الصيف ضيعت الشطرطون .. ما قصروا ..مرمطون .. و صورون

[الحكواتي]

.

.

الشباب يســـ أبو شطرطون ــمونن

لأني استعضت عن ميدالية المفاتيح به

يعني بالمخباة .. حاطز .. بلا حراك عدا عن وزنه الذي يخف مع المشاوير

.

بس أمر الله فوق كل أمر

.

بالمختصر أنا بالبداية من مؤيدين نظام ساهر

سااااابقاً طبعاً

.

ولكن بعد أن بدأ يختل للعالم ، وأنا أولهم

خلف التريلات .. والجبال والطعوس والكثبان

أعلنت انشقاقي .. وسللت شطرطوناً شققت غمده

.

طبعاً شغلانه .. أستعمله بالطرق السريعة بس

ركب بعد التفتيش .. وشيل قبله

وهلم شرطن

.

وتمضي الخطوط والشرطنة .. والشيطنة

إلى أن أراد الله أن أوقف أشرطن بعد نقطة تفتيش

ويطنب لي صاحب سيارة صغيرة إكسنت .. عرفت إنه يبي

شطرطوني المبجل ذو المائة متر طولاً .. فابتسم بأدب وأنا مستعجل

الشطرطون لو سمحت .. قلت خذ .. هدية .. مع السلامة

.

وإذ بنقطة تفتيش على غير خبري .. وأصفط وأشيل

وأتجاوزها .. ولا به شطرطون .. وقلت أمشي شوي شوي

ماااااااااش حكتن رجلي ودست

فجأة

.

طررررررررررررررررع

.

من قو الفلاش

طلعت لي إشاعة بالمرتبة الخلفية

وصدع راسي

.

المفترض يوم سوو حملة مضادة لساهر .. تعللوا بأضراره على

الصحة ، كالفلاش مثلاً .. مهوب لوحات التنبيه و التغبي بكل مكان

.

إلا على طاري الصداع

حزنت على وقف بيع ، بنادول الأبيض

.

.

لأنه كان ناجع في العلاج .. وتلقاه عادي عند بنشر

أو .. محل سياكل ، أو مغسلة سيارات ينباع

.

يقولون يسبب الزهايمر .. أعوذ بالله

.

وأثاريني كنت أنسى الألم .. مهوب يعالجه

هو كرتونه ..

.

عموماً .. رجعت حزين للغبنة وليس للمبلغ

وأفتح المحفظة أشوف السهيمات .. إلا وهم لاطعيننا هواميرنا الأعزاء

بخسارة .. قلت : ملحق بعضه

وأسكر المحفظة وأطلع لمسجد المحطة ..

.

القريب من بيتنا بحي المنتزه الغربي

وأنا حقيقة لا أخلي وقت أو وقتين من الصلاة فيه

.

إما هروب من التزامات وتأخير جماعة مسجدنا وخاصة الشيبان

الله يطول بأعمارهم

.

أو هناك مباراة

.

للبلوز أو السكري

فرق بين الاثنين .. صحيح بس وش نسوي الشكوى لله

.

أو أبخشت بدري ..

.

صلى بجنبي واحد شباب ..

وبعد الصلاة قام يقضي كم ركعة ..

لفت انتباهي ... كومة أكياس صوف على رأسه

قصدي .. تقليعة الكدش الله يعافيه ولا يبلانا

.

الصراحة بحياتي ما عمري شفت مثله على الطبيعة

شي خورررررررررررررافي

.

.

شعره من نوع ليفة الحديد وبكثافة فضيعة

ولكم أن تتصوروا الصورة

مع كل سجدة .. أقول : هالحين يطق رأسه

أو يجيه انزلاق بالرقبة .. نحيف وأكبر ما به هالكوشة

.

الصراحة رحمته .. قلت : خل أسلم عليه بعد الصلاة

أشوف وش سالفته

.

ما كنت أبنصحه .. لأنه يبدو إن الشق أكبر من الرقعة

.

بس ..

أول سؤال كنت أبسأله

هل تواجه مشاكل تغذية خاصة مع وجود مثل هذا الكائن

قابعاً على دميجتك ؟

.

هكذا ببساطة ..

.

أبشوف وشلون تمت تغذية هالأدغال .. بس

.

وبعد أن أنهى صلاته .. لا حظت إنه ما قام

جلس يسبح ويهلل .. ثم قام يتسنن

.

يوم سوى كذا .. الصراحة

قمت أنا .. وقلت : واحد مهتم بالتغذية الروحية

مهوب بلش بالتغذية الجسدية ..

.

حنا شباب فينا تقصير ...

ولكن .. نظل دائماً قريبين

.

نبعد .. ولكن سرعان ما نعود .

شبابنا بحمد الله نشأ على الطاعة في مجتمع متدين

حتى وإن قصر أو أذنب .. يظل شباباً وللعمر أحكام

والشدة لا تأتي بشيء .. فللعقل حديث وللقلوب أوقات تتقبل فيه

فرفقاً .. وستجدونهم كما تحبون

.

.

.

.

.

بمان الله