اهداء لاخي خالد موب كفالة ولكن مواساة
بين أربع الجدران صرنا مساجين * صارت ليالينا علينا عجاف
اليوم كنه يا هَل الدين عامين * همٍ يجي قدمي وهمٍ خلافي
وين الربوع اللي على القلب غالين * من وقت سجني قلبهم ما يشافِ
والصدر ضاق وزود الهم همين * ولا حدٍ لحالي غير مولاي شافِ
وجدي على مكة وشوف الملبين * ناخذ فروض السعي عقب الطوافِ
وجدي على شوف النخل والبساتين * وشوف الرياض اللي بها العشب زاهي
وجدي على شوف الرمل والظلاعين * لصحصحاً تسفي عليها السوافِ
يا ماحلا مع شقة الصبح ما شين * معقب سيل الوسم والجو صافي
في داخل الغرفة عددنا ثلاثين * والزاد والوجبات ماهي نظافِ
شفنا الغبن من حجرة السجن والبين * واجسادنا صارت هزالٍ ضعافِ
من الغبن في ضامري مثل سكين * ولاحدٍ لحالي غير مولاي شافِ
يا وقتنا اللي غيرن الموازين * واشوف في سير الزمان اختلافِ
الشمس ما تشرق بوسط الزنازين * هل نورها في تالي الوقت طافي
نسهر طوال الليل مثل المصاخين * عفنا الكرى والجفن ماهو بغافي
الذنب وشو جاوبوا يالمصلين * لا تكتمون الحق بالله كافي
حنا نفرنا ننصر الحق والدين * ما رحت أدور فالعراق إنحراف
ما بيننا مهرب حشيش وكوكاين * ولا بيننا مدمن شرابٍ وهافي
يالله ياللي مالك الملك والدين * محدٍ سواك لوضعنا اليوم رافي
أنت الذي في علمك الزين والشين * * وأنت الذي سترك على الناس ظافي
عجل بفك قيودنا يالمساكين * وانك تورينا السعد والعوافي
عيش الشقا والخلق صاروا مريحين * لا نام خطو لاش مرقده دافي
الصبح يصبح مير منّا بدارين* أصارع أحزاني وأطوّي افراشي
السجن ما تبغاه قطم الشياهين * ينذل لو إنه شجاعٍ سنافي