خواتي الصغار امس واليوم ممرحات عندي بالغرفة ..
ووالله ياهن متشققات من الوناسة ..ليتكم بس تشوفون أشكالهن وهن ينقلن فرشهن عندي .
متحمسات بقووووة ..
واليوم يقولن ميخالف ننام اليوم عندك بعد ؟!
قلت ايه ميخالف نامن .
تذكرت نفسي منول والله ياانا اعجز انام الليلة الي نبي نروح به لم خوالي من الفرحة اننا نبي نمرح عندهم ويصيرن هالايام تسنهن ايام عيد خاصة لاصارت به وحدة من خالاتي ..
ولا جت بنت خالي الله يرحمه وأمرحت معنا ..
قسم والله ياهو فله ..
عاد تو اناظرهن وأقول سبحان الله البزر يفرحه أي شيء لو هو بسيط وبالعكس يمكن أنفسهم تفضل الأشياء البسيطة عن التقنية الي متوفرة الحين .
ومن اللكاعة بي كل ماحتست وحدة منهن قلت له ضفي فراشتس ولا أشوف خشتس عندي ..
همن تقول لالا خلاص التوبة آخر مرة أبسكت .. 
ياحبيلهن بس .
جربوا وخلوا أخوانكم الصغارين ينامون بغرفكم ونزلوا أنفسكم لهم ..
اقعدوا معهم بالفراش وقصوا لهم قصة من قصصنا منول الي نسمعهن من جداتنا والحريم الكبار بالعائلة .
وبتدعون لي من كثر الفرحة الي بتشوفونه بوجيههم .