جيبن ربع يمشي مع الطعس مرتاح
ما عرقله عسـر النفـود وغـرازه
يشبه لزورق فوق الامـواج طفـاح
عزمه قوي كل الصعايـب اجتـازه
ماشي على دربن تغشلته الاسمـاح
دربن ضرب قفرن عريضن عزازه
مربطن ما عضدوا لـه بالاصـلاح
متناسق التفصيـل عالـي طـرازه
بالقيض يشادي للخرينق بمصبـاح
ثاوي بوسط الظـل طـال التـزازه
ولجا الوسم قرناس يكفـخ لملـواح
طيرن شطير الكف عجلـن فـزازه
مع كل فجن بيـن الاقفـار سـواح
ياخذ معه مشـوار وقـت الاجـازه
ما يزلق بجيلان الاطعاس وينـزاح
يرسـم حوايفهـا سـواة الخـرازه
يدهل عروقن ما بها غير الاريـاح
تحرك غصونـن تخالـف هـزازه
ينسل مع كـل العسايـر بمـرواح
سلت كسر بادي بعـرض القـزازه
عزمه قوي لاعلا المطاليـع نطـاح
يشمر كما ذيبـن سريعـن قمـازه
او هو كما فزة بدن حـس باسـلاح
سمع الحساس وجاه صيـاد هـازه
ذيب الرمال اللي على الطعس وضاح
وصفه من طيورن كواسيـر بـازه
يا ما حـلا خيالـن بعيـدن اذا لاح
وغطا مغيب الشمس قـام ارتكـازه
مد الفضا كلـه بـه الرعـد رزاح
كل الرتـج بالبيـد يبـدا اهتـزازه
يهـل وبلـه بالعدانـه وينـسـاح
يمـلا محاجرهـا وقـاع ارتـوازه
يالله ياللـي موجـدن كـل الارواح
ويا محيي الاموات عقـب الجنـازه
ترسل لنا ودقن على كـل الابطـاح
وتفرج لنا يا رب مـن كـل عـازه
من جده ومكه اليا شـرق الاسيـاح
ومن مشمل سكاكا لجنوب المحـازه
