السلام عليكم ورحمة الله وبركاته، .،.،..،.،.،
🎁حكايتي ليست شكوى او دعابه للضحك
انما اعتبرها هديه لكل فتاة مقبله على الزواج🎁
تزوجت عائله تختلف نهائي عن عادات عائلتي وطباعهم وكل شي كل شي رغم انهم كلهم من ديره وحده
مادري ليش يتفاوتون بنمط الحياة
فحصل تصادم نفسي كثير معهم
خصوصا اني ساكنه معهم بجناح
<غرفة ودورة مياه>فوق غير مستقل
•••••••••••••••••••••
ام زوجي عسل
مشكلتها له نظام
الغداء والعشاء بوقت معين ماحضرتي
خلاص انتظري الوجبه الي بعده
طيب تعبانه
راحت نومه
مشغوله
مافي النظام نظام
الصراط المستقيم
مهب بخل والا قشاره لا حبيبه وطيبه وحشامه
لاطبعهم كذا
احيانا اجي من الكليه تعبانه ودي انام واتغدى العصر
لامافيه
تغدي مع الناس وبوقته ثم نامي
لو ماتصحي الا العشاء ماقالوا وينك
•••••••••••••
تأقلمت معهم
ومافيه العشاء
طابخه مثلا مطازيز
لابو زوجي
كل العائله يأكلون مطازيز
طيب يالغاليه مااحبه مااشتهيه😥
تخيلو مطازيز بعز الحرغصب ماتشتهينه
الشكوى لله ناكل مطازيز
ولامصيري انام جوعانه
ومااحب اقول لرجلي
من السوالف
احسه مغلوب على أمره
واهله وامه صعبه جدا
واردع نفسي اقول منب ميته جوع
اسكت
••••••••••••••••••••••••••••••••••
وخالتي له فضل علي مراعيتني بحكم اني ادرس بالكليه
ايام الاسبوع مااطبخ ولا اشتغل
والاربعاء اروح لاهلي وانام على الخميس
مافي الا الجمعه اطبخ
يفرحون الصغارخاصه البنات لاني ابطبخ لهم شي يناسبهم
مسقعه،.،.صينية دجاج.،.،.،مكرونة باشميل
أبوزوجي مهب كبير شبابي يفرح بكذا
••••••••••••••••••••••••••••••••••
احيانا تصفي على بسكوت ابوولد تذكرونه الازرق باحمراكله ونام هذا عشاي
خاصه لاصارالعشاء جريش
مااقدر اجامل
••••••••••••••••••••••••••••
مهب هنا المشكله
الطآمة الكبرى
كتب الله وحملت وصار وحمي
(بيض مسلوق)💥💥
فطوري وغداي وعشاي
كرم الله النعمه
•••••••••••••••
خالتي تتطلع احيانا الضحى للجيران واحيانا العصر تسير على امه استغل الفرصه اسلق خمس ست بيض
وارقيهن معي لغرفتي بقدر صغير بماهن وقدام المكيف
كلما جعت أكلت بغريفتي
والحمدلله الأمور طيبه
يوم جاء ذاك اليوم
الله لايعيدالشر الحين لافطنت له غصت بثيابي من الفشيله🙈
قالت خالتي
مهب معقوله طبق البيض بيومين يخلص وانا ماشوف احد يستهلك وين يروح؟ماهنا الا فهد اكيد يضف لاستراحته<فهد ولدهم جذع بالخمس طعش كذا>
🙈🙈جتن الصيحه من الفشيله
تحسبونن قلت لاياخاله انا
و اكيد تتعذرن اني متوحمه بس استحي
المهم
خلاص مااخذت بعده
••••••••••••••
ماش ابي بيض
قلت لرجلي السالفه
قال أمري وش تبين اسوي
الي تامرين به اسويه
قلت مافي الا تشري لي السخان الكهربائي وقدر صغير واسلق بيض بغرفتي
والحمدلله شرينا سخان وقدر
وانواع اللفلفه بالاكياس وحنا داخلين علشان مااحديعرف
المشكله البيض
وشلون يغبى
وصعبه نشري طبق كامل
بدا رجلي يشري عشر ويلف كل بيضه بمنديل
وبكيس وحركته هاديه حتى مايتكسرن
•••••••••••••••••
عسى ماوحاام
وبدأ التنفيذ
اطبخ كل الي اتوقع بيكفنن اليوم مره وحده علشان الريحه ورعب قلبي يرجف
والحمدلله نجحت العمليه
وعدت على خير
لكن السؤال
تتوقعون يشمون مني ريحة البيض ويسلكون لي؟
•••••••••••••••••
عاد مهب حسافه كسافة البيض
الحين ولدي من حفظة القرإن
الله يحفظه ويذوقني نفعه
••••••••••••••
والحمدلله الحين الي تطبخ بيض بغريفته بسرقه
ابشركم زانت اموره احلى واحلى
اسكن بيت ووظيفه وابناء وبنات
وراحت سوالف
•••••••••••••••
قارب الحياة يسير فقط يبي منا جرعات صبر مع حسن نيه وحسن ظن بالله
••••••••••••••••