[align=center]فزّ الخفوق وقلت يالله عسى خير
أثر الليالي عاد غايب قمرها
مع شوفته نشوة و فزّة و تخدير
و عيون خلانً تعانق نظـرها
يتوق له قلبي كما فزّعة الطير
و الرجل كن اللي تحتها غـدرها
يا صبح عمري يا صباح التباشير
نوره ملئ قلبي و روحي غمرها
عقب الفراق اللي تعدّى المحاذير
يبّس غصون القلب جافي دهرها
ربّع بـروحي عقب ما هي معاسير
سحابة ً هلّت بقلبي مطـرها
و أسقَى بها زرعة هوانا بتقدير
غرسة غرام ً بالمحبة بـذرها
يا عاذلين العين و الله مخاسير
و اللي درَى عن حال عيني عذرها
تشوم عيني عن جميع الغنادير
و إن ناظرت عيني فؤادي نهـرها
يا ناس أحبه و المحبة مقادير
هـذا هوَى نفسي و هذا قـدرها
و الحب ماله يا أهل الحب تفسير
قـلبين و الله بالمحبة أمـرها
لا جيت اصوّر حالة الحب تصوير
و أرد عن حالي لخلّي خبرها
لقيت وجدي فوق كل التعابير
كن الشعر قطره و شوقي بحرها[/align]