مشاعرها هذي كانت من لسان قريبتها لي
لكنها وافقت على جرح
كبيــــــــــــــــر

5
سالفة الأم اللي أخذت سلفة عشان زواج بنتها
وأهل الزوج طبعا زواجاتهم هاي هاي

6
وأم خلت ولدها يدخل قسم غير راغب فيه وغير مطلوب وأسمع وش تقول
أدري أن هالقسم ماله مستقبل لكن كشكل إجتماعي لازم الولد ينقال عنه دخل الجامعة ولا هو بكيفه
بعدين يصير خير
مع أن ابوه كان مستعد يدرسه دبلوم بقسم مطلوب وعلى حسابه


هذي صور كثيرة
وشوف وشلون نصفين المجتمع تلعب بالقرارات الشخصيه وبالمستقبل
لكن
السالفة 1 فيه ناس يغيرون مجالتهم بسبب فرد من أفراد المجتمع
مع أنه قد يكون حاقد ومايبي لك الخير..
بيأثر فيك كلامه؟؟

السالفة2تلعب الناس بحياتك الشخصية على أساسات أحيانا رائعة بأسلوب اختيار الشريك..وأحيانا مباديء تافهه ممكن تضيع عليك فرص لا تعوض
قرارك الشخصي بموضوع مثل هذا يحدده المجتمع؟؟
وأقصد النواحي اللي تخصك مو المبادئ الأساسية اللي نعتز فيها

السالفة3أهتمام شخص يحبك..لكن ممكن يأثر على رأيك إذا كنت بتسمح له بتحديد مصيرك مع آرائه
بتخلي الإنسان اللي من النصف المعطاء بزيادة يحدد لك مصير؟؟

السالفه4خلت عيني تدمع
لأن البنت كانت تعيش فراغ كبير والعايله ما قصرو بكلامهم عنها أنها للحين ماتزوجت مع أنها عايشة بعز وكرامة ببيت أبوها
كان أساس الأختيار اللي حددوه لها أن الشخص يكون مقبول ولازم ترضى لأنها على أعتاب العنوسة
اعتبرت النصف القاسي من المجتمع حدد مصيرها
لأنها خنقها النظرة المتسائلة
والفراغ المنتظر
والكلام اللي إن ماكان من وراها كان في وجهها
أعرف أنها قد تكون فوتت فرصة مناسبة في الماضي وبسبب قد يكون مجتمعي أيضا
ولكن ماذنبها ياناس تلغي شروطها وتتزوج أبو سيجارة
المؤلم أنها في عز شبابها ..
هنا المجتمع حدد مصيرها


السالفه 5 لا تستطيع مواجهة أهل الزوج بحفل عادي..لسبب بسيط أنها لا تريد الظهور بمظهر أقل من هؤلاء ..لا تؤمن بالإختلاف الطبقي وستضع مايحلو لهم بالزفاف على حساب وضعها المادي
المتدني
جعلتهم يحددون مصير اختيارها لطابع حفل ابنتها في وقت قد يكونون متسامحين جدا من هذه الناحية



والسالفة6
ستنتبه الأم بأن نصف المجتمع الهائم في أسوار المستجدين من الطلاب
قد حدد مصير ابنها
ولكن متى؟؟
حينما يفشل في دراسته
أو يتخرج ولكن مع أمل زائف


هههه
أدري أنه مجلد
أعرف أني طولت عليك
لكني استرسلت في الكلام
غصب عني
وأتمنى ما يحدد لي المجتمع مصير وبحدد حياتي أنا حسب اللي يناسبني ويناسب أمي وأبوي الغالين مع إقناعهم بالإختلاف..ههه
.................................................. ..............
;;;;;;;;;;;;;;;;;;;;;;;;;;;;;;;;;;;;;;;;;;;;;;;;;; ;;;;;;;;;;;;;
أما الطنزة اللي تقول...ماهيب زي منت معتقد بلعكس من ردودك على موضوعنا أنا وبدايعيه أقتبست كونك تهتم بالقضية اللي قدامك بس الله وأعلم

أما طريقتك بين الأعضاء :أن الحديث يبقى بإطاره وما يطلع حتى تظهر النتيجة
أما اللي ألاحظه في البعض أنو يخرجون عن الموضوع بجدال طويــــــــــــل من دون أي فايدة
بعضهم لأنهم ما يقدرون يردون على بعض النقاط
فالسبيل الأول والأخير هو الهجوم والميل عن خط الموضوع
الله يديم عليك
تحيـــــــــــــــــــــــــــــــــــــــــــــــ ــــــــاتي لك
وشلون يكتب أصبعي غير ممشاي..!!

[قهررررر أحبه]

طيب وش يضحك أولآ ..
لا تصيرين وأنتي تكتبين هذا الرد وأنتي ميته من الضحك .. ممكن ليش لا ؟؟

طيب يا وحدانيه .. ياوسع صدرك وأنتي تكتبين ..
عليك ردود وتعليقات مروقه بالحيل يا حظك والله ..
مشكوره على كل اللي ذكرتي وما خليتي والله شيء لنا لكي نرد عليك فيه
جمعتي عباس مع دباس .. ماحطيتي لي ولا كلمه وحده لأجل أني أمسك معاها .
الله يوفقك وين ما كني وتشرفنا بحاوراتك الممتعه ..


خلص شكري لك !!!!!

قهررررر .........

[ملاك الحبر]

مرحبا...

الضحكة أكيد كنت أضحك
بصراحة .. قعدت أكتب وأكتب يوم شفت طول اللي أنا كاتبه قلت ما صارت وش ذا؟؟
وأضحك على نقاش طويـــــــــــــــــل مكتوب بموضوع استفسار حق دلوعة أخوها



بالنسبة لردودي ..يمكن لأن النت ما ياخد كل وقتي عشان كذا لا قريت شيء وأنا فاضيه
كتبت اللي عندي..ولو بفتحه وأنا وراي أشغال,, ما قدرت أكتب


عباس ودباس<<هذي العادة لازم أمثال بس أول مرة يمر علي



والشكر ما فيه ولا احتياطي...؟؟

مو مشكلة أساسية

أهم شيء كل واحد وضح ...
والصورة أكتملت..





(تحياتي)

[*بدايعيه*]

<< متابعه بصمت

عايشه لوحدي

ماشاء الله عليكـ عندك قدرة ع الاقناع اسلووبك ومناقشتك روووووووووعه

وربي يحفظكـ ويحميكـ

اقتباس: ويناسب أمي وأبوي الغالين

الله يخليهم لكـ يارب
خخخخخخخخ كفشتكـ ماصرتي عايشه لوحدكـ

~~~~~~~~~

قهر احبـــــــــه

اجل تقول ياوسع صدر عايشه لوحدي
المفروض الواحد وهو يكتب يعيش بجو هادئ عشان يركز ويطلع كل اللى عنده
لكن حنا ماعندك احد ...
انا الحين جالسه ارد عليكم وعندي التلفزيون مشغل وصوته عالي وخواني يلعبون ويصارخوون
<< من وين تبي الواحد يركز ويروق

والحيـــن خلاص
صافي بالبن ...

تــحــــيـــــاتي

[قهررررر أحبه]

هين أنتن صايرات مثل ضبان الصحراء تحملن الصعاب (( آيه هين