【:::عَلَى كَفْ اَلْزَّمَنْ ,, حَفَرْتْ اِسْمِيِ ..

[جمان البحر]

اليوم حسيت باحساس العجوز الي ماغير تشكى من عياله ,, وجربت احساس المقعدين حركياً ..

يوم راحوا أهلي لصلاة التراويح .. هجن خواتي للغرفة الثانية علشان يشوفن أفلام الكرتون ..

وقعدت لحالي بالغرفة وبلشة بعمري وشلون أبتحرك ..
ابي التلفون أبكلم الدكتورة وأسأله عن المعقمات الي صارفتهن لي .. وأبي لاب توبي من غرفتي فوق أبوسع صدري ..
وأبي الريموت حق التلفزيون لأن حضراتهن قامن والصوت مرفوع والموسيقى بدت تصدح عندي بالغرفة ..

أنادي أنادي وحلقي انبح ولا يردن <<<ياحسافة حشيمة أمس أثره بس طفه

قسم بآخر شيء خنقتن العبره ..
تخيلت المعاقين حركياً وشلون يخدمون أنفسهم لانزلوا من الويل تشير وماحولهم أحد ..
حسيت نفسي عجوز وماتقوى تحرك وعياله هاجينن عن ازعاجه وتناديهم وكل واحد يقول للثاني انت رد وهي ملطوعة بالغرفة ومنلهدة ..

بس أشوى أول ماجت أمي أدبتهن بديت لاطلبت من وحدة وعيّت هاشته وقالت ذي أختك الكبيرة قومي أحسن لك ..
واكتشفت شيء ثاني أضغط عليهن به ..
يوم فكيت الشاش عن رجليني علشان أعقمهن أومير يصارخن ,, الي بدت تصيح .. والي تتاوع ..
بديت لا قلت شيء ولا سونه أقول ترا أبرفع رجلي بوجهتس .. خخخخخخخ علشان يسون الي أبيه ..
حتى أمي مع انه تحب مناظر الدم والخرابيط ذي يوم شافتن عيت ترجع تشوفهن تقول رجليك صايرات من تحت زي وجيه مصاصي الدماء ..
ووحدة من خواتي قايلة قبله رجليك زي الأفلام الي تحبهن أمي ,, قصده أفلام الأكشن ..

بس قسم ياانا رحمت العجز ورحمت المعاقين بجد الله يعينهم ويهون عليهم ولا يحيجهم لأحد غيره ..

[جمان البحر]

اليوم الأول لنا في القرية ..
قررنا اننا نروح فيه لبحيرتين قريبات من القرية .. تقريباً 30 كيلو أو أقل .. بس مش أي 30 كيلو ..
ليش ؟!

الطريق وعـــر جداً ,, ملئ بالصخور ,, لفات × لفات ,, لكن ,, المناظر جداً رائعة .. والصور راح تكون أوضح بالنسبة للطريق وبالنسبة للمناظر..


بعد خروجنا من الشقة حاذينا النهر الي يصب في البحيرة و اخترنا لنا مكان على جانبه علشان نفطر ,,




ياحلو غط الرجلين بالماء البـــارد في عز حرارة الشمس .. وبيالة الشاهي رفيق جميل بهاللحظة





بسم الله بدينا بالمناظر الحلوة .. شوفوا الطريق كيف جداً خطير على الكفرات ..
ترا هالصورة أحبه قوه لأن الشباك ضربن وما ااهتميت وكملت تصوير ..
بس الانتل مبلشن كل ماصورت لازم يرتز بالصورة




المناظر الجميلة , والأنهار ,












ليت هالبيت البني الي قدام لي ,,






شوفوا ذولا ياحليلهم كاشتين ,, تخيلوا طرفيتنا كذا ,,





يتبع .. بس علشان ما أجمع الصور في صفحة وحدة و تصير ثقيلة ..

[جمان البحر]

هذا الشلال أو النهر الجميل ,,
مرة يصير فوقك ..




ومرة يصير تحتك





وشلون ؟


هذا الله يسلمكم حاطين صبه عنده علشان يقدرون يشقون الطريق ومايوقفون النهر والسيارات يمشن فوق الصبه والنهر ماشي ما وقف ..



بالله على هالصورة ما أستحق اني أنافس المصورين العالميين <<<ياشين الي شايف نفسه ..





والثلج على القمم بشكل جميل ..






وصلنا البحيرة الأولى ,, بحيرة صغيرونة اسمها أريقونا ..

توقف سيارتك وتمشي لها حوالي 700 متر على رجليك ..

العائلة الكريمة شادين الهمة ويمشون ..






البحيرة الصغيرة ,,




البحيرة من فوق الجبل ,,




نشبت بمكاني وقلت لاهلي ماراح أتحرك من هنا الا اذا قعدت على العشب الأخضر وبين الورد ..
سويت الي براسي وقعدت وخواتي قعدوا يلعبون ويجمعون من الزهور الي مالية المكان ويتخيلون أنفسهم بمكان هايدي





يتبع ,,

[جمان البحر]

اقتباس: الذين يشاهدون محتوى الموضوع الآن : 4 ( الأعضاء 4 والزوار 0) ‏جمان البحر , ‏مسـ بشويش ـرعه , ‏احلى دنيا , ‏ămōяẻ

ياهلا وغلا بكل الموجودين ..

شرفتوا ..

اقتباس: الذين يشاهدون محتوى الموضوع الآن : 4 ( الأعضاء 3 والزوار 1) ‏جمان البحر , ‏ابو ريما الخالدي , ‏منال الشوق

أهلاً اهلاً ..

نورتوا ..

[جمان البحر]

منظر من الأعلى للطريق الذي سلكناه .. ملتوي كأنه ثعبان ..





أهم أسباب ذهابنا الى هذه البحيرات هو وجود الثلج بجانبها .. لكن سبحان الله من شدة الحرارة في هذه السنة ذابت الثلوج القريبة من البحيرة الكبرى فاضطررنا للصعود إلى الثلج على أقدامنا والمغامرة لأن الأطفال أصروا على لمس الثلج بأيديهم ..

العائلة شادة الهمة بالصعود ..





صورة للأرض أثناء الصعود ..






وأثناء صعودنا شفنا منظر بديع للبحيرة الكبرى ,, بحيرة السمك ..










يتبع ,,

[جمان البحر]

وصلنا الثلج أخيراً ,,





وكتبت اسمي ,,




وكتبنا اسم الغالية ,,


تاج القصيم ..






البحيرة من الجنب أثناء النزول وتبيّن الصورة سيارة سعوديين كاشتين بجانب البحيرة ,,






صورة ثانية حلوة ,,





فنجال قهوة مع هالمنظر الحلو ..





شلال صغيرون بطريق العودة ,,






هذولي البنات ضحكت عليهم كثير ,, كنت أصور ولاهية بالكاميرا يوم التفت عليهن وأثرهن يمشن وهن منزلات روسهن ويناظرنن بأطراف عيونهن يحسبنن أصورهن ..
خخخخ شكل العالم مبلشينهن يصورنهن كل مامروا ..







الماء بكل مكان يمشي حتى بوسط الصخر والشجر .. شوفوا الماء من وين يطلع ..










وانتهينا من رحلة اليوم على خير ..


أعجيتنا المنطقة والمناظر لكن الطريق جداً سيء ..

[جمان البحر]

تراي أفرح بتعليقاتكم ..


هنا :

http://www.******.me/JamoOon22

[جمان البحر]

في طريقنا للبحيرة كنت قارية موضوع بالنت عنها ..
والرجال يقول يوم خلصنا من كشتتنا ووناستنا وحنا راجعين وحدة من الحصى ضربت الكفر وبنشر ..
يقول كان وقتها مطر والطريق صاير غرين ..
نزلت الرافعة (نسيت وش اسمها) ورفعت السيارة وبديت ازينها ..
يقول : انتبهت للوحل وجبت حصى كبار وحطيتهم تحت السيارة ..

وحنا نزين بالكفر ,, فجأة ,,


طاحت الرافعة ..


والحمدلله ربي ستر والحصى الي حطيت مسك السيارة ولا كان نبلش من يطلعها ..



طبعاً أنا يوم نقرر نروح كنت ناسية هي صارت له وين ..
وماتذكرت لين مسكنا الطريق ..

كنا كلنا خايفين وكان أبوي كل مانمشي شوي يقول الله يستر على الكفرات عسى مايجيهن شيء ..

وأنا أخاف أقول لأهلي السالفة ويعصبون علي ليش ماقلت من قبل .. فكنت بالعة لساني وساكتة وأدعي ربي اننا نرجع سالمين ..

وبعد ماانتصفنا بالطريق قابلنا سعودي ,,
وقال لنا : لا تكملون ارجعوا المناظر فوق زي الي تحت .. اللهم بحيرتين فوق ومافيهم شيء زود عن الي موجودة بوسط القرية والطريق زفت زفت وكان معصب ..
بس حنا ماسمعنا كلامه .. لأن البزارين مشتبين يبون الثلج ..
وماكنا متوقعين ان الثلج بيكون انحسر وذاب ومابقى منه الا قطع بسيطة ومرتفعة ويبي لها مغامرات مثل الي سوينا ..



وعقب مارجعنا ووصلنا الطريق الزين قلت لأهلي السالفة الي أنا قارية ..
وقلت لهم اني جاحدة عنهم لاني خايفة يتنرفزون زيادة من الطريق ويصيرون على أعصابهم أكثر ..

[جمان البحر]

اقتباس: الذين يشاهدون محتوى الموضوع الآن : 6 ( الأعضاء 4 والزوار 2) ‏جمان البحر , ‏كلوز , ‏فديكا بريده

اهلاً أهلاً ,, حياكم الله ,,


شرفتوني بحضوركم ..



ياهلا وغلا بكل من حضر .. حياكم الله ..

شرفني حضوركم ..

[جمان البحر]

●● ●● ●● ●● ●● ●●

ماشاء الله يادنو ..

ألف مبروك افتتاح المدونة القديدة يا بت ..
وعقبال ماتوصلينها الـ100 صفحة بسواليفك الحلوة الي زي الشربات ..

[جمان البحر]

مدونة أبو ريما من المدونات التي تعجبني وبشدة ..

فقد تميّز بعرضه للمعلومات المفيدة ولكن بطريقة خفيفة على النفس ..

بصراحة (تحسفت) كثيراً لأنني لم أكتشف المدونة وجمال مافي داخلها الا في رمضان ..


هنيئاً لك أبو ريما هذا التميّز .

[جمان البحر]

نوقف تنزيل صور شوي ,, ونرجع للسواليف ..

أذكر يوم كنت صغيرة .. يمكن عمري 5 سنين أو أقل ..

رحنا لجدة ,,وهناك دخلنا مطعم وحنا نطلب سألون أهلي وش تبي تشربين ؟!
قلت أبي بيبسي ..
وماش تقل ماجاز لأهلي ..
ساحرون منا مناك ,, يا بنيتي مايصلح البيبسي يخليتس تبتلين قصيرة ونحيفة .. ويطيح سنونتس ..
وأنا مصممة على الي أبيه << لو أنا من أهلي كان سطرت هالبزر كف وهجدته

ماش تقل أيسوا من ..
نادى أبوي الجرسون ..
يوم جاء أثره فلبيني ..
كان قصير لدرجة انه أطول من ذاك الوقت بشوي يعني يمكن طوله متر و20 سم أو أقل ..
جاز لي شكله وقمت ووقفت جنبه أبقيس طولي عند طوله ..
وأنا طايرة عيوني به ..
ياحليله أول مرة بحياتي أشوف رجال صغير
كنت أناظر شاربه و أناظر طوله وأنا مستغربه .. ياحليله ذاك الفلبيني تسيف اني بلشت به ذاك اليوم قوة ..
هنا أبوي استغل الفرصة ..
نكّت مع الرجال شوي .. كان بعض كلامه عربي وبعضه انجليزي فماكنت فاهمه كل شيء ..
وقال: شفتي هذا الرجال !!
أنا : ايه وش به ؟
أبوي : تراه قصير كذا من كثر ما يشرب بيبسي ..
أنا :
أبوي : حتى اسأليه ..
أنا :
واستطرد ,, هاه وش قلتي نجيب لك عصير ؟
قلت : ايه وبنفس طيبه وراضيه تمام الرضا .. لدرجة اني بغيت أقول لهم أبي لبن <<< هكوا علي

[جمان البحر]

نجرب أنشودة العيد ..

ألف ألف مبروك تمام رمضان ..

وعيدكم مبارك مقدماً ..

[flash=http://sub3.rofof.com/09tfkxo9/aydy.html]width=0 height=0[/flash]

[جمان البحر]

الحين أنتم تشتغل عندكم الأنشودة ولالا ؟!

[flash=http://sub3.rofof.com/09tfkxo9/aydy.html]width=0 height=0[/flash]

[جمان البحر]

قبل شوي قريت موضوع في قسم بريدة الخاص عن وصف الطرق وتذكرت موقف حصل لنا في الإمارات في شهر ذوالحجة الماضي ..

كانت هذه رحلتنا الخامسة لديار زايد وفي كل رحلة لازم نحوس شوي في دخلتنا و طلعتنا من أبو ظبي بسبب تغير الطرق والتحويلات والإصلاحات ..

في الرحلة التي سبقتها سجلت أسماء القرى التي يتوجب علينا اتباع لوحاتها لنستطيع الخروج من أبو ظبي باتجاه دبي بدون الدخول داخلها ..
ونجحت المسألة في طريق القدوم لكن في طريق العودة رأيت اللوحة التي يجب علينا اتباعها ولكن لم أتأكد من قرائتي لاسم القرية فقد خيّل لي بأنني أتوهم الاسم بسبب تشكيك البقيّة..

فاضطررنا للدخول إلى داخل أبو ظبي ..
وقبل التعمق فيها وعند أحد الإشارات توقف بجانبنا جيب في اكس آر فتح والدي نافذته وأشار لصاحب السيارة وكانت الأغاني تصدح من داخل السيارة ..
كان من في داخل السيارة شاب صغير السن لا يتجاوز الـ25 سنة هذا إن لم يكن أقل ..
لا أخفيكم أنني في داخلي قلت لنفسي : لا والله مارجينا خير شاب وأغاني وشلون بيقدر يوصف لنا !!
فتحت الإشارة فأشار لوالدي بالتقدم و الوقوف على جانب الطريق ..
توقفنا ونزل والدي ونزل الشاب ..
أترك الحديث هنا لوالدي كما سمعناه ..
يقول : سلمت عليه وسألته عن الحدود السعودية ..
بدأ بالوصف وقال أنت أخطيت المفروض تعوِّد مع طريقك الي جيت معه ..
يوم طول بالوصف ..
قال : تدري أخاف تضيع بالطريق لأنه كله تحويلات وحوسة واللوحات مب واضحة ..
خلّك وراي ..

ركب والدي السيارة وقال خلونا نمشي وراه .. جزاه الله ألف خير تكفل بدلنا على الطريق ..

مشينا وراه ومشينا ومشينا يمكن درنا على أبوظبي كله بكبره مشينا حوالي 50 كيلو ..
تضايقنا من طول مشينا خلفه وكلنا بصوت واحد قلنا لأبوي خلاص وقفه يكفي أبعدناه عن الديره ...
وقفناه على جنب وقال له أبوي خلاص جزاك الله خير بس وصف لي الطريق وأنت تيسر بحالك ..
رفض الشاب رفض قاطع وقال : أبداً ماراح أخليكم لين أوصلكم بعيد عن التحويلات وحوسة الطرق ..
انحرجنا منه بشكل كبير ..
يوم مسكنا طريقنا الي جينا معه وعرفنا معالمه وتأكدنا انه هذا هو وقف ..
وسلم على أبوي وقال له : أنا اسمي عبدالله التميمي .. أصولنا من السعودية لكن أجدادنا أتوا إلى الإمارات من قديم ..

تركنا ومشى وعيوننا كلنا على سيارته وحنا ندعي له إنه يحفظه لشبابه ولأهله ويوصله لهم بالسلامة وبالذات أمي الي ما أسكتت من الدعاء له .. خاصة مع سرعته الكبيرة كباقي شبابنا الله يصلحهم ..

بصراحة بهذه اللحظة حسيت إن من أكبر الأخطاء أننا نحكم على الشخص من مظهره الخارجي فقط .
وتعلمت درس مهم في أن النخوة والفزعة ليست بحاجة لشخص محافظ ولا متديّن وليست بحاجة لعمر كبير بقدر ماهي بحاجة لشخص مستعد لخدمة من يحتاج المساعدة بروح طيبه وبال طويل ..

والا فيه أحد يسويها ويمشي كل هالمسافة علشان ناس مايعرفهم !!


ربي احفظ عبدك عبدالله لشبابه ..واهده وأصلحه ..ويسّر له أموره أينما سار وأينما حل ,, كما يسّر لنا أمرنا ..