الى جميع كاتبات المنتدى

[بنت^العشرين]

[c] البدايه أبلغكم سلامي الحار الذي يغلي فأحرق يديني ولساني >> يحلفون ان له سنه ما طبت بريده خخخخخخ

هاك اليوم وانا افكر وغرقانه بالتفكير شوي وأموت بس أنقذتني ضحكه اختي المدويه تقول فيله مطلقه وطبعا مافي داعي اسألها عن سبب الضحكه لانه معروف اكيد طبت كوره الجيران عندنا وفشتها كالعاده خخخ كنت افكر >> خلصينا والا ضفي وجهتس .. طيب خلاص بقول لاتنفخون كنت افكر في مشكله عويصه يعاني منها مجلس سواليف وهو انه تقل عاير حارتنا كله قواطي قصدي شباب

انا من هذا المنبر الفت عنايه الاعضاء والعضوات باني سوف اقوم بالاجرأت التاليه للحد من مصاله شباب سواليف المصون وكرشهم خارج المجلس والجلوس خلف دريكسون القياده جنباً الى جنب مع اختي بردقانه>>> قاموا يتماعطون شوش بعض كل وحده تبي هي الي تسوق حريم ماش مستحيل يتفقون
وهذا الدستور الجديد


1 - معط السنت بنات المنتدى لين يتدودل لسانهم من خششهن عشان تكثر بربرتهن ويتنعنش المجلس

2 - منع حلق شنبات تماسيح المجلس ..علشان اذا بغوا يسولفون ينشب لسانهم في شنبهم ومعد يقدرون يسولفون .. ثم يسون تسجيل خروج ومعد يرجعون الا لين يتفاكون السنتهم وشنباتهم

3 - لابد من وجود عفريته عشان نرفع مواضيع البنات القليله ولا تروح الصفحه الثانيه

4 - مكتوب اعلى المجلس --->

( هذا القسم بإشراف : البكيراوي الجنرال مسافره بلازاد )
3 مشرفين نصهم من طوال الشوارب >> اسكتي يابنت ترى قرب شطبتس

وحنا !!! مالنا رب

لابد من تواجد مشرفه تفهم متطلبات البنيات المصرقعات وتحسسهم بالامان والاتنماء يعني لازم نروح مجلس المراه والاسره علشان نحس بالحنان وتجرجر خوياتها المصرقعات وتخليهن يسجلن بالمنتدى وبكذا تغطي النقص وتضطهد القواطي الي بالمجلس >> خوش مشرفه

5 - لابد من وضع رسوم جمارك للتماسيح علشان يدهم كبيره تاخذ مساحه على الكيبورد والصفحه تلاقي خط الواحد كنه كفر محترق

6 - بنحط على باب المنتدى سكورتيه لبنانيه حمرتن عطره وركبها فوشي علشان كل تمساح بيبي يدخل المجلس يشوفه عند الباب يفك معها وينسى ينزل موضوعه او رده

7 - لكل عضوه تتحفنا برد او تتكرم علينا بموضوع بمجلسناقبل تدحدر مع باب المنتدىالا كيسه الكراث الفرش الي تو البنغلاديشي مقطعه من مزرعتنا تحتريها عند الباب وعلى الكيسه كرت (( وردي )) انيق مكتوب بوه ..

(( سعدنا ببصمه كراعينك ))

8 - تغيير اسم سواليف الى سواليف على كيف الملوسنات او حل يرضى جميع الدببه قصدي العضوات نغير الاسم الى ازحفي حتى تنحفي >> بما ان القياده للبنات

9 - نبي نسوي خلطه مويه وكلوركس وصابون تايد واي عضوه تشوف عضو جاي وراز كي بورده نكب السطل بالممر حق سواليف ولا هو زالق وواصل المراقبين

10 - نبي نحط لوحه عند باب المنتدى ممنوع دخول المدخنين واكيد اباء البراطم السود بيتركون المنتدى علشان خاطر الزقاره

شاكرين حسن تعاونكم

مديريه السكري والكراث
معالي سعاده الفراشه
بنت العشرين
تشششششششششششششششششششششششششششش << توقيع

يسمونها بالبيت بؤرة خراب <<< لاحد يسأل وش معنى بؤرة لانهم يسموني كذا وانا قوطي بيبسي مادري وين الله حاطني بس أتوقع ان معناها قاهره الخراب يعني الخراب مايقربني ولا أقربه طبعاً هذا اللقب افتخر به كثيرا

خلاص يكفي بربسه .. والله جمجمتي (بسم الله عليه ) تعورني
وكل عام وانتم بخير [/c]