لاجيت طيّب قالوا الناس مسكين
وإن جيت أقشر قالوا الله يشيله
ولاحدّتك دنـياك للـفـقر والدين
قالوا فقـير وحمّلوك الفشيـلة
ولاضحكت أيامك وحصلت قرشين
قالوا ترى نصّاب ياويل ويله
ولاجبت غلطة حطوا العيب والشين
وزادوا على غلطتك قاز وفتيـلة
ولاجاتك الزلّة وتاهت عناوين
قالوا ترى مجنون خلوا سبيله
ولا رحت مقفي مع رجالٍ مقفين
قالوا ترى المقفي ندور بديـله
ولاجيتهم بالجود وفعل الكريمين
قالوا يهايط كـل صبح وليـلة
وإن طحت خلوك العرب والمحبين
واللي يطيح فـ هـالزمن عزتيـله
قال الجمل لاطاح جته السكاكين
وكلٍّ على ذبحته بيشد حيـله
هـذي حقيقه قلتها وسط بيتـين
من شاعرٍ ساق البيوت الجزيلة
جرّبت في الدنيا وشفت الكثيرين
وأشوف هذا الوقت مافيه حيلة
الناس ماترضى ولـو تسكن العين
وصعبه تحقـق حاجةٍ مستحيلة ..