بين ((الدلـــــــــــــــوخ ))..و ((الدوافــــــــــــــــــير ))..في كليات البنات

[مسافره بلا زاد]

بسم الله الرحمن الرحيم ...



السلام عليكم ورحمة الله وبركاته ...




هلا والله وغلا حياكم الله تفضلوا واستمتعوا بها المقارنة



تنقسم شريحة البنات في الجامعة الى عدة اقسام (ليست فقرية وغير فقرية )



وهي كالتالي ...




1- فئة الدلوخ ::...

وهم البنات اللي يكرفن بس مهنا بركة ولا فايدة من شغلهن ..اهم شيء تجي بدستة اقلام ملونة لكل محاضرة ,,وينقشن المحاضرة نقش حتى لو عطست الدكتورة كتبوا انها عطست ...ما يفكرن يغيبن والتطنيش ممسوح من قاموسهن ..ولو طلبت الدكتورة واجب الاسبوع الجاي جابوه من بكره ..بس في النهاية الكل ينجح الا هن فشششششششششششش راسبات ...ليه ؟؟ بصراحة مافي جواب ...لكن الغباء ابتلاء من الله ..




فئة المكتبات ::..


هذا النوع يعتمد على التلزق بالاستاذات دائما موجودات في الممرات امام المكاتب يدورن على اي سؤال ولو تافه علشان يسألون الاستاذة ...وما في مشكله عندهن يشيلن شنطة الدكتورة وكتابها ولو حصل لهم حبوا راسها ...بس في النهاية معدل هذي الفئة يعتمد على عدد الزيارات للمكاتب ونوعية الخدمات المقدمة للأستاذة غير كمية الاسئلة الغبية اللي يقولونها للاستاذة ونوعية المدائح والصفات الكريمة ..



فئة التطنييييييييش::..



وهذي الفئة تنقسم لقسمين ..أ) الدجة ....ب ) الفلة ...


وطالبات هالقسمين متشابهات تقريبا وفلسفتهن وحده وهي ...[gl]طنش تعش[/gl] ميزتهن الصرقعة والوناسة وسعة الصدر بالجامعة ومحلهن الصف الاخير في كل قاعة طول الفصل الدراسي وحضورهن لمجرد تسجيل الحضور ..والا هن في وااادي والاستاذة في واااادي واذا التفت لهن هزن روسهن على بالنا فاهمات ...اما قبل الاختبارات يسرعن لفئة الدلوخ علشان يصورن دفاترهن واذا واجهتهم اي مشكلة راحن لفئة المكتبات علشان يتوسطن لهن ..

والاختلاف بين القسمين يكون في النتائج ...لان بعضهن ينجحن بسهولة وبحظ يفلق الصخر ويسمون فئة (الفلة )..وبعضهن رغم كل المحاولات يرسبن فيكونن من فئة ((الدجة )) ..




قسم راااااااسبين راااااااسبين ::...


وهذولا البنات اللي ما يكتبن ولا يصورن دفاتر الدلوخ ولا يحضرن اصلا ولا يعرفن شيء عن المواد ..من بداية الفصل والكل يدري انهن راسبات ..وبعضهن معروفات في الجامعة منذ العصور القديمة وعاصرن اجيال كثيرة ..وغالبا تنتهي حياتهم بنهاية مأساوية بالطرد من الجامعة بسبب المعدل ..الا اذا كانت عندهن فيتامينات قوية ؟؟






قسم ((الدواااافير ))::..


وهذا القسم ما يحتاج لتوضيح ...نظريتهم في الحياة ((اموووووووت ..ولا اعطي واجبي لاحد )):4: دايم ثقيل دمهن ومكروهات من الجميع وفئة الدلوخ يكرهنهن من باب الحسد اما فئة المكتبات ما يواطننهن لانهن ينافسونهم على مكاتب الاستاذات ,,وفئة التطنيش ما يطيقون هالفئة علشانهن ما يعطن الواجبات الاحد ولا يقدمن المساعدة ...وفي النهاية معدلاتهن ... ...لكن علاقتهن مع البنات صفرررررر...ويمكن يكون شواذ من هذي القاعدة فنشوف دافورة محبوبة ومرحة لكنها نادرة ...وتحدث مره كل الف مولود ..



---------------------



ونصيييييييحة للبنات المعدل مثل الزواج قسمة ونصيب ...قضاء وقدر ... يعني يمكن تنجحين وبتفوق في مادة ما ذاكرتيها وما حضرتي محاضراتها ...وفي المقابل مادة تطلعين من اختبارها وانت ترقصين من الفرحه على بالك حاله زين لكن تفاجئين بالرسووب فيها (كفانا الله واياكم شر الرسوب ..)..






هذا الموضوع قراءته في احد المجلات ونقلته لكم وللمعلومية كل الكلام صحيح 100% ...





تحيا111111تي للجميع

:1:

[البكيراوي]

هههههههههههههههههه

حلووووووووووة

ما شاء الله عليتس ورا ما الفتي كتاب على هالموضوع !!

بس على فكرة انت من اي نوووووع ؟؟ ( طلعت الفضايح )

اما فئة الكتبات ههههههههه صراحة احسب هالعاده ذي عند العيال بس !! ما دريت انه وصلت عندكم ؟

بس تبي الصدق !! والله انه تنفع احيانا !!

وتسليمن على هالمشاركة !! اللي تهـبّـل !!

[مسافره بلا زاد]

هلا والله بمستر بكيراوي




تسلم والله على اطرائك وشرف كبير انه تشارك في هذا الموضوع ..



بالنسبة لي و الاعتراف بالحق فضيلة باقولها من اللحين انا من فئة الدجة اللي ماعندهم ماعند جدتي اصقع راسي بها المحاضرات على بالي فاهمة والله يجني صداع من كثر القرق وليته بالعربي الا بالانجليزي يعني انا سيم سيم ذا تشير اللي جالسه عليه والله يستر اما انتقلت لفئة رااااسبين رااااااسبين :3:



تحياتي لك :1:

[الكوماندو]

واللهي فلم وثائقي شيق الصراحة

ذكرتونا بايام النكد الله لا يعيده علينا

بس حلوة المعدل مثل النصيب

لا طبعا , متى ما نظمنا الوقت , الباقي يهون امره


استالافيستا

[ام المقداد]

هااااهاااااييييههههاااا>>>وحده تمصعت من الضحك
ترى تبي تستاثمين بي يامسافره ان جان روماتزم>>ماله دخل
موضوع رهيييب رهيييب ويوسع الصدر ...
وانا معك في هالتقسيمات لكنك نسيتي قسم يتواجد مؤخرا
في الجامعات والكليات وهم من فئة التطنيش ممكن تصنفينهم
بالصنف:
ج:عصابات المافيا
فيه اشكال الله لايبلانا مسوين فيها فتوات ويتقيوون على البنات ومتسلطين على الدوفير بالذات يمكن حسد فيهم ....
ولا مو موجودين عندكم؟
وبالنسبه للكلام هو صح 100% انا معك من ناحية تصنيف الطالبات ,اما من ناحية الرسوب والنجاح فهو 99,50 يعتمد على الجهد الذي يبذله الطالب...
ومثل ماقال الكوماندو تنظيم الوقت مهم جدا جدا للطالب ....
وتسلمين ياعمري على الموضوع
وآسفه على الاطاله
اختك
ام المقداد.

[بردقانه]

والله يا مسافره موضوعك يجننننننننن بس اني را يح اكون غير وقت الاختبارت تدرين ليش لان فيه بنات ما تعرفينها داخل القاعه وحتى السلام ما ترده عليك ولما تجي الاختبارات تصير حمامه وديعه معك والله ودقيتي يا مسافره على الوتر الحساس.. لا وعلى فكره كمان شكلك من الدوافييييير..

تقبلي اشواقي وفائق احترامي. بردقااااااانه

[كرباج]

هلا بالمراقبه الفكاهيه علشان اغثتس غث

دامنك لاحظت هالكلمه تراي كل يوم ابقوله

<<---- يدور اي شي على الاعضاء

وهاذي الصوره نيابة على الدلاوخ




اللهم لاشماته...................

ام عن موضوعك ايتها المراقبه حلو وصريح ومعبر

<<-------- بس هذا من فئه انتبهوا لاتقولون الدوافير بعدين يصير اشكال

عاد اتذكر ايام المتوسطه يوم كنت بسادس جيم بثانوية الشعله

اجلس باخر الصف وحط رجل على رجل عاد يجي لمي المدرس ويقول

عدل جلستك هاذي جلسه عاد اقوله لا هاذي نسخه اصليه

قديمه صح شكرا

لانطلع برى المنتدى نرجع للموضوع اشكرك وفعلا موضوع منقول بحنكه

بس ماقلتولي من اي نوعيه امثل انا

تشااااااااااااااااااو برظوا

[مسافره بلا زاد]

هلا والله بالكوماندو عقبال ماتصير لواء زي خلف بن هذال


اي ماشاء الله انبسط يا شيخ الله لا يعيده لانك متريح من زمان ...وبيني وبينك شف والله لو الدكاتره حطوا في بالهم طالبة انهم يرسبونها لو وش ما جابت يعني مثل ما قلت الدعوه قسمة ونصيب والتوفيق من رب العباد ...



===========


هلا والله بالطش والرش ...


اجل طلعتي زي الفولة اللي تمصع بطنها من الضحك والله هذا اللي ابيه يا بعدي ابيتس تضحكين لين يطير برج من راستس لا امزح والله يوسع صدرتس قبل بالعافية يا اوخيتي ولا يحرمنا من ضحكتس اللي تسوى الدنيا ومابه


وان تسان على قسمتس الجديد فالمعذرة لانه سقط سهونا ...تعالي بس شوفيهم قسم بالله تروعين كانتس بشوارع امريكا قصات الشعر والنظارات والسلاسل اقسم بالله تحوم تسبدس منهن والله تمشين وتقولين الحمد لله على نعمة العقل



وحياتس ربي الغالية ...الله يعين بس على الدراسة



تحياتي للجميع :1:

[مسافره بلا زاد]

هلاوين وغلوين ومرحبتين ببردقانوووووه

يا بعدي والله الله يصلحتس شايفتن مغنية ادق وتر لا امزح معتس اي والله يا البنات بعضهم انواع النذالة ولو بغوا شيء قسم بالله تودد لتس لو يحصل له حبت رجولتس ,,ايه والله الناس اجناس ..



بعدين تعالي وش الله يصلحتس شايفتن من الدوافير :3: والله الدفاره من صوب وانا بصوب قايلته للبكيراوي ادربي راسي بالمحاضرات واقول( يس ابسلوتلي تيشر) واهز ها الراس على بالي فاهمه :3: والله شر البلية ما يضحك ادعي لي الله يفتح على عقلي و يعدي ها السنين على خير بدون ما افحط فيهن



تحيا111تي يا حيا1111تي :1:

[~ ر و ز ~]

هلا والله مسافرة وش اخبارك

ههههههههههههههههههههههههههههههههههههههههههههه

صدقتي يامسافرة تحليل ولا اروع

اما فئة المكتبات عندنا منهن كثييييير لكن ياليتهن يطلعن بنتيجة ماتسوى مذلتهن :2:

طيب مافية فئة وسط
يعني بدون تلزق .. بدون تشدد .. بدون تطنيش بزيادة ..

احسن شيء انك تتقاسمين المواد الكتابية مع صديقاتك اما المواد الفهمية مثل القرمر وغيرة كل وحدة تمسك كتابة

يعطيك العافية مسافرة على هالموضوع الغييير شكل

تحياتي يالغالية ..

~ ر و ز ~